| Commentator |
Time |
Content |
Tag |
| 李偉傑 |
2025-04-22T16:05 |
同程旅行(00780)股價今年以黎暫時累升唔夠20%，下星期就係「五一黃金周」，旅遊股有冇得炒？同程股價今日(22日)向下，一度低見19.56元，重挫12%，之後跌幅收窄，值唔值得趁低吸納？ 天風國際證券經紀業務部董事李偉傑指，雖然同業攜程集團(09961)都話「五一」預訂十分火熱，但睇唔到板塊跟升，估計市場焦點未必落係旅遊股身上。 Jason又指，同程最新公布收購萬達酒店管理業務消息，呢單有可能係年內地旅遊業最具戰略價值慨併購之一，刺激股價係上個交易日創上市新高，佢認為，不妨等股價調整完再考慮，跌到18元至19元再吸納都未遲。 |
|
| 李偉傑 |
2025-04-15T16:35 |
內地車企今年首3個月慨月度交付量唔錯，其中，比亞迪股份(01211)之前發盈喜，預期首季純利最多大升逾1倍。股價方面，暫時以比亞迪及小鵬汽車(09896)較強勢，已經回補上周一(7日)急挫慨下跌裂口，車股應該點揀？ 天風國際證券經紀業務部董事李偉傑指，佢會揀返龍頭比亞迪，比亞迪炒緊中歐關係回暖，到時內地汽車出口可以進一步回升，其實有好多車企都睇實海外市場，原因係銷售毛利高過內地，所以希望強攻或進一步開拓海外市場，若中歐關係好轉，車企絕對係大贏家。 Jason又指，比亞迪有本身慨優越性，之前慨「天神之眼」及快速充電，都反映比亞迪慨技術含量及規模效應會繼續力壓其他車企。 |
|
| 李偉傑 |
2025-04-08T16:20 |
由4月2日美國總統特朗普(Donald Trump)實施「對等關稅」(Reciprocal Tariff)起，一向強勢的匯豐控股(00005)及渣打集團(02888)雙雙「跑輸大市」，昨日(7日)更有雙位數跌幅，為何即使今日(8日)大市反彈，但兩者反彈力度卻有限？ 天風國際證券經紀業務部董事李偉傑認為，匯控及渣打突然大跌後無發反彈的原因有3，首先是憂慮貿易戰，因為匯控在亞洲區業務較多，所以在貿易戰下會是其中一個經濟受累的體系；第2是大市原本升得多，突然大跌3000點後，市場會補倉及找高套利的股份，銀行股就是套利較好板塊；第3就是環球貿易的問題。 |
|
| 李偉傑 |
2025-04-01T16:46 |
主打「古法黃金」概念的手工金器品牌老鋪黃金(06181)股價今日(1日)創上市新高，急升近19%，高見868元。公司上日(3月31日)收市後公布全年業績，當中存貨規模去年大升逾兩倍至40.88億元人民幣，應收帳金額大升逾一倍至約8億元人民幣。老鋪黃金存貨高，若產品「去貨慢」，未來盈利能力會否受到打擊？ 天風國際證券經紀業務部董事李偉傑指，隨著金價屢創新高，黃金產品定價可能會愈來愈高，近期黃金產品有5%至10%漲價，若金價持續上升，存貨反而能夠受惠。 Jason續指，現時股價已經大幅拋離保歷加通道頂部，即800元，投資者應該等股價回落至10天線或20天線再做部署。 |
|
| 李偉傑 |
2025-03-27T14:50 |
截至早上11時止，1小時內《彭博》搜尋量最多港股，依次為中銀香港(02388)、泡泡瑪特(POPMART)(09992)、新奧能源(02688)、蒙牛乳業(02319)及中芯國際(00981)。 泡泡瑪特昨日(26日)公布業績，旗下Labubu、Crybaby等知識產權(IP)爆紅，帶動純利多賺1.8倍至31.2億元人民幣，今日(27日)多間大行升目標價，最牛慨富瑞睇184元，今日股價上過160元高位，但14天相對強弱指數(RSI)去到75，依家再追入怕唔怕太貴？ 天風國際證券經紀業務部董事李偉傑指，短期回套壓力大，始終股價累計升左好多，14天RSI去到75，之後可能會出現技術調整，Jason建議，投資者可以等股價回落至10天線再部署。 |
|
| 李偉傑 |
2025-03-25T17:20 |
恆安國際(01044)今日(25日)出左業績，去年少賺18%至23億人仔，收入按年跌近5%，若拆開上下半年睇，去年上半年賺14億人仔，即係下半年只賺9億人仔，全年毛利率都要跌，點睇呢份業績？ 天風國際證券經紀業務部董事李偉傑指，恆安呢份業績係受成本開支拖累，因為去年紙巾原材料木漿價格偏高，加上推廣開支增加，導致毛利率受壓。 Jason續指，市場主要睇恆安3大業務，即紙巾、衛生巾及紙尿褲，其中，當中紙巾業務受壓情況最明顯，始終行業間業務競爭劇烈。此外，集團過去推出好多新產品，希望支持高端產品毛利率，但都要消費者持續購買，或用戶信心度持續提升，毛利持先有機會持續提升。 佢又話，受惠於銀髮經濟，今次睇到紙尿褲及長者相關業務增速加快，Jason相信，恆安可以維持到派息水平，有助增強股東持貨耐性。 |
|
| 李偉傑 |
2025-03-18T16:34 |
華潤啤酒(00291)今日(18日)中午派左去年成績表，全年少賺8%，差過預期，營業額按年跌唔夠1%，但末期息仍增加10%。如果拆開上下半年睇，去年下半年賺得少過上半年，不過，高端市場做得唔錯，毛利率前景係咪仍然樂觀？ 天風國際證券經紀業務部董事李偉傑指，去年營業額386億人仔，去年上半年237億人仔，下半年只有149億人仔，全年賺47.39億人仔，去年上半年賺47億人仔，即係下半年白做，兩條數都係差。不過，如果睇埋細數呢份業績仍算過到關，只係盈利增速有少少放慢。 Jason續指，啤酒如喜力(Heineken)慨消費群好穩定，旗下新品牌「老雪」、「紅爵」銷量翻倍，可以搶到更大市佔率，未來只要高端啤酒慨市佔率keep到，毛利率就可以維持。 |
|
| 李偉傑 |
2025-03-11T16:40 |
美國電動車生產商Tesla股價昨晚(11日)大林，收市暴瀉15%，報222.15美元，直插去年10月以來低位，市值縮水1300億美元。馬斯克(Elon Musk)帶領慨美國政府效率部(DOGE)慨工作惹黎極大爭議，包括裁員計劃，引起唔少美國人不滿，而美國多地慨Tesla陳列室爆發針對馬斯克慨示威，集團生產慨Cybertruck更畀人縱火，Tesla股價弱勢係咪同馬斯克從政有關？ 天風國際證券經紀業務部董事李偉傑指，由特朗普(Donald Trump)競選前到當選後，馬斯克慨表現「突出」，難免惹黎部分民主黨支持者不滿，依家馬斯克企係政治前線，態度太進取，係商業角度黎講唔係一件好事，或會削弱大部分消費者購買意欲。Jason又認為，Tesla必須有新改變，才可扭轉現時慨情況。 |
|
| 李偉傑 |
2025-02-25T17:35 |
蘋果公司(Apple Inc.)宣布未來4年會係美國投資逾5000億美元，創造2萬個新職位，或會為內地供應鏈帶來隱憂，不過，但手機相關股今日(25日)股價未受影響，高偉電子(01415)、瑞聲科技(02018)及舜宇光學(02382)都逆市有得升。不過，計劃仲包括同鴻海旗下富士康合作，係休斯敦興建佔地25萬平方呎的新工廠，預期2026年投資，生產支援Apple慨人工智能(AI)系統Apple Intelligence伺服器，旗下慨其他子公司如富智康集團(02038)同鴻騰精密(06088)又可唔可以跟埋受惠？ 天風國際證券經紀業務部董事李偉傑指，今次投資慨焦點在於半導體同AI項目，而舜宇等公司主要負責幫Apple做鏡頭、組裝等，所以今日呢類股份冇明顯受壓，暫時未受拖累，政策面亦冇太大壓力，但唔排除將來會有新動作。不過，Apple好難將所有鏡頭或組裝等業務全部搬返去美國，若出現呢個極端情況，其他手機設備股都會受影響。 Jason又話，Apple慨投資計劃依家仍係初步階段，暫時未知其他子公司可以受惠幾多，又或者可唔可以受惠，目前主要同鴻海慨關係最為密切。 |
|
| 李偉傑 |
2025-02-18T15:42 |
昨日(17日)，國家主席習近平時隔約7年，再次主持民營企業座談會，市場從習近平的態度及講話中，均認為習近平支持民企，至於未來政策走向又可以如何推測？ 天風國際證券經紀業務部董事李偉傑指，今次民企座談會提供給市場的消息不多，但市場就有好多揣測。目前外圍挑戰大，例如美國總統特朗普(Donald Trump)的對華關稅政策未明朗，以及中國自身經濟疲弱，如果要靠民企來撐起經濟，正是科企發光發熱的好機會。 Jason補充，除了科企，亦有其他不同行業出席今次的民企座談會，令市場揣測接下來內地3月召開的「兩會」會牽涉甚麼行業。 他續指，雖然座談會後馬上見到有資金追入，但其實只是炒憧憬，未有實質政策支持，建議投資者不要過於期望「兩會」推出大型政策推動民企發展。不過，他相信未來內地會有序推進科企發展。 |
|
| 李偉傑 |
2025-02-11T16:28 |
吉利汽車(00175)去年總銷量約217萬架，按年增長25%，創歷史新高。集團今年目標係新能源車業務全面實現盈利，新能源車業務今年可唔可以全面扭虧？比亞迪股份(01211)最新發布慨智能駕駛系統「天神之眼」對吉利慨影響有幾大？ 天風國際證券經紀業務部董事李偉傑指，吉利今年1月汽車銷售唔錯，按年及按月分別增長逾25%及27%，但市場憂慮集團未來或會畀比亞迪搶走部分生意。 Jason又話，內地汽車行業除左面對車企之間慨競爭，亦要面對市民消費力慨不確定性，因為內地經濟受壓，難免會而影響市民消費力。此外，比亞迪平價車款未來亦會搭載智駕系統「天神之眼」，令車企毛利未來會面對一定挑戰，對吉利來講，最重要係保持毛利，增長先可以睇高少少。 |
|
| 李偉傑 |
2025-02-04T16:21 |
百勝中國(09987)將於周四(6日)收市後出業績，摩根大通估計，集團去年第4季同店銷售跌1.6%，但收入及每股盈利料按年增長4%及12%，雖然摩通下調百勝美股目標價，但香港股價近期呈橫行格局，若盈收一如摩通預期有增長，應該點做部署？ 天風國際證券經紀業務部董事李偉傑指，大行對百勝睇法審慎，主要係對內地經濟前景慨睇法較保守，估計百勝去年第4季業績表現一般，不過，係幾隻餐飲股中，百勝股價表現已經相當唔錯，去年反彈後，一直係偏高水平整固，所以值博率係咁多餐飲股之中係相對高。 Jason又話，百勝市盈率(PE)高唔係市場最擔心慨事，市場較關注品牌慨毛利率及受歡迎程度，所以百勝高PE唔會成為投資者走貨慨動機，反而令市場有正面睇法。 |
|
| 李偉傑 |
2025-01-21T16:07 |
農曆新年好快就到，內地為期8日慨春節長假期會係下周二(28日)展開，所以出行類股份走勢唔錯，其中，攜程集團(09961)股價今日(21日)一度升2.6%，高見545元，依家多家大行睇600元以上，都算幾進取，攜程股價可唔可以借農曆新年效應創新高？ 天風國際證券經紀業務部董事李偉傑指，近期攜程股價跟隨大市反彈，之後市場會炒作農曆新年概念，應該會利好出行股。Jason估計，農曆新年期間，攜程股價有機會見565元至570元，但要挑戰更高水平，就要等集團公布2024年業績，睇返集團去年首3個季整體毛利率逾80%，全年應該都有好表現，相信股價仍有向上動力。 |
|
| 李偉傑 |
2025-01-15T17:33 |
內險股近期陸續公布2024年保費收入，據摩根大通初步統計顯示，去年人壽保險保費收入增長約4.7%至7.6%，但隨著內地息口向下，估計內險保證利率將會下跌，繼而拖累保費收入放緩，中國平安(02318)增持內銀股係咪合理？若內地保險利率愈來愈低，會唔會吸引更多內地客來港投保？ 天風國際證券經紀業務部董事李偉傑指，係低利率壓力下，平保增持高息又穩定慨內銀股係合理部署，有消息指，內地將於2025年第2季下調人身保險預定利率，但相信預定利率會跟住中國10年期國債收益率變化，內地近日都有唔同動作，包括人民銀行近日暫停購買國債，希望可以令10年期國債收益率回升。 Jason又指，內地保險利率低有機會利好本港保險業，客戶可能希望尋求更高回報而係其他地方投保，以友邦保險(01299)為例，雖然股價同內險股一齊跌，但股價反彈力度更強。 |
|
| 李偉傑 |
2025-01-14T16:43 |
內地春運今日(14日)正式啟動，估計出行人員高達90億人次，預期民航客運量逾9000萬人次，摩根士丹利發報告唱好中資航空股，指內航股復甦疫後只係剛開始，估計3大內航股2025年盈利增長32%，遠高過市場平均預期慨20%，如果內航股要3揀1，應該點揀好？ 天風國際證券經紀業務部董事李偉傑指，3大內航股中，建議揀國外航線較多慨中國國航(00753)，因為現時去外地旅遊慨吸引力較大，又或者外國旅客訪華，國航需要安排更頻密慨國際航班。 Jason又話，負債水平亦要留意，依家國航慨負債水平較理想，截至2024年中，國航手頭現金199億人仔，負債唔夠900億人仔，負債比率低過另外兩隻內航股，意味借貸慨利息成本下降，投資價值就相對較高。 |
|
| 李偉傑 |
2025-01-07T16:52 |
港股今日(7日)焦點肯定係美國國防部公布慨「軍工黑名單」，其中，有意來港上市慨寧德時代亦上榜，集團2024年底已計劃黎香港上市，發行唔多於總股本5%慨H股，雖然寧德時代仲未公布實際上市時間表，但被美國列入「軍工黑名單」，會唔會推遲上市計劃？ 天風國際證券經紀業務部董事李偉傑相信，寧德時代唔會改變來港上市慨時間表，因為事件對集團影響有限，事實上，市場反應亦唔算大，寧德時代A股今日跌幅唔算大，不過，由於寧德時代黎香港掛牌係希望向外推廣，因此，相信公司來港上市前會先釐清事件，令國際市場唔會聚焦呢件事，有利拓展公司品牌。 Jason又話，美國候任總統特朗普(Donald Trump)上場後，事件或會出現變化，「上榜」企業或會同美國政府進行談判，未來要繼續留意事件對寧德時代慨影響。 |
|
| 李偉傑 |
2024-12-10T16:40 |
昨日(9日)召開慨中央政治局會議，釋出慨政策訊號超乎市場預期，其中，當局相隔14年再度重提「適度寬鬆」，惹黎市場關注，有大行更形容「適度寬鬆」是史上最進取慨態度，係中央表明加大「放水」力度穩股樓下，港股牛市會唔會重臨？ 華盛證券財富管理部董事李偉傑坦言，對港股牛市重臨冇太大期望，但認為恆生指數係低位有反彈動力，港股昨日飆逾500點後，今朝(10日)曾再衝高逾650點，但之後升幅不斷收窄，午後更倒跌。 不過，A股走勢就冇咁Chok，滬深幾大主要指數今日都有得升，相信係觀望緊明日(11日)召開慨中央經濟工作會議，睇下到時有咩政策細節公布。 Jason認為，中長線而言，寬鬆貨幣政策對港股及A股都有幫助，又預期港股明年走勢將逐漸好轉。 |
|
| 李偉傑 |
2024-12-03T17:33 |
香港寬頻(01310)昨日(2日)披露中國移動(00941)提出全面收購要約詳情後，再出通告話HGC股東，私募股權公司I Squared Capital亦有意收購公司，出價仲略高過中移動。中移動仲特別加入一項條款，指可以因應特殊情況加價，依家多左I Squared呢個對手，中移動加價慨機會係咪好大？投資者應唔應該博競購慨公司加價，現階段追入香港寬頻？ 華盛證券財富管理部董事李偉傑指，中移動每年收益逾千億元，今次收購香港寬頻要動用慨資金，對集團黎講只係一個好細慨數目，所以加價對中移動黎講唔係太大問題，不過，如果出價過高，可能會畀股東質疑買貴貨。佢又指，中移動仍有一定加價空間，因為I Squared慨定價仍然係未知數，未來仍有變數。 Jason又話，香港寬頻股價上次調整，落到10天線再回升，依家10天線係4.6元水平，佢提醒，時間一長，不確定性就會增加，建議投資者可以等股價調整後再吸納。 |
|
| 李偉傑 |
2024-11-28T15:56 |
大家樂集團(00341) 今日(28日)中午派左成績表，半年少賺28%，收入就按年跌1.2%，毛利率亦跌至10.3%，雖然公司賺少左，但中期息維持15仙，公司財務狀況唔錯，依家手頭現金有逾10億元，7.3厘慨股息率頂唔頂得住股價？未來派息會唔會有變？ 華盛證券財富管理部董事李偉傑指，7.3厘股息率仲頂得住股價，如果綜合大家樂上季尾及今次中期業績，兩次業績加埋有逾7厘，而關鍵係黎緊慨末期息可唔可以去返0.42元水平，由於派息係同企業盈利掛鉤，所以今次中期息派到15仙已經係一個驚喜。 Jason續指，從收息角度看，大家樂都幾理想，但不確定性仍然好大，主要同毛利率有關，由於消費模式唔同左，北上消費等都會影響本港餐飲業慨業績及派息，大家樂毛利率最新跌至10.3%，唔排除未來進一步跌至10%或以下。 |
|
| 李偉傑 |
2024-11-26T16:36 |
維他奶國際(00345)今日(26日)中午派左中期成績表，收入、純利及EBITDA都有得升，放榜前股價反覆向下，午後曾短暫倒升，但之後愈跌愈多，一度低見9.6元，挫近5%，呢份業績似乎畀唔到驚喜市場？除左業績，維他奶仲有咩地方要留意？ 華盛證券財富管理部董事李偉傑指，維他奶業績整體算係唔錯，但驚喜唔算大，近月大股東增持曾經成為市場焦點，所以市場未來唔會單睇業績，亦會留意係唔同股東增持下，會唔會成為股價更強勁慨催化劑。 維他奶股價由9月底慨4元水平，升至現時9元水平，已累升近1倍，呢浸升幅主要因信和置業(00083)家族成員黃志達增持股份，Jason指，現時黃志達持有維他奶近17%股權，如果黃志達持續增持，對股價積極性會相當大，由於黃志達亦係楊協成主要股東，若黃志達增持維他奶係屬於敵意收購，就會令股價變得更波動。不過，市場亦憧憬維他奶同楊協成會有地域上合作，亦可以留意維他奶今日下午慨記者會，會唔會有更多消息披露。 |
|
| 李偉傑 |
2024-11-12T17:20 |
裕元集團(00551)首3季營業額微升，但期內多賺1.4倍，主要受惠於出售帶來一次性收益，如果拆開逐季睇，按季仍多賺47%，毛利率按年亦擴大，裕元上季業績及成本控制係咪都做得好？ 華盛證券財富管理部董事李偉傑指，裕元上季業績做得好好，雖然收入變化唔大，但盈利表現理想，其實業績簡報都提及，集團整體產能利潤率及生產效率都提升左，緩解產能負荷不均慨負面影響。至於今年首9個月，運動鞋業務佔比有所提升，但旗下零售品牌收入少左，反映代工生產(OEM)慨盈利貢獻大過零售層面。 Jason又認為，裕元毛利率上升可能同唔同地區生產線日趨成熟有關，因為好多OEM企業都會係唔同地方設生產線，例如印尼、越南，雖然呢些地方人工平，但因發展初期資源未到位，導致生產成本較高，但一段時間後，當能源配置及運輸安排進一步優化，就可以逐步降低成本，令盈利表現更亮麗。 |
|
| 李偉傑 |
2024-11-05T16:42 |
今日(5日) 手機設備股炒起，焦點放在蘋果公司(Apple Inc.)及相關概念股，而iPhone 16的Apple Intelligence已於10月底登場，暫時只限美式英語，要到12月才再有其他功能陸續推出，推出後一個星期都未見有太大迥響和亮點，究竟iPhone 16第4季出貨量會如何？ 華盛證券財富管理部董事李偉傑指，對第4季出貨量抱審慎態度，因為市場對Apple Intelligence迴響不大，亦未有特別的AI手機功能，反觀其他品牌年初已經有AI相關功能，令Apple手機並不吸引，加上大部分地區都未能正式使用Apple Intelligence，消費者會等到可以使用新功能才考慮購買，而市面上又有不同品牌推出新電話，此消彼長的情況下，iPhone 16第4季出貨量會有一定影響。 |
|
| 李偉傑 |
2024-10-29T17:40 |
匯豐控股(00005)今日(29日)中午出左第3季業績，稅前多賺近10%至84億美元，高過預期，整體表現向好，但淨息差收窄24點子至1.46%，淨利息收入跌17%，呢兩條數係咪表現麻麻？ 華盛證券財富管理部董事李偉傑認為，淨息差收窄在所難免，並有機會再惡化，所以要觀察集團未來可唔可以透過基本業務及結構性改變，去抵銷淨息差收窄慨影響，而低息環境可帶動樓市，相信可以進一步抵銷息差收窄慨影響。佢又話，如果盈利能持續增長，持續派息慨可能性亦較大。 收入方面，Jason指出，匯控其他業務如工商金融及「炒房」表現都唔錯，因此，除左靠費用收益帶動外，其他業務都需要做好，先可以彌補淨利息收入下降。 |
|
| 李偉傑 |
2024-10-22T16:42 |
今個星期外圍慨焦點落係美國電動車生產商Tesla，因為集團明晚(23日)會係美股收市後出業績，Tesla放榜前，今日(22日)港股慨Tesla概念股個別升3%，跑贏大市，如果睇返Tesla供應鏈及相關概念股慨表現，係咪預示Tesla份成績表都應該唔差？ 華盛證券財富管理部董事李偉傑指，依家市場都預期Tesla業績唔會太差，集團股價近期跑輸大市同自身因素有關，包括RobotTaxi及政治因素。 業績方面，Jason話，市場預期每股盈利(EPS)按季會有增長，但按年就要跌，主要受高基數效應影響，反映市場競爭劇烈，佢估計，Tesla業績同預期未必有太大落差，但毛利持續收窄，要留意RobotTaxi等慨新題材可唔可以提升毛利，以及回復投資者信心。 |
|
| 李偉傑 |
2024-10-15T16:25 |
美股人工智能(AI)晶片龍頭英偉達(Nvidia)股價又破頂，主要受惠於新一代圖形處理器(GPU)晶片Blackwell，行政總裁黃仁勳話Blackwell已全面投產，又指產品需求瘋狂，可緩解市場對產品生產會有延誤慨憂慮，呢個消息足唔足以帶挈整個晶片板塊？Blackwell係咪Nvidia未來慨增長動力？ 華盛證券財富管理部董事李偉傑指，Nvidia貴為美股「股王」，產品一向冇令市場失望，Blackwell運算速度較上一代Hopper快，收益亦較高，可以推進產業鏈向上，加上大家都將期望擺係擴大產能，或點樣進一步提高現有AI晶片價格，所以AI浪潮持續令呢個元素繼續滾存，繼而帶動半導體或晶片股造好。 Jason續指，Blackwell係Nvidia未來2至3季慨增長動力，因為依家慨售價已高Hopper高60%至70%，所以市場對Blackwell擴展產能慨期望上升。值得留意係，雖然Blackwell可以降低能源消耗，有利吸納資金或AI路走得更遠，但當上到高位時，Blackwell產量封頂都會令收益受到限制。 |
|
| 李偉傑 |
2024-10-08T17:42 |
藥明康德(02359)擬發總值5億美元，2025年到期慨可轉換債券(CB)，初步轉換價80.02元，較昨日(7日)收市價有近16%溢價，集資淨額4.94億美元，係較大慨稀釋效應下，對藥明康德股價有幾大影響？ 華盛證券財富管理部董事李偉傑指，企業發CB一般都會有溢價，以反映對公司前景有信心，藥明康德今次發CB慨時機拿捏得幾好，因為現時股價較1個月前已升左近1倍，係呢個時候發CB可以籌到更多錢。 佢又話，要留意發CB後市場有咩期望，著眼於公司集資後未來慨發展機會，還是攤薄效應會影響每股盈利。 Jason續指，如果藥明康德想透過今次集資，用黎拓展全球業務，就需提供更清晰慨指引，例如邊個市場，會令市場更易接受今次發CB呢個舉動。 |
|
| 李偉傑 |
2024-09-26T13:34 |
截至早上11時止，過去1小時內，《彭博》用戶搜尋量最多港股，依次為新世界發展(00017)、交通銀行(03328)、農業銀行(01288)、中國銀行(03988)及海底撈(06862)。 新世界及新世界百貨(00825)今日(26日)開市前停牌，鄭志剛現時係新世界執行副主席及行政總裁，亦係新百貨主席，兩家公司今朝停牌，可能同昨日(25日)市傳慨人事變動有關，市傳新世界現任首席營運總監馬紹祥會接任CEO，投資市場及股價會點反映呢個重大人事變動消息？ 華盛證券財富管理部董事李偉傑指，公司傳出重大人事變動傳聞，股份係呢個敏感時間停牌係合理，但實際人事變動暫時仍未知道。市傳馬紹祥接任新世界CEO，市場對佢慨執行能力，或對股價折讓能否收窄都有正面睇法，因為市場通常對新任人選有較高期望。 |
|
| 李偉傑 |
2024-09-24T16:06 |
名創優品(MINISO)(09896)擬斥近63億人仔，收購蝕足3年慨內地永輝超市近30%股權，消息一出，今日(24日)股價一度急瀉逾39%，險守20元，投資者點睇呢單deal，似乎已用腳投左票，究竟名創要用60億人仔買一家蝕錢公司？ 華盛證券財富管理部董事李偉傑指，名創今次買永輝超市暫時真係睇唔到有任何協同效應，加上名創係股價今日(24日)急挫前，市值約400億人仔，絕對有能力直接開多個品牌，唔需要用60幾億人仔買一家蝕緊錢慨公司。 Jason補充，雖然名創睇到永輝一些市場睇唔到慨潛力，又或者想透過公司係內地慨實力，同埋海外拓展能力，帶永輝「出海」。 但佢提醒，永輝係騰訊控股(00700)入股後仍然賺唔到錢，所以依家牌面上睇，用60幾億人仔買一家蝕錢公司，的確唔係一單好劃算慨交易，亦係今日急瀉後唔識彈慨原因。 |
|
| 李偉傑 |
2024-09-10T16:30 |
今日(10日)係手機界大日子，兩大品牌蘋果公司(Apple Inc.) 及華為前後腳舉行發布會，Apple慨iPhone 16系列硬撼華為慨三摺手機Mate XT非凡大師，不過，對手機設備股冇刺激作用，其中，舜宇光學(02382)及瑞聲科技(02018)午後跌2%至3%，係咪因為市場唔睇好呢兩部新機可以引爆換機潮？ 華盛證券財富管理部董事李偉傑指，雖然Apple推出人工智能(AI)功能Apple Intelligence，但卻令市場失望，因為連美國用家都要等到10月先用到AI功能，意味Apple未準備好就已急急推iPhone 16，時間點上同市場預期有落差，部分海外用家更要明年先可以用到AI功能，就更加唔使咁心急換機。 華為方面，雖然三摺機Mate XT新奇兼有好大吸引力，但因為仲未披露定價，市場估計，可能索價2萬元，因此，呢兩部機慨發布會似乎都唔可以令換機潮發酵。 Jason續指，由於Apple及華為慨賣點都唔係手機設備升級，所以舜宇及瑞聲股價食唔到個氣氛炒上去。 |
|
| 李偉傑 |
2024-09-03T16:51 |
內銀股價今日(3日)幾乎全線向下，昨日(2日)逆市造好慨農業銀行(01288)，今日都要回套，一度挫逾5%，低見3.35元。摩根大通指，內銀季績大致符合預期，但預期股價未來兩個月會走弱，主要係業績觸發市場對淨息差、借貸成本等憂慮。內銀股出現調整，係咪反映部分投資「中特估」概念股慨資金食糊離場？ 華盛證券財富管理部董事李偉傑估計，內銀股短期仍有調整壓力，股價跌主要係今年升得太多，上到高位冇新消息支持股價再上。佢又話，大部分內銀收入及盈利都微跌，僅農行表現較好，派中期息及不良貸款率下降係正面消息，但派中期息其實只係拆開黎派，由於利好消息盡出，股價上到高位已經冇上升動力，所以就出現調整壓力。另一方面，市傳內地准業主做轉按，如果屬實會直接影響內銀淨息差，亦令唔少投資者趁高獲利離場。 揀股方面，Jason話，內銀股首選中國銀行(03988)，其次係農行。 |
|
| 李偉傑 |
2024-08-27T16:31 |
華潤電力(00836)今日(27日)中午出左業績，股價午後由跌轉升，升逾4%，曾高見23.1元，中期息有加碼，派息比率維持約23%，期內公司現金多左1倍，理論上有能力支持派更多息，全年派息係咪值得憧憬？ 華盛證券財富管理部董事李偉傑指，全年派息係可以憧憬，不過，雖然潤電現金多左，但負債都好重，所以即使係長期債務，公司都會考慮返呢個情況，加上潤電去年11月都派過特別息，全年派息係可以期待，但未必年年都派高息。 股價方面，人工智能(AI)用電量未必可以利好內地電企，因為呢類公司主要受惠於煤電容量電價機制提升，股價係業績後市場反應正面，短期仍有動力挑戰24元至25元水平。 |
|
| 李偉傑 |
2024-08-20T17:51 |
內銀股業績期下周殺到，市場憧憬內銀會派中期息，甚至有分析指，內銀股可能是仍未放榜慨股份中，較值博慨板塊。不過，有大行睇淡內銀股，其中，高盛最新一口氣削7隻內銀H股目標價。 華盛證券財富管理部董事李偉傑指，內銀股板塊基本上同內地經濟、港股市況A股市況背馳，持續向上，以估值平及高股息率吸引投資者，以維持升勢，但佢提醒，內銀去年普遍面對息差收窄壓力，而內銀股係「中特估」概念股之中，唯一未有出現調整，但今次派中期成績表就可能輪到佢。 Jason又話，雖然貸款市場報價利率(LPR)維持不變，令息差冇咁大壓力，但睇返股價，部分內銀股已經破頂，或升上多年高位，所以唔排除業績後趁高獲利，但佢估計，股價唔會跌得好深，整體而言，內銀股有調整壓力，但下跌空間唔大。 |
|
| 李偉傑 |
2024-08-13T17:08 |
係柬埔寨開賭慨金界控股(03918)，股價今日(13日)一度瀉逾11%，低見2.95元，其後跌幅收窄。摩根士丹利指，第2季到訪柬埔寨慨內地旅客按年增長47%，據柬埔寨旅遊部統計顯示，上半年國際旅客316萬人次，按年增長23%，其中，內地旅客增長45%，成為當地旅遊業主要動力，雖然當地旅遊業復甦，旅客又增長理想，但似乎反映唔到係業績上面？ 華盛證券財富管理部董事李偉傑指，近年柬埔寨成為旅遊熱點，周邊旅遊、綜合度假已成為旅遊項目，而旅客較重視旅遊體驗，唔係淨係去賭場。此外，由於內地賭客資金方面有一定限制，因而影響賭收，故金界業績未能受惠。 至於金界股價，Jason估計，金界股價係3元水平有初步支持。 |
|
| 李偉傑 |
2024-08-06T17:44 |
舜宇光學科技(02382)上個月發左盈喜，預告上半年多賺最多1.5倍，但股價不升反跌，更延續7月中展開慨跌浪，今日(6日)終於跟隨大市回升，收市升近2%，報40.3元。 舜宇股價由盈喜前高位53元，跌至現水平已累跌逾10元，集團將於8月20日出中期業績，值唔值得提前部署？華盛證券財富管理部董事李偉傑指，舜宇股價自高位回落至今，已形成比較斜慨下降通道，未來兩星期可唔可以向上突破42元水平慨通道頂部，就要睇外圍股市會唔會轉勢，同埋集團將於未來一周出爐慨7月出貨量數據有冇驚喜，否則，或要下試38元水平慨通道底部。 基本面而言，舜宇6月慨手機攝像模組出貨量按年大減20%，公司解釋係因為優化產品組合而出少左低階產品，手機鏡頭出貨量則按年大增近20%。 Jason就話睇好舜宇前景，因為舜宇做開高端手機用慨鏡頭，唔少內地品牌近兩季都推出旗艦機型，而市傳華為、小米集團(01810)將於下半年推出高階摺機，估計市場對高端前置鏡頭慨需求將進一步增加，相信可以彌補來自蘋果公司(Apple Inc.)定單減少慨不確定性。 |
|
| 李偉傑 |
2024-07-30T18:31 |
恆隆地產(00101)上半年少賺逾55%，中期息按年大減33%至12仙，今日(30日)中午出左業績後，股價一度急瀉15%，低見5.42元，跌至逾3年低位。 其實恆隆地產出業績前，匯豐證券及摩根大通已唱淡本地地產股，摩通更「批中」恆隆地產會削減派息，雖然原本係估全年派息減19%至63仙。華盛證券財富管理部董事李偉傑預期，睇唔到恆隆地產下半年業績有改善契機，又估計末期業績應該好難維持派高息。 不過，Jason認為，小股民唔需要對恆隆地產派息前景太悲觀，就算末期息按年再減33%，即由0.6元減至0.4元，令全年派息縮至0.52元，以現價計仍有逾8厘股息率，利息收益仍高過係銀行造定存，佢又認為，恆隆地產股息率調整壓力正逐步消退，唔使擔心賺息蝕價。 Jason續指，雖然恆隆地產股價係業績後「跳水」，但市帳率(PB)僅約0.2倍，低過同樣被摩根大通估計會削派息慨新鴻基地產(00016)及九龍倉置業(01997)，佢預期，恆隆地產股價未來下跌空間唔大，應該可以係5元水平喘定。 |
|
| 李偉傑 |
2024-07-26T16:33 |
內地擬安排3000億人仔超長期特別國債，支持大規模設備更新及消費品「以舊換新」，而焦點就落係家電身上，購買二級及以上能效或水效家電可獲15%補貼，一級及以上能效或水效產品再獲額外5%補貼，即合共20%，今日家電相關股升得幾靚，其中，海爾智家(06690)及海信家電(00921)大升6%，呢輪國策帶動慨升勢可以持續幾耐？ 華盛證券財富管理部董事李偉傑指，中央撐設備更新及消費品「以舊換新」慨政策，可帶挈相關股份受惠，不過，對消費者來講，折扣愈大就一定愈吸引，現時先要刺激市場熱度，提升消費者對買機、換機慨意欲，彌補之前慨政策缺失。 Jason又指，海爾智家可以全面受惠於政策，一定對股價有支持，亦反映市場對政策寄予厚望，加上集團過去盈利平穩向上，表現較同業穩定，相信股價升勢可維持一段時間。 |
|
| 李偉傑 |
2024-07-19T15:26 |
截至早上10時45分止，1小時內《彭博》搜尋量最多港股，依次為停牌中的碧桂園(02007)、遠洋集團(03377)、萬科企業(02202)、華潤置地(01109)及龍湖集團(00960)。 今日(19日)上榜股份清一色係內房股，相信都係同昨日(18日)閉幕慨三中全會有關，會議公報對內房著墨唔多，只係話會有措施刺激內需，以及有全力去庫存，推新政策憧憬落空，內房股股價今日顯著受壓，點解會出現咁大落差？ 華盛證券財富管理部董事李偉傑指，相信主要同三中全會提及慨政策唔夠全面有關，大部分公布慨政策內容只係一個大方向，細節就欠奉，可能要等稍後慨政治局會議先會有詳情，所以內房股今日表現係合理。 Jason又話，「517」樓市新政推出後，房地產銷售曾經係5月出現短暫反彈，但好快又放緩，未來要繼續留意政策會唔會再發揮作用，銷售再度反彈，到時先有機會見到個別內房股可能有較似樣慨反彈。 |
|
| 李偉傑 |
2024-07-16T18:13 |
小米集團(01810)今朝(16日)在微博宣布將於周五(19日)晚上7時舉行新品發布會，摺疊旗艦手機「小米MIX FOLD 4」將會亮相，董事長雷軍形容呢部係「真正頂配全能摺機」。過往雷軍一般會係8月發表年度演講，今年提早係周五傍晚，係咪為「小米MIX FOLD 4」造勢？之前小米推出電動車時，股價就大幅炒上，今次會唔會借「小米MIX FOLD 4」炒返轉？ 華盛證券財富管理部董事李偉傑指，小米一向好識把握發布新產品時機，估計小米股價今次都會借發布新手機炒高，加上呢部新摺機有人工智能(AI)加持，而售價會貴過上一代「小米MIX FOLD 3」，對小米毛利都有幫助。 Jason又話，有過汽車發布會慨成功例子，相信今次發布「小米MIX FOLD 4」都會為小米股價帶來驚喜作用，集團有可能一次過發布市場關注慨消息，例如手機及汽車業務。 |
|
| 李偉傑 |
2024-07-09T16:50 |
農夫山泉(09633)股價今日(9日)終止7連跌，一度反彈逾4%，股價之前跳水係由「618」大減價觸發，睇返農夫山泉上市後，純利連升4年，毛利率一直企穩係60%水平，內地市場爆「內捲」，集團優勢及業績可唔可以維持到？農夫山泉去年茶飲業務增長83%，係咪可以跑贏茶飲同業？ 華盛證券財富管理部董事李偉傑指，農夫山泉係數據上係有優勢，但茶飲市場競爭激烈，有唔少同業都跟隨農夫山泉推出冰杯，農夫山泉要爭取市佔率，需要加大廣告開支，但會影響未來毛利表現。 Jason又話，睇返集團過住業績，好多年都有增長，毛利率又穩定，一直維持55%至60%，未來可唔可以維持將取決於行業進入者係價格慨取態。 |
|
| 李偉傑 |
2024-07-02T16:38 |
吉利汽車(00175)慨極氪(Zeekr)賣得唔錯，吉利亦上調全年銷售目標，由190萬部調高至200萬部。值得留意係，極氪全年銷售目標係23萬部，上半年就賣左8.7萬部，意味下半年每個月平均要賣到2.37萬部才達標，吉利全年銷售目標200萬部係咪講大左？還是真係有機會達標？ 華盛證券財富管理部董事李偉傑指認為，吉利今次上調銷售目標係合理，因為臨近年中預訂會增加，睇返過往數據，吉利每年平均賣150萬至200萬部。佢又話，雖然極氪下半年平均每個月賣到2.37萬部車先可以達標，但極氪第1季度以來，銷售持續增長，相信全年銷售仍有望達標。 Jason又認為，吉利唔一定完全靠極氪食糊。 |
|
| 李偉傑 |
2024-06-25T16:05 |
中國旺旺(00151)今日(25日)中午出左業績，全年多賺逾18%，若拆開上下半年睇，下半年純利增長較上半年勁，管理層係業績報告中指出，部分原材料及包裝材料價格回落，令去年度銷貨成本按年減少2%，推高左毛利率，加上控制開支及所得稅率下調，都帶動盈利增長。旺旺去年下半年業績似乎做得唔錯。 華盛證券財富管理部董事李偉傑指，旺旺成本下降係盈利增長慨關鍵因素之一，營業額佔比較大係乳製品，主要原材料進口全脂奶每單位成本錄得單位數跌幅，令集團盈利表現突出。 Jason續指旺旺業績另一個亮點係海外業務，集團越南工廠正式投入運作，不單生產成本比內地平，更有助推廣東南亞市場，加上旺旺係包括越南在內5個國家有附屬公司，因此，海外市場亦成為業績增長慨關鍵。 |
|
| 李偉傑 |
2024-06-21T13:50 |
截至早上11時止，1小時內《彭博》搜尋量最多慨首5隻港股，依次為東亞銀行(00023)、商湯(00020)、長和(00001)、中國銀行(03988)、恆大汽車(00708)。 排第2位慨商湯，開市前公布折讓配股集資近20億元，主要用作提升支持生成式人工智能(Generative AI)進一步發展，市傳會有多名戰略投資者及基金入股，現有股東亦會增持。 此外，有內媒消息指，商湯將於7月5日舉行慨世界人工智能大會上，發布再升級慨日日新大模型5.5版本。 商湯股價今朝(21日)低開4%，半日最多跌近7%至1.23元，險守配售價1.2元水平。 華盛證券財富管理部董事李偉傑認為，商湯依家仍然係蝕錢，資金壓力幾大，所以市場早已預左公司要集資，股價昨日(20日)早段衝上1.45元日內高位後，臨收市似乎有春江鴨出沒，先行沽貨離場，最終以全日低位1.32元收市。 不過，Jason指，公告指有唔不少於6位承銷人認購新股，相信唔會大幅攤薄股權，加上商湯今日守得住50天線，更一度逆市倒升，相信現價已反映配股因素。 |
|
| 李偉傑 |
2024-06-18T16:32 |
「618電商購物節」發起人京東集團(09618)，股價今日(18日)冇乜睇頭，睇返過往慨「618」效應，京東股價係2021及2022年5月中至6月底，分別升約14%及20%，但2023及2024年同期就要跌，係咪反映「618」效應已經消退？ 華盛證券財富管理部董事李偉傑指，因為內地政策唔鼓勵盲目消費，同埋消費模式唔同左，個別內地企業近年亦冇再每日現場公布銷售金額，而內地消費力持續受壓，導致銷售額冇起色，自然無法帶動股價。 京東股價走勢方面，Jason就話，除左跟大市走，亦因為行業競爭非常激烈，電商行業互相搶奪市場份額，若要提升市佔率，就要向海外市場埋手，銷售才有增長空間。 |
|
| 李偉傑 |
2024-06-11T18:14 |
啤酒股今日(11日)集體插水，華潤啤酒(00291)跌超過4%、青島啤酒股份(00168)跌近1%、百威亞太(01876)就跌近3%。啤酒銷量受壓，係咪因為茅台減價，搶走部分市場？ 華盛證券財富管理部董事李偉傑指，茅台獨特性高，同啤酒關聯性唔大，由於內地消費降級，啤酒銷量難免受影響，若人均收入下降，靠賣高端啤酒谷盈利慨企業，會面對更大困難。此外，茅台同啤酒客源未必重疊，所以兩者關聯唔大。 此外，內地券商睇好今個月開鑼慨歐洲國家盃會利好啤酒銷情，啤酒股係咪可以受惠於歐國盃？Jason認為，歐國盃即將開鑼，加上今年已經冇防疫限制，市民參與度一定會提高，應該可以彌補到今年頭幾個月消費力流失慨情況，佢認為，今年慨體育盛事會有利啤酒股股價表現。 |
|
| 李偉傑 |
2024-06-04T16:30 |
中煙香港(06055)發盈喜，預告今年上半年最少多賺30%，受消息刺激，中煙股價今朝高開逾7%後，升幅不斷擴大，午後升逾17%，衝破16元關口，創近2年半新高。 中煙提及，發盈喜主因之一係趁疫後免稅店消費客流持續恢復，優化捲煙產品組合，並提升自營業務佔比，令捲煙出口業務慨收入及毛利大幅增長，公司去年相關收入急升逾8倍，恢復至2019年同期約55%。 華盛證券財富管理部董事李偉傑認為，捲煙出口業務去年佔中煙總營業額約10%，加上公司受惠於行業規管嚴格下競爭較小，相比其他內需股有更強復甦能力，未來仍有增長憧憬。 不過，中煙股價今年已累升逾60%，走勢上已拋離所有主要平均線，並升穿上升通道，14天相對強弱指數(RSI)亦逼近超買水平。Jason指，中煙股價低位係8.5元水平，以近期阻力區間12.5元水平作頸線，估計股價仍有4元上升空間，即可升至16.5元水平，建議投資者等今輪反彈完結後，股價回落至10天線水平再考慮吸納。 |
|
| 李偉傑 |
2024-05-28T16:26 |
阿里健康(00241)去年多賺約65%至逾8億人仔，收入增長近1%，刺激股價今日(28日)一度勁升逾15%，如果拆開上下半年睇，不論收入或盈利，下半年都好過上半年，不過，收入按年計其實要跌。值得留意係，受惠於精簡營運及數字化升級，經營及定價能力都好左，但點解毛利率仲未重返疫前水平？ 華盛證券財富管理部董事李偉傑認為，阿里健康業績靚，唯一要挑剔係營業額未見大升，只係盈利大幅增長，藥商平台前期投放普遍較多，依家已經到左收成期，由於同業都係近兩年先賺錢，又或者虧損收窄，所以競爭都激烈。 毛利率方面，Jason認為，疫後主要考驗企業韌性係咪可以持續，同埋始終係一個平台，毛利唔可能推到好高，除非有自營產品，同埋睇下可唔可以進一步提升健康及網上看診業務，毛利先有機會推高，佢坦言，自營產品毛利有少少雞肋，雖然量大但價唔可以扯得太高，因為同業之間慨競爭會削弱毛利。 |
|
| 李偉傑 |
2024-05-21T16:51 |
內地5月批出96款國產網遊版號，雖然網易(09999)冇份，但集團昨日(20日)有逾40款遊戲亮相，花旗引述管理層指，依家集團慨產品線合共有54款遊戲，其中20款已獲批，花旗指，由於網易遊戲產品線豐富，可推動未來幾年增長，焦點遊戲包括《永劫無間》及《燕雲十六聲》，前者電腦版已推出3年，亦幾受歡迎，手遊版預先登記玩家已逾2520萬，網易新遊戲對推動增長有幾大幫助？ 華盛證券財富管理部董事李偉傑估計，網易增長同騰訊控股(00700)差唔多，網易新一季主打派對遊戲，性質較平和，亦冇咁血腥，但玩家大部分偏好較刺激慨遊戲，因此，預期新遊戲可以保持收益，但未必可以帶黎強勁收入，由於《永劫無間》及《燕雲十六聲》都係好受年輕人歡迎慨高質遊戲，所以市場都遊戲今季推出後，集團能回復理想增長寄予厚望，加上網易早前跟暴雪娛樂(Blizzard Entertainment)「復合」，會令市場有另一個憧憬。 股價方面，Jason指出，由於市場對網易業績冇太大期望，估計網易周四(23日)放榜後，股價會係150元至160元水平調整。 |
|
| 李偉傑 |
2024-05-14T15:52 |
騰訊控股(00700)今日(14日)收市後會出首季業績，股價暫時連升4日，今早一度升逾1%，高見384.8元慨52周高位。《彭博》綜合市場預測，預期騰訊首季收入按年增長近6%，經調整盈利則增長32%。 不過，華盛證券財富管理部董事李偉傑預期，上季遊戲收入將按年錄得單位數倒退，除左受高基數影響，亦因為期內冇乜新遊戲推出，而去年下半年推出慨合家歡派對遊戲《元夢之星》未能吸引到大量「流水」。佢又預期，廣告業務會延續去年復甦勢頭，連同視頻號商業化業務及金融科技業務，成為集團首季慨盈利增長亮點。 至於第2季，Jason指旗下新手遊《地下城與勇士》慨韓服吸金能力相當強，令市場憧憬下周二(21日)係內地正式上線後，將刺激整體流水進一步增加。 此外，佢相信騰訊加碼回購慨機會唔大，並認為目前回購規模已經足夠抗衡來自南非大股東Naspers拋售持股慨沽壓，但預期股價升至400元關口後有較大沽壓。佢又指，投資者反而可以留意資本開支(CAPEX)今年有冇增長，話集團投入資源研發更有效提升股東回報價值。 |
|
| 李偉傑 |
2024-05-07T17:37 |
蘋果公司(Apple Inc.)今晚(7日)舉行春季發布會，預期新iPad Pro及iPad Air將會亮相，今次就冇iPhone，但係換機潮下，比亞迪電子(00285)係咪可以受惠？比電股價之前一度跌至23元水平，之後彈返上去，最新已上到30元水平慨阻力位，比電股價後市會點走？ 華盛證券財富管理部董事李偉傑指，比電業績係跑贏同業，雖然搵唔Apple業務對集團貢獻有幾大，但海外業務收入佔比係不斷上升，去年已去到逾60%，手機業務方面，集團係造鈦金屬外殼，呢個都係近年大行其道慨產品，佢認為，未來相關業務都會繼續upgrade，係一個唔錯慨發展方向。 股價方面，Jason認為比電有機會挑戰2月、3月高位，即32元水平，雖然新iPad未現身，但市場已偷步炒作，短期目標係升穿32元，中線有機會上試37元水平。 |
|
| 李偉傑 |
2024-05-03T12:37 |
截至早上11時止，1小時內《彭博》用戶關注度上升最多港股，依次為藥明合聯(02268)、郵儲銀行(01658)、藥明生物(02269)、新鴻基地產(00016)及騰訊控股(00700)。 藥明系今早(3日)全線向下，其中，藥明合聯一度瀉13%，失守100天線。藥明生物指，唔會參加今年6月於美國加州舉行慨「2024年生物科技國際大會」，藥明康德(02359)亦不在參展商名單內，但兩家公司自2022年起，一直有參加呢個活動。今次慨決定會唔會同美國今年3月通過《生物安全法》有關？藥明系急挫係咩原因？ 華盛證券財富管理部董事李偉傑認為，今年係中美角力非常明顯慨一年，近日亦有消息指，美國可能會對華為等公司進行新一輪制裁，呼應之前藥明系被美國施壓，係呢個情況下，如果再去美國出席活動會令市場更觸目，所以就決定唔參加。 Jason又指，集團美國業務佔比相當大，雖然近年已開始擴大大中華區佔比，但始終美國業務盈利貢獻大，若美國不斷加大施壓，必定對藥明系盈利及發展前景構成一定壓力。 股價方面，李偉傑認為，雖然港股近期回勇。 |
|
