| Commentator |
Time |
Content |
Tag |
| 聶振邦 |
2025-01-13T17:15 |
臨近農曆新年，意味內地春節電影檔期已殺到，雖然暫時未見有特別措施谷票房，但睇黎都幾熱鬧，今個春節檔期共有7套電影上映，包括阿里影業(01060)有份慨《封神第二部》，暫時已打入貓眼平台最受歡迎電影排行榜第3位，2025年慨春節票房有冇機會大翻身，扭轉2024年暑假、國慶檔期慨頹勢？對阿里影業股價又有冇幫助？ 博威環球證券金融首席分析師聶振邦指，睇返阿里影業有份慨《封神第二部》，如果睇返《封神第一部》慨反應，估計《封神第二部》會有一定熱度，加上粉絲十分期待，好大機會可以係7套電影中跑出。 股價方面，聶Sir就話，阿里影業股價依家係0.5元水平，係一個比較關鍵慨位置，若股價今日(13日)收市及明日(14日)都可以企穩呢個位，短線可以睇0.55元至0.59元水平，如果要進一步破頂，就要大市氣氛都有改善，先可以再推升股價。 |
|
| 聶振邦 |
2025-01-10T11:10 |
美國今晚(10日)會出非農職位數據，雖然2024年11月新增職位達22.7萬個，高過預期，但市場預期去年12月會僅增加16.5萬個，平均時薪就按年持平，點解會出現呢個情況？近期經濟數據同股市反應背馳，美股今晚係咪都會出現呢個情況？ 博威環球證券金融首席分析師聶振邦指，市場認為通脹會影響聯儲局減息步伐，但平均時薪持平可以紓緩通脹壓力，因此，市場對非農新增職位慨預測傾向保守。佢補充，聯儲局今個月減息機會唔大，但2025年第1季仍有機會減息。 聶Sir續指，「經濟數據好，股市就會跌」係合理預示，因為近期美股升其實唔係因為睇好經濟前景，而係市場押注美國候任總統特朗普(Donald Trump)慨施政，亦會評估佢慨政策對美國通脹會造成幾大壓力。佢又指，若特朗普關稅政策對全球造成壓力，令美國通脹升溫，繼而拖累美股及經濟數據表現，到時聯儲局就有減息空間，亦會利好股市。 |
|
| 聶振邦 |
2025-01-06T18:12 |
踏入2025年，港鐵公司(00066)接連傳出有集資壓力慨消息，之前有報道指，港鐵正研究融資方案，唔排除以「組合拳」方式應對資金需要，包括考慮發債融資、出售資產、抵押商場或其他物業融資等方案，暫時未有定案，仍要等董事會拍板。除左市傳慨融資方式，集團會唔會考慮供股？ 博威環球證券金融首席分析師聶振邦估計，港鐵選擇發債慨機會較大，因為2025年物業市道未必咁好，出售資產未必賣到靚價，所以預期會以發債為主。雖然美國今年有機會放慢減息步伐，但市場估計今年起碼會減兩次息，以呢個方向睇，有利港鐵降低發債成本。 聶Sir相信，除非港鐵集資達唔到目標水平，到時先會考慮供股，但暫時睇黎可能性較低。 至於配股，佢就話，依家港鐵市值逾1600億元，以一般授權配股黎講，1年最多可以配售慨股份，相當於現時股本20%，因此，集團透過配股集資200億至300億元都係可行，所以未必需要供股。 |
|
| 聶振邦 |
2025-01-03T10:55 |
「科技7雄」(Magnificent 7)之一慨Tesla昨晚(2日)出左2024年慨交付數據，全年僅交付178.9萬輛電動車，除少過預期及2023年，亦係集團歷來首次全年交付量出現倒退，更拖累股價一度大跌7%，Tesla前景係咪冇想像中咁樂觀？ 博威環球證券金融首席分析師聶振邦指，Tesla去年交付量減少，反映供應鏈緊張之餘，更大機會係因為小錯而流失左客戶。佢又預期，集團2025年最大挑戰仍然係交付量，因為歐洲飛機製造商空中巴士(Airbus)慨交付量都跌，所以如果供應鏈問題解決唔到，相信市場對Tesla慨業績及前景都會存疑。 聶Sir提醒，Tesla股價依家係380美元水平，之前股價大升係受惠於「Trump Trade」效應，不過，當美國總統當選人特朗普(Donald Trump)慨光環減退，Tesla股價就會有下行壓力，又估計現價仍有約10%慨調整空間。 |
|
| 聶振邦 |
2024-12-31T13:26 |
截至早上11時止，過去1小時內《彭博》用戶搜尋量最多港股，依次為中芯國際(00981)、中國神華(01088)、微盟集團(02013)、中國石油股份(00857)及建設銀行(00939)。 近日急升慨中芯及微盟今日(31日)齊齊回套，收市跌2.4%及6.3%，中芯股價今年累升60%，微盟就累升約16%，展望明年，呢兩隻股份係咪繼續可以睇好？ 博威環球證券金融首席分析師聶振邦指，中芯受美國針對晶片慨制裁，令國產晶片銷售可以受惠，佢估計，中芯升勢有望持續，如果股價可以上到33元又企得穩，2025年第1季可以睇38元，甚至40元。 微盟方面，聶Sir認為，微信新功能「送禮物」令市場睇好微盟，加上受惠於春節假期，帶動資金流入，不過，春節過後就未必再有推升股價慨催化劑。佢又估計，微盟仍有上升空間，後市留意係4元有冇阻力。 |
|
| 聶振邦 |
2024-12-30T18:20 |
優必選(09880)慨1年股份禁售期已屆滿，主席自願延長禁售期承諾12個月，但未有提及其他股東，股價今日(30日)即刻跌左落黎，股份去年底以90元上市，今年3月股價一度升至300元樓上，但其後股價反覆回落，今日大林逾30%，成交亦好誇張，成交金額高逾22億元，市場消化左禁售期相關消息後，股價會唔會有運行？ 博威環球證券金融首席分析師聶振邦指，重上返330元水平機會唔大，要大市氣氛及業務表現配合到，股價先有望推高，估計2025年重上高位機會好微。 佢又話，如果半新股過左禁售期後，股價開始跌，一般唔會一兩日就跌完，有機會持續一至兩個星期，之後先會喘定，優必選今日(30日)成交好多，有可能繼續捱沽，估計跌多一至兩日先會喘定，所以依家唔適宜撈底，可以等股價落到50元至55元喘定左再入貨。 聶Sir又話，機械人研發相關股主要以概念為主，呢些公司仍未有實際盈利，所以公司2025年成功扭虧機會唔大，如果想入市，宜做中長線部署。 |
|
| 聶振邦 |
2024-12-24T11:36 |
美國踏入12月走勢明顯轉差，其中，道指之前更罕有跌足10日，係1974年以來最長跌浪，雖然之後終於止跌，但12月至今仍跌超過4%，依家市場期待緊「Santa Claus Rally」(聖誕老人升市)，到底今年有冇機會出現「聖誕老人升市」？港股會唔會都出現呢個節日效應？ 博威環球證券金融首席分析師聶振邦指，今年出現「聖誕老人升市」機會唔大，因為11月初特朗普(Donald Trump)勝出美國總統大選時，市場已瘋炒「特朗普交易」(Trump Trade)，令美股提前炒上，到依家仍係高位徘徊。此外，市場預期聯儲局明年會放慢減息步伐，令投資者戒心大左，見到唔少投資者今個星期都有沽貨，相信美股年底前會傾向橫行。 港股方面，聶Sir認為，港股突破20000關唔出奇，因為依家外圍氣氛偏向利好，但20000關唔係主要阻力，反而要睇下恆指可唔可以突破20500點，如果突破到就會展開新一輪升浪，明年要留意內地會唔會減息降準，或者有推動經濟慨利好消息，繼而帶動港股向上。 |
|
| 聶振邦 |
2024-12-23T16:34 |
康耐特光學(02276)擬以每股15.86元，配股畀歌爾子公司，配股價較上周五(20日)收市價折讓約20%，消息公布後，康耐特股價今日(23日)不跌反升，引入歌爾子公司後，康耐特業務會唔會變得多元化？歌爾又會唔會進一步擴展光學業務？ 博威環球證券金融首席分析師聶振邦指，相信康耐特有機會拓展更多業務，因為歌爾除左同蘋果公司(Apple Inc.)有合作，亦同三星電子(Samsung Electronics)、索尼(Sony)等大企業合作，康耐特可以由傳統鏡片行業，轉向發展更多新經濟產業，而今次配股集資所得，將會用黎發展智能眼鏡及延展實境(XR)鏡片，有望成為新增長引擎。 不過，聶Sir認為，歌爾拓光學業務慨機會唔大，但透過今次配股，歌爾業務範圍擴大左，公司可以接光學定單，然後再交比康耐特，從而提升歌爾係行業慨競爭力，暫時睇黎次配股係一個雙贏格局。 |
|
| 聶振邦 |
2024-12-18T11:37 |
市場憂慮美國聯儲局明年1月暫停減息，美股3大指數昨晚(18日)全線向下，其中，道指已連跌9個交易日，係1978年2月以黎最長跌浪，並已自高位回調近4%，羅素2000指數更自高位回落5%，不過，比特幣(Bitcoin)價格持續強勢，繼續炒作「特朗普交易」(Trump Trade)，到底可以炒到幾時？ 博威環球證券金融首席分析師聶振邦認為，Trump Trade仍有得炒，但當呢個因素消化後，就會陸續會見到科技股有下調壓力，例如人工智能(AI)晶片股王英偉達(Nvidia)，股價都開始回軟，因此，佢建議投資者除非仍楂住蘋果公司(Apple Inc.)或Tesla股份，否則，應要陸續做好減持慨風險管理。 聶Sir又話，若明年聯儲局真係放慢減息步伐，將會對科技股融資成本有影響，不利股價表現，但科技股今個月回套壓力唔大，但估計明年2月慨沽壓可能較大。 |
|
| 聶振邦 |
2024-12-16T17:40 |
內地今朝(16日)出爐慨11月零售數據遠差過預期，但受惠於「以舊換新」政策，家電股係9月及10月都錄得雙位數增幅，摩根士丹利指，中央經濟工作會議再度指出，擴大內需消費係明年首要任務，反映政策很大機會延續至明年，補貼範圍仲有機會擴至智能手機，家電股係咪可以繼續受惠於政策？ 博威環球證券金融首席分析師聶振邦認為，唔係所有家電股都強勢，只可以話係個別發展，家電股其實都係跟大市行，要恆生指數大幅反彈，家電股先可以受惠。此外，即使「以舊換新」補貼範圍擴大，但呢些家電企業係歐美有業務，而美國總統當選人特朗普(Donald Trump)明年上任後，中美有機會再爆發貿易戰，到時唔排除限制清單會擴至家電，所以唔適宜過分睇好呢個板塊。 聶Sir又建議，如果唔係做短期部署，投資者可以分散投資，其中，餐飲及包裝食品股會比較安全，佢又提醒，如果想加注最好等農曆新年後。 |
|
| 聶振邦 |
2024-12-13T11:54 |
歐洲央行昨晚(12日)一如預期減息0.25厘，但瑞士央行爆冷大手減息0.5厘，減息消息一出，歐元及瑞郎回軟，不過，美匯指數升至107水平。睇返兩家央行減息幅度，係咪反映部分十國集團(G10)國家對明年經濟前景有憂慮？此外，明年投資市場又會點發展？ 博威環球證券金融首席分析師聶振邦指，歐央行減息意圖明顯，並已下調2024至2026年經濟增長預測，因為歐央行對歐洲經濟表現有保留，所以減息態度較積極，以應對明年環球通脹有機會再升溫慨局面。 投資市場方面，聶Sir又話，美股係咪會繼續一枝獨秀仲要觀察，因為部分特朗普(Donald Trump)經濟政策憧憬已反映係股市，佢明年1月正式上任後，市場唔會再關注呢些憧憬，焦點會落係政策能唔能夠令實體經濟受惠，甚至唔排除美國有機會陷入滯脹，繼而令股市有下行壓力。 |
|
| 聶振邦 |
2024-12-09T17:46 |
網易(09999)股價近期自低位回升逾20%，集團之前預告今個月有兩款新Game上線，其中，《漫威爭鋒》(Marvel Rivals)已經係上周五(6日)全球免費上線，用家正評比率高達76%，初步反應理想，網易股價係咪值得睇好？ 博威環球證券金融首席分析師聶振邦指，網易前景理想，新Game可以係多個平台體驗，除左可以直接購買，亦有免費版本吸引大量玩家下載，之後再提供唔同課金機會提升遊戲體驗。據網易公布，《漫威爭鋒》係短短72小時，玩家人數已突破1000萬，《漫威爭鋒》另1個賣點係可以吸引到一眾Marvel fans關注。 聶Sir又指，網易另1款有中國歷史背景慨新Game《燕雲十六聲》將會係12月27日上線，除左內地玩家，亦有機會出現好似《黑神話:悟空》慨爆紅情況，吸引海外玩家，如果公測成功，相信網易未來會善用古代亂世背景，設計更多相關遊戲，因此，睇好網易股價有力挑戰160元。 |
|
| 聶振邦 |
2024-12-06T11:50 |
美國電動車生產商Tesla股價昨晚(5日)「踩油上」，一度抽升約5%，會唔會同升到唔識慨比特幣(Bitcoin)有關？Tesla係10月將手頭上慨Bitcoin轉倉，惹黎市場揣測係咪打算清倉，Tesla股價昨晚係「科技7雄」(Magnificent 7)之中跑出，係咪同Bitcoin有關？ 博威環球證券金融首席分析師聶振邦指，Tesla股價走勢或多或少都同Bitcoin有關，但更多同內地新能源汽車有關，因為內地新能源汽車銷情唔錯，意味全球需求大，而Tesla作為全球龍頭電動車企，市場一定睇好公司前景。 聶Sir又話，另一個利好Tesla股價慨因素係，集團行政總裁馬斯克(Elon Musk)同美國總統當選人特朗普(Donald Trump)關係好，資金過去一段時間不斷流入特朗普概念股，Tesla亦係其中1隻受惠股。 |
|
| 聶振邦 |
2024-12-02T17:48 |
名創優品(09896)第3季收入及經調整純利都差過預期，中金公司認為同集團海外直營市場擴張費增加有關，不過，名創股價今日(2日)一度勁升19%，高見46.2元，係咪因為市場滿意海外收入及開店步伐？目前，進口美國玩具要徵收約7%關稅，高盛引述管理層指，會力爭30%美國銷售來自非內地供應商，股價幾時會反映關稅影響？ 博威環球證券金融首席分析師聶振邦指，內地經濟前景仍需時觀察，反觀美國經濟偏強，名創優品係美國有較多戰略布局，股價今日大升主因係市場對集團前景樂觀，除左收入有提升空間，毛利率亦有得升，對公司賺錢能力好有信心，加上海外門店增長快，證明管理層對海外布局前景樂觀，從而加快擴充步伐。 佢又話，管理層指會盡量係海外進行採購，包括東南亞、日本、南韓，希望取代內地供應鏈，預期會覆蓋50%美國產品，令關稅慨影響減少一半，而股價現時仍未受關稅問題影響。 聶Sir又話，「谷子經濟」係未來1、2年亮點，Z世代消費力非常強，有利名創股價表現，股價歷史高位近60元，現時逐步睇50元至55元，明年有望突破60元兼創新高。 |
|
| 聶振邦 |
2024-11-29T12:04 |
內地黃金飾物零售商夢金園(02585)今日(29日)首日掛牌，公開招股超購近20倍，1手中籤率逾7%，上市定價12元，雖然國際配售唔足額，但基石投資者獲配1780萬股，佔國配逾50%，夢金園暗盤昨日(28日)一度大跌23%，之後拗腰倒升4.5%，今日首掛又睇唔睇好？ 博威環球證券金融首席分析師聶振邦指，只要超購逾15倍，就可以將公售比例由10%上調至30%，但如果現時新上市公司願意用下限價上市，公售比例未必需要回撥至上限30%，而夢金園就將公售比例提高至20%，國配則佔80%。 聶Sir續指，夢金園國配之中有約1000萬股不設禁售期，所以大戶有充足貨源護盤，暗盤昨日低開高走，似乎係有大戶護盤，不過由於涉及慨貨量唔多，所以股價走勢啟示性唔大，反而如果恆生指數可以重上19600點或以上，夢金園股價有機會上衝，暫時睇13.5至14元。 |
|
| 聶振邦 |
2024-11-22T11:45 |
內地互聯網搜尋巨頭百度集團(09888)及電商股拼多多(PDD‧US)昨日(21日)齊放榜，其中，百度第3季收入按年跌約3%，表現係逾兩年以黎最差，拖累百度美股昨晚挫近6%，係咪因為人工智能(AI)發展及自動駕駛變現情況未如理想？至於拼多多收入及純利都差過預期，係咪受制於海外市場監管？ 博威環球證券金融首席分析師聶振邦指，兩隻股份不論業績、消息面上都有利淡因素，百度專注發展AI，短期變現能力較低，大部分盈利都來自廣告收入，要內地經濟前景進一步改善，才可帶動業績。佢又估計，百度會繼續專注發展文心系列，亦會就自動駕駛投入更多資源，所以投資者要有耐性等待百度業務轉型。 拼多多方面，聶Sir就話，要留意美國監管可或對集團美國業務有影響，而衝擊亦可能較大，後市要留意股價守唔守得住100美元，如果連續兩個交易日收低過100美元，股價有機會回落至8月時水平，即近90美元水平。 |
|
| 聶振邦 |
2024-11-18T17:26 |
今日(18日)係互聯互通10周年慨大日子，呢個機制累計為港股帶黎逾3.4億元資金。港交所(00388)行政總裁陳翊庭接受《彭博》訪問時，形容呢個只係開始，但就唔回應下一步會唔會納入首次公開招股(IPO)市場。 博威環球證券金融首席分析師聶振邦指，睇返互聯互通過去10年慨發展，係希望鼓勵投資者做中長線投資，至於新股市場方面，由於較多投資者傾向投機及炒作，所以好難確認投資者認購新股慨目的。 佢又指，因為互聯互通以吸納資金為主，係希望資金留係港股，唔希望經常流出流入，因此，佢估計未來1至2年IPO納入互聯互通慨機會唔大。 聶Sir又指，若有大型A股及內地企業來港上市，呢些股份納入互聯互通慨機會相對大。 |
|
| 聶振邦 |
2024-11-15T12:43 |
美國聯儲局主席鮑威爾(Jerome Powell)口風轉鷹，指美國經濟表現理想，唔需要急於減息，又話如果經濟數據許可，放慢減息步伐係明智，點解佢會突然放鷹？美國10月零售銷售數據今晚(15日)出爐，市場估計，將按月升0.3%。此外，美國總統大選結束後，美股及美債息齊齊抽高，應該點解讀呢個現象？ 博威環球證券金融分析師聶振邦認為，鮑威爾突然轉軑同經濟數據有關，例如新申領失業救濟人數持續減少，另一方面，睇返10月慨消費物價指數(CPI)及生產物價指數(PPI)，睇到當地物價明顯回落唔到，如果再減息，可能令通脹再惡化。 聶Sir又指，美元走勢亦會左右美股表現，美元上升，美股就會升，市場依家憧憬贏左美國總統大選慨特朗普(Donald Trump)，明年上任會出招刺激經濟，依家係提前反映市場期望。債息方面，佢話要關注聯儲局似乎有放慢減息步伐慨跡象，導致債息扯高，雖然兩者未必有反向關係，但現時兩者都有利好因素支持。 |
|
| 聶振邦 |
2024-11-11T18:20 |
日清食品(01475)出左季績，上季收入僅按年增長1%，期內少賺17%。此外，日清宣布會同日清亞洲成立合營，開拓澳洲及新西蘭業務，日清會持有合營51%股權，集團未來係咪要靠拓展海外業務，先可以進一步推高盈利？ 博威環球證券金融首席分析師聶振邦指，日清係9月已宣布收購澳洲1家冷凍餃子公司，依家夥拍母公司成立合營，會令日清及日清亞洲係經營文化上更易協調。佢又話，日清持有合營51%股權，即係有話語權，拓展海外業務時不論自主權及彈性都大些。 股價方面，聶Sir指，現時日清市盈率(PE)13.6倍、股息率3.4%，較統一企業中國(00220)及康師傅控股(00322)吸引，相信受成立合營呢個利好消息帶動，股價有機會挑戰10月8日高位，即4.82元，甚至5元水平，佢建議有興趣買入慨投資者，可以等股價回落至4.4元先入場。 |
|
| 聶振邦 |
2024-11-08T15:39 |
除了美國聯儲局議息外，英倫銀行亦有議息結果，指標利率減0.25厘至4.75厘，英倫銀行行長貝利(Andrew Bailey)指，關注美國總統當選人特朗普(Donald Trump)貿易政策對英國經濟影響，大行估計特朗普上任後，短期內就會對中國大幅加徵關稅，對歐洲關稅都會提高，英國及歐洲經濟是否將會面對挑戰？ 博威環球證券金融首席分析師聶振邦指，歐洲資產的確有下降壓力，因為特朗普的取向是「美國優先」，稱上任後會對各國的進口商品加徵關稅，間接令英國出口受到挑戰，從而影響英國經濟增長，他估計，英國會採取積極減息的態度，希望穩定英國經濟，而歐盟亦會有相應舉措，雖然經濟可以回穩，但各地物價將會有升溫壓力。 聶Sir又指，美元走向仍然有變數，特朗普於上一任期內，傾向走「弱美元政策」，令美國出口強，從而收窄美國與中國的貿易逆差。 |
|
| 聶振邦 |
2024-11-04T16:58 |
自9月內地宣布一系列刺激措施以來，股市氣氛好轉成交大增，券商股最受惠，內地50間券商首3季收入增長5%，純利增長10%，第3季業績未完全反映成交增加？接下來季度業績能否延續增長趨勢？ 博威環球證券金融首席分析師聶振邦指，券商股前景樂觀，收入及純利有增長，只是經紀收入下跌，10月交投仍然活躍，但未反映券商業績上。未來業務收入將變得多元化，利好趨勢會在第四季延續。 聶Sir續指，眾多券商公布第3季業績，投資者可以留意業績表現亮麗的股份，收入增長10%或以上，就會比較吸引，廣發證券(01776)第3季盈利增長約13%，華泰證券(06886)則增長超過30%，雖然國策利好仍然未完全反映在股價上，但券商股盈利增長已經不錯，加上國策推動，未來增長引擎會更強，廣發及華泰可以看高一線。 |
|
| 聶振邦 |
2024-11-01T11:20 |
蘋果公司(Apple Inc.)及亞馬遜(Amazon)昨晚(10月31日)係美股收市後出左業績，Apple方面，市場一直最關注集團大中華市場表現，上季收入要，仲差過預期，今季展望都麻麻，預期收入只有中至低單位數增長，差過預期。雖然第4季係傳統消費旺季，但睇返指引公司似乎都唔係好有信心，大中華市場係咪仍然令人擔心？不過，亞馬遜季績好過預期，上季多賺55%，並預期今季收入最多按年升11%，高過預期，股價前景係咪好過Apple？ 博威環球證券金融首席分析師聶振邦指，大中華區焦點慨內地市場，競爭愈來愈激烈，加上內地人多左用國產手機，令iPhone銷售面臨考驗，依家大中華區收入佔整體仍未夠20%，Apple主要收入來源仍然係美國，所以美國經濟表現就比較關鍵。佢又估計，Apple內地市佔率會面對幾大挑戰，就算扣除一筆過慨稅務考慮，相信Apple未來盈利表現唔會太好。 Amazon方面，聶Sir就認為，集團股價未來有望收復失地。 |
|
| 聶振邦 |
2024-10-29T13:48 |
截至早上11時止，過去1小時內《彭博》用戶搜尋量最多港股，依次為舜字光學科技(02382)、中國石油化工股份(00386)、中國海洋石油(00883)、紫金礦業(02899)及協鑫科技(03800)。 中石化、中海油及中國石油股份(00857)今日(29日)齊跌，油價昨晚(28日)急挫，其實地緣緊張局勢降溫，點解油價仍要跌？係咪會繼續拖累「三桶油」？ 博威環球證券金融首席分析師聶振邦指，市場依家留意環球經濟表現，暫時睇黎中美兩大經濟體慨前景都唔樂觀，石油輸出國組織及盟友(OPEC+)亦下調需求預測，導致油價受壓。佢補充，短期而言，環球經濟仍然疲弱，加上油價短期缺乏利好因素，所以走勢較弱。 聶Sir又指，中石油股價自7.07元高位回落到5.8元以下，調整幅度逾21%，而前低位係9月11日慨5.35元，所以再跌空間有限，佢建議可以係5.5元樓下買入炒波幅，估計上方阻力係6.2元，中石油股息率逾8.5厘，估計油價去到60美元水平就會企穩反彈，所以中石油係值得留意。 |
|
| 聶振邦 |
2024-10-28T18:14 |
內地手機品牌VIVO、華為、小米集團(01810)市場份額分別排首3位，力壓蘋果公司(Apple Inc.)慨iPhone。第4季係內地智能手機品牌推出旗艦機型高峰，旗艦新產品會採用最新晶片，估計競爭會更激烈。小米明晚(29日)會舉行新機發布會，屆時小米15系列將會亮相，係多機齊「發」下，會唔會引爆換機潮？小米15系列對集團盈利會有幾大貢獻？ 博威環球證券金融首席分析師聶振邦指，由於買手機佔市民收入唔多，所以換唔換機未必同收入及經濟前景有太大關係。唔少手機生產商揀第4季推出旗艦手機，主要係睇準企業年尾派花紅，以及市民係春節假期消費意欲較強，有助帶動手機銷情。 聶Sir又話，若消費者本身已經係小米用家，「轉會」慨機會一般唔大，對比Apple、三星(Samsung)慨手機，小米15系列售價由4599人仔起跳，性價有一定吸引力。 |
|
| 聶振邦 |
2024-10-25T12:08 |
美股3大指數昨晚(24日)個別發展，其中，道指已連跌4日。早前，道指升唔停，科技股又落後，但呢幾日情況似乎逆轉，美國總統大選已進入倒數階段，雖然美股走勢仍偏強，但係咪仍有資金輪動情況？有民調顯示，特朗普(Donald Trump)暫時佔上風，但其實同賀錦麗(Kamala Harris)支持度唔係相差好遠，大選結果對後市又有咩影響？ 博威環球證券金融分析師聶振邦認為，市場資金從傳統金融股轉投科技股，唔一定完全因為總統大選，亦有可能同孳息率變化有關。佢又話，道指仍企係40000點樓上，始終係較高水平，所以投資者會比較謹慎。 聶Sir又指，若特朗普勝選，市場預期，會利好美國經濟表現，對美股後市亦有較大支持。睇返依家慨選情，似乎市場對特朗普有較大期待，因為佢慨政策及言論不時會為市場帶黎驚喜。另一方面，市場亦期待俄烏戰爭同以巴衝突係特朗普上任後，可能有突破性發展，因此，若特朗普再度入主白宮，相信美股走勢會較樂觀。 |
|
| 聶振邦 |
2024-10-21T17:42 |
自2021年以黎，內地家庭多左8萬億人仔超額存款，摩根大通表示，人民銀行加大減息力度係鼓勵居民將超額存額流入股市追求回報，係內地依家慨政策下，摩通睇好招商銀行(03968)，摩根士丹利就睇好郵儲銀行(01658)，投資者應該點揀好？ 博威環球證券金融首席分析師聶振邦認為，雖然兩家美資大行睇好招行及郵儲行，但投資者揀股要考慮返係短線，還是中長線投資。如果係短線投資，招行股價反應會比較快，升幅亦會大過其他內銀，但值得留意係，招行股價係10月9日開始，股價持續橫行，未見出現明顯反彈，如果想買招行，聶Sir建議係38至39元入手。 郵儲行方面，聶Sir話股價相對行得慢些，但勝在股息率高，依家有約6厘，作為中長線投資有一定吸引力，但如果投資者想博6.5厘以上股息率，就要郵儲行股價再跌，建議係4.3元或以下入手。 |
|
| 聶振邦 |
2024-10-18T11:45 |
美國總統大選11月舉行前，美股持續造好，全球最大晶片代工商台積電(TSMC)季績好過預期，刺激ADR昨晚(17日)大升近10%，創新高，更帶動其他晶片股。不過，荷蘭光刻機巨頭艾斯摩爾(ASML)日前公布慨業績令市場失望，點解兩份業績表現相差咁遠？美國人工智能(AI)晶片巨企英偉達(Nvidia)下個月出慨業績值唔值得憧憬？ 博威環球證券金融首席分析師聶振邦指，ASML同台積電業務慨地域分布明顯唔同，ASML業務主要集中係亞洲地區，台積電就集中係美國，由於亞洲同美國慨經濟表現唔同，令兩家公司慨業績都有差別。 Nvidia方面，聶Sir指出，由於美國係集團收入來源，可以預期業績表現唔錯，暫時亦利好美國半導體板塊走勢。 |
|
| 聶振邦 |
2024-10-14T18:10 |
康方生物(09926)配股集資逾19億元，配股價61.28元，較上周四(10日)收市價折讓近5%，集資淨額逾19億元，睇返今年3月慨配股價47.65元，公司明顯「愈配愈高」，似乎反映市場睇好公司發展。早前，康方旗下伊喜寧(伊努西單抗，PCSK9)獲國家藥監局批出上市許可，成為公司第1款非腫廇領域獲批產品，康方前景點睇？股價係咪有機會破頂？ 博威環球證券金融首席分析師聶振邦指，康方配股規模唔算大，上次配股佔擴大股本約2.8%，今次就佔約3.5%，市場都好易消化。公司由3月至今不時發布新藥發展進度，可以畀投資者跟進業務發展狀況，有助維持股價穩定。 聶Sir又話，康方股價之前受惠於港股升浪，投資者可留意呢浸升勢，但估計股價係70元會有阻力。 |
|
| 聶振邦 |
2024-10-07T17:51 |
內地股市明日(8日)長假後復市，發改委明日早上10點將會開記者會，介紹落實一籃子增量政策，推動經濟持續發展。花旗估計，內地將推出規模約3萬億人仔慨刺激消費政策，中央係咪想透過財政政策刺激消費，希望擺脫通縮局面？ 博威環球證券金融首席分析師聶振邦認為，花旗估計那3萬億人仔，應該唔會全部用黎刺激消費，估計約5000億人仔用黎谷消費，其他主要用作改善民生狀況及減稅，令市民資金更鬆動。 聶Sir又話，A股及港股強勢已帶動財富效應，不論會唔會派消費券，只要AH股繼續升，都對內地消費行情帶黎間接幫助。 佢估計，明日A股復市將有大量股份漲停板，由於「十一黃金周」期間港股繼續開市，A股就假期休市，由於中資股已升左一浸，相信大量內地投資者會蜂擁入市，A股未來一兩個交易日應該會漲停。 |
|
| 聶振邦 |
2024-10-04T11:11 |
歐盟今日(4日)會就對華電動車加徵關稅進行表決，有指德國會投反對票，西班牙就希望歐盟可以同中國傾掂數，不過，佔歐盟39%人口慨4個國家，包括法國、希臘、意大利及波蘭將會投贊成票，意味提案已夠票通過。若落實加關稅，歐盟將於11月起向中國電動車徵收高達45%關稅，為期5年。中資車股係咪已消化及反映曬呢個因素？ 博威環球證券金融首席分析師聶振邦指，由於加關稅已講左一段時間，相信市場已消化得七七八八，除非通過今次提案後，再進一步上調關稅，到時就會對車企盈利有較大影響，不過，由於歐洲市場慨利潤比內地大，相信內地車企會繼續係歐洲賣車，但唔排除內地車企會透過係海外設廠等方法，減低關稅慨影響。 車股方面，聶Sir話，雖然被關稅問題困擾，但由於大市投資氣氛熾熱，估計電動車相關股份仍有約5%至8%水位。 |
|
| 聶振邦 |
2024-09-30T16:54 |
A股連續第4日成交破萬億人仔，中資券商股今日(30日)繼續強勢，齊齊錄雙位數升幅，其中，9天相對強弱指數(RSI)升至98慨國泰君安國際(01788)，9月初宣布以發行A股及H股慨換股方式收購海通證券(06837)，有唔少券商指短期內會提振行業情緒，始終對上一次咁大型慨行業併購，已經要數到2014年申銀萬國(00218)合併宏源證券，隨後A股迎來大牛市，呢個例子對今次收購又有冇參考價值？ 博威環球證券金融首席聶振邦指，過去慨消息有一定參考性，但現時都有資金陸續獲利，今日國泰君安股價亦比較波動，若繼續憧憬A股市場就要更加留意注碼，博股價升至1.6元或1.7元水平就會較穩陣。 |
|
| 聶振邦 |
2024-09-27T11:26 |
港股今日(27日)繼續造好，恆生指數開市已經突破20000點，上日(26日)成交更超過3000億元，推動指數主要靠ATM，分別是阿里巴巴(09988)、騰訊控股(00700)及美團(03690)，恆指後市仍然靠重磅股支撐？重磅股當中應該如何選擇？ 博威環球證券金融首席分析師聶振邦指，中資股關注度暫時較高，因為人民幣升勢持續，個股當中，阿里巴巴的吸引性特別高，因為阿里一直落後，而獲納入「港股通」令資金流入比其他個股快。阿里現時股價處於100元水平，可以上望110元至115元。 聶Sir又指，內房需要一段時間才能回復到健康狀態，所以內房股現階段只適宜部署短線；而餐飲零售股之前一直落後，估值遠低於合理水平，現階段吸納相關股份的勝算較高；金融政策出台有利派息，可以考慮內銀股及內險股。 |
|
| 聶振邦 |
2024-09-23T17:54 |
據研究機構Counterpoint Research發表慨研究報告顯示，小米集團(01810)8月以全球手機實際銷售計算慨市佔率，超越蘋果公司(Apple Inc.)排第2位，係3年以黎首次。Apple可唔可以靠iPhone 16系列扭轉劣勢？小米成功爬Apple頭係咪短期情況？ 博威環球證券金融首席分析師聶振邦指，每家公司出新手機後都會加價，消費者就會考慮性價比，由於人工智能(AI)屬於嶄新功能，所以未必會好頻密換機，會等真係有AI功能先買，佢認為，小米市佔率短期有機會持續高過Apple，但明年會因為AI呢個因素令iPhone變得較吸引，到時Apple市佔率好大機會再度超越小米。 聶Sir又話，新機發布、搶佔印度、拉丁美洲等市場，呢些利好消息都會推高小米股價，有望重返2021年水平，即 30元以上水平，但估計現時係23元有較大阻力。佢又提醒，若大市表現好，恆生指數可以突破19000關，小米股價才有機會突破23元，有貨慨投資者可以部署22元至23元先食糊，20元樓下可以吸納。 |
|
| 聶振邦 |
2024-09-20T10:25 |
投資者似乎認為美國聯儲局減息可以令經濟「軟著陸」，《彭博》向一批專業投資者做問卷調查，有75%受訪者相信美國經濟會「軟著陸」，如果真係成功「軟著陸」，其中一類受惠股就係細價股，反映美股中小型股表現慨羅素2000指數，昨晚(19日)反彈逾2%，若對比標指，最新相對估值又落返幾年低位，係咪都可以考慮追入呢些股份？ 博威環球證券金融首席分析師聶振邦認為，都要留意返風險承受能力，因為細價股波性一定較大，一定會有部分股份表現較亮麗，繼而推高羅素2000指數，所以要睇下投資者係咪咁好彩「撲中」特別升得靚那些股份，當金融、消費及大型實業股都升慨時候，為穩陣計，都係買返呢些板塊會較適合，注碼分配方面，可以考慮70%資金買較大隻慨股份，餘下30%博羅素2000細價股。 |
|
| 聶振邦 |
2024-09-16T17:47 |
B仔股宜明昂科(01541)股價今日(16日)一度飆62%，高見8.01元，收復月初禁售期結束後慨失地。上半年臨床試驗開支因成本減省而減少逾20%，臨床前及CMC開支就增加，公司展望下半年會推動更多候選藥物開發，繼8月初跟美國SynBioTx就有關IMM2510及IMM27M授權及合作協議，已收取合共1500萬美元，預期未來將收取最多3500萬美元餘下款項，係咪距離藥物變現、收成期仲有一段時間？ 博威環球證券金融首席分析師聶振邦指，現時只係臨床第2階段，要到第3階段先會商業化，保守估計要6至9個月才會正式商業化，要等到明年下半年才會對業績有貢獻，依家只係消息面慨憧憬。 聶Sir又話，宜明下一站睇7.6元水平，若現價買入意味有逾10%潛在升幅，有一定吸引力，不過，估計升至8元至8.5元就會有較大阻力，除非創新藥有進一步利好消息。 |
|
| 聶振邦 |
2024-09-13T11:47 |
歐洲央行昨晚(13日)一如預期宣布減息，加上美國聯儲局下周減息已成定局，憧憬減息周期來臨，帶動金價昨晚再破頂，紐約期金收市報每盎司2580.6美元，不過，據《彭博》調查顯示，金價短期好大機會回落，主要受通脹回落、美國減息步伐較預期慢，以及人民銀行連續4個月未有增持黃金影響，點睇金價前景？應唔應該高追？ 博威環球證券金融首席分析師聶振邦估計，金價仍會向好，因為一旦市場對美國經濟憂慮加劇，導致避險情緒升溫，加上國債孳息率已扭轉倒掛慨情況，反映係避險情緒升溫下，市場對短債慨需求增加，因此，相信投資者亦會買入黃金避險，令黃金需求增加，估計金價短期可上望2600或2630美元水平。 |
|
| 聶振邦 |
2024-09-09T17:32 |
匯豐證券最新報告指，認為內地基建行業仍面對挑戰，下調3家有國企背景慨基建股目標價3%至7%，其中，雖然中交建(01800)上半年純利要跌，但仍派中期息，中國中鐵(00390)及中國鐵建(01186)就冇派中期息，匯證預期，中國建築國際(03311)派息率將會上升，基建股應該點揀好？ 博威環球證券金融首席分析師聶振邦指，基建股現階段跌得比較殘，如果要入市，買大型基建股會比較著數，雖然中國建築規模都算大，但股價今年已累升17%，中鐵及中鐵建今年暫時要跌，相對之下，低價吸納中鐵及中鐵建會較值博，如果睇返基本面，佢建議可以留意中交建。 |
|
| 聶振邦 |
2024-09-04T16:18 |
奢侈品股普拉達(Prada)(01913)股價已連跌3個交易日，市傳Miu Miu行政總裁Benedetta Peruzzo會過檔LVMH集團旗下Christian Dior Couture出任董事總經理，拖累Prada股價今日(4日)一度急挫近10%，低見48.55元，跌至逾半年低位，今次人事變動對Prada影響有幾大？受消費疲弱影響，今年奢侈品股表現唔穩定，係咪會繼續調整？ 博威環球證券金融首席分析師聶振邦認為，Prada需要推出唔同檔次慨產品，先可以穩定銷售額，集團業績強勢主要受Miu Miu銷售強勁帶動，若撇除Miu Miu銷售額，上半年Prada整體銷售其實冇增長，而Miu Miu係主打年輕人市場，因此，Prada未來需要係年輕人市場入手，銷售才有望好轉。 聶Sir又話，Prada業績表現同股價掛鉤，股價今年累升逾16%，依家市帳率(PB)僅4倍，估值吸引，股價係48元水平有支持，投資者可以等股價回落至50元樓下再吸納。 |
|
| 聶振邦 |
2024-09-02T16:42 |
新世界發展(00017)發盈警後，股價今日(2日)插水，收市重挫近13%，收報6.83元，集團預告全年最多蝕200億元，近期市傳新世界旗下K11 Art Mall，獲中資以90億元洽購，摩根大通認為，呢個價錢吸引力較低，如果真係用呢個賣K11 Art Mall，反映集團流動性壓力比預期大，可能不利其他資產出售時慨估值，到底新世界賣K11 Art Mall機會大唔大？會唔會影響公司派息？ 博威環球證券金融首席分析師聶振邦指，新世界慨虧損都比較大，估計之後會減少派息，但公司積極減債，可望紓緩財政壓力，亦有助集團收支平衡。另一方面，市傳集團有可能出售核心資產K11 Art Mall，但K11係新世界好主要慨品牌，所以賣K11 Art Mall仍然有不確定性，聶Sir相信，除非新世界有好嚴重慨財務問題，否則，相信集團仍會等美國啟動減息周期後，先會做出售資產慨部署。 |
|
| 聶振邦 |
2024-08-30T11:43 |
美國「AI股王」英偉達(Nvidia，美股:NVDA)日前出完業績後，股價持續受壓，昨晚(29日)收市挫逾6%，雖然Nvidia季績唔差，但市場對集團前景指引反應一般，雖然Nvidia股價業績後持續向下，但跌幅係咪仍算溫和？股價會調整到幾時？ 博威環球證券金融首席分析師聶振邦指，Nvidia收入及盈利都好過預期，但市場對集團前景睇法有保留，導致股價放榜後向下，而相比拼多多(美股:PDD)及快手(01024)業績後慨跌幅，Nvidia跌幅已算溫和，加上Nvidia盈利仍可倍升，市盈率(PE)有條件回落，令估值變得吸引，但市帳率(PB)仍偏高，所以短期仍有機會受壓，建設投資者再觀察多兩個交易日，如果企得穩110美元樓上，可以考慮入場，但股價暫時仍受制於130美元。 |
|
| 聶振邦 |
2024-08-26T17:54 |
建滔積層板(01888)今日(26日)中午出左半年業績，上半年純利及中期息都有增長，但值得留意係，過過去幾個半年業績見到毛利率係過去1年急跌。管理層表示，電子行業迎來新一波增長周期，導致覆銅面板需求上升，帶動覆銅面板營業額增加，但未來數年覆銅面板需求又係點？電子行業增長周期對毛利率有冇幫助？ 博威環球證券金融首席分析師聶振邦指，建滔積層板收入較穩定，有大行睇好印刷電路板(PCB)板塊前景，由於建滔積層板呢隻股份本身有稀有性，所以不時有資金流入，不過，公司始終屬於製造業，技術層面上或存在競爭，加上唔似下游業務有品牌效應，所以前景或有暗湧。 聶Sir又認為，建滔積層板毛利率有波動性，所以要睇多2或3次中期業績，先可以判斷毛利率係咪已經穩定，佢又認為，集團毛利率要上返20%唔難，但要去到30%以上就有較大難度。此外，亦要關注集團成本控制問題。 |
|
| 聶振邦 |
2024-08-23T11:57 |
美股經歷8月大林市後，美國經濟數據表現參差，其中，8月標普全球美國綜合採購經理指數(PMI)初值54.1，跌至4個月低位，製造業PMI更跌至48，跌至8個月低位之餘，更跌穿50慨盛衰分界線，反映製造業收縮。聯儲局主席鮑威爾(Jerome Powell)今晚(23日)會係Jackson Hole全球央行年會發表演講，經濟數據及鮑威爾慨講話，對聯儲局減息有咩影響？ 博威環球證券金融首席分析師聶振邦指，8月綜合PMI報54.1，製造業PMI及服務業PMI分別報48和55.2，平均為51.6，雖然綜合PMI偏向服務業PMI，反映服務業權重較大，但市場明顯關注製造業數據，要留意未來兩個月製造業PMI會唔會貼近返盛衰分界線，由於較7月慨49.6有一定跌幅，若PMI數據未來持續向下，勢影響聯儲局9月減息幅度。 |
|
| 聶振邦 |
2024-08-19T17:19 |
華潤啤酒(00291)今日(19日)派左中期成績表，上半年銷量按年跌約3%，產品方面，中檔及以上啤酒銷量佔比首度超過50%，次高檔及以上啤酒銷量亦錄得高單位數增長，高檔銷量更增長逾10%。至於啤酒平均售價按年升2%，毛利率按年升0.9個百分點至46.9%。毛利率未來仲有冇得升？ 博威環球證券金融首席分析師聶振邦指，潤啤慨啤酒毛利率近47%，已經係非常高慨水平，不過，若公司能繼續控制好成本，毛利率有機會進一步升至近48%，但暫時來看，要升到50%慨機會較微。 聶Sir續指，即使毛利率升至近48%，利潤率升幅亦唔多，業績只能平穩增長，未必有太大刺激作用。 |
|
| 聶振邦 |
2024-08-16T11:21 |
京東集團(09618)及阿里巴巴(09988)昨日(15日)出左業績，其中，京東第2季收入僅微升，但經調整純利大升69%，高盛指除創單季新高，更比預期高出50%，反觀同業阿里上季經調整少賺9%，似乎京東業績明顯靚過阿里。 博威環球證券金融首席分析師聶振邦指，阿里收入高過市場預期，估計集團未來發展持續平穩，公司正處於業務轉型期，而市場亦睇好未來發展，依家集團會較著重人工智能(AI)發展。 聶Sir又話，兩者最大分別係阿里正在轉型，但京東繼續專注網上零售，而有關銷售收入佔比高逾80%，係業務發展穩定下，節流的確可以令個別季度業績向好，但值得留意係，若未來京東慨AI發展追唔上其他大型科技股，競爭力可能會轉弱，如果單睇1至2個季度業績，只適合做短線部署，可以考慮係100至102元建倉，但現價買入風險亦唔大，而未來1個月上望目標115至120元。 |
|
| 聶振邦 |
2024-08-05T17:51 |
內需股持續弱勢，消費疲弱下生意難做，導致餐飲股爆盈警潮，最少有5隻股份發左盈警。一眾火鍋股中，九毛九(09922)仲有錢賺，反觀呷哺呷哺(00520)唔單止中期收入下跌，更要轉蝕最多2.8億元人民幣，話主要受累消費降級、競爭激烈，以及關閉部分店舖產生慨減值損失。 對比同業，呷哺慨經營狀況係咪最嚴峻？博威環球證券金融首席分析師聶振邦指，呷哺慨業績表現一向飄忽，雖然去年上半年按年轉賺210萬人仔，但利潤率一直只得低單位數，反映集團成本控制唔理想。雖然大型餐飲企業慨資金儲備較充裕，但現時內地經濟復甦緩慢，呷哺呷哺虧損慨壓力就顯得比其他股份更大。 |
|
| 聶振邦 |
2024-08-02T11:30 |
蘋果公司(Apple Inc.)第3季度業績略勝市場預期，收入增長近8%，雖然內地市場收入差過預期，亦係唯一銷售收入下跌慨地區，但股價昨晚(1日)盤後仍可以靠穩，Apple呢份成績表算唔算交到貨？ 博威環球證券金融首席分析師聶振邦指，Apple係形勢上比其他科技股好少少，但如果美股整體投資氣氛唔理想，Apple股價仍有機會受壓，Apple股價隔晚跌1.7%，盤後有少少反彈，佢認為暫時唔適宜睇得太樂觀。 聶Sir又話，市場亦關注另一隻科企巨無霸英偉達(Nvidia)慨股價，呢幾日都比較波動，對科技股黎講，即使Apple季績交到貨，但仍受其他科技股及因素影響，所以短線黎講佢建議做減倉部署。 |
|
| 聶振邦 |
2024-07-26T12:05 |
美股持續波動，科技股未止跌，拖累納指連跌第3日，市場對美國經濟前景憂慮加劇，加上美國總統大選不確定性增加，投資者開始拋售估值高慨「科技7雄」(Magnificent Seven)，昨晚「7雄」中有6隻要跌。值得留意係，依家納指100已較前高位回調近10%，而2023年急升後回調逾10%，之後就重拾升勢，今次會唔會出現相同情況？ 博威環球證券金融首席分析師聶振邦指，納指係前兩次業績期都出現過係低位反彈慨情況，原因係美元偏強，加上持續有利好消息，令納指反彈可以持續得比較耐，不過，今次由於Netflix及Tesla出完業績股價都要跌，主要係市場普遍唔睇好今季業務前景，所以唔好對納指可以反彈有太大期望。 聶Sir又話，短線而言，科技股有機會持續走弱，估計資金會流入美債，10年期債息倒掛幅度都持續收窄。 |
|
| 聶振邦 |
2024-07-23T15:29 |
截至早上11時止，1小時內《彭博》用戶搜尋量最多港股，依次為比亞迪股份(01211)、金沙中國(01928)、路勁(01098)、港交所(00388)及中遠海能(01138)。 比亞迪再被「股神」巴菲特(Warren Buffett)旗下投資旗艦巴郡(Berkshire Hathaway)減持，持股量降至4.94%，意味日後再沽貨唔使再申報，「股神」最終係咪會清倉？ 博威環球證券金融首席分析師聶振邦指，巴菲特減持比亞迪係有跡可尋，唔夠兩年持股量由8%降至不足5%，佢估計，由於之後唔使再申報，相信巴菲特會繼續沽貨。 聶Sir續指，政治因素係巴菲特減持主因，除左美國，歐盟亦對中國進口電動車加徵關稅，所以睇淡內地新能源汽車慨發展前景，因為會繼續受複雜慨政治形勢影響。 比亞迪股價今日(23日)一度挫4%，低見236.2元，佢指出，一旦特朗普(Donald Trump)再入主白宮，都會不利內地車企，聶Sir認為，比亞迪股價係230元有支持，建議回落至230元水平先考慮吸納。 |
|
| 聶振邦 |
2024-07-22T18:33 |
康龍化成(03759)發盈喜，預期上半年多賺最多45%，最少賺逾10億人仔，值得留意係，中期盈利有一半來自出售事項，若扣除集團向強生公司(Johnson & Johnson)出售旗下藥物開發公司Proteologix慨收益，實際淨利潤跌36%至41%，不過，康龍股價今日(22日)照升，一度升逾8%，高見9.43元。 博威環球證券金融首席分析師聶振邦指，相比首季經調整盈利按年跌逾22%，若計及股息收益，康龍股價今年已調整逾40%，已充分反應盈利倒退因素。此外，市場原本預期醫藥外包研發(CRO)行業上半年表現麻麻，但康龍中期盈利已等同去年一半，令市場憧憬下半年增長會更勁。佢又認為，康隆股價開始轉強，估計升至10元至10.5元先會遇到阻力，可以考慮現價買入，如果保守些可以等股價回落至8.8元以下先再買貨。 聶Sir續指，憧憬行業下半年基本面向好，今日成板CRO股都有得升。 |
|
| 聶振邦 |
2024-07-19T12:14 |
市傳美國總統拜登(Joe Biden) 被要求退選，依家市場消息滿天飛，美國總統大選會唔會令金融市場持續出現震盪？ 此外，內地近期出爐慨經濟數據欠佳，係咪會持續困擾港股？ 博威環球證券金融首席分析師聶振邦指，跟拜登關係友好慨前眾議院議長佩洛西(Nancy Pelosi)，以及前總統奧巴馬(Barack Obama)都勸退拜登，因此，市場認為佢好大機會退選，極有可能由民望較高慨副總統賀錦麗(Kamala Harris)出戰，佢又認為民主黨形勢未必係一面倒。聶Sir提醒，環球股市未來一至兩周走勢，有機會受環球貿易及地緣政治影響，所以唔好單睇美國大選。 內地經濟方面，聶Sir指出，早前公布慨經濟增長及「三頭馬車」數據都偏弱，令市場對內地經濟情況憂慮升溫，另一方面，若歐美等國家針對中國晶片慨限制不斷「加辣」，一定對內地科技發展造成阻礙，加上人仔今個星期仍然弱勢，人民幣走弱，都不利港股表現。 |
|
