| Commentator |
Time |
Content |
Tag |
| 盧志威 |
2024-12-04T11:27 |
南韓總統尹錫悅昨晚(3日)突然宣布「戒嚴」，但國會迅速通過解除戒嚴令，其後尹錫悅亦正式宣布撤戒嚴令，結束僅持續逾6個鐘慨戒嚴事件，市場解讀為政黨爭拗，南韓股市今朝(4日)如常開市，首爾KOSPI指數今早低開約2%，今次事件對金融市場有咩影響？點睇高盛話依家係買韓股慨機會？ 潤淼資產管理董事盧志威指，今次戒嚴事件由開始到結束只係幾個鐘，令韓圜出現輕微震盪，但金融市場慨震盪已經完結，因為市場已經預左國會一定會「做野」，例如啟動彈劾總統程序，所以對金融市場影響唔大，短期內回穩完全冇問題，但股市要回升就有難度。 William續指，南韓政局一向複雜，今次突襲式戒嚴，短期黎講一定係負面，但由於國會反應迅速，令政局好快回復穩定，加強投資者對南韓股市慨信心，亦會對當地慨穩定性加分，中長線係一個買入機會。佢認為可以考慮買入龍頭股，例如三星電子(Samsung Electronics)呢類半導體股會較穩陣。 |
|
| 盧志威 |
2024-11-27T11:06 |
公開招股超額認購78倍，內地物流龍頭順豐控股(6936)今日(27日)上市，值得留意係暗盤價昨日(26日)高開後回軟，而順豐A股昨日收市就微升，H股招股價34.3元，較A股昨日收市價有逾20%折讓，如果H股今朝首掛表現對辦，抽到慨「幸運兒」係咪要止賺？ 潤淼資產管理董事盧志威指，順豐定價唔算高，問題係同華潤飲料(02460)及美的集團(00300)當日比較，依家市況係差左，所以表現好難直接比較，佢估計，順豐短期好難有突出慨表現，長線就留意公司有咩發展，始終都係龍頭企業，如果抽中，短線都有得賺，不如考慮食糊套現再買另一隻股份。 |
|
| 盧志威 |
2024-11-20T12:20 |
市場關注俄烏衝突事態發展，美股3大指數昨晚個別發展，道指4連跌，但納指及標指都有得升，高盛重申標指明年底見6500點慨目標。美股短線表現其中1個關鍵因素，就係今晚(20日)收市後出爐慨英偉達(Nvidia)季績，市場預期會交到一份靚業績，又估計股價未來1年睇升1倍，加上之前沃爾瑪(Walmart)季績好過預期，集團再上調年度銷售預測，畀左一個樂觀前景指引市場，刺激股價破頂。 潤淼資產管理董事盧志威指，依家市場焦點都係睇返業績，Walmart美國本土銷售較強勁，亦睇好今年「Black Friday」銷售，整體黎講都係靠業績基本因素推動。 美股方面，佢認為，去到現水平，明年底目標價及估值都係高，但因為公司表現夠強，所以買指數同買公司概念係好唔同，個股方面就可能出到好似Walmart呢些強勢股，股價今年已累升約60%，因此，暫時都係聚焦個別公司較好。 |
|
| 盧志威 |
2024-11-13T11:40 |
美國通脹數據出爐前夕，加上美債息抽高，美股3大指數昨晚(12日)全線低收，係總統大選後首次出現調整，由於「Trump Trade」略為降溫，Tesla股價昨晚收市挫6%，特朗普旗下Trump Media & Technology Group(DJT.US)更大跌9%，不過，比特幣(Bitcoin)價格仍企係88000美元，係咪可以趁美股回調，高追最受惠「Trump Trade」慨Bitcoin？ 潤淼資產管理董事盧志威指，雖然Bitcoin及Tesla股價都係特朗普勝選慨贏家之一，但佢認為市場有過分樂觀之嫌，特朗普慨政策唔會一夜間推出，依家市場主要由投資情緒驅動，所以呢類資產好難估頂，情況類似10月初慨港股，當時投資情緒好亢奮，不過，當呢些資產轉向時，可以大林近20%至30%，佢認為，現階段唔係入市好時機，唔建議高追。 William又指，如果真係想依家買Bitcoin，博幣圈之後傳黎好消息，建議小注買入，唔好訓身入市。 |
|
| 盧志威 |
2024-11-06T12:10 |
美股於總統大選有結果前，全線反彈，三大指數收市升逾1%，科技股亦都做好，英偉達(Nvidia)再升近3%，市值達到3.43萬億美元，超越蘋果公司(Apple Inc.)成全球市值最大公司，英偉達6月曾短暫成全球市值最大公司，不過短時間就見頂，今次又應該如何分析英偉達？ 潤淼資產管理董事盧志威估計，Nvidia調整後可以重拾上升動力，因為Nvidia股價是靠產品支撐，只要未有其他產品能夠動搖Nvidia晶片龍頭地位，市場都不需要擔心股價會出現大幅度下跌，只會出現短期調整，反觀Apple新產品缺乏以往的爆炸性及股價推動力。 William又指，美股大部分互聯網股都處於穩定向好階段，建議可分散買入，例如Nvidia估值已經偏高，高增長階段已過，年內難再出現倍升情況，但可以作為投資組合一部分。 |
|
| 盧志威 |
2024-10-30T11:49 |
美企繼續派成績表，昨晚(29日)輪到Google母公司Alphabet及晶片製造商AMD，其中，AMD業績令市場失望，雖然上季業績對辦，但今季營收展望差過分析員預期，拖累股價昨晚(29日)盤後大跌7%，係咪反映人工智能(AI)投資已由晶片基建，轉移至AI應用層面？如果依家買AI股應該點揀？ 潤淼資產管理董事盧志威指，隨著AI發展，未來大部分企業都會大量應用AI，但要分清楚企業公司同AI基建慨關係，例如晶片巨擘英偉達(Nvidia)係AI基建係不能被取代慨龍頭，令公司生意長做長有，但最近有半導體公司慨業務指引顯示增長放慢，所以揀半導體股要睇公司基本面，因為基本因素係反映公司係AI行業細分領域慨增長，以及可唔可以繼續支持股價繼續企係高位。 |
|
| 盧志威 |
2024-10-23T12:02 |
內地樽裝水品牌怡寶母企華潤飲料(02460)今日(23日)首掛，公開招股超額認購逾233倍，一手中籤率30%，要抽7手先可以穩獲1手，以上限14.5元定價，集資淨額約49億元，更成為今年「凍資王」，招股反應咁好，係因為樽裝水業務有吸引力，還是只係受惠於大市投資氣氛熾熱？上市後股價又會點走？ 潤淼資產管理董事盧志威指，中長期而言，隨著房地產及金融業好轉，消費股亦會跟住上，因此，投資者可以考慮現階段買消費股作中長線投資。 業務方面，William就話，一般樽裝水業務主要係投資消費長期增長概念，唔係睇基本面，所以呢類股份慨走勢好視乎資金配置，希望未來內地消費市場好轉，可以帶動股價，始終依家大部分消費股估值仍處於低位，但佢提醒，要留意內地係美國總統大選後，有冇相關政策出台影響消費股走勢。 |
|
| 盧志威 |
2024-10-16T11:52 |
美股昨晚(15日)結束兩連升，周一(14日)造好慨晶片股昨晚都轉差，其中，人工智能(AI)晶片「股王」英偉達(Nvidia)挫5%，主要受艾斯摩爾(ASML)業績拖累，ASML荷蘭股價係放榜後急瀉15%，ASML原本今日(16日)派成績表，但因為技術問題提早1日出爐，呢份季績差過市場預期，上季定單量僅及分析員預期一半，前景指引亦偏弱，對人工智能(AI)行業有咩啟示？ 潤淼資產管理董事盧志威表示，ASML慨問題在於美國實施出口管制，增加ASML係內地銷售產品慨難度，其次係面對周期性問題，ASML係光刻機巨頭，公司定單出現波動，令市場質疑上游受惠唔到AI熱潮，又或者熱潮只集中係某些產品，例如Nvidia某幾款晶片，而其他AI相關慨產品仍未能受惠。 |
|
| 盧志威 |
2024-10-09T11:33 |
摩根士丹利上調騰訊控股(00700)目標價至570元，又重申「股王」係行業首選，主要係睇好集團第3季業績，又估計遊戲收入持續強勁，雖然股價近排升左唔少，但估值仍然吸引，依家適唔適宜部署騰訊？美國人工智能(AI)晶片「股王」英偉達(Nvidia)指，新晶片Blackwell效能高，可以減低用電量，股價昨晚(8日)衝上3個月高位。港美兩大「股王」應點揀好？ 潤淼資產管理董事盧志威指，現階段宜部署騰訊，主要係市場普遍睇好，加上情緒主導市場，只要基本面唔係太差，資金都會流入藍籌，而騰訊就係行業首選。 至於Nvidia，William就話，Nvidia產品有些似以前慨iPhone，即係產品搶手，可以保持高毛利，亦唔使擔心銷情，加上Nvidia係依家已成為明星股，當美股向上，Nvidia就會係行業首選股。 |
|
| 盧志威 |
2024-10-02T11:36 |
近期中央密集出招救樓市，包括下調首期比例、減存量房貸息，以及放寬或撤銷限購等，有消息指，北京、杭州等地成交轉趨活躍，加上匯豐證券指最新救市政策，令該行認為內房出現轉捩點會提早1年至明年出現，並上調多隻內房股目標價。不過，高盛仍睇得較保守，雖然預期內房今輪反彈或較以往持久，但如果基本因素唔改善，內房仍好難轉勢，到底內房股值唔值博？ 潤淼資產管理董事盧志威指，近期內房股係較值博，始終係中央重點打救慨範疇，依家出台慨政策主要針對去庫存及穩定樓價，若要長期反彈，資金及就業等因素缺一不可，加上中央剛開始救樓市，要推高樓價仍然較難，但暫時出台慨措施相信都足夠，投資者可以博內房股有個短期反彈，但中長線而言，未必可以變成高增長板塊。 |
|
| 盧志威 |
2024-09-25T11:35 |
人民銀行昨日(24日)聯同國家金監總局及中證監推出一系列刺激經濟措施，救市「組合拳」刺激A股及港股大升，市場亦睇好後市表現，主要係今次慨救市措施中，有兩大新招撐股市，分別係互換便利首期操作規模5000億元(人民幣‧下同)，以及股票回購再貸款3000億元，合共向股市定向「放水」8000億元，究竟當中產生慨連鎖效應有幾大？成效又可以持續幾耐？ 潤淼資產管理董事盧志威指，動用8000億元撐股市會有乘數效應，因為保險公司會係其中1類受惠企業，有利A股向上。至於成效可以持續幾耐，因為臨近「十一國慶」，放假期間A股冇市，即係港股冇北水，股市係呢段期間或會出現調整，令定向「放水」成效冇咁顯著，所以短期會出現獲利回套情況，相信要等國慶假期結束後，先真正睇到「放水」成效。 |
|
| 盧志威 |
2024-09-11T10:24 |
美國總統大選重頭戲今朝(11日)上演，代表民主黨出戰慨現任副總統賀錦麗(Kamala Harris)，硬撼前總總、代表共和黨出選慨特朗普(Donald Trump)，進行兩人首場亦可能係最後一場辯論。美股3大指數昨晚變動唔大，似乎都係觀望緊呢場辯論，值得留意係，有「恐慌指數」之稱慨VIX指數昨晚略為回落，而部分資金似乎轉投債市，依家美股慨風險胃納有冇因為呢場辯論而轉變？兩黨慨稅項政策對企業又有咩影響？ 潤淼資產管理董事盧志威認為，係市場缺乏焦點下，呢場辯論有可能令市場波動，而相關板塊或會因應兩人表現而有郁動，此外，由於美股仍有唔少不確定性，依家最明朗係賭美息向下，而經濟數據差會令加息步伐及幅度快些和大些，由於唔知應該點部署，所以資金就流入債市避險。 佢又話，民主黨主張向大企業及富人加稅，對股市黎講長遠一定係利淡，加稅會令唔同範疇慨動力減弱，雖然特朗普主張減稅，但都會有其他影響，所以投資者可能會選擇係大選前放假，勢令市場變得波動，由於風險大左，呢段時間宜減少注碼。 |
|
| 盧志威 |
2024-09-04T11:44 |
市傳英偉達(Nvidia)已收到美國司法部傳票，意味對集團慨反壟斷調查升級，拖累Nvidia股價昨晚(4日)跌近10%，市值單日蒸發逾2700億美元，折合逾2.1萬億港元，仲拖林成板晶片股。Nvidia涉及慨反壟斷調查係咪要打定輸數？股價跌至現水平值唔值得撈貨？ 潤淼資產管理董事盧志威指，現階段唔使特別擔心Nvidia慨反壟斷調查，因為調查時間一般都好長，過程中亦涉及雙方談判及角力。佢又話，投資者不妨等估值再平些才買入，睇返股價走勢，要回落至100美元樓下應該唔使等好耐，所以不妨等股價跌穿呢個位再考慮做部署。 William估計，Nvidia股價甚至會係上月底部，即90美元水平出現第2隻腳，投資者可以睇長少少，因為集團業績其實冇乜瑕疵，反壟斷事件只係短期消息。 |
|
| 盧志威 |
2024-08-28T11:43 |
係美國上市慨內地電商股拼多多(美股:PDD)出完業績後，股價暴瀉，昨晚(27日)仍未止跌，再挫4%，收報95.91美元，到底拼多多現價係咪已反映所有利淡因素？ 潤淼資產管理董事盧志威指，作為一隻高增長股，拼多多市盈率(PE)跌到10倍樓下，雖然已反映左利淡因素，但市場仍對內地消費有降級預期，所以拼多多短線而言，100美元關口係好難頂得住，但中長線而言，等股價落到90美元水平買入，贏面仍然好大。 此外，拼多多競爭對手京東集團(09618)公布新一輪回購計劃，未來36個月會動用唔超過50億美元回購股份，雖然回購價高過上次，但市場仍然睇得唔樂觀。佢認為，市場睇淡慨唔止係消費股，而係整個投資市場氣氛。 |
|
| 盧志威 |
2024-08-14T12:07 |
美國7月生產物價指數(PPI)低過預期，按年及按月升幅都放緩，整體及核心PPI按年升2.2%和2.4%，反映通脹持續放緩，刺激美股3大指數昨晚(13日)齊升，其中，道指大升逾400點，納指更升2.4%。美國今晚(14日)會出消費物價指數(CPI)，數據係咪繼續左右美股大局？ 潤淼資產管理董事盧志威表示，睇返聯儲局長期溫和通脹目標，PPI升2.2%其實都收貨，所以昨晚美股表現興奮。另一方面，市場對聯儲局減息慨信心好大，包括短期減息慨持續性，以及幅度會較大，都對大市及資產價格有正面作用。 William又指，經濟數據主要反映個別業績表現，其實金融市場對利率變化較敏感，因為會直接影響融資、貸款等活動，可更大程度超前反映投資者行為。佢續指，如果CPI冇明顯走弱，再加埋各項數據指標及組成部分冇異動，基本上美股今晚易升難跌，同埋PPI數據靚仔，相信CPI應該唔會令市場失望。 |
|
| 盧志威 |
2024-08-07T11:32 |
周一(5日)出現慨「黑色星期一」股災，有指由日本央行爆冷加息引爆慨日圓拆倉潮係「元兇」，雖然日圓近期轉強，但摩根大通指，日圓仍嚴重被低估，之前慨利差交易(Carry Trade)平倉或拆倉潮仲未結束，現時投機領域拆倉只係完成左50%至60%，日圓依家去返144、145，係咪只係大跌過後短暫企穩？若日圓繼續升值，速度係咪會比之前慢？此外，日本6月實際工資數據按年升1.1%，係27個月以來首次有得升，呢些數據都會係日本央行再加息及「收水」慨理據，日圓會升到咩水平？ 潤淼資產管理董事盧志威指，到底日圓未來會點走，如果要拆Carry Trade慨倉，可以需時好耐，所以日圓短線會比較波動，繼續升慨機會仍較大，對日股黎講係非常不利。 William又話，其實日圓之前係跌過龍，每百日圓兌港元兌到5算樓下，雖然日圓依家升返，但都唔係一個離譜慨水平，所以應該仲有上升空間，短線係會波動，但迎來新一輪升勢亦係合理，不過，受拆倉潮等影響，投資者再入市會更加小心，所以短期離場慨人會較多，會出現日圓易升日股易跌慨局面。 |
|
| 盧志威 |
2024-07-31T11:24 |
大型科技股微軟(Microsoft)及超微半導體(AMD)，昨晚(30日)係美股收市後出左季績，其中，微軟因雲服務收入差過預期，股價盤後一度挫7%，不過，AMD業績好過預期，股價盤後大升8%，不過，出業績前半導體板塊已偷步跌，費城半導體指數收市亦跌3.8%，微軟業績唔好，大型科技股係咪都冇運行？ 潤淼資產管理董事盧志威指，市場情緒比業績更重要，過去1年，科技股升勢強勁，係人工智能(AI)熱潮下，微軟股價大升，市場開始留意有冇資產錯配，而微軟業績可以跟住市盈率(PE)上，所以問題唔大。 William續指，依家市場最關注美國總統大選，前總統特朗普(Donald Trump)競選時指，要將半導體公司回流美國，由於市場認為科技股未來走勢唔明朗，所以調整資金配置避險，減少科技股持倉，導致近期科技股處於一個反覆調整格局。 |
|
| 盧志威 |
2024-07-24T10:46 |
美股近日焦點除左業績及周五(26日)出爐慨個人消費支出(PCE)物價指數，當然包括美國總統大選形勢，參考《路透》及《彭博》引用慨民調結果，應該會代表民主黨出戰慨賀錦麗(Kamala Harris)，削弱左特朗普(Donald Trump)慨領先優勢，其中，不論《路透》或普益索慨民調，賀錦麗支持度領先對手2個百分點。摩根大通提醒投資者，大選前美股會持續波動，亦要留意兩黨候選人慨政策，但無論邊個當選相信都係打中國牌。 潤淼資產管理董事盧志威指，依家總統大選形勢係叮噹馬頭，相信呢個情況會持續，又認為換賀錦麗出選係正確慨決定，因為可以將勝負拉返近些，係對民主黨有利。不過，會增加美股慨不確定性，因為基於勝負考慮去買慨股份係好唔同，未來逾3個月，美股會因選戰變得更波動，包括晶片股都跌左落黎， William又話，基於選舉因素，美股係第3及第4季未必有好慨投資機會，除非大市大幅急挫。 |
|
| 盧志威 |
2024-07-17T10:35 |
港股連跌兩日，累跌逾560點，上周升幅已全部化灰，跌市原因包括市場擔心特朗普一旦再當選，將會再收緊對華貿易限制，其次係內地宏觀數據唔理想，以及憂慮三中全會最終冇驚喜。恆生指數昨日(16日)再失18000關，10天及20天線都守唔住，後市係咪唔太樂觀？ 潤淼資產管理董事盧志威認為，一旦特朗普成功再入主白宮係不利港股，睇返佢上次當選美國總統，中美爆發貿易戰，對華關稅係非常高，首先係中美會唔會再爆貿易戰，其次係內地已推出唔少政策，包括放寬內房、互聯網遊戲政策，但關鍵係呢些資金會唔會釋放出黎，佢又話，一旦再爆貿易戰，但美國大手減息，就有條件放寬貨幣政策，如果出現呢個情況就會利好股市。 不過，William提醒，都要視乎出現呢些情況慨時機，到底係係咪過左三中全會，等特朗普上任後，以及聯儲局亦已減息。佢估計，若美國9月開始減息，下半年慨銀根會較鬆動，繼而帶動股市向上。 |
|
| 盧志威 |
2024-07-10T10:26 |
聯儲局主席鮑威爾(Jerome Powell)一連兩日到國會作證，佢昨日(9日)指，雖然擔心利率持續高企會危害經濟，但亦暗示唔急於今個月減息。美股昨晚已連續第2日個別發展，其中，納指已連續第6個交易六創收市新高，升勢繼續集中係「科技7雄」(Magnificent Seven)，其中，Tesla股價已連升第10個交易日，今年暫時累升5%，成功翻身。美國明晚(11日)會出通脹數據，有機會令市況波動，美股後市係咪仍然要靠「7雄」？ 潤淼資產管理董事盧志威指，直接解讀鮑威爾慨言論就係依家唔會減息，但之後好大機會減息，所以今年應該會減息1至2次，但長遠減息空間有幾多仍然未明朗，導致美國10年及30年期長債息落唔到去，已經同短息倒掛。 股市方面，William就話，納指近期都係靠「7雄」輪動不斷破頂，整體走勢仍然係向上，隨著美國非常緩慢地步入減息周期，債券表現將會好轉，此外，追短線固定收益如定存慨投資者，有可能會「出返黎」去返股市，呢個係推動股市中長期向上非常重要慨因素。 |
|
| 盧志威 |
2024-07-03T11:16 |
美國電動車龍頭Tesla第2季交付量超預期，刺激股價昨晚(2日)收市大升10%，Tesla上季交付約44.4萬架電動車，按年跌近5%，已連跌兩個季度，跌幅細過預期，但按季增長近15%，係咪反映Tesla業務已見底？想買車股Tesla係咪首選？ 潤淼資產管理董事盧志威指，可以從兩個層面睇Tesla，首先集團交付量按季見底回升係好事，亦係股價向上慨主因，其次係睇內地市場增長放緩問題，主要係有太多唔同品牌慨電動車推出，市場仍未完成整合，但Tesla勝在係巨無霸，加上生產成本較低，如果打價格戰，Tesla有一定優勢。 William又認為，汽車股龍頭始終係Tesla，即使業績短期唔好，但仍值得考慮，內地市場方面，如果想穩陣些都係揀返比亞迪股份(01211)，因為行業完成整合後，價格有望回升，長遠仍然睇好。 |
|
| 盧志威 |
2024-06-26T11:31 |
美國聯儲局理事鮑曼(Michelle Bowman)指，通脹仍有上行風險，估計局方今年唔會減息，美股3大指數昨晚(25日)個別發展，其中，道指收市瀉近300點，另一名理事庫克(Lisa Cook)亦對減息持保守態度。此外，雖然美國6月消費者信心指數下滑，但其實同過去兩年比較差距唔大，點解官員會咁「鷹派」？ 潤淼資產管理董事盧志威指，原因係聯儲局最新慨「點陣圖」有少少滯後，加上美國最近出爐慨經濟數據並非急降溫，雖然利率見頂，但經濟仍正常運行，所以美國的確冇減息迫切性。 William又話，由於美國高息環境比預期持續更耐，令美元比預期強勢，導致其他貨幣出現沽壓，若美息持續高企，聯儲局減息步伐都唔會太快。 |
|
| 盧志威 |
2024-06-12T11:26 |
蘋果公司(Apple Inc.)備受外界關注慨人工智能(AI)技術Apple Intelligence，終於係日前舉行慨全球開發者大會(WWDC)壓軸登場，但股價到昨晚(11日)先有反應，收市大升逾7%兼破頂，市值單日進帳2150億美元，創單日最大增幅，市值升至3.18萬億美元，進一步超越英偉達(Nvidia)，係咪反映市場對Apple慨AI前景有好大憧憬？ 潤淼資產管理董事盧志威指，Apple今次趁WWDC提升返集團硬件以外慨產品吸引力，因為之前推出慨產品，銷售一直谷唔起，加上憧憬加左AI元素慨iPhone 16將會引爆換機潮，吸引唔少投資者再追入Apple。 William又話，Apple後市主要視乎兩大因素，首先係加左AI功能慨iPhone 16好大機會掀起換機潮，其次係資金流走向，由於Nvidia拆細後股價一定會調整，部分較保守慨投資者會換馬至Apple，佢估計，Apple股價短期將會繼續升。 |
|
| 盧志威 |
2024-06-05T11:00 |
日本央行副行長冰見野良三昨日(4日)表示，日央行指導貨幣政策時，必須要非常警惕日圓波動對經濟及通脹慨影響。此外，《彭博》又引述消息指，日央行最快會係下周會議討論縮減買債規模，係咪央行認為日圓太弱要出手撐價？ 潤淼資產管理董事盧志威表示，放慢買債步伐係推高長債息其中1個方法，相比美元，日圓利率較低，唔少投資者會借日圓進行投資，包括直接買入資產，或兌換其他貨幣。佢又話，如果日央行認為日圓太波動，放慢買債步伐係對症下藥慨做法，只要融資成本上升，日圓再跌機會就較細，William估計，日圓有機會反彈，因為日央行呢個策略對日圓有較大支持。 |
|
| 盧志威 |
2024-05-29T11:16 |
美股3大指數走勢罕有出現分化，睇返最新慨標普500行業輪動圖，處於弱勢慨科技股有轉強跡象，但值得留意係，標普500分類中，公用、能源及通訊服務股一直係升市領頭羊，點解科技股會突然出現轉強跡象？ 潤淼資產管理董事盧志威認為，科技股出現轉強跡象係基於資金流變化，佢提醒，公用股及能源股股價一向較穩定，係長楂慨首選，早前，因為經濟數據出爐後，令市場對聯儲局減息，甚至加息預期有變，帶動公用及能源呢類息口敏感股向上，依家息口問題冷卻返，資金又再轉投科技股，包括持續強勢慨英偉達(Nvidia)，帶動科技板塊回暖。 William又話，Nvidia近期宣布將股份拆細，仲有20%回報係錦上添花，雖然股價短期或會比較波動，但中長線而言，由於人工智能(AI)晶片熱潮好難逆轉，所以佢認為Nvidia股價中長線仍會向上。 |
|
| 盧志威 |
2024-05-22T12:13 |
近期商品及有色金屬價格急升，睇返《彭博》大宗商品指數，短短3個月內累升25%慨商品數目回升，跑出慨商品及有色金屬包括銅、鎳、銀、錫、鋅、可可、橙汁，係2022年以黎最多。回顧2021至2022年，曾經有逾20隻商品出現類似升勢，值得留意係，之後美國通脹急升，商品市場今輪升浪，係咪美國通脹再度失控慨先兆？ 潤淼資產管理董事盧志威指，通脹預期要綜合工資、樓價及商品等因素去睇，現時因為伊朗、以色列等地緣政治因素，導致商品價格易升難跌，睇返依家商品價格慨升勢，的確有機會令通脹回落速度放慢。 不過，William補充，除非油價、樓價等都急升，否則，美國通脹仍然可控。佢又指，貴金屬等都係投資避險需求為主，對民生影響較小，如果呢輪升勢只限於貴金屬，相信對通脹慨影響唔大。 |
|
| 盧志威 |
2024-05-08T11:07 |
蘋果公司(Apple Inc.)昨晚(7日)舉行名為「Let Loose」線上發布會，新iPad正式亮相，其中，最矚目係係iPad Pro搭載最新及功能最強慨M4晶片，Apple形容M4性能可以媲美其他大廠慨人工智能(AI)晶片。不過，Apple股價昨晚反應十分冷靜。 潤淼資產管理董事盧志威認為，Apple股價近期回升主要受回購推動，雖然AI概念係市場焦點，但今次加入AI功能係iPad，唔係公司主要收入來源慨iPhone，對於今年將會推出慨iPhone 16，市場估計，銷售情況同之前差唔多，不論銷情及增長等都唔會係爆發性，所以股價表現都要等iPhone 16登場後先可以再評估到，不過，由於之前慨回購計劃太厲害，所以股價短期應該仍會偏強。 |
|
| 盧志威 |
2024-04-24T10:44 |
昨日(23日)美股收市後Tesla公布首季業績，純利、收入、汽車毛利率均下跌及遜預期，創辦人馬斯克(Elon Musk)指，新車投產時間會提早至今年年底或明年初，更會以平價出售新車，呢個消息抵銷純利下跌負面因素，帶動股價係延長交易時段大升逾10%，仲有冇其他好處？此外，Tesla競爭對手比亞迪(01211)及小米集團(01810)均有推平車，持續減價戰有機會令賣車利潤歸零，點解都仲要鬥平咁賣車？ 潤淼資產管理董事盧志威指，因為要推平車，Tesla有用機械人加速自動化生產，令成本更平，加上推行自動駕駛同無人駕駛的士(Tesla Robotaxi)，令業務拓展至人工智能(AI)、大數據(Big Data)方向，對股價會有幫助。 William續指，依家行業處於整合，減價戰會淘汰現金流歸零慨車企，因為未來些車價趨勢都係向下，就睇係環境差時，邊個車廠搶到市佔率。 |
|
| 盧志威 |
2024-04-17T11:11 |
美國10年期債息升至近4.7厘水平，事關聯儲局主席鮑威爾(Jerome Powell)同副主席傑斐遜(Philip Jefferson)都暗示或要推遲減息步伐，指去年底起抗通脹缺乏進展，愈黎愈多券商下調今年減息次數預測，其中，瑞銀預期今年減息兩次後，明年有機會掉頭加息。 雖然金價仍處於每盎司2380美元水平慨高位，不過，潤淼資產管理董事盧志威認為，後市10年期債息有機會上到5厘，長遠不利金價走勢，加上中東局勢繼續升溫，最新以色列明言會報復伊朗，短期金價未見進一步動力向上，建議投資者趁而家市場氣氛好就適量減持黃金。 |
|
| 盧志威 |
2024-04-03T10:18 |
Telsa首季交付量按年跌8.5%，係2020年以黎首見，令市場十分驚訝，更形容為一場災難，按季更大跌20%，遠差過預期，拖累股價昨晚(2日)一度挫近7%，有分析員更直指，除非集團可以扭轉劣勢，否則，Tesla可能會步入黑暗日子，係咪意味Tesla暫時可以放埋一邊，轉吼其他股份？ 潤淼資產管理董事盧志威指，全球電動車市場環境開始逆轉，競爭進一步白熱化，比亞迪股份(01211)及小米集團(01810)等都追緊上黎，大打價格戰，係多項因素夾擊下，令整個電動車市場前景唔明朗及唔樂觀，再加上銷售及交付量急速下滑，會令市場非常失望，繼而令Tesla股價向下，佢建議暫時先避開Tesla。 內地電動車股方面，William估計，Tesla會逐漸失去龍頭地位，內地將會有車企跑出成為新龍頭，亦會好快出現汰弱留強慨局面。 |
|
| 盧志威 |
2024-03-27T12:31 |
海底撈(06862)昨日(26日)收市後出左業績，去年多賺逾2倍至45億人仔，更慷慨地將近90%盈利用黎派息，末期息按年大增6倍至0.824港元。不過，集團股價暫時連跌3日，今朝平開後，一度跌3%，低見16.44元。 潤淼資產管理董事盧志威表示，海底撈派息比率有驚喜，但難免令市場憂慮集團放棄快速擴張店舖網絡發展策略，繼而影響盈利。William認為，唔需要為左收息係現價吸納海底撈，並指集團正由增長股慢慢調整為收息股，中線而言，預期股價會係14至18元水平上落，不妨等股價再跌多些先買。 |
|
| 盧志威 |
2024-03-13T11:54 |
據內媒報道，遭評級機構穆迪降評級至垃圾級別慨萬科企業(02202)，獲工商銀行(01398)及建設銀行(00939)等合共12家銀行，幫集團籌800億人仔貸款，用黎應對到期慨債券。此外，《彭博》昨日(12日)收市後報道，銀行會將持有慨萬科債權轉換為有抵押品慨「非標準化債權」，短期係咪可以幫到萬科？ 潤淼資產管理董事盧志威指，雖然萬科評級已變「垃圾」，但銀行都願意出手打救，而債權轉為有抵押品慨「非標準化債權」可解決違約問題之餘，亦可解決短期流動性危機，釋出一個利好訊號。 不過，William提醒，雖然賣樓、爛尾樓、去庫存等問題，可以比時間慢慢消化，而瑞銀亦對內房行業睇法轉為正面，但要回復至未爆發危機前仍然需要一段時間。 |
|
| 盧志威 |
2024-03-04T11:21 |
樓市全面「撤辣」後，在剛過去慨周末，一二手交投都出現「小陽春」，一手最少錄得約443宗成交，按周大升17倍，其中，「撤辣」後首個推出的全新樓盤，恆基地產(00012)旗下Belgravia Place首批138伙全數沽清。二手方面，十大屋苑過去兩日有27宗成交，係逾1年以來最多，但都係要蝕讓，呢個「小陽春」係咪可以持續，繼而帶動本地地產股？ 潤淼資產管理董事盧志威認為，依家明顯見到成交被托起，呢個情況係會刺激到些買家出黎，一定會利好數量，但價錢就係未知數，雖然買家多左，但一二手仍有好多單位要賣，尤其一手靜左成年，最有可能出現慨情況係刺激好多人換樓，同埋收租客會入市，如果租金回報去到3厘至4厘，就當鎖定定期存款。佢又指，由於發展商會推優惠去庫存，估計未來會係成交量升，但價格平穩。 盧志威又指，本地地產股係可以留意，尤其係跌得比較多慨高負債公司，趁依家較易去貨，同埋個價靚左，呢類股份都值博。 |
HENDERSON LAND , Real Estate , Real Estate , big 10 Est |
| 盧志威 |
2024-02-28T10:51 |
財政司司長陳茂波今早(28日)會發表新一份《財政預算案》，市場焦點落係點樣刺激經濟，以應對財政赤字，以及政府會唔會為樓市「撤辣」，因為過去一段時間，不論市場及業界都不停呼籲「撤辣」救市。 潤淼資產管理董事盧志威表示，雖然政府力谷旅遊業，尤其內地旅客，希望提振經濟，但內地推出唔同慨退稅優惠，令旅客係香港消費購物都冇以往咁平，呢個係一個長期問題，至於政府計劃「月月放煙花」及無人機表演，只可以增加短途即日來回旅客，都刺激消費冇乜幫助。 有消息指，政府傾向為樓市「減辣」唔係「撤辣」，William話，投資者不妨睇實本地地產股或地產代理股，政府為樓市「減辣」有兩個原意，首先係刺激買樓自住以外慨投資需求，鼓勵買樓收租撐樓市，其次係刺激細屋搬大屋需求，希望帶動成交，而係市民換樓一買一賣下，地產代理股都可以受惠。 |
Real Estate , Real Estate , China real est , HK real estate |
| 盧志威 |
2024-02-21T10:09 |
美國晶片巨企英偉達(Nvidia)會係今晚(21日)美股收市後出業績，但股價昨晚(20日)向下，拖低埋標指及其他科技股。市場一致睇好Nvidia上季業績，但係咪足以支持估值及股價強勢？呢份業績有咩地方要留意？ 潤淼資產管理董事盧志威指，Nvidia股價今年已累升40%，市場預期，上季盈利將以倍數增長，雖然股價大升有業績支持，但要留意今晚出爐呢份業績係咪同預期差唔多，其次係由AI熱帶動慨需求係咪可以持續，最後就係前景指引。至於股價噚晚跌，估計同投資者係業績前先行獲利回套，再睇下份業績可唔可再推高股價。 William又話，如果想買Nvidia唔使太心急，因為高增長已成定局，而增長唔係靠谷高估值，由正股轉去CALL/PUT都係合理，若短期穿左止賺或止蝕位，預期股價會好波動大，建議投資者業績後再做部署。 |
Earnings , IT , US Stock |
| 盧志威 |
2024-01-31T11:36 |
【Now財經台】美股進入業績高峰，多家科技巨企噚晚(30日)派左成績表，其中，微軟(Microsoft)收入增速系兩年以來最快，不過，Google母公司Alphabet上季多賺近52%，但Google廣告及搜尋業務收入差過預期，至於全球第2大晶片商AMD今季收入展望低過分析員平均預測，3只股份盤後都要跌，但整體業績仍維持增長，系咪都算交到貨？ 潤淼資產管理董事盧志威指，上面提及慨公司中，AMD面對最大問題，同英特爾(Intel)一樣，集團正面對個人電腦及游戲機伸展需求下降問題，雖然兩只都系之前表現搶鏡慨半導體股，但放榜後都要跌，所以要小心呢類股進入調整期。William又話，雖然微軟業績好，但噚晚都要偏軟，相信系之前升得太多，Alphabet情況亦差唔多，因為股價過去1年累升50%，所以就算業績好過預期，中線都要小心。 盧志威 潤淼資產管理董事 |
US Stock , IT |
| 盧志威 |
2024-01-24T10:04 |
【Now財經台】Netflix昨晚(23日)係美股收市後出左業績，去年多賺20%，收入及新增用戶都好過預期，後者更是疫後表現最強勁慨季度，刺激股價盤後勁升8%，系咪反映集團力谷用戶慨措施見效？此外，集團擲數十億美元奪得WWE Raw美國獨家轉播權，系咪除左劇集外，Netflix加強體育直播范疇？ 潤淼資產管理董事盧志威指，Netflix廣告及訂閱商業化之後表現系好左，呢個都令市場有些驚喜，令業績及財務回報表現好理想，但佢認為，要留意未來兩季慨情況，再判斷改變訂閱制度令付費用戶多左，系咪一次性因素。 William又話，大型體育節目直播都系另一個可以吸引觀眾，但都需時觀察，雖然經過今輪增長後，Netflix未來業績表現可能唔再有咁大驚喜，但仍然系一家具高增長潛力慨企業。 盧志威 潤淼資產管理董事 |
ETF , USD , US Stock , HSCEI ETF |
| 盧志威 |
2024-01-17T11:49 |
【Now財經台】Tesla行政總裁馬斯克(Elon Musk)指，要有25%投票權先可以令Tesla成為一家人工智能(AI)及機械人公司，依家馬斯克持股量約13%，系咪意味佢有可能增持公司股份？ 潤淼資產管理董事盧志威相信，馬斯克系有機會增持，但由於未必會係市場買入股份，所以都唔容易，亦唔會對Tesla股價有太大影響。 自從比亞迪股份(01211)成為全球電動車銷售No.1後，馬斯克多次強調Tesla唔系純電動車公司，轉型意圖都幾明顯，而公司都有AI等其他業務，Tesla開拓新業務或獲注入新業務機會大唔大？盧志威指，話Tesla系一家能源公司更貼切，依家AI系大潮流，雖然馬斯克刻意強調Tesla唔只系一家電動車企業，但估計暫時唔會有實質搞作。 睇返Tesla股價，依家系呈一個下跌趨勢，佢就話，隨著美股出現調整，加上都升左唔少，相信會繼續調整，加上Tesla未來發展都系未知數，所以現階段買唔過。 |
Energy , BYD COMPANY , US Stock |
| 盧志威 |
2024-01-10T09:57 |
【Now財經台】唔少大行指2024年系「債券年」，但「老債王」格羅斯(Bill Gross)係美國通脹數據出爐前夕大唱反調，指美國10年期國債被高估，又話如果投資者想買債券，通脹掛鉤債券(TIPS)更好慨選擇，佢又稱，深信10年及2年期國債孳息曲線將會回歸正值。不過，TIPS只得1.8厘息，遠低於10年期國債慨4厘息。 潤淼資產管理董事盧志威指，可能格羅斯覺得國債升得太快太急，擔心會出現調整，其實依家短期長期利率已出現倒掛情況，可能佢覺得貴之余，又認為唔會咁快減息，但其實好難講，已資金覺得債息由5厘去到4厘都無問題，所以就出現一個追捧國債現象。 William又話，依家市場反應都好快，亦都系跟紅頂白，所以依家系處於一個追捧國債慨時間，但佢認為相對TIPS，國債仍然較值博。 盧志威 潤淼資產管理董事 |
US Bonds , Gross |
| 盧志威 |
2023-12-13T11:30 |
【Now財經台】美國11月消費物價指數(CPI)按年升3.1%，符合預期 ，但按月升0.1%，略超預期，市場原本預期無升跌，聯儲局一連兩日慨議息會議就快完結，議息結果會係本港時間今晚凌晨出爐，市場焦點落係點陣圖及聯儲局主席鮑威爾慨講話，會有咩啟示或線索畀市場，點評估聯儲局明年減息時間表？ 潤淼資產管理董事盧志威指，市場一直預期聯儲局明年會減息，雖然現階段仍會維持高息一段時間，但市場正不斷揣測到底明年幾時開始減息。William認為，預期明年3月減息系過分樂觀，最快5月先開始減息，佢又提醒投資者評估減息時間時，必須冷靜睇，同埋要先睇經濟數據。 盧志威 潤淼資產管理董事 |
|
| 盧志威 |
2023-12-06T11:45 |
【Now財經台】藥明生物(02269)早前召開業務會議，股價一度急瀉23%，之後突然中途停牌，市場及大行普遍對集團下調業務指引感到失望，甚至驚訝，股份昨日(5日)復牌繼續插水，更一度失守30元，集團今早(6日)出通告，稱動用最多6億美元做回購，系咪可以挽回市場信心，同埋「救價」？ 潤淼資產管理董事盧志威認為，其實唔少公司出完業績就宣布回購，顯示股份抵買，係股價低殘時做回購或多或少可以撐下價，中長期黎講都系好事，至少可以減低流通量。 不過，佢指出，由於回購系一個長期操作，長遠一定系利好，但短期始終要睇供求，依家慨關鍵系點樣令資金回流，呢個就要視乎公司吸引力，例如可以拓展海外市場，或整體經濟反彈，先可以吸引到資金。 |
Capital Flow , USD , Bio , WUXI BIO |
| 盧志威 |
2023-11-29T11:31 |
【Now財經台】美團(03690)昨日(28日)收市後放榜，雖然第3季業績對辦，但管理層展望今季外賣餐飲業務放緩，更預告外賣客單價下跌，估計外賣業務收入增速較第3季略為放緩，閃購業務收入增速或跟上季持平，結果績後被一眾大行下調評級或目標價，其中，高盛降目標價至176元。 美團股價噚日收市跌5%，收報103元，今朝一開市即失守「紅底」，一度急插逾10%至92.1元。潤淼資產管理董事盧志威認為，內地消費疲弱，加上疫情過後，外賣需求及單價下降，美團將要面對增長放緩慨逆境，預期股價好大機會持續受壓，建議投資者避一避會安全些。 William續指，美團開市前公布最多回購10億美元股份，雖然長線有助支持股價，但中期仍會因為基本面轉差而受壓，認為美團股價係未來一至兩季都未必見起色。 |
Rating , Sachs , USD |
| 盧志威 |
2023-11-15T11:32 |
【Now財經台】美國通脹穩步回落，進展良好，刺激美股昨晚(14日)大升，除市場憧憬聯儲局加息周期完結外，有《華爾街日報》記者通脹數據出爐後，撰文指局方可能唔會再加息，究竟12月會唔會加息？明年中減息機會系咪大增？ 潤淼資產管理董事盧志威指，今次消費物價指數(CPI)系有驚喜，因為通脹持續回落，聯儲局就冇加息理據，而局方只能話經濟過熱或要加息，但呢個理據唔太成立，所以下個月加息機會細左好多，美股噚晚表現亢奮系因為一旦利率開始下調，就會為市場帶黎投資機會，佢估計，聯儲局明年下半年會啟動減息周期，如果有閒錢不妨考慮做中長線部署。 盧志威 潤淼資產管理董事 |
US Stock |
| 盧志威 |
2023-11-08T10:55 |
【Now財經台】受內地外貿數據影響，港股昨日(7日)3連升斷纜，恆生指數收市挫近300點，星期一(6日)收復慨50天線又失守。中央繼續出招試圖化解內房及地方債危機，以及穩住經濟增長，內地風險因素系咪有紓緩跡象？恆指可唔可以再收復返50天線？ 潤淼資產管理董事盧志威指，恆指升穿50天線後又落返去，依家市場只得夾淡倉，基本因素冇顯著改善，經濟數據差系意料之內，但其實有些野系改善緊，例如中央出手化解萬科風險，因為一旦萬科企業(02202)呢類房企出事，系統性風險系非常巨大，咁樣對下藥系一件好事，相信市場系會受落。William又指，即使港股依家氣氛好差，但應該已處於一個築底階段。 |
Stock , China Real Estate , HANG SENG BANK , CHINA VANKE |
| 盧志威 |
2023-11-01T10:58 |
【Now財經台】港股係10月慨傳統「股災月」累跌近700點或3.9%，連跌3個月，回顧過去一段時間，雖然中央連番出手救市，但港股及A股繼續尋底，經歷「股災月」後，年尾又要面對投資者鎖定利潤呢個潛在風險，加上本港經濟亦唔太好，除經濟增長遜預期，7月至9月負資產數目再破萬宗，港股系咪好難有起色？ 潤淼資產管理董事盧志威指，救市措施作用的確系愈來愈細，因為唔少措施都系比較短期，最根本問題系前景唔明朗，加上有一定風險，所以資金唔願意投資。樓市方面，雖然政府已經「減辣」，但最多只系提升返流動性，唔可以令樓價回升，而大量用家去租樓，都反映唔睇好樓市，寧願撳住個荷包。 William認為，港股市仍處於一個陰干式格局，反覆向下，除非有好消息先可以快速夾淡倉。 盧志威 潤淼資產管理董事 |
HK Cap Flow , Stock , Capital Flow , HK real estate |
| 盧志威 |
2023-10-25T10:41 |
【Now財經台】國家主席習近平罕有去人民銀行調研，中央支持金融及經濟慨決心不言而喻，事實上，踏入第4季中央已不停出手，包括中央匯金買入內銀A股及ETF，以及額外發債等，市場預期，下一步會系減息降准，係呢個情況下，港股今季市況系咪可以睇返樂觀些？ 潤淼資產管理董事盧志威指，中央針對金融及財政范疇連環出招，目的系令市場及實體經濟回穩，相信對內地系有一定作用，問題系市場慣左夾空倉，但夾完淡倉後有冇力再升系一個疑問，只要解決到呢個問題，個市系會升返。 William又話，港股今日應該會向上，但去到17500點水平就會有阻力，佢建議投資者保持一個較輕慨倉位，睇中長線會比較好，即使彈上19000點，又會有另一個阻力，主要系蟹貨多，佢估計，即使再連環出招，恆指升至19000點水平應會止步。 盧志威 潤淼資產管理董事 |
Stock , China Banks , ETF , HSCEI ETF |
| 盧志威 |
2023-10-18T11:22 |
【Now財經台】美國企業季績好壞參半，不過，零售銷售數據強勁，投資者擔心高息環境持續更長時間，加上中東局勢發展都令投資者審慎，美股噚晚好淡爭持。雖然美股隱憂唔少，但似乎同通脹一樣韌力十足，後市會點走？ 潤淼資產管理董事盧志威認為，雖然近期發生唔少事件，但美股仍可以企係高位，反映市況穩定。佢又話，投資者應該試下搵其他板塊炒，唔可以好似年初咁只睇住人工智能(AI)板塊，由於市場仲等緊消息，所以沽壓暫時唔算好大，建議投資者可以做中長線部署，因為短線流動性較差，亦冇乜特別野可以炒，所以唔建議做短線部署。 揀股方面，William就話，建議投資者集中吼高增長科技股，其中，大型科網股勝在穩定，因為美股成交主要集中係Tesla、Apple等重磅股身上。 盧志威 潤淼資產管理董事 |
IT , US Stock |
| 盧志威 |
2023-10-11T12:28 |
【Now財經台】美國10年期債息錄得7月中以來最大單日跌幅，回落至4.65厘水平，加上聯儲局「鴿派」官員、亞特蘭大聯儲銀行行長博斯蒂克(Raphael Bostic)話唔使再加息，又指美國經濟唔會陷入衰退，據最新利率期貨顯示，聯儲局11月唔加息慨機會升至90%，帶動美股3大指數昨晚造好，並已連升3個交易日。 潤淼資產管理董事盧志威指，官員「放鴿」會對債息有幫助，加上以巴沖突令中東局勢升溫，帶動避險需求，資金會重投美債避險。佢又指，如果睇返數據，美國經濟「軟著陸」慨機會系大左，市場會博債息差唔多見頂，雖然最近長債息升左一浸，但已有見頂跡象，對股市及債市都系一個利好訊號。 William又話，係高息環境下，投資者會傾向低風險投資，因此，債息回落會令市場信心回升。 盧志威 潤淼資產管理董事 |
US Bonds , US Stock |
| 盧志威 |
2023-10-04T11:38 |
【Now財經台】港股昨日(3日)係第4季首個交易日曾瀉近600點，低見17212點，再創今年新低，潤淼資產管理董事盧志威認為，港股短線好大機會再跌，因為港股一向跟足外圍經濟大趨勢，依家仍需時消化美國聯儲局加息等消息，估計恆生指數要跌至16800點，先有機會反彈。 此外，摩根士丹利繼續睇好匯豐控股(00005)，預期股價未來30日有70%至80%機會上升，並估計10月底公布慨第3財季業績將保持穩健，目標價維持72.2元。 William亦認為，相比某些熱門公用股如中國移動(00941)、中國海洋石油(00883)等，匯控更加買得過，又話暫時未見出現按揭斷供潮，加上按息上調，相信集團可以維持到資產質素，後市相對穩陣，可趁現價，即60元水平吸納。 |
HSBC HOLDINGS , HSBC , Oil , Stock , HANG SENG BANK |
| 盧志威 |
2023-09-27T11:32 |
【Now財經台】新一批綠色債券將於明日(28日)截止認購，唔少銀行近日開始加定存息「搶錢」，仲未入飛慨投資者，建唔建議佢地趕搭「綠債尾班車」？港股噚日穿底，成交繼續淡靜，港股依家最大問題系「缺水」，後市似乎好難樂觀。 潤淼資產管理董事盧志威坦言，唔建議趕搭「尾班車」，因為銀行紛紛加定存息，造定存其實已經足夠，買綠債純粹系因為手頭資金好充裕，作為一個投資配置。 港股方面，William認為，市況咁差都受唔少宏觀因素影響，有分析預期，美債息可以升至7厘，如果真系咁其實咩都唔使做，就咁沖入去買美債穩袋7厘息，其次系信心好差，寧願造定存都唔去投資，就連樓價都跌唔停，佢認為，依家港股宜做防守性部署，又預期大市會維持一個陰干式下跌格局。 盧志威 潤淼資產管理董事 |
US Bonds , Stock , IPO , IPO |
