| 评论员 |
时间 |
内容 |
标签 |
| 关焯照 |
2025-06-06T16:13 |
国家主席习近平跟美国总统特朗普(Donald Trump)昨日(5日)通话气氛唔错，但市场似乎冇乜反应，始终对话未有实质内容，市场普遍预期，中美谈判唔会咁快有结果，加上特朗普处事太反覆，市场担心会再出现变数。另一方面，Tesla行政总裁马斯克(Elon Musk)炮轰减税法案《大而美法案》(One Big Beautiful Bill Act)，导致两人决裂，特朗普威胁终止马斯克旗下公司嘅政府合约，导致Tesla股价昨晚大冧，市值单日蒸发逾千亿美元，点睇美股6月表现？ 冠域商业及经济研究中心主任关焯照指，特马不和短期对Tesla肯定冇好处，依家股价正反映紧呢个不明朗因素，因为唔知特朗普会唔会再出招对付马斯克，不过，废除减税法案亦唔系一个好主意，虽然减税法案会增加债务及财政负担，但冇咗呢个法案，特朗普可能会出另一招，不确定性会更大。 关博士估计，美股已见底，暂时已经脱险，但短期将持续波动，可唔可以破顶要视乎标指企业盈利表现，同埋美国之后会唔会推出利好美股嘅政策。 |
|
| 关焯照 |
2025-05-23T16:15 |
1个月拆息今日(23日)一度跌至0.58厘，市场认为，拆息回落同资金预备认购大型新股宁德时代(03750)有关，宁德时代上市后，新股接连有好表现，系咪代表认购宁德时代嘅资金有意接力抽其他新股？ 冠域商业及经济研究中心主任关焯照指，美国政策带来嘅不确定性，令美元资产需求减弱，资金就会流入其他市场，包括亚洲区，香港只系其中一个受惠嘅市场，所以资金流入同香港本身嘅优势冇关。 关博士又话，资金流入香港会推低拆息，有助市场资金流动性，以及带动市场气氛，但佢认为，流入香港嘅资金未必全部都同抽新股有关。 |
|
| 关焯照 |
2025-05-15T11:02 |
美国总统特朗普(Donald Trump)率领科技企业代表团出访中东，成功签咗好多大Deal，市传英伟达(Nvidia)将会向中东国家出售大量先进人工智能(AI)晶片，晶片企业似乎系今次中东之旅嘅大赢家，系咪可以带挈相关股份再展升浪？ 冠域商业及经济研究中心主任关焯照认为，Nvidia股价逐步破顶主要系近日走强，主要受市场利好消息及risk on mode推动。佢又认为，今次喺中东攞到大生意系时机问题，因为呢啲国家现时有庞大嘅科技需求。 关博士续指，投资者毋须担心Nvidia业绩，因为今次喺中东接到嘅额外定单，业绩嘅利好预期可以持续至明年，佢又估计，Nvidia股价仍有上升空间，但要升穿高位有难度。 |
|
| 关焯照 |
2025-05-09T15:43 |
美国昨晚(8日)同英国达成今轮贸易战以嚟首份贸易协议，带动美股3大指数隔晚一度大升，收市升0.5%至逾1%，升幅收窄系受富人税消息拖累，中美今个周末就会展开贸易谈判，会点反映喺美股身上？会唔会好似英美一样传嚟好消息？ 冠域商业及经济研究中心主任关焯照指，美英达成今轮贸易战首份协议，市场认为气氛好转，但英国唔系美国主要入口嘅贸易伙伴，所以重要性唔大，投资者唔好将美英协议睇得太重。 关博士又话，依家中国系美国第2大入口国，所以要达成协议嘅难度几高，timing上系对美国不利，因为特朗普(Donald Trump)嘅民望愈嚟愈低落，加上唔可以将关税拖延到中期大选之后，最少要喺明年初之前同中国倾掂数，所以有好大迫切性，佢估计，美国最后只会向中国货品加征20%至25%关税。 |
|
| 关焯照 |
2025-04-25T15:48 |
美股几乎重返4月初特朗普(Donald Trump)政府公布关税详情嘅水平，虽然市场对中美关税谈判有唔同揣测，但近期嘅消息明显纾缓投资市场对关税战持续恶化嘅忧虑，而特朗普近期嘅态度，似乎反映佢喺关税问题上有软化迹象。此外，据《彭博》最新报道，中国考虑豁免部分美国进口货反制关税，包括医疗设备、乙烷等化工原料，睇返关税战最新发展，再睇埋美股3大指数近日走势，美股系咪已经脱险？ 冠域商业及经济研究中心主任关焯照指，其实中美“一刀切”只会令双方利益受损，佢相信中美会进行贸易谈判，而呢类消息可大大纾缓市场恐慌情绪。 值得留意系，美股几个主要指数如纳指、罗素2000及标指，最少连续两日企喺20天线楼上，已经去返一个比较安全嘅地带，佢又认为美股会慢慢回稳。 |
|
| 关焯照 |
2025-04-17T10:24 |
联储局主席鲍威尔(Jerome Powell)昨晚(16日)指，关税可能令通胀升温及经济增长下降，坦言对局方带嚟挑战，但佢冇就今年利率走向作出任何暗示。如果睇返鲍威尔昨晚嘅言论，联储局紧急减息都应该唔使谂，现阶段系咪要避开美元资产？ 冠域商业及经济研究中心主任关焯照指，依家嘅情况未需要急于减息，因为经济数据仲未出，尤其近期嘅通胀数据低过预期，虽然预期通胀未来有上升压力，加上美元转弱，虽然有入口通胀会令人担心，但实际上消费信心会唔会令经济转差，因为密歇根大学消费信心指数大幅下滑，呢个系一个衰退水平。 关博士又话，依家有两个问题，首先系预期通胀升上高水平，其次系失业率飙升，会慢慢形成滞胀风险，不过，呢个唔会系一个极大风险，但当失业率大升及好多企业破产时，联储局就要紧急减息，但就算未来一至两季减息，幅度及次数都唔会好多。 美元资产方面，佢认为，若特朗普(Donald Trump)政府嘅政策继续摆动性咁高，投资者一定会失去兴趣。 |
|
| 关焯照 |
2025-03-28T16:05 |
美国总统特朗普(Donald Trump)将会喺下周三(4月2日)公布新一轮关税措施，政策公布前，市场充斥不确定性及忧虑，对美股后市有咩影响？上半年个顶系咪已经见咗？ 冠域商业及经济研究中心主任关焯照认为，美股应该已见顶，依家最大问题系业绩期就快杀到，而市场对政策嘅不明朗嘅忧虑太大，所以大部分企业嘅业绩指引都比较保守，其中，联邦快递(FedEx)下调咗全年指引，美国达美航空(Delta Air Lines)就调低首季收入及盈利预测，企业指引保守一般都会拖低股价。 关博士续指，就算系过去两年表现强劲嘅“科技七雄”(Magnificent 7)，股价都要受压，暂时表现最强势嘅Facebook及Instagram母公司Meta，股价都只系可以守住600美元，所以整体美股都因为业绩期来临而变得唔太乐观，现阶段系易跌难升。 佢又话，依家最重要系4月2日公布嘅新关税政策，如果同之前差唔多，投资者忧虑细咗，美股有机会轻微反弹。 |
|
| 关焯照 |
2025-03-14T17:35 |
美国今晚(14日)将会公布3月密歇根大学消费者信心指数初值，市场预期数据将会向下，要留意对已经“见熊”嘅美股有咩影响。此外，虽然纳指已跌入调整区，但昨晚(14日)英伟达(Nvidia)及软件公司Palantir股价冇跟纳指100破底，系咪预示纳指有机会出现超卖反弹？ 冠域商业及经济研究中心主任关焯照表示，指数已严重超卖，系有机会反弹，如果今晚公布嘅数据差，就“揿佢一下”，然后趁势平仓，今日已经系星期五，如果期权借数据“队落下”平仓，再部署技术性反弹，首先系比美国总统特朗普(Donald Trump)一个警号，就系市民信心开始转差，通胀预期仍然系升，佢就好难解释，跟住就可能会“松手”，所以呢个Weekend有可能讲返一啲比较温和嘅说话。 Nvidia方面，关博士就话，纳指100近期破底，但Nvidia股价系升，Palantir亦冇跌穿之前个底，反而开始有啲稳定，呢两只股王应该对市况有帮助。至于台积电(TSMC)市盈率(PE)已跌到17倍，投资者可以留意返一啲有实力、稳定嘅股票，呢几只博反弹都可以考虑。 |
|
| 关焯照 |
2025-02-28T15:47 |
“科技7雄”(Magnificent 7)之一嘅Tesla，佢嘅创办人马斯克(Elon Musk)带领美国“政府效率部”(DOGE)，大刀阔斧兼手起刀落削政府开支，早前宣布嘅裁员行动已惹怒唔少美国人，就连欧洲方面对佢嘅好感度都急跌，为Tesla业务带嚟嘅负面影响逐步浮现，除欧洲销量大跌，股价今个月已累跌近30%，市值累计蒸发3900亿美元，有货嘅投资者应唔应该沽出？ 冠域商业及经济研究中心主任关焯照指，马斯克做咗一啲其他人唔认同嘅举动，例如美国国内嘅裁员潮，同埋佢干涉欧洲政治，惹嚟欧洲民众强烈不满，导致Tesla喺欧洲销量暴跌，佢相信，就算美股可以企返稳，Tesla都会继续跌，加上基本因素唔好，公司都要面对通胀风险，所以Tesla系“7雄”中跌得最甘，又认为短期内都不宜沾手。 关博士建议投资者可以考虑反手部署，例如T-Rex 2X Inverse Tesla Daily Target ETF(TSLZ)等逆向型产品，但投资者必须控制风险，始终Tesla仲未跌完。 |
|
| 关焯照 |
2025-02-14T16:09 |
DeepSeek引爆港股今轮升浪，恒生指数昨日(13日)一度冲破22000点关口，但其后喺高位回套，最终由飙逾600点变倒跌完场，但今日(14日)再度发力，迫近22600点，仲升穿昨日高位，港股今轮升浪会持续几耐？ 冠域商业及经济研究中心主任关焯照指，呢个系等咗一段短时间嘅调整，过去1个月恒指累升逾3000点，期间冇乜回套，所以今次即日回套都会令投机者知惊，而一啲权重股都有回落，例如腾讯控股(00700)、阿里巴巴(09988)等，昨日嘅回调都算系一次健康调整。 关博士又认为，就算冇DeepSeek，港股都会喺低位反弹，因为一般喺“两会”前，市场都会有政策憧憬，呢段时间嘅人工智能(AI)发展只系令大市弹多啲，佢又估计，今轮升浪最少持续至“两会”前，不过，如果“两会”期间指数升得太多，中央可能会减低政策嘅力度，因为内地股市近期偏向“慢牛”，所以到时会出现更大幅度嘅回套。 |
|
| 关焯照 |
2025-01-24T16:23 |
美国总统特朗普(Donald Trump)最新表示，如非必要唔会加中国关税，市场解读得非常正面，但仍要等到2月1日先有最终决定，下星期就系农历新年长假，港股下周只有1日半市，港股放假期间，美国有唔少大事件，“科技7雄”(Magnificent 7)会出业绩、联储局议息及关税死线，投资者应该点部署？ 冠域商业及经济研究中心主任关焯照认为，投资者唔需要“减磅”过年，因预期大市喺农历新年长假前好会有得升，除非大市已见顶，依家恒生指数喺20000关上落，有货嘅投资者可以等过年后，等港股复市睇定啲再做决定。 美股“7雄”业绩方面，关博士话，唔需要太担心，因为现时美股嘅权重股如金融股等，交到好业绩后，股价炒上后都冇回落，呢个主要同美国总统特朗普正式上场有关。 佢续指，“7雄”之中，Meta、亚马逊(Amazon)、Google都会喺业绩前炒起，市场预期呢啲公司业绩唔会太差，唯一要担心系苹果公司 (Apple Inc.)，因为昨晚(23日)纳指自低位反弹，但Apple都跟唔上，市场普遍认为，Apple已经冇新意，手机销售又唔理想，除非公司有重大消息或产品发布，股价先有望出现突破，否则，唔建议投资者持有。 |
|
| 关焯照 |
2025-01-03T16:24 |
美汇指数持续强势，今日(3日)一度升穿109水平，美国总统当选人特朗普(Donald Trump)将会喺2025年1月20日上任，意味加中国货关税嘅日子愈嚟愈近，呢啲因素都不利人仔，究竟应该点投资好？ 冠域商业及经济研究中心主任关焯照指，特朗普本身就系最大不明朗因素，因为佢所有政策都会推高通胀，不利股市。佢又话，美元强势系因为长息扯高，而长息升意味通胀预期转强，亦代表投资者沽美国长债，但仍持有美元。值得留意系，美元强势亦同欧元疲弱有关，欧元兑美元已失守1.03。 关博士认为，短期而言，喺美元强势下，亚洲股市都应该冇乜运行，而随着特朗普上任，好多消息及政策都会落实，政策细节会逐步曝光，睇返大环境系对港股及A股不利，因为美国系唔会“放过”中国。佢建议投资者可以考虑保守型股票，但要喺内地推政策后立即行动，如果唔想跟咁贴，就可以考虑防守型板块。 |
|
| 关焯照 |
2024-12-20T15:44 |
据联储局最新“点阵图”显示，美国明年有可能只减息两次，每次0.25厘，即时震散美股，当晚道指急泻逾点，但昨晚(19日)已经喘定，收市升15点，扭转连跌10个交易日嘅劣势，系咪反映市场已消化联储局或放慢减息步伐呢个消息？ 冠域商业及经济研究中心主任关焯照指，市场已消化咗部分有关减息嘅消息，美股今轮调整嚟得比预期快，佢认为，美股之后大升嘅机会唔高，始终嚟紧仲有好数据，都会影响整体大市表现，包括今晚(20日)出炉嘅核心个人消费支出(PCE)，如果数据超预期，相信美股仍有下调压力。 关博士又指，“点阵图”其实系向特朗普(Donald Trump)发警示，暗示佢要重新审视加息嘅谂法，今次只系释出局方明年有机会放慢减息步伐，市场已经咁大反应，而特朗普一向好重视美股表现，若联储局加息有机会拖冧美股，呢个亦系局方“放鹰”嘅原因之一。 |
|
| 关焯照 |
2024-12-06T17:39 |
港股今日(6日)突然好兴奋，半日成交已超过800亿元，一度上返19900点楼上，市传中央经济工作会议下周三(11日)及下周四(12日)召开，市场系咪又开始炒政策憧憬？2024年只剩返10几个交易日，恒生指数有冇机会嚟个“最后冲刺”上返20000点？ 冠域商业及经济研究中心主任关焯照认为，恒指上返20000点结束2024年机会唔大，反而有可能喺中经会前见返2字头，有机会上返50天线水平，即20300点水平，但睇返“往绩”，开完中经会之后，大市就会插水，曾经试过会后两个星期累跌逾3000点，佢估计，今次都会出现呢个情境，会前炒政策憧憬，会后就急散水。 关博士提醒，一旦恒指真系上返20000点水平唔好再追，因为之后有机会返落19000至19300点。 |
|
| 关焯照 |
2024-11-22T16:37 |
金融科技公司SoFi Technologies(SOFI.US)股价靠人工智能(AI)技术，今年已累升逾50%，到底AI为公司带嚟咩好处？此外，比特币(Bitcoin)持仓大户，狂扫Bitcoin嘅企业软件商MicroStrategy(MSTR)股价，喺Bitcoin价格升唔停之下，股价昨晚(21日)突大冧逾16%，原来畀沽空机构香橼研究(Citron Research)狙击，投资者应对点应对？ 冠域商业及经济研究中心主任关焯照解释，SoFi本身系做学生贷款生意，有咗AI可以帮公司挑战更合适嘅借贷对象，令拖欠比率显着下降，加上SoFi开始发展金融借贷服务，产品种类大增，现时AI商业应用比例已达27%，相信未来仍有好大上升空间。 至于MSTR，关博士就话，Bitcoin已出现史上最大泡沫，MSTR股价之前急升，系靠杠杆出售Bitcoin，股价昨日因被香橼狙击而急挫，反映公司易受消息影响。佢又提醒，若Bitcoin价格继续升，MSTR短期仍可保持强势，但当Bitcoin价格见顶，股价就会急插，形容投资者要“食得咸鱼抵得渴”。 |
|
| 关焯照 |
2024-11-08T17:06 |
软件公司Palantir(PLTR)公布季度业绩后大升20%，隔晚(7日)高位一度升至56.47美元，第3季收入比预期高3%，第4季指引收入就比市场预期高3%，其实季绩比预期高出不算多，但市场反应相当正面，当中原因为何？投资者又应否这个时候入手？ 冠域商业及经济研究中心主任关焯照指，主要由于公司目前有多个包括微软(Microsoft)等的大型客户，加上利用人工智能(AI)提升企业决策效率，所以市场对公司未来数季业绩有颇大憧憬，前景可期。 关博士预料Palantir股价会在隔晚收市55.88美元这个水平徘徊一、两日，即使出现回套，幅度亦不会多，因为股份在绩前曾经急挫，不少人因此离场，不过公布业绩之后股价反应出乎意料地正面，但投资者已经难以追货，他又形容此股份是“AI产品界中的英伟达(Nvidia)”，股价虽较之前贵，但仍然值得考虑入手。 |
|
| 关焯照 |
2024-10-25T16:45 |
受惠于中央自9月底频频出招救市，恒生指数曾冲上23000点，但之后无以为继，更一度失守20000点。美国总统大选已进入倒数阶段，选情及结果点影响港股后市？ 冠域商业及经济研究中心主任关焯照认为，港股冲高后回调嘅幅度比预期大，有机会系炒港股嘅投资者喺大市仲升紧时已经获利离场，然后再吼低位买货，令港股冇办法再冲高。佢又话，未来两周会有美国大选及议息会议等事件，所以港股要等2至3周后，先可以扫除不明朗因素，估计11月中前，港股会喺20000点至21100点上落。 关博士续指，内地未来有机会再出大招救经济，恒指年底前有机会上试21600点，即较现水平仲有约5%上升空间，明年就要留意可唔可以冲破22700点，呢个亦系过去2至3年嘅阻力位。 |
|
| 关焯照 |
2024-09-27T18:47 |
自从周二(24日)内地3大金融部门出招后，港股升势几乎无停过，今日(27日)半日成交额已经超过2300亿，下午更破港股成交额纪录，收市前已经突破4000亿，今次升势强劲，短线升势可以延续？阻力位及支持位在甚么水平？ 冠域商业及经济研究中心主任关焯照指，恒指短时间内冲破前高位19700点，亦有成交量配合，近几日成交量都比今年4月恒指向上时的成交量高，如果今日(27日)出现回调亦不足为奇，因为恒指短短几日已经有超过2000点升幅，是非常强劲的升势，估计20000点至20200点会出现支持位，而短期阻力大约处于21000点，之后要一段短时间横行后才能破顶，突破后第4季可以上望22500点。 |
|
| 关焯照 |
2024-09-13T17:32 |
美国联储局将于本港时间下周四(19日)凌晨公布议息结果，依家市场对减息幅睇返有分歧，但睇返最新利率期货，减0.25厘嘅机会约70%，减0.5厘就约30%，似乎大手减息嘅机会仍较细。港股投资者喺议息会议前后应该点部署？ 冠域商业及经济研究中心主任关焯照指，现时美国通胀仍略高于预期，所以减息0.25厘息嘅机会较大，但唔排除今年会合共减息1厘。 关博士又话，若港股喺议息前造好，指数股就可以食糊，不过，若今次议息后，联储局继续减息，意味将继续美国金发女孩经济(Goldilocks Economy)，估计美股会继续升，但港股仍可能受内地市况拖累，但政策憧憬会对第4季市况有帮助，要留意议息后美股嘅反应，预期美股展开新一轮升势前，或会先行回套，而港股投资者可以考虑喺恒生指数见17200点水平时买入，博第4季弹上至18000点。 |
|
| 关焯照 |
2024-08-29T11:36 |
交通银行(03328)及中信银行(00998)昨日(28日)派咗中期成绩表，并双双宣布派中期息，交行派0.182元人仔，信行派0.1847元人仔，前者系首次派中期息。交行指，派息比率维持约30%，但其实系咪将末期息“一拆二”，攞部分出嚟做中期息？ 冠域商业及经济研究中心主任关焯照认为，今次派息的确有“拉上补下”嘅情况，但“提早”派息可以带嚟正面心理作用，虽然交行派息比率仅约30%，但相比派息理想及高派息率嘅企业，交行派息空间其实相对较大。 关博士又指，若美国联储局减息，相信内银都会跟，减息会令息差压力变大，所以要留意喺息差收窄下，公司预期盈利能否保持稳定，但宏观而言，减息会利好整体内银股。 |
|
| 关焯照 |
2024-08-23T17:12 |
市场预期，美国联储局将于9月开始减息，但对减幅仍有分歧，联储局主席鲍威尔(Jerome Powell)今晚(23日)会喺Jackson Hole全球央行年会发表演讲，佢嘅讲话会唔会令减息时间及幅度明朗化？ 冠域商业及经济研究中心主任关焯照预期，鲍威尔嘅言论会较中性，甚至偏鸽，因为唔想令市场受惊，但佢提醒，市场唔好期望9月会减息0.5厘，因为参考过往数据，每逢联储局减息0.5厘，美国经济就会出现衰退，加上现时经济数据唔算太差，所以好大机会减息0.25厘以稳定市场信心。 关博士又话，早前股市大冧市系担心因为衰退而减息，但依家股市表现正面，亦冇受日圆强势影响，未来减息次数及时间仍然要睇9月估计嘅终端利率，如果今个减息周期嘅终端利率维持3.1厘水平，市场普遍认为经济稳定，股市下半年有望继续升。 |
|
| 关焯照 |
2024-08-09T18:58 |
今个星期一(5日)全球冧市，亚太区股市以日本及台湾股市“灾情”最严重，港股表现相对硬净，之后受内地数据带动，恒生指数出现反弹，到底内地经济下半年形势系点？港股又应该点部署？ 冠域商业及经济研究中心主任关焯照认为，内地跟本港经济融合已有一段时间，全球冧市当日港股冇受外围明显着拖累，除咗内地数据带来支持外，亦因为港股之前已跌咗唔少，削弱外围嘅杀伤力，加上临近业绩期，港股亦借一啲外围利好因素反弹。 至于内地下半年经济表现，关博士认为唔会太理想，但今日(9日)出炉嘅7月内地居民消费价格指数(CPI)好过预期，反映通缩情况有改善。 投资部署方面，关博士指出，投资者要见机行事，进取型投资者可以考虑押注ATM业绩，佢就睇好阿里巴巴(09988)及美团(03690)。至于恒指预期会喺19000点见顶，短期会继续喺16000至17700点上落。 |
|
| 关焯照 |
2024-07-26T16:09 |
三中全会结束后，可能政策憧憬落空，加上受外围拖累，恒生指数连跌3日后，今日继续打17000关攻防战，250天牛熊线亦危危乎，重磅股方面，依家只得腾讯控股(00700)顶得下，到底港股会跌到边个水平，几时先值得吸纳？此外，“中特估”概念股都有沽压，获利盘开始涌现，其中，中国联通(00762)今日(26日)一度挫逾7%，呢类股份系咪唔应该再沾手？ 冠域商业及经济研究中心主任关焯照指，港股最值得入手喺16000至16200点，腾讯系造返好啲，但其实之前跌咗唔少，不过，佢仍睇好腾讯，指343元有一定值博率。佢又提醒，港股业绩期快到，个别股份喺下个月可能有意外发挥。 至于关博士之前一直睇好嘅“中特估”概念股，佢依家都唔建议沾手，因为上半年造好嘅电力股、电讯股及油股，最近都守唔住，因此，建议投资者等业绩期展开，等内地电讯股等沽完先再买入。 |
|
| 关焯照 |
2024-07-12T16:11 |
美国通胀全面降温，昨晚(11日)出咗消费物价指数(CPI)数据后，据最新利率期货显示，联储局9月减息机会率急升至逾90%，到底美国今年会减几多次息？ 冠域商业及经济研究中心主任关焯照估计，美国9月及11月都有机会减息，不过，睇返联储局内部做嘅经济增长预测，第2季增长约2%，连同第1季都系低过去年第3及第4季，依家好似行紧1995年条路，即系今年及明年唔会减好多次息。 至于可受惠于减息嘅地产股、REITs及公用股，其中，地产股仍面对供应问题，拖住复苏嘅后腿，地产股反弹系咪只系死猫弹？关博士指，地产股反弹唔代表楼市反弹，纯粹系之前跌得多，依家减息预期升温，部分投资者就冚淡仓，部分短期就揸上去，一旦政府出招，例如将公私营房屋比例改为8比2，起多啲公屋，就会有啲支持，但都要搞返好经济，外围减息系帮唔到太多，佢又建议，地产股已升咗唔少，宜减磅套现。 |
|
| 关焯照 |
2024-07-05T15:19 |
港股7月开局唔错，但恒生指数今日(5日)一度挫逾200点，过去3日嘅升幅几乎化灰，三中全会将会喺7月15日至18日召开，港股下周表现系咪唔使太担心？指数成分股之中，暂时以美团(03690)升得最靓，值博率系咪最高？ 冠域商业及经济研究中心主任关焯照认为，恒指会有反弹，但如果期望有新一轮升势就睇得太乐观，最初市场对股息税等政策有一定期望，但愈来愈觉得“冇乜嘢讲”，所以恒指都由19700点水平回落至17700点水平，近期续受制18000关，市场会认为下星期会有风声漏出嚟，借势扫高恒指几百点，估计会弹到18500点左右，市况唔会太差。 美团方面，关博士就话，年初跌到60几蚊时，之后出现一个大浪，急升至130元水平，之后落返250天线，但冇跌穿，走势仲强过腾讯控股(00700)，如果要推上去系比较易，因为业务能见度高，亦有做回购及业绩有改善，亦留意到每当恒指“郁”，美团通常会行多啲。 |
|
| 关焯照 |
2024-06-28T15:49 |
美国总统大选首场电视辩论喺本港时间今朝(28日)9点举行，据即时民调显示，67%观众认为特朗普(Donald Trump)表现较好，认为拜登(Joe Biden)表现较好只有33%，美股期货市场即时反应亦显示特朗普占上风，会更利好股市表现，美国总统大选系咪会为下半年投资市场焦点？ 冠域商业及经济研究中心主任关焯照指，呢场选举只系其中一个因素，美国总统将会喺11月举行，其实市场都有心理准备，如果特朗普辩论表现理想，就会睇好美股后市，因为特朗普在任期间，道指大幅飙升，若特朗普真系再入主白宫，预期美股表现会同上次一样。 关博士续指，即使拜登成功连任，美股都未必一定跌，因为美国经济表现更关键，其他左右股市走势因素，包括美国联储局下半年减息次数、2025年息口走向、欧洲右翼抬头嘅影响等，都要留意。 |
|
| 关焯照 |
2024-06-07T17:49 |
港股近期似乎有“畏高”问题，恒生指数今日(7日)午后愈跌愈多，一度险守18300点。市场焦点除咗美国联储局到底几时减息外，亦包括嚟紧嘅陆家嘴论坛，以及7月召开嘅三中全会，系咪可以憧憬会再有利好股市嘅国策出台？ 冠域商业及经济研究中心主任关焯照指，港股喺19700点超买得好紧要，所以之后喺高位回落，返做个调整。港股喺14800点起步，升到19700点，差唔多升咗5000点或近30%，咁短时间升可以升咁多，对港股嚟讲已经系一个奇迹，如果由19700点回落到18000点，即保历加通道中轴或下轴，之后再弹上18600至18700点，预期会喺20天线及250天线间上落，即17600点至18800点。 关博士又预期，港股走势下周有望好转。 |
|
| 关焯照 |
2024-05-31T16:02 |
虽然港股早前表现强势，单日成交更一度大增至2000亿元，但仍未能断言为大升市，恒生指数果然喺19800点前止步，一度高见19706点，但之后掉头连跌3日，大市近期嘅调整及估值修复系咪已经完成？ 冠域商业及经济研究中心主任关焯照指，如果睇返保历加通道，恒指已接近下限，即18000点水平，系一个心理关口，如果守唔住，可能会进一步回落至250天线。 关博士亦指，若估值修复完成，意味大市已触顶，而恒指之前一度高见19700点水平，同摩根士丹利嘅目标价好接近，问题系如果完成估值修复，恒指唔应该仲喺一个咁平嘅水平，而系回归中位数市盈率(PE)，即20000点以上水平，所以仍未到“均值回归”水平，今次可能系超跌后反弹，因为相比其他股市，港股估值仍然平好多，最终资金可能由较贵嘅市场重投港股，再加上有内地政策支持，估计恒指有机会自低位反弹近5000点水平。 |
|
| 关焯照 |
2024-05-17T16:34 |
港股升唔停，恒指今日(17日)一度升穿19600关，应该可以确认步入牛市，早前，冠域商业及经济研究中心主任关焯照已提醒要留意重磅股，例如腾讯控股(00700)，结果业绩后走势强劲，股价连日挑战400元，有货应唔应该再加注？如果想喺现水平买货，应该追边类股份？ 关焯照指，如果腾讯可以企稳405元楼上，升势应该可以持续，因为公司回购力度大过大股东沽货力度，所以即使大股东再沽货都唔会掟散股价，令腾讯可以继续升。 关博士又指，因为外围有机会减息，虽然会令净息差收窄，但随着中央不断出手救内房，会带动内银股反弹，而内银股喺恒指占比大，对恒指嘅影响可以大过腾讯，所以有唔少板块都配合到今次反弹，所以后市可以睇住ATMJ及内银股。 |
|
| 关焯照 |
2024-05-03T15:48 |
美股人工智能(AI)热近日有少少冷却，轮到中概股接力炒上，金龙指数隔晚(2日)大升6%，录得9个月最大单日升幅，多只录得双位数升幅，系咪反映美股AI热已见顶？ 冠域商业及经济研究中心主任关焯照认为，AI热冇见顶之余，路线反而更清楚，以晶片股嚟讲，虽然英特尔(Intel)及AMD都系晶片生产商，大型科企嘅AI投资包括买入高科技晶片，但大部分都选择英伟达(Nvidia)，而3家晶片商中，Nvidia已抢咗大部分生意。佢又指，唔少大型科企仍强调未来会大力投资AI，所以呢股热潮唔会止步。 若AI热持续，港股方面，ATMXJ系咪仍然值得部署？关博士就话，ATMXJ股价弹咗唔少，但如果认真秤，AI概念股其实只得百度集团(09888)，但百度唔可能好似Nvidia升得咁多，只可以跟住外围科技股走，如果讲上望空间较大，首选美团(03690)，其次系腾讯控股(00700)，百度弹力只系一般，因此，如果要炒AI概念股，外围始终都系拣Nvidia，港股就冇乜选择。 |
|
| 关焯照 |
2024-04-12T18:02 |
美国上月通胀超预期，联储局减息时间好大机会再押后，估计加息次数亦会大减。虽然美债息持续向上，但美股反应冷静，科技龙头英伟达(Nvidia)及苹果公司(Apple Inc.)都升得靓，呢种情况应该点解读？ 冠域商业及经济研究中心主任关焯照认为，债息升系因为通胀数据连升3个月，并高过预期，导致市场对联储局6月减息嘅预期急降温，减息次数预期亦愈来愈少，虽然货币政策相对收紧、利率水平距离中性利率仍远，但经济似乎仲顶得住。关博士又话，由于联储局以经济稳定为大前提，所以依家唔会急于减息，以免刺激通胀。 |
|
| 关焯照 |
2024-04-05T16:26 |
近日，有多个消息来源指，人民银行将会以下场购买国债方式注入流动性，被市场解读为人行或快将启动量化宽松政策，即“中国版QE”，甚至美国联储局嘅现代货币理论(MMT)，即无限量印银纸支持政府开支，喺呢个情况下，边类股份最受惠？ 冠域商业及经济研究中心主任关焯照指，“中国版QE”背后重点系撑基建，但由地方发债，所以人行或会喺二手市场透过银行或商业机构买债，之后再回套，直接撑基建。佢又话，QE跟MMT最大分别系，后者直接支持政府开支，可能将支出债务或货币化，前者就涉及埋商业债市，但暂时未见相关做法。 关博士又话，若内地行MMT，资金买债后会流入基建项目，基建股就会受惠，中国交通建设(01800)及中国中铁(00390)等本身较呆滞嘅股份，一旦有呢啲刺激措施，就可以增加收入，加上现时息率有7厘以上，相对抵买。 |
|
| 关焯照 |
2024-03-15T16:39 |
美国2月消费物价指数(CPI)及生产物价指数(PPI)略超预期，令市场认为美国通胀黏性颇强，PPI出炉后，利率期货显示联储局6月减息预期轻微降温，有分析指，反映局方唔急于减息，睇返现时嘅情况，系咪不宜对6月开始减息太乐观？月底出炉嘅个人消费支出(PCE)物价指数又有几重要？ 冠域商业及经济研究中心主任关焯照指，CPI重要性低过PCE，CPI主要反映市场趋势，美国核心及非核心CPI都高过预期，PPI就处于低水平，但要留意有低基数效应，所以PPI未来有可能回升至2%或以上，跟疫情前相若。 关博士又提及，CPI反映美国通胀黏性，预期租金会持续回落，但速度会较慢，依家租金占CPI约44%，占PCE则约20%，所以租金对PCE影响较细。 至于联储局今年减息次数，佢预期，可能只减两次息，即使6月减息，但再下一次减息就要等到大选后，避免经济反弹。 |
|
| 关焯照 |
2024-02-16T15:52 |
美股、日股及台股表现强势，主要系受惠于人工智能(AI)热潮，带动相关概念股造好，继而推升大市，美股方面，虽然龙头英伟达(Nvidia)股价昨晚(15日)回套，但超微电脑(SMCI)股价9连升，更冲破1000美元，美银证券预期，未来3年AI伺服器年均复合增长率可达50%，不过，股价升到咁癫，AI板块有冇出现泡沬嘅迹象？ 冠域商业及经济研究中心主任关焯照指，短期系会出现泡沬，始终股价升得太夸张，个别晶片股如SMCI跑得特别快，市值不断被炒高，令市场睇好成个板块，令股价继续向上，但整体而言，成个AI板块只系啱啱见到“绿芽”。 关博士又话，AI科技股有好大影响力，所以唔可以低估今轮升浪，投资者不妨留意Nvidia下周三(21日)出咗季绩后，股价有冇机会升至1100美元。 |
科技 , 美元 , 美股 |
| 关焯照 |
2024-01-26T16:16 |
【Now财经台】国资委开记招讲国企重组，甚至升职都要睇国企业绩，中特估概念股近日成功翻炒，中国海洋石油(00883)股价破晒顶，另一只资源相关股中铝国际(02068)昨日(25日)更颠升逾70%，中特估概念股应该点拣好？应该长揸或短炒？ 冠域商业及经济研究中心主任关焯照认为，应该畀呢啲股份唞一唞，因为行得好快，其实国企改革好多季之前已经炒咗，睇返中国移动(00941)走势，虽然有2至3季静咗落嚟，虽然依家破顶，但低过之前个顶，低过70元，走势系咪系咁劲？所以都要小心。 佢又话，好彩都有鞭策国企揸弗人，叫佢哋睇实股价、做好业绩，反而令市场人士有返啲信心，如果业绩好派多啲息。 |
中国海洋石油 , 石油 , 中国移动 , 中国铝业 , 资源 |
| 关焯照 |
2024-01-12T17:59 |
【Now财经台】英伟达(Nvidia)股价昨日(11日)再破顶，连升6日，累升15%，集团同印度数据中心营运商(Yotta)达成协议，Yotta会向Nvidia买入总值10亿美元嘅人工智能(AI)晶片，估计2025年3月付运。《彭博》综合分析员12个月目标价睇648美元，Nvidia有冇机会到价？ 冠域商业及经济研究中心主任关焯照表示，其实Nvidia目标价个别睇到680至720美元，睇返集团每股盈利(EPS)后，每季嘅增长都十分可观，喺强劲嘅AI浪潮下，唔同范畴嘅需求都好大，Yotta系其中一个例子，Nvidia嘅晶片绝对唔忧卖。 关博士提醒，Nvidia生产水准(Capacity constraint)唔似Tesla，货运量、生产量都有限，但Nvidia可以将晶片制造外判，集团发展空间十分庞大，所以目标价可以睇得更高。 关焯照 冠域商业及经济研究中心主任 |
美元 , 佳宁娜 , 天元医疗 , 企业评级 |
| 关焯照 |
2023-12-22T18:29 |
【Now财经台】中午内地突然爆出谘询文件，话要限制网络游戏嘅课金系统，监管政策突然180度转变，搞到腾讯控股(00700)同网易(09999)股价大跳水，腾讯更创逾52周新低。 冠域商业及经济研究中心主任关焯照重申，千祈唔好掂ATM等重磅科网股，包括阿里巴巴(09988)、美团(03690)，指内地打压平台经济超过2年，而目前仍然睇唔到有消停嘅一日，加上当局不断收紧监管下已经“榨干”呢类科网股嘅估值，唔可以好似前几年当佢地系高增长股咁样炒。 不过，关博士表示，唔少恒指其他成分股表现好过ATM，先撑得住恒指未跌穿16000点，又话即使港股估值平，都唔好只买某几只重磅股，要分散投资来减低ATM拖累大市嘅风险，而近日大跌市中可见盈富基金(02800)持仓量愈来愈多。 |
港股 , 腾讯控股 , 阿里巴巴 , 盈富基金 , 科技 |
| 关焯照 |
2023-12-08T15:53 |
【Now财经台】评级机构穆迪近日连环出手，降完中国评级展望后，又降埋香港及一批内地和香港企业评级展望，拖累港股一度跌到16000点边缘，今轮跌浪中，蓝筹友邦保险(01299)跌足10日后，今日终于回稳，上返64元，点解友邦会跌到咁？现价值唔值得买入？ 冠域商业及经济研究中心主任关焯照指，友邦应该可以企稳62元水平，依家系入手好时机，友邦呢一浸跌势明显系有人收到风，ATM都已经郁紧，加上美团(03690)等因素，于是顺势推落去。 关博士又话，友邦本身有正面因素支持，理论上走势唔会咁，佢认为友邦股价应该跌够，而大部分不利消息都出晒，后市应该喺现水平开始反弹，估计年底可以见66元、68元。 |
港股 , 企业评级 , 友邦保险 |
| 关焯照 |
2023-12-01T16:04 |
【Now财经台】美股今年强势，标普500指数11月升近9%，彭博话近9%嘅单月升幅，自1928年以来次数唔够十次，外媒形容是“世纪行情”，咁强系因为通胀预期降，油价、长息回落，目前美国通胀及需求降温嘅趋势，系咪可以持续？经济最终又会否衰退？ 冠域商业及经济研究中心主任关焯照指，市场预期明年会“软着陆”，经济增长接近零，以目前经济放缓走势嚟睇，预计之后几个月通胀会继续慢慢回落，提醒唔好对回落速度有太大期望。 佢又话，如果经济出现衰退，通胀回落嘅速度会增加，有机会会跌到落3%以下。 关焯照 冠域商业及经济研究中心主任 |
美股 |
| 关焯照 |
2023-11-10T17:41 |
【Now财经台】虽然英伟达(Nvidia)未出第3季业绩，但股价近日由400美元一度炒上480美元水平，据英国《金融时报》报道，Nvidia再为中国“度身订造”3款性能较低嘅人工智能(AI)晶片，目的系避开美国政府禁令。此外，被市场称为“元宇宙第一股”嘅Roblox上月初登陆Playstation后，股价裂口上升，而数据分析软体公司Palantir亦系季绩后裂口上升嘅股份，呢啲股份系咪都值得睇好？ 冠域商业及经济研究中心主任关焯照指，Nvidia针对中国市场开发新晶片，目的系减低美国新规对销售嘅影响，加上依家AI系全球经济主轴，同AI有关嘅公司都比较赚钱，佢估计，Nvidia股价未来有机会升穿500美元。 关博士又话，Roblox股价时好时坏，但10月初登陆Playstation后，加上业绩理想等因素，令到股价升得唔错，至于Palantir从事AI及软件相关业务，最近又攞到政府合约，业绩亦持续改善，加上食正AI热，都可以继续睇好呢啲股份。 关焯照 冠域商业及经济研究中心主任 |
美元 |
| 关焯照 |
2023-10-27T16:05 |
【Now财经台】过往同债息同步嘅股份，系咪应该开始要避开，例如下周一(30日)出业绩嘅汇丰控股(00005)，喺利率向上下，憧憬息差扩阔会利好汇控，但喺息口就快见顶下，利好系咪已经反映晒，集团第4季表现系咪会较差？ 冠域商业及经济研究中心主任关焯照认为，要视乎息口维持喺高水平几耐，虽然息口快见顶，甚至可能已见顶，但高息会维持一段长时间，股价系炒预期，所以汇控息差扩阔嘅利好因素就会消失，理论上股价表现会较差。 不过，集团有做回购，会对股价有支持，加上英镑由年初1.03水平低位，反弹至1.21水平，但汇控最大问题系唔清楚集团内房嘅借贷及投资情况，睇返渣打集团(02888)因为内房拨备多咗，畀市场一个唔好嘅印象，会令人质疑汇控系咪同样有呢个情况，股价近期跌得比较多，如果最终盘数睇到拨备情况唔系咁差，股价有机会弹上60元。 |
汇丰控股 , 汇控 , 渣打集团 , 内房 , 英镑 |
| 关焯照 |
2023-10-13T16:22 |
【Now财经台】美国通胀超预期，加上10年期债息回升，令联储局年底前加息预期升温，美股噚晚喺连升4日后向下，联储局系咪一定要加息？港股方面，今日(13日)亦借势回套，加上内地通缩威胁似乎仲未消退，中央汇金增持4大国有银行A股效应又冇晒，港股后市会点走？ 冠域商业及经济研究中心主任关焯照认为，联储局官员“放鸽”系因为担心一旦债息升穿5厘，美股会出现大调整，所以“出口术”话唔使再加息，变相夹硬将美息封咗顶，所以暂时应该唔会加息。 港股方面，恒生指数噚日触及保历加通道顶，同50天线重叠，自然有获利回套诱因，由上周17100点水平抽上18000点，系升得好急，同埋腾讯控股(00700)去到315元及316元，一定升唔穿，畀人揿返落嚟，美团(03690)及阿里巴巴(09988)都跟住落，呢啲股份嘅表现都会限制咗港股升幅。 |
港股 , 恒生银行 , 腾讯控股 , 阿里巴巴 , 港银 |
| 关焯照 |
2023-09-29T18:42 |
【Now财经台】按揭证券公司上周五(22日)宣布，1000万元以下楼花都可以造到九成按揭，此外，财爷近日亦转口风，话现时楼市嘅情况，同当年引入“辣招”时已经唔同咗，令市场憧憬下个月发表嘅《施政报告》，可能有机会“减辣”，今次按证放宽按揭对楼市又有冇帮助？ 冠域商业及经济研究中心主任关焯照直言，放宽按揭冇帮助，因为大家对后市仍然冇信心，亦释放唔到刚性需求。佢续指，过去逾10年，“辣招”已切断了换楼链，加上楼市已调整咗一段时间，其实已达至“辣招”部分目的，因此，佢认为系时候“撤辣”。 关博士又话，若政府可以减少置业限制，市场经济会运作得更顺畅，届时可释放返换楼客出嚟，令换楼链顺返啲，避免楼价出现下降轨，令市场信心尽失。 关焯照 冠域商业及经济研究中心主任 |
|
| 关焯照 |
2023-09-15T15:36 |
【Now财经台】人民银行今日再降准“放水”，内地今朝出嘅重磅经济数据表现又唔错，尤其零售数据，带挈港股今日一度升逾300点，虽然早段曾短暂轻微倒跌，但最新都升逾200点，到底人行再“放水”对大市有几大帮助？ 冠域商业及经济研究中心主任关焯照认为，恒指一度升逾300点，主要受内地零售数据超预期带动，因为数据符合市场对内需嘅憧憬。 不过，佢认为降准帮助唔大，因为降准后释放出嚟嘅流动性，未必会流入实体经济。内房方面，主要视乎企业借唔借到钱，有大行估计，今次降准最多释放6000亿人仔，数目唔算大，其实之前内地经济差嘅时候，人行都曾经降准，但当时都冇乜反应。 关博士又话，内房依家系面对资金问题，卖唔到楼，就算有流动性都冇用，加上内房息率本来已经偏低，好难透过减息提振市场，更重要系，内房会影响市场对整体经济信心，所以降准亦好难提振经济。 关焯照 冠域商业及经济研究中心主任 |
港股 , 港资流向 , 内房 , 资金流向 |
| 关焯照 |
2023-08-18T15:57 |
【Now财经台】港股呢几日沽压沉重，恒生指数仲未企得稳18000点关口，冠域商业及经济研究中心主任关焯照认为，技术上港股仲未跌完。 关博士分析指，港股近月一直以约200点波幅横行，但近日保历加通道突然扩阔后，呢几日就急挫，并提及上次喺同样情况下，恒指泻逾1000点先识停，但估计恒指短线跌至17500点会有支持。 佢认为，同内地关系大嘅股份，即使有盈喜都撑唔住股价，目前不宜沾手，不过，个别股份如中国移动(00941)，高息之余有政策支持，仲可以考虑下。另外，欧洲三宝亦可以秤下，其中，佢最睇好新秀丽(01910)，因为最新中期业绩靓，业务发展稳健，又有唔少资金捧场博升。 |
港股 , 公司业绩 , 恒生银行 , 中国移动 , 公司业绩 |
| 关焯照 |
2023-08-04T14:08 |
【Now财经台】美国突然畀惠誉降级，拖低美股唔出奇，美国10年期债息亦冲上9个月高位，但连亚太区股市都散埋，应该点解读呢个情况？睇到债息抽升对全球股市都有关键影响，今次只系短暂调整，还是美国经济可能陷入衰退，股市将会大冧？ 冠域商业及经济研究中心主任关焯照指，亚太区市以香港、日本及南韩为主，主要畀科技股拖累，同埋内地救经济仍未有实质政策出台，变咗股市畀美息主导咗走势，其中，美股3大指数中，纳指系跌得最多。 关博士又话，要睇实美国今晚出炉嘅非农就业数据，但当地经济势头系靓，虽然突然被降级，但其他国家情况都差唔多，虽然美国盘数有啲令人担心，但政府可以印银纸，中长线会影响美元地位，初步睇可能会引发股市有啲调整。 关焯照 冠域商业及经济研究中心主任 |
美股 , 科技 , 美元 |
| 关焯照 |
2023-07-21T15:01 |
【Now财经台】虽然美国加息周期届尾声，但个别企业季绩差，例如Tesla及Netflix，导致股价隔晚要跌，纳指今晚有rebalancing，除咗换马亦会调整权重，股价短期或会较为波动，但投资者系咪可以趁调整吸纳心水股？除咗科技股，美股下半年仲有股份要留意？ 冠域商业及经济研究中心主任关焯照指，噚晚跌得多都系之前升得嘅大型科技股，例如Microsoft及Tesla等，要特别留意Apple，虽然升幅唔及Microsoft等，但噚晚只系跌约1%，反映系针对权重及升得多嘅科技股，但完成rebalancing后，估计呢批科技股会再起动，因为唔少都涉及人工智能(AI)领域，如果今晚收市前见到呢啲股份跌咗落去，可以考虑吸纳。 关博士又估计，具复常概念如旅游股，下半年仍会强势，例如航空股Delta、United Airlines，而游轮股仍有唔少水位，冷门就可以留意Uber，原因系... 关焯照 冠域商业及经济研究中心主任 |
美股 , ETF , 科技 , 恒生中国企业 |
| 关焯照 |
2023-07-07T18:00 |
【Now财经台】美国噚晚出咗有“小非农”之称嘅美国ADP私人企业就业职位，结果远超市场预期，美国就业市场持续强劲，市场忧虑今晚公布嘅6月非农就业数据同样强劲，美国加息周期系咪真系会较预期长？如果联储局今个月一如期加息，之后系咪仲要再加？ 冠域商业及经济研究中心主任关焯照表示，如果今晚出嘅非农数据比预期强，加息嘅持续性就会比预期强，佢又话，市场一般预期7月加多1次息，今个加息周期就会结束，但联储局话未来会持续温和加息，加息关键始终系通胀及劳工市场会唔会降温。 关博士又提醒，若劳工市场持续保持强劲韧性，上世纪80年代初嘅加息潮或会重现，令长债息升得快过短债息，若联储局继续加息，美国经济陷入衰退只系迟早问题。 关焯照 冠域商业及经济研究中心主任 |
|
| 关焯照 |
2023-06-23T18:14 |
【Now财经台】美国联储局本月暂停加息，但主席鲍威尔明言今年内可能会加多1至2次息。美股仲喺高位徘徊，纳指、标普隔晚见反弹。究竟下半年美股走势会系点？ 冠域商业及经济研究中心主任关焯照表示，市场预期下半年经济转差，道指等代表传统产业嘅指数或会受压；至于纳指，因为有微软、苹果公司、英伟达等重磅科技股撑市，预期经济衰退忧虑对纳指影响中性。 关博士续指，除咗以上嘅重磅股，纳指值得留意的股份包括现金充裕或有AI概念嘅股份，例如落后咗好耐嘅亚马逊，近日就爆返上约130美元嘅年内高位。 关博士认为，亚马逊仍有上升动力，因为公司手上现金多，可以收购好公司扩大业务，又有资本去长期投资AI概念，呢啲都会支持到股价。 关博士又预料，近排股价急升嘅美国连锁平价杂货店Dollar Tree会受惠经济衰退，因为经济差令民众倾向买廉价商品。 关焯照 冠域商业及经济研究中心主任 |
美股 , 科技 , 美元 |
| 关焯照 |
2023-06-09T15:50 |
【Now财经台】内地面对通缩压力，5月内地居民消费价格指数(CPI)按年仅升0.2%，工业生产者出厂价格指数(PPI)就录得7年以来最大跌幅，反映内地消费及上游生产需求仍然疲弱。 冠域商业及经济研究中心主任关焯照指，内地已经减咗人仔存款息，又计划年底前推汽车促销优惠谷消费，但始终解决唔到内地人消费意欲低迷嘅核心问题，而上游价格大跌反映工业生产量下跌，稍后通缩风险传导到至下游时，就会影响经济。关博士预期，内地下半年会力谷基建开支，以达至全年经济增长5%嘅目标。 港股方面，边啲股份会有炒作空间？关博士认为，重磅科技股阿里巴巴(09988)、腾讯控股(00700)、美团(03690)只适合短炒，有“中特估”概念加持嘅红筹，先系未来港股嘅投资焦点。佢又话，中国中铁(00390)、中国石油股份(00857)、中国移动(00941)近日走势十分靓仔，而息高、估值低嘅中信股份(00267)亦受资金追捧，股价由5月底9元水平弹上近10元。 |
科技 , 中国中铁 , 石油 , 港股 , 腾讯控股 |
