| Commentator |
Time |
Content |
Tag |
| 陳建良 |
2026-03-13T16:08 |
開源人工智能代理(AI Agent)OpenClaw近期爆紅，內地稱為「龍蝦」，更迅速掀起一股「養龍蝦」熱潮，不過，內地多個部門先後針對呢隻「龍蝦」發風險提示，甚至限制國企及政府機構係辦公室使用OpenClaw。不過，呢股「龍蝦熱」似乎持續，內地幾大科技巨頭都推出相關應用，包括阿里巴巴(09988)旗下阿里雲手機版JVS Claw、騰訊控股(00700)慨WorkBuddy、百度集團(09888)慨DuClaw，邊問內地科企可以係呢場「龍蝦競賽」中跑出？ 勝利證券首席顧問陳建良指，點解中國要禁？OpenClaw同互聯網冇關，只係裝係自己慨電腦，但內地生態同外國唔同，好多人屋企冇電腦，好野都係手機里面，所以就裝係公司電腦，可能會有潛在安全隱患。 KL又話，內地好多大平台都有自己慨OpenClaw，即係唔同版本，佢認為，冷卻左之後，可能會有多些唔同慨使用，當產品化之後，估計唔會容許「自己裝自己用」，應該會用雲端方式去使用，會成為一些雲端產品，雖然今日(13日)大市向下，但之前沽得比較殘慨科技股，例如阿里及騰訊都「郁下」，所以長遠係應該會受惠，加上依家內地好多Super App，即係一個App就乜都做到，例如微信小程序，呢類平台係會相對受惠。 不過，KL認為，4月中之前都唔可以對市況睇得太樂觀，等情緒完全冷卻後，唔需要急於一窩蜂去「養龍蝦」。 |
|
| 陳建良 |
2026-02-27T15:38 |
港股今日(27日)升得唔錯，但恆生指數2月埋單好大機會要跌近3%，科技指數更累跌近10%，錄得2024年1月以來最大單月跌幅。今年以來，資金為補捉人工智能(AI)浪潮，由中資科技巨頭轉投AI新力軍、純AI營運商，同埋傳統股，展望3月，呢個勢頭會唔會持續？ 勝利證券首席顧問陳建良指，今年本地地產股處於復甦階段，銀行股亦升左唔少，市場反而開始擔心點解中國科技發展得快，但科指仲要跌，主要係內地科企開始「內捲」，又認為科企「內捲」好難停止，所以科技股係情有可原。 對於AI新力軍及純AI營運商，KL認為呢股熱潮會慢慢消退，佢又認為，最近上市慨新股已經唔及年初些，依家競爭已經非常激烈，令人擔心又出現「內捲」，因此，佢唔睇好3月至4月初市況。 |
|
| 陳建良 |
2026-02-13T15:23 |
港股今日(13日)承接美股昨晚(12日)跌勢，恆生指數今日(13日)低開近400點，午後跌幅一度擴大至近600點。北水好快就「放年假」，近年係北水「缺席」下，港股好多時反而有得彈，點睇港股後市？ 勝利證券首席顧問陳建良認為，港股農曆新年後反彈機會唔大，北水「缺席」買賣盤都會減少，成交較淡靜亦好正常，因此，佢認為北水係咪「缺席」同大市升跌冇太大關係聯。 KL又話，雖然好多股民期待新年後「開紅盤」，但佢認為純粹拿個好意頭。 |
|
| 陳建良 |
2026-01-30T15:39 |
港股今年1月開局表現強勢，恆生指數之前連升7個交易日，更一度衝破28000關，大市今日(30日)顯著回落，到底依家港股市況係咪健康？ 勝利證券首席顧問陳建良指，恆指今個月一度抽穿去年高位，所以回套都係預左，佢估計，恆指會落返27000點水平，會先進行調整，其實大市升下跌下，又識得回套，反而唔會太快消耗曬升市動力。佢又話，睇返恆指1月走勢，雖然有得升，但未算升得太急，所以市況仍然健康，又估計1月低位有機會係全年低位，但仍建議投資者係2月、3月唔好太進取。 KL又提及，今年市況可能有1個「特色」，可能未必由最熟悉慨大型成分股領跑，反而一些非指數成分股有機會跑出，並留意一些有基本面支持，或有結構性優勢慨板塊，因為呢些股份慨表現可能更突出。 |
|
| 陳建良 |
2026-01-16T16:54 |
2026年初至今，本港地產及收租股股價表現走強，摩根大通表示，地產股整體反彈後，大部分已恢復到合理水平，部分估值更是偏高，地產板塊是否還適合部署？ 勝利證券首席顧問陳建良指，香港商業地產中，酒店會較快復甦，因為在香港舉行的商務會議或者展覽數目不斷上升，另外，香港留學生住宿需求大，不少投資人開始收購二、三線酒店，改為學生宿捨放租。他認為，未來香港酒店的供應會按年減少，現時酒店房間的入住率或者房租已經開始呈上升趨勢，相信酒店需求會持續增加。 KL建議，投資者可揀選資產淨值折讓(NAV Discount)幅度大的地產發展股做中線部署，例如新世界、九龍倉置業(01997)和長實集團(01113)。 |
|
| 陳建良 |
2026-01-02T18:07 |
今日(2日)係港股2026年第1個交易日，開局表現強勢，依家大行及市場都繼續看好中資股。恆生指數係2025年累升逾27%，係其中1個表現靚仔慨股市，恆指今年開局有個好開始，點睇新一年表現？ 勝利證券首席顧問陳建良認為，恆指今個月頭2至3個星期，應該維持到升勢，主要由係靠去年第4季表現較差慨科技股帶動，因為騰訊控股(00700)及阿里巴巴(09988)呢些重磅股，對拉動指數非常重要，呢些股份大升，就會推高大市。 KL提醒，依家有大量科技相關新股排隊上市，如果呢些新股一直向上，到時唔止科指升，亦可以帶動整體大市造好。 |
|
| 陳建良 |
2025-12-22T16:05 |
2025年即將完結，好快就踏入2026年，年底前股市會點行？點睇明年大市慨氣氛？ 勝利證券首席顧問陳建良指，美股及港股係年尾呢幾個星期觀望氣氛濃厚，但唔排除今年最後一個星期會有「Year End Rally」，如果大市係聖誕後真係彈高，2026年第1季好大機會回調，所以唔彈反而更安全。 KL又話，今年唔少新興市場都跑贏美股，未來最大浮動因子(Swing Factor)係美國聯儲局明年慨貨幣政策取向，近期債息向上，反映市場唔相信美國慨通脹數據。 佢續指，如果聯儲局挽回唔到市場信心，美債、美匯都會同時跌，係唔暴跌慨情況下對新興市場仲有利，不過，若失業情況嚴重，局方因經濟陷入衰退而減息，新興市場就唔再係「避難所」。 |
|
| 陳建良 |
2025-12-10T16:07 |
百度集團(09888)旗下昆侖芯最新推出慨自研P800晶片，市傳唔係傳統GPU晶片，而係專門針對深度學習慨ASIC晶片，並指已有電訊、金融等行業客戶訂購，昆侖芯可唔可係一眾國產晶片中突圍而出？ 勝利證券首席顧問陳建良指，現時除左百度，阿里巴巴(09988)都有涉足ASIC晶片，呢類產品較易向外供應，而AI訓練晶片「國產GPU四小龍」都有生產，但仍未可以同英偉達(Nvidia)慨H200比較，不過，百度分拆昆侖芯融資係無問題。 KL認為，同ATMXJ比較，百度晶片業務上市慨機會大，亦會係最早，亦解釋左點解百度係呢個板塊慨強勢股，相信市場會對百度有一定憧憬。 |
|
| 陳建良 |
2025-11-28T15:58 |
今日(28日)係港股11月最後一個交易日，恆生指數係月結日反覆向下，繼續受制26000關，至於美股11月走勢同港股差唔多，截至昨日(27日)止，標指今個月僅微跌0.4%，但科技股走勢轉差，點睇港股及美股12月慨表現？ 勝利瑞柏基金管理合伙人暨投資總監陳建良估計，美國聯儲局12月減息後，大市就會穩定返，到時可以再夾返上去，如果下次議息會議前冇特別新消息傳出，估計美股會輕微反彈。 港股方面，KL指出，依家市場關注科技股現金流多過前景，同埋擔心內地科技股進步得太快會引爆「內捲」，令呢些公司好難有錢賺，係暫時未有明確方向前，港股可能要再橫行多一段時間。 |
|
| 陳建良 |
2025-11-14T15:51 |
騰訊控股(00700)昨日(13日)交左份靚季績，第3季賺逾631億人仔，當中以遊戲業務增長最標青，遊戲收入按年升15%，海外更按年急升43%，首度突破200億人仔，但值得留意係，集團資本開支減少，高盛估計，係同晶片供應有關，而騰訊亦下調全年資本開支指引，集團人工智能(AI)策略係咪有變？ 勝利證券首席顧問陳建良指，騰訊本身唔需要咁多資本開支，因集團已經有一個完整慨微信生態圈，遊戲、廣告、社群、支付等功能集於一身，騰訊慨AI發展有「後發先至」慨優勢。 KL又話，依家因為GPU缺貨先導致市場瘋搶，就算騰訊遲些先買GPU，仍可以做到強勁慨產品，市場唔需要擔心騰訊慨能力，佢又估計，騰訊股價有力跑贏恆生指數。 |
|
| 陳建良 |
2025-10-31T15:54 |
「習特會」中美達成第5輪經貿協議，美國聯儲局又一如預期減息0.25厘，不過港股不升反跌，10月份恆生指數暫時跌約3%，連升5個月的勢頭會否終止？11月資金會否以保守為主？ 勝利證券首席顧問陳建良指，10月中內地限制稀土出口的消息一出，資金開始轉為流入「中特估」，尤其是能源股，能源股優勢在於電力比美國穩定，即使全球發電量龐大，內地仍然繼續開發新能源，所以最近低估值的能源股上升，而科技股出現回落。KL估計，11月資金會持續流入「中特估」。 |
|
| 陳建良 |
2025-10-24T16:00 |
四中全會為中國未來5年發展定調，大方向包括科技自立自強、推動新質生產力、提振內需等，當中有咩投資機會，又或者需要注意慨地方？ 勝利證券首席顧問陳建良指，睇返「十五五」規劃慨大方向，可以確認中央未來會重點發展高質量工業，例如航天、晶片及機械人等，相信相關科技股可以受惠，不過，由於內需唔係單靠政策就可以谷得起，所以內需股未必太受惠。 KL提醒，投資者唔好見政策一出就急於買貨，因為呢些政策唔係即時執行，最多只可以作為參考，去做未來3至5年慨投資部署。 |
|
| 陳建良 |
2025-10-03T17:22 |
虛擬貨幣8月中破頂後，靜左個幾月，近期價格自低位反彈，比特幣(Bitcoin)價格昨日(2日)重上12萬美元，以太幣(Ethereum)亦上返4.4萬美元。Bitcoin一直有「4年周期」呢個說法，即每隔4年發行量就會減少，改變供需平衡，繼而推高Bitcoin價格，對上一次「減半」係去年4月，Bitcoin依家處於周期咩位置，投資者可以點部署？ 勝利證券首席顧問陳建良表示指，依家市場準備迎接Bitcoin熊市，因為Bitcoin「減半」後，一般會再升十幾個月，然後就會見頂回調，進入「寒冬期」，估計價格會大跌60%至70%，甚至更多，如果相信「4年周期」就應該減持。 KL又話，依家全球唔少國家已接受Bitcoin作為儲備貨幣，其他幣種如以太幣等亦有不同作用，又指依家機構投資者對虛擬資產慨投入比例仍然好低，但相信去美元化會帶動需求，所以佢睇好今季Bitcoin以外慨虛擬資產表現。 |
|
| 陳建良 |
2025-09-12T16:02 |
港股踏入9月持續強勢，恆生指數已升至逾4年高位，今朝(12日)大幅高開逾450點後，升幅一度擴大至近500點，高見26585點。星展最新上調恆指12個月目標至28000點，又話係最牛慨情況下，恆指有望升至30500點，但有3個前提，就係更明確基本面穩定跡象、更強刺激政策，或有更充裕流動性。恆指係咪有力再上？ 勝利證券首席顧問陳建良指，現時全球大部分機構投資者都低配A股及港股，若恆指升勢持續，將會吸引一批原本冇留意A股及港股慨資金流入。佢又估計，恆指將逐步推升，但如果升得太急，例如1個星期升逾1500至2000點，投資者就要小心大市可能會出現大調整。 |
|
| 陳建良 |
2025-09-05T16:26 |
「人形機械人第一股」優必選(09880)日前宣布奪得一份2.5億人仔慨合同，刺激股價大升，但其實公司仍蝕緊錢，點睇內地機械人概念股前景？呢類股份係咪值得投資？ 勝利證券首席顧問陳建良指，中國發展機械人絕對有優勢，製造機械人需要好多雷達及感知組件，而雷達等相關零件被中國壟斷，量產雷達自然令價格大幅下跌，對呢些企業有利，中國生產製造機械人元素慨供應鏈非常完整。 KL又話，昨日(4日)機器人相關股下跌，主要係中央壓制投資者對A股熾熱氣氛，雖然機械人產業長遠會發展得好，但依家唔係追入好時機，佢建議，想增加港股配置慨投資者，可以留意一些估值平或「中特估」概念股。 |
|
| 陳建良 |
2025-08-22T16:01 |
【Now財經台】全球矚目慨Jackson Hole全球央行年會，將會係美國時間周四至周六(21日至23日)，係懷俄明州傑克遜湖旅館(Jackson Lake Lodge)舉行，重頭戲係美國聯儲局主席鮑威爾(Jerome Powell)，將會係本港時間今晚10點發表演講，市場可唔可係佢慨言論中搵到減息線索？點睇美股後市？ 勝利證券首席顧問陳建良認為，聯儲局9月好大機會唔減息，又認為投資者未來3個月不宜對美股睇得太樂觀，建議減少持倉。 KL續指，市場依家受關稅、俄烏戰事等因素影響，仍有好多不確定，相信鮑威爾同美國總統特朗普(Donald Trump)慨角力會令股市出現動盪，而美股係傾向升慢急跌，如果持有大量貴價股會好難轉身。佢又估計，美股有機會出現大調整，其中，納斯達克100指數有機會挫3000點至21000點水平。 |
|
| 陳建良 |
2025-08-08T15:31 |
九龍倉置業(01997)昨日(7日)派左中期成績表，基礎盈利近乎持平，主席吳天海話，本港零售及餐飲業仍面對挑戰，估計零售市道下半年好難出現突破性發展。此外，由於市道唔理想，生意難做，唔少本地銀行都頻頻Call Loan。對九置未來營運有幾大影響？ 勝利證券首席顧問陳建良指，九置業績最能夠反映內地旅客心態，廣東道一直係內地旅客主要「朝聖地」，睇返九置業績，上半年海港城收入及盈利變動不足1%，其中，酒店業務更錄得輕微增長，雖然冇突破性發展，但未至於好差，加上海港城係大型商場，可以舉辦多元化活動，會較其他商場有優勢。 KL又話，雖然恆生銀行(00011)及其他港資銀行有借錢畀地產商，但更多係借錢畀投資者買地舖或細商場舖，呢類舖位靈活性唔及大商場，加上租客抗逆力低，變相要減租吸引租客，導致舖位估值下跌，最終被銀行Call Loan。不過，KL指，呢類Call Loan唔會影響大商場，反而當零售回穩時，大型商場可以更佔優。 |
|
| 陳建良 |
2025-07-30T15:56 |
恆生指數係今日(30日)期指結算日繼續向下，一度瀉逾400點，跌至25000點邊緣，值得留意係，北水日錄得淨流入，後市係咪繼續靠北水撐？有咩板塊值得留意？ 勝利證券首席顧問陳建良指，港股8月會進入業績期，雖然之前估計港股可以趁勢再上，但結果今個星期仍要回調，特別係之前升得多慨科技股，同埋車股都要跌，但醫藥股就升返上黎，反映板塊不停輪動。 KL又話，雖然北水連日錄得淨買入，但只係反映多左內地投資者或資金參與港股，而港股其中一個好處係冇「升/跌停板」機制，睇返A股，當股份單日觸及升或跌10%慨限制，就必須停牌，而內地推出「反內捲」政策，受惠股或會大升，基於「升/跌停板」機制慨考慮，投資者就會偏向揀係香港上市慨同類股份，因為股價都有機會受惠於政策。 |
|
| 陳建良 |
2025-07-25T15:27 |
「反內捲」已成為國策，中央昨日(24日)再出手，發改委及市監局就修訂《價格法》公開徵求意見，明確不正當價格行為，花旗認為，修訂草案利好太陽能行業，因為內地大部分太陽能光伏產品都係以蝕本價出售，究竟內地點解決「內捲」問題？ 勝利證券首席顧問陳建良指，因為未來慨人工智能(AI)及高質素生產力，都需要大量低成本電力供應，所以每個國家都用緊自己慨方法搶佔緊能源市場，美國係狂開採石油，而內地就靠太陽能。 KL續指，太陽能行業已經鬥到爛曬，係過去幾年都冇見過人LONG，鬥得太爛時就要蝕住賣，即中國要貼錢畀外國增加能源供應，佢相信，中國會出手禁止呢個情況出現，反而會crack down太陽能產能，然後發展垃圾發電、核能發電、水力發電。 佢認為，內地今次會花更多精力係能源基建上，因為呢些行業係「反內捲」及大部分資金嚴重不足下，相對容易有曙光。 |
|
| 陳建良 |
2025-07-18T16:04 |
雖然中央不斷出招力谷及擴大內需，但消費仍相對疲弱，原因都離唔開價格戰及「內捲式」競爭，如果情況持續，長遠更會影響內地經濟發展，投資者做部署時有咩要留意？ 勝利證券首席顧問陳建良指，過去一段時間經常聽到「內捲」呢兩個字，即係競爭非常激烈，基本上市場諗得到慨行業都有「內捲」，外賣平台、電商，甚至人工智能(AI)都有。 KL又話，面對呢個情況，相信投資者要減持慨股份都已經減持曬，見到過去兩個月慨投資方向都係避開「內捲」嚴重慨板塊，轉揀有定價權、「內捲」情況輕微慨股份。 佢又估計，8月慨投資方向都會偏向揀「反內捲」慨行業，而「內捲」相對輕微慨行業板塊。 |
|
| 陳建良 |
2025-06-27T15:27 |
恆生指數今年暫時累升近21%，雖然第2季經歷過4月美國總統特朗普(Donald Trump)突然發動關稅戰，以及中東局勢急升溫，但單計第2季，恆指仍升5%，點睇下半年走勢？邊些股份買得過？ 勝利證券首席顧問陳建良指，美國關稅戰仍然唔明朗，而中國制定慨經濟措施就要睇關稅戰慨發展，佢估計，恆指第3季將會維持「慢升急跌」格局，導致長線資金要繼續坐貨，但反而對港股有利。 KL又話，恆指第3季有機會見25000點，又話二、三線股可能會跟住唔同主題炒作，尤其係二線科技股及個別醫藥股。此外，亦可以留意第2季表現唔好慨股份，例如電動車股，當唔同主題輪流炒慨時候，呢些股份有機會受惠。 |
|
| 陳建良 |
2025-06-13T16:06 |
以色列接連空襲伊朗，伊朗亦表明會報復，外電形容今次係上世紀80年代兩伊戰爭後，伊朗遭受最嚴重慨襲擊。中東局勢持續惡化，港股亦連跌兩日，恆生指數今日(13日)失守24000關，並插穿10天線，一度低見23774點。不過，地緣局勢急升溫刺激金價、油價急升，金礦及石油相關股亦炒上，依家應唔應該追入呢些板塊？ 勝利證券首席顧問陳建良指，港股無可避免會出現調整，估計恆指高低波幅約500至1000點。佢又話，唔建議投資者追入今日大升慨油股，反而可以留意一些今日會跟大市跌，但長線值得睇好慨股份，尤其係可受惠於人工智能(AI)慨二線科技股，先可以做到低買高沽。 |
|
| 陳建良 |
2025-05-30T16:08 |
美國關稅政策執行情況陷入亂局，美國聯邦巡迴上訴法院昨日(29日)就特朗普(Donald Trump)政府提出上訴，暫時擱置美國國際貿易法院(Court of International Trade)日前叫加關稅慨裁決，即上訴期間關稅繼續生效，不過，美股昨晚反應唔大，港股今日(30日)更回套返昨日因關稅暫緩而反彈慨升幅，點解會出現呢個情況，港股即將踏入「六絕月」，投資者應該點部署？ 勝利證券首席顧問陳建良指，特朗普上任後，市場一直關注佢係社交平台X慨言論，因為覺得佢係X講慨野都會執行，但經過呢幾個月，發現特朗普慨言論其實係一種討價還價慨策略，另一方面，美國總統慨權力係會受到限制，佢講慨野未必可以完全執行到，令市場反應愈黎愈平淡，KL相信，呢個情況將會持續。 港股方面，KL估計，要小心6月上旬第1個突破有機會係假突破，投資者唔好跟車太貼，亦唔好對一些消息太敏感，至6月下旬或會出現同美債及關稅慨傳言，佢又認為，6月盡量避免追細，亦可能會出現資金輪動情況。 |
|
| 陳建良 |
2025-05-21T15:29 |
三生製藥(01530)昨日(20日)日公布，同輝瑞(Pfizer)簽獨家許可權，而輝瑞有機會入股三生製藥，刺激三生製藥股價急升。個別藥股有正面消息利好整個板塊投資氣氛，內地藥企有一定水平，又有成本優勢，連外資都睇中，內地醫藥業前景係咪可以繼續睇好？ 勝利證券首席顧問陳建良認為，內地人口老化問題令醫藥需求增加，而人工智能(AI)協助開發新藥，逐漸取代進口藥物，因此，內地醫藥股長遠前景值得睇好。佢又指，現時唔少國家都傾向購買較平慨內地藥物，令內地藥企拿到更多出口生意。 不過，KL認為，內地生物製藥股或創新藥股慨portfolio唔及外國公司，而內地藥企又要持續面對內捲問題，令投資者會較難預測藥股走勢。佢提醒，對藥股有興趣慨投資者宜打散黎買，佢相信未來整體藥股慨市值膨脹機會仍然好高。 |
|
| 陳建良 |
2025-05-16T16:46 |
阿里巴巴(09988)上季收入按年增長逾6%，經調整EBITDA就按年增長逾35%，其中，淘天客戶管理收入(CMR)按年增長12%至710億人仔，好過預期，阿里股價今日(16日)顯著受壓，一度重挫6.6%，險守120元，到底業績出左咩問題？ 勝利證券首席顧問陳建良指，阿里第4季業績收貨，其中，電商業務表現唔錯，但電商盈利增速反映內地經濟及消費趨勢仍需時解決，亦要面對競爭對手京東集團(09618)、美團(03690)及拼多多慨補貼搶客，加上市場對人工智能(AI)投入及業績期望過高，又擔心電商業務可能會受美國小額包裹關稅影響，呢些都反映係股價上。 KL認為，阿里AI業務未來會受惠於阿里雲增長，但由於阿里雲佔比較細，僅約10%，依家佔比最大仍然係電商，因此，阿里需時修復估值。 |
|
| 陳建良 |
2025-05-02T14:57 |
近期不斷傳黎為關稅降溫慨消息，包括市傳美國多次釋出談判訊號，中方就回應指，依家正在評估，似乎中美展開談判現曙光，加上美國多家科技巨企季績靚，帶動股價業績後造好，繼而推升美股，其中，道指近期已自低位累計反彈逾3000點，今輪反彈可以持續幾耐？不過，關稅問題時好時壞，投資者應該點部署？ 勝利證券首席顧問陳建良認為，美股今輪反彈應該已接近尾聲，早前大跌係因為市場擔心關稅問題，但之後傳出中美談判消息，更指會大幅下調關稅，令市場開始變得樂觀，帶動美股反彈。 但KL認為，由於最終結果仍然係未知之數，因此，佢估計，美股5月市況會開始變Chok，但波幅會持續收窄，建議投資者高沽低買。 |
|
| 陳建良 |
2025-04-11T15:31 |
關稅戰升溫之際，美股連日大波動，上日(10日)公布的美國3月消費物價指數(CPI)反映通脹回落，減息憧憬提高，但國債孳息率仍沒有下跌，這些現象是否反映市場對美債及美金資產的可信性有所質疑？ 勝利證券首席顧問陳建良指，雖然昨日公布了CPI，但市場並沒有太大關注，核心CPI按年放緩到2.8%，全線回落，正常情況下通脹受控後會減息，國債隨之回升，但昨日CPI數據明顯回落，美債卻持續下跌，以往若面臨經濟衰退情況，資金都是流去美債和美金，但今次特朗普(Donald Trump)不斷升溫的關稅政策導致美債重挫，所以市場擔心美債現在是否還是終極避險資產。 KL又認為，美國現在面對兩難，情況可能會維持一段時間，而在特朗普暫緩部分國家關稅90日期間，金融市場的動蕩會稍微緩解，但稍後時間可能會再次緊張起來，不排除是由國債市場引起，或會引致流動性問題，投資者需要有些警惕性。 |
|
| 陳建良 |
2025-03-21T16:02 |
港股繼昨日(20日)急瀉逾500點後，今日(21日)仍未止跌，恆生指數更一口氣跌穿10天及20天線，插穿24000關，仲有約兩個星期就踏入第2季，點評估恆指第2季表現？Long Short策略合唔合適？ 勝利證券首席顧問陳建良估計，恆指第2季會係22800至25300點上落，依家港股Beta值正在下調，Beta值一般是用黎衡量一隻股份慨風險大，佢認為，第2季唔會出現齊升齊跌慨局面，個股表現會較為分化。 KL建議，做多些Long Short及區間交易(Range Trade)，過左3月又會有一批公司出業績，相信市場會較為理性，並會對業績有反應，因此，佢估計，港股第2季唔會暴瀉，但亦好難日日創新高。 |
|
| 陳建良 |
2025-03-07T17:59 |
「兩會」首次將穩住股樓寫入政府工作報告，而《新華社》亦係「兩會」開幕前發表一篇題為「習近平:我是一貫支持民營企業的」文章，係咪反映再度重視民企？另一方面，內地人工智能(AI)模型百花齊放，AI領域會唔會出現內捲情況？ 勝利瑞柏基金管理合伙人暨投資總監陳建良表示，中央領導層對民企態度改變，足以令成個市場恢復，因為好少國家只靠國企或資源壟斷性企業撐起成個市，因為好難產生一個好強勁慨增長，不過，因為民企有能力去嘗試唔同的機會，而環境又令佢地有呢個機會，呢方面係重要，今次政府工作報告加入股樓，意味未來對民企慨政策帶黎支持，其實樓市依家都穩定返，一線城市銷售都好返些，但依家冇乜人炒樓，已經幫到個市場，因為內地儲蓄率一向唔低，湧返些錢出黎已經好足夠了。 AI方面，KL認為，應著重會用到AI慨二線科技股。 |
|
| 陳建良 |
2025-02-21T15:54 |
阿里巴巴(09988)昨日(20日)派左一份亮麗慨季度成績表後，股價升勢持續，今日(21日)一度飆近15%，迫近140元關口，首席執行官吳泳銘指，未來3年會大增人工智能(AI)慨投入，睇返股價表現，市場除左滿意呢份成績表外，相信亦睇好集團AI發展前景，係咪都唔怕高追？此外，嗶哩嗶哩(B站)(09626)上市後終於首次實現季度盈利，股價前景係咪都可以睇好？ 勝利瑞柏基金管理合伙人暨投資總監陳建良認為，阿里業績都算交到貨，由於集團係AI方面投入咁多資金，依家阿里旗下通義千問及DeepSeek係大型語言模型相對較領先，加上阿里受惠於電商呢棵搖錢樹，所以市場會對阿里較有信心，繼而憧憬阿里慨AI發展，但佢又認為，投資者唔應該高追阿里，宜等股價回落返先再做部署。 B站方面，KL覺得公司錄得盈利，除左動畫方面受惠於AI，亦同Z世代用戶有關，因為隨著Z世代用戶成長，佢地慨消費力提升會帶動B站遊戲業務盈利，不過，同阿里情況一樣，B站股價已升左唔少，因此，投資者宜等股價回調後再入手。 |
|
| 陳建良 |
2025-02-07T18:24 |
恆生指數今日(7日)重上21000點，突破去年12月10日高位，暫時睇黎「中美貿易戰2.0」似乎港股冇乜影響，雖然恆指冇破頂，但港股今輪升勢相比去年9月至10月期間，內地推出救市組合拳時出現慨大升市，表現係咪更實淨？ 勝利瑞柏基金管理合伙人暨投資總監陳建良相信，今輪升浪同去年那浸升浪唔同，今次唔係一個流動性風險(Liquidity Driven)慨升浪，今次係市場擔心係咪有部分中資科技股及消費股慨Fundamental真係變好，投資者介乎信同唔信之間。不過，由今年1月到依家，恆指未有一日係升得特別多，依家係技術性牛市，投資者唔使太心急去追。 KL又指，可以等港股回一回氣之後，再留意市況如何，因為市場都追求增長，唔能夠一味靠平，同埋靠些錢衝入黎，依家大家開始覺得中國係人工智能(AI)方面有優勢，因此，市場會投資返非國企慨私人企業，令A股及港股市況好轉，不過，指數未必會反映相關情況。 |
|
| 陳建良 |
2025-01-17T16:17 |
依家全球焦點都落係特朗普(Donald Trump)身上，因為佢下星期一(20日)就會正式宣誓就任美國總統，市場非常關注佢慨政策，同埋針對唔同範疇及國家點出招，其中，加關稅會唔會係佢首要任務？稅率最終會唔會縮水，係咪早前傳出慨漸進式加關稅等，都係全球焦點。如果睇返金融市場表現，其中，美股近日表現都反映市場持觀望態度。 勝利瑞柏基金管理合伙人暨投資總監陳建良指，美股依家的確係相當觀望，市場過去一段時間已經對特朗普上場後慨政策作出唔同預測，美股係2024年10月就特朗普當選炒左一轉，依家外界就睇緊特朗普政策會唔會有副作用，同埋真係會執行。佢又話，美股跌得多又會彈返些，升得多又會回套少少，反映觀望氣氛都幾濃，例如美國通脹問題，市場有時好驚，但有時又覺得唔使太擔心。 KL估計，特朗普上任第1個月關稅政策就會出爐，但唔係「曬冷」一下子加60%關稅，應該係加少少，如果對方唔執行某些野或開放市場，90日或180日後再加關稅，其實特朗普好鍾意估一樣野，就係睇準對方「最痛那點」質落去，對方如果覺得痛，佢就會叫對方讓步，特朗普就會縮手，變相係佢冇做過乜野已有收穫，呢個係佢慨慣技。 |
|
| 陳建良 |
2025-01-10T16:05 |
公開招股超額認購近6000倍，史上第3大「超購王」，全城瘋搶慨玩具新股布魯可(00325)今日(10日)首掛，股價表現十分對辦，更一度變成「紅底股」。事實上，近期招股慨新股，好多隻認購反應都好熱烈，雖然呢些熱爆新股上市後，唔係隻隻都對辦有好表現，但係咪反映新股市場係2025年可以全面復甦？ 勝利瑞柏基金管理合伙人暨投資總監陳建良相信，內地監管當局未來會為更多內企境外上市「開綠燈」，香港就係主要選項，加上依家係美國掛牌慨中概股，亦有誘因黎香港上市，呢些股份會成為新股市場慨催化劑，佢估計，今年港股慨新股市場將會比前幾年熾熱。 KL補充，雖然新股類型多元化，亦預期今年會好多新股排隊上市，但優質慨新股好難抽得多，質素唔好慨又未必會入飛抽，加上部分新股上市後跌穿招股價，所以佢傾向觀望新股市場，好少「落場」抽新股。KL又提醒，不妨多留意新式零售股，因為業務較創新會有較大市場。 |
|
| 陳建良 |
2024-12-27T15:32 |
港股係年底終於收復20000關，2024年收爐時，恆生指數有機會扭轉連跌4年慨劣勢，依家市場正靜待應該係明年3月召開慨「兩會」，而「兩會」前會進入政策真空期，點睇港股2025年開局表現？係咪傾向睇淡？ 勝利瑞柏基金管理合伙人暨投資總監陳建良估計，中央將因應農曆新年期間整體消費，以及春節假後復工數據做部署，若消費數據向好，就唔需要推咁多刺激政策，反之亦然，所以的確會進入一個相對冇討談空間慨時間。 KL續指，估計恆指明年較大機會呈橫行格局，但同過往慢慢飄落去慨橫行唔同，因為外資唔會係經濟岩岩復甦後，就即刻投資港股及A股，所以佢認為港股明年唔會升好多，但亦唔會出現資金大舉流走或沽空慨情況。 佢又預期，港股明年板塊輪動會幾明顯，唔同板塊會輪流炒上，而且係短線升完一浸就跌，所以較難捕捉政策市反彈，佢建議投資者明年僅適量參與，唔好太進取。 |
|
| 陳建良 |
2024-12-13T15:40 |
港股昨日(12日)反彈，因為對中央經濟工作會議有憧憬，其中，內需股表現最搶鏡，不過，中經會結束後，恆生指數今日(13日)又跌過，午後更一度插穿20000關，瀉逾400點，可能同會議仍然冇提及一些實質數字有關，大行亦指，對中經會冇再提及具體樓市去庫存措施有些失望。其實中經會結果係咪預期之內？ 勝利瑞柏基金管理合伙人暨投資總監陳建良指，市場對中經會有兩方面慨預期，首先係希望中央擴大財政政策，結果冇提及，其次係希望有實際數字交代，但亦都冇公布，就令唔少投資者開始質疑，之前提出慨政策係咪可以令房地產市場止跌回穩。 KL又指，其實市場由始至終慨關注點都係中央救市、救經濟慨措施，到底成效有幾大，依家比唔到個預期市場，有負面反應都係好正常，佢估計，恆指20000關好難守得住，但大市波幅年底好大機會慢慢收窄返。 |
|
| 陳建良 |
2024-11-29T15:34 |
國家醫保局昨日(28日)首次就醫保藥品目錄調整舉行新聞發布會，並係會上公布2024年國家醫保藥品目錄調整情況及新版醫保目錄，醫保局指，會以「前所未有慨力度支持創新藥」，背後原因係咩？整體又對中國藥企有無幫助？ 勝利瑞柏基金管理合伙人暨投資總監陳建良指，內地首次舉行發布會係想表示國家會支持醫療板塊，令市民能夠買到新生物製藥。此外，醫保局亦容許新生物製藥適量加價。整體而言，國家希望令內地醫療水平上升，市民對未來慨憂慮減少，從而帶動消費上升。 KL續指，美國生物安全法案雖然禁止美國生物公司同中國企業合作，但歐洲一些福利較為完善慨國家，仍然需要靠中國生物製藥公司提供廉價藥物，因此，KL認為法案令美國藥廠成本提高，最終係損害緊美國，相反對內地其實係有利。 |
|
| 陳建良 |
2024-11-15T15:57 |
特朗普(Donald Trump)勝出美國總統大選後，內閣及主要官員提名陸續曝光，睇返呢份名單，班底都係特朗普忠實支持者，而唔少都係對華強硬慨人士，特朗普又揚言要打倒「深層政府」及掃清「官僚主義」，點睇呢個「特朗普2.0」班底？ 勝利瑞柏基金管理合伙人暨投資總監陳建良表示，對華鷹派慨魯比奧(Marco Rubio)獲提名做國務卿後，拖累恆生指數周二(12日)失守20000關，不過，KL認為唔使太擔心，因為民主黨同共和黨做法唔同，民主黨偏向透過各部長及官員同中國溝通，而魯比奧就偏向兩國政府元首直接對話，所以最終重要慨事務，較大機會由特朗普直接同國家主席習近平溝通。 此外，Tesla行政總裁馬斯克(Elon Musk)、企業家拉馬斯瓦米(Vivek Ramaswamy)將會聯手領導新成立慨「政府效率部」，KL認為，馬斯克將會大刀闊斧削減政府龐大慨開支及人手，有望令美國高企慨赤字回落，支持美元強勢，間接控制通脹。 |
|
| 陳建良 |
2024-11-06T16:42 |
若特朗普(Donald Trump)勝出美國總統大選，入主白宮，好有可能會隨即對華加徵關稅，對中國企業影響大，中央又會怎樣應對？有機會加碼刺激？ 勝利瑞柏基金管理合伙人暨投資總監陳建良指，加徵關稅主要影響中國出口企業或部分科技企業，因為晶片可能會受到限制，中央會加大財政政策，集中刺激內需，部分美國零售企業依靠中國內需，例如蘋果公司(Apple Inc.)及Starbucks。除了加大財政措施，中央亦會加大力度興建及推動科技及電訊基建。 |
|
| 陳建良 |
2024-10-18T16:27 |
港股近期坐過山車，恆生指數急升完又急挫，早前由17000點衝上23000點，之後又回調，恆指昨日(17日)一度插穿20000關，期間，有唔少外資留意返內地及香港市場，臨近年尾，外資開始部署明年資產配置，會唔會增加返中資股配置？ 勝利瑞柏基金管理合伙人暨投資總監陳建良認為，外資肯定會提高配置中國股票慨比例，因為從唔同跟資產配置有關慨會議中得知，唔少全球大型資金對中資股慨配置係市非常低，對沖基金更沽空股票，經歷今輪急升急跌後，估計資金唔敢再沽空港股及中資股，因為隨時有政策推出再刺激港股向上，因此，沽空A股及港股慨力度暫時偏細。 KL又話，資金重新流入A股及港股後，大部分都持觀望態度(wait and see)，但由於本身對A股及港股慨配置少，令資金傾向增持而非減持，加上美國總統大選臨近，加上中央係財政政策方面，未來會落實更多措施，相信外資2025年配置中資股慨比例將會上升，帶動A股及港股造好。 |
|
| 陳建良 |
2024-10-04T16:08 |
中央以出乎市場預期慨力度救市，令A股及港股牛氣沖天，截至8月底止，全球基金配置中國市場水平偏低，僅約5%，但隨出內地上月推出多項重磅救市措施，配置水平應有所回升，到底基金完成配置未？市場對救市力度係咪有信心？ 勝利瑞柏基金管理合伙人暨投資總監陳建良指，主動型基金配置至8月底係5%，可能係基於唔同原因Short左A股或港股，Short港股那些如果下面冇平倉都夾死左，所以估計那批應該已平曬倉。不過，如果要去返一個合理慨比重，情況應該要持續，又認為相關配置應該未完。 佢又話，當中央慨招數盡出後，就要觀察兩樣野，首先係政策力度係咪符預期，因為市場預期一直升溫，如果力度比預期大，個市會再抽上去，但可能好快就轉弱，如果力度比預期細可能會回調，所以係考驗決策者點樣拿捏市場及民眾慨水平。佢認為，現水平應該係未加完倉，但會唔會不問價咁加倉，佢估計，第一下可能已完成左大部分。 KL續稱，長倉基金配置唔會好心急，會等回調買入(Pull Back)，亦會趁呢個浪睇下邊些股份或經濟面會受惠，主要係仲有時間，同埋長倉配置唔可以齋睇momentum，雖然整體升浪未完，但現階段需要先抖一抖。 |
|
| 陳建良 |
2024-09-20T15:28 |
美國啟動減息周期後，港股連續第2日顯著造好，恆生指數衝破18000關後，升勢持續，今早(20日)一度突破18300點，升勢亦有成交配合，呢浸升浪算唔算有驚喜？ 勝利瑞柏基金管理合伙人暨投資總監陳建良指，港股今轉反彈幅度的確比想像中大，雖然成交增加，但同大市波動關係唔大，加上短期始終擺脫唔到上落格局，投資者對反彈慨態度亦變淡，所以今輪升勢唔算特別有驚喜。 KL又話，恆指依家慨反彈幅度唔會再好似4月、5月咁，唔好睇得太樂觀係呢個時候追貨，建議投資者今日做返止賺動作。 |
|
| 陳建良 |
2024-09-11T14:58 |
港股今日(11日)一度失守17000關，其後走勢反覆，事實上，港股一直冇乜起色，下半年係咪都好難樂觀？不過，美國聯儲局快將減息，如果唔係因為經濟衰而減息，理應會利好股市，港股可唔可以受惠？ 勝利瑞柏基金管理合伙人暨投資總監陳建良估計，港股下半年高位已經見左，即7月中高位，但下半年低位應該仍未見，估計最差慨情況下恆生指數會跌穿16000點，但再急挫機會亦唔大，始終估值低，但市場對內地經濟及企業盈利利前景都睇唔透，係資金唔太充裕下，恆指未來仍會「彈下跌下」。 KL又話，港股主要賣點係平，但睇返消費、經濟增長等數據，都擔心內地再陷入通縮，事實上，情況的確係唔明朗。 |
|
| 陳建良 |
2024-08-30T16:25 |
整個人工智能(AI)行業都睇住英偉達(Nvidia)份業績，雖然交到貨，但市場對Nvidia及AI行業慨期望愈黎愈高，AI行業開始達唔到市場慨高期望，對美股後市有咩影響？AI仲係唔係熱炒慨主題？ 勝利瑞柏基金管理合伙人暨投資總監陳建良指，相信納斯達克100指數今年已經見頂，道指及標指近期都係頂部徘徊，市場會形容為「板塊輪動」，美國聯儲局係通脹未完全受控之際開始減息，資金會轉投小型及價值型股份，2000年科網股爆破時都出現過「板塊輪動」，當時資金流出科技股，投資者要留意全球資金流出增長股或AI股，轉投估值較平兼高息慨股份。 |
|
| 陳建良 |
2024-08-16T16:02 |
長和系已陸續派發成績表，其中，長和(00001)及長實集團(01113)昨日(15日)公布業績後，股價今日(16日)向下，雖然市場對中期息減少有些失望，但未至於感到意外，面對現時慨經濟環境等因素，未來息率又點睇？有興趣入手長和系慨投資者又應該點揀？ 勝利瑞柏基金管理合伙人暨投資總監陳建良指，集團指派息係因應業務重估而定，長和及長實業務平穩，但仍面對頗大挑戰，股價折讓左唔少，希望公司可以定期派息，但認為派息係全球經濟放緩下，仍有機會再減少，不過，係現時慨經濟環境下，長實及長和營運已經做得非常好，只係市場任由股價繼續折讓，所以會對派息失望。 揀股方面，KL就話，長和系之中可以考慮入手港燈(02638)，其次係長江基建集團(01038)，值得留意係，長建下星期會係英國第2上市，有助提升成交量及減少折讓，收購及集資渠道亦會增加，都對股價有利。佢又認為，長建現時估值偏低，但相信市場會給予長建更合理慨價值。 |
|
| 陳建良 |
2024-08-02T17:51 |
最近投資市場氣氛及市況明顯轉差，加上美國最新公布慨經濟數據唔理想，對美國經濟陷入衰退慨憂慮升溫，令聯儲局會9月開始減息慨機會進一步增加，今年餘下慨3次議息會議，甚至有機會每次都會宣布減息，美股後市都好難樂觀？ 勝利瑞柏基金管理合伙人暨投資總監陳建良估計，美股應該已進入熊市，3大指數都已經見頂，過往冇通脹時，利率可以一次過減到零救市，但依家通脹仲未落到2%慨目標水平就開始減息，反映聯儲局今次「彈藥」有限。 KL又話，依家正值美股業績期，暫時出左慨業績有好有壞，但市場整體都係傾向睇淡，加上市場都心知肚明美息唔會不停減落去，所以焦點即時轉移睇返經濟轉差慨倩況會維持幾耐，因此，佢估計，美股應該會再調整得深些。 |
|
| 陳建良 |
2024-06-21T16:15 |
美股3大指數昨晚(21日)個別發展，其中，標指及納指創新高後倒跌收市，主要受人工智能(AI)晶片股王英偉達(Nvidia)股價大幅波動影響，Nvidia昨晚早段再破頂，但收市倒跌3%，係咪同「四巫日」(Quadruple Witching Day)效應有關？ 「四巫日」即指數期貨、指數期權、個股期貨及個股期權同日結算，於每年3月、6月、9月、12月的第3個星期五進行，而今晚(21日)就係第2季度慨「四巫日」。 勝利瑞柏基金管理合伙人暨投資總監陳建良指，Nvidia屬於大市值股份，股價兩個月前仲升1倍，唔排除美股指數會係短時間內形成一個「階段性頂部」，而「四巫日」最大影響係，當中有好多價內期權(in the money call option)到期，相信大市之後會變得波動。 至於應唔應該趁低吸納Nvidia，KL又話，Nvidia升到咁高，帶挈唔少類似慨晶片股一齊升，但睇Nvidia呢隻股份最好小心些，現階段唔太建議趁低吸納。 |
|
| 陳建良 |
2024-06-14T15:33 |
周大福(01929)全年業績出爐後，股價今朝裂口低開，早段更一度急挫10%至逾3年低位，低見8.47元，午後仍跌約9%。 市場原本憧憬周大福派發95周年特別息，但最終落空。其實，集團現金及等價物已經連續2年減少，於2024財年減少40億元至約76億元，集團亦解釋目前市況波動、利率高企，需要更穩健地管理財務。 周大福2025年財年指引營業額按年持平或小幅增長，勝利瑞柏基金管理合伙人暨投資總監陳建良認為，市況不穩下趨向更保守的經營策略，雖然對公司長遠發展有好處，但現時投資者傾向短線獲利，當公司業務狀況短期內未見明顯好轉，便會借業績消息回套。 KL續指出，周大福估值不算低，預測市盈率(PE)逾11倍，加上市場難以判斷公司造黃金淡倉，是單純為了對沖金價波動，還是趁機賭金價升跌來獲利，憂慮今年業績繼續受累相關投資虧損，而選擇先行沽貨離場。 |
|
| 陳建良 |
2024-06-05T18:47 |
摩根士丹利最新一份有關內地經濟慨報告提及，內地新盤仍有需求，內房爆煲程度亦唔及1990年日本泡沫經濟爆破咁嚴重，救樓市對內地經濟可唔可以走出困局極之重要，係咪要等到7月三中全會先會再出招？之前會唔會再出台刺激經濟政策？ 勝利瑞柏基金管理合伙人暨投資總監陳建良指，內地救樓市慨政策變得較鴿派，令樓市唔會大跌，依家內房慨情況已穩定左，所以房企連環倒閉慨機會好微。佢又話，三中全會一般都會有政策出台，但落實需時，KL建議投資者要繼續觀望，同埋唔應該持有太多貨，但亦唔需要清倉。 佢睇好慨股份大部分唔係指數成分股，首先呢些股份市值唔會太大，通常唔超過500億元，其次係股價接近52周高位，即使恆生指數跌到14000點，呢些股份抗跌力較大，最後係唔會受內捲影響太大，海外業務又增長快。 |
|
| 陳建良 |
2024-05-24T16:47 |
美股上周破頂，其中，道指衝破40000關，港股亦自低位反彈3700點，不過，美股昨晚(23日)因經濟數據強勁，令市場減息預期再降溫，拖累3大指數全線跌，其中，道指收市瀉逾600點，單日表現係1年最差，標指及納指跌幅相對溫和，港股今日(24日)都要跌，暫時已連跌第4日，出現呢輪調整係咪都唔意外？ 勝利瑞柏基金管理合伙人暨投資總監陳建良指，唔可以用「調整」形容近日慨跌勢，依家唔係牛市，更應該以「升市」去看待，因為牛市意味股市跌就要撈、升都唔減持，相反，係「升市」期間跌就要減磅。 KL認為，港股4月底展開慨升浪已經完結，依家要視為跌市，所以唔係「調整」，而係跌市開端，至於會跌幾多，睇返港股過往慨模式，「升得快，跌得慢」，相信唔會跌得好急，股價會先反覆波動，估計最少會跌到17000點水平。佢又提醒，唔夠貨或買夠貨慨投資者不宜撈貨，尤其係指數股。 |
|
| 陳建良 |
2024-05-10T15:54 |
中央擬再出招撐港股，《彭博》係港股昨日(9日)收市後報道，指內地考慮減免內地投資者炒港股慨股息稅，瑞銀及中金清楚列出現行慨股息稅政策，內地投資者最多會被徵收28%股息稅。雖然消息仍未證實，但港股今日(10日)表現興奮，恆生指數一度飆逾450點，逼近19000關，港交所(00388)股價更一度衝高8%，一旦落實推出，利好作用真係咁大？ 勝利瑞柏基金管理合伙人暨投資總監陳建良指，其實只有內地個人投資者及證券投資資金，透過港股通投資慨紅籌股及非H股慨中資股，先會雙重徵稅，H股就完全冇關，所以真正受惠主要係投資高息紅籌股慨內地個人投資者，股份就包括中國移動(00941)、上海實業控股(00363)及中國建築興業(00830)，科技股就差少少。 KL又話，係現時資金輪動，冇特定趨勢下，如果想入市或追貨，就建議追落後股，因為緩衝空間大些，不過，大落後慨板塊就比較危險，例如內房及電動車板塊。 |
|