| Commentator |
Time |
Content |
Tag |
| 陳建良 |
2025-01-10T16:05 |
公開招股超額認購近6000倍，史上第3大「超購王」，全城瘋搶慨玩具新股布魯可(00325)今日(10日)首掛，股價表現十分對辦，更一度變成「紅底股」。事實上，近期招股慨新股，好多隻認購反應都好熱烈，雖然呢些熱爆新股上市後，唔係隻隻都對辦有好表現，但係咪反映新股市場係2025年可以全面復甦？ 勝利瑞柏基金管理合伙人暨投資總監陳建良相信，內地監管當局未來會為更多內企境外上市「開綠燈」，香港就係主要選項，加上依家係美國掛牌慨中概股，亦有誘因黎香港上市，呢些股份會成為新股市場慨催化劑，佢估計，今年港股慨新股市場將會比前幾年熾熱。 KL補充，雖然新股類型多元化，亦預期今年會好多新股排隊上市，但優質慨新股好難抽得多，質素唔好慨又未必會入飛抽，加上部分新股上市後跌穿招股價，所以佢傾向觀望新股市場，好少「落場」抽新股。KL又提醒，不妨多留意新式零售股，因為業務較創新會有較大市場。 |
|
| 陳建良 |
2024-12-27T15:32 |
港股係年底終於收復20000關，2024年收爐時，恆生指數有機會扭轉連跌4年慨劣勢，依家市場正靜待應該係明年3月召開慨「兩會」，而「兩會」前會進入政策真空期，點睇港股2025年開局表現？係咪傾向睇淡？ 勝利瑞柏基金管理合伙人暨投資總監陳建良估計，中央將因應農曆新年期間整體消費，以及春節假後復工數據做部署，若消費數據向好，就唔需要推咁多刺激政策，反之亦然，所以的確會進入一個相對冇討談空間慨時間。 KL續指，估計恆指明年較大機會呈橫行格局，但同過往慢慢飄落去慨橫行唔同，因為外資唔會係經濟岩岩復甦後，就即刻投資港股及A股，所以佢認為港股明年唔會升好多，但亦唔會出現資金大舉流走或沽空慨情況。 佢又預期，港股明年板塊輪動會幾明顯，唔同板塊會輪流炒上，而且係短線升完一浸就跌，所以較難捕捉政策市反彈，佢建議投資者明年僅適量參與，唔好太進取。 |
|
| 陳建良 |
2024-12-13T15:40 |
港股昨日(12日)反彈，因為對中央經濟工作會議有憧憬，其中，內需股表現最搶鏡，不過，中經會結束後，恆生指數今日(13日)又跌過，午後更一度插穿20000關，瀉逾400點，可能同會議仍然冇提及一些實質數字有關，大行亦指，對中經會冇再提及具體樓市去庫存措施有些失望。其實中經會結果係咪預期之內？ 勝利瑞柏基金管理合伙人暨投資總監陳建良指，市場對中經會有兩方面慨預期，首先係希望中央擴大財政政策，結果冇提及，其次係希望有實際數字交代，但亦都冇公布，就令唔少投資者開始質疑，之前提出慨政策係咪可以令房地產市場止跌回穩。 KL又指，其實市場由始至終慨關注點都係中央救市、救經濟慨措施，到底成效有幾大，依家比唔到個預期市場，有負面反應都係好正常，佢估計，恆指20000關好難守得住，但大市波幅年底好大機會慢慢收窄返。 |
|
| 陳建良 |
2024-11-29T15:34 |
國家醫保局昨日(28日)首次就醫保藥品目錄調整舉行新聞發布會，並係會上公布2024年國家醫保藥品目錄調整情況及新版醫保目錄，醫保局指，會以「前所未有慨力度支持創新藥」，背後原因係咩？整體又對中國藥企有無幫助？ 勝利瑞柏基金管理合伙人暨投資總監陳建良指，內地首次舉行發布會係想表示國家會支持醫療板塊，令市民能夠買到新生物製藥。此外，醫保局亦容許新生物製藥適量加價。整體而言，國家希望令內地醫療水平上升，市民對未來慨憂慮減少，從而帶動消費上升。 KL續指，美國生物安全法案雖然禁止美國生物公司同中國企業合作，但歐洲一些福利較為完善慨國家，仍然需要靠中國生物製藥公司提供廉價藥物，因此，KL認為法案令美國藥廠成本提高，最終係損害緊美國，相反對內地其實係有利。 |
|
| 陳建良 |
2024-11-15T15:57 |
特朗普(Donald Trump)勝出美國總統大選後，內閣及主要官員提名陸續曝光，睇返呢份名單，班底都係特朗普忠實支持者，而唔少都係對華強硬慨人士，特朗普又揚言要打倒「深層政府」及掃清「官僚主義」，點睇呢個「特朗普2.0」班底？ 勝利瑞柏基金管理合伙人暨投資總監陳建良表示，對華鷹派慨魯比奧(Marco Rubio)獲提名做國務卿後，拖累恆生指數周二(12日)失守20000關，不過，KL認為唔使太擔心，因為民主黨同共和黨做法唔同，民主黨偏向透過各部長及官員同中國溝通，而魯比奧就偏向兩國政府元首直接對話，所以最終重要慨事務，較大機會由特朗普直接同國家主席習近平溝通。 此外，Tesla行政總裁馬斯克(Elon Musk)、企業家拉馬斯瓦米(Vivek Ramaswamy)將會聯手領導新成立慨「政府效率部」，KL認為，馬斯克將會大刀闊斧削減政府龐大慨開支及人手，有望令美國高企慨赤字回落，支持美元強勢，間接控制通脹。 |
|
| 陳建良 |
2024-11-06T16:42 |
若特朗普(Donald Trump)勝出美國總統大選，入主白宮，好有可能會隨即對華加徵關稅，對中國企業影響大，中央又會怎樣應對？有機會加碼刺激？ 勝利瑞柏基金管理合伙人暨投資總監陳建良指，加徵關稅主要影響中國出口企業或部分科技企業，因為晶片可能會受到限制，中央會加大財政政策，集中刺激內需，部分美國零售企業依靠中國內需，例如蘋果公司(Apple Inc.)及Starbucks。除了加大財政措施，中央亦會加大力度興建及推動科技及電訊基建。 |
|
| 陳建良 |
2024-10-18T16:27 |
港股近期坐過山車，恆生指數急升完又急挫，早前由17000點衝上23000點，之後又回調，恆指昨日(17日)一度插穿20000關，期間，有唔少外資留意返內地及香港市場，臨近年尾，外資開始部署明年資產配置，會唔會增加返中資股配置？ 勝利瑞柏基金管理合伙人暨投資總監陳建良認為，外資肯定會提高配置中國股票慨比例，因為從唔同跟資產配置有關慨會議中得知，唔少全球大型資金對中資股慨配置係市非常低，對沖基金更沽空股票，經歷今輪急升急跌後，估計資金唔敢再沽空港股及中資股，因為隨時有政策推出再刺激港股向上，因此，沽空A股及港股慨力度暫時偏細。 KL又話，資金重新流入A股及港股後，大部分都持觀望態度(wait and see)，但由於本身對A股及港股慨配置少，令資金傾向增持而非減持，加上美國總統大選臨近，加上中央係財政政策方面，未來會落實更多措施，相信外資2025年配置中資股慨比例將會上升，帶動A股及港股造好。 |
|
| 陳建良 |
2024-10-04T16:08 |
中央以出乎市場預期慨力度救市，令A股及港股牛氣沖天，截至8月底止，全球基金配置中國市場水平偏低，僅約5%，但隨出內地上月推出多項重磅救市措施，配置水平應有所回升，到底基金完成配置未？市場對救市力度係咪有信心？ 勝利瑞柏基金管理合伙人暨投資總監陳建良指，主動型基金配置至8月底係5%，可能係基於唔同原因Short左A股或港股，Short港股那些如果下面冇平倉都夾死左，所以估計那批應該已平曬倉。不過，如果要去返一個合理慨比重，情況應該要持續，又認為相關配置應該未完。 佢又話，當中央慨招數盡出後，就要觀察兩樣野，首先係政策力度係咪符預期，因為市場預期一直升溫，如果力度比預期大，個市會再抽上去，但可能好快就轉弱，如果力度比預期細可能會回調，所以係考驗決策者點樣拿捏市場及民眾慨水平。佢認為，現水平應該係未加完倉，但會唔會不問價咁加倉，佢估計，第一下可能已完成左大部分。 KL續稱，長倉基金配置唔會好心急，會等回調買入(Pull Back)，亦會趁呢個浪睇下邊些股份或經濟面會受惠，主要係仲有時間，同埋長倉配置唔可以齋睇momentum，雖然整體升浪未完，但現階段需要先抖一抖。 |
|
| 陳建良 |
2024-09-20T15:28 |
美國啟動減息周期後，港股連續第2日顯著造好，恆生指數衝破18000關後，升勢持續，今早(20日)一度突破18300點，升勢亦有成交配合，呢浸升浪算唔算有驚喜？ 勝利瑞柏基金管理合伙人暨投資總監陳建良指，港股今轉反彈幅度的確比想像中大，雖然成交增加，但同大市波動關係唔大，加上短期始終擺脫唔到上落格局，投資者對反彈慨態度亦變淡，所以今輪升勢唔算特別有驚喜。 KL又話，恆指依家慨反彈幅度唔會再好似4月、5月咁，唔好睇得太樂觀係呢個時候追貨，建議投資者今日做返止賺動作。 |
|
| 陳建良 |
2024-09-11T14:58 |
港股今日(11日)一度失守17000關，其後走勢反覆，事實上，港股一直冇乜起色，下半年係咪都好難樂觀？不過，美國聯儲局快將減息，如果唔係因為經濟衰而減息，理應會利好股市，港股可唔可以受惠？ 勝利瑞柏基金管理合伙人暨投資總監陳建良估計，港股下半年高位已經見左，即7月中高位，但下半年低位應該仍未見，估計最差慨情況下恆生指數會跌穿16000點，但再急挫機會亦唔大，始終估值低，但市場對內地經濟及企業盈利利前景都睇唔透，係資金唔太充裕下，恆指未來仍會「彈下跌下」。 KL又話，港股主要賣點係平，但睇返消費、經濟增長等數據，都擔心內地再陷入通縮，事實上，情況的確係唔明朗。 |
|
| 陳建良 |
2024-08-30T16:25 |
整個人工智能(AI)行業都睇住英偉達(Nvidia)份業績，雖然交到貨，但市場對Nvidia及AI行業慨期望愈黎愈高，AI行業開始達唔到市場慨高期望，對美股後市有咩影響？AI仲係唔係熱炒慨主題？ 勝利瑞柏基金管理合伙人暨投資總監陳建良指，相信納斯達克100指數今年已經見頂，道指及標指近期都係頂部徘徊，市場會形容為「板塊輪動」，美國聯儲局係通脹未完全受控之際開始減息，資金會轉投小型及價值型股份，2000年科網股爆破時都出現過「板塊輪動」，當時資金流出科技股，投資者要留意全球資金流出增長股或AI股，轉投估值較平兼高息慨股份。 |
|
| 陳建良 |
2024-08-16T16:02 |
長和系已陸續派發成績表，其中，長和(00001)及長實集團(01113)昨日(15日)公布業績後，股價今日(16日)向下，雖然市場對中期息減少有些失望，但未至於感到意外，面對現時慨經濟環境等因素，未來息率又點睇？有興趣入手長和系慨投資者又應該點揀？ 勝利瑞柏基金管理合伙人暨投資總監陳建良指，集團指派息係因應業務重估而定，長和及長實業務平穩，但仍面對頗大挑戰，股價折讓左唔少，希望公司可以定期派息，但認為派息係全球經濟放緩下，仍有機會再減少，不過，係現時慨經濟環境下，長實及長和營運已經做得非常好，只係市場任由股價繼續折讓，所以會對派息失望。 揀股方面，KL就話，長和系之中可以考慮入手港燈(02638)，其次係長江基建集團(01038)，值得留意係，長建下星期會係英國第2上市，有助提升成交量及減少折讓，收購及集資渠道亦會增加，都對股價有利。佢又認為，長建現時估值偏低，但相信市場會給予長建更合理慨價值。 |
|
| 陳建良 |
2024-08-02T17:51 |
最近投資市場氣氛及市況明顯轉差，加上美國最新公布慨經濟數據唔理想，對美國經濟陷入衰退慨憂慮升溫，令聯儲局會9月開始減息慨機會進一步增加，今年餘下慨3次議息會議，甚至有機會每次都會宣布減息，美股後市都好難樂觀？ 勝利瑞柏基金管理合伙人暨投資總監陳建良估計，美股應該已進入熊市，3大指數都已經見頂，過往冇通脹時，利率可以一次過減到零救市，但依家通脹仲未落到2%慨目標水平就開始減息，反映聯儲局今次「彈藥」有限。 KL又話，依家正值美股業績期，暫時出左慨業績有好有壞，但市場整體都係傾向睇淡，加上市場都心知肚明美息唔會不停減落去，所以焦點即時轉移睇返經濟轉差慨倩況會維持幾耐，因此，佢估計，美股應該會再調整得深些。 |
|
| 陳建良 |
2024-06-21T16:15 |
美股3大指數昨晚(21日)個別發展，其中，標指及納指創新高後倒跌收市，主要受人工智能(AI)晶片股王英偉達(Nvidia)股價大幅波動影響，Nvidia昨晚早段再破頂，但收市倒跌3%，係咪同「四巫日」(Quadruple Witching Day)效應有關？ 「四巫日」即指數期貨、指數期權、個股期貨及個股期權同日結算，於每年3月、6月、9月、12月的第3個星期五進行，而今晚(21日)就係第2季度慨「四巫日」。 勝利瑞柏基金管理合伙人暨投資總監陳建良指，Nvidia屬於大市值股份，股價兩個月前仲升1倍，唔排除美股指數會係短時間內形成一個「階段性頂部」，而「四巫日」最大影響係，當中有好多價內期權(in the money call option)到期，相信大市之後會變得波動。 至於應唔應該趁低吸納Nvidia，KL又話，Nvidia升到咁高，帶挈唔少類似慨晶片股一齊升，但睇Nvidia呢隻股份最好小心些，現階段唔太建議趁低吸納。 |
|
| 陳建良 |
2024-06-14T15:33 |
周大福(01929)全年業績出爐後，股價今朝裂口低開，早段更一度急挫10%至逾3年低位，低見8.47元，午後仍跌約9%。 市場原本憧憬周大福派發95周年特別息，但最終落空。其實，集團現金及等價物已經連續2年減少，於2024財年減少40億元至約76億元，集團亦解釋目前市況波動、利率高企，需要更穩健地管理財務。 周大福2025年財年指引營業額按年持平或小幅增長，勝利瑞柏基金管理合伙人暨投資總監陳建良認為，市況不穩下趨向更保守的經營策略，雖然對公司長遠發展有好處，但現時投資者傾向短線獲利，當公司業務狀況短期內未見明顯好轉，便會借業績消息回套。 KL續指出，周大福估值不算低，預測市盈率(PE)逾11倍，加上市場難以判斷公司造黃金淡倉，是單純為了對沖金價波動，還是趁機賭金價升跌來獲利，憂慮今年業績繼續受累相關投資虧損，而選擇先行沽貨離場。 |
|
| 陳建良 |
2024-06-05T18:47 |
摩根士丹利最新一份有關內地經濟慨報告提及，內地新盤仍有需求，內房爆煲程度亦唔及1990年日本泡沫經濟爆破咁嚴重，救樓市對內地經濟可唔可以走出困局極之重要，係咪要等到7月三中全會先會再出招？之前會唔會再出台刺激經濟政策？ 勝利瑞柏基金管理合伙人暨投資總監陳建良指，內地救樓市慨政策變得較鴿派，令樓市唔會大跌，依家內房慨情況已穩定左，所以房企連環倒閉慨機會好微。佢又話，三中全會一般都會有政策出台，但落實需時，KL建議投資者要繼續觀望，同埋唔應該持有太多貨，但亦唔需要清倉。 佢睇好慨股份大部分唔係指數成分股，首先呢些股份市值唔會太大，通常唔超過500億元，其次係股價接近52周高位，即使恆生指數跌到14000點，呢些股份抗跌力較大，最後係唔會受內捲影響太大，海外業務又增長快。 |
|
| 陳建良 |
2024-05-24T16:47 |
美股上周破頂，其中，道指衝破40000關，港股亦自低位反彈3700點，不過，美股昨晚(23日)因經濟數據強勁，令市場減息預期再降溫，拖累3大指數全線跌，其中，道指收市瀉逾600點，單日表現係1年最差，標指及納指跌幅相對溫和，港股今日(24日)都要跌，暫時已連跌第4日，出現呢輪調整係咪都唔意外？ 勝利瑞柏基金管理合伙人暨投資總監陳建良指，唔可以用「調整」形容近日慨跌勢，依家唔係牛市，更應該以「升市」去看待，因為牛市意味股市跌就要撈、升都唔減持，相反，係「升市」期間跌就要減磅。 KL認為，港股4月底展開慨升浪已經完結，依家要視為跌市，所以唔係「調整」，而係跌市開端，至於會跌幾多，睇返港股過往慨模式，「升得快，跌得慢」，相信唔會跌得好急，股價會先反覆波動，估計最少會跌到17000點水平。佢又提醒，唔夠貨或買夠貨慨投資者不宜撈貨，尤其係指數股。 |
|
| 陳建良 |
2024-05-10T15:54 |
中央擬再出招撐港股，《彭博》係港股昨日(9日)收市後報道，指內地考慮減免內地投資者炒港股慨股息稅，瑞銀及中金清楚列出現行慨股息稅政策，內地投資者最多會被徵收28%股息稅。雖然消息仍未證實，但港股今日(10日)表現興奮，恆生指數一度飆逾450點，逼近19000關，港交所(00388)股價更一度衝高8%，一旦落實推出，利好作用真係咁大？ 勝利瑞柏基金管理合伙人暨投資總監陳建良指，其實只有內地個人投資者及證券投資資金，透過港股通投資慨紅籌股及非H股慨中資股，先會雙重徵稅，H股就完全冇關，所以真正受惠主要係投資高息紅籌股慨內地個人投資者，股份就包括中國移動(00941)、上海實業控股(00363)及中國建築興業(00830)，科技股就差少少。 KL又話，係現時資金輪動，冇特定趨勢下，如果想入市或追貨，就建議追落後股，因為緩衝空間大些，不過，大落後慨板塊就比較危險，例如內房及電動車板塊。 |
|
| 陳建良 |
2024-04-26T15:58 |
港股氣勢強勁，今日(26日)恆生指數已經連升第5日，而且有好多板塊都升，連最冇人吼慨內房股都大升，點解會咁？仲有冇邊些股份或者板塊可以吼？ 勝利瑞柏基金管理合伙人暨投資總監陳建良指，內房股跌得太殘，所以會少些「淡倉」，加上普遍市場會認為「跌得殘，彈得快」，而港股又平，所以好多人入手。佢話因為恆指較多成分股，所以認為恆指會比科指反彈得較慢，而如果恆指升穿18000點，科指就應該會有起碼4000點。 KL提醒要避開以往較強勢、較多人入市慨板塊，例如電訊股、銀行股，呢些之後會較落後，甚至冇得再升，反而之前落後慨科網股，可能有機會追上可以留意下。 |
|
| 陳建良 |
2024-04-19T16:35 |
網上串流平台Netflix昨晚出左上季業績，雖然盈利及收入都好過預期，付費用戶按年增長近16%，但股價盤後挫近5%，係咪同集團明年第1季開始，唔再披露用戶數據有關？ 勝利瑞柏基金管理合伙人暨投資總監陳建良認為，Netflix業績唔算好差，投資者主要留意收入(revenus)及每股盈利(EPS)，對Netflix呢類增長股黎講已算交到功課。至於集團明年開始唔再公布每月每戶平均收入(ARPU)及subscription number等數據，相信係預期呢兩個數據增長未必太勁，主要同全球化及唔同地方有唔同定價有關。 KL又指，雖然Netflix係美國streaming TV龍頭，但唔係冇競爭，長遠而言，增長係咪可以持續？佢認為，Netflix收入增長會放慢，反而專注係cost cutting。 至於「科技7雄」(Magnificent 7)餘下6家公司會陸續出業績，佢相信都會係好壞參半，市場應該唔會只反映中東局勢，仲會包括之前爆炒慨人工智能(AI)相關企業慨業績係咪交到貨，以及美國聯儲局會唔會掉頭加息，估計美股後市都係傾向向下Chock。 |
|
| 陳建良 |
2024-03-22T16:56 |
瑞銀昨日(21日)有份報告，將中資股依家慨情況，同2015至2016年復甦時期比較，因為情況都幾類似，包括中央放寬內房政策及銀根、嚴格監管IPO、禁止沽空及「國家隊」入市，如果對比2015及2016年，中資股後市會步入復甦期，還是繼續反覆？ 勝利瑞柏基金管理合伙人暨投資總監陳建良指，今年1月股市「窒息」，流動性不足，尤其係藍籌表現認真麻麻。依家流動性恢復返，公司多左現金，派息及回購能力亦都高左。對比2015至2016年，最大分別係地緣政治，當時冇咁複雜，美國總統奧巴馬(Barack Obama)同中國關係良好，加上內房危機影響財富效應，對A股及港股都有影響，係需時復原，依家全球利率亦比當時高，呢3個因素會壓低估值，令公司健康左之餘，估值又冇之前咁高，所以呢段時間會有一些股份進入復甦階段，而另一些就會持續反覆，經濟層面會分化，所以個市唔會一面倒或全面上升。 |
|
| 陳建良 |
2024-03-08T17:57 |
京東集團(09618)日前公布去年第4季業績，全年收入按年增長約4%，經調整純利升約10%至84億人仔。雖然經調整淨利率按年升10個基點，但已經低至2.7%，野村證券亦警告，京東今年利潤率或受壓，原因是京東自去年中起加大投資，例如增加補貼及降低免運費的門檻。 京東一直面對阿里巴巴(09988)、拼多多等同業競爭，勝利瑞柏基金管理合伙人暨投資總監陳建良表示，呢份業績側面反映內地慨內捲情況已蔓延到網購行業，又指內地電商市場已進入全面競爭狀況。佢認為，內捲係未來大趨勢，因為內地政府樂見電商業界內有一定競爭，當各電商平台打價格戰吸客，普羅大眾可以從中受益，用更低廉慨價格買到商品，提升整體生活水平。 |
|
| 陳建良 |
2024-03-01T16:15 |
航運股太平洋航運(02343)昨日(29日)收市後出左業績，今日(3月1日)股價低開逾3%，但好快已轉升。集團去年收入及純利按年跌30%和84%，單計去年下半年亦大幅倒退，但勝在派息吸引，下半年股息率有2.5厘。管理層指，首季整體運費仍然唔錯，日均租金明顯高於收支平衡水平。此外，農曆新年後行業表現亦顯著反彈，航運業前景似乎頗為樂觀。 勝利瑞柏基金管理合伙人暨投資總監陳建良認為，航運股係一個超級周期性行業，升跌幅度好大，運費會受供求影響，依家對航運價格影響最大慨因素係紅海地緣政治緊張，有約60%貨船要繞道而行，令船程長左，上次出現類似情況係疫情時，由於船公司認為紅海事件係短期問題，加上擔心需求唔理想，所以唔造船，任由運費上升。 不過，KL認為，由於紅海貨運船隻受騷擾慨潛在延續性被低估，可能會持續至第2或第3季，甚至更長時間都唔出奇，航運股就可以受益。 |
Results , BDI , PACIFIC BASIN |
| 陳建良 |
2024-02-23T16:49 |
近日市場焦點肯定係內地放寬自由行，最新有消息指，中央已同意將更多城市納入自由行，會率先開放西安及青島，下階段就會擴至哈爾濱等地，但係咪可以刺激到本港零售市道？有大行認為，放寬更多個城市居民來港，似乎係正面消息，但消費力未及一線城市，因為唔少係打卡為主，而本地消費股今日(23日)個別發展，當中以莎莎國際(00178)升得比較靚，昨日(22日)大升逾10%後，今日繼續升，但九龍倉置業(00020)等大商場股及金飾珠寶股就向下，點睇呢個現象及本地消費相關股前景？ 勝利瑞柏基金管理合伙人暨投資總監陳建良指，自由行納入更多城市當然係一個正面消息，但更重要係留意內地會唔會開放返一簽多行，因為會增加經濟及商業活動，繼而帶動本港整體經濟活動。 KL又指，開放多2至3個城市自由行，唔足以扭轉整個局面，所以依家唔少投資者都抱wait and see慨態度，今日升得多慨莎莎其實已經好耐冇人留意，可能細價些好炒些，至於較大隻慨商場股，就要睇《財政預算案》會唔會有刺激本地消費相關措施，如再派消費券等，因為商場要人流持續增加一段時間先可以加租，因此，佢認為投資者不妨先等一等，如果下星期《財政預算案》有刺激留港措施，其他消費股先會郁。 |
SA SA INT'L , HK Cap Flow , WHARF HOLDINGS , WHARF REIC |
| 陳建良 |
2024-02-02T16:11 |
【Now財經台】本港經濟仍然疲弱，去年第4季本地生產總值(GDP)增長4.3%，全年就升3.2%，差過預期，農歷新年好快就到，過往呢段時間零售股都會熱炒，不過，匯豐證券最新慨報告預期，本港零售業前景仍面對好大挑戰，又話偏好組合多元化及必需性消費占比較高慨收租股，包括領展房產基金(00823)及太古地產(01972)，究竟呢類股份系咪可以係疲弱慨零售市道下跑出？ 勝利瑞柏基金管理合伙人暨投資總監陳建良指，以現時本港市況，呢類多元化收租股應該會跟住大市行，未必可以單獨跑出，佢又提醒投資者要避開借貸較高慨股份，因為最近銀行對物業股開始有問號，所以借貸愈少慨公司會愈有優勢。 |
Real Estate , HSBC HOLDINGS , Real Estate , SWIRE PACIFIC A , SWIRE PACIFIC B |
| 陳建良 |
2024-01-19T17:46 |
【Now財經台】近半年唔少大行唱好日本市場，吸引大量資金湧入日股，內地股民近日更瘋搶滬深股市慨日股交易所買賣基金(ETF)，即使較資產淨值(NAV)有20%溢價都照買，反觀港股踏入2024年只得兩個交易日有得升，恆生指數周一(15日)至周三(17日)更崩盤式累跌約1000點。 勝利瑞柏基金管理合伙人暨投資總監陳建良表示，港股估值平系人都知，並唔足以吸引投資者，估計最少要1年時間，等內地經濟略為好轉，以及政策面上令市場相信中資企業可以市場化運作，外圍資金先會再重新流入港股。 KL又分析今年開局以來中資股票基金慨資金流向，指除左歐洲主動型資金外，香港被動型基金亦明顯減持中資股，相信系強積金相關基金或指數型交易所買賣基金(ETF)慨管理人斬倉止蝕。 陳建良 勝利瑞柏基金管理合伙人暨投資總監 |
Capital Flow , HK Cap Flow , Stock , HANG SENG BANK , HK Banks |
| 陳建良 |
2024-01-05T17:31 |
【Now財經台】高盛最新報告指，本港樓市疲弱，不但打擊地產股表現，本地銀行股會受更大影響。勝利瑞柏基金管理合伙人暨投資總監陳建良表示，過去1年唔少本地銀行因為內地房地產慨風險敞口(exposure)遭下調評級，但市場似乎低估香港地產同樣帶俾銀行唔少風險。 KL分析本地銀行慨內地及香港房地產風險占比，指出大部分銀行慨風險集中係三方面，包括借俾發展商慨貸款、為商業物業做慨槓桿(gearing)、本地住宅按揭。當前高息口環境加上本港經濟麻麻，令銀行借貸時要承受更大壓力，而本地銀行板塊慨股價尚未完全反映呢個負面因素。 KL認為，今年應該避開投資本地銀行股，並指市場誤以為之前港美息差擴闊，有助推升本地借貸需求，但而家經濟轉差，銀行反而需要為不良貸款慨潛在損失做減值撥備(provision)，繼而對今年度慨財務表現有負面影響。 陳建良 勝利瑞柏基金管理合伙人暨投資總監 |
Sachs , HK real estate , Real Estate , Real Estate , China real est |
| 陳建良 |
2023-12-29T16:16 |
【Now財經台】市場預料美國明年會率先減息，美元轉弱將令通脹持續回落難度增加，美國經濟軟著陸系咪言之尚早？美股又可唔可以繼續強勢？ 勝利瑞柏基金管理合伙人暨投資總監陳建良話，好多投資者睇美國經濟同美股指數掛鉤，但其實兩者無咩關系。美國市民慨生活環境，包括積蓄、中小企破產數字、信用卡違約等數字都一直升緊，最終都會影響美國經濟轉差。佢相信即使好巨型慨科企，都好難完全「離地」、同美國經濟完全無關，又話美國科企系服務全球，面對歐洲反壟斷慨懲罰等，都會令企業係未來一年慨盈利無想象中咁高。 佢又提到，今年咁多投資者追入科技股，系因為好多人認為科企慨財政狀況甚至比美國政府好，但應該考慮估值系咪值得。整體上佢認為2024年美國經濟唔容易軟著陸，亦唔睇好美股表現。 陳建良 勝利瑞柏基金管理合伙人暨投資總監 |
IT , USD , US Stock |
| 陳建良 |
2023-12-15T17:54 |
【Now財經台】港股今日表現認真麻麻，指數拾級而下，周一(11日)更一度失守16000點關，即市低位見過15972點，今日(15日)終於有個似樣少少慨反彈，恆指一度飆逾500點，2023年只剩返8個交易日，呢個反彈可唔可以持續？ 勝利瑞柏基金管理合伙人暨投資總監陳建良認為，港股今年已經跌完，估計今年余下時間可以守住16000關，而呢浸升浪好大機會持續至明年1月中。佢又話，美國聯儲局「放鴿」系支撐港股最主要因素，由於美元下跌，人仔自然有得升，都對港股有提振作用，資金成本亦可望下降。 此外，港股沽空情況明顯收斂，以盈富基金(02800)為例，沽空比率之前日日達70%以上，近日就得返單位數，KL認為，港股今次反彈系平淡倉所致，依家有一定夾倉壓力，尤其系狗股，佢又指睇好狗股表現，尤其系內需板塊。 |
Stock , TRACKER FUND , USD , ETF |
| 陳建良 |
2023-11-22T16:14 |
【Now財經台】金價再升穿每盎司2000美元，不過，今年幾次觸及呢個心理關口就見左短期頂，勝利瑞柏基金管理合伙人暨投資總監陳建良就認為，市場憂慮美元長遠購買力系主要原因，並預期金價年內有望企穩2000美元水平，甚至創新高。 KL分析指，美國聯儲局11月會議紀錄顯示再加息機會唔大後，美元匯價好快回軟，而市場亦憂慮美國長遠遏通脹慨能力。此外，全球地緣政治局勢緊張，美元長遠購買力不足令央行持有美國國債、美元資產作為外匯儲備慨功能存疑。 KL又話，留意到全球央行近年加快掃入黃金避險，其中，人民銀行減持美元資產同時，已連續12個月買金，成為全球最大的官方黃金買家。佢認為，在港上市慨金礦股可看高一線，首選山東黃金(01787)，因為內地金礦股主要以人民幣舉債發展或收購，利息壓力冇美股同業咁高，加上背靠中央政府呢個大客，使公司銷售成本較低。 |
Gold , RMB , USD , Gold mine , US Stock |
| 陳建良 |
2023-11-17T16:26 |
【Now財經台】美股3大指數今個月強勁反彈，有分析認為，美國迎來「金發女孩」(Goldilocks)慨理想景象，即通脹溫和及經濟持續增長。不過，之前提及今年基金經理系部署long美國科技股，係度平緊倉，依家美股已非常貼近頂部，散戶高追會唔會有風險？ 勝利瑞柏基金管理合伙人暨投資總監陳建良直言系非常危險，回顧兩年前，聯儲局宣布會開始加息，兩年後慨今日就話加夠，利論上「收水」不利股市，「放水」就對股市有利，資金依家就追入，但通脹及美國債息都未必會回落得太多，除中國繼續沽美債，最近30年期國債拍賣反映美債需求唔旺盛，加上近期美國數據急速轉差，睇返依家慨情況，相信經濟衰退(Recession)好快就出現，亦擔心減息系救唔到。 KL提醒，係呢個情況下要留意金價，相信金價多次挑戰每盎司2000美元後，最終會係呢段時間試穿，創歷史新高，縱觀多個資產價格，似乎市場系反映緊對長遠美國通脹慨憂慮，如果現階段追入美股非常危險，甚至懷疑美股可能已經見頂。 陳建良 勝利瑞柏基金管理合伙人暨投資總監 |
US Bonds , Gold , IT , USD , US Stock |
| 陳建良 |
2023-11-03T17:41 |
【Now財經台】港股成交低迷，日均成交相對總市值0.15%，但好多擁擠交易(Crowded Trade)，由於低成交下unwind需時，出現左空倉回補慨情況，一旦夾升補空倉威力都幾強，恆生指數及中資科技股可以彈得幾高？中線黎講科技股系咪值博慨板塊？ 勝利瑞柏基金管理合伙人暨投資總監陳建良認為，過去一星期已有基金經理平倉，相信10月中恆指逼近18000點水平時已經想補空倉，但因為市場等穿底再慢慢平倉，不過，由於成交太少平唔到太多，今日大市升導致平空倉壓力大增。今年平空倉慨壓力比去年擁擠，但依家港股投資情緒低迷，無乜cut average，反彈幅度就唔會好似去年咁勁。 KL又話，做中短線部署首選科技股，佢認為，科技指數係今輪反彈浪會跑贏恆指，雖然恆指未必好似去年彈咁多，但幾千點都有可能，去年主要系價值股抬頭，由於今年「中特估」蟹貨好多，走勢反覆慨科技股反而有機會跑出。不過，有一類股份就要小心… 陳建良 勝利瑞柏基金管理合伙人暨投資總監 |
Stock , HANG SENG BANK , IT |
| 陳建良 |
2023-10-20T15:35 |
【Now財經台】面對全球經濟前景不明朗，各類消費及娛樂都有一定壓力，澳門今年9月賭收按年大升4倍，今個月慨「超級黃金周」中場博彩收入超過疫情前水平，摩根大通認為，長線投資者可以撈底，賭收系咪值得憧憬？ 勝利瑞柏基金管理合伙人暨投資總監陳建良認為，9月賭收的確有增長，但唔能夠同去年同期比較，因為去年仍然系疫情管控期間，雖然賺左錢，但要留意唔少內地游客已改變左去香港旅游慨模式，就系唔再以消費為主，相信去澳門玩慨內地旅客都有相同情況，因此，係呢個改變下賭收要重返疫前水平會比較困難。 |
Gold |
| 陳建良 |
2023-10-06T15:26 |
【Now財經台】港股係持續超賣下，今日終於有一個唔錯慨反彈，但一浪低於一浪慨格局未變，在內地經濟放緩等負面因素困擾下，港股後市會唔會延續依家呢個區間上落格局？未來會唔會出現一些可以扭轉劣勢慨利好因素？ 勝利瑞柏基金管理合伙人暨投資總監陳建良指，之前都講過恆指會維持上落格局，要扭轉依家慨局面唔容易，因為香港經濟情況好貼近內地，貨幣政策都偏向緊縮，港股較難突然翻身。佢又指，市場認為港股成交淡靜系因為北水未回歸，但實際上，即使北水可帶旺成交，但唔代表指數會升。 KL續指，恆指依家已經唔再系區間上落，已明顯突破左第2、第3季慨區間，慢慢向下，但突破方式唔系大跌後出現大成交，而系「陰些陰些」咁跌，穿底就升少少，之後又跌過，成交愈來愈少。 佢又話，價值投資者唔肯入市，加上之前有外資沽空港股，唔睇好中國經濟又唔肯停倉，如果情況相反，成交應該會增加返返，可能要等港股係大成交下大跌，先有機會扭轉局面。 陳建良 勝利瑞柏基金管理合伙人暨投資總監 |
Stock , China Econ |
| 陳建良 |
2023-09-20T16:02 |
【Now財經台】蔚來(09866)噚日話計劃發10億美元可換股優先債券，蔚來美股隔晚收市急挫17%後，港股今朝一開市直插暫時即市低位67.75元，大幅低開逾13%，之後股價都冇起色。 勝利瑞柏基金管理合伙人暨投資總監陳建良相信，蔚來發債行動陸續有來，而其他新興慨電動車企亦可能會跟住蔚來向市場「伸手」，集資打價格戰。 KL分析指，傳統車廠或電動車企龍頭比亞迪股份(01211)，可以靠傳統汽車銷售提供現金流，但蔚來呢類純電動車企本身好難有正現金流，因此，只能靠減價促銷谷銷量及收入，不過，依家蔚來銷售唔系太理想，現金流入(cash inflow)唔算高，加上公司以前靠服務取勝慨賣點，唔及依家同業慨先進技術咁有競爭力。 佢認為，如果蔚來汽車銷量夠秤，大可以向銀行借錢，但公司選擇發債，或意味未來營運現金流未必咁理想。 |
US Bonds , HK Cap Flow , Stock , BYD COMPANY , USD |
| 陳建良 |
2023-09-13T15:15 |
【Now財經台】本地地產股近期受壓，其中，新鴻基地產(00016)周一(11日)急挫，之後獲郭老太增持，股價亦回穩返，其實係本地銀行相繼加按息，同埋本港經濟欠佳，地產市道都好難樂觀？發展商唔減價去唔到貨，會唔會導致大量樓盤積壓？ 勝利瑞柏基金管理合伙人暨投資總監陳建良指，新地周一急挫主要系唔肯保證唔減派息銀碼，投資者會擔心，若地產市道持續向下，意味新地派息會愈來愈少。不過，有一點系無辦法扭轉，雖然本港地產商借貸冇1997年咁多， 但始終個周期系向下，加上負擔成本上升，而新盤開售時亦肯劈價，由於利息成本高，亦限制左發展商還錢能力。 KL又話，睇返本地發展商依家慨借貸比率及派息比例，大部分都有Gearing，只得長實集團(01113)及信和置業(00083)系處於淨現金狀態，而呢兩只股份會相對較好，因為唔會受利息上升影響。 |
SHK PPT , Real Estate , SINO LAND , Real Estate , CKH HOLDINGS |
| 陳建良 |
2023-09-06T17:17 |
【Now財經台】英國第2大城市伯明翰(Birmingham)係當地時間9月5日突然宣布破產，首相辛偉誠表明政府唔會出手救伯明翰，噚晚歐洲股匯未見波動，系咪意味市場覺得事件影響唔大？ 勝利瑞柏基金管理合伙人暨投資總監陳建良相信，呢次唔系單一事件，並指有統計顯示，英國仲有逾20個城市有破產風險，認為辛偉誠對伯明翰破產事件慨回應，似乎系警告其他城市政府，唔好期望一旦輪到佢地「爆煲」政府會出手打救。 KL又指，無論英國政府救定唔救，市場慨第一個反應好大機會系美元會升，會對全球風險資產偏向不利，仲話未來3個月要密切留意事態發展。 佢分析指，若英國政府用「印銀紙」方式打救，係當地高通脹環境下，會令英鎊及英國債價受到好大壓力，如果政府選擇唔救，再有城市突然爆煲，當地經濟將會轉差，房產價格下跌，企業經營困難，失業率又上升，到時就系當地銀行業同股市出事，因為… 陳建良 勝利瑞柏基金管理合伙人暨投資總監 |
USD |
| 陳建良 |
2023-08-25T16:49 |
【Now財經台】恆指上個星期又破底，創今年新低，雖然近日曾重上18000點，但成交都好麻麻，點解港股咁平都冇人吼？ 勝利瑞柏基金管理合伙人暨投資總監陳建良指，港股平系有原因，因為香港經濟跟內地，貨幣政策就跟美國，所以係中國經濟比較差的情況下，香港同時面對上市公司業績前景普通同緊縮慨貨幣政策，不利投資者入市意欲。 陳建良 勝利瑞柏基金管理合伙人暨投資總監 |
Stock , Results , Earnings , China Econ , IPO |
| 陳建良 |
2023-08-11T17:47 |
【Now財經台】阿里巴巴(09988)上季度經調整純利按年升48%，6大業務全面向好，除左雲業務收入增長較慢外，其余5大業務都錄得雙位數增長，業績整體好過市場預期，阿里股價今日開市冇耐已升近4%，一度高見97.95元，收市報95.3元，逆市升1%。 不過，勝利瑞柏基金管理合伙人暨投資總監陳建良認為，雖然市場收貨，但投資者要留意，期內收入按年急升，系由於去年同期出現疫情封控令數據受惠於低基數，加上今年上半年復常後，疫情期間被壓抑慨需求(pent-up demand)帶動銷售增長。 不過，第2季起內地經濟開始掉頭向下，佢估計，年底經濟增長將不及年初，而網上銷售同經濟掛鉤，集團網上購物業務慨收入增長或顯著收縮。 KL續指，在高息環境下，新股吸引力不再，認為阿里分拆業務獨立上市唔會對股價有好大幫助，加上美國落實對當地企業投資中國高科技領域慨新限制，一定會影響阿里發展人工智能(AI)或其他涉及高科技慨業務，預期股價會繼續係80至100元橫行一段長時間。 |
Results , ALIBABA , IPO , IT , IPO |
| 陳建良 |
2023-08-02T18:09 |
【Now財經台】評級機構惠譽係美股噚晚收市後，突然下調美國主權信貸評級，由最高的「AAA」下調至「AA+」，成演2011年8月上旬，另一評級機構標准普爾將美國主權信用評級降至「AA+」翻版，亞股今日全線插水，系咪同2011年一樣，資金避險回流美債及美元？對美國下半年息口有冇影響？ 勝利瑞柏基金管理合伙人暨投資總監陳建良指，根據上次美國被降級慨經驗，加上之後爆發歐債危機，令資金重投美元及美債，今次美國再被降級，由於依家美國債務沉重，加上息口上升，美國已經無空間行寬松慨貨幣政策，其中一只反映未來美國加息機會慨ETF PFIX抽升3%，反映美國下半年不單唔會減息，甚至可能要再加息1至2次。 陳建良 勝利瑞柏基金管理合伙人暨投資總監 |
US Bonds , ETF , Capital Flow , US Credit , USD |
| 陳建良 |
2023-07-28T18:36 |
【Now財經台】中央政治局會議周一(24日)召開，港股第2日即收復牛熊線，大市今個星期成交回升，其中3日成交逾千億元。恆指7月暫累升逾800點，好大機會連升兩個月，港股系咪終於有「東風」？ 勝利瑞柏基金管理合伙人暨投資總監陳建良認為，8月環球股市好大機會「東升西降」，佢解釋指，日本央行有准備退出超寬松貨幣政策慨跡象，相信環球資金流將出現反轉效應(reversal effect)，部分資金會從美股回流亞洲股市，有利港股後市，並預期港股市寬將全面上升，並會有更多上市集資活動。 KL續指，5至6月全球擁擠交易(crowded trade)數據顯示，美股大型科企好倉系最擁擠慨交易，其次系沽空中資股，佢估計，呢兩個趨勢將會逆轉。 佢認為，雖然美國加息周期屆尾聲，但當地滯脹風險懸而未決，美國科技股會面對好大沽壓。另一邊廂，港股近日大舉反撲，估計唔少淡友將要夾淡倉，繼而夾高恆指，加上港美息差只系稍微擴闊，港元匯價冇明顯受壓，亦利好港股。 陳建良 勝利瑞柏基金管理合伙人暨投資總監 |
Stock , HK Cap Flow , IT , Capital Flow , US Stock |
| 陳建良 |
2023-07-14T14:31 |
【Now財經台】人仔回勇，利好中資股及港股，其中，平台經濟股近排升得唔錯，中央除左出招、出口術力撐行業外，國務院總理李強日前都話平台經濟大有可為，睇返官方最新慨態度，平台經濟系咪已確認走出谷底？至於平台經濟股第2季業績又點睇？ 勝利瑞柏基金管理合伙人暨投資總監陳建良指，平台經濟對內地系有貢獻，佢估計，相關公司慨管理層未來會變天，業務方面亦會做返「專」些，所以唔排除競爭會大左，但對民生黎講系好事，只要冇出現壟斷情況，相信中央都系循呢個方向去睇。 KL又話，如果揀平台經濟股最好系中小型及估值低，避開龍頭股。次季業績方面，佢認為應該冇乜睇頭，相比疫情前當然好好多，因為中國經濟正面對一個失速情況，而中央點解再度技持內房及平台經濟，因為呢些公司大部分系私人企業，可以令經濟失速情況冇咁嚴重。 陳建良 勝利瑞柏基金管理合伙人暨投資總監 |
Stock , China Real Estate , China Econ , Expo |
| 陳建良 |
2023-06-30T15:21 |
【Now財經台】今日系港股半年結，但大市仍然冇乜起息，噚日期結日都彈唔起，恆指落到19000點都冇人願意入場，成交繼續淡靜，基金唔買，散戶又唔買，係呢個情況下，港股第3季系咪都好難樂觀？ 勝利瑞柏基金管理合伙人暨投資總監陳建良指，其實3月時已預期第2季系一個上落市，估計第3季會明顯突破橫行局面，開始行單邊，暫時睇單邊向下機會仍較大，始終不利因素比較多，例如美國通脹，即使6月跌穿4%，但應該已見底， 所以唔好期望減息，中國方面就系救經濟，但由於板斧唔多，都離唔開「放水」，但會令人仔下瀉，而係呢些情況下，個別股份如上季熱炒慨「中特估」概念股都應該炒完。 陳建良 勝利瑞柏基金管理合伙人暨投資總監 |
Stock |
| 陳建良 |
2023-06-16T16:27 |
【Now財經台】市傳內地將出大招救經濟，不過，勝利瑞柏基金管理合伙人暨投資總監陳建良認為，內地唔會好似以往咁大幅減息降准及谷基建。 KL分析指，內地當局或會針對青少年失業率創新高，鼓勵年輕人重返校園，並放松教育政策同增加補貼，主營職業教育慨教育股將會受惠。佢又預期，政府唔再谷房地產，但會增建公共住房，可能惠及建造相關股，並估計，內地會轉向再生能源產業加大資本投資，有利光伏、風電等新能源板塊。 佢續指，早前熱炒慨中資電訊股、內險股，表現或受累外圍高息環境而引發慨人仔貶值壓力，因為呢類企業慨資產同現金流大多以人仔結算。 KL又話，港股仍然擺脫唔到上落市格局，預期之後更大機會向下突破，建議投資者趁呢排多好消息出貨，無謂係高位追入。 陳建良 勝利瑞柏基金管理合伙人暨投資總監 |
HK Cap Flow , Stock , Energy , Real Estate , Real Estate |
| 陳建良 |
2023-06-02T15:17 |
【Now財經台】科學家年初已警告，今年全球天氣會比舊年更熱，因為遏止氣溫上升慨拉尼娜現象今年會結束，相反，令全球氣溫上升慨厄爾尼諾(EI Nino)現象，有數據顯示今年好大機會發生，而今年海水平均溫度都遠高於去年及平均水平，係呢個情況下，電力股系咪有一定投資價值？ 勝利瑞柏基金管理合伙人暨投資總監陳建良估計，今年好大機會出現一個較嚴重慨厄爾尼諾現象，其實唔止香港及東南亞地區，相信美國都感受到，係呢個情況下，會令好多國家開始留意返同環保相關慨野，美股噚晚同鈾礦股狂升，因為可以開始起返核電廠，相信內地都會大力推動風力、太陽能及核電，但水力、火電發電就唔睇好，原因系... 陳建良 勝利瑞柏基金管理合伙人暨投資總監 |
ChinaElec , US Stock , Enviro |
| 陳建良 |
2023-05-19T16:02 |
【Now財經台】恆指呢排都系日升日跌，上日彈完今日又跌過，截至中午，恆指全周跌88點，前幾日科指升，尋日就由中特估同金特估接力，點睇恆指上落市格局同之後走勢？ 勝利瑞柏基金管理合伙人暨投資總監陳建良指，整體市況去到6月中較波動，由舊年年尾大家都好恐慌，到今年首季大家都好亢奮，過左兩個極端情緒之後，黎到依家成交數就會相對膠著。KL又話，依家個市橫行左一段時間之後，會出現幾次假突破，之後就會出現真突破。佢預計，真突破出現慨時候，個市會向下跌穿18000點。 陳建良 勝利瑞柏基金管理合伙人暨投資總監 |
|
| 陳建良 |
2023-05-05T17:17 |
【Now財經台】自今年初通關到最近「五一黃金周」假期，市場一直唱好消費股前景，不過，勝利瑞柏基金管理合伙人暨投資總監陳建良認為，市場忽視後疫情時代下消費股慨成本上升壓力。 KL點出市場對消費股慨5大分析盲點。 首先，疫情後大部分消費者慨財政狀況較疫情前轉差。第二，雖然疫情後積壓需求(pent-up demand)引發報復式消費，但後續慨消費力度可能無以為繼。第三，唔少產品已經加價，反而令銷售量減少，收入未必會大幅增長。第四，通脹高企下好難控制好產品成本，如運輸、人工等，因而壓縮左毛利率。 KL續指，現時利率高於2019年水平，所以依家慨估值好難同當年相比，而估值要低於2019年水平先算吸引。 陳建良 勝利瑞柏基金管理合伙人暨投資總監 |
Gold |
| 陳建良 |
2023-04-14T16:42 |
【Now財經台】受惠於美元回軟，內地金礦股連日發力，今日其他金屬資源股亦造好，不過，勝利瑞柏基金管理合伙人暨投資總監陳建良提醒，投資礦業股應回歸基本面，切忌只見外圍因素就盲目高追，亦要小心美國突然出現通縮，佢更預期，呢個板塊今輪抽升後，最快5月就會爆「抽水潮」。 KL表示，金屬礦慨質量同公司估值關連性最大，內地高質量礦唔多，加上開采金屬礦須投放好多資本，導致唔少中資礦企有高負債問題。 佢續指，業績期剛剛過左，可以做返公司行動(corporate action)，話參考以往國企礦業股慨歷史，某些高負債、高市帳率(PB)公司或會趁高位配股，咁岩今日有只五礦資源(01208)價量齊升，KL就話投資者要小心配股風險。 |
MMG , USD , Gold mine , MINMETALS LAND , IPO |
| 陳建良 |
2023-03-31T15:46 |
【Now財經台】今日系港股第1季最後一個交易日，恆指今季先高後低，季初一度高見22700點，到季尾曾失守19000關，截至今日，已收復返從高位回落慨半數失地。港股上落市格局係季尾愈來愈明顯，但成交始終冇乜起色，今季日均成交約1200億元。 展望第2季，勝利瑞柏基金管理合伙人暨投資總監陳建良指，依家市場仍有好多不確定性，例如經濟衰退程度、聯儲局幾時停止加息、內地經濟復蘇速度等，所以成交唔會暢旺，佢估計，港股會繼續系上落市，波幅將較首季約3800點更細，悶局可能最少持續至6月中。 此外，唔少人博加息周期息差擴闊買入本地銀行股，但近日呢個板塊表現好差，其中，噚晚出左業績慨中銀香港(02388)，今朝最多跌6%，而恆生銀行(00011)近期亦差唔多落到去年10月低位。 KL認為，借貸利息上升令息差擴闊，但亦因為高息令借貸需求減少，加上銀行吸存款慨成本不斷上升，繼而影響盈利，而高息環境亦會影響銀行持有資產慨穩定性。 佢續指，本地銀行經營環境正在轉差，側重銷售、非利息收入占比較高慨銀行，例如中銀香港，未來將受到更大打擊，股價好可能向下，建議等銀行股估值再平些先買貨。 |
HANG SENG BANK , Stock , HK Banks , BOC HONG KONG , Earnings |
| 陳建良 |
2023-03-17T16:11 |
【Now財經台】歐美近日接連有銀行倒閉或頻臨爆煲，雖然第一共和銀行及瑞信獲同業和央行出手打救，不過，勝利瑞柏基金管理合伙人暨投資總監陳建良認為，今輪救亡行動只系幫到一時，因為整個歐美銀行業已出現慢性慨信貸收縮危機！ KL續指，聯儲局資產負債表過去幾日大升，係依家貨幣政策寬松，但唔減息慨環境下，銀行為吸引存款而加存款息，貸款時亦更審慎，推高利息成本，銀行淨息差將大幅收窄，造成惡性循環。佢又話，銀行唔少抵押資產系國家債券，可能因為聯儲局一直唔減息，要面對貨幣貶值風險，亦對銀行造成財務壓力。 KL又認為，今年不宜沾手歐美金融股，並預期整個金融業將會信貸收縮，引發美國樓市爆煲，持有唔少國債投資慨保險公司將續受加息影響，更嚴重慨情況系，某些中型國家慨國債會出事。 陳建良 勝利瑞柏基金管理合伙人暨投資總監 |
US Bonds , US Credit , AEON CREDIT |
