评论员 |
时间 |
内容 |
标签 |
黄伟豪 |
2024-04-29T17:28 |
近排内房不断传出嚟正面消息,最新有四川成都全面取消楼市限购令,今日(29日)内房股大爆发,个别民企内房升幅达60%,不过,摩根大通今日(29日)发嘅报告就有少少泼冷水之嫌,取消限购令可刺激内房销售1至3个月,但未来有机会再度转差,又认为唔足以扭转楼价跌势。摩通呢份报告中,有一半内房被睇淡,唯独叫增持中国海外发展(00688)及华润置地(01109),想买内房股系咪应该拣呢两只? 中薇证券研究部执行董事黄伟豪指,有央企背景嘅内房的确比较稳阵,民企内房就炒味较浓,其实市场嘅睇法一直都系咁,但呢一刻其实应该再谨慎少少,即使中海外及润地有央企背景,但沽空比率都超过30%,而销售同其他内房一样都要跌,加上市场担心板块炒高后,部分民企及小型内房会再趁高“抽水”,会令投资气氛打折扣,所以Ravi建议等内房回返少少,再吼较重磅嘅内房股。 |
|
黄伟豪 |
2024-04-23T11:54 |
银河娱乐(00027)股价连升第2日,内地“五一黄金周”将至,唔少投资者都趁机短炒银娱一些在5月至6月到价的短身产品,杠杆6倍至8倍,而较受欢迎长身产品在10月至12月到期,杠杆5倍至7倍。银娱股价徘徊低位,投资者部署好仓嘅时候,应该点拣比较好? 中薇证券研究部执行董事黄伟豪认为,拣银娱长身产品较合适,虽然大部分投资者认为炒短期某些事件,应该拣短身CALL值博一啲,但留意两款CALL嘅杠杆及价外幅度差唔多,最大分别在于时间值,但短身CALL时间值损耗较快,价外最少30%,炒“五一黄金周”热潮到价嘅机会较微,值博空间唔大。 Ravi又指,暂时银娱嘅股价未出现明显转势,距离10天线有约2元距离,对股价能唔能够大幅度弹上有保留。 |
|
黄伟豪 |
2024-04-16T11:05 |
港股暂时连跌第4个交易日,恒生指数今朝(16日)低开后,跌幅扩大,一度挫近300点。好仓继续有资金流入,今朝流入4500万元,5日合计有1亿元资金坐货,淡仓5日合计有约2200万元资金流出。此外,牛证重货区介乎16200至16300点,其中,16200点是最多人加仓位置,熊证重货区就喺17200点,最多人加仓系16800点。大市连日下跌,明显见到资金流较多部署好仓,今日系咪仍然维持呢个趋势? 中薇证券研究部执行董事黄伟豪认为,港股短期走势会较为反覆,过去几日投资者博好仓,因为当时见到大市借势回落,加上技术上仍未跌穿移动平均线,不过,今朝再跌就有少少破坏咗短期上升趋势,50天及100天线已失守,即16400点水平。 Ravi又话,如果想博好仓,例如牛证就要从收回价着手,宜拣距离现价远少少,以过夜为主至少要摆喺15500点水平。 |
|
黄伟豪 |
2024-04-09T12:51 |
内地昨日(8日)公布,4月批咗14款进口网络游戏版号,虽然网易(09999)嘅游戏冇份,但股价今日(9日)仍有得升,今朝成交活跃嘅CALL集中喺9月至12月到期,行使价170元至200元,杠杆做到4至6倍,距离收回价10%至30%嘅牛证,杠杆做到3至7倍,两者杠杆差唔多,想做睇好部署应该点拣? 中薇证券研究部执行董事黄伟豪指,网易股价近期走势比之前弱,所以建议拣牛证,避免出现缩窝情况,虽然网易股价或会慢慢回升,但始终动力唔大,所以拣CALL可能会缩窝。 Ravi又话,收回价同现价有一定距离,要留意150元系关键位置,只要网易股价唔跌穿呢个位,再下试空间唔大,如果守得住,博正股慢慢升返上160元水平。 |
|
黄伟豪 |
2024-03-26T12:45 |
中国石油股份(00857)昨日(25日)出咗业绩,去年多赚逾8%,派息0.23人仔,高盛指派息符合预期,而集团自由现金更创新高。超短身、1个月就到期嘅中石油CALL,行使价7.68元,价外17%,但杠杆做到15倍,博唔博得过? 中薇证券研究部执行董事黄伟豪指,短身CALL嘅时间值损耗快,唯一可以博短线价内有好大爆发力,覆盖时间值损耗嘅问题,加上呢只CALL价外幅度有一定比例,想博就要抱以小博大、可能会输嘅心态,小注去博,如果博到,回报会几吸引,值博率大。如果睇好中石油前景,建议投资者拣较长身,杠杆唔高嘅CALL会更值博。 |
|
黄伟豪 |
2024-03-19T12:26 |
太阳能股信义光能(00968)股价喺上公布业绩后展开升浪,由4元升至6.8元,累升70%,之前略为调整后,股价今早(19日)向上。信光CALL都有好多选择,其中,行使价6.98元,轻微价外,4月底到期,时间值唔多,不过,一旦升穿近期顶位,就会系最快到价嘅CALL,投资者应该短炒,还是拣返9个月后先到期嘅价外CALL? 中薇证券研究部执行董事黄伟豪指,信光暂时只适宜短炒,因为过去大半个月股价升得几急,亦累积唔少升幅,即使投资者睇好后市,但始终短时间内升得咁急,都较难预测后市走势,因此,不如博信光嘅短期爆发性。 Ravi又提醒,呢类CALL较短身要留意注码,唔适宜太进取,股价方面,只要守得住250天线,即6.37元水平,令CALL变返价内嘅机会较大。 |
|
黄伟豪 |
2024-03-12T10:58 |
虽然港股暂时连升第3日,但恒生指数喺100天线有明显阻力,淡友摆位时系咪都可以参考呢个位?5日合计,好淡仓都有资金坐货,系咪反映市场对后市睇法有分歧? 中薇证券研究部执行董事黄伟豪指,市场对港股嘅睇法都系五十五十,虽然近日大市个势系强返啲,但如果睇返长期趋势都系偏弱,所以投资者唔会过分乐观,认为个市会大升。资金部署方面,佢指出,好淡两边都有资金做部署。 |
|
黄伟豪 |
2024-03-05T12:39 |
中国联通(00762)发盈喜,预期全年多赚12%,股价今日(5日)逆市炒上,价外CALL行使价大部分约7.2元,较短身约60日到期嘅CALL,杠杆做到9倍,长身少少约90日到期嘅CALL,杠杆只得7倍,边类CALL较值博? 中薇证券研究部执行董事黄伟豪建议拣长身CALL,虽然联通发咗盈喜,但其实股价今日唔算升得靓,呢类股份即使走强,睇返过往表现,都只系呈反覆缓慢上升格局,因此,拣可以揸耐少少嘅衍生工具会比较明智。 Ravi表示,较长身嘅CALL,杠杆有7倍都算吸引,由于“中特估”概念今年仍然流行,对联通呢类股份都有正面支持,但要留意联通股价依家喺6元水平有阻力,要升穿6元先有进一步上望空间。 |
中国联通 |
黄伟豪 |
2024-02-20T12:17 |
获俄罗斯总统普京批准出售俄罗斯业务嘅汇丰控股(00005),明日(21日)会出业绩,股价今日(20日)曾冲上1个月高位,报62.85元,如果想做绩前部署可以用咩产品? 中薇证券研究部执行董事黄伟豪指,如果做短线业绩前部署,用牛证会比较好,因为绩前啲CALL会比较高,就算业绩表现正面,虽然股价会升,但亦有“缩窝”风险,所以依家拣CALL唔算特别值博。 Ravi又话,牛证嘅条款唔错,杠杆有逾10倍,收回价约58元,同现价有一定距离,加上市场对汇控业绩嘅预期普遍正面,所以建议拣牛证做部署。 |
汇丰控股 , 汇控 , 新股IPO , 新股IPO |
黄伟豪 |
2024-02-06T12:46 |
市场关注内地农历新年前,会唔会再有刺激经济政策出台,港股市况牛皮,部署熊证会唔会系较好嘅选择?摆位方面,如果用前高位,即16100至16200点作为收回价合唔合适? 中薇证券研究部执行董事黄伟豪指,港股仍未有大升条件,加上农历新年前内地未必会推出刺激经济措施,由于仲有几日就过年,相信港股大升机会唔大,因此,投资者可以考虑开淡仓做短期部署,但收回价摆16100至16200点会有少少风险,因为只得300至400点收回距离系太贴价。 Ravi建议投资者参考50天线以上,即时收回风险较低嘅16500点,作为熊证收回价。 |
港股 |
黄伟豪 |
2024-01-30T12:33 |
【Now财经台】恒生指数今朝(30日)低开逾百点,开市即失守16000关。轮证资金流方面,昨日(29日)好友资金转为流入,流入约630万元,5日合计有2.17亿元离场。淡友资金亦转为流入,昨日流入3300万元,5日合计有2.28亿元坐货。牛证重货区连续3日处于15300点,最多人加仓系系15800点,熊证重货区继续喺16500点,最多人加仓系16400点。大市再失守16000关,呢个位置短期系咪有较大阻力?贴价牛证已被收回,重货区会唔会太贴? 中薇证券研究部执行董事黄伟豪指,恒指16000点水平短期应该会有阻力,近期自低位回升近1400点,其实都唔算少,加上近期推升大市嘅诱因少咗,相信会借势整固,但要留意农历新年长假前仲有政策憧憬,或会带动大市反弹。 产品部署方面,依家牛证重货区喺15300点,如果做即市部署问题唔大,但要过夜或摆耐少少就有保留,一旦大市发力抽高几百点,牛证有可能全军覆没,如果想过夜,可以考虑收回价15000点以下嘅条款,若大市反弹,16500点会系下一个挑战目标。 黄伟豪 中薇证券研究部董事 |
恒生银行 , 资金流向 , 港股 |
黄伟豪 |
2024-01-16T12:38 |
【Now财经台】理想汽车(02015)昨日(15日)宣布几个系列大幅减价,股价今日(16日)再向下破位,临近中午曾见逾半年低位117.4元,半日跌2%。 理想股价连跌3日,但仍未有见底迹象,淡仓系5日计资金流入第4大个股,有669万元资金坐货。 热门PUT轮约26%价外,2024年5月底末至6月到期,杠杆有3倍。中薇证券研究部执行董事黄伟豪认为,呢只PUT唔算短身,毋须担心时间值损耗,但价外幅度较大,未必咁容易变价内。 Ravi续指,正股股价累跌幅度颇大,如果后市向上突破250天线,即126元水平,建议淡友先行止蚀。反之,下一步目标价可以放喺115元楼下,之后约109元。 |
资金流向 , 企业评级 |
黄伟豪 |
2024-01-09T12:13 |
【Now财经台】联想集团(00992)股价今日(9日)一度升7%,高见10.88元,系今朝最强势蓝筹,联想股价之前强势,但上周开始回套,一度失守10元关口,但今日显着反弹,差少少就收复所有失地,想部署联想CALL轮或PUT轮有咩要留意? 中薇证券研究部执行董事黄伟豪指,联想因为具生成式人工智能(Generative AI)功能电脑概念,股价一直好正面,单睇股价走势,联想甚至比汇丰控股(00005)更强,多头排列兼均线持续扩阔,有机会再试高位,所以资金以部署CALL轮为主,但佢提醒,联想今日升得比较急,建议等股价回落至10.6元楼下先做部署。 |
汇丰控股 , 联想集团 , 汇控 |
黄伟豪 |
2024-01-02T11:59 |
【Now财经台】港股今日(2日)喺2024年首个交易日高开,但冇耐已经转跌,并插穿17000点。轮证资金流方面,好友资金上周五(12月29日)转为流入逾3400万元,5日合计有逾4300万元离场,淡友资金就转为流出逾1300万元,5日合计有约1.2亿元资金坐紧货。牛证重货区上移至16600点,系最多人加仓嘅位置,熊证重货区就继续喺17100点,最多人加仓嘅位置系18300点。今朝贴价牛熊证都比较受欢迎,喺依家嘅市况下会唔会太进取? 中薇证券研究部执行董事黄伟豪认为系比较进取,今日高位系17100点水平,牛证重货区喺16600点,即20天线水平,两者只相差约500点,除非玩即日鲜,否则,过夜就略嫌太进取。 佢又话,大市今日高低位波幅近400点,如果拣得太贴有收回风险,港股短线方向仍然唔太明显,投资者都认为趋势系向下,但短期趋势都系一个反覆格局,如果向上突破唔到17100点,即50天线水平,向下又未跌穿20天线,亦就好难呈单边向下趋势,拣得太贴会有收回风险,可以考虑摆远啲,睇好可以考虑16000点楼下,即2023年尾低位,睇淡可以考虑17500点以上,即100天线以上,会比较安全。 |
港资流向 , 港股 , 资金流向 |
黄伟豪 |
2023-12-19T11:50 |
【Now财经台】比亚迪股份(01211)今日跌幅显着,失守200元,再刷新逾8个月低位,近期已明显弱势,今日再加大跌势,好仓较受欢迎,热门CALL有6月到期,价外25%,睇$250,杠杆6倍,喺呢轮跌浪前的水平,呢款CALL条款值搏?到价机会大唔大? 中薇证券研究部执行董事黄伟豪指,呢个条款可考虑博中线反弹,因为6月先到期,唔太短身,唔担心时间值损耗得非常快,但小心距离价外有啲远,短线番到250元楼上都唔太易。 Ravi又话,以比亚迪近期股价都系向下,似乎都仲寻紧底,所以现阶段未企番定,贸然去博要留意,重要关口喺3月中大概190元低位,如果跌唔穿先上望220元。 |
比亚迪股份 |
黄伟豪 |
2023-12-05T11:22 |
【Now财经台】药明生物(02269)昨日(4日)开业务会议,股价急泻后突然中途停牌,集团强调,业务营运维持强劲势头,目标今年整体收入实现约10%增长。股份今早(5日)复牌,低开约5%后,跌幅不断扩大,唔少投资者都开好仓博反弹,热门CALL轮价外90%,7月到期,杠杆5倍,呢啲条款系咪合适? 中薇证券研究部执行董事黄伟豪认为,如果药明生物大幅反弹,价外条款回报当然吸引,但大幅反弹机会都比较细,因为呢两日跌落嚟嘅主因系基于公司营运状况,相信盈利预测及估值都会被下调,除大行普遍下调目标价,睇返估值下调情况,相信股价仲未跌够,不过,由于呢两日跌得比较急,所以有机会出现轻微技术反弹,因为9天RSI已跌到11、12水平,属于极度超卖。 |
生物 , 企业评级 , 药明生物 |
黄伟豪 |
2023-11-28T12:40 |
【Now财经台】阿里巴巴(09988)股价早前急挫近10%后,已收复部分失地,但股价呢两日反覆向下,喺74元至75元水平徘徊,市场较热门嘅CALL轮都较长身,行使价83元,价外10%,明年8月到期,杠杆4至5倍,系今次大跌之前嘅价位,想上返呢啲位难度大唔大?行使价可唔可以摆高少少至90元,博高啲杠杆? 中薇证券研究部执行董事黄伟豪表示,拣较长身嘅CALL唔使担心时间值损耗问题,阿里公布业绩时宣布暂缓分拆进程暂缓,拖累股价显着下跌,仲有一个较大裂口,即使呢几日反弹,都只系修补到一半,反映投资者态度偏向谨慎。若拣长身CALL就要畀多啲耐性,短线仍有反弹空间,预期股价喺73元至77元上落。 |
阿里巴巴 , 科技 |
黄伟豪 |
2023-11-14T11:55 |
【Now财经台】中国平安(02318)股价噚日跌至年内低位36.6元,今朝持续向好,好仓最少连续6日有资金流入,5日合计有3000万元坐紧货,系资金流入最多个股,虽然平保股价持续弱势一段时间,但今朝有唔错反弹,想做部署应该点摆位? 中薇证券研究部执行董事黄伟豪指,短线博反弹比较好,虽然平保股价有反弹,但日前创新低之余,股价今年亦不断跌紧落嚟,而宏观因素亦较利淡平保,所以估值一直被下调,虽然呢两日弹高,但整体形态其实冇变。 Ravi又话,平保今日反弹,但10天线仲未升穿,因此,如果想部署好仓,最少要等股价收复10天线,再上望40元水平,暂时都系做短线即市操作比较好。 |
中国平安 , 资金流向 |
黄伟豪 |
2023-11-07T11:05 |
【Now财经台】港股昨日(6日)显着造好,恒生指数升逾300点,但今朝出现回套。好仓连续3日有资金流出,噚日流出逾5600万元,但淡仓连续4日有资金流入,噚日流入逾8500万元。此外,牛证重货区上移至17200点,亦系最多人加仓嘅位置,熊证重货区就上移至18300点,最多人加仓系18500点。依家最贴价牛证同现价距离逾500点,系咪一个安全水平?熊证摆位参考资金密集区,即18300至18500点,系咪合适? 中薇证券研究部执行董事黄伟豪指,港股过去几日升咗约1000点,系升得比较急,所以今日出现调整都系正常,佢认为港股年底前仍有条件试高少少,牛证摆位距离现价约500点系冇问题,但就要睇紧啲,始终大市近期都比较波动,但熊证收回价摆18500点,除非做即市部署,否则,会有一定风险。 黄伟豪 中薇证券研究部董事 |
|
黄伟豪 |
2023-10-31T11:28 |
【Now财经台】快手(01024)今朝走势反覆,一度失守50元关口,资金流方面,快手好仓连续5日都有加仓,合共有1187万元资金坐紧货,系个股中最多,今朝成交活跃嘅CALL轮都较长身,条款亦偏保守,明年4至10月先到期,依家系咪较适合做保守部署? 中薇证券研究部执行董事黄伟豪认为,考虑到依家市况比较反覆,做保守部署的确较合理,市场上较多长身好仓,因为暂时唔需要考虑时间值损耗问题,除非大市或快手会出现强劲反弹,否则,如果拣短身CALL,时间值损耗会比较快,风险会较大。快手股价已重返4月、5月低位,出现技术反弹都唔出奇。 佢又话,拣长身CALL轮博反弹会比较好,止蚀价可以摆47.5元,即4月低位。 |
资金流向 |
黄伟豪 |
2023-10-24T11:48 |
【Now财经台】腾讯控股(00700)股价暂时连跌第4个交易日,好仓连续5日录得净流入,5日合计有4500万元资金坐紧货,系个股中最多,今朝成交活跃嘅PUT轮都系较短身,11月至明年2月到期,杠杆7至11倍,熊证方面,距离收回价7%至15%,杠杆5至12倍,到底拣熊证还是PUT轮较好? 中薇证券研究部执行董事黄伟豪指,熊证值博率较高,因为腾讯本身系重磅股,大市向下会利淡腾讯,如果要做淡腾讯,建议等股价弹返高少少先开仓比较好。 Ravi建议,拣熊证短线考虑因素较少,因为短身PUT时间值损耗相对高,反观熊证唔使特别考虑呢样嘢。佢又话,暂时先博腾讯股价弹上300元水平,如果升唔穿,再考虑博淡仓。 |
腾讯控股 , 资金流向 , 科技 |
黄伟豪 |
2023-10-17T12:22 |
【Now财经台】京东集团(09618)股价连跌两日后,今日出现反弹,京东股价自8月以嚟不断破底,系资金流入最多嘅个股,好仓连续两日有资金流入,5日合计,有近1700万元坐货,依家系咪入场博反弹嘅好时机? 中薇证券研究部执行董事黄伟豪指,短线可博反弹,但注码唔好咁大,始终京东基本面比较差,最近都被几家大行唱淡,因集团中期业绩嘅收入几乎冇增长。不过,从技术面睇,京东反弹唔出奇,虽然股价8月以嚟不断创新低,但RSI有轻微底背驰。 Ravi又话,从走势上睇,博反弹嘅话,近期低位105.1元系关键止蚀位,暂时反弹目标睇120元。 |
资金流向 |
黄伟豪 |
2023-10-10T12:03 |
【Now财经台】港股今朝继续升,升市功臣之一嘅美团(03690),股价暂时已连升第3日,并收复10天线,美团股价9月以来持续下跌,跌至年半低位105.5元后,近几日有反弹,美团股价系咪已初步见底?热门牛证及CALL轮嘅杠杆都系5倍,应该点拣好? 中薇证券研究部执行董事黄伟豪指,大市连日反弹,美团呢类重磅股弹多少少都唔出奇,如果短线博美团好仓,拣CALL轮会好少少,始终股价之前跌咗咁多,博股价夹高少少,可能会扯高CALL轮,整体吸引力会较大。 Ravi又话,要等股价升穿20天线,即116元以上水平,再上望125元水平,作为做部署嘅目标水平。 |
港股 |
黄伟豪 |
2023-10-03T11:04 |
【Now财经台】港股喺10月首个交易日急挫,恒生指数一度泻逾550点,今朝牛熊证街货比例方面,牛证44%对熊证56%,牛证重货区继续喺17300至17200点,最多人加仓系17400点,熊证重货区就上移到18100点,最多人加仓系18500点,大市再创今年新低,系时候捞底未?市况未有好转,今朝啲贴价牛证都被收回,依家系咪适宜保守啲? 中薇证券研究部执行董事黄伟豪指,喺呢个市况下,揸正股嘅投资者一定要以保守为主,如果轮场方面,就要睇投资者系咪比较贴市及转身比较快,大市上周五(9月29日)突然夹高,之前部署咗好仓,上周五都食糊离场,或者转为部署淡仓,今朝又可以食埋呢浸,因此,暂时都系做较快及较短嘅操作为主。 Ravi又话,如果真系要博好仓,要过夜或摆耐少少,偏离17000点多少少会比较好,若摆得太贴,收回风险会比较大。 黄伟豪 中薇证券研究部董事 |
港股 , 恒生银行 |
黄伟豪 |
2023-09-26T12:30 |
【Now财经台】腾讯控股(00700)股价暂时连跌第2日,今朝一度低见300.8元,资金连续第5日流入好仓,5日合计,有3700万元资金坐货,系个股中最多,今朝成交活跃嘅CALL轮都较短身,但市况未见好转,好友系咪唔好拣得太贴? 中薇证券研究部执行董事黄伟豪认为,如果选择短身产品,就要考虑股价短期内有没有机会上试返行使价,令产品变返价内,而关键系要控制注码。佢又话,腾讯走势同大市差唔多,当大市跌至年内低位,腾讯就会慢慢去到300元水平,唔排除会出现技术反弹,若大市反弹,唔排除腾讯会再夹高小小,阻力位喺320元水平。 Ravi又话,如果想博CALL轮唔系唔可以,但建议尽量拣长身小小,同埋要控制注码。 |
腾讯控股 , 资金流向 , 科技 |
黄伟豪 |
2023-09-19T11:21 |
【Now财经台】腾讯控股(00700)大股东Prosus及其母公司Naspers行政总裁请辞,腾讯股价暂时已连跌6日,今朝一度退守上个低位,即306元水平。不过,资金连续4日流入好仓,5日合共有2300万元坐货,系资金流入第2大个股,但亦系资金流出最多嘅个股,5日合计,淡仓有790万元资金离场,投资者似乎都系以睇好为主? 中薇证券研究部执行董事黄伟豪指,单睇好淡仓资金流,投资者仍倾向部署腾讯好仓,但以额度计,规模就相对较小,反映市况比较淡静,亦意味腾讯走势暂时仍然反覆。如果睇返正股走势,虽然股价逼近5月底低位,即306元,但对比其他科技股,腾讯仍然较硬净。 Ravi续指,想博腾讯好仓仍有得谂,始终股价比较硬净,但要留意,一旦股价跌穿306元,可能要考虑先行离场。 |
科技 , 腾讯控股 , 资金流向 |
黄伟豪 |
2023-09-05T12:13 |
【Now财经台】腾讯控股(00700)上月中公布业绩后,股价有轻微回落趋势,两周前一度见314元水平,不过,之后逐步回勇,上返330元水平,短线有冇力上试较高水平,例如334元嘅50天线、337元嘅100天线,系咪适合做好仓部署? 中薇证券研究部执行董事黄伟豪指,腾讯正股股价过去4个月维持横行格局,喺315元至360元上落,Ravi又话,现价属于中等水平,如果想博升穿移动平均线,不妨等回落至325元楼下再开好仓,而止蚀位就定喺区间底部。 |
腾讯控股 , 科技 |
黄伟豪 |
2023-08-29T12:05 |
【Now财经台】比亚迪股份(01211)中期多赚2倍至逾109亿人仔,但唔派中期息,股价今朝一度逼近240元,但仍然系近期相对低位。今朝成交活跃嘅比亚迪牛证,距离收回价10%以内,杠杆做到9倍,而12月到期嘅热门CALL,就做到7至9倍杠杆,应该点拣好? 中薇证券研究部执行董事黄伟豪指,比亚迪短期可以做返好仓部署,虽然比亚迪近日借业绩炒高咗,但其实集团盈利未必可以大升,因为毛利率低过预期,估值亦唔系平,可以博好仓,但未必一下子会大升。Ravi又话,CALL嘅值博率会较大。 |
比亚迪股份 , 公司业绩 |
黄伟豪 |
2023-08-22T13:43 |
【Now财经台】表现较差的药明生物(02269)四连跌,暂于所有移动平均线下,股价今年持续下挫,今日股价贴近年内35.45元低位,博反弹的话,热门CALL有较长身,明年3月至12月到期,一款价外22%,3倍杠杆,另一款价外2%,2倍杠杆。 中薇证券研究部执行董事黄伟豪指,第一款值博性比较大,虽然价外幅度大,但起码杠杆都多少少,博中长期有较明显反弹。 Ravi又话,药明短线难调头向上,因为内地医药行业有整顿因素,影响整个板块投资气氛,加上股价持续低迷,所以中线博好仓会好啲,如果冇延伸跌浪,中线上望44元水平。 |
生物 , 药明生物 |
黄伟豪 |
2023-08-15T11:58 |
【Now财经台】港股噚日再失守19000点,今朝低开过百点,内地“三头马车”经济数据出炉后,大市跌幅一度扩大至逾200点,低见18559点。恒指牛证重货区喺18500点,淡友就比较进取,熊证重货区喺贴价嘅19500点。 中薇证券研究部执行董事黄伟豪指,虽然由上月底高位约20300点计,恒指已调整咗唔少,按道理短期有机会出现技术反弹。 不过,佢认为,内地经济数据差过预期,加上人仔持续贬值都利淡港股,技术上相对强弱指数(RSI)亦先向下突破,反映大市仍有下跌空间,估计恒指有机会下试18000点水平。 Ravi提醒,淡友唔好拣太贴价嘅熊证,好友博反弹可以拣收回价18000点或以下嘅牛证,减低收回风险。 黄伟豪 中薇证券研究部董事 |
港股 |
黄伟豪 |
2023-08-08T12:45 |
【Now财经台】阿里巴巴(09988)股价近日受制于100元水平,今朝一度跌逾2%,集团将于周四(10日)派季度成绩表,依家适唔适合做部署? 中薇证券研究部执行董事黄伟豪认为,近几季市场对科网股业绩预期都偏淡,不过,即使阿里收入增长麻麻,但成本控制做得唔错,佢估计,阿里今份业绩同对上几季一样,都会好过市场预期。 Ravi续指,虽然市场对科网股前景偏乐观,但预期阿里股价后市唔会系大升格局,佢认为,好友可以用短线策略做业绩前部署,因为阿里股价近期走势唔错,一直沿20天线向上。 不过,Ravi提醒,通常业绩前CALL轮引伸波幅会扯高唔少,即使业绩好过预期,仍有缩窝风险。 |
阿里巴巴 , 科技 |
黄伟豪 |
2023-08-01T12:18 |
【Now财经台】快手(01024)今朝开市前发盈喜,预告中期转赚最少5.6亿人仔,刺激股价今朝显着造好,一度高见72.5元,升近8%,之后升幅收窄,快手有冇力进一步反弹,上试更高水平? 中薇证券研究部执行董事黄伟豪指,快手短期走势呈明显上升格局,加上公司发盈喜,对本身未有盈利嘅新经济股嚟讲系有好大憧憬,呢类平台股一般前期都不断蚀钱,但只要有钱赚,股价就升得好急,佢估计,快手仲有少少上望空间。 Ravi又话,7月初一度低见50元水平,近日逼近70元,如果依家先做部署,建议止蚀位摆喺68元,因为呢个位有较大支持位,如果短线即市跌穿咗68元,上升轨略为破坏咗,不妨考虑先止蚀离场。 |
|
黄伟豪 |
2023-07-18T10:51 |
【Now财经台】港股连升5日后,今朝显着回套,而牛熊证街货比例就偏向熊证,摆位方面,较多投资者拣20500点,会唔会太过保守?系咪可以进取啲? 中薇证券研究部执行董事黄伟豪指,港股过去个几星期都弹得比较急,差不多升咗过千点,所以喺高位部署淡仓都系正常,其实港股仍然系一个区间上落格局,弹下又跌下,未见出现突破,因此,做熊证部署都系比较合适。 佢又话,虽然大市系上落格局,但唔排除夹高时会比较急,恒指近月高位喺20155点,所以摆20500点系合理,但港股今朝咁杀落去,投资者转为较进取亦唔出奇,佢估计,若恒指再失守19000点,有机会落返依家嘅牛证重货区,即18500点水平。 黄伟豪 中薇证券研究部董事 |
港股 |
黄伟豪 |
2023-07-04T14:32 |
【Now财经台】中国联通(00762)股价由5月高位约6元一路跌落近期低位4.86元,近日有回升迹象,目前已连升第3日,如果想博反弹追好仓,成交活跃嘅长身CALL轮,行使价5.96元,5倍杠杆系咪值博? 中薇证券研究部执行董事黄伟豪认为,呢批长身CALL值博,唔使担心时间值损耗较快,加上正股跌得多过另外两只中资电讯股,加上已经收复短平均线,有条件借势反弹。 Ravi续指,若股价突破埋5.8元水平嘅大阻力,亦系50天及100天线水平,虽然未到行使价,但回报会几吸引。 黄伟豪 |
中国联通 |
黄伟豪 |
2023-06-27T12:35 |
【Now财经台】阿里巴巴(09988)接连传出分拆上市消息,最新系旗下菜鸟网络及盒马鲜生,最快第3季递上市申请,今朝较受欢迎嘅阿里CALL都系年底到期,价外近20%至30%,行使价约99元,杠杆5倍至6倍,呢类CALL值唔值博? 中薇证券研究部执行董事黄伟豪指,可以考虑中长线持有呢类CALL,因为较长身,时间值损耗唔会咁快,同埋博阿里分拆对股价有刺激作用,但佢提醒,如果去到第3季中后段都睇唔到阿里股价升,就要考虑离场。 Ravi又话,其实唔太睇好阿里分拆,因为分拆后股份会细只咗,以往美国科企因为愈做愈大,先有资金追捧,担心阿里长线吸引力会下降,但短期而言,仍唔排除分拆会对股价有正面推动作用。 |
阿里巴巴 , 新股IPO , 科技 , 新股IPO |
黄伟豪 |
2023-06-20T11:11 |
【Now财经台】银河娱乐(00027)今朝一度升2.6%,系表现较好嘅蓝筹一,银娱股价今年一直喺50元至56元上落,依家股价喺呢个区间嘅中游位置,揸住好仓嘅投资者系咪应该考虑食糊?还是等埋暑期旺季,博酒店入住情况及赌收都理想? 中薇证券研究部执行董事黄伟豪指,对银娱睇法暂时都偏向正面,除咗暑假旺季因素外,通关后,过去半年赌收系有改善,虽然增幅系以倍数计,但其实金额只系相等于疫前60%至70%,反映去澳门已经唔再只系赌博,所以暑假期间可能会炒作呢个因素,而银娱非博彩设施都相对多,所以可以睇得正面啲。 佢又话,银娱股价仍有一定动力,因此,只要股价可继续企喺10天线楼上,揸住好仓嘅投资者不妨再等一等。 |
银河娱乐 |
黄伟豪 |
2023-06-13T12:41 |
【Now财经台】中国海洋石油(00883)股价连跌第2日,市场依家都睇淡油价后市,如果想开淡仓,系咪唔建议拣短身PUT?8至9月到期嘅PUT,杠杆8倍至13倍,但成交活跃嘅熊证,杠杆只得2倍至4倍,似乎冇乜肉食? 中薇证券研究部执行董事黄伟豪指,如果做短线操作,可以考虑博油股再向下,因为油价仍处于弱势,估计仍有几美元下跌空间,利淡中海油股价。 Ravi又话,过去拣中海油可能系想收息或炒“中特估”概念,但依家“中特估”气氛弱咗,加上中海油几个星期前已除净,要到9月再到中期息除净,所以呢段时间股价可能有下跌空间,短线可以睇10.8元水平。 |
石油 , 中国海洋石油 , 美元 |
黄伟豪 |
2023-06-06T12:41 |
【Now财经台】中芯国际(00981)噚日一举收复10天、20天、50天线,今日平开后,一直企喺50天线楼上,好仓已最少连续5日录得净流入,5日合共有逾680万元资金坐紧货,中芯股价噚日急升6%,系咪应先行食糊离场?想继续追好仓可以点摆位? 中薇证券研究部执行董事黄伟豪指,本身揸住好仓喺手,又有一定利润嘅投资者,可考虑先换一换马,虽然中芯唔可以同外国嘅芯片公司比较,但仍有追落后本钱,如果短线可企稳20元水平,预期股价反覆向上,因此,有好仓喺手嘅投资者,可考虑攞部分利润换马较远价嘅CALL轮。 |
中芯国际 , 资金流向 |
黄伟豪 |
2023-05-23T12:11 |
【Now财经台】快手(01024)首季亏损收窄,较预期好,更计划回购最多40亿元股份,股价今早高开3%,一度升逾6%,市场似乎都收货,快手向上空间仲有几大?股份升咗咁多上嚟,系咪已经冇咁值博? 中薇证券研究部执行董事黄伟豪指,怏手已经升咗“两棍”,依家值博率一定唔算非常高,但业绩后先入手风险较低。快手对上两年都要亏损,今次成功扭亏,对估值带嚟正面刺激,所以股价最近弹返系正常。快手股价迫近约100天、250天平均线位置,大约60元会见阻力,短线可部署60元作目标价。 |
公司业绩 , 企业评级 |
黄伟豪 |
2023-05-16T11:58 |
【Now财经台】百度集团(09888)稍后出业绩,目前百度热门牛证距离收回价约15%,做到5至6倍杠杆,热门CALL价外约20%,同样是5至6倍杠杆,今年8至10月到期,到底点拣好? 中薇证券研究部执行董事黄伟豪指出,如果睇好百度再上,牛证同CALL轮分别唔大,但考虑埋百度今日出业绩,好多时业绩前后引伸波幅都有比较大改变,Ravi建议博牛证会好啲,即使业绩不太理想,短线都不至于有好大下调风险。 |
|
黄伟豪 |
2023-05-09T11:31 |
【Now财经台】腾讯控股(00700)股价继续喺334元水平徘徊,资金连续5日净流入,合共有逾4000万元坐紧货,腾讯股价近日同大市一样淡静,热门CALL轮大部分系价外约20%,杠杆8倍至11倍,股份近期冇乜利好消息,以上摆位会唔会太进取?值唔值得吸纳? 中薇证券研究部执行董事黄伟豪指,最主要睇CALL轮嘅年期,如果系较长身嘅CALL都值得部署,虽然腾讯股价近期冇乜动静,资金亦唔热衷买科技股,但较长身嘅CALL有一定杠杆,加上价外幅度达一定程度时,当资金追返落去时,存在一定上升空间,因此,部署CALL轮要留意年期够唔够长,太短身可能会蚀时间值,加上正股依家喺中长期均线以下,升势唔明显,所有短身CALL都冇优势。 |
科技 , 腾讯控股 , 资金流向 |
黄伟豪 |
2023-05-02T11:48 |
【Now财经台】汇丰控股(00005)今日中午会派首季成绩表,市场预期,汇控业绩造好,如果依家先做业绩部署会唔会太迟?拣短身CALL可唔可取? 中薇证券研究部执行董事黄伟豪指,博业绩做短线部署有得谂,估计汇控呢份季绩及股价走势都唔差,股价依家仍处于反覆上升格局,睇基本面预期及技术走势,有条件再试高啲,投资者可以考虑拣短身CALL,但要控制注码,唔好太重手,因为股价可能喺出完业绩后缩。 |
汇丰控股 , 汇控 |
黄伟豪 |
2023-04-25T12:10 |
【Now财经台】中国海洋石油(00883)周四(27日)公布今年首季业绩,公司股价近期强势,依家好仓仲值唔值搏? 中薇证券研究部执行董事黄伟豪认为,好友买牛证会较买Call化算,因为买中海油Call有缩窝风险。 Ravi建议投资者拣收回价较远嘅牛证,避免股价升势突然逆转带来嘅风险,可以留意收回价约10元,杠杆5至6倍嘅产品。 |
中国海洋石油 , 石油 |
黄伟豪 |
2023-04-18T12:03 |
【Now财经台】安踏体育(02020)先旧后新折让8.8%配股,安踏股价失守100天线,亦曾失守“红底股”行列,股价短线会继续受压定有反弹?建议部署淡仓吗? 中薇证券研究部执行董事黄伟豪建议,投资者保持观望态度,部署上唔建议太进取,因为配股造成摊薄效应,加上集资所得部分用于还债,市场感觉不太正面,股价跌系好合理。 不过,佢唔建议追淡或单向部署,因为喺轮证上安踏选择唔多,但唔排除有炒作投资者博跌幅收窄。 |
安踏体育 , 新股IPO |
黄伟豪 |
2023-03-21T12:14 |
【Now财经台】收购美国矽谷银行(SVB)英国业务嘅汇丰控股(00005),股价由SVB出事前约59元,跌至噚日低位49.7元,过去5日系较多资金流出淡仓个股之一,汇控仍未失守100天线,1月初3个上升裂口中,噚日已经补咗1个,如果补晒就会落返去年12月横行区,即46水平元嘅机会有几大? 中薇证券研究部执行董事黄伟豪指,汇控股价暂时未去到咁低,虽然近期走势麻麻,因为欧美银行业出事,始终都会左右汇控股价,短短两星期已跌咗8元,跌幅都唔小,因此,有部分造淡仓投资者选择食糊离场都唔出奇。 Ravi又话,由于市场对美国议息结果只都系估估下,因此,好难估计汇控股价走向,资金选择先离场再观望都系正常嘅。佢认为,汇控再大跌空间唔大,所以落到40元水平机会唔大。 |
汇丰控股 , 汇控 , 港银 , 资金流向 |
黄伟豪 |
2023-03-14T11:52 |
【Now财经台】汇丰控股(00005)噚日宣布以1英镑收购矽谷银行(SVB)英国业务,今朝系拖低大市元凶之一,1月以嚟仲有几个上升裂口未补返,汇控淡仓博唔博得过?如果想进取啲,收回价约60元嘅熊证有冇得谂? 中薇证券研究部执行董事黄伟豪指,联储局减息机会唔大,局方亦唔会因个别银行爆煲、倒闭,改变利率政策方向,仍然系视乎通胀走向,依家炒减息或放慢加息步伐,都系投资者个人判断,因而影响银行股气氛。 Ravi又话,汇控用1英镑收购返SVB英国业务,表面睇似乎好着数,但关键系当中嘅注资、债务等带嚟嘅影响,加上欧美业务做得唔好,睇返基本因素,汇控暂时都系比较利淡,如果想部署淡仓都可以,但要留意股价有冇机会弹上54元楼上,如果升穿50天线,即55元水平,要考虑先行止蚀。 |
汇丰控股 , 汇控 , 港银 , 美债 , 英镑 |
黄伟豪 |
2023-03-07T11:08 |
【Now财经台】赌股近期表现唔错,其中,银河娱乐(00027)股价今朝都有得升,一度升穿55元关口。澳门2月赌收增长逾30%,银娱同金沙中国(01928)股价一直喺高位徘徊,冇明显回调,如果睇好3月及之后“5.1”假期赌收,开好仓有咩要注意? 中薇证券研究部执行董事黄伟豪指,由于已全面通关,市场一定对赌收有憧憬,但始终都系偏向中线,唔系即时会发生,唔少利好因素都系偏向中长线,如果拣CALL为主,要留意时间性,拣返长身少少,股价方面,银娱走势系ok,如果股价继续贴住53元楼上走,有机会上到56元、57元。 |
银河娱乐 |
黄伟豪 |
2023-02-07T12:32 |
【Now财经台】港股连跌3日后,今朝显着反弹,牛熊证部署方面,博大市连跌3日后持续受压,还是博后市会有可观嘅反弹? 中薇证券研究部执行董事黄伟豪指,港股连跌几日后,借势反弹,但唔建议现阶段贸然博好仓,技术层面上,判断港股走向时想再稳阵啲,起码要等恒指上返20天线水平,即21700点水平,距离现水平约200点。Ravi又提醒,等恒指企稳20天线,再部署好仓博进一步反弹会比较好,依家博反弹水位未必太多。 黄伟豪 中薇证券研究部董事 |
港股 |
黄伟豪 |
2023-01-31T12:02 |
【Now财经台】港股噚日显着回套,一度失守22000点关口,恒指今朝反弹,10天线系咪有较大支持?如果做睇好部署,恒指牛证应该点摆位?噚日最多资金加仓嘅21700点稳唔稳阵? 中薇证券研究部执行董事黄伟豪指,随着北水回归、A股复市,港股借势调整,睇返整体格局,虽然后市未必睇得好淡,但已炒咗复常及通关一段时间,港股要再上需视乎有冇新催化剂。 佢又话,恒指20天线有较大支持,如果投资者唔系太进取,拣收回价喺21400点楼下比较合适,如果拣21700点咁贴,随时即日被收回。 黄伟豪 中薇证券研究部董事 |
港股 |
黄伟豪 |
2023-01-17T11:57 |
【Now财经台】药明生物(002269)大股东减持套现,股价今朝应声下跌,依家系咪开好仓嘅好时机?不过,今朝成交活跃嘅CALL,行使价喺80元水平,杠杆只得3倍,至于牛证距离收回价约10%,杠杆做到5倍至7倍,系咪牛证较值博? 中薇证券研究部执行董事黄伟豪指,药明牛证较值博,其实减持消息唔算太负面,配售价折让幅度亦唔系特别大,加上牛证杠杆做到5倍至7倍,距离收回价仲有10%价外,即市收回风险唔大,药明股价由去年10月底低位计,至昨日已累升逾1倍,由于升势较急,扯高咗引伸波幅,拣CALL冇咁着数。 Ravi又认为,可以等药明股价企稳10天线,即69元水平先做部署,高位可上望77.4元,见68.9元、69元入手可以部署,短期止蚀位摆67元。 黄伟豪 中薇证券研究部董事 |
生物 , 药明生物 |