| Commentator |
Time |
Content |
Tag |
| 梁傑文 |
2025-07-07T15:39 |
餐飲股Classified Group(08232)上周三(2日)開市前停牌，據聯交所資料顯示，主要股東、海洋公司主席龐建貽及黃子超已就出售持股訂立協議，將會由THAC Group BVI Limited接手，今次賣盤係基於咩原因？係咪反映本港餐飲業已冇路可行？ 《香港股票財技密碼》作者梁傑文指，除左經濟周期因素，都同公司財務狀況有關，集團上市10年一直「見紅」，令公司資產淨值及股東權益持續下跌，一旦變成負資產公司會更加不利，所以呢兩個係觸發今次賣盤慨原因之一。 Mike又話，今次賣盤對賣家最著數，每股資產淨值(NAV)0.1元，市帳率(PB)10倍，溢價20%，條件非常優厚，對買方而言，買入一個上市平台，有助打響品牌知名度，未來跟供應商爭取更優惠協議。 |
|
| 梁傑文 |
2025-06-30T15:23 |
英皇國際(00163)上周五(27日)出左全年業績，勁蝕逾47億元，值得留意係，集團有166億元銀行貸款已經逾期，有機會被銀行要求立即還款。睇返公司通告，英皇國際有可能會出售投資物業還錢，如果真係用呢個方案，救唔救到公司？ 《香港股票財技密碼》作者梁傑文指，睇返公司年報，英皇楂住唔少優質商廈及地舖，依家面對債務違約，相信集團未來要出售呢些優質資產套現解決問題。 Mike又話，依家香港市道呈兩極化，雖然本港經濟開始回穩，但物業估值仍然低殘，加上英皇系內及其他中小型發展商都面臨同樣問題，係各方急於沽貨套現下，較難賣到一個靚價。 佢補充，變賣資產能唔能夠幫到公司過到呢一關，仍然好視乎本港經濟前景及息口走勢，近年美國息口向上，令本港商廈及地舖市場一直冇起色，雖然睇得出集團有誠意解決問題，無奈市道跌得太急，公司錯過左最佳沽貨時機，相信要較大折讓先可以成功沽貨套現。 |
|
| 梁傑文 |
2025-06-24T13:32 |
截至早上11點，過去1小時內《彭博》用戶搜尋量最多港股，依次為中國宏橋(01378)、小米集團(01810)、中國平安(02318)、創科實業(00669)及泡泡瑪特(09992)。 宏橋昨日(23日)收市後發盈喜，預告中期多賺35%至約124億人仔，摩根士丹利指，盈喜好過該行預期，並估計鋁價下半年會繼續係高位浮動，料宏橋下半年業績可以保持平穩。宏橋股價今日(24日)破頂，早市一度大升8%，高見17.28元，值唔值得高追？ 宏高證券董事梁傑文指，宏橋發盈喜係預期之內，但無諗過咁早發，市場一定會收貨，加上市場估計鋁價會持續高企，而係原材料供過於求下，公司可以壓低成本，所以毛利率有擴闊空間。 Mike補充，集團去年多賺1倍，但係高基數效應下，預期今年增速將會放慢，但佢認為，股價短期仍有上升動力，冇貨要考慮係咪有需要高追。 |
|
| 梁傑文 |
2025-06-23T15:45 |
3隻新股今日(23日)硬撼，齊齊首掛，股價個別發展，其中，以Tesla供應商三花智控(02050)表現最差，股價幾乎一「潛」到尾，好彩尾市發力，成功上返水面，三花首掛表現對新股市場有咩啟示？ 《香港股票財技密碼》作者梁傑文指，幾隻新股表現分化，股價有得升慨集資額比較細，集資額大就「潛水」，佢建議普通散戶都唔好再入場，因為炒新股熱潮已過左高峰，與其不停「內捲」倒不如搵嚇其他機會。 此外，蘋果公司(Apple Inc)供應鏈之一慨藍思科技，已通過上市聆訊，計劃黎香港發H股，Apple股價都上返200美元，呢隻新股又抽唔抽得過？ Mike就話，藍思科技係Apple供應鏈之一，唔可以忽略箇中潛在風險，建議留意中美關係變化，再作考慮。 |
|
| 梁傑文 |
2025-06-16T18:36 |
停牌近1個月慨駿高控股(08035)今日(16日)復牌，股價一度飆1.3倍，高見0.15元。公司係4月底獲大股東增持股份，涉及1.52億股，每股作價0.05元，大股東持股量由約29%大升至逾54%，按例須提全購，但值得留意係，要約價高過增持價，即每股0.06元，點睇呢個要約價？ 《香港股票財技密碼》作者梁傑文指，主要係受全購規則限制，公司曾經係年初用0.06元慨價位，係市場上增持股份，當觸發到全購規則後，就要睇返公司係半年內，有冇係市場或市場外收購過股份，如果有，就需要用收購股份慨最高價，即0.06元，向餘下慨小股東提出全購要約，所以呢次要約價先會高0.01元。 駿高股價今日一度升呢變毫子股，但之後又打回原形變返仙股。 |
|
| 梁傑文 |
2025-06-09T16:20 |
摩根士丹利之前轉軑唱好港交所(00388)，跟手調整埋目標價，相隔1個月，大摩再上調目標價，最新睇500元，除左睇好日均成交更上層樓，亦因為睇好本港IPO市場，估計下半年IPO步伐將會加快，又預期今年新股集資額約1800億元，明年更升至3100億元，如果IPO旺場，港交所變「啡底股」係咪指日可待？ 《香港股票財技密碼》作者梁傑文指，港股IPO今年首5個月慨集資額暫居全球首位，如果新股市場持續暢旺，相信全年集資額有望成為全球No.1。佢又話，雖然環球投資者擔心中美貿易戰帶黎慨不確定性，但有危亦有機，貿易戰反而有機會令香港成為中資企業上市首選地，或者觸發係美國上市慨中概股回流香港掛牌，令香港間接受惠。 Mike補充，港交所股價近期升勢凌厲，短短2至3個月已由300元水平衝上400元水平，所以唔排除有機會上到500元。 |
|
| 梁傑文 |
2025-06-02T16:23 |
毫子股曠逸國際(01683)股價今日(2日)逆市大升，一度高見0.75元，大升近12%。集團上周四(5月29日)及上周五(5月30日)都有消息，分別係向福建中釀買資產及租用物業，集團會發股支付交易，福建中釀變相入主，同埋折讓逾10%配股集資，股價今日先有反應。值得留意係，曠逸2022年開始年年蝕錢，業績同財務都冇乜表現，但股價係4月初發力，由0.15元水平升至早前最高0.77元，係咪福建中釀入股早已洩漏左，「春江鴨」就出動？ 《香港股票財技密碼》作者梁傑文指，曠逸股價升應該同配股消息有關，連續宣布兩單deal惹黎市場關注。佢又話，未必係「春江鴨」，有可能係內部人士或高手sense到公司做野，所以半年前已部署撈底，加上曠逸係一隻殼股，就炒起左股價，集團上一次易主係2018年，股價曾高見3元，但易主後業務走下坡兼遇上股災，淪為毫子股，亦曾經合股及供股，但近年莊家及市場感受到港股投資氣氛逆轉，公司開始有部署，吸引資金撈底推高股價，再宣布福建中釀入股，當中可能真係有「春江鴨」成分，因為收購唔會係短時間內落實，可能已做左幾個月盡職審查，可能保密功夫做得唔好，令消息走漏左，吸引有心人係低位買貨。 |
|
| 梁傑文 |
2025-05-26T16:04 |
金朝陽集團(00878)私有化交易告吹，拖累股價今日(26日)插水，計埋之前私有化失敗慨復宏漢霖(02696)、利福中國(2136)及金利來集團(00533)，金朝陽已經係今年第4隻私有化失敗慨股份，其實私有化其中一個較大誘因係股價長期低迷，點解接連有公司私有化失敗？對市場有咩影響？ 《香港股票財技密碼》作者梁傑文指，利福、金利來、金朝陽都係香港及內地人較熟悉慨公司，市場好清楚呢些公司慨投資價值，所以當私有化價格唔係特別吸引，就會令股東更加容易判斷應唔應該投贊成票，或大股東出價係咪合理。 Mike續指，另一原因係港股投資氣氛今非昔比，2022至2023年投資氣氛好差，所以當時好多公司成功私有化，不過，近半年港股已自低位大幅反彈，令市場感受到港股交投有改善，令小股東唔願意投贊成票。佢補充，其實今年私有化宗數同去年比較已經大減，相信主要係港股成交金額由低位回升。 佢又提醒，大股東要權衡輕重，因為當私有化失敗，過去慨投資成本就變成徒勞無功，因此，如果要成事，或要接受比50%更高慨溢價。 |
|
| 梁傑文 |
2025-05-19T15:54 |
中國證監會公布放寬上市公司重大資產重組，其中，中國旭陽集團(01907)出售滄州旭陽化工近80.5%股權，換取濱海能源對價股份，置換後濱海能源A股今日(19日)大升，但中國旭陽就要跌，點解會出現呢個情況？ 《香港股票財技密碼》作者梁傑文指，中國旭陽唔使額外拿錢出黎做重組，因為公司係賣家之一，出售化工業務拿返濱海股份，而濱海A股市值唔大，相信重組後中國旭陽會獲得濱海大部分股權。 Mike又話，依家滄洲化工處於收成期，有穩定收入，濱海仲停留係研發期，產品亦未開始量產，依家兩邊重組互換，實際上將好資產注入濱海，所以股價今日大升，至於中國旭陽股價跌，相信同重組有關。 |
|
| 梁傑文 |
2025-05-12T16:24 |
上月底開始停牌慨晉安實業(02292)獲大股東提私有化建議，每股0.78元，較停牌前收市價有約30%溢價，股份今日(12日)復牌一度勁升逾1倍，高見1.3元，高私有化出價66%，係咪有炒過龍之嫌？大股東提供現金、股份、現金加股份慨方案，小股東應該點揀？ 《香港股票財技密碼》作者梁傑文認為，晉安股價今日炒到咁高的確有少少奇怪，因為今次私有化慨流程都比較簡單，亦講明唔會加價，雖然過往出現呢種情況，投資者認為公司物有所值，或憧憬私有化失敗後，公司會有提振股價方案，所以唔介意依家追入，但其實呢些情況好少出現，主要都係投資者過度興奮，可能係今日慨市況吸引資金短暫流入，Mike估計，晉安股價2至3日後有機會失守私有化出價。 Mike又指，控股公司慨股份較難變現，所以唔建議選擇公司股份，如果私人公司冇上市，流動性會較低，再加上係離岸公司，小股東會難獲取公司慨資訊，如果想變現，可能要憧憬公司之後再上市或派息，但不確定性都比較高。 |
|
| 梁傑文 |
2025-04-28T16:13 |
耀才證券金融(01428)獲阿里巴巴(09988)旗下螞蟻控股以每股3.28元，向大股東葉茂林收購逾50%股權，涉資逾28億元。股價在今日(28日)復牌後一度飆升超過96%，高見6元，對未有貨的投資者來說，現在是買貨好時機嗎？ 《香港股票財技密碼》作者梁傑文指，以往阿里巴巴收購香港上市公司之後，都會注入業務，投資者可以參考阿里健康(00241)及阿里影業(01060)的股價走勢，來判斷耀才未來的股價表現。 Mike補充，螞蟻收購耀才之後並不會只做股票買賣，一定會有資產注入活動，這也能推動耀才股價繼續上升。而耀才「泊到大碼頭」之後，市值有機會愈來愈高，若一段時間後再入選互聯互通。 |
|
| 梁傑文 |
2025-04-14T15:19 |
停牌約1個月慨鳳祥股份(09977)，獲大股東持有慨全資公司提私有化，要約價2元，較停牌前有33%溢價，但較每股資產淨值(NAV)折讓11%，要約人講明唔會加價，成功私有後就會退市。今次作價合唔合理，小股東有冇著數？ 《香港股票財技密碼》作者梁傑文認為，今次私有化出價有手緊之嫌，如果佢係鳳祥小股東就唔係咁滿意，雖然出價較停牌前有頗大溢價，但同NAV仲有逾10%折讓，另外，睇返公司基本面，業績都幾好，去年不論收入或經營溢利都有高雙位數增長，而近幾年業績都睇到一個明顯好轉慨趨勢，依家公司市盈率(PE)唔夠10倍，再睇返私有化出價，都唔係明顯對小股東有利。 |
|
| 梁傑文 |
2025-04-07T16:56 |
關稅戰捲席全球，亞太區股市集體重挫，港股今日(7日)遭大幅拋售，見有史以來最大單日點數跌幅，完全蒸發DeepSeek升浪。面對市場恐慌，後市該如何部署？ 《香港股票財技密碼》作者梁傑文指，投資者或因關稅實施幅度高於預期而打亂部署，加上市場憂慮關稅戰令環球經濟陷入衰退，市場避險意識高漲，難以估計跌市何時結束。 他估計，大市在未來兩至三天將繼續波動，相信至19000至20000點水平才能判斷後市走勢，不建議計劃撈底的投資者採用高槓桿形式入場。 |
|
| 梁傑文 |
2025-03-31T16:13 |
今日(31日)為3月最後一個交易日，區內股市跟隨美股大跌，港股算「跌得少」，市場普遍等待美國總統特朗普(Donald Trump)「對等關稅」(Reciprocal Tariffs)出台。 《香港股票財技密碼》作者梁傑文指，外圍不明朗因素困擾下，現時對港股持緊慎樂觀態度，短期內出現回調或高位整固，亦屬正常。長線而言，展望下半年，港股仍有力再試高位，甚至升穿25000點。 Mike提醒，持有充裕現金的投資者想部署入市，或可再「等一等」。 |
|
| 梁傑文 |
2025-03-24T15:26 |
創仔股盛良物流(08292)上周五(21日)收市後宣布，擬斥5000萬元收購以人工智能(AI)驅動慨全球社交娛樂音樂平台V Sing全部股權，集團會發新股支付交易，發行價15.7港仙，較上周五(21日)收市價折讓約20%，消息刺激盛良股價今日(24日)一度飆1.3倍，而V Sing係盛良慨持股量升至近30%，躍升單一大股東，盛良會召開股東特別大會尋求通過議案，呢單疑似係「賣殼交易」慨收購可唔可以成功闖關？ 《香港股票財技密碼》作者梁傑文指，呢單收購性質上的確似賣殼，港交所對呢類交易一向有嚴格監管，雖然今次呢單收購存在灰色地帶，但仍符合規定，相信係監管層面上可以輕易過關。 Mike又話，公司慨物流業務持續錄得虧損，今次收購目標係從事社交音樂平台業務，本身有一定賣點，加上V Sing可以為用家提供舞台效果等，可以谷到流量，呢單deal會比到市場及股東新憧憬，盛良今次透過呢單交易提升知名度，然後再拓展業務。 |
|
| 梁傑文 |
2025-03-17T15:06 |
由A股上市公司南山鋁業分拆出來，東南亞氧化鋁製造商南山鋁業國際(02610)今日(17日)開始招股，入場費約3182元。睇返公司盤數，2021年開始盈收都快速增長，去年就多賺逾2倍，毛利率升至50.6%，依家市盈率(PE)約5至6倍，同業中國鋁業(02600)等都差唔多，PE似乎都唔算貴。 《香港股票財技密碼》作者梁傑文指，南山鋁業及同業中國宏橋(01378)去年盈利都大幅增長，原因亦都係一樣，主要受惠於氧化鋁價格急升近1倍，但去年底似乎已見頂及大幅回落，所以都擔心成功上市後業績會大走樣。 Mike又指，南山鋁業好似幾吸引，但如果睇埋中鋁及宏橋。 |
|
| 梁傑文 |
2025-03-10T15:44 |
銅鑼灣大地主金朝陽集團(00878)今早(10日)復牌，股價一度抽升逾40%，高見7.73元，但仍低過大股東提出慨8.5元私有化作價，港股私有化浪潮去年開始升溫，係咪反映市場融資困難，公司寧願進行私有化？ 《香港股票財技密碼》作者梁傑文指，情況岩岩相反，因為近年融資環境對地產商來講其實係理想，所以金朝陽把握機會，趁股價低殘提出私有化，加上港股一些中小市值公司估值仍然低殘，公司大股東今次以低價錢買貴資產，令身家「水漲船高」。 Mike又提及，對比起大股東，小股東就更加無奈，私有化作價較停牌前有55%溢價，屬於偏低水平，加上地產市道下行，商廈租值大跌，小股東估唔到公司估值繼續下行，而金朝陽算係咁多地產公司之中，折讓較大慨一家。 |
|
| 梁傑文 |
2025-03-03T15:24 |
ASMPT(00522)今朝(3日)開市前出通告，進一步披露去年10月出售附屬公司先進封裝材料慨詳情，將會收取A股上市公司2900萬股新股及現金7.98億人仔，作價17.17億人仔，市帳率(PB)約1.2倍，算唔算貴？ 《香港股票財技密碼》作者梁傑文指，作價對比現水平1.4倍慨PB低，但屬合理水平，原因係先進封裝材料業績比較波動，加上交易後能夠換到一堆現金以及A股上市公司慨股份，若然整合做得好，有機會因重組成功而炒高股價，所以ASMPT先願意平少少賣先進封裝材料。 Mike又估計，由於內地係人工智能(AI)方面發展迅速，半導體需求將會以幾何級數上升，相信公司想儘快落實交易對價，快些係市場上分一杯羹，所以加快左今次ASMPT慨出售交易。 |
|
| 梁傑文 |
2025-02-24T15:43 |
首程控股(00697)分別係上周五(21日)及今日(24日)出左通告，暗示公司想轉型發展機械人產業，當中提到集團所屬慨首程資本旗下管理慨北京機器人基金，近日投資自變量公司，自變量公司係一家專注具身智能通用大模型研發慨高科技企業，應該點解讀公司呢兩份通告？首程想轉型實際上可唔可行？ 《香港股票財技密碼》作者梁傑文指，相信今次首程係想透過頻密發通告搶市場焦點，並希望市場可以重新關注公司其實唔止有停車場、產業園區管理等沉悶慨業務，亦係機械人產業、人工智能(AI)領域下功夫及投資。 Mike又話，首程亦希望為之後成立慨專業投資基金鋪路，因為AI開始步入收成期，帶挈唔少相關概念股股價大升，而中國機械人相關行業係全球較有競爭力慨行業之一，如果之後係呢個背景下進行集資，會利好公司長遠發展。 |
|
| 梁傑文 |
2025-02-17T15:40 |
與DeepSeek同被市場形容為「杭州六小龍」的群核科技，上周五(14日)向港交所(00388)遞交上市申請，根據初步招股文件，群核科技為內地3D軟件製造商，經營3D雲端設計平台「酷家樂」，內地市佔率(PE)約22%，正中現時市場炒人工智能(AI)相關概念熱潮。同時，中國及全球最大現製飲品企業龍頭蜜雪冰城亦於聯交所披露聆訊後的招股書，反映公司已通過上市聆訊，有望短期內招股，兩隻股份很大機會來港上市，財庫局局長許正宇，上周四指正積極研究放寬企業來港上市要求，意味著新股市場逐步回暖？ 《香港股票財技密碼》作者梁傑文指，相信第一波資金會先流入中資科技股或AI相關股，但港股成交額近日呈上升趨勢，港交所股價或有機會挑戰去年高位，過去數年港股市因估值低或成交下跌，而難以承受大型新股集資上市，但近半年情況正在好轉，如順豐同城(09699)或美的集團(00300)等集資額較大的股份亦能夠成功上市，上市後股價表現亦不錯，相信未來2至3年，港股新股市場有望再度興旺。 |
|
| 梁傑文 |
2025-02-10T15:57 |
茂盛控股(00022)上周五(7日)晚宣布，以7.65億元，出售青衣永倫800酒店予香港機管局旗下公司，預期交易今年4月上旬完成，估計將錄得4億元收益，公司又建議完成出售後派發0.12元特別息，總金額2.34億元。受消息刺激，茂盛股價今日一度炒高1.22倍，高見0.18元，其後升幅收窄，市值升至2.85億元，股價後市會點走？ 《香港股票財技密碼》作者梁傑文指，茂盛股價未來有冇得升，好視乎出售酒店交易可唔可以獲得通過，不過，公司估值仍然低殘，股價今日(10日)大升後，市值都唔夠3億元，若交易落實，回籠資金約7億元，由於派特息對小股東有利，相信股價仍有炒作空間，但佢提醒，高追左慨投資者要小心控制注碼，因為當消息熱度降溫後，交投就會開始縮，流通性會相應減少，沽貨難度就會增加。 |
|
| 梁傑文 |
2025-02-04T16:25 |
「譚仔」及「譚仔三哥」曾一度分家，其後係2017年先後被日資丸龜製麵(Marugame Seimen)母企東利多控股(Toridoll)收購，經重組後，2021年以譚仔國際(02217)係本港掛牌上市，當初收購兩間公司作價折合港元約22億元，但目前市值就跌至約12億元。今朝(4日)開市前譚仔國際突然停牌，公司話等待緊發布構成內幕消息慨公告，今次停牌會唔會係有大股東想公司私有化？ 《香港股票財技密碼》作者梁傑文認為，依家公司股價相對低殘，成交量又唔多，股東無可能供股集資，所以，停牌好大機會係因為股東商量緊私有化部署。 Mike又話，現時大部分股東帳面上有虧損，如果私有化作價唔算高，股東未必同意私有化，加上大股東已持有約75%股權，所以，以全購方式私有化慨可能性極低。不過，如果用協議安排私有化，就只需要超過75%出席股東同意，並有唔超過10%獨立股東反對，就可以通過私有化方案，成事機會更大。 |
|
| 梁傑文 |
2025-01-27T16:04 |
今日(27日)復牌狂飆慨濠暻科技(02440)，股價大幅高開逾3.6倍，開市報3.8元，其後升幅一度擴大至逾7.5倍，高見6.98元，市值係半日內大增5億元，相信同集團成為本港首隻迷因(Meme)股有關。濠暻上周五晚(24日)出復牌通告，指獲著名社交網絡及MEME平台9GAG創辦人陳展程入股，以每股0.889元，收購約70%股權，涉資1.4億元，較停牌前有逾8%溢價。9gag係全球3大幽默類社交媒體平台之一，全球受眾最少2億人，早前GameStop亦因為受網絡追隨者關注，刺激股價飆升，濠暻可唔可以成為GameStop翻版，股價大升？ 《香港股票財技密碼》作者梁傑文指，9gag有大量人關注，非常有實力，即使公司基本面唔夠好，但只要吸引到夠多散戶，都可以推升股價，GameStop早前爆升主要係美股散戶夾淡倉，但今日濠暻炒上係因為獲有實力投資者入股帶動。 Mike又指，濠暻上市後股價表現一直唔好，但今次陳展程入股後，公司潛力變得非常大，陳展程過去幾年係Web3.0及非同質化貨幣(NFT)等領域慨發展相當成功，但要注意市場慨憧憬唔一定會實現，可能只係谷高股價慨噱頭。 |
|
| 梁傑文 |
2025-01-20T16:10 |
金貓銀貓(01815)及中國白銀(00815)今日(20日)齊齊復牌，兩家公司聯合公布，指西藏勘查發現大型金礦潛力，同埋金貓銀貓擬改名「珠峰黃金」，集團本身係做金飾銷售業務，屬於偏向下游慨業務，今次完成收購後，變身做上游採礦相關業務，轉型後係咪值得睇好？ 《香港股票財技密碼》作者梁傑文指，市場認為，金貓銀貓今次收購金礦好似買中左個寶藏，可以幫公司徹底轉型，不過，仍要留意潛在風險，雖然上下游產業有關連，但開採金礦同銷售係兩回事。 Mike又話，會對金貓銀貓慨信心打左少少折扣，雖然業務上多左採礦，但性質上仍然同其他金礦股如紫金礦業(02899)、招金礦業(01818)差好遠，現階段亦計唔到數，因為集團提供唔到任何專家報告或資源數據，所以要等公司披露更多細節先可以再做判斷，睇下實際誤差有幾大。 |
|
| 梁傑文 |
2025-01-13T16:04 |
今日(13日)又有兩隻新股首掛，股價個別發展，其中，澳洲及新西蘭車企新吉奧房車(00805)股價曾低見0.9元，較招股價1.27元，低逾29%，內地城商行宜賓銀行(02596)就一直守住招股價2.59元，變動唔大。不過，上周五(10日)上市慨玩具股布魯可(00325)表現強勢，首掛高收約40%，1手帳賺逾7000元。如果睇返呢幾隻新股表現，公司慨知名度係咪好重要？ 《香港股票財技密碼》作者梁傑文指，雖然預期2025年上市慨新股數目會多返，但股價表現就好參差，呢個極端情況會令投資風險大左，多左新股選擇慨同時，其實「陷阱」亦多左，所以投資者揀新股要好小心。 Mike又提到，雖然投資風險大左，但仍有1類股份係較大機會跑出，就係有概念及基本面吸引，有獨一無二慨經營模式，呢類新股可以吸引到唔少資金熱捧。 此外，內地製茶飲店品牌古茗已通過上市聆訊，短期內就可以招股。 |
|
| 梁傑文 |
2025-01-06T17:35 |
優必選(09880)上周宣布主席周劍同幾名高層解除一致行動人士協議，但主席承諾延長禁售期1年，市場仍憂慮其他股東會減持，消息一出，集團股價單日急瀉逾30%，並跌足4日，累跌51%，到今日(6日)先出現反彈。依家主席以外慨一致行動人士合共持股12%，當中3名股東承諾未來1年唔減持，但2名冇表態股東會唔會係隱憂？ 《香港股票財技密碼》作者梁傑文認為，事態發展有些失控，認為股東之間協調性唔係咁好，可能係佢地係2024年12月「拆夥」後，見股價幾穩定及市場反應唔大，但冇諗過消息一出，同埋個別股東掟貨會散震股價。 Mike續指，另一方面可能係前期投資者見股價升至逾90至100元水平就有減持誘因，但冇諗過股價係短短半個月內「腰斬」，可能令原本想減持慨股東改變主意，並延長禁售承諾。 至於2名冇表態及持貨較多慨股東，Mike覺得市場解讀得比較負面。 |
|
| 梁傑文 |
2024-12-23T15:30 |
維信金科(02003)今早(23日)復牌，主席馬廷雄因增持而觸發技術性全購，收購價每股1.8元，較停牌前有約9%折讓，係咪反映大股東唔想私有化公司？公司近年業績轉差，主席仍繼續增持，係咪佢睇好公司經營前景會好轉？ 《香港股票財技密碼》作者梁傑文指，對今次全面收購(GO)慨價錢感到意外，佢認為關鍵在於基金投資者急住走，要錢唔要貨，大股東就成人之美，佢都認同主席未必想私有化，今次GO有持股約26.39%慨股東唔接納要約，所以理論上都做唔到私有化。 Mike又認為，雖然維信金科近年經營環境較差，但公司上半年經營現金流仍然係正數，全年派息有0.1元，反映公司仍有競爭力，如果明年有政策支持，或行業前景好轉，股價反彈2至3倍唔係冇可能，就算彈唔起，始終公司依家仲賺到錢及派到息，如果股東唔介意都可以坐一坐。 |
|
| 梁傑文 |
2024-12-16T16:00 |
草姬集團(02593)公開招股今午(16日)截飛，綜合券商最新數字，暫時接左約782億元，公開發售暫時超購約5657倍，暫時已經係歷來新股「超購王」No.3，如果今日「最後衝刺」成功，有機會挑戰史上No.2兼今年「超購王」晶科電子(02551)超購5677倍慨紀錄。除左有「視帝」郭晉安慨明星效應加持，草姬招股反應熱爆仲有咩原因？ 《香港股票財技密碼》作者梁傑文認為，保健股係本地市場增長空間有限，草姬基本面又唔算標青，加上上半年盈利出現倒退情況，收入按年亦要跌，似乎有增長見頂之嫌，因此，即使草姬超購倍數勁，很大程度上只歸功於明星效應。 Mike續指，受惠於港交所(00388)調整招股機制，可以吸引到更多新投資者認購新股。 |
|
| 梁傑文 |
2024-12-13T22:45 |
中信國際電訊(01883)發盈警，預告全年股東應佔溢利介乎8.6億至9.2億元，按年減少25%至30%。《香港股票財技密碼》作者梁傑文認為，全年盈警原因，與中期原因相若，反映管理層無力扭轉業務跌勢。公司中期賺4.55億元，以全年盈警下限計，下半年業績甚至是進一步轉差，相信中期業務走勢都會是維持轉弱。 |
|
| 梁傑文 |
2024-12-09T17:20 |
上周二(3日)開市前宣布停牌慨利福中國(02136)，獲主席兼大股東，人稱「細劉」慨劉鑾鴻提私有化，每股作價0.913元，較停牌前有逾21%溢價，利福今朝(9日)復牌股價一度大升逾29%，依家係咪私有化慨好時機，點睇今次慨私有化出價？ 《香港股票財技密碼》作者梁傑文指，對大股東黎講依家絕對係私有好時機，港股經歷早前慨牛市後，開始慢慢回落，令細價股交投都比較有彈性，呢些因素都有利大股東私有化，對小股東黎講，公司業績倒退、估值低殘下，為佢地提供一個有溢價，將股份變現慨機會，相信會有唔少股東支持私有化。 Mike又認為，今次私有價較6月底慨每股資產淨值(NAV)有折讓，但今次交易特別之處在於大股東之後，可因應市場環境變化選擇提高出價，以增加私有化成功機率，一般企業宣布私有化後市價會有折讓，但利福股價反而大升，反映市場憧憬遲些會有加價空間。 |
|
| 梁傑文 |
2024-12-02T16:42 |
內地美妝集團毛戈平(01318)今日(2日)開始招股，入場費約3010元，集團今次上市集資最多21億元。公司去年收入按年增長58%，純利更按年大增近90%，毛利率高達85%，業績都算靚仔，係咪都抽得過？ 《香港股票財技密碼》作者梁傑文指，係投資者角度黎睇，毛戈平業績的確非常吸引，去年收入及純利都有高雙位數增長，而今年上半年收入及純利都增長40%，牌面上係吸引，亦解釋到點解今次上市估值唔算平，市盈率(PE)達20倍，集資20億元，係淡市下，呢個集資額算比較進取。 Mike又指，投資者睇完業績後，可能會有些擔心，因為化妝品毛利率高達85%，由於產品成本低，對追求品質慨用家黎講，可能會對品牌有質疑。值得留意係，毛戈平多次申請係A股上市都唔批，今次轉戰香港首次公開招股(IPO)，Mike擔心公司冇披露到某些負面風險。 |
|
| 梁傑文 |
2024-11-25T15:39 |
上星期一(18日)內地物管股融信服務(02207)開市前宣布停牌，今日(25日)終於復牌，公布慨復牌通告指，獲大股東提私有化，股價今朝一度大升逾13%。融信服務大股東提出以每股0.6元私有化，較停前牌前有逾15%溢價，值得留意係，牌面上有逾15%溢價，似乎大股東有著數，因為較截至6月底止每股資產淨值(NAV)折讓逾53%，咁大折讓算唔算令人意外？ 《香港股票財技密碼》作者梁傑文指，私有化都預左有大折讓，但融信服務今次折讓幅度都算大，雖然內房仍然冇太大起色，但相對於開發商係較安全，物管始終係輕資產及低負債行業，可能受制於母公司融信中國(03301)，負債高兼資金鏈有斷裂危機，如果成事，小股東都要蝕住沽。 如果由上市持有到依家，以當年上市價近5元計，現價低逾80%。 |
|
| 梁傑文 |
2024-11-18T16:07 |
全球最大豬肉生產商萬洲國際（00288）早於今年7月已經話計劃分拆史密斯菲爾德食品(Smithfield Foods)業務，萬洲會經營內地及歐洲業務，Smithfield就主攻美國及墨西哥業務。萬洲昨日(17日)出通告，披露分拆Smithfield到美國上市慨計劃更多細節。 《香港股票財技密碼》作者梁傑文指，萬洲今次分拆Smithfield係美國上市，集資金額唔算多，佢估計，呢個分拆行動意義大於實際，萬洲可能希望多1個上市平台，令萬洲同Smithfield慨分工更清晰，以及資源更集中，投資者亦易投資。事實上，萬洲財政向來穩建，負債又唔高，集團完全唔缺錢，所以Smithfield集資規模都唔會加大。 Mike又指，萬洲過去10年有進行業務重整，亦加大唔同地區投資，所以好難直接衡量當年買Smithfield有冇買貴貨。 |
|
| 梁傑文 |
2024-11-11T17:44 |
內地物流龍頭順豐控股近日已通過聯交所上市聆訊，市傳集團計劃今個星期啟動上市前預路演，今次在港上市集資10億至15億美元，折合最多117億港元，2017年已經係內地上市慨順豐，今次黎香港掛牌有咩盤算？ 《香港股票財技密碼》作者梁傑文認為，內地物流企業以至整個行業慨競爭都好激烈，即使順豐服務好、價錢平，都冇可能撼贏菜鳥及京東物流(02618)等同業，Mike認為，由於內地出現惡性競爭，順豐今次來港上市集資，得到國際認受性之餘，又可以借香港拓展歐美市場，將來甚至有機會挑戰全球物流龍頭地位。 |
|
| 梁傑文 |
2024-11-04T16:52 |
本港股市最近好淡增持，恆指在大選前已連跌4周，跌幅近10%，有分析指A股投資者在大選前表現淡定，或者憧憬一旦特朗普(Donald Trump)當選，中央政府會出台更多刺激政策，這樣是否代表今星期港股市場會繼續波動？幾時適合再做部署？ 《香港股票財技密碼》作者梁傑文指，本星期市況一定有波動，不少投資者將焦點放在選舉結果上，加上民調顯示兩位候選人支持比率不相伯仲，之後即使有定案，但仍不排除之後需要進入法律程序，令結果公布一再拖延，未必很快塵埃落定。 Mike建議，投資者過了美國大選再做部署會較合適，目前憧憬中央政策出台，代表他們有預視地針對特朗普當選後的一系列制裁，例如加關稅，但就算有政策出台都好，最後會否派用場是未知數，始終留有懸念，建議等一切有確實定案之後再入場炒市，避開大市波動風險。 |
|
| 梁傑文 |
2024-10-28T16:39 |
今日(28日)有多隻內房、物管股復牌，包括力高集團(01622)、力高健康生活(02370)、新明中國(02699)，係咪同中央不斷出招撐內房，令呢些公司銷售及經營回暖，繼而符合到復牌條件有關？力高及力高健康今日復牌股大林，但新明一度狂飆3倍，呢幾隻股份買唔買得過？ 《香港股票財技密碼》作者梁傑文認為，除左刺激樓市措施，市場對股市重拾信心都係原因之一，早前，港股成交一度高達4000億元，雖然近期回落，但仍有近2000億元，市場見到港股仲有一定成交，A股又反彈，對股市慨憧憬就返黎，唔排除投資者會借助現時慨投資氣氛，進行集資或融資以解決資金鏈困難。 Mike又話，新明中國股價彈高，係因為停牌前經歷大跌，由於公司市值細，就吸引資金流入博反彈。佢續指，如果諗住短炒，就未必需要睇基本面，相反，若打算長楂，建議留意返公司管理層質素，因為有可能影響財務狀況或管治。 |
|
| 梁傑文 |
2024-10-21T16:40 |
從事電力設備、重型機械及核電設備等業務慨上海電氣(02727)，向母公司收購寧笙實業100%股權，後者持有從事工業機械人業務慨日本企業發那科(Fanuc)50%股權，現金代價逾30億人仔，上海電氣股價今日(21日)大幅炒上，一度飆逾39%，點睇上海電氣今次呢單收購？ 《香港股票財技密碼》作者梁傑文認為，上海電氣股價今日升上1個月高位，係反映上海電氣同發那科毋須再磨合呢個亮點，因為上海電氣早於3年前已持有發那科業務，已經好熟悉對方慨經營方針，所以收購完成後，就可以即時產生協同效應，未來亦為上海電氣盈利帶黎大幅增長空間。 |
|
| 梁傑文 |
2024-10-14T17:37 |
中手游(00302)向3名投資者配售合共近1.06億股新股，佔擴大後股本約3.6%，配股價0.9元，較上周四(10日)收市價有輕微折讓，3名投資者分別係中手游現有股東朱一航、首次入股慨無極資本及世紀華通旗下子公司，係傳統遊戲界元老級廠商，韓國公司Actoz Soft，呢兩間公司入股係咪可以產生協同效應，從而炒起股價？集團可唔可以靠重頭遊戲《仙劍奇俠傳》扭虧為盈？ 《香港股票財技密碼》作者梁傑文指，獲不同資本方參與，對年底發行慨《仙劍奇俠傳》有潛在幫助，亦可以炒作熱度，但值得留意係，公司股權架構非常雜亂，若《仙劍奇俠傳》受歡迎，股東或對未來發展方向有分歧，呢個係公司中長線要解決慨問題。 Mike又話，佢續指，市場關注《仙劍奇俠傳》年底推出後慨口碑及用家反應，呢些會係明年第1季或上半年業績中反映，係中手游股價能否起死回生慨關鍵。 |
|
| 梁傑文 |
2024-10-07T17:37 |
嘉和生物(06998)今日(7日)復牌股價急升，一度勁升近97%，高見3.25元，公司公布同億騰醫藥合併，成為公司全資附屬。由於億騰價值較高，因此，嘉和生物屬於反向收購，點理解嘉和生物今次「蛇吞象」？ 《香港股票財技密碼》作者梁傑文認為，嘉和生物復牌前市值唔夠10億元，但今次就透過發新股收購億騰，今次「蛇吞象」非常罕見，因為近年港交所(00388)修改上市規則，涉及控股權轉讓慨重大收購，流程及要求同IPO一樣，因此，大部分大公司會索性做IPO，因為可以即時籌集新資金。 Mike相信，B仔股最壞情況已經過左，2021年股市熱潮退卻，市場認清B仔股慨真面目係賺唔到錢，股價就回歸理性，加上美國息口掉頭向下，對醫藥股有一定幫助。今次嘉和生物同億騰合併帶挈股價彈起，但要上返上市價24元基本上冇乜可能，反而藉消息炒高股價，輸少當贏之下，吼位「落車」止蝕。 |
|
| 梁傑文 |
2024-09-30T16:54 |
停牌1個月慨新威國際(00058)今日(30日)復牌，股價一度飆逾3倍，但公司財務狀況一直唔理想，仍然蝕緊錢，僅持有逾700萬元現金，近年靠向控股股東詹培忠借錢交租、出糧及其他行政開支等，但唔使抵押品及畀利息，集團今次向他發可換股債券(CB)，籌約3000萬元，由於公司欠詹培忠逾2200萬元，所以詹培忠只需付逾700萬元現金。此外，公司又會以96%溢價向詹培忠發新股，交易完成後，持股量將升至逾50%，須提出強制無條件現金要約。但值得留意係，詹培忠仍有官司在身，如果佢將來想賣殼會唔會有影響？ 《香港股票財技密碼》作者梁傑文指，有機會影響詹培忠入主新威，但絕對唔影響往後轉售公司業務，始終「金牌莊家」係市場上有較高知名度，容易搵到買家，加上公司似乎有意做債轉股，由借錢應付交租、出糧，再以低價發CB，變相提升詹培忠係新威慨控股權，令市場對公司有更多憧憬。 |
|
| 梁傑文 |
2024-09-23T16:28 |
昇能集團(02459)月初被證監會點名指股權高度集中，股價單日暴瀉98%，公司上周五(20日)收市後公布以先舊後新方式，配售最多5000萬股，佔擴大後股本約4.72%，配股價0.325元，折讓約13%，呢個配股價係咪合理？散戶應唔應上車？ 《香港股票財技密碼》作者梁傑文指，大股東被斬倉後，亦有係個別日子沽貨，當時沽貨價見過0.4元至0.5元，相對今次認購股份配售價0.3元，有高沽低賣慨情況。佢估計，昇能今次未必係最後一次配股，未來有可能再係低位配股，所以要留意事態發展，才知道大股東部署上係咪高賣再係低位買貨。 Mike又話，昇能半年業績差，收入倒退，經營狀況處於虧損狀態，係典型新股上市後見真章慨例子，由有利潤變蝕錢。之前投資者炒憧憬公司納入指數成分股，但證監會點名後，股權分散左，加上依家係低位配股，建議投資者繼續觀望，唔好入場博反彈。 |
|
| 梁傑文 |
2024-09-16T17:08 |
仙股利時集團控股(00526)股價今日(16日)一度飆逾73%，高見0.13元，由仙股升格變毫子股，事源公司獲Manukura Limited(CMCI)溢價入股，將會向CMCI發8億股認購股份，每股0.076元，集資約6000萬元，認購人CMCI由Alexia David全資擁有，後者係係倫敦上市慨可口可樂希臘瓶裝(Coca-Cola Hellenic Bottling Company AG)創辦人，已故慨Andrew A. David女兒，利時今次係咪泊到大碼頭？依家係咪入貨好時機？ 《香港股票財技密碼》作者梁傑文指，通告上刻意介紹認購人背景，唔少投資者都畀可樂呢個字眼吸引，利時股價今日爆升前，市值僅約10億元，一間市值細、業務唔顯眼慨公司，突然畀大人物睇中入股，一定令市場有憧憬。 Mike又話，一家公司業務係西歐，另一家就係內地，雙方未必會有合作，但業務上仍有合理憧憬，雖然認購人係家族公司冇實質職位，但對利時黎講，就多左1個打開西歐市場慨門路。 佢建議，投資者應該靜觀其變，因為今次入股金額唔大，未來要留意利時營運方針有冇改變，甚至恢復派息，雖然股價今日借消息喪炒，但相信中長線好快會回落至低水平。 |
|
| 梁傑文 |
2024-09-09T16:21 |
內地家電龍頭美的集團(00300)今日(9日)開始招股，集資額係近年最多，有機會問鼎今年新股「集資王」。睇返美的2023年底現金及等價物，有近600億人仔，今次集資所得會用作研發及投入現有業務，今次黎香港IPO係咪有其他動機？建唔建議散戶入飛抽？ 《香港股票財技密碼》作者梁傑文指，美的帳面上現金充裕，今次集資逾200億元，對公司黎講只係杯水車薪，而集團本身冇乜財務壓力，對今次認購股份慨投資者黎講係好事，估計美的係想拿H股上市地位，可能為將來海外併購做準備。 Mike又話，近期大市投資氣氛麻麻，即使美的係家電龍頭，但對美的上市後短期期望唔大，反而可以留意中長線發展，例如可以憧憬納入恆指成分股等，佢建議投資者可以抽黎長線投資。 |
|
| 梁傑文 |
2024-09-02T15:56 |
中策資本控股(00235)最新公布，收購是菲律賓銀行Citystate Saving Bank(CSB)約27%股權，作價1億港元，截至6月底止，CSB資產淨值1.56億港元，以今次交易作價金額計，出價慨市帳率(PB)約2.4倍，而CSB截至去年底止，PB僅約1.28倍，點解中策今次出手咁闊綽？ 《香港股票財技密碼》作者梁傑文指，雖然中策通告話睇好菲律賓係因為當地經濟高速增長，銀行業前景理想，但睇返CSB財報，近兩年都蝕錢，而今次出價慨PB約2.4倍，同環球銀行股相比係偏高，反映今次收購溢價及估值都偏高。 Mike又話，雖然中策睇好CSB潛力，但後市仍要留意中策高層點樣可以令CSB「起死回生」，改善CSB經營前景慨計劃。 |
|
| 梁傑文 |
2024-08-26T16:25 |
GEM(前稱創業板)今年1月1日起實施改革以黎，計埋今日(26日)開始公開招股(IPO)慨集信國控(08629)，只有3隻新股申請係GEM上市，係咪代表改革唔成功？集信國控又值唔值得入手？ 《香港股票財技密碼》作者梁傑文指，上市數字少反映改革失敗，甚至連入紙申請上市慨公司數目都唔多，背後原因可能係因為高息及港股估值偏低，所以就算進行改革，對本港或內地企業黎講仍然缺乏吸引力。雖然轉板機制簡化左，但符合資格轉做主板慨GEM公司數目少之又少，大部分新股留係GEM慨時間較長，亦會影響投資者慨熱情。佢又話，睇返今年頭兩隻GEM新股，上市後交投冷清，都會影響投資者對黎緊上市慨集信國控投資意欲。 睇返集信國控，Mike認為，公司業務冇乜特別，加上公司收入飄忽，所以市場普遍會畀較低估值，但公司招股架構同估值相對進取，甚至可以話非常貴，所以預期反應會比之前兩隻GEM新股更低，佢認為未必值得入飛抽，如果想買呢隻股份，不妨等上市後，等股價消化左估值或大跌後再考慮。 |
|
| 梁傑文 |
2024-08-19T15:52 |
新火科技控股(01611)以逾3046萬美元，折合約2.38億港元，收購1家英屬處女群島註冊控股公司Avenir Asset Holding。此外，集團以近277萬美元，折合約2160萬港元，向Goldenway收購BitTrade約7.69%股權，新火科技將會發新股支付交易，發行價2.18元，較上周五(16日)收市價有逾14%溢價，交易完成後，BitTrade將成為新火科技間接附屬，BitTrade係日本持牌虛擬貨幣兌換服務供應商。受消息帶動，新火科技股價今日(19日)一度升穿2元關口，升逾6%。到底市場點睇今次呢單deal？ 《香港股票財技密碼》作者梁傑文指，相信今次收購會對公司發展有正面影響，不過，虛擬加密貨幣面對全球性競爭，尤其以美國競爭最激烈，估計短時間內較難令市場有信心新火科技呢項業務可以急速發展，因此，市場對消息相對冷靜。 Mike又指，市場可能會擔心加密貨幣投資者已用慣大型交易平台，如幣安(Binance)、Coinbase等，未必會轉用其他平台，所以吸唔吸到客仍然係一個問號。 |
|
| 梁傑文 |
2024-08-12T15:53 |
資源股萬國國際礦業(03939)近幾個交易日，出左幾份通告兼有唔少消息，從中睇到公司一些發展軌軌跡，其中，股東特別大會通過左改名為「萬國黃金集團有限公司」慨提案，此外，公司又發左中期盈喜，而其中一份通告就交代集團增持金礦權益，上述種種明確左公司主業慨黃金定位，雖然對股價刺激唔算大，但集團似乎有左一個明確發展方向？ 《香港股票財技密碼》作者梁傑文指，萬國國際連串消息都好正面，公司之前收購慨所羅門群島金礦開始步入收成期，帶動盈利增幅十分誇張，可以提早發盈喜，由於公司都覺得呢個發展方向係岩，所以直接宣布增持金礦權益，進一步確認公司轉型。 至於股價近日冇太大反應，Mike認為，可能係股價過去1年已經超前反應，由去年唔夠2元升到現時7元樓上，仲一度上過9.9元慨高位，升左3倍有多。 |
|
| 梁傑文 |
2024-08-05T15:52 |
亞洲電視控股(00707)建議「2供1」，供股價0.1元，較上周五(2日)收市價折讓46.81%，並指集資淨額約6342萬元慨80%將用作還債。股份今朝低開9%後，午後曾急挫20%至全日低位0.15元。 公司似乎幾手緊，7月中先配股集資完逾3400萬元來還債，6月時又沽左一批大馬上市公司慨持股，套現近1600萬元。《香港股票財技密碼》作者梁傑文表示，亞視截止去年底手持現金1390萬元，而單計短期流動債規模已逾8億元，一堆應付帳項同街數逾4億元，光靠呢幾次集資難以緩解短期債務壓力，隨時又畀債權人入稟法院申請將公司清盤。 公告亦交代，亞視正與部分債權人磋商將約2億元債務資本化。Mike解釋，即係以股代債，發行新股「抽水」，而小股東參與供股可謂有害無利，因為即使佢地願意低價供股，手上持股仍有被大比例攤薄慨風險。 此外，Mike認為，亞視同時宣布罷免主席劉敏斌相當耐人尋味，指劉敏斌作為最大單一股東，持股比例因上月配股被攤薄至約14%，而佢目前未表明會否參與供股，因此猜測其他董事或順勢借助今次供股「逼宮」，進一步攤薄主席慨持股。 |
|
| 梁傑文 |
2024-07-29T15:30 |
奇點國峰(01280)公同向包括控股股東兼主席袁力等一眾關連人士，收購內地培訓服務業務北京聖商100%股權，總代價3.4億元，交易將以發代價股支付，每股0.4元，較上周五(26日)收市價折讓19%，涉及新股相當於已發行股本47%。值得留德係，公司其實兩年前已經想做呢單交易，當年收購作價近20億元，但最終未有進行。 《香港股票財技密碼》作者梁傑文指，對小股東黎講，遲兩年買類似慨業務，由約20億元變逾3億元，主要係目標公司盈利每況愈下，令估值大幅萎縮，加上至少有兩家同類上市公司可以比較，都好難拿到好誇張慨估值，佢又話，始終今次買平左一大截，小股東一定收貨。 Mike續指，對獨立股東黎講未必有好大意義，加上公司近期做左一個配股行動，咁短時間內又再做關連交易，如果用陰謀論去揣測，可能上次配股係為今次收購，召開股東特別大會時去投贊成票，有友好人士持有公司大量股份，預期即使小股東好積極投反對票，都好難推翻交易。 |
|
| 梁傑文 |
2024-07-22T16:51 |
知乎(02390)提出有條件自願回購，最多逾4690萬股A類普通股，佔已發行總股數近16%，每股現金要約價9.11元，較上周五(19日)收市價有7%溢價，較截至去年底止每股資產淨值(NAV)折讓47%，今次係咪小股東一個變現慨好機會？始終股份平時交投疏落，除左本港小股東，美國存託股投資者都可以接受要約，值得留意係，接受現金要約小股東有機會成手碎股，應唔應該接受？ 《香港股票財技密碼》作者梁傑文指，由於知乎現價低過回購價，估計大部分股東會接受要約，但係供過於求下，最終只會按比例收返小股東慨股份，計及今次回購涉及股數及已發行股本，比例約七分之一。佢估計，若小股東交返1000股畀知乎，當中最多六分之一慨股份先可以成功賣出。 Mike續指，對小股東黎講，雖然溢價唔係特別高，對現價冇好大慨刺激作用，但如果小股東唔接受，而其他大戶接受要約，小股東就會「蝕底」，因為小股東擁有慨七分之一股份，係唔可以高於市價沽出，所以對小股東而言，今次回購其實相當「雞肋」。 |
|