Commentator |
Time |
Content |
Tag |
聶振邦 |
2024-07-26T12:05 |
美股持續波動,科技股未止跌,拖累納指連跌第3日,市場對美國經濟前景憂慮加劇,加上美國總統大選不確定性增加,投資者開始拋售估值高慨「科技7雄」(Magnificent Seven),昨晚「7雄」中有6隻要跌。值得留意係,依家納指100已較前高位回調近10%,而2023年急升後回調逾10%,之後就重拾升勢,今次會唔會出現相同情況? 博威環球證券金融首席分析師聶振邦指,納指係前兩次業績期都出現過係低位反彈慨情況,原因係美元偏強,加上持續有利好消息,令納指反彈可以持續得比較耐,不過,今次由於Netflix及Tesla出完業績股價都要跌,主要係市場普遍唔睇好今季業務前景,所以唔好對納指可以反彈有太大期望。 聶Sir又話,短線而言,科技股有機會持續走弱,估計資金會流入美債,10年期債息倒掛幅度都持續收窄。 |
|
聶振邦 |
2024-07-23T15:29 |
截至早上11時止,1小時內《彭博》用戶搜尋量最多港股,依次為比亞迪股份(01211)、金沙中國(01928)、路勁(01098)、港交所(00388)及中遠海能(01138)。 比亞迪再被「股神」巴菲特(Warren Buffett)旗下投資旗艦巴郡(Berkshire Hathaway)減持,持股量降至4.94%,意味日後再沽貨唔使再申報,「股神」最終係咪會清倉? 博威環球證券金融首席分析師聶振邦指,巴菲特減持比亞迪係有跡可尋,唔夠兩年持股量由8%降至不足5%,佢估計,由於之後唔使再申報,相信巴菲特會繼續沽貨。 聶Sir續指,政治因素係巴菲特減持主因,除左美國,歐盟亦對中國進口電動車加徵關稅,所以睇淡內地新能源汽車慨發展前景,因為會繼續受複雜慨政治形勢影響。 比亞迪股價今日(23日)一度挫4%,低見236.2元,佢指出,一旦特朗普(Donald Trump)再入主白宮,都會不利內地車企,聶Sir認為,比亞迪股價係230元有支持,建議回落至230元水平先考慮吸納。 |
|
聶振邦 |
2024-07-22T18:33 |
康龍化成(03759)發盈喜,預期上半年多賺最多45%,最少賺逾10億人仔,值得留意係,中期盈利有一半來自出售事項,若扣除集團向強生公司(Johnson & Johnson)出售旗下藥物開發公司Proteologix慨收益,實際淨利潤跌36%至41%,不過,康龍股價今日(22日)照升,一度升逾8%,高見9.43元。 博威環球證券金融首席分析師聶振邦指,相比首季經調整盈利按年跌逾22%,若計及股息收益,康龍股價今年已調整逾40%,已充分反應盈利倒退因素。此外,市場原本預期醫藥外包研發(CRO)行業上半年表現麻麻,但康龍中期盈利已等同去年一半,令市場憧憬下半年增長會更勁。佢又認為,康隆股價開始轉強,估計升至10元至10.5元先會遇到阻力,可以考慮現價買入,如果保守些可以等股價回落至8.8元以下先再買貨。 聶Sir續指,憧憬行業下半年基本面向好,今日成板CRO股都有得升。 |
|
聶振邦 |
2024-07-19T12:14 |
市傳美國總統拜登(Joe Biden) 被要求退選,依家市場消息滿天飛,美國總統大選會唔會令金融市場持續出現震盪? 此外,內地近期出爐慨經濟數據欠佳,係咪會持續困擾港股? 博威環球證券金融首席分析師聶振邦指,跟拜登關係友好慨前眾議院議長佩洛西(Nancy Pelosi),以及前總統奧巴馬(Barack Obama)都勸退拜登,因此,市場認為佢好大機會退選,極有可能由民望較高慨副總統賀錦麗(Kamala Harris)出戰,佢又認為民主黨形勢未必係一面倒。聶Sir提醒,環球股市未來一至兩周走勢,有機會受環球貿易及地緣政治影響,所以唔好單睇美國大選。 內地經濟方面,聶Sir指出,早前公布慨經濟增長及「三頭馬車」數據都偏弱,令市場對內地經濟情況憂慮升溫,另一方面,若歐美等國家針對中國晶片慨限制不斷「加辣」,一定對內地科技發展造成阻礙,加上人仔今個星期仍然弱勢,人民幣走弱,都不利港股表現。 |
|
聶振邦 |
2024-07-15T18:13 |
重卡股濰柴動力(02338)發盈喜,預期中期盈利按年最多升約60%,受消息刺激,濰柴股價今日(15日)最多逆市升5%,早段高見13.14元,收市仍升1%,報12.64元。 博威環球證券金融首席分析師聶振邦認為,濰柴繼去年純利按年大升逾80%後,今年上半年再錄得雙位數增長,業務表現相當強勁。不過,內地經濟前景仍未明朗,佢預期,集團下半年難以突破去年同期慨高基數。 聶Sir續指,雖然濰柴股價升至高位後,唔少投資者趁好消息出貨,但睇返基本面,集團慨氫能電池業務,估計可受惠於國家推動新型能源政策,濰柴股價今年曾借氫能概念炒上17元,加上派息唔錯,股息率約4厘,有一定防守性,建議待股價回落至12元後入手,下半年目標價睇14.5元至15元。 |
|
聶振邦 |
2024-07-12T11:35 |
美國通脹降溫,6月消費物價指數(CPI)按年升3%,扣除食品及能源慨核心CPI按年升3.3%,兩者都低過預期,令聯儲局9月減息理據增加,但投資者趁好消息獲利,美股3大指數昨晚(11日)個別發展,其中,標指及納指向下,美股近期主要靠「科技7雄」(Magnificent 7)撐住,但見到資金都開始流向中小型股,係咪可以考慮做相關部署? 博威環球證券金融首席分析師聶振邦指,美股近排表現一般,加上炒作減息憧憬已接近尾聲,通脹相關利好消息令科技股普遍受壓,所以資金都要搵新出路,令中小型股成為新關注點。 不過,聶Sir提醒,雖然資金依家偏向流入中小型股,但估計呢類股份升勢唔會持續得好耐,而波動性亦比較大,投資者落注時需留意。 |
|
聶振邦 |
2024-07-04T19:12 |
港股繼續上落格局,不過,個別覆銅板產業鏈股份近日開始異動,其中,建滔積層板(01888)股價借外圍行業消息炒作,今日(4日)早段最多升逾6%,高見8.73港元。 原來有南韓高端覆銅板及銅箔供應商日前獲英偉達(Nvidia)確認產量,是次供應慨HVLP銅箔可用於人工智能(AI)加速器,簡單而言,即發展AI會增加對高端銅箔慨需求。建滔3月中慨去年業績亦提及,旗下高端覆銅板相關產品剛完成開發,正跟客戶進行全面測試,意味有機會於未來數年量產。 博威環球證券金融首席分析師聶振邦表示,台灣中低階覆銅板生產商因AI伺服器急速發展,導致產能緊張而開始加價。佢相信,未來2至3年覆銅板慨行業前景樂觀,而建滔覆銅板業務去年貢獻集團98%收入,達160億元人仔,料將受惠環球再漲價趨勢。 股價方面,聶Sir認為,若建滔後市企穩10港元以上,未來1年目標價可以睇14港元,即2020年6月慨高位。 |
|
聶振邦 |
2024-06-28T11:58 |
美國昨晚(27日)出爐慨經濟數據欠佳,其中,消費開支要向下修訂,新申領失業救濟人數係2021年11月以來最多,今晚(28日)就會公布核心個人消費支出(PCE)物價指數,若升幅放緩,會唔會令美國聯儲局減息預期升溫? 美國經濟係咪已開始步入衰退? 博威環球證券金融首席分析師聶振邦指,經濟增長同物價走勢呈正向關係,所以當經濟數據較差時,物價回落機會亦相對較大,現時聯儲局9月減息機會近60%。換言之,當數據唔理想時,反而會令減息憧憬升溫,亦會對美股有較大支持。 至於美國經濟情況,聶Sir指,一旦步入減息周期,意味貨幣政策趨向寬鬆,會對經濟帶來正面作用。佢又話,美國經濟今年陷入衰退慨風險唔大,雖然未來一至兩年仍有相關風險,但當步入減息周期,形勢將會有變,又認為現時毋須過分憂慮。 |
|
聶振邦 |
2024-06-24T17:03 |
海底撈(06862)同特海國際(09658)出現高層人事變動,海底撈首席執行官楊利娟辭任,將由苟軼群接任,楊利娟將會加入特海,消息拖累海底撈股價今日(24日)一度大跌逾7%,低見14元,是表現最差藍籌,相反,特海股價愈升愈有,午後升幅進一步擴大,勁升13%,高見13.56元。市場係咪擔心兩家公司經營策略將會出現重大轉變?海底撈冇左楊利娟,業績會唔會轉差? 博威環球證券金融首席分析師聶振邦指,今日餐飲股表現麻麻,所以海底撈其實只係跟其他火鍋股行,特海今日表現一枝獨秀,反映市場對今次人事變動有憧憬,因為楊利娟出任海底撈首席執行官後,海底撈財務狀況明顯有改善,所以市場憧憬佢能夠令特海表現更上一層樓,盈利有望增加。 聶Sir認為,海底撈新首席執行官苟軼群經驗老道,加上同員工關係穩定,因此,海底撈未來業務及風格未必有太大變化。不過,由於楊利娟上任時,海底撈進行兩大改革,若苟軼群會同樣相應計劃,或會令市場有憧憬。 |
|
聶振邦 |
2024-06-21T11:17 |
商湯(00020)股價自4月上市低位,即0.58元反彈至現水平,累升逾1倍,集團開市前出左通告,計劃配售約16.7億股新B類股,配股價1.2元,較昨日(20日)收市價折讓約9%,集資淨額近20億元,主要用黎支持生成式人工智能(Generative AI)進一步發展,到底商湯AI業務值唔值得憧憬? 博威環球證券金融首席分析師聶振邦指,AI已經係全球焦點,如果要係AI算力上具競爭力,一定要投放大量資金做科研,由於商湯股價已上返正常水平,所以今次配股唔會對股價構成好大壓力。 聶Sir又話,商湯股價暫時係1.15元至1.35元徘徊,當市場消化完配股消息,又或者集團之後再推出新產品,都會對股價有提振作用,短線仍可以睇得樂觀少少。 |
|
聶振邦 |
2024-06-17T18:32 |
大家樂集團(00341)今日(17日)中午出左業績,股價午後由跌轉升,集團全年純利增長近2倍至3.3億元,撇除政府疫情資助,經調整純利大增近3.8倍,不過,去年純利同2019年慨逾5.8億元仍相差好遠,係成本太高?還是其他原因導致盈利相差一大截? 博威環球證券金融首席分析師聶振邦指,其實主要同工作模式改變有關,疫情後在家工作(work from home)愈來愈普及,原本每星期要返Office返足5日,依家可能只需返3至4日,其他時間就WFH,呢種工作模式會令打工仔外出食飯需求減少,因而影響大家樂慨純利表現。 聶Sir又指,成本係另一個原因,因為大部分食品供應商都想追返疫情期間,即3年慨損失,導致大家樂要硬食較高慨來貨價,利潤無可避免會受損。 佢認為,大家樂應透過增加收入,應對來貨價問題,除左直接加價,亦可以考慮加入一些有噱頭慨食品及新套餐,又或者同其他IP品牌合作,吸引多些年青人去大家樂食野,相信會對提升集團毛利率有幫助。 |
|
聶振邦 |
2024-06-14T11:04 |
蘋果(Apple Inc.)再創收市新高,蘋果全球開發者年會(WWDC)後連升幾日,市值已去到3.285萬億美元,不但反超英偉達(Nivdia),亦超越微軟(Microsoft)成為全球市值最大企業,市場對蘋果遲來的人工智能(AI)發展仍然充滿信心?股價後市走勢又如何? 博威環球證券金融首席分析師聶振邦指,消息利好蘋果股價,蘋果帶領手機發展的潮流,市場對蘋果業務前景樂觀,雖然昨日(13日)收市價創新高,報214.2美元,但對應股價最高位220.2美元稍為低,加上技術走勢出現「十字星」及陰燭,投資者要留意未來兩個交易日能否企穩220美元以上,否則會在200美元左右整固。 |
|
聶振邦 |
2024-06-07T11:36 |
美團(03690)首季業績強勁,遠超市場預期,經調整溢利按年增長36%,收入就按年增長25%,值得留意係,新業務美團優選虧損大幅收窄約40%,美團出完業績後,最少獲8家大行上調目標價,反映呢份業績市場都收貨。此外,科網股近期紛紛行可轉換優先票據(CB)「抽水」,但美團表明冇意跟隊發CB,係咪代表已掃除呢個風險? 博威環球證券金融首席分析師聶振邦指,美團去年第4季表現已畀到市場信心,所以股價都有支持,暫時可以先留意125元水平,如果今個月上到130元,後市可以睇得更樂觀,如果想穩陣些可分兩注買入,現價先買一注,再等股價企穩125元樓上再加注。 聶Sir續指,就算美團發CB,其實股價早已反映呢個因素,集團業績交到貨之餘,又有咁大行撐,消息面上仍然係利好為主。 |
|
聶振邦 |
2024-06-03T17:02 |
政府收返恆基地產(00012)兩幅農地,集團會獲得逾57億元現金補償,其中,洪水橋被收返350萬呎土地後,恆地係洪水橋新發展區仲有約300萬呎農地,集團話會繼續發展洪水橋餘下慨土地儲備,又預期今次收地合共帶黎基礎稅前盈利約31億元。 博威環球證券金融首席分析師聶振邦指,現時本港經濟不確定性高,獲得呢筆收地補償令恆地財務狀況更穩健,無論呢筆錢點用,都可以優化集團今年慨財政狀況。 聶Sir又指,今次恆地被收回都係農地,如果自行開發需要較長慨周期做準備,到時樓市係咪暢旺,銷情係咪理想都有好多變數,政府今次收回逾300萬呎土地,若未來經濟好轉,就可以有地可用,係一個攻守兼備慨安排,因此,恆地今次被政府收地,整體黎講都係利好消息。 |
|
聶振邦 |
2024-05-31T11:26 |
雖然美股近期連日急挫,但3大指數今個月累計仍有得升,但走勢似乎轉差,係咪有資金獲利離場慨情況?坊間一直話「Sell in May」,如果真係有呢個情況,係咪要6月以後先反映? 博威環球證券金融首席分析師聶振邦指,基本上係出現左「Sell in May」呢個情況,現時美股缺乏利好消息,所以市場將焦點逐步轉移至經濟數據,不過,數據表現又似乎傾向負面較多,令投資者沽貨意欲大增,同美股慨走勢形成一個反差,因此,資金由股市轉投債市亦唔奇怪。 聶Sir又話,傳統股沽壓相對較大,導致道指幾乎冇得升,反觀由科技股主導慨標指及納指都有得升,而係AI晶片股王英偉達(Nvidia)仍算強勢下,可以保持住科技股慨指標性。 |
|
聶振邦 |
2024-05-27T16:39 |
內地媒體引述企業信息平台《天眼查》,俗稱「大基金」的國家集成電路產業投資基金三期股份成立,註冊資本3440億元人民幣,中芯國際(00981)亦有受惠,根據研究機構數據顯示,中芯全球市場份額升至6%,不過仍然落後台積電和三星電子,中芯年初至今股價表現明顯落後,但國產晶片因素,再加上內地需求,中芯仍然有一定前景? 博威環球證券金融首席分析師聶振邦指,內地經濟是否有復甦跡象有待觀察,以內需表現而言,晶片價格有所回升,令中芯前景似乎稍為理想;但以國際形勢而言,台積電和三星電子仍然主導,如果中芯要發展海外市場,仍要留意歐美以外地區影響力,至於中芯今年業績會否回升,取決於內地經濟表現會否有強勁增長勢頭。 |
|
聶振邦 |
2024-05-24T10:50 |
港股近日持續向下,恆生指數3日累跌逾700點,昨日(23日)更插穿10天線,失守19000關,20天線係咪危危乎?港股之前慨升勢全靠新經濟股帶動,但值得留意係,繼京東集團(09618)後,又輪到阿里巴巴(09988)發可換股債券(CB),呢個情況會唔會拖累港股表現及投資氣氛? 博威環球證券金融首席分析師聶振邦指,恆指今日(24日)的確有機會下試20天線,要留意18500點有冇支持,如果守得住反映整體升勢仍未被破壞,相反,4月以黎慨升浪可能會結束。 聶Sir又話,要留意未來會唔出現一個發CB浪潮,如果陸續有大型科技股跟隨,就會令港股沽壓更明顯,亦要關注國策,如果再有救內房及谷零售政策推出,後市可以睇得樂觀些,如果冇呢些消息,投資者就會傾向獲利離場。 |
|
聶振邦 |
2024-05-20T17:30 |
零跑汽車(09863)今日(20日)跑贏大部分新能源車股,股價最多升近9%,高見34.1元,衝上逾3個月高位,收市仍升逾6%。 公司上周五(17日)收市後出季績,首季按年虧損及毛損率收窄,收入則大升1.4倍,交付量更升2.1倍至逾3.3萬部,惟按季表現較遜色,毛利率由去年第4季慨6.7%重返負增長,零跑解釋係受累促銷及銷量下跌,推升平均製造成本。 博威環球證券金融首席分析師聶振邦認為,雖然零跑季績差少少,但按年表現有亮點,首季汽車平均售價逾10萬人仔,相比理想汽車(02015)或小米集團(01810)20萬人仔起跳慨價錢,有更大提價空間,加上業績提及拓展海外業務慨部署,令人憧憬今季單價同「出海」有助收入增長,進而改善毛利率。 聶Sir又指,今日新能源車股成板升,或因為市場對行業前景轉趨樂觀,已消化減價戰消息,加上最近幾個長假期慨消費市道見改善,而零跑股價落後,較去年底仍累跌約5%,就引黎有資金追落後。 |
|
聶振邦 |
2024-05-17T11:10 |
美國長債息再次落後短債息,市場擔心經濟好快陷入衰退,美國零售巨企沃爾瑪(Walmart)昨晚(17日)出左首季度業績,上季按年多賺逾2倍至51億美元,好過預期。此外,集團又睇好業績前景,上調2025年財年收入及盈利預測,不過,係消費者態度轉趨慎審下,投資者係咪唔應該對美股後市睇得太樂觀? 博威環球證券金融首席分析師聶振邦指,短期唔好期望美股會有好明顯慨升勢,始終美國經濟有衰退風險,市場對消費者購物模式慨轉變關注度高,而當物價高企時,就要留意勞工市場,因為唔少大型企業仍間歇性裁員,暫時睇黎美國經濟「軟著陸」慨不確定性仍然較高,即使美股隔晚(16日)有得升,但佢認為,後市最多只會係高位徘徊。 |
|
聶振邦 |
2024-05-13T17:14 |
美國總統大選愈來愈近,上周先傳出拜登政府將會向中國電動車「開刀」關稅,據《彭博》最新引述華府消息報道,針對中國電動車慨關稅,將會由27.5%大幅調高近4倍至102.5%,而部分其他貨品關稅亦會大增至2至3倍。電動車股今日(13日)繼續「死火」,但已經較上周跌少左,其中,比亞迪股份(01211)一度跌2.4%,其後幾乎完全收復失地,係咪加關稅慨影響其實唔大? 博威環球證券金融首席分析師聶振邦指,前總統特朗普(Donald Trump)任內已加過關稅,其後被世界貿易組織(WTO)裁定違反世貿規則,所以今次再加關稅未必會咁順利,當中存在一定變數。此外,據內地電動車龍頭比亞迪年報顯示,依家內地收入佔整體收入四分之三,境外只佔四分之一,而二線或三線電動車企都以內銷為主,海外業務唔,因此,即使華府落實大加關稅,對內地電動車企亦影響唔大。 |
|
聶振邦 |
2024-05-13T15:38 |
截至早上11時止,1小時內《彭博》用戶關注度上升最多港股,依次為長城汽車(02333)、世茂集團(00813)、永利澳門(01128)、碧桂園(02007)、藥明生物(02269)。 據外媒報道,長汽計劃係匈牙利設廠研發新能源車,股價今早(13日)一度升8%,高見13.5元,跑贏其他車股,衝上逾年半高位,長汽新能源車1月至4月銷量佔整體22%,其中,海外銷量佔近35%,不過,主席魏建軍上周五(10日)預期,行業未來3年競爭持續激烈,加上美國及歐盟不斷推出針對內地電動車慨打壓措施,點睇股價前景? 博威環球證券金融首席分析師聶振邦指,長汽設廠消息配合國家主席習近平近日出訪匈牙利,的確可以提振股價,雖然歐盟有機會啟動針對內地新能源車慨調查,甚至制裁,而美國已率先出手,的確不利內地新能源汽車係海外市場慨發展,不過,屬於東歐慨匈牙利市場應可「避過一劫」,所以市場對消息慨解讀仍唔算負面。 聶Sir又話,長汽股價上月累升逾37%,5月暫時累升逾11%,加上市盈率(PE)僅約10倍,相信股價仍有上升空間,後市有力上望14.5元至15元。 |
|
聶振邦 |
2024-05-10T12:14 |
美國上周新申領失業救濟人數係逾8個月以來最多,美元及美債息齊跌,主要係市場對經濟放緩慨預期升溫,炒減息憧憬,減息預期持續困擾股市,不過,之前一度炒作聯儲局今年可能會加息,因為通脹仍然高企,市場依家係咪減息、加息輪住炒? 博威環球證券金融首席分析師聶振邦指,減息始終係市場焦點,唔止美國,幾時減息係英國及歐元市場慨關注度都較高,雖然英倫銀行昨晚(9日)議息後維持利率不變,但行長貝利(Andrew Bailey)話,唔排除6月會減息。另一方面,歐元區消費物價指數(CPI)持續回落,逐漸接近2%慨通脹目標,所以歐洲央行(ECB)有搶閘減息慨可能,令美國短期內有機會減息,市場氣氛就炒起黎。 |
|
聶振邦 |
2024-05-06T17:26 |
雖然《生物安全法案》已係美國參議院壓倒性通過,藥明系股價一度急瀉,但要總統拜登簽署成為法案仍要過好多關,其中1名發起法案慨議員已經離任,藥明康德(02359)指,至今未有重大項目被取消或影響新項目,反而首季有40%新項目來自歐美客戶。不過,摩根大通下調集團今年收入預測及目標價,如果想部署藥明生物(02269)及藥物康德要留意乜野? 博威環球證券金融首席分析師聶振邦指,法案對藥明系影響唔大,其中,已出左首季業績慨藥明康德表現唔差,但受法案影響,收入及純利都減少,但歐美業務收入同比有增長,加上內地經濟回穩,相信藥明生物及藥物康德上半年業績唔差。 聶Sir又話,依家藥明康德市盈率(PE)僅約9倍,股價下一個阻力介乎45至50元,現價買入風險唔算大,如果想再穩陣些,可以係35至36元做部署,至於藥明生物現價跟3月高位,即22元水平仲有好大距離,係16至16.5元會有阻力,所以可以吼13.5至14元買入。 |
|
聶振邦 |
2024-05-03T10:51 |
蘋果公司(Apple Inc.)昨晚(2日)出左第2財季業績,市場最關注慨iPhone銷售跌逾10%,但其實都係市場預期之內,集團又公布歷來最大規模,高達1100億美元慨回購計劃,又宣布增加派息,刺激Apple股價盤後一度飆逾7%,到底呢個史上最大規模回購計劃,可唔可以以令Apple股價起死回生? 博威環球證券金融首席分析師聶振邦認為,Apple股價已連跌5個月,加上股息相對低,即使股價跌到咁,股息率都唔夠1%,但相信咁大規模慨回購計劃可以穩定返股價。Apple股價上月高位約178美元,噚晚收報173.0.3美元,短期有機會彈上180美元樓上,即上返前兩個月慨高位180至185美元。 不過,聶Sir提醒,美股投資氣氛開始轉弱,所以唔好對Apple慨反彈力度有太大憧憬,而有意入市慨投資者亦要控制注碼。 |
|
聶振邦 |
2024-04-29T16:25 |
友邦保險(01299)今日(29日)開市前出左首季業績,新業務價值創季度新高,公司又宣布股份回購計劃加碼20億美元至120億美元,又宣布改善資本管理政策,透過股息及股份回購向股東返還資本。雖然友邦每年派息都有增長,但股息率唔高,據《彭博》數據顯示,依家股息率唔夠3厘,係咪想透過提升股東回報留住股東?派息係咪有望逐步增加? 博威環球證券金融首席分析師聶振邦指,睇返新業務價值走勢,今年都應該會有增長,但增速可能會放慢。友邦財政狀況唔錯,加碼回購會釋出一個訊號,就係股息分派或會出現上調趨勢,對股東及潛在投資者黎講係會增加吸引力。 股價方面,聶Sir話,友邦股價之前持續弱勢,兩個新消息都有助股價回穩,但如果要有好大提振作用,始終要睇未來業績係咪可以持續高增長。技術走勢上,佢就話,友邦股價可能係60元有阻力,如果今個星期可以企穩,「五一黃金周」後有機會逐步上試63至65元位置。 |
|
聶振邦 |
2024-04-26T11:55 |
美股繼續處於業績期,Alphabet原先股價都係跌住收市,但出左業績後,盤後升逾10%,收入和純利都有正面升幅,業務方面,無論廣告收入、服務收入、雲服務收入數據都好過預期,係咪可以支持Alphabet股價繼續創新高? 博威環球證券金融首席分析師聶振邦指,呢些數據的確係可以帶動Alphabet股價表現,而相對比較驚喜慨就係派息方面,首次派息亦反映現金流比較強,加上回購亦見財政狀況良好,市場樂觀情緒升溫,所以今晚可以延續盤後升勢慨機會較大。 雖然數據令人滿意,但人工智能(AI)熱潮之下,Alphabet又好似冇乜亮點,市場又點睇? 聶sir話,Alphabet慨焦點未必係AI,因為都見到有唔少其他利好因素,市場關注點並無落係AI身上,但本身Alphabet客戶基數大,即使出左AI服務之後,相信亦會有唔少用戶去使用,前景目前仍然樂觀。 |
|
聶振邦 |
2024-04-24T17:23 |
天齊鋰業(09696)股價逆市破底,AH兩股齊齊急插。天齊料盈轉虧蝕逾36億,公司歸咎慨其中一個原因係鋰產品售價下跌,令毛利率大幅下跌至不足85%,反映左些咩?大摩預料天齊有原材料庫存撥備仍未完成入帳,要繼續撥備機會係咪都大? 博威環球證券金融首席分析師聶振邦指,毛利率80%以上已經算係利潤偏高產業,呢個情況都錄得虧損,證明營運成本相對較高,如果天齊唔處理,估計未來一至兩年業績唔會理想。 聶sir續指,新能源汽車不斷有減價戰,反映行業可能有產能過剩情況,除非鋰電池係新能源汽車以外有非常廣泛慨用途,或新能源汽車產業有明顯銷量改善,天齊先可以有改善狀況,所以估計天齊第2季撥備壓力會大。 |
|
聶振邦 |
2024-04-22T16:49 |
中國財險(02328)下周一(29日)出業績,今日(22日)股價急跌最多5%,見兩個月低位,失守100天線,雖然已經連跌兩個月,不過年初至今仍升4%,跑贏中國平安(02318)、中國人壽(02628),亦都跑贏大市,後市走勢會係點? 博威環球證券金融首席分析師聶振邦指,中國財險有一定優勢,過去5年業績每年盈利都超過200億元人民幣,表現平穩,市盈率亦維持8倍以下,估值吸引;另外,市場預期財險第一季淨利潤跌8%至87.5億元人民幣,亦唔算太差,加上大行目標價有12元左右,反映市場對財險股價仍然睇高一線。 聶Sir又話,財險股價要到下半年先會回升到市場預期水平,建議可以係9元至9.2元之間入手。 |
|
聶振邦 |
2024-04-19T11:30 |
美股3大指數昨晚(18日)個別發展,其中,納指已連跌5日,但台積電(TSMC)昨日(18日)出完季績後,都幫到英偉達(Nvidia)股價靠穩,值得留意係,台積電進一步睇淡行業增長前景,又預期集團第2季收入增長唔及第1季,對行業有咩啟示?此外,係美股噚晚收市後出業績慨Netflix,交左一份亮麗成績表,每股盈利超預期,但集團公布2025年首季開始,唔再公布季度會員數目,會唔會對股價有影響? 博威環球證券金融首席分析師聶振邦指,受人工智能(AI)發展帶動,今年晶片需求理應有增無減,但台積電第2季預測保守,或反映AI發展冇想像中咁強勁,有機會對整體美股帶黎挑戰。 聶Sir又話,Netflix透明度減少不利市場氣氛,但會增加公司營運彈性,因為唔需要投入咁多資源向公眾交代數據,有助控制成本,佢認為唔需要太擔心,始終集團業績增長亮麗,預期股價暫時會係600美元至640美元上落。 |
|
聶振邦 |
2024-04-15T16:13 |
周大福(01929)上周五(12日)收市後出左業績,股價今日(15日)顯著受壓,一度挫9%,不過,大行焦點反而落係開店及關店數目上,摩根士丹利指,周大福淨關店數目少過預期,中信里昂就話,淨開店數目少過指引,到底呢些數據有幾重要? 博威環球證券金融首席分析師聶振邦指,雖然周大福內地淨關店數目近90間,但佔比其實唔大,不過,市場預期,內地今年經濟應該比去年好,但今年第1季反而出現淨店舖減少,市場傾向解讀為集團睇淡未來消費市道。佢認為,集團削減店舖慨趨勢將會持續,主要係線上銷售逐步增加,銷情亦唔錯,如果呢個情況持續,門店需求會不斷減少,周大福將資金強化網上銷售係比較合適。 聶Sir又指,實體店同網上銷售慨收入交替,或令整體業務發展出現「陣痛」,相信市場未來會關注呢個交替銜接係咪暢順,投資者暫時要有心理準備,周大福會繼續削減店舖,但其實係一個健康發展方向。 |
|
聶振邦 |
2024-04-12T11:51 |
美國3月生產物價指數(PPI)按年升幅擴大至2.1%,核心PPI就按年升2.4%,美債息及金價均反映市場對聯儲局6月減息憧憬愈來愈小,不過,美股冇再大跌,昨晚(11日)收市靠穩,係咪反映市場已經接受聯儲局會推遲減息?今年會唔會只減息1次? 博威環球證券金融首席分析師聶振邦指,美國近日公布慨消費物價指數(CPI)令市場感到驚訝,因此,投資者已對PPI數據有「心理準備」,近期公布慨通脹數據都預示聯儲局會推遲減息時間,令市場焦點由減息轉移至企業盈利表現。 聶Sir又話,人工智能(AI)熱潮帶挈科技股,現時美股7大科技股之中,逾半都同AI相關,噚晚科技股亦有好表現,但仍要留意科企未來收入、美國政策轉變等消息,因為會直接影響美股整體投資氣氛。 |
|
聶振邦 |
2024-04-08T17:59 |
內地3日清明節假期完結,期內,本土遊客出行花費達539.5億人仔,較2019年增長逾12.7%,人均消費數字更首次超越疫情前水平。 不過,今個假期內地人似乎傾向短線遊,據攜程集團(09961)統計顯示,熱門出發地及目的地主要集中在高鐵20分鐘車程慨地方,同時內陸機航班數量少過比元旦、春節假期,係咪因為消費降級而令民眾放棄長途旅行? 博威環球證券金融首席分析師聶振邦表示,清明去祭祖多數係短線旅程,單以3日數據黎判斷出遊結構改變係言之尚早,加上今個假期以短線遊為主,但人均消費倍增,令人憧憬「五一黃金周」長假期旅遊消費繼續強勁復甦,相信短途定長途行程都有市場。 聶Sir續指,攜程集團、同程旅行(00780)兩隻同系分別受惠於長線遊及短線遊,如果想提前部署「五一黃金周」短途遊市場出現爆發式增長,可以考慮經營本土旅遊為主慨同程。中長線而言,市值較大慨攜程會受惠資金流入旅遊股板塊。 |
|
聶振邦 |
2024-04-05T11:20 |
憧憬減息,加上受惠於中東局勢緊張等因素,金價一度衝破每盎司2300美元,仲不停挑戰新高,4月至今已累升逾3%,不過,昨晚(4日)有聯儲局官員指,今年可能未必減息,美股3大指數應聲下挫。聯儲局官員係減息時間上多次「彈弓口」,一時「放鷹」,一時又話可能唔減,但地緣政局持續緊張,係呢個情況下,金價會點走? 博威環球證券金融首席分析師聶振邦指,最近地緣政治變數多,尤其以色列係停止攻擊加沙問題上再受壓,但以色列態度仍然強硬,更唔排除伊朗亦會有同等攻擊,令金價下周有機會進一步上升,佢估計,金價應可以企穩2300美元,後市可上望2330至2350美元水平。 聶Sir又話,投資者可以考慮部署油股、電力相關股及資源股,因為近期有色金屬股走勢唔錯,不過,過去幾周油價及金價能夠逆市升都係靠利好消息,由於隨時會出現變數,所以暫時只適宜做短線及小注部署,但由於油股息率高,如果想做中長線部署,可以揀返較穩陣慨「三桶油」。 |
|
聶振邦 |
2024-03-25T17:49 |
中國宏橋(01378)去年多賺31%,若拆開上下半年睇,去年下半年純利較上半年大增逾2倍,派末期息29港仙,按年倍增,連同中期息全年派63港仙,按年增加23%,相信係股價炒起慨原因,雖然派息增幅唔及全年基本盈利增幅,但市場係咪仍睇好派息前景?宏橋股價今日勁升逾13%,後市有仲有冇水位? 博威環球證券金融首席分析師聶振邦認為,今次全年派息有計及特別息,所以相對2022年係明顯較好,但相對2021年慨派息,今次其實唔算派得好多,市場對股息增加算係有一個正面解讀,但未必好關注股息未來會唔會加碼,始終都係靠特別息撐住,如果明年唔派特別息,全年股息可能會縮水,相信市場主要關注業績及盈利增長可唔可以持續,推高股價表現。 聶Sir又話,股價依家已落到大概去年2月慨水平,如果保守少少可以留意9元水平,但潛在升幅未有10%,佢又建議可以考慮係8元至8.2元水平吸納。 |
|
聶振邦 |
2024-03-22T11:52 |
長實集團(01113)昨日(21日)放榜,去年賺逾173億元,派末期息1.62元,全年合共派息2.05元。集團指,本港經濟已有復甦跡象,「撤辣」後住宅市場升溫,樓市未來向好慨機會較大,又話樓市仍有剛性需求,未來會繼續由房屋政策及利率走向主導。有貨冇貨慨投資者,業績後應該點部署? 博威環球證券金融首席分析師聶振邦指,依家長實依家股息超過6厘,而股價亦處於一個吸引水平,如果估中長線投資,持貨2至3年,現價買入慨風險都唔算大。佢又話,睇返近1年股價走勢,相信利淡因素已經反映曬。此外,由於本港地產市道偏弱,投資者對派息方面宜較審慎。 |
|
聶振邦 |
2024-03-18T16:47 |
華潤啤酒(00291)今日(18日)中午出左全年業績,股價午後愈升愈有,潤啤幾條大數都有增長,其中,純利升逾18%,而收入增長大過成本,意味係一份收入帶動慨業績。受惠於整體啤酒銷量及營業額上升,加上部分包裝成本下降,毛利率就升1.7個百分點至40.2%,點評價呢份啤酒股業績? 博威環球證券金融首席分析師聶振邦指,如果睇股價表現,相信市場都收貨,不過,如果拆開上下半年睇,上半年收入增長逾13%,溢利就增長約22%,但下半年僅增長10%及約18%,但值得留意係,下半年增速一向唔會好快,雖然去年下半年收入增長唔算勁,但增速仍然係過去5年最快,都係呢份業績慨亮點,再睇埋去年下半年盈利表現,相信集團今年業績前景可以睇得樂觀些。 股價方面,聶Sir認為,潤啤股價仍有水位,短期可上望40至42元。 |
|
聶振邦 |
2024-03-15T11:18 |
全日本最大工會JENGO將於今日(15日)傍晚公布,就「春鬥」,即係工資增長初步調查結果,結果出爐前,唔少大型企業先後公布加薪幅度,介乎4%至5%,調查結果勢成日本央行今個月會唔會退出負利率政策慨關鍵,而「春鬥」結果亦會左右日圓走勢,究竟「春鬥」結果對當地經濟、日圓及央行政策有幾大影響? 博威環球證券金融首席分析師聶振邦指,去年日本工資增長3.6%,市場估計,2024「春鬥」工資增速可能達4%以上,高增速將會令日本通脹升溫,而日央行為調控通脹,將會結束負利率政策,但唔會直接由負利率變成正利率,因為大幅加息會令日股有下行壓力,估計日央行會將利率由負數上調至零水平會較合理。 |
|
聶振邦 |
2024-03-13T17:45 |
雖然361度(01361)恢復派末期息,去年就多賺近29%,但拆開上下半年睇,其實下半年賺少一大截,但收入未有大跌,只係銷售成本增加,下半年表現有冇令人失望?集團恢復派息有咩啟示? 博威環球證券金融首席分析師聶振邦指,睇返361度出完業績後慨股價表現,反映市場係收貨,如果睇返往績,361度下半年慨收入及盈利普遍少過上半年,所以市場都對下半年業績冇乜期望,不過,不論收入還是盈利增速,下半年走勢都好過上半年,令市場憧憬今年業務將會出現提速慨情況。 此外,361度恢復派息,全年派息比率40%,帶動股息率去到約1厘,聶Sir就話,集團派息慷概反映管理層睇好今年業務前景,唔需要預留現金做撥備及周轉安排,市場會因而憧憬今年業務表現進一步提升,令派息亦有上調空間,暫時集團整體財務表現仍然健康。 |
|
聶振邦 |
2024-03-11T17:48 |
嗶哩嗶哩(B站)(09626)獲摩根大通唱好,預期B站股價係6月前下跌空間有限,並上調目標價至85元。消息刺激B站今日(11日)最多曾急升15%,高見96.25元,收市仍升逾11%,報93.1元。 博威環球證券金融首席分析師聶振邦認為,雖然B站仍未有錢賺,但市場更著眼於公司收入係2年內倍增慨驚喜。佢指出,公司2021年收入按年顯著增長逾60%,係高基數下過去兩年仍可保持增長,令市場憧憬公司未來一兩年將錄得盈利。 此外,摩通睇好B站今年廣告收入增長加快,聶Sir分析指,上季日均活躍內容創作者增長16%,月均投稿數字增長逾30%,反映平台不斷有新用戶願意投入內容,當中慨流量規模對商戶仍有吸引力,加上內地通脹數據有反彈,零售消費市道有望回暖,亦會吸引更多商戶落廣告,佢認為廣告業務將繼續為公司帶來重大貢獻。 不過,聶Sir提醒,有貨慨投資者觀望未來1至2周慨股價走勢,若未能突破100元慨心理關口,建議先沽貨離場,待股價回落至92元樓下再部署。 |
|
聶振邦 |
2024-03-08T12:27 |
美國聯儲局主席鮑威爾(Jerome Powell)昨日(7日)「放鴿」,再令投資者對6月開始減息慨預期升溫,美股主要指數噚晚全線向上,標指、納指、費城半導體指數齊創新高。 不過,博威環球證券金融首席分析師聶振邦提醒,「放鴿」消息對美股慨刺激有限,加上美股業績期將至,若企業普遍對今年業務慨展望較審慎,或會影響市場投資氣氛。佢又提到,近日美國再現中小型銀行倒閉風險,後市亦可能因有關消息而波動。 此外,AI概念股英偉達(Nvidia)股價昨日首度突破900美元。聶Sir引述日本5大券商之一瑞穗證券,指該行警告市場需關注人工智能(AI)概念炒作過熱慨行情,形容已達到「危險到過頭」慨地步,而Nvidia市盈率(PE)已逾77倍,稍有不利消息就可能會顯著下跌。佢又話,中國業務佔公司收入近20%,如果後市出現美國限制對中國出口芯片慨消息,勢必影響收入同盈利增速。 |
|
聶振邦 |
2024-03-04T16:41 |
美團(03690)股價上周五(1日)抽升10%,雖然今日(4日)早段走勢反覆,但開市已重上90元。市傳美團擬出售美團優選社區團購新業務,雖然消息仍未證實,但摩根士丹利估計,美團股價上周五大升係市場憧憬公司有更進取慨措施令美團優選虧損收窄,又指如果新業務明年可達至收支平衡,美團股價有14%潛在升幅,不過,大摩估計,新業務明年仍要蝕逾百億人仔,係咪真係咁快可以收支平衡? 博威環球證券金融首席分析師聶振邦認為,始終虧損金額唔細,所以投資者暫時都唔敢睇得太樂觀,未來要留意內地零售銷售可唔可以係2025年扭虧為盈,加上依家唔少競爭對手係本地生活範疇積極擴展,對美團黎講競爭係比較激烈,相信新業務要虧轉盈都要時間確立,大摩之後可能都會更新睇法。 股價方面,聶Sir指,美團去年11月底公布業績時股價向下,裂口頂部係100元,相信仍然係收復緊失地,有貨慨投資者暫時可以睇98至100元,冇貨可以考慮90元以下先部署,防守性會較強。 |
Earnings |
聶振邦 |
2024-03-01T11:50 |
相隔唔夠1年,內地雲服務商再爆減價戰。阿里巴巴(09988)旗下阿里雲昨日(29日)突然宣布減價,全線核心產品平均減價逾20%,最多更勁減55%,係歷來最大減幅,集團指,減價係希望釋放內地市場潛力,令雲計算進一步普及,其後京東集團(09618)亦宣布「參戰」,但減幅冇咁大,只係較特定服務商平10%。騰訊控股(00700)、百度集團(09888)等會唔會跟隊減價?新一輪減價戰會對呢些公司慨盈利帶黎幾大壓力? 博威環球證券金融首席分析師聶振邦指,騰訊及百度等好大機會跟阿里減價,但減幅未必咁進取,佢又估計,呢輪減價潮會持續一段時間,因為內地經濟仍有好大不確定性,雲服務商要以低價吸引更多人用佢地慨服務,雖然減價戰會為利潤帶黎挑戰,但亦有助提升銷量,因此,預期減價戰未必會對第1季業績有太大影響。 |
TENCENT , ALIBABA , Earnings , IT |
聶振邦 |
2024-02-26T16:41 |
中電控股(00002)去年多賺6.2倍,雖然差過市場預期,但符合1月底慨盈利預告,第4期中期息派維持1.21元,全年總股息3.1元,同2022年一樣。買公用股都係睇實股息,美國今年減息預期不斷押後,係咪會不利公用股慨股價?不過,減息其實都已經係市場共識,只是時間問題,依家係咪部署公用股慨好時機? 博威環球證券金融首席分析師聶振邦認為,一般黎講,公用股係避險之選,若高息環境持續,港股短期未必有好大上升動力,所以資金可能會流入公用股。 聶Sir又指,中電仍可睇高一線,股價上半年有機會升上68至70元水平,全年股息近幾年都係派3.1元,如果股價要有明顯上升動力,要留意黎緊派慨季息會唔會由0.63元,加碼至0.7元,甚至更多,相信要有呢類驚喜,先可以刺激股價有顯著上升空間。 |
CLP HOLDINGS , HK Cap Flow , Stock , Capital Flow , Util |
聶振邦 |
2024-02-23T12:16 |
美國晶片巨企英偉達(Nvidia)業績靚,刺激股價昨晚(22日)飆逾16%,再破頂,市值更創美股史上最大單日升幅,不過,在港上市慨芯片股今日(23日)反應相對冷靜,中國工信部呼籲要大力推進5G及人工智能(AI)應用,中資AI概念股中,點睇中芯國際(00981)慨投資前景? 博威環球證券金融首席分析師聶振邦認為,中芯股價走勢有較大變數,因為集團係穩定原材料供應方面有挑戰,亦要視乎晶片技術高低,美國晶片巨頭如Nvidia及超微半導體(AMD),佢地慨納米技術可以做到好薄身,7納米以下慨晶片,反觀中芯慨晶片係咪可以做到愈來愈薄,以及技術水平好似Nvidia等咁高,都係一個疑問,加上中芯收入主要來自內地,美國佔比唔夠20%,因此,內地經濟表現對集團有較大影響,所以中芯未來不論業務及股價都可能有較大變數。 |
SMIC , US Stock , IPO , IPO |
聶振邦 |
2024-02-19T17:37 |
資源、電力股今日(19日)炒上,其中,又以煤炭股表現最標青,普遍升4%至7%。雖然煤炭行業去庫存係好事,但穩定煤價之餘,又要錄得增長始終要睇需求,內地持續出現通縮,而1月製造業採購經理指數(PMI)仍處於收縮區,雖然全國用電量持續錄得增長,但可唔可以維持用電及煤炭需求? 博威環球證券金融首席分析師聶振邦就指,內地過去4個月慨PMI數據差距唔大,亦貼近盛衰分界線,而1月數據按月係有改善,佢估計,3月後工業活動將會較活躍,原材料價格傾向利好,煤炭價格可望受惠,加上近期中東局勢緊張,倫敦布蘭特期油企穩每桶80美元樓上,令內地油價呈上升趨勢,煤作為替代能源價格亦會有向上空間。 至於煤炭股應該點部署,聶Sir就話,部分股份市盈率(PE)仍然吸引。 |
Energy , Oil , ChinaElec , USD , Coal |
聶振邦 |
2024-02-16T11:30 |
美國晶片巨企超微半導體(AMD)股價已連升9日,累升73%,係另1隻受惠於人工智能(AI)熱潮慨股份,美銀證券昨日(15日)出報告,給予AMD「買入」評級,目標價睇1040美元,係華爾街大行中最牛,又估計集團慨AI伺服器需求,未來3年每年複合增長達50%。 博威環球證券金融首席分析師聶振邦指,雖然AI處於早期發展層面,但投資者未必可以用數字量化當中慨潛力,佢又話,只要市場有憧憬,呢類概念股慨股價就可以急炒上。 至於在港上市慨AI相關股,聶Sir指,聯想集團(00992)唔算太受惠於AI發展,雖然股價曾經炒上,但佢認為,聯想有制裁隱憂難免令外資有戒心,導致流入慨資金減少。股價方面,佢提醒,聯想股價要未來兩三日企穩8元,先可以挑戰9元以上水平,而短期爆升機會亦唔大。 |
HK Cap Flow , LENOVO GROUP , Rating , Capital Flow , USD |
聶振邦 |
2024-02-14T17:52 |
內地春節長假期放到下周一(19日),雖然今年慨春節電影檔期頭4日(10日至13日)慨入場人次按年增長2%至9000萬,但受累於消費降級,平均票價跌6%,連帶累計總票房收入亦跌4%,錄得近45億元人仔。 目前領跑春節檔票房慨係勵志喜劇《熱辣滾燙》,由阿里影業(01060)擔任出品人及發行人,暫居第2慨《飛馳人生2》慨出品人則有貓眼娛樂(01896)同阿里,票房造好帶動兩隻股份升逾2%。博威環球證券金融首席分析師聶振邦分析指,目前2部電影佔總票房約65%,阿里影業會較貓眼更受惠,股價有望係春節檔期跑出。 不過,聶Sir提醒,阿里影業市盈率(PE)處於逾62倍慨高水平,又指毫子股慨股價會較波動,預期升到0.48元會遇較大阻力,距離現價0.435元水位唔多,只適宜小注部署。 |
ALI PICTURES , MAOYAN ENT |
聶振邦 |
2024-02-09T11:57 |
軟銀(SoftBank)旗下芯片設計公司Arm季績靚,加上指引強勁,刺激股價昨晚(8日)飆升逾40%,市值突破1000億美元,依家股價已較上市價51美元升逾倍,Arm係咪今年要繼續關注慨人工智能(AI)概念股? 博威環球證券金融首席分析師聶振邦指,Arm上季收入錄得雙位數增長,經調整每股盈利亦高過市場預期,加上第4季指引慨收入增長高過市場預期,呢些都係股價飆升慨主因。不過,Arm市盈率(PE)已逾千倍,市賬率(PB)更逾20倍,若未來收入及盈利增速差過預期,就會有估值偏高風險。 聶Sir又話,雖然市場繼續睇好AI發展會利好Arm股價,但唔排除未來會有更多競爭對手,睇返Arm股價走勢,市場似乎認為Arm冇乜對手,呢個睇法係太過樂觀,不過,短線黎講,估計Arm股價去到下月仍會走強,有機會升至125美元至130美元。 |
USD , IPO , IPO |
聶振邦 |
2024-02-08T16:18 |
心動公司(02400)旗下自研慨角色扮演RPG 遊戲《出發吧麥芬》係蘋果IOS榜排第2位,僅次於米哈遊旗下慨《原神》,呢類遊戲慨玩家持續性及變現能力係咪好強? 內地近排接連有國產及進口遊戲獲批版號,而心動公司都有份,集團前景係咪逐步改善中? 博威環球證券金融首席分析師聶振邦指,《出發吧麥芬》屬於放置式遊戲,即係唔需要一路楂住電話玩,比較適合上班族,操作上只要開左個遊戲,佢自己就會運作。佢又話,上班族慨消費力較強,唔介意「課金」,係有利心動公司前景。 聶Sir又話,國家新聞出版處1月批出115隻遊戲,代表國家有推動遊戲慨意向,同去年12月慨氣氛完全唔同,好多遊戲公司慨估值都會提升,加上去年行業整頓慨憂慮釋除後,今年市場會更關注環球消費狀況,間接反映係遊戲股上,呢些公司慨收入前景值得憧憬。 |
XD INC |
聶振邦 |
2024-02-05T17:52 |
體育用品股361度(01361)今日(5日)中午發盈喜,預告去年多賺25%,其中佔集團整體收入約25%慨電商收入增長亮點之一。集團去年增持電商業務附屬股權至87%,而電商流水去年4個季度都維持30%以上增長,去年上半年電商收入已相等於2022年64%,全年似乎都應該有唔錯增長。 博威環球證券金融首席分析師聶振邦指,疫情期間市民培養左線上消費模式,因此,361度發展線上業務係行岩方向,相信未來仍有增長空間。聶Sir又指,361度可能要轉型,減少門市數目,集中火力發展線上業務,有利361度控制成本之餘,亦有機會提升純利率,始終毛利率係同銷售成本掛鉤,未必同門市銷售有關,如果淨利潤率表現好,都對361度業績前景有幫助。佢又提醒,未來要留意361度會唔會有業務轉型慨利好消息,因為有機會推升股價。 |
Results , Earnings , Sport |