| Commentator |
Time |
Content |
Tag |
| 梁偉民 |
2025-01-14T11:31 |
美國非農就業數據強勁，令聯儲局減息步伐出現變數，美股3大指數昨晚(13日)個別發展，道指及標指有得升，但科技股被拋售拖低納指。美股今個星期會進入業績期，將會由金融及銀行股打頭陣，近期標普銀行分類指數跑贏標普500指數，雖然已步入減息周期，但美息有可能係現水平維持一段時間，減息步伐放慢對金融及銀行股係咪有利？ 高富金融集團投資總監梁偉民指，聯儲局放慢減息步伐對銀行業黎講唔係壞事，因為高息有利銀行淨利息收入，但相信淨利息收入已見頂，預期2025年銀行公布慨淨利息收入，將會較2024年少。此外，市場認為銀行近年受惠於投資市場熾熱，帶動投行業務復甦，加上銀行股亦係特朗普(Donald Trump)當選後升左一浸，反映相關政策利好銀行業。 Wyman又話，銀行業係今年可以睇高一線慨行業，因為銀行業收入及盈利可以維持一定水平，加上政策利好，而銀行股近期已自高位回落約5%，現水平有一定吸引力。 |
|
| 梁偉民 |
2025-01-07T11:44 |
美國基金經理昨日(6日)全面復工，令美股成功延續反彈升勢，功臣又係科技股，其中，人工智能(AI)晶片股王英偉達(Nvidia)股價創收市新高，今日市場焦點係國際消費電子展2025(CES 2025)，估計Nvidia有新產品發布，包括最新顯示卡系列，Nvidia合作伙伴台積電(TSMC)昨晚盤前亦創新高，依家係咪可以追呢類大型人工智能(AI)相關股份？大型科技股後市慨走勢又係點？ 高富金融集團投資總監梁偉民指，Nvidia係AI熱潮最實在慨公司，過去幾年慨收入及盈利都以倍數增長，雖然股價已經升左一段，但市盈率(PE)大約50左右，處於合理水平。不過，AI主題係2025年有些隱憂，因為AI相關股股價已經以倍數上升，但只有Nvidia慨收入盈利比較理想，而其他公司收入盈利增長跟唔上股價，令呢些公司慨PE會升到昂貴水平。 Wyman又話，科技巨擘過去一年對AI慨投入已經好多，即使2025年對AI慨投資唔會縮水，但係現有較高投入水平，未必會再有大幅增長，會令收入盈利增長轉弱，對晶片及半導體慨需求都會有減慢慨情況，要小心留意AI相關股慨走勢。 |
|
| 梁偉民 |
2024-12-31T12:49 |
美股3大指數昨晚(30日)跌約1%，《彭博》指出，有19家大行及研究機構慨分析師，都冇預期美股明年會跌，其中，標指最牛睇7100點，較昨日收市有20%上升空間，市場似乎認為美股明年將會延續今年慨樂觀情緒，到底係市場太樂觀，還是都係一個合理預測？ 高富金融投資總監梁偉民指，標普明年要見7000點以上，即係要升約20%，估值及盈利增長都要配合，呢個係比較誇張及期望較高慨預測。佢補充，由於過去兩年市場已price in左對盈利增長較樂觀慨睇法，但到依家仍未滿足到市場慨樂觀預期，因此，標指明年要大升，企業盈利就要大幅增加，或市場慨樂觀情緒進一步升溫。不過，佢認為人工智能(AI)相關慨熱度明年會降溫，因為呢類企業過去兩年慨盈利表現唔係好對辦。 Wyman又話，美股明年慨憧憬及驚喜主要來自放寬監管，但具體放寬程度、咩行業會受惠等，都要等美國總統當選人特朗普(Donald Trump)上任後先明朗化。 |
|
| 梁偉民 |
2024-12-27T10:58 |
美股過去一段時間一直靠重磅股撐，包括「科技7雄」(Magnificent 7)慨Tesla及蘋果公司(Apple.Inc)，後者更連續4個交易日破頂，依家最牛目標價睇325美元，但有分析指，美股表現同市寬唔配合，係咪市場低估左人工智能(AI)推動慨升級周期？資金會唔會繼續捧「7雄」？ 高富金融集團投資總監梁偉民指，美股市寬一直唔太理想，市場經常側重某些板塊，但整體黎講，美股應可以繼續向上，至少意味投資市場唔覺得市寬係好大問題。 Wyman續指，自特朗普(Donald Trump)勝選後，係競選期間出錢出力撐佢慨「頭號浸粉」馬斯克，旗下公司成為大贏家，帶挈股價累升逾50%，但佢認為已經升過龍，主要係集團無人駕駛的士短期未必可以推出市場，加上應該會有競爭對手。 Apple方面，已有慨AI應用唔算多亦唔算吸引，較難掀起換機潮，值得留意係，隨著大價股估值愈推愈高，如果一些憧憬唔可以落實，股價就會回調，又指靠憧憬推高股價係唔實在。 |
|
| 梁偉民 |
2024-12-20T12:36 |
日本央行昨日(19日)議息後宣布按兵不動，不過，行長植田和男之前講過，如果經濟及物價走勢符合預期就會加息。當地最新爐慨11月消費物價指數(CPI)升2.7%，超預期，係咪意味明年1月加息慨機會大左？ 高富金融集團投資總監梁偉民指，雖然日本通脹回升，但仍算溫和，事實上，通脹唔係日央行加唔加息慨主要考慮，主要係睇利率可唔可以重返正常水平，因為之前實施負利率及零息政策一段長時間，日央行希望利率逐步正常化，而當通脹及經濟情況容許時，日央行就會考慮加息。 不過，Wyman認為，日央行明年1月未必會加息，首先，加息會再引發通縮問題，其次係全球經濟唔理想，明年仲有關稅等不確定因素，相信日央行會先觀望美國總統當選人特朗普(Donald Trump)上場後慨政策走向，再作出決定。 |
|
| 梁偉民 |
2024-12-17T15:18 |
加密貨幣繼續炒，其中，比特幣(Bitcoin)價格直撲10.8萬美元，反映投資市場繼續追捧呢類風險資產。美股方面，雖然道指已8連跌，但納指再創新高，升勢算唔算單一？美股及Bitcoin未來又會點走？ 高富金融集團投資總監梁偉民認為，科技股升勢唔算單一，市場過去半個月特別睇好某些行業及資產，例如Tesla就炒無人駕駛及機械人憧憬，但市場唔會比咁高估值電動車企，因為電動車銷售支持唔到現水平慨估值。 Bitcoin方面，Wyman話，依家市場仍對Bitcoin有無限憧憬，主要係市場認為美國總統當選人特朗普(Donald Trump)上任後，會大力發展加密貨幣市場，令加密貨幣需求大增。 但佢提醒，有部分憧憬似乎過分誇張，一旦市場樂觀情緒突然消失，相關資產就有較大回調風險。 |
|
| 梁偉民 |
2024-12-10T11:53 |
美國總統當選人特朗普(Donald Trump)最近透露，曾經同國家主席習近平通話，但冇透露其他細節，雙方對上一次溝通已經係3年前，今次通話係咪代表中美關係回暖？但與此同時，央視新聞昨日(9日)指，英偉達(Nvidia)涉嫌違反反壟斷法，市監總局已依法立案調查，事件對Nvidia以至中美關係有咩影響？ 高富金融集團投資總監梁偉民認為，其實中美對立已經預左，雙方關係唔再惡化已經好好，對內地經濟黎講，中美衝突絕對係一大隱憂，但Wyman認為亦唔需要太擔心，除非美國真係將對華關稅上調至60%或以上，又或者有其他制裁行動，否則，市場已有足夠準備應對。未來幾個月，除左留意關稅問題，亦要留意內地有冇應對策略。 至於立案調查Nvidia，Wyman相信只係一個警戒作用，內地唔會因此唔再買Nvidia晶片，事實上，亦冇其他替代品。佢又指，反而要留意美國針對Nvidia晶片出口到內地慨禁令，依家Nvidia慨高階晶片唔可以賣畀內地，若未來禁止再升級，所有晶片都唔可以賣畀內地，影響就非常嚴重。 |
|
| 梁偉民 |
2024-12-03T11:40 |
美國再公布新一輪對華出口半導體「加辣」措施，包括限制向中國出口用於人工智能(AI)訓練等高端應用高頻寬記憶體晶片，並將136家中國實體加入「出口管制實體清單」，外圍芯片股昨晚(2日)向好，其中，英偉達(Nvidia)微升，台積電(TSMC)預託證券升5%，而ASML升近1%，公司話正在評估影響，但認為長遠半導體需求唔會受到影響，係美國禁制措施下，長遠環球半導體產業真係唔會受到影響？ 高富金融集團投資總監梁偉民指，制裁行動對半導體需求會受到一定影響，尤其係短期慨晶片需求，因為對全國慨晶片公司黎講，中國係一個好大慨市場，美國禁制措施會限制對中國出口，對晶片公司慨生意會有影響，不過，對半導體公司短期業績慨影響唔會太明顯，因為禁制措施已經唔係新鮮事。 Wyman又話，重磅慨半導體公司，例如Nvidia、台積電等未來幾季慨業績，係大中華慨生意會有下跌，因為公司會主動減少向中國出口，以避免觸犯禁令。 |
|
| 梁偉民 |
2024-11-26T11:17 |
轉軑變成加密貨幣大好友慨特朗普(Donald Trump)好快就重返白宮，仲話之後會破天荒新設1個同加密幣相關慨官職，另一方面，據《彭博》報道，華爾街準備推出新一代加密貨幣相關交易所買賣基金(ETF)，現時加密貨幣市場規模已高達3.2萬億美元，係呢些背景下，依家係咪吸納加密幣慨好時機？ 高富金融集團投資總監梁偉民指，比特幣(Bitcoin)價格係特朗普當選後唔夠1個月已累升逾30%，反映加密幣近期的確十分強勢，但投資者必須留意，就係加密幣好難估值，因為唔似上市公司股份，可以用收入及資產作出合理估值，加密幣一般由市場情緒主導，係1種投機味好重慨工具。 如果投資者想玩Bitcoin，Wyman建議要抱投機心態，注碼不妨細些，同埋要留意風險控制。 |
|
| 梁偉民 |
2024-11-19T09:59 |
小米集團(01810)上季盈利及收人都好過預期，後者更創季度新高。此外，小米SU7汽車交付已超過10萬部，提前完成全年目標，集團上調全年交付目標至13萬部。小米呢份成績表有冇驚喜？但值得留意係，手機業務毛利率再跌，係咪值得關注？ 高富金融集團投資總監梁偉民指，小米手機業務係需要關注，始終仍佔整體收入逾半以上，競爭力係咪可以保持，同埋係內地消費市道疲弱下，盈利未來係咪可以keep到都係非常重要。佢又指，小米手機毛利率下跌反映受內地消費市道影響，繼而令價格及毛利率受壓。 汽車業務方面，Wyman就指，交付達標唔係一個好誇張慨利好消息，集團1年只係生產約10萬架，規模其實唔算太大，更重要係，汽車業務要扭虧為盈仍有一段好漫長慨路要走，因此，小米股價已反映左呢些利好消息，雖然上季收入及盈利都好過預期，但股價今年已累升逾80%，市盈率(PE)已超過30倍，現價已經唔平，業績後會唔會再衝高，升至約30元都有機會，但再升高些就機會唔大。 |
|
| 梁偉民 |
2024-11-12T12:04 |
美國證交會(SEC)今年為比特幣(Bitcoin)現貨交易所買賣基金(ETF)後，刺激Bitcoin價格3月一度升至74000美元，之後持續係60000至70000美元整固，特朗普(Donald Trump)贏左美國總統選戰後，市場估計，美國對加密貨幣慨監管會「鬆手」，Bitcoin價格更大幅跑贏股市，年底有冇機會見10萬美元？ 高富金融集團投資總監梁偉民指，暫時好難講會唔會上到10萬美元，但特朗普贏左大選都預左Bitcoin價格會繼續升，因為特朗普係選舉期間講明會撐加密貨幣發展，雖然唔知佢正式上任後會否會兌現承諾，但市場都會借勢炒作，所以見到有資金大量湧入。 Wyman提醒，加密貨幣難玩之處在於衡量唔到客觀價值，價格炒上主要係供應有限，當市場需求增加，價格就會飆升，但Bitcoin需求冇路捉，而價格升跌又好影響需求，睇返2021年至2022年，Bitcoin價格係冇壞消息傳出之下，都可以大林70%至80%，由於投機味道重，必須小心較大慨下跌風險。 |
|
| 梁偉民 |
2024-11-05T11:31 |
美國大選今日(5日)正式投票，兩位總統候選人特朗普(Donald Trump)和賀錦麗(Kamala Harris)的選情依然難分難解，有意見認為，如果賀錦麗選情追上會令美元下跌，帶動人民幣離岸價升穿7.1兌一美元，是否反映如果賀錦麗勝出，能夠即時帶動中資股？ 高富金融集團投資總監梁偉民認為，如果賀錦麗勝出，能夠即時帶動中資股，因為美元有機會轉弱，對人民幣會有幫助，而人民幣靠穩甚至回升的話，能夠利好港股。 Wyman又指，如果特朗普未能當選，大幅加關稅潛在風險會減少，變相減少中國出口的不明朗，對港股有刺激作用，所以港股及A股投資者都希望賀錦麗能夠當選。 |
|
| 梁偉民 |
2024-10-29T11:13 |
蘋果公司(Apple Inc.)將會係周四(31日)出業績，Apple慨人工智能(AI)技術一直落後，但近期AI發展似乎進入新階段，究竟Apple有冇追落後本錢？AI對集團股價慨推動力有幾大？ 高富金融集團投資總監梁偉民指，Apple推出Apple Intelligence首階段功能後，股價由200美元樓下升至近期230美元水平，相信股價已反映AI功能帶黎慨增長。不過，由於AI相關功能始終較遲推出，而面世後慨吸引力亦唔算大，所以短期內對iPhone銷售慨刺激仍然係一般，相信要等明年相關功能進一步完善後，先可以判斷AI功能慨刺激作用。 業績方面，佢指出，由於上季業績未反映iPhone 16系列慨銷售情況，所以市場會更關注今季業績。 Wyman認為，由於Apple估值偏高，市盈率(PE)約35倍，但以現時慨業績黎睇，唔足以支持咁高估值，所以Apple股價未必有太大上升空間。 |
|
| 梁偉民 |
2024-10-22T11:41 |
美國企業開始派發第3季成績表，並由銀行股打頭陣，今個星期業績焦點落係明日(23日)放榜慨Tesla。摩根大通指，過去幾個月券商下調企業第3季盈利預測，主要集中於商品及周期性板塊，例如工業及非必需消費品企業，平均由增長8%降至4%，至於「科技7雄」(Magnificent 7)盈測就平均增長17%，較第2季近乎「腰斬」，盈測下調幅度足唔足夠？季績後美股又會點走？ 高富金融集團投資總監梁偉民認為，美國企業上季業績差過預期慨機會唔大，因為市場一直對美企盈利有信心，而大部分業績一般都好過預期，但業績後股價升到幾多，就要睇好過預期幾多。 Wyman估計，科技股繼續係高增長慨板塊，但其他板塊盈利增長唔會太高，而工業及能源企業盈利按年仍會下跌，不過，科技股股價今年已升左好多，即使盈利增長唔錯，股價都唔一定大升，因為股價大升後，亦要盈利有一定升幅才可以支持到股價，佢估計，唔少科企盈利增長會跑輸股價升幅，尤其人工智能(AI)相關股，整體黎講，美股現時已偏貴，估計盈利增長唔足以支持美股再大升。 |
|
| 梁偉民 |
2024-10-15T12:05 |
美股人工智能(AI)晶片股王英偉達(Nvidia)股價昨晚(14日)創收市新高，市值逼近3.4萬億美元，消息面方面，主要圍繞新晶片Blackwell已經投產，另有報告指，Nvidia未來12個月慨產品已沽清，反映需求十分熾熱，係Nvidia 11月底出業績前，市場係咪會繼續炒作Blackwell因素？ 高富金融集團投資總監梁偉民指，市場除左憧憬Blackwell，亦會留意其他科技公司針對AI慨投資規模，睇返近期科企公布業績時提及慨相關AI投資金額，科企消息會對Nvidia股價有決定性影響。 Wywan續指，市場對AI樂觀係因為上季有科技巨企講明，即使AI投資未能轉化為收入及盈利，仍會持續及大量投資AI領域。佢估計，科企係怕對手未來有較成熟慨AI技術，令自身競爭力下降，所以唔敢暫停投資AI。 佢又建議，未來兩三周可留意科技巨企如Google母公司Alphabet、亞馬遜(Amazon)投資方向，若大量投資AI將有利Nvidia股價。 |
|
| 梁偉民 |
2024-10-08T11:25 |
港股近期升到唔識停，全民皆股情景再現，資金持續湧入股市，值得留意係，據外電引述金融管理局資料顯示，港銀向金管局貼現窗借入近48億元，規模是近5年最大，係咪同全城撲水炒股有關？外資及大行近日睇好A股及港股，係咪反映外資已重新睇好兩地股市？ 高富金融集團投資總監梁偉民指，當海外資金要買港股，港元需求就會增加，由於港元及拆息走強，令港股氣氛熾熱，反映港元需求仍然較大。佢又話，股市暢旺代表有大量資金湧入，對股市黎講係好消息之餘，亦係一個良性循環。 Wyman續指，過去港股大升都係靠政策憧憬，雖然減息降準、內房取消限購等政策已出台，但呢些政策仍未可以完全扭轉市場慨睇法，佢認為，市場期望有更重磅慨財政政策推出，如果短期冇相關政策出台，樂觀憧憬就會消退。 佢認為，依家經濟數據對股市慨影響唔係最大，反而係當市場見到中央推出更多刺激經濟政策，展示救市決心，資金自然會陸續流入A股及港股。 |
|
| 梁偉民 |
2024-09-24T10:58 |
美國昨晚(23日)出爐慨9月製造業採購經理指數(PMI)差過預期，初值為47，低過市場預期慨48.6，亦差過前值47.9，其實唔止美國製造業疲弱，德法英最新製造業數據都差過預期，製造業疲弱係咪一個全球性問題？ 高富金融集團投資總監梁偉民認為，美國製造業收縮情況已維持一段較長時間，其他國家都有呢個情況，所以係一個全球性問題。佢又話，疫後全球製造業都陷入收縮，主因係除左美國，全球經濟都較為疲弱，消費者開支由購買消費品轉移至服務業如旅遊，購物支出減少令相關製造業出口受一定程度影響，繼而影響製造業出口數據。 不過，Wyman認為，製造業疲弱對於美國影響較小，因為製造業係美國經濟佔比唔大，因此，若美國服務業能持續擴張，市場唔需要太擔心。不過，其他國家慨情況會較嚴重，例如歐元區、德國及英國，因為製造業係當地經濟慨佔比較大。 |
|
| 梁偉民 |
2024-09-17T11:19 |
美國聯儲局將於本港時間周四(19日)凌晨公布議息結果，近日匯市及債市都反映局方大手減息慨預期升溫，美匯指數落返100水平，債息就係3.6厘水平徘徊。《彭博》訪問了300名用戶，逾60%預期債市未來1個月會跑贏股市，係近兩年以黎最多人睇好債市表現，依家係咪做短線部署慨時機？ 高富金融集團投資總監梁偉民指，因為市場依家太側重減息慨樂觀預期，但其實呢兩個月2年或10年期債息跌幅都較明顯及誇張，例如10年期債息係5月一度高見4.6厘，最新回落至3.6厘，2年期債息就由5月慨5厘回落至最新3.5厘，反映市場近期側重減息預期升溫，令債息加快回落。 Wyman續指，當全球央行步入減息周期，其實債息有持續回落慨情況，所以呢段時間做短期部署並唔吸引。佢又提醒，短期可以留意會唔會出現回套，又認為等債息回升先入市會較理想，但如果作為長線投資，債券始終都值得吸納。 |
|
| 梁偉民 |
2024-09-10T11:28 |
萬眾期待慨蘋果公司(Apple Inc.)發布會已經完結，一如預期推出一系列新產品，包括iPhone 16系列，但市場更關注慨Apple人工智能(AI)功能Apple Intelligence，反而冇透露太多相關消息。iPhone 16系列定價唔係太進取，仲話Apple AI唔會跟iPhone 16同步推出。依家Apple每股盈利增長係科技七雄(Magnificent 7)中最慢，再睇埋今次發布會，係咪唔適宜對Apple業績抱太大期望？ 高富金融集團投資總監梁偉民指，依家每一代Apple產品升級明顯度都唔高，功能又冇太大突破，所以好多Apple用家寧願等舊機報銷先再買新機，事實上，iPhone收入已出現倒退，反映需求唔大，因此，iPhone 16系列定價都唔敢太進取。 Wyman又指，現時Apple市盈率(PE)逾30倍，其實唔太合理，因為過去1年收入增長唔算亮麗，所以Apple現價係偏貴。佢續指，市場最期待唔係手機硬件，而係加入AI功能，雖然市場6月開始已炒作Apple會推出AI功能，並期待會刺激iPhone銷售，但因為發佈會冇透露太多，所以都要等iPhone16系列10月發售後，再睇下Apple股價有咩表現，現階段唔好對集團業績有太大期望。 |
|
| 梁偉民 |
2024-09-05T11:54 |
美國AI晶片股王英偉達(Nvidia)受集團涉及慨反壟斷調查升級影響，股價繼日前收市挫近10%後，昨晚(4日)再跌1.7%，但Nvidia指未收到傳票，公司連日反應都反映Nvidia想妥善解決事件，不過，股價仍要受壓，係咪市場對今次反壟斷調查仍有憂慮？ 高富金融集團投資總監梁偉民指，市場對反壟斷有一定憂慮，因為擔心會影響Nvidia發展，甚至好似其他科技巨企可能被「拆骨」。不過，唔少大型科企已習以為常，微軟(Microsoft)、Alphabet、Meta、蘋果公司(Apple Inc.)等都曾經涉及呢類問題，但市場情緒未見受好大影響。 Wyman又估計，Nvidia股價短期仍會受壓，原因係大行憂慮大型科企投資人工智能(AI)慨速度會減慢，雖然呢些科企已經投入左好多資金，但至今仍未成功變現，令市場質疑未來仲有冇能力再作巨額投資，導致呢類股份出現調整。 |
|
| 梁偉民 |
2024-09-03T10:38 |
蘋果公司(Apple Inc.)將會係本港時間周二(10日)凌晨1點舉行發布會，估計將會發布iPhone 16系列，但昨日(2日)內地網上突然流傳iPhone 16可能唔支援微信(Wechat)慨消息，可能同Wechat慨小程序會連結應用程式以外慨支付系統有關。此外，對手華為(Huawei)突然宣布同日開發布會。兩單消息同步傳出係唔係巧合，還是國產品牌聯手造勢？ 高富金融集團投資總監梁偉民指，內地市場始終對Apple好重要，加上近期iPhone銷售有下跌跡象，如果再失去內地市場，不論對Apple銷售及Wechat都有好大影響，所以暫時黎睇iPhone 16用唔到Wechat慨機會好微。 Wyman又指，相信兩單消息同時傳出只係巧合，因為騰訊控股(00700)冇必要幫華為造勢，始終兩家公司有互惠互利關係。此外，近年華為國內銷售持續上升，已對Apple構成威脅，之前亦要減價谷銷售，未來要留意華為慨銷售情況會唔會影響Apple前景。 |
|
| 梁偉民 |
2024-08-27T11:15 |
晶片股王英偉達(Nvidia)於星期三(28日)收市後出業績，市場預期Nvidia年尾開始增長放慢，究竟要如何部署業績及未來增長？ 高富金融集團投資總監梁偉民不建議現階段入市，因為由8月份大跌至100美元樓下，到近期已經反彈30%至130美元附近水平，股價暫時不太吸引，雖然市場預期業績會達標，但估值已經相對較高，年至今累積升幅不少，除非業績有超預期表現，否則短期內難有明顯升幅，加上年底因為高基數效應令增長開始減慢，對市場情緒有一定影響，Wyman指，Nvidia回落到110美元水平可以開始吸納。 |
|
| 梁偉民 |
2024-08-21T15:03 |
外電引述消息人士指，美國零售巨企沃爾瑪(Walmart)計劃減持京東集團(09618)持股，套現逾200億港元，京東美股昨晚(20日)跌逾4.5%，盤後更急瀉11%，主要股東之一計劃減持，擔唔擔心會引爆「逃亡潮」？繼而拖累港股氣氛？ 高富金融集團投資總監梁偉民指，雖然Walmart減持消息仍未證實，但市場已經憂慮京東係咪出現營運問題，以及股價過高慨情況，雖然京東盈利增長仍然唔錯，但過去兩年收入都冇乜增長，令市場擔心內地零售、電商競爭情況仍然唔明朗，集團前景唔太樂觀。 Wyman續指，若市場信心受損，科技股有可能沽壓湧現，例如阿里巴巴(09988)、騰訊控股(00700)、百度集團(09888)等短期影響較大，亦可能會拖低恆生指數，要留意內地經濟復甦情況，以及有冇新政策出台，否則，恆指後市好難突破18000點。 |
|
| 梁偉民 |
2024-08-20T12:05 |
人仔近日強勢，離岸價昨日(19日)仲創左今年新高，但似乎對港股幫助唔大，雖然恆生指數昨日埋單都升左百幾點，但全日高低波幅只係百幾點，波幅係3個月最窄，成交就縮到唔夠1000億元，連北水都走人，昨日淨流出逾60億元。此外，雖然騰訊控股(00700)業績好過預期，但股價唔識升，點解讀呢個情況？ 高富金融集團投資總監梁偉民表示，北水過去1年，甚至更長時間，短炒慨時間愈來愈短，最近見港股彈返少少就平倉獲利離場。至於騰訊股價係業績後冇進一步上升，可能同股價今年已累升20%至30%有關，而市場係騰訊放榜前已對呢份業績有一定預期，所以可能要更多利好消息，先可以刺激股價向上。 Wyman又認為，暫時黎講港股表現唔算太差，已自低位彈返唔少，若後市再升少少，就可以擺脫5月開始形作慨下降軌。 |
|
| 梁偉民 |
2024-08-13T12:19 |
雖然港股已連升4日，但繼續係一個窄幅上落格局，恆生指數昨日(12日)波幅僅逾百點，全日成交只有約700億元，係近6個月最奀，A股昨日成交就唔夠5000億人仔，係4年最少，係咩原因導致資金唔願意入市？ 高富金融集團投資總監梁偉民指，港股持續弱勢主要係內地經濟仍然冇起色，由於短期睇唔到股市有咩亮點，港股好難大幅反彈，所以資金就唔願意入市。 Wyman又話，港股過去數周走勢唔算太差，至少恆指已由低位16500點上返17000點樓上。另一方面，7月中至今，美股持續出現調整，但港股仍可以同美股打成平手已算硬淨。佢認為，經濟數據冇驚喜，加上內地冇大規模刺激經濟措施出台，令港股上升動力不足，係呢個情況下，恆指守到17000點已經可以接受。 |
|
| 梁偉民 |
2024-08-09T11:54 |
美國昨日(8日)再禁止5家中國企業產品進口，指呢些公司涉嫌侵犯維吾爾族人權及強迫勞動，被制裁企業包括在港上市慨稀鎂科技(00601)、稀鎂母公司世紀陽光(00509)，同埋紫金礦業(02899)子公司新疆哈巴河阿捨勒銅業有限公司，今次消息對紫金股價有幾大影響？ 高富金融集團投資總監梁偉民指，市場開始對呢類消息感到麻木，始終美國制裁中國企業制裁已有一段時間，而紫金跟美國之間慨出口、貿易唔多，相信消息對紫金影響好細。 Wyman又指，紫金股價近期下跌只係跟大市回落，現時國際金價仍偏強，企係每盎司2400美元以上，對紫金黎講係利好因素，雖然消息令紫金股價再跌多浸，但亦係買入慨好時機。 |
|
| 梁偉民 |
2024-08-06T12:01 |
今朝(5日)港股新加坡黑期反彈逾200點，上返17000點水平，美元下跌，帶動離岸人仔一度創今年新高，高見7.0844兌1美元，人民銀行有空間做野之餘，港元亦上返強方兌換保證水平，投資者係咪要等恆生指數上返17000點再入貨？ 高富金融集團投資總監梁偉民表示，相比亞太區其他股市大幅波動，港股係較穩定，睇返昨日(6日)港股收市都只係跌約1%。投資者應唔應該撈底，Wyman就話，暫時冇好大誘因撈底，因為港股仍然較弱，處於幾個月低位，加上恆指短期應較難大幅反彈，所以建議做中線部署。 Wyman又指，人仔走勢係港股主要利好因素，日圓轉強，加上市場預期美國聯儲局好快減息，更可能會大手減息，都會紓緩人仔沽壓，加上唔少內地企業係港股上市，收入及盈利主要係人仔，依家人仔轉強，折算返做港元會多左，自然對港股都有幫助。 |
|
| 梁偉民 |
2024-07-30T11:36 |
摩根士丹利將Tesla列為行業首選，踢走福特汽車(Ford)成為最佳車股，Tesla股價隔晚(29日)收市升逾5%，大摩最新睇310美元，較上周五(26日)收市價有40%上升空間，主要睇好Tesla可成本削減、來自內地慨收入貢獻增加，加上市傳集團計劃年前係內地推出全自動駕駛系統(FSD)，呢些因素係咪會幫到Tesla股價企返穩？ 高富金融集團投資總監梁偉民指，Tesla慨無人駕駛發展時間比其他公司短，唔認為Tesla技術上有領先優勢，加上早前公布慨業績令市場有些失望，而銷售疲弱令盈利受壓。佢又話，電動車競爭十分激烈，估計Tesla要繼續減價谷銷售，意味毛利率將持續受壓。 Wyman又指，市場一度將Tesla投資重點放係無人駕駛及機械人，但呢兩項業務係未來幾季，都唔會有明顯收入及盈利貢獻，始終監管機構都擔心係路面上大量使用無人駕駛慨可行性，所以未來一兩年廣泛使用無人駕駛機會唔大。 |
|
| 梁偉民 |
2024-07-23T10:01 |
資金吼美股回調趁低吸納，3大指數昨晚(22日)全線高收，其中，標指及納指升1%。目前，市場最重要考慮一定係美國總統大選形勢，總統拜登(Joe Biden)宣布退選後，副總統賀錦麗(Kamala Harris)將會參選，除拜登外，民主黨內重量級人馬佩洛西(Nancy Pelosi)，以及黨內多名潛在挑戰者最新亦表態支持佢，對美股有咩影響，科技股昨日反彈同選情有冇關？此外，Tesla及Google母公司Alphabet將會係今晚(23日)美股收市報出季績，有咩要留意？ 高富金融集團投資總監梁偉民指，科技股之前回套主要係之前升得太多，納指上星期回套前已累升20%，所以趁高獲利，但科技股近日反彈可唔可以持續，都要睇市場情緒係咪可以持續高漲，始終估值仍然係貴，同埋好難估頂。 Wyman又話，Tesla業績的確需要關注，集團現時仍然主要靠電動車業務撐業績，佢估計，今晚(23日)出慨業績唔會太好，市場有機會借勢回調，Tesla股價近期大升，主要炒無人駕駛及機械人業務，但短期唔可能帶來強勁收入及盈利，所以之前高追左Tesla慨投資者要特別留意。 |
|
| 梁偉民 |
2024-07-16T12:24 |
美國前總統特朗普(Donald Trump)早前遇襲，令佢係11月慨總統大選勝出慨機會大增，唔少分析認為佢再度入主白宮已成定局，令資金押注聯儲局好大機會係9月減息，今年甚至有機會減息3次。美匯指數昨晚(15日)一度跌至104邊緣，金價就上返去每盎司2420美元樓上，美元及金價走勢反映市場押注聯儲局，將會係經濟唔會陷入衰退慨前提下減息，係咪意味聯儲局減息幅大過市場預期？ 高富金融集團投資總監梁偉民預期，聯儲局有70%機會係9月減息，全年就會減兩次息。Wyman又指，因為最新數據都有利聯儲局減息，令市場慨減息預期升溫，其次係聯儲局希望美國物價穩定及全民就業，不過，美國最新通脹數據放緩，就業市場亦轉弱，都成為聯儲局減息慨推手。 |
|
| 梁偉民 |
2024-07-09T11:46 |
港股近日表現弱勢，恆生指數昨日(8日)挫近300點，跌至兩個半月低位，全日成交縮到唔夠900億元，今朝(9日)開市不久更插穿250天牛熊線，雖然7月開局時表現唔錯，但恆指依家已由升轉跌，雖然今朝開市前，快手(01024)傳出回購消息，擬8月8日至明年5月30日，回購唔超過60億元股份，不過，恆指仍繼續跌，港股後市點睇？ 高富金融集團投資總監梁偉民指，回購消息暫時對港股幫助唔大，主要係出現外資明顯流走情況，A股已連續5周有走資情況，6月流走400億美元，暫時係今年最多慨月份，更拖累港股近期回調。佢又指，恆指4月開始反彈係因為市場對經濟有憧憬，但結果出黎慨經濟數據麻麻，同市場預期有落差，導致港股回落。 Wyman續指，恆指暫時仲可以守住100天線，短期相信會有支持，但大市未必可以有個明顯反彈，佢估計，恆指會橫行一段時間，投資者亦要睇實人仔走勢，因為可以左右港股大局。 |
|
| 梁偉民 |
2024-07-02T11:41 |
內地多家車企出左6月銷量及交付數據，大部分表現都唔錯，其中，比亞迪股份(01211)上月銷量逾34萬部，按年增長35%，蔚來(09866)交付量逾2.1萬部，按年大升近1倍，創新高，理想汽車(02015)交付量逾4.7萬部，按年增長逾46%。如果想買車股，係咪繼續揀龍頭比亞迪？還是可以考慮其他車股？ 高富金融集團投資總監梁偉民指，睇好比亞迪會持續強勢，又認為減價戰有機會持續至明年，甚至更長時間，當要打大型價格戰時，有大規模廠房慨車企有更大優勢，比亞迪絕對有規模優勢，亦係市場公認慨「一哥」，所以一定係首選。 Wyman又解釋，雖然理想、蔚來、小鵬等近期表現唔錯，其中，蔚來更特別標青，但佢認為，要留意蔚來交付量其實只有逾2萬部，本身風險又高，未必可以持續係市場生存到。 |
|
| 梁偉民 |
2024-06-25T11:23 |
美股人工智能(AI)晶片股王英偉達(Nvidia)，股價升跌都會影響成個AI板塊，以及晶片股投資氣氛，自股價上周破頂後，股價已連跌3日，昨晚(24日)再瀉逾6%，錄得兩個月以來最大單日跌幅，3日累跌13%，已進入技術性調整，市值落返3萬億美元以下，市場係咪開始擔心Nvidia增長前景及估值太高？ 高富金融集團投資總監梁偉民指，Nvidia由5月出完業績至今，股價由約900美元升到約1200美元，累升逾30%，所以股價出現回調係好正常。佢又話，除Nvidia外，其他AI股亦累積左幾誇張慨升幅，有炒過龍慨情況，所以亦會隨時出現回調。 Wyman續指，唔需要太擔心Nvidia股價，亦相信會升返，反而其他AI股因為收入及盈利，跟唔上股價升幅，跌左落去就未必咁快升得返上去。 |
|
| 梁偉民 |
2024-06-19T11:36 |
港股成交已連續兩日唔夠1000億元，今日(19日)一連兩日慨上海陸家嘴論壇開幕，市傳中證監會係論壇上發布有關資本市場慨政策，有咩值得憧憬及留意？ 高富金融集團投資總監梁偉民認為，未必會惹黎太大憧憬，市場想聽到較有力慨言論，支持金融市場及資本市場發展，當中包括要求上市企業諗辦法提升業績，但呢方面相對上流於口號，因為企業業績能否提升，好大程度睇經濟大環境。 Wyman又指，市場亦想聽到企業會唔會提升股東回報，例如增加派息次數及派息比率，但由於之前已做左一輪相關工作，有些企業已開始增加派息次數及提升派息比率，所以就算論壇上有任何政策公布，企業亦未必會大幅增加派息，對港股而言亦未必有即時及正面作用。 |
|
| 梁偉民 |
2024-06-18T11:40 |
「股神」巴菲特(Warren Buffett)旗下投資旗艦巴郡(Berkshire Hathaway)上周二(11日)減持比亞迪股份(01211)H股，持股量由7.02%降至6.9%，套現約3.1億港元，近期歐盟公布對華電動車徵收額外關稅，但比亞迪股價似乎未受太大影響，今朝(18日)股價反覆，一度失守230元，但之後曾倒升，高見235元，雖然比亞迪賣車成績唔錯，但面對各國慨針對性政策，係咪始終會有影響？ 高富金融集團投資總監梁偉民指，今次歐盟提高關稅，對內地車企冇太大實際影響，因為內地車企出口到歐洲慨數量唔多，加上係內地生產再出口到歐洲慨車，大部分都係外國品牌，不過，投資者要留意其他地區，尤其係新興市場，會唔會跟隨美國及歐盟加關稅，因為內地車企有唔少汽車出口到新興市場。 Wyman又話，如果想買車股，建議揀大型車企，因為電動車競爭激烈，規模較細慨車廠競爭力較差，依家比亞迪仍然係行業首選。 |
|
| 梁偉民 |
2024-06-11T15:04 |
美國聯儲局今晚(11日)開始，展開一連兩日慨議息會議，美國明日(12日)會出5月消費物價指數(CPI)，由於之前公布慨數據時好時壞，令息口走向仍未明朗，其中，非農新增職位遠超預期，平均時薪按年及按月都高過預期，美國10年期國債孳息率升穿4.4厘，美國幾時開始減息係咪仍好難判斷？ 高富金融集團投資總監梁偉民指，美國經濟仍然強勁，非農數據高過預期，反映就業市場穩定，所以聯儲局冇需要透過減息刺激經濟，估計美息短期內會維持不變，直到11月至12月減息慨機會先會較大。 Wyman又指，全球央行都開始減息，除左留意美國方面，其他國家慨情況其實同樣重要，因為全球已踏入減息周期，對股市慨正面影響會逐步浮現，所以唔需要太在意美國仍未開始減息。 |
|
| 梁偉民 |
2024-06-04T11:36 |
五礦資源(01208)同兗礦能源(01171)股價今年分別累升65%及30%，兩隻資源股最新齊齊有「動作」，其中，五礦計劃供股籌錢還債，兗礦就折讓配股集資還債，兩隻股份今早(4日)大跌，係咪可以趁機買貨？兩間公司撲水還債對資源板塊有咩影響？ 高富金融集團投資總監梁偉民指，現階段唔適宜吸納資源股，始終股價今年已升左唔少，加上市場之前憧憬內地經濟復甦，帶動資源價格3月已開始衝高，帶動相關資源股股價向上。 Wyman又提醒，內地經濟暫時未見顯著復甦，加上歐洲經濟疲弱，資源價格短期內急升慨理據唔充分。佢補充，資源股回套風險增加之餘，依家相繼有呢類公司供股或配股集資，市場難免會擔心呢類股份加快調整。 |
|
| 梁偉民 |
2024-05-28T11:06 |
美匯指數連日回軟，隔晚美匯向下的原因之一，是歐洲央行官員暨法國央行行長德加洛(Francois Villeroy de Galhau)表示，歐央行6月減息已成定局，而且不排除7月有減息可能，結果市場跟隨他的言論去炒作，歐元兌英鎊匯價亦觸及去年8月底位。 歐央行下周四(6月6日)議息，假使一如市場預期率先減息，會如何影響英倫銀行的決策？高富金融集團投資總監梁偉民亦預期，歐央行很可能於6月減息，因為當地通脹數字已經維持於2%一段時間。 至於英國跟歐元區的經濟同樣不景氣，Wyman指當地整體物價按年增長於4月顯著回落至2.3%後，如果通脹數據在未來數月維持2%水平，他相信英倫銀行於9月亦將開始減息。 |
|
| 梁偉民 |
2024-05-21T11:45 |
市場等緊「科技七雄」(Magnificent 7)之一慨全球晶片巨擘英偉達(Nvidia)出業績，集團將會係美股明晚(22日)收市後放榜，因為睇返標普500每股盈利增長預測，有同冇Nvidia在內係有明顯分別，係咪反映Nvidia呢份成績表，係標指未來走向慨關鍵？高富金融集團投資總監梁偉民指，Nvidia今年首兩季業績都唔需要擔心，因為基數仍唔算大，但去到下半年就要小心，因為增長會放慢。 雖然Nvidia對市有舉足輕重慨影響，但美股後市似乎唔使太擔心，因為其他行業都追緊上黎，除今季跑贏慨通訊服務及公用股，亦包括零售及能源股等，令標普500每股盈利增長預測差距收窄，係唔太集中於「七雄」下，係咪反映唔使太擔心指數慨表現？ Wyman指出，美股今年升市分布的確較平均，雖然科技股仍一枝獨秀，但金融、能源等股份已累升逾10%，但更重要係，經濟及企業盈利係咪可以跟住股市上，但要留意個別公司估值已經抽高，所以美股後市仍有隱憂，又認為值博率已經細左，始終股價已拋離盈利增長。 |
|
| 梁偉民 |
2024-05-14T12:29 |
據《彭博》調查顯示，在一眾資產類別中，不論機構或個人投資者都最睇好黃金，其次係大型科技股。美股3大指數昨日(13日)個別發展，其中，納指收市微升，值得留意係，好耐冇乜動靜慨迷因股GameStop，股價一度升逾倍，事緣係2021年GameStop事件中帶頭挾淡倉，美國財經界著名網紅Keith Gill疑暗示會重出江湖，GameStop呢浸係咪純屬短暫炒作？ 高富金融集團投資總監梁偉民認為，雖然GameStop業績有改善，但一夜之間突然爆上係比較奇怪，事實上，GameStop市盈率(PE)已高達300倍，短期盈利增長唔太可能支持到咁高PE，公司盈利增長空間亦唔大，認為純粹係炒作，投資者有時為炒而炒，唔會放過任何投機機會，即使美國咁成熟慨市場，都會出現呢些現象，投資者要小心呢浸炒作唔會太持久，Wyman估計，GameStop爆升後會大幅回落，如果想買GameStop都只可以做短期投機操作，唔適宜做長期部署。 |
|
| 梁偉民 |
2024-05-07T11:10 |
美國4月就業數據差過預期，令市場對聯儲局減息預期再升溫，美國債息下跌，美股3大指數隔晚(6日)高收。此外，紐約聯儲銀行行長威廉斯(John Williams)最新指，聯儲局最終都會減息，時間就取決於數據。係咪反映減息問題開始明朗化？今年係咪最少減息1次？ 高富金融集團投資總監梁偉民認為，美國減息時間仍未明朗，雖然非農數據冇預期咁強勁，但已令今年減息慨可能性增加，不過，股市及債市慨即時反應，反映市場對美國減息問題仍非常敏感，即使只係一兩個數據已足以影響減息預期。佢又話，一旦下個月慨經濟數據再度轉強，市場睇法又隨時有變。 不過，Wyman認為，美國今年減息機會仍高，因為下半年經濟好難好似依家咁強勁，佢估計，聯儲局會係第3季開始減息，今年減息1至2次。 |
|
| 梁偉民 |
2024-05-02T11:44 |
美股5月開局麻麻，美股3大指數隔晚(1日)只得道指微升，晶片股顯著回套，其中，超微電腦(AMD)及英偉達(Nvidia)更成拖低標普500指數「元兇」。 傳統智慧話要「Sell in May」，主要因為季績期後至10月前，通常市況較淡靜。不過，據統計顯示，標指係5月至10月其實升多跌少，過去10年平均回報4%，玩美股慨投資者今個月要點部署？ 高富金融集團投資總監梁偉民就認為，標指欠缺動力重上5100點水平慨橫行區，預期未來兩個月將持續受壓，但唔會延續4月時大跌約4%慨情況。Wyman續指，近日比特幣(Bitcoin)價格大幅回落，反映市場規避風險(risk-off)情緒高漲，會對美股構成負面影響。 |
|
| 梁偉民 |
2024-04-30T11:10 |
美國電動車生產商Tesla行政總裁馬斯克(Elon Musk)突閃電式訪華，消息指，內地當局暫時批准Tesla推出全自動駕駛(FSD)系統，集團亦會同百度集團(09888)展開FSD相關合作，係內地推廣應用FSD。Tesla美股隔晚(29日)一度飆20%，到底Tesla同百度「強強聯手」威力有幾大，利好效應又可以持續幾耐？ 高富金融集團投資總監梁偉民認為，Tesla同百度慨合作難有即時效果，因為自動駕駛要係內地推出及廣泛使用，技術層面上慨要求好高，監管層面上，一旦發生意外，責任誰屬亦要取得社會共識，因此，佢認為短時間內好難做到。 Wyman續指，無人駕駛需要大量感應器及複雜慨電腦計算，由於成本極高，好難短時間內做到高效益使用。股價方面，Tesla對上5個交易日累計，已自低位反彈逾30%，Wyman形容市場對Tesla睇法過度樂觀及亢奮，建議投資者必須審慎。 |
|
| 梁偉民 |
2024-04-23T10:51 |
茶百道(02555)今日(23日)首日掛牌，雖然係「新股集資王」，但集資只有近26億元，昨日(22日)暗盤收市價更比招股價低逾10%。茶百道係內地現製茶飲店第3大企業，經營模式與已申請上市慨蜜雪冰城相若。面對內地餐飲業內捲化、消費降級及平價取勝，呢隻新股王前景都唔太樂觀？ 高富金融集團投資總監梁偉民認為，市場本身競爭好大，加上消費市場有轉弱慨情況，所以對茶飲銷售就會有負面影響。但更重要係經營模式，大部分呢類公司係靠授出專利予其他人開店，收入盈利好靠開店數目。上市前一般都會有亢奮性開店擴張，帶動收入明顯上升，但上市後分店高速擴張一般都會見頂、甚至回落，亦可能被其他競爭對手取代。佢提醒要小心呢種經營模式，盈利未必可以持續。 |
|
| 梁偉民 |
2024-04-18T10:47 |
聯儲局主席鮑威爾(Jerome Powell)周二(16日)指，抗通脹進度麻麻，暗示要再推遲減息後，聯儲局最新出爐慨地區經濟報告顯示，美國大部分地區經濟增速2月底開始略為加快，企業對今年稍後慨經濟表現偏向樂觀，似乎反映美國經濟乃仍然強勁，似乎冇減息迫切性？ 高富金融集團投資總監梁偉民指，過去幾個月美國經濟數據理想，離衰退愈來愈遠，減息迫切性的確細左，呢個情況會維持幾耐，係幾時開始減息慨重要因素。 市場開始估計美國今年未必會減息，其中，美國銀行預期聯儲局最快明年3月先開始次息。不過，花旗認為聯儲局官員其實唔係咁鷹，又指今年仍有機會減息5次。 Wyman指出，減5次息唔係市場主流睇法，但唔排除美國經濟下半年有機會失控，導致聯儲局加快減息步伐，係6月開始減息，但睇返依家慨情況，雖然美國經濟下半年可能轉弱，但係兩至3個月內出現好大問題慨機會唔大，唔足以迫使聯儲局大手減息。 佢又認為，上述兩個種預測都未必會發生，仍預期美國今年減息1至兩次，首次會係9月，11月或12月會再減。 |
|
| 梁偉民 |
2024-04-16T11:55 |
美股昨晚(15日)先升後跌，市場憂慮以色列將回應伊朗攻擊，加上美國3月零售銷售強勁，市場對聯儲局推遲減息慨預期升溫，道指單日轉向，由一度飆400點，到收市跌逾200點，已連跌6個交易日，而3大指數中，以納指跌得最多，收市跌近2%，美股後市仲有幾大下調空間？可唔可以趁大市氣氛轉弱撈人工智能(AI)慨念股？ 高富金融集團投資總監梁偉民指，美股之前受AI熱潮帶動，無視債息上升慨負面影響，不過，最近AI相關股份都係高位出現整固及回落，反映AI熱潮有冷卻跡象，但唔排除之後會回勇，如果大市短期冇左AI相關股份支撐，債息上升對美股慨影響會明顯浮現，佢估計，美股未來有機會再回調2%至3%。 |
|
| 梁偉民 |
2024-04-09T12:13 |
美國商務部昨日(8日)公布，將會向台積電(TSMC)提供高達66億美元，折合515億港元慨補貼，以及50億美元低息貸款，協助集團係亞利桑那州鳳凰城興建第3間先進晶圓廠。值得留意係，台積電第2間廠房仍未落成，預期2028年開始生產全球最先進慨2納米製程晶片，今次興建第3間晶圓廠慨消息，對台積電股價有幾大幫助？ 高富金融集團投資總監梁偉民認為幫助唔大，因為台積電都未必好想係美國設廠，始終成本較高會影響毛利率，加上美國生產晶片配套一向唔多，所以較難搵到同台灣差唔多又比較好慨配套，因此，即使美國提供補貼興建第3間晶片廠，對台積電收入及盈利都未必有好大幫助。 Wyman又指，美國出於政治考慮，強調要係美國本土生產晶片保障供應鏈，因此，晶片企業獲邀去美國設廠係大勢所趨。 |
|
| 梁偉民 |
2024-04-02T11:36 |
小米集團(01810)旗下首款電動車「小米SU7」公布售價，介乎21.59萬至29.99萬人仔，集團指，定單表現強勁，首24小時定單量已超過8.8萬部。大行對新車評價普遍正面，話定價合理，有競爭力，中信里昂估計，SU7全年交付量6萬部。 小米慨美國預託證券(ADR)上周五(3月29日)收市價比本港上周四(3月28日)收市高13%，今朝港股承接美股升勢，大幅高開近15%，一度升穿17元水平。不過，高富金融集團投資總監梁偉民認為，短期冇咩利好因素支持小米股價，唔建議係現水平高追小米。佢指出，後市更應關注集團生產規模係咪足夠支持如期交付，以及交付後客戶對SU7慨反應。 |
|
| 梁偉民 |
2024-03-26T12:36 |
比特幣(Bitcoin)價格扭轉上周劣勢，重上71000美元，而4年一度慨「減半」(Halving)預期4月中就會發生，對上3次慨「減半」Bitcoin價格都有明顯升幅，今年情況又會點？ 高富金融集團投資總監梁偉民指，Bitcoin價格近排爆升有兩個主因，首先係美國監管機構容許Bitcoin現貨交易所買賣基金(ETF)上市，令市場憧憬Bitcoin需求增加，其次係即將殺到慨「減半」，不過，Wyman認為，Bitcoin價格今年未必會爆升，因為大部分利好因素已反映哂。佢又提醒，投資者須小心出現反高潮效應，原因係Bitcoin價格之前升得太誇張，可能會出現調整。 |
|
| 梁偉民 |
2024-03-19T11:18 |
理想汽車(02015)月初推出，曾寄予厚望慨首款純電MPV產品MEGA，市傳銷情遠差過預期，半個月只得4000架定單，要實現全年80萬架慨交付目標絕對唔容易。內地電動車價格戰持續，加上歐盟對中國電動車企進行反補貼調查，代表共和黨出戰美國總統大選慨特朗普(Donald Trump)講明要加中國製汽車關稅，投資者係咪都唔好「上車」？ 高富金融集團投資總監梁偉民指，理想去年表現好好，銷售超出市場預期，帶挈股價升左唔少，但今年情況逆轉，銷售量開始減慢，新車銷情又一般，始終行業競爭太激烈，公司一定有減價壓力，繼而影響毛利率及盈利增長，佢坦言唔睇好整體車股後市。 Wyman又指，雖然理想慨股價回落，投資者可以考慮入手，但如果要買內地車股，揀返龍頭比亞迪股份(01211)比較穩陣，始終集團規模大，係競爭激烈慨環境下較易生存。 |
|
