| 评论员 |
时间 |
内容 |
标签 |
| 卢志威 |
2024-05-08T11:07 |
苹果公司(Apple Inc.)昨晚(7日)举行名为“Let Loose”线上发布会，新iPad正式亮相，其中，最瞩目系系iPad Pro搭载最新及功能最强嘅M4晶片，Apple形容M4性能可以媲美其他大厂嘅人工智能(AI)晶片。不过，Apple股价昨晚反应十分冷静。 润淼资产管理董事卢志威认为，Apple股价近期回升主要受回购推动，虽然AI概念系市场焦点，但今次加入AI功能系iPad，唔系公司主要收入来源嘅iPhone，对于今年将会推出嘅iPhone 16，市场估计，销售情况同之前差唔多，不论销情及增长等都唔会系爆发性，所以股价表现都要等iPhone 16登场后先可以再评估到，不过，由于之前嘅回购计划太厉害，所以股价短期应该仍会偏强。 |
|
| 卢志威 |
2024-04-24T10:44 |
昨日(23日)美股收市后Tesla公布首季业绩，纯利、收入、汽车毛利率均下跌及逊预期，创办人马斯克(Elon Musk)指，新车投产时间会提早至今年年底或明年初，更会以平价出售新车，呢个消息抵销纯利下跌负面因素，带动股价喺延长交易时段大升逾10%，仲有冇其他好处？此外，Tesla竞争对手比亚迪(01211)及小米集团(01810)均有推平车，持续减价战有机会令卖车利润归零，点解都仲要斗平咁卖车？ 润淼资产管理董事卢志威指，因为要推平车，Tesla有用机械人加速自动化生产，令成本更平，加上推行自动驾驶同无人驾驶的士(Tesla Robotaxi)，令业务拓展至人工智能(AI)、大数据(Big Data)方向，对股价会有帮助。 William续指，依家行业处于整合，减价战会淘汰现金流归零嘅车企，因为未来啲车价趋势都系向下，就睇喺环境差时，边个车厂抢到市占率。 |
|
| 卢志威 |
2024-04-17T11:11 |
美国10年期债息升至近4.7厘水平，事关联储局主席鲍威尔(Jerome Powell)同副主席杰斐逊(Philip Jefferson)都暗示或要推迟减息步伐，指去年底起抗通胀缺乏进展，愈嚟愈多券商下调今年减息次数预测，其中，瑞银预期今年减息两次后，明年有机会掉头加息。 虽然金价仍处于每盎司2380美元水平嘅高位，不过，润淼资产管理董事卢志威认为，后市10年期债息有机会上到5厘，长远不利金价走势，加上中东局势继续升温，最新以色列明言会报复伊朗，短期金价未见进一步动力向上，建议投资者趁而家市场气氛好就适量减持黄金。 |
|
| 卢志威 |
2024-04-03T10:18 |
Telsa首季交付量按年跌8.5%，系2020年以嚟首见，令市场十分惊讶，更形容为一场灾难，按季更大跌20%，远差过预期，拖累股价昨晚(2日)一度挫近7%，有分析员更直指，除非集团可以扭转劣势，否则，Tesla可能会步入黑暗日子，系咪意味Tesla暂时可以放埋一边，转吼其他股份？ 润淼资产管理董事卢志威指，全球电动车市场环境开始逆转，竞争进一步白热化，比亚迪股份(01211)及小米集团(01810)等都追紧上嚟，大打价格战，喺多项因素夹击下，令整个电动车市场前景唔明朗及唔乐观，再加上销售及交付量急速下滑，会令市场非常失望，继而令Tesla股价向下，佢建议暂时先避开Tesla。 内地电动车股方面，William估计，Tesla会逐渐失去龙头地位，内地将会有车企跑出成为新龙头，亦会好快出现汰弱留强嘅局面。 |
|
| 卢志威 |
2024-03-27T12:31 |
海底捞(06862)昨日(26日)收市后出咗业绩，去年多赚逾2倍至45亿人仔，更慷慨地将近90%盈利用嚟派息，末期息按年大增6倍至0.824港元。不过，集团股价暂时连跌3日，今朝平开后，一度跌3%，低见16.44元。 润淼资产管理董事卢志威表示，海底捞派息比率有惊喜，但难免令市场忧虑集团放弃快速扩张店铺网络发展策略，继而影响盈利。William认为，唔需要为咗收息喺现价吸纳海底捞，并指集团正由增长股慢慢调整为收息股，中线而言，预期股价会喺14至18元水平上落，不妨等股价再跌多啲先买。 |
|
| 卢志威 |
2024-03-13T11:54 |
据内媒报道，遭评级机构穆迪降评级至垃圾级别嘅万科企业(02202)，获工商银行(01398)及建设银行(00939)等合共12家银行，帮集团筹800亿人仔贷款，用嚟应对到期嘅债券。此外，《彭博》昨日(12日)收市后报道，银行会将持有嘅万科债权转换为有抵押品嘅“非标准化债权”，短期系咪可以帮到万科？ 润淼资产管理董事卢志威指，虽然万科评级已变“垃圾”，但银行都愿意出手打救，而债权转为有抵押品嘅“非标准化债权”可解决违约问题之余，亦可解决短期流动性危机，释出一个利好讯号。 不过，William提醒，虽然卖楼、烂尾楼、去库存等问题，可以比时间慢慢消化，而瑞银亦对内房行业睇法转为正面，但要回复至未爆发危机前仍然需要一段时间。 |
|
| 卢志威 |
2024-03-04T11:21 |
楼市全面“撤辣”后，在刚过去嘅周末，一二手交投都出现“小阳春”，一手最少录得约443宗成交，按周大升17倍，其中，“撤辣”后首个推出的全新楼盘，恒基地产(00012)旗下Belgravia Place首批138伙全数沽清。二手方面，十大屋苑过去两日有27宗成交，系逾1年以来最多，但都系要蚀让，呢个“小阳春”系咪可以持续，继而带动本地地产股？ 润淼资产管理董事卢志威认为，依家明显见到成交被托起，呢个情况系会刺激到啲买家出嚟，一定会利好数量，但价钱就系未知数，虽然买家多咗，但一二手仍有好多单位要卖，尤其一手静咗成年，最有可能出现嘅情况喺刺激好多人换楼，同埋收租客会入市，如果租金回报去到3厘至4厘，就当锁定定期存款。佢又指，由于发展商会推优惠去库存，估计未来会系成交量升，但价格平稳。 卢志威又指，本地地产股系可以留意，尤其系跌得比较多嘅高负债公司，趁依家较易去货，同埋个价靓咗，呢类股份都值博。 |
恒基地产 , 地产 , 地产 , 十大屋苑 |
| 卢志威 |
2024-02-28T10:51 |
财政司司长陈茂波今早(28日)会发表新一份《财政预算案》，市场焦点落喺点样刺激经济，以应对财政赤字，以及政府会唔会为楼市“撤辣”，因为过去一段时间，不论市场及业界都不停呼吁“撤辣”救市。 润淼资产管理董事卢志威表示，虽然政府力谷旅游业，尤其内地旅客，希望提振经济，但内地推出唔同嘅退税优惠，令旅客喺香港消费购物都冇以往咁平，呢个系一个长期问题，至于政府计划“月月放烟花”及无人机表演，只可以增加短途即日来回旅客，都刺激消费冇乜帮助。 有消息指，政府倾向为楼市“减辣”唔系“撤辣”，William话，投资者不妨睇实本地地产股或地产代理股，政府为楼市“减辣”有两个原意，首先系刺激买楼自住以外嘅投资需求，鼓励买楼收租撑楼市，其次系刺激细屋搬大屋需求，希望带动成交，而喺市民换楼一买一卖下，地产代理股都可以受惠。 |
地产 , 地产 , 内地楼市 , 港楼市 |
| 卢志威 |
2024-02-21T10:09 |
美国晶片巨企英伟达(Nvidia)会喺今晚(21日)美股收市后出业绩，但股价昨晚(20日)向下，拖低埋标指及其他科技股。市场一致睇好Nvidia上季业绩，但系咪足以支持估值及股价强势？呢份业绩有咩地方要留意？ 润淼资产管理董事卢志威指，Nvidia股价今年已累升40%，市场预期，上季盈利将以倍数增长，虽然股价大升有业绩支持，但要留意今晚出炉呢份业绩系咪同预期差唔多，其次系由AI热带动嘅需求系咪可以持续，最后就系前景指引。至于股价噚晚跌，估计同投资者喺业绩前先行获利回套，再睇下份业绩可唔可再推高股价。 William又话，如果想买Nvidia唔使太心急，因为高增长已成定局，而增长唔系靠谷高估值，由正股转去CALL/PUT都系合理，若短期穿咗止赚或止蚀位，预期股价会好波动大，建议投资者业绩后再做部署。 |
公司业绩 , 科技 , 美股 |
| 卢志威 |
2024-01-31T11:36 |
【Now财经台】美股进入业绩高峰，多家科技巨企噚晚(30日)派咗成绩表，其中，微软(Microsoft)收入增速系两年以来最快，不过，Google母公司Alphabet上季多赚近52%，但Google广告及搜寻业务收入差过预期，至于全球第2大晶片商AMD今季收入展望低过分析员平均预测，3只股份盘后都要跌，但整体业绩仍维持增长，系咪都算交到货？ 润淼资产管理董事卢志威指，上面提及嘅公司中，AMD面对最大问题，同英特尔(Intel)一样，集团正面对个人电脑及游戏机伸展需求下降问题，虽然两只都系之前表现抢镜嘅半导体股，但放榜后都要跌，所以要小心呢类股进入调整期。William又话，虽然微软业绩好，但噚晚都要偏软，相信系之前升得太多，Alphabet情况亦差唔多，因为股价过去1年累升50%，所以就算业绩好过预期，中线都要小心。 卢志威 润淼资产管理董事 |
美股 , 科技 |
| 卢志威 |
2024-01-24T10:04 |
【Now财经台】Netflix昨晚(23日)喺美股收市后出咗业绩，去年多赚20%，收入及新增用户都好过预期，后者更是疫后表现最强劲嘅季度，刺激股价盘后劲升8%，系咪反映集团力谷用户嘅措施见效？此外，集团掷数十亿美元夺得WWE Raw美国独家转播权，系咪除咗剧集外，Netflix加强体育直播范畴？ 润淼资产管理董事卢志威指，Netflix广告及订阅商业化之后表现系好咗，呢个都令市场有啲惊喜，令业绩及财务回报表现好理想，但佢认为，要留意未来两季嘅情况，再判断改变订阅制度令付费用户多咗，系咪一次性因素。 William又话，大型体育节目直播都系另一个可以吸引观众，但都需时观察，虽然经过今轮增长后，Netflix未来业绩表现可能唔再有咁大惊喜，但仍然系一家具高增长潜力嘅企业。 卢志威 润淼资产管理董事 |
ETF , 美元 , 美股 , 恒生中国企业 |
| 卢志威 |
2024-01-17T11:49 |
【Now财经台】Tesla行政总裁马斯克(Elon Musk)指，要有25%投票权先可以令Tesla成为一家人工智能(AI)及机械人公司，依家马斯克持股量约13%，系咪意味佢有可能增持公司股份？ 润淼资产管理董事卢志威相信，马斯克系有机会增持，但由于未必会喺市场买入股份，所以都唔容易，亦唔会对Tesla股价有太大影响。 自从比亚迪股份(01211)成为全球电动车销售No.1后，马斯克多次强调Tesla唔系纯电动车公司，转型意图都几明显，而公司都有AI等其他业务，Tesla开拓新业务或获注入新业务机会大唔大？卢志威指，话Tesla系一家能源公司更贴切，依家AI系大潮流，虽然马斯克刻意强调Tesla唔只系一家电动车企业，但估计暂时唔会有实质搞作。 睇返Tesla股价，依家系呈一个下跌趋势，佢就话，随着美股出现调整，加上都升咗唔少，相信会继续调整，加上Tesla未来发展都系未知数，所以现阶段买唔过。 |
能源 , 比亚迪股份 , 美股 |
| 卢志威 |
2024-01-10T09:57 |
【Now财经台】唔少大行指2024年系“债券年”，但“老债王”格罗斯(Bill Gross)喺美国通胀数据出炉前夕大唱反调，指美国10年期国债被高估，又话如果投资者想买债券，通胀挂钩债券(TIPS)更好嘅选择，佢又称，深信10年及2年期国债孳息曲线将会回归正值。不过，TIPS只得1.8厘息，远低于10年期国债嘅4厘息。 润淼资产管理董事卢志威指，可能格罗斯觉得国债升得太快太急，担心会出现调整，其实依家短期长期利率已出现倒挂情况，可能佢觉得贵之余，又认为唔会咁快减息，但其实好难讲，已资金觉得债息由5厘去到4厘都无问题，所以就出现一个追捧国债现象。 William又话，依家市场反应都好快，亦都系跟红顶白，所以依家系处于一个追捧国债嘅时间，但佢认为相对TIPS，国债仍然较值博。 卢志威 润淼资产管理董事 |
美债 , 格罗斯 |
| 卢志威 |
2023-12-13T11:30 |
【Now财经台】美国11月消费物价指数(CPI)按年升3.1%，符合预期 ，但按月升0.1%，略超预期，市场原本预期无升跌，联储局一连两日嘅议息会议就快完结，议息结果会喺本港时间今晚凌晨出炉，市场焦点落喺点阵图及联储局主席鲍威尔嘅讲话，会有咩启示或线索畀市场，点评估联储局明年减息时间表？ 润淼资产管理董事卢志威指，市场一直预期联储局明年会减息，虽然现阶段仍会维持高息一段时间，但市场正不断揣测到底明年几时开始减息。William认为，预期明年3月减息系过分乐观，最快5月先开始减息，佢又提醒投资者评估减息时间时，必须冷静睇，同埋要先睇经济数据。 卢志威 润淼资产管理董事 |
|
| 卢志威 |
2023-12-06T11:45 |
【Now财经台】药明生物(02269)早前召开业务会议，股价一度急泻23%，之后突然中途停牌，市场及大行普遍对集团下调业务指引感到失望，甚至惊讶，股份昨日(5日)复牌继续插水，更一度失守30元，集团今早(6日)出通告，称动用最多6亿美元做回购，系咪可以挽回市场信心，同埋“救价”？ 润淼资产管理董事卢志威认为，其实唔少公司出完业绩就宣布回购，显示股份抵买，喺股价低残时做回购或多或少可以撑下价，中长期嚟讲都系好事，至少可以减低流通量。 不过，佢指出，由于回购系一个长期操作，长远一定系利好，但短期始终要睇供求，依家嘅关键系点样令资金回流，呢个就要视乎公司吸引力，例如可以拓展海外市场，或整体经济反弹，先可以吸引到资金。 |
资金流向 , 美元 , 生物 , 药明生物 |
| 卢志威 |
2023-11-29T11:31 |
【Now财经台】美团(03690)昨日(28日)收市后放榜，虽然第3季业绩对办，但管理层展望今季外卖餐饮业务放缓，更预告外卖客单价下跌，估计外卖业务收入增速较第3季略为放缓，闪购业务收入增速或跟上季持平，结果绩后被一众大行下调评级或目标价，其中，高盛降目标价至176元。 美团股价噚日收市跌5%，收报103元，今朝一开市即失守“红底”，一度急插逾10%至92.1元。润淼资产管理董事卢志威认为，内地消费疲弱，加上疫情过后，外卖需求及单价下降，美团将要面对增长放缓嘅逆境，预期股价好大机会持续受压，建议投资者避一避会安全啲。 William续指，美团开市前公布最多回购10亿美元股份，虽然长线有助支持股价，但中期仍会因为基本面转差而受压，认为美团股价喺未来一至两季都未必见起色。 |
企业评级 , 高盛 , 美元 |
| 卢志威 |
2023-11-15T11:32 |
【Now财经台】美国通胀稳步回落，进展良好，刺激美股昨晚(14日)大升，除市场憧憬联储局加息周期完结外，有《华尔街日报》记者通胀数据出炉后，撰文指局方可能唔会再加息，究竟12月会唔会加息？明年中减息机会系咪大增？ 润淼资产管理董事卢志威指，今次消费物价指数(CPI)系有惊喜，因为通胀持续回落，联储局就冇加息理据，而局方只能话经济过热或要加息，但呢个理据唔太成立，所以下个月加息机会细咗好多，美股噚晚表现亢奋系因为一旦利率开始下调，就会为市场带嚟投资机会，佢估计，联储局明年下半年会启动减息周期，如果有闲钱不妨考虑做中长线部署。 卢志威 润淼资产管理董事 |
美股 |
| 卢志威 |
2023-11-08T10:55 |
【Now财经台】受内地外贸数据影响，港股昨日(7日)3连升断缆，恒生指数收市挫近300点，星期一(6日)收复嘅50天线又失守。中央继续出招试图化解内房及地方债危机，以及稳住经济增长，内地风险因素系咪有纾缓迹象？恒指可唔可以再收复返50天线？ 润淼资产管理董事卢志威指，恒指升穿50天线后又落返去，依家市场只得夹淡仓，基本因素冇显着改善，经济数据差系意料之内，但其实有啲嘢系改善紧，例如中央出手化解万科风险，因为一旦万科企业(02202)呢类房企出事，系统性风险系非常巨大，咁样对下药系一件好事，相信市场系会受落。William又指，即使港股依家气氛好差，但应该已处于一个筑底阶段。 |
港股 , 内房 , 恒生银行 , 万科企业 |
| 卢志威 |
2023-11-01T10:58 |
【Now财经台】港股喺10月嘅传统“股灾月”累跌近700点或3.9%，连跌3个月，回顾过去一段时间，虽然中央连番出手救市，但港股及A股继续寻底，经历“股灾月”后，年尾又要面对投资者锁定利润呢个潜在风险，加上本港经济亦唔太好，除经济增长逊预期，7月至9月负资产数目再破万宗，港股系咪好难有起色？ 润淼资产管理董事卢志威指，救市措施作用的确系愈来愈细，因为唔少措施都系比较短期，最根本问题系前景唔明朗，加上有一定风险，所以资金唔愿意投资。楼市方面，虽然政府已经“减辣”，但最多只系提升返流动性，唔可以令楼价回升，而大量用家去租楼，都反映唔睇好楼市，宁愿揿住个荷包。 William认为，港股市仍处于一个阴干式格局，反覆向下，除非有好消息先可以快速夹淡仓。 卢志威 润淼资产管理董事 |
港资流向 , 港股 , 资金流向 , 港楼市 |
| 卢志威 |
2023-10-25T10:41 |
【Now财经台】国家主席习近平罕有去人民银行调研，中央支持金融及经济嘅决心不言而喻，事实上，踏入第4季中央已不停出手，包括中央汇金买入内银A股及ETF，以及额外发债等，市场预期，下一步会系减息降准，喺呢个情况下，港股今季市况系咪可以睇返乐观啲？ 润淼资产管理董事卢志威指，中央针对金融及财政范畴连环出招，目的系令市场及实体经济回稳，相信对内地系有一定作用，问题系市场惯咗夹空仓，但夹完淡仓后有冇力再升系一个疑问，只要解决到呢个问题，个市系会升返。 William又话，港股今日应该会向上，但去到17500点水平就会有阻力，佢建议投资者保持一个较轻嘅仓位，睇中长线会比较好，即使弹上19000点，又会有另一个阻力，主要系蟹货多，佢估计，即使再连环出招，恒指升至19000点水平应会止步。 卢志威 润淼资产管理董事 |
港股 , 内银 , ETF , 恒生中国企业 |
| 卢志威 |
2023-10-18T11:22 |
【Now财经台】美国企业季绩好坏参半，不过，零售销售数据强劲，投资者担心高息环境持续更长时间，加上中东局势发展都令投资者审慎，美股噚晚好淡争持。虽然美股隐忧唔少，但似乎同通胀一样韧力十足，后市会点走？ 润淼资产管理董事卢志威认为，虽然近期发生唔少事件，但美股仍可以企喺高位，反映市况稳定。佢又话，投资者应该试下搵其他板块炒，唔可以好似年初咁只睇住人工智能(AI)板块，由于市场仲等紧消息，所以沽压暂时唔算好大，建议投资者可以做中长线部署，因为短线流动性较差，亦冇乜特别嘢可以炒，所以唔建议做短线部署。 拣股方面，William就话，建议投资者集中吼高增长科技股，其中，大型科网股胜在稳定，因为美股成交主要集中喺Tesla、Apple等重磅股身上。 卢志威 润淼资产管理董事 |
科技 , 美股 |
| 卢志威 |
2023-10-11T12:28 |
【Now财经台】美国10年期债息录得7月中以来最大单日跌幅，回落至4.65厘水平，加上联储局“鸽派”官员、亚特兰大联储银行行长博斯蒂克(Raphael Bostic)话唔使再加息，又指美国经济唔会陷入衰退，据最新利率期货显示，联储局11月唔加息嘅机会升至90%，带动美股3大指数昨晚造好，并已连升3个交易日。 润淼资产管理董事卢志威指，官员“放鸽”会对债息有帮助，加上以巴冲突令中东局势升温，带动避险需求，资金会重投美债避险。佢又指，如果睇返数据，美国经济“软着陆”嘅机会系大咗，市场会博债息差唔多见顶，虽然最近长债息升咗一浸，但已有见顶迹象，对股市及债市都系一个利好讯号。 William又话，喺高息环境下，投资者会倾向低风险投资，因此，债息回落会令市场信心回升。 卢志威 润淼资产管理董事 |
美债 , 美股 |
| 卢志威 |
2023-10-04T11:38 |
【Now财经台】港股昨日(3日)喺第4季首个交易日曾泻近600点，低见17212点，再创今年新低，润淼资产管理董事卢志威认为，港股短线好大机会再跌，因为港股一向跟足外围经济大趋势，依家仍需时消化美国联储局加息等消息，估计恒生指数要跌至16800点，先有机会反弹。 此外，摩根士丹利继续睇好汇丰控股(00005)，预期股价未来30日有70%至80%机会上升，并估计10月底公布嘅第3财季业绩将保持稳健，目标价维持72.2元。 William亦认为，相比某啲热门公用股如中国移动(00941)、中国海洋石油(00883)等，汇控更加买得过，又话暂时未见出现按揭断供潮，加上按息上调，相信集团可以维持到资产质素，后市相对稳阵，可趁现价，即60元水平吸纳。 |
汇丰控股 , 汇控 , 石油 , 港股 , 恒生银行 |
| 卢志威 |
2023-09-27T11:32 |
【Now财经台】新一批绿色债券将于明日(28日)截止认购，唔少银行近日开始加定存息“抢钱”，仲未入飞嘅投资者，建唔建议佢哋赶搭“绿债尾班车”？港股噚日穿底，成交继续淡静，港股依家最大问题系“缺水”，后市似乎好难乐观。 润淼资产管理董事卢志威坦言，唔建议赶搭“尾班车”，因为银行纷纷加定存息，造定存其实已经足够，买绿债纯粹系因为手头资金好充裕，作为一个投资配置。 港股方面，William认为，市况咁差都受唔少宏观因素影响，有分析预期，美债息可以升至7厘，如果真系咁其实咩都唔使做，就咁冲入去买美债稳袋7厘息，其次系信心好差，宁愿造定存都唔去投资，就连楼价都跌唔停，佢认为，依家港股宜做防守性部署，又预期大市会维持一个阴干式下跌格局。 卢志威 润淼资产管理董事 |
美债 , 港股 , 新股IPO , 新股IPO |
| 卢志威 |
2023-09-20T11:17 |
【Now财经台】美国联储局公布议息结果前夕，市场观望气氛持续，虽然局方9月唔加息，同埋今年余下时间最少再加一次息已经系市场共识，但值得留意系，议息结果出炉前，油价继续升，美国长债息抽升，似乎反映市场对年内最少再加一次息嘅睇法或正逐步改变，反映官员对未来息口走向预期嘅点阵图中位数，上调机会有几大？明年系咪会继续加息？ 润淼资产管理董事卢志威估计，点阵图中位数好大机会保持不变，因为联储局暂时都唔会减息，依家仍处于一个缓慢加息阶段，联储局睇法同市场唔同，市场会聚焦美国经济会唔会下滑，甚至陷入衰退，憧憬减息系希望令资产市场维持平稳，反观联储局就一直着眼于通胀问题，若通胀比预期强劲，就必须遏制。 卢志威 润淼资产管理董事 |
|
| 卢志威 |
2023-09-06T16:07 |
【Now财经台】传统上，美股有个“9月魔咒”，表现都会比较差，睇返过去5年，道指3跌两升，其中2022年大跌近9%，今个9月暂时都要跌，今年会唔会再应验“9月魔咒”？ 润淼资产管理董事卢志威认为，今年好大机会应验，撞正美股过去几个月都升得几夸张，好多之前部署咗嘅淡仓都被夹爆，不论睇历史数据或短期技术走势，指数向下嘅机会较大，其实睇返整体大市都系处于一个调整阶段，但估计调整幅度唔会太大，因为呢个系技术调整，而美股基本面又冇出现太大转变。 卢志威 润淼资产管理董事 |
美股 |
| 卢志威 |
2023-08-30T10:37 |
【Now财经台】美股3大指数噚晚3连升后，全线收复50天线，技术走势明显改善，今轮调整系咪已经完结？美股8月只剩返两个交易日，3大指数暂时跌约2%，展望9月，美股市况乐唔乐观？ 润淼资产管理董事卢志威指，美股走势好转，依家已收复返一啲重要嘅移动平均线，之前出现调整系受加息预期等因素影响，但呢啲因素都比较反覆，所以调整幅度都唔会太大，同埋美股之前已经升咗唔少，而调整仍处于横行消化阶段，需要更重大嘅利好消息，先可以将个指数推上去。 William又指，其实美股表现已经好强，始终面对住唔少坏消息，由于科网巨企业绩唔错，相信会继续有资金流入美股，而苹果公司将会喺美国时间9月12日举行发布会，估计iPhone 15将会亮相，对美股有咩影响。卢志威就话... 卢志威 润淼资产管理董事 |
资金流向 , 美股 |
| 卢志威 |
2023-08-16T10:51 |
【Now财经台】美国3月爆发嘅地区银行危机好快平息，不过，有评级机构认为，银行经营环境转差，其中，惠誉最新指，包括摩根大通在内等大银行评级，亦有下调风险。另有消息指，美国监管机构会向资产规模唔少过1000亿美元嘅银行，提出发行足够长债嘅要求，以弥补资本损失。到底美国银行危机系咪好似评级机构讲到咁严重？ 润淼资产管理董事卢志威指，其实3月爆发嘅地区银行危机唔系市场讲到咁严重，依家美国监管机构明显想睇少几家银行，希望高息环境可以推动银行合并、重组，因为喺呢个操作下，银行体系会变得更健康，唔会咁易冧，但提醒投资者中小型银行股嘅股价会比较飘忽。 佢又话，虽然小型银行依家冇乜优势，好难揾到新定位，因此，都系朝着合并、重组嘅大方向发展，合理之余，美国监管机构亦乐见。 卢志威 润淼资产管理董事 |
美元 , 企业评级 |
| 卢志威 |
2023-08-02T12:06 |
【Now财经台】评级机构惠誉噚晚突然喺美股收市后，将美国降级，评级由最高嘅“AAA”下调一级至“AA+”，但评级展望由“负面”转为“稳定”，降级理据预期美国未来年财政状况将会恶化，政府整体债务负担不断增加。消息传出后，财长耶伦随即发声明批评呢个降级决定，投资市场有咩反应？对美股又有冇影响？ 润淼资产管理董事卢志威指，暂时市场反应唔算太激烈，因为降级原因唔涉及突发性因素，虽然会令投资者调整投资部署，但其实资金唔止参考评级，亦会有其他考虑，因此，今次降级对美股影响有限，虽然美股短期可能会步入调整期，但跌幅唔会太大。 卢志威 润淼资产管理董事 |
美股 , 企业评级 |
| 卢志威 |
2023-07-26T10:52 |
【Now财经台】美国联储局会喺香港时间今晚凌晨2点公布议息结果，听日(27日)就系欧洲央行决策日，星期五(28日)轮到日本央行公布议息结果，美汇指数喺联储局议息结果出炉前偏软，企喺101水平，担唔担心美股12连升后，借议息后调整？ 润淼资产管理董事卢志威认为，联储局加息5厘呢个因素已经price in咗，美股今轮升浪主要受市场预期美国利率好快见顶，只要加埋今次之后，局方预测唔系太鹰，William估计，道指可以维持低波幅、慢升格局，对美股嚟讲，呢个情况系唔错，因为依家唔系好似之前咁集中炒板块，而系一种稳中向好模式，同港股大上大落好唔同，所以美股可以买定啲货揸住。 卢志威 润淼资产管理董事 |
港股 , 美股 , 美汇 |
| 卢志威 |
2023-07-19T10:33 |
【Now财经台】港股噚日5连升断缆后，今日好大机会失守19000关，港股再度转弱原因都唔少，包括内地上季经济增长差过预期、中国恒大(03333)两年劲蚀5800亿人仔，负债多达2.4万亿人仔，破晒香港上市公司纪录等，恒大咁吓人嘅数据，好大机会令更多投资者掟货，继而推低港股，港股后市似乎都好难乐观。 润淼资产管理董事卢志威指，虽然恒大负债真系好吓人，但相信最终都可以成功重组，只系唔知需时几耐，不过，内房股系应该逐只睇，佢认为，睇公司系重要过睇板块，其实港股已经稳定落嚟，因为要沽嘅都沽晒，只要识拣中线仍可以发围，但短线而言，港股好大机会继续大幅跑输美股。 |
港股 , 内房 , 美股 , 新股IPO , 新股IPO |
| 卢志威 |
2023-07-12T10:17 |
【Now财经台】虽然港股连升两日，但恒指仍受制于18800点水平，而成交已连续15个交易日唔够1000亿元，恒指短期挑战19000关，还是下试18000点机会较大？近排赌股、车股及汽车零部件股热炒，呢啲股份今个暑假系咪继续可以睇高一线？ 润淼资产管理董事卢志威指，美元有转弱迹象，人仔有向上趋势，后者对港股影响几大，因为人仔不停跌一定会影响企业盈利、估值等，如果人仔短期见返7算，已足以令港股上返19000点或以上，加上唔少股份已经跌到好残，大市短期系可以博反弹。 William又话，近期明显见到有短线资金返嚟搵板块炒，佢认为，赌股可以考虑估中线部署，但人工智能(AI)相关股相对难玩，但可以吼... 卢志威 润淼资产管理董事 |
港股 , 美元 |
| 卢志威 |
2023-07-05T11:49 |
【Now财经台】人仔近日回稳，对港股嚟讲系一个正面因素，虽然恒生指数噚日收复20天线，但交投持续淡静，已连续10个交易日成交唔够1000亿元，不过，北水重新录得净流入，噚日净买入逾4亿元，人仔回稳，加上市场气氛略为好转，恒指可唔可以再向上突破？ 润淼资产管理董事卢志威指，恒指正处于转强阶段，唔同板块都开始呈向上趋势，有唔同板块被炒起，主要系人仔回稳，同埋市场憧憬中央推出刺激经济政策，加上大市再跌空间有限，佢预期，恒指短期内有望反弹。 卢志威 润淼资产管理董事 |
港股 , 港资流向 , 恒生银行 , 新股IPO , 新股IPO |
| 卢志威 |
2023-06-21T15:05 |
【Now财经台】药明生物(02269)股价噚日急泻，因为公司喺投资者日自爆上半年业绩差，收入增长放慢至只有低双位数，纯利更可能零增长，集团今朝开市前出通告，重申集团业务运作正常，冇重大不利变化等。大和就话，药明生物股价噚日急泻系投资者反应过度，到底系咪跌过龙？药物外包行业(CRO) 前景又系点？ 润淼资产管理董事卢志威指，市场依家都比较风声鹤唳，其实好难讲边间公司会中招，但估计呢啲情况会陆续有来，所以拣股时最好选择喺消费疲弱下，影响较细嘅公司。 William又话，CRO股唔系特别高危，可能只系个别因素，不过，有好多行业其实系显而易见，例如高端消费品相关股就会跌得多啲。 |
公司业绩 , 生物 , 药明生物 |
| 卢志威 |
2023-06-14T11:52 |
【Now财经台】美国通胀进一步降温，5月消费物价指数(CPI)按年升4%，低过市场预期，连跌11个月，但按月升0.1%，而核心CPI按年升幅则是逾两年最小，市场憧憬联储局今个月会暂停加息，刺激美股3大指数噚晚向上，美元汇价就偏软，如果6月真系唔加息，7月再加息嘅机会大唔大？ 润淼资产管理董事卢志威指，如果美国通胀持续呈下降趋势，加息嘅机会就愈嚟愈细，但美息可能会喺高位横行一段较长时间。William又话，近日美股及罗素2000指数等都有唔错嘅反弹，反映市场预期美息已接近见顶，因此，对后相对乐观，不过，减息暂时仍未有眉目，仍要视乎未来嘅情况。 卢志威 润淼资产管理董事 |
美元 , 美股 |
| 卢志威 |
2023-06-07T12:33 |
【Now财经台】联储局下星期议息，市场对暂停加息嘅预期续升温，美股3大指数继续喺高位徘徊。值得留意系，反映中小型企业状况嘅罗素2000指数再跑赢纳指，3个交易日累升2.7%，依家连细价股都郁，系咪反映美股升势更全面，有利呢浸升浪持续更长时间？ 润淼资产管理董事卢志威指，美国债务上限危机化解后，美股升得唔错，中小型股都升埋上去。此外，美国加息周期已届尾声，对美国经济嚟讲系一个利好讯号，因为之前不停加息令实体经济有压力。 William估计，美股升到现水平应该差唔多见顶，因此，部分资金会买入罗素2000嘅细价股，而喺美息趋势向下嘅情况下，美股未来有机会再升5%至10%，长揸系一个唔错嘅选择。 卢志威 润淼资产管理董事 |
美股 |
| 卢志威 |
2023-05-31T11:28 |
【Now财经台】国际油价噚晚一度急挫5%，录得4周以来最大跌幅，纽约期油收市失守每桶70美元，石油输出国组织及盟友(OPEC+)即将开会，油价急挫同市场忧虑经济衰退有关？还是担心OPEC+减产力度细过预期？ 润淼资产管理董事卢志威指，现时OPEC+主要面对供求问题，依家环球经济好坏参半，所以需求较之前减少，OPEC+可能会因应情况而有动作，油价依家进入咗调整浪，亦系利好通胀慢慢回落嘅主要因素，油价之前一度非常波动，急挫后又升返上去，依家油价反覆向下，反而有利之后嘅升势。 卢志威 润淼资产管理董事 |
石油 , 美元 |
| 卢志威 |
2023-05-24T11:10 |
【Now财经台】美国债务上限谈判僵局仍未解决，共和党话只系有少许进展，国际货币基金组织(IMF)亦出声，指债务上限问题唔需要等到最后一刻先解决，港股噚日一度急泻逾300点，收市仍要跌200几点，港股今个星期焦点仍落喺科网股季绩，港股后市会点走？ 润淼资产管理董事卢志威估计，港股后市会平稳发展，虽然间中仍要跌，但基本上睇唔到有足以令港股大冧嘅大事件，依家港股同过去几年嘅A股一样，处于一个大型上落市嘅阶段。 佢又话，喺指数冇乜睇头下，建议投资者炒个股时，可以吼一啲有突围本钱嘅股份先买货，否则，佢建议部署整体仓位时都系倾向保守啲会较稳妥。 卢志威 润淼资产管理董事 |
港股 |
| 卢志威 |
2023-05-17T10:27 |
【Now财经台】股神巴菲特第一季持仓变动除咗出手买金融股，亦有继续加码日股，股神现时日本股票持仓已占组合超过7%，仲话未来可能增至9.9%。日本东证指数升至逾30年高位，日股前景如何？日本经济未见好好，如果股市表现与经济背驰，升势恐怕未能持续？ 润淼资产管理董事卢志威指，日股表现部分受惠于现时环球高息政策。日本低息有望再维持一段时间，同时，其他国家都已经加息，低息政策虽然对日圆而言无益，但对经济及股市有利。另一方面，股神可能认为地缘政治风险高，一旦台海发生冲突，将有利日本嘅商品及供应链。加上美股现时未见有特别值得投资嘅股票，所以投资日股都系一个好选择。 卢志威 润淼资产管理董事 |
美股 |
| 卢志威 |
2023-05-10T10:26 |
【Now财经台】美国通胀数据今晚出炉，市场预期，通胀将按年持平，但核心通胀按月会略为升温，通胀数据公布前夕，2年期债息反覆上返4厘，金价亦微升，不过，连日有联储局官员放风，话对6月唔加息持开放态度，并重申今年唔会减息，除非今晚出嘅通胀数据远超预期，否则，6月系咪好大机会唔会加息？ 润淼资产管理董事卢志威指，其实系，因为依家讲紧利率见顶，所以除咗睇经济数据，市场亦愈来愈重新聚焦银行业危机，第一共和银行(First Republic Bank)被接管后，其实向市场释出一个讯号，就系金融体系唔系单睇股市升跌，依家要考虑嘅因素好多，所以只要经济数据唔系大幅回升，相信市场嘅加息预期已经大幅降温。 William又话，如果再爆发银行危机或出事，都可以成为联储局减息嘅籍口，但现阶段都只系一个憧憬。 卢志威 润淼资产管理董事 |
黄金 |
| 卢志威 |
2023-05-03T11:17 |
【Now财经台】联储局公布议息结果前夕，市场忧虑再有地区银行爆煲，导致多只地区银行股暴跌，例如西太平洋银行及西方联合股价分别急泻28%及15%，而美股3大指数噚晚全线跌逾1%，其实市场都预咗联储局会加息0.25厘，点解投资者仍咁惊？ 润淼资产管理董事卢志威指，第一共和银行(First Republic Bank，FRC)等陆续爆煲，造成恐慌性存款转移，因此，市场仍忧虑有更多地区银行可能会爆煲，而呢个情况会祸及大银行，即使受惠于存款增加，但大银行佢都未必会做并购，导致金融股受压。 William又话，依家联储局最大问题系比唔到市场一个清晰嘅加息预期，即系几时停止加息，或系咪直接鼓励银行做并购应对加息，若短期内联储局政策冇实质转向，估计市况仍然会好波动。 卢志威 润淼资产管理董事 |
美股 |
| 卢志威 |
2023-04-26T12:05 |
【Now财经台】美股3大指数噚晚全线跌逾1%，主要系第一共和银行(First Republic Bank，FRC)首季存款流失幅度大过预期，加上市传FRC可能出售最多1000亿美元资产自救，或者寻求外部注资，拖累股价噚晚惨被“腰斩”，更拖冧埋欧洲嘅银行股，市场似乎重燃对美国银行业危机嘅忧虑，点评估未来嘅事态发展？ 润淼资产管理董事卢志威认为，美银行业高危时期已经过去，短期而言，主要系心理冲击及银行估值会再调整，多过相关事件会唔会再发酵，继而演变成下一个危机。 佢又话，股价下跌对银行影响唔大，最重要系存户仍有信心，虽然再传出坏消息，但整体而言，市场气氛仍未去到好差，投资者唔需要过度恐慌。 卢志威 润淼资产管理董事 |
美元 , 美股 , 新股IPO , 新股IPO |
| 卢志威 |
2023-04-19T11:15 |
【Now财经台】联储局官员发表鹰派讲话，支持继续加息，而美国银行CEO预计下半年美国经济会衰退，官员及市场看法系咪有落差？系咪冇衰退就可以继续加息？ 润淼资产管理董事卢志威指，依家出现两种观点，一派系纯睇数据，过去一至两年经济数据愈表现得好，联储局就会加息。自从几间银行相继爆煲之后，另一派会加入考虑银行体系本身嘅承受能力，因为加息明显影响债价，系令到银行爆煲嘅原凶。 佢又话，即使经济数据唔差，仍会出现金融危机，唔同资产、基金都有潜在风险。唔再出现经济好就加息嘅情况，有利于利息更快见顶。 卢志威 润淼资产管理董事 |
|
| 卢志威 |
2023-04-12T11:38 |
【Now财经台】美国消费物价指数(CPI)今晚出炉，据《彭博》估计，美国3月CPI按年将会由6%回落至5.1%，但核心CPI会升至5.6%。市场依家仲系睇实CPI走势，去评估联储局政策系“鹰”定“鸽”，然后再反映喺股市，到底美国3月CPI会唔会进一步降温？ 润淼资产管理董事卢志威指，睇返美国CPI嘅走势，相信系呈回落趋势，估计3月CPI同市场预期差唔多，唔会偏离太多，市场关注CPI数据其实唔系睇几时会减息，而系加息步伐几时开始放慢，甚至利率见顶，其实市场都估计美息好快见顶，只要CPI持续降温，相信就唔会出大问题。 William又话，美国之前爆发银行危机，虽然只系涉及中型银行，但都畀咗一个警示市场，市场对加息嘅承受能力唔系单睇就业、经济数据，联储局都会考虑银行体系风险，因此，如果夹埋嚟睇，估计加息周期已去到尾声。 卢志威 润淼资产管理董事 |
|
| 卢志威 |
2023-03-28T11:28 |
【Now财经台】康师傅(00322)噚日收市后交咗一份符合大行预期嘅业绩，去年收入按年增长6%，但全年少赚31%，期内，饮品及即食面业务毛利率，因为成本上升而收窄，食品股近排都似乎蠢蠢欲动想破前高位，呢类公司嘅业务复苏情况系咪值得睇好？ 润淼资产管理董事卢志威认为，食品股前景明朗，毛利率收窄主要受通胀成本压力影响，相信呢个情况未来可以纾缓，加上预期下半年销售改善，所以唔使太担心。 佢又话，食品股普遍都面对成本问题，康师傅毛利率问题仍可以接受，始终集团系一个较稳定嘅消费品牌，整体而言，可以睇好集团下半年嘅业务复苏情况。 |
食品 , 康师傅控股 |
| 卢志威 |
2023-03-22T11:39 |
【Now财经台】联储局会喺本港时间今晚凌晨公布议息结果，喺结果出炉前，市场风险胃纳有改善，有“恐慌指数”之称嘅VIX大跌，银行股就持续反弹，喺全球主要央行及金融监管机构连番出手下，市场信心似乎好转咗，今次银行业危机系咪已届尾声？ 润淼资产管理董事卢志威指，地区性银行嘅存款额占整个美国银行体系唔多，只要央行短时间内向呢啲中小银行提供流动性，相信爆煲风险唔大。欧洲方面，瑞信有瑞银出手打救，问题已暂时解决，虽然收购后额外一级资本债券(AT1)变晒废纸，一度令市场恐慌，但AT1持有人最终有机会得到赔偿，所以整体嚟讲唔会构成系统性风险。 William又话，只要联署局加息步伐唔好咁急，令资产价格回升，基本上可以化解银行业危机，而加息周期已去到中后阶段，所以解决时机已经好近。 卢志威 润淼资产管理董事 |
美债 , 港资流向 |
| 卢志威 |
2023-03-15T11:01 |
【Now财经台】华府及相关部门迅速“扑火”下，由矽谷银行(SVB)、Signature Bank倒闭引发嘅银行业动荡忧虑降温，而为咗遏制潜在嘅金融危机，据报联储局考虑向中型银行实施更严格规定，同样爆出流动性危机嘅第一共和银行(First Republic Bank)同时遭两大评级机构列入负面观察名单，穆迪亦将美国银行业评级展望降至负面，今次因有银行倒闭引发嘅信心危机，最坏情况过咗未？ 润淼资产管理董事卢志威指，SVB“死因”系输咗钱，加上融资做得唔好，引爆信心危机继而倒闭，但情况同雷曼唔同，其实短期流动性危机已经解决，由于有唔同方法可以处理到，例如由政府接管等，最后应该可以成功“拆弹”。 William又话，要留意一间银行冧咗之后可能引发嘅迁徙潮，钱会由地区银行搬去大银行，相信唔少大企业都会咁做，长远嚟讲，会令小型银行被边缘化，因此，即使市场气氛回稳后，地区银行嘅股价表现都唔会好。 卢志威 润淼资产管理董事 |
企业评级 |
| 卢志威 |
2023-03-08T11:06 |
【Now财经台】联储局主席鲍威尔出席国会听证会时指，利率见顶水平可能高过预期，未来或加快加息步伐，鲍威尔嘅鹰派言论打击股债金及油市，道指噚晚收市泻逾500点，美汇指数冲上3个月高位，美国2年期国债息冲穿5厘水平。芝加哥商业交易所嘅Fedwatch最新亦显示，联储局今个月加息0.5厘嘅机会增至近70%。润淼资产管理董事卢志威指，鲍威尔嘅鹰派程度出人意表，预期3月好大机会加息0.5厘，联邦基金利率要升至6厘先见顶。 不过，William认为，美股嘅承接力比想像中强，因为过往鲍威尔“放鹰”后，美股3大指数都会跌2%以上，但今次标指及纳指只系跌逾1%，可能系资金涌入美元令美元强势所致。 卢志威 润淼资产管理董事 |
美股 , 美元 , 美汇 |
| 卢志威 |
2023-03-01T11:28 |
【Now财经台】美国最新公布嘅经济数据转弱，市场预期，联储局加息峰值需再上调，而美股喺2月最后一个交易日向下，总结2月，3大指数都要跌，其中道指今年由升转跌，但纳指暂时仍有9%升幅。 美国银行研究预期，联储局或要加息至6厘才会“收手”，并估计美国经济将于第3季步入衰退。此外，美债市交易员亦估计，美息要7月至9月先见顶，并相信年内减息机会微。 润淼资产管理董事卢志威认同加息周期可能较预期长，但估计联储局只会向上微调，唔会好似去年由零大幅加至4厘以上，相信市场反应唔会太大。 踏入3月，William预期，加息仍然系美股主要利淡因素，但依家有更多微观因素影响大市，例如近日爆红嘅人工智能聊天机械人ChatGPT，佢认为唔可以单凭加息预期，就睇淡科技股板块及纳指后市。 卢志威 润淼资产管理董事 |
美股 , 美债 , 科技 , 长城天下 |
| 卢志威 |
2023-02-22T11:44 |
【Now财经台】美国2月综合PMI爆冷升至50.2，创8个月新高，令市场对加息嘅忧虑升温。美股噚晚假后复市，3大指数收市跌逾2%，联储局未来加息会唔会更进取？不过，美国两大零售商Walmart及Home Depot均对业务前景审慎，后者上季业绩更差过预期，即使经济数据强劲，但企业前景其实系咪都唔太乐观？ 润淼资产管理董事卢志威指，美国1月经济表现强劲，反映喺依家嘅利率水平下，通胀回落速度仍然较慢，联储局未来有机会加息至6厘，甚至更高水平，因此，市场都要调整息口见顶水平嘅预测，导致美股比较chok。 William又话，通胀高企令企业有压力系正常，始终消费者荷包紧咗，企业要跑出就需要有新增长潜力或动力，例如近期发展ChatGPT等人工智能(AI)技术嘅企业。 卢志威 润淼资产管理董事 |
美股 , 长城天下 |
