| 评论员 |
时间 |
内容 |
标签 |
| 梁伟民 |
2026-07-20T10:34 |
内地人工智能(AI)初创公司月之暗面(Moonshot)上周五(17日)发布“Kimi K3”大型语言模型，公司声称可媲美OpenAI及Anthropic嘅模型，外电形容系另一个DeepSeek时刻，消息一出，多只国产大模型股嘅股价上周五急泻，月之暗面喺内地嘅竞争对手智谱(02513)急泻逾28%，MiniMax(00100)亦重挫近16%，今日(20日)区内相关股份都继续受压，若中国AI模型技术持续进步，有咩股份可以受惠？ 高富金融集团投资总监梁伟民指，中国发展自家AI会推高半导体需求，不过，中国受美国限制令好多西方嘅半导体公司未必会供货畀中国，所以中国需发展自家半导体，所以会利好内地半导体企业，所以市场对晶片制造商前景睇得比较乐观，例如华虹宏力(01347)，但投资者要留意呢啲晶片制造商嘅估值系咪合理，例如华虹就已经好夸张，几百倍市盈率(PE)，即使未来1年盈利有好高增长，预测PE仍超过150倍。 |
|
| 梁伟民 |
2026-07-14T11:03 |
美国联储局主席沃什(Kelvin Warsh)今晚(14日)起一连两日到国会作证，喺佢作证前联储局理事沃勒(Christopher Waller)警告，若美国通胀过热，近期或需加息，沃勒一向被视为美国总统特朗普(Donald Trump)嘅支持者，如果联储局真系要加息，系咪要小心股市出现调整？ 高富金融集团投资总监梁伟民指，市场过去几个月都有price in加息，因为近期油价反弹，加息预期自然再升温，不过，油价弹一两日唔足以令联储局加息，加上仍未重返3月至4月高位，所以佢认为7月加息机会唔大，最快都要9月先有机会加息。 Wyman续指，其实市场price in加息风险都系未够，尤其系科技股，虽然最近记忆体及半导体相关板块已开始调整，但始终今年累积升幅仍然好夸张，所以股市借加息前景不明朗，或潜在隐忧再出现调整都唔出奇。 |
|
| 梁伟民 |
2026-07-07T10:57 |
南韩记忆体龙头之一三星电子(Samsung Electronics)，今朝(7日)出咗第2季初步业绩，季度经营利润按年劲升约18倍至89.4万亿韩圜，超预期，不过，三星股价今朝一度重挫近8%，低见293000韩圜，点解股价反应咁负面？ 高富金融集团投资总监梁伟民指，最近市场对记忆体市场有较大忧虑，三星、SK海力士(SK hynix Inc.)及其他记忆体供应商，都先后话要大增产能，其中，南韩政府之前牵头，跟三星及海力士投资天价金额增加记忆体及半导体产能，市场忧虑喺产能大增下会出现供过于求嘅情况，继而影响记忆体价格。 另一方面，最近电子产品零售商如苹果公司(Apple Inc.)，因为记忆体太贵，导致产品需要加价，但加价或会打击市场对电子产品及记忆体需求，喺呢个情况下，单靠业绩未必可以利好股价。 Wyman又指，市场亦可能担心三星股价之前升咗咁多，估值会过咗龙，亦担心之前乐观嘅预期最终唔会出现，投资者要留意未来几年，科技公司系咪持续大手投资喺人工智能(AI)，支撑记忆体火热嘅需求。 |
|
| 梁伟民 |
2026-06-23T10:20 |
美股3大指数轮流破顶后，昨晚(22日)轮到反映细价股表现嘅罗素2000指数突破，点解释今轮升势？此外，费城半导体指数(SOX)今年已累升88%，但人工智能(AI)及半导体狂热似乎仲未完，投资者可以点部署？ 高富金融集团投资总监梁伟民指，通常小型股向上系因为市场预期经济复苏，同埋息口相对温和，但依家市场开始担心加息，罗素2000反而破顶，Wyman就认为，今次系由市场情绪推动多啲，今年股市特色就系畀情绪带住走，唔系太关注基本面，但投资者要小心，现时估值真系贵，同时亦有隐忧，如息口上升同中东局势未明等因素。 Wyman又话，半导体板块现时估值偏贵，好多公司嘅股价已反映咗未来几年好夸张嘅盈利增长，如果公司指引未能满足市场预期，或者盈利增长唔达标，随时会引发调整，例如之前嘅博通(Broadcom)，但依家股市调整完，随时又会创新高，投资者可能会迷惑，唯一可以做就系定止蚀机制，跌超过10%至20%就考虑下洗唔洗减仓。 |
|
| 梁伟民 |
2026-06-16T10:05 |
英伟达(Nvidia)加入美国科企巨无霸Cap水行列，相隔5年，Nvidia再度发债，集资200亿美元，虽然少过之前嘅Google母公司Alphabet，但集资规模都系近期较大，市场反应亦好热烈，超额认购几倍，Nvidia股价昨晚(15日)收市升逾3%，点解连Nvidia都要集资？发债时机又有咩启示？ 高富金融集团投资总监梁伟民认为，企业集资不外乎发股或发债，而市场对发债唔会太担心，因为Nvidia财政状况好理想，现金流十分强劲，加上公司负债唔多，认购踊跃都好正常。 至于点解Nvidia要发债，佢指出，虽然集团未来几年透过股息及回购回馈股东，但钱肯定唔缺，所以呢方面都要留意住，但无论如何都比发股好，因为唔会摊薄每股盈利。 |
|
| 梁伟民 |
2026-06-09T10:27 |
虽然美汇、芝加哥期权交易所波幅指数(VIX)及油价等风险指标全线回落，但债息不跌反升，市场系咪仍忧虑通胀及加息风险？美股昨晚(8日)一度反弹，可能受Google加单、OpenAI已交IPO申请等消息刺激，但收市都要跌，点睇美股后市？ 高富金融集团投资总监梁伟民指，近期债息有明显上升趋势，主因系美国经济数据强劲，虽然美国10年期债息未去到令人最担心嘅水平，但2年期债息已升上逾5月高位，而债息一向行得快过联储局嘅货币政策决定，就算市场开始担心加息风险上升，都只系提早反映年底有机会加息1次，佢估计，联储局未来几个月都会按兵不动，投资者要留意美国明晚(10日)出炉嘅通胀数据。 Wyman又话，科技股相关消息短线有利市场气氛，市场对人工智能(AI)嘅信念仍然好大，只要科企继续投入资本开支，即使息口上升会令估值受压，半导体及记忆体公司嘅盈利及收入，未来1至2年仍可持续高企。 不过，最近好多科企都要发债或发新股集资，所以要留意明年科企资本开支，仲可唔可以维持大幅增长，以及投资变唔变到现，以支撑未来开支。 |
|
| 梁伟民 |
2026-06-02T10:35 |
英伟达(Nvidia)创办人黄仁勋昨日(1日)喺台北GTC大会(GPU Technology Conference)公布一系列新产品，刺激Nvidia股价昨晚大升逾6%，黄仁勋提及，Nvidia将会踩入个人电脑(PC)市场，推出CPU+GPU一体化产品，并宣布新一代人工智能(AI)晶片Rubin已全面量产，点睇呢个消息？CPU大战系咪已白热化？ 高富金融集团投资总监梁伟民指，市场担心其他科技巨企自行研发AI晶片，会威胁到Nvidia嘅市占率，所以依家有1个新增长点，对投资者嚟讲都系好消息，但问题在于PC及CPU市场本身竞争已经好大，例如传统参与者英特尔(Intel)、超微半导体(AMD)等，因此，Nvidia可唔可以突围仍要观望，虽然Nvidia股价被炒起，但Wyman认为，短线未必对实质业绩有好大帮助。 佢又话，过去两个月，市场投资焦点落喺CPU身上，今年以来，Intel股价已飙近2倍，但CPU新贵当中，Arm反而更突出，因为喺AI应用方面，Arm耗电量相对较少，未来科技企业喺人工智能代理(AI Agent)方面，或会选择有悭电优势嘅Arm架构，投资者要留意市场格局或会出现变化。 |
|
| 梁伟民 |
2026-05-26T11:40 |
沃什(Kevin Warsh)上周正式宣誓就任联储局主席，他的发言强调联储局应以独立性、清晰判断及坚定立场去控制通胀及实现充分就业，但在息口政策方向上未有释放讯号，目前应如何预测息口去向？ 高富金融集团投资总监梁伟民指，相信沃什言论满足到市场预期，联储局决定观察经济数据而订立货币政策，没有一个非常明确的立场加息或减息，正正反映其中立性，若他有既定立场，或会令市场质疑他受到美国总统特朗普(Donald Trump)的影响。 Wyman补充，目前虽然油价因美伊重启谈判而回落，但通胀仍有一定压力，而美国现时经济不算太差，未需要透过减息去刺激经济，预料联储局在未来2、3次议息中，仍会按兵不动，最快或要到今年年底才有较大机会出现变动。 |
|
| 梁伟民 |
2026-05-19T10:59 |
美股昨日(18日)个别发展，其中，道指升过百点，但标指及纳指就轻跌，股份方面，记忆体晶片股普遍受压，主要受硬碟制造商希捷(Seagate)CEO指出，新工厂要好长时间先起好，令市场对行业产能不足嘅忧虑急升温，到底系之前升得太多出现回套，还是借消息调整？ 高富金融集团投资总监梁伟民指，其实呢个消息对市场嚟讲唔算系坏消息，因为产能暂时提升唔到，意味供不应求情况持续，变相令记忆体晶片价格会持续高企喺一个火热水平，相信昨日纯粹系冇乜特别消息，借势回调。 Wyman估计，行业未来几季收入及盈利，可望继续录得爆炸性升幅，始终记忆体仍供不应求，加上近期三星电子(Samsung Electronics)有大罢工风险，短期有机会令记忆体供应不足情况恶化。 佢又话，依家Seagate估值相对偏贵，其他记忆体晶片股未来4季预测市盈率(PE)，可能只系约10倍或以下，但Seagate预测PE去到30倍，如果真系要入场，佢建议买返美光(Micron)及SanDisk等。 |
|
| 梁伟民 |
2026-05-18T11:15 |
中美元首会面结束，美国白宫表示，中国承诺连续3年每年最少购买170亿美元农产品，中国商务部亦发声明指，中美同意设立贸易理事会和投资理事会，通过一系列互相互降关税推动双向贸易。投资者应该怎么看待这次美国访华成果？ 高富金融集团投资总监梁伟民表示，自从美国对中国加征关税后，两国间的贸易障碍增加，交流明显减少。不过他相信，美国产品本身有一定竞争力，只要美国总统特朗普(Donald Trump)不再加收中国关税且不再施加新限制，中国依然会乐意购买美国的产品。 他续指，由于目前尚未清晰知道中国会如何执行所提出的承诺，加上特朗普未来仍继续对中国实施针对性行为，中美关系有机会再次陷入紧张，因此提醒投资者不应因中国购买量增加而认为中美关系有好转。 |
|
| 梁伟民 |
2026-05-12T11:18 |
美股持续造好，标指及纳指昨晚(11日)再创新高，前者更首度升穿7400关收市，晶片股方面，高通(Qualcomm)、美光科技(Micron)齐破顶，英特尔(Intel)及英伟达(Nvidia)亦有得升，有分析预测，标指年底有望突破8000关，不过，电影《沽注一掷》(The Big Short)主角原型、着名对冲基金经理Michael Burry认为，科技股估值太贵，建议沽货获利，同埋唔好沽空，但唔少投资者认为，够胆高追人工智能(AI)上游硬件股就会赢钱。 高富金融集团投资总监梁伟民表示，当市场好火热时，估值短期可能已被拨埋一边，如果单纯因估值贵去做空，投资者未必会理，甚至导致进一步上升。依家市场情绪高涨，Intel、超微半导体(AMD)、Micron、SanDisk等，股价喺过去1个月累升1倍或以上，即使睇啱方向做空，只要唔系即时，要1至2个月后先发生，可能会造成几十个百分点，甚至逾倍亏损，佢直言，方向可能会估中，但几时出现调整就好难估。 Wyman建议，若担心风险就要减低注码或继续持货，直至指数自高位回落约10%再止赚。此外，唔少投资者觉得之前错过机会，想呢一刻追入，但Wyman话，依家追落去可能1至2周会赚好多，不过，一旦回套跌幅可以好大。 |
|
| 梁伟民 |
2026-05-04T11:06 |
国际油价持续高企，纽约期油及伦敦布兰特期油齐齐企喺每桶100美元楼上，不过，美国总统特朗普(Donald Trump)话，美国好快又会有行动，导致被困霍尔木兹海峡(Strait of Hormuz)嘅中立船只驶离海峡。此外，7个石油出口国组织及盟友(OPEC+)主要产油国宣布，6月开始会每日增产18.8万桶原油，呢啲因素可唔可以令油价回落？ 高富金融集团投资总监梁伟民指，几个OPEC+成员国增产未必可以推低油价，因为部分成员国系中东国家，佢哋依家出口仍然受阻，所以增产其实意义唔大，加上增产嘅成员国主要来自非中东，或者进出霍尔木兹海峡冇受限嘅国家，增产数目唔算多，大概每日20万桶。 Wyman又认为，虽然美伊重启和谈短期有机会倾掂数，但由于前景唔明朗，估计油价仍会高企一段时间，直至中东问题真正解决。 |
|
| 梁伟民 |
2026-04-28T11:27 |
据报高通(Qualcomm)正跟OpenAI、台湾联发科及内地立讯精密合作，联手研发智能手机嘅人工智能(AI)晶片，预期2028年量产，如果落实，对手机产业有几大影响？ 高富金融集团投资总监梁伟民指，要视乎智能手机智能化程度、设计及创意，以及对传统手几使用量有几大影响，虽然AI运算十分强劲，过去唔少手机开发商，如苹果公司(Apple Inc.)、三星电子(Samsung Electronics)及小米集团(01810)等，都话要将AI技术加入智能手机，但其实AI未必配合到消费者需要，所以唔系太受消费者重视。 Wyman又指，智能手机AI晶片对手机供应商来讲，的确系一项潜在威胁，但未必可以即时打破现时嘅格局，相信要等实物出现及公布相关功能，但佢提醒，AI系可以影响任何一个行业嘅市场格局，所以市场都要做好心理准备。 |
|
| 梁伟民 |
2026-04-27T11:27 |
投资者憧憬美伊重启和谈，美股3大指数上周五(24日)个别发展，其中，标指及纳指又破顶，而业绩及指引都好过预期嘅美国晶片制造商英特尔(Intel)，股价上周五一度狂飙27%，再破顶，而其他晶片股如博通(Broadcom)及AMD，股价上周五亦最少升10%，人工智能(AI)晶片龙头英伟达(Nvidia)就升逾4%，虽然股价冇破顶，但市值已重上5万亿美元。至于费城半导体指数(SOX)已连升18个交易日。 今个星期会有“科技7雄”(Magnificent 7)出业绩，有冇机会进一步推动AI及半导体股气氛？M7边份成绩表可睇高一线？ 高富金融集团投资总监梁伟民指，M7业绩其实同半导体冇太大关系，仅Nvidia比较有关连性，佢认为，依家半导体同M7已经脱离咗关系，市场焦点未必再落喺M7业绩增长，反而会关注呢啲科企资本开资系咪持续咁巨大。 Wyman又话，M7之中暂时只睇好Nvidia及Alphabet，前者可直接受惠于成个AI基建发展，例如数据中心，因为企业都一定要用Nvidia嘅晶片。至于Alphabet系因为集团嘅AI发展好全面，有自家大模型，亦有数据中心出租及晶片研发业务，只要有一瓣成功，市场都会认为Alphabet会大幅受惠于成个AI潮流。 |
|
| 梁伟民 |
2026-04-21T10:21 |
美伊局势持续紧张，美国总统特朗普(Donald Trump)态度仍然好强硬，指唔太可能再延长停火期，指美伊须达成协议，否则，美军会再有行动。美股3大指数昨晚(20日)收市微跌，美元、美债亦几乎冇变动，点睇依家嘅局势发展？ 高富金融集团投资总监梁伟民指，投资者要有心理准备美股会出现调整，昨晚嘅市况仍比较乐观，相对平稳，即使油价抽返上去，标指及纳指只系微跌0.2%，过去两周，美股自低位大幅回升，甚至再破顶，不过，短线都倾向较悲观及审慎。 Wyman又话，呢一刻都唔肯定美伊谈判会有正面发展，当中仍有好大变数，所以后市必须小心。佢认为，股市似乎有啲过分乐观之嫌，睇返依家中东及油价嘅情况，美股仲企喺历史高位系唔太合理，因为战事问题仍未解决，只系有机会“将会解决”，而呢几日更加唔可能百分百解决，认为市场系price in得过分乐观。 至于有“恐慌指数”之称嘅VIX，虽然升咗，但仍处于相对低嘅水平。 |
|
| 梁伟民 |
2026-04-14T11:00 |
继美国银行股后，科技股会接力派成绩表，市场对硬件企业嘅业绩有颇大期望，点预测美国科技股业绩？此外，全球NAND快闪记忆体企业SanDisk晋身纳指100，将会喺下周生效，刺激股价昨晚(13日)飙逾10%，今年以嚟已累升约3倍，仲值唔值得高追？ 高富金融集团投资总监梁伟民估计，硬件股业绩会继续造好，因为科技巨企不断发展人工智能(AI)，令硬件需求维持炽热，出现供应紧张嘅情况，令呢啲公司有主导价格嘅本钱，继而大幅推高毛利率。至于记忆体板块，受惠于供不应求，价格大幅飙升，相信都可以交出靓业绩，甚至高过市场预期。 不过，Wyman提醒，呢啲股份嘅股价已经升唔少，要留意股价到底反映咗几多盈利增长，虽然供不应求嘅周期或维持1至2年，但如果年底至明年初供应增加，届时股价有机会回落，建议投资者以短期操作为主。 佢又话，好难估计SanDisk股价几时见顶，始终业绩仍然强劲，上季盈利较预期高出70%，市场预期，集团今、明两年盈利将持续增长，现时预测市盈率(PE)约20倍，明年都有约10倍，所以SanDisk短期仍有炒作空间。 |
|
| 梁伟民 |
2026-03-31T10:32 |
美股喺3月份都几伤，如果以昨晚(30日)收市计，美股3大指数中，标指已自高位回落咗近10%，摩根士丹利最新亦下调全球股票评级，由“增持”降至“与大市同步”，主要系油价干扰市场嘅时间、规模嘅不确定性仍然较大。高盛交易员就认为，对冲基金大举做空，一旦战事降温，股市有望迎来大反弹，而同经济主题有关嘅交易产品空仓，升至10年以嚟最高水平。点睇美股后市？ 高富金融集团投资总监梁伟民认为，美股暂时调整咗约10%，佢觉得反而系合理啲，因为美股之前只系调整咗约5%，其实唔系太足够，始终油价升咗好多，影响全球经济及通胀，股市应该有一个更明显嘅调整，以反映返呢啲负面或不明朗因素。 Wyman又话，呢一刻系咪可以捞底？佢认为回调幅度仍未够，如果睇返2022年，俄乌战事开打导致油价飙升，当时美股曾重挫20%至30%，始终股市要有一定跌幅，先可以足够反映油价飙升、局势不明朗等负面因素，因此，佢认为股市起码要回调15%，意味等股市再跌多约5%，到时先再考虑捞唔捞货。 |
|
| 梁伟民 |
2026-03-24T10:53 |
美国总统特朗普(Donald Trump)向伊朗发出“48小时最后通牒”后，突然喺本港时间昨晚(23日)7点左右话，将“死线”推迟5日，又话同伊朗嘅对话有成效，但之后遭伊朗掴一巴，否认同美国谈判。 特朗普喺美股两大指数自高位回调近10%之际，突然出手为场战事降温，可能考虑到今年有中期选举，唔想美股喺大选前冧市，特朗普出手后，油价一度应声急挫14%，债息急回，美股昨晚盘中一度弹逾千点，呢场战事系咪唔会拖太耐？ 高富金融集团投资总监梁伟民坦言，唔会睇得太过乐观，虽然特朗普昨日为市场送上惊喜，但唔代表系停战，美军会撤出中东，而市场最关注一定系伊朗系咪会解封霍尔木兹海峡(Strait of Hormuz)，就呢啲问题下定论依家仲系言之尚早，特朗普向伊朗施压冇成效，就被迫暂缓攻击，美国一直唔敢攻击能源设施，主要系担心伊朗会作出大规模亡命报复，怕承受唔到当中嘅后果。 Wyman又话，伊朗开出嘅停火条件，其中最关键系要美国保证唔会再攻击伊朗，估计特朗普好大机会唔接受，而战事会持续几个星期，甚至1至2个月。 金融市场方面，佢指出，睇返股市、债市、油价今日(24日)都开始缩紧，反映乐观情绪冇昨日咁高涨之余，亦显示仍未睇到停火曙光。 |
|
| 梁伟民 |
2026-03-10T10:13 |
美国总统特朗普(Donald Trump)最新指，打击伊朗军事目标嘅行动已“基本完成”，暗示战事可能好快结束，风险资产价格全线应声反弹，美股3大指数昨晚(9日)全线倒升收市。此外，有“恐慌指数”之称嘅VIX指数收市亦转跌。不过，市场仍担心美国有滞胀(Stagflation)风险，到底美国会唔会出现滞胀，喺呢个阴霾下，边啲板块可以受惠？ 高富金融集团投资总监梁伟民指，会唔会出现滞胀主要睇油价系咪持续高企，同埋会持续几耐，如果只系持续1至2周，即使企喺每桶100美元楼上，相信唔会大幅推高通胀，但如果长期企喺80美元以上，甚至接近100美元，若呢个情况持续几个月，对通胀嘅影响就大好多。 Wyman又认为，喺呢个情况下受惠嘅板块唔多，始终经济真系受损，而通胀又升温，对大部分行业都系负面，唯一谂到可以受惠就系能源股，其次系军工股。 |
|
| 梁伟民 |
2026-03-03T09:50 |
伊朗局势急升温，美以针对伊朗嘅军事行动持续，伊朗亦作出反击，包括向区内多个能源设施施袭，美国总统特朗普(Donald Trump)最新表示，唔会完全排除派出地面部队嘅可能，如果真系咁做系史无前例。不过，纳指及标指昨晚(2日)收市仍可倒升，系咪反映战事影响初步可控？ 高富金融集团投资总监梁伟民指，派唔派地面部队的确会影响中东局势，但投资市场最关注始终系油价，而现阶段估计派地面部队嘅机会唔大，但如果出动地面部队能成功控制伊朗局面，市场当然唔会觉得系坏事。佢又认为，依家油价唔稳定仍会带嚟好大风险，未来仍有机会上到每桶80美元楼上。 Wyman又话，虽然美股昨晚(2日)止跌回升，但只要油价仍向上，相关风险及忧虑仍然存在。至于资金昨晚喺低位吸纳无人机、国防及科技股，而有“恐慌指数”之称嘅VIX都只系升到约21，佢指出。 |
|
| 梁伟民 |
2026-02-24T09:55 |
美国总统特朗普(Donald Trump)输咗关税官司后，随即启动Plan B，当中引发嘅不确定性及忧虑，席卷欧美股市，美股3大指数昨晚(23日)跌逾1%，其中，道指收市泻逾800点，资金涌入美债、黄金、白银避险，虽然特朗普警告其他国家唔好“玩嘢”，但欧盟已经有行动，印度更暂停官员访问，关税裁决对市场嘅影响系咪未反映晒？ 高富金融集团投资总监梁伟民指，依家市场关注美国同贸易伙伴嘅关系，会唔会因为今次法院嘅裁决而有变，之前同美国倾掂数嘅国家，喺新关税Plan B下系唔着数，例如欧盟、日本及英国，取消对等关税(Reciprocal Tariff)后，所有国家都系支付相同关税，呢啲国家可能会寻求修订之前嘅协议，但特朗普未必愿意。 Wyman又话，依家市场观望会唔会因此而出现新冲突，虽然有不明朗情况，但股市又唔系有太大隐忧。 |
|
| 梁伟民 |
2026-02-20T11:14 |
“两会”将会喺3月4日开幕，因为今年系“十五五”开局第1年，市场憧憬“两会”将会提及未来规划，以及推出科技、人工智能(AI)等相关针对性政策，系咪月底已经可以偷步炒“两会”憧憬？ 高富金融集团投资总监梁伟民指，不论半导体生产还是AI模型开发，中央喺政策上一定会支持，但支持力度有几大仍然系未知之数，例如提供几多补贴、拨款喺相关行业。佢又提醒，内地AI相关股今年升幅已经好夸张，例如Minimax(00100)，某程度上已经唔需要靠政策刺激。 整体经济方面，Wyman认为，内地过去2年已经用唔同方法去稳住经济，所以今年都唔需要做太多令经济大幅增长，佢相信，今年“两会”政策都系以小修小补为主。 |
|
| 梁伟民 |
2026-02-16T10:24 |
近日市场对科技股，尤其系人工智能(AI)嘅巨额投入有好大忧虑，以Google为例，股价上周累跌约10%，依家系咪捞底揸中长线嘅好时机？ 高富金融集团投资总监梁伟民指，如果股价调整再深啲，部分科技股可以考虑喺低位买入，例如微软(Microsoft)、Alphabet等，因为呢啲公司估值唔贵，市盈率(PE)只系约30倍，加上自身业务强劲，即使AI投资带动唔到盈利及收入上升，投资者仍可考虑喺低位买入，但估值贵嘅公司就要小心。 Wyman又指，依家AI应用层面最大问题系，未能将投资变成产品或服务，相信呢个问题会延续至年底，加上大部分AI服务都系免费，公司好难从中获利，或者系明显带动收入及盈利，所以今年唔少科技公司都未必会有乐观嘅收入及盈利。 |
|
| 梁伟民 |
2026-02-10T10:24 |
美股3大指数造好，经历上星期一轮调整后，暂时企返稳，但科技股近期面对资本支出(CapEx)太大嘅质疑下，股价大幅波动，科技股昨晚(9日)又弹返上嚟，话资金转投科技股以外板块系咪言之尚早，后市点睇？ 高富金融集团投资总监梁伟民指，后市发展要睇市场气氛，科技股出现调整除质疑资本开支太大外，更担心最后可唔可以收回成本，带动盈利上升，科企依家瞓身投资人工智能(AI)，例如大模型开发，但技术几时可以变现仍然系未知之数，当市场情绪比较中性或悲观时，呢个忧虑就更严重。佢又指，亦要留意会唔会出现算力供应过剩嘅情况，又提醒今年要审慎部署。 Wyman续称，依家见到有资金轮动嘅情况，今年道指及部分传统板块，例如工业、能源都跑赢纳指，但佢质疑传统股升势系咪有足够基本面支持，又认为呢轮升势未必可以延续到年底。 |
|
| 梁伟民 |
2026-02-03T10:15 |
之前崩盘嘅金价及银价，喺今朝(3日)亚洲交易时段反扑，现货金价一度弹逾3%，升穿每盎司4800美元，现货银价更弹逾5%，冲破83美元，之前连日插水，主要系投资者调整仓位，尤其系短炒白银嘅投资者，仓位退返出嚟之后，金价及银价后市会点行？ 高富金融集团投资总监梁伟民指，金价暂时低位喺4500至4600美元水平，虽然金价近期出现较大调整，但资金冇明显流走，反映黄金利好因素比白银多。 Wyman又指，炒作白银嘅资金主要来自内地，现时国内银价较国际市场银价有逾20元美元溢价，反映国内投资者对白银睇法乐观，投资者不妨留意未来两星期内地嘅情况，如果资金继续涌入就冇问题，相反，若投资者散水，要小心白银再调整，而且幅度可能好夸张。 |
|
| 梁伟民 |
2026-01-27T11:00 |
国际金价不断破顶，昨日(26日)冲破每盎司5100美元后回软，不过，银价升得更癫，昨日曾飙14%，高见每盎司117美元水平。除地缘局势因素外，仲有咩原因推升银价，呢个趋势今季会唔会持续？目标价可以点摆？ 高富金融集团投资总监梁伟民指，金价及银价都好难Set目标价，尤其系后者，因为投机味真系好重，短短1个月大升40%的确好夸张，比金价升得更癫，更大幅跑赢金价，其实都好难解释到呢个情况，如果纯粹避险及去美元化，黄金嘅角色应该比白银重要，理论上升幅会大过银价。 Wyman续指，唯一解释系大量热钱喺短时间内涌入白银市场，短线嚟讲，银价可能会再升，但升到现水平已偏离基本面，一旦热钱唔再流入，调整幅度可以好夸张。 |
|
| 梁伟民 |
2026-01-20T10:47 |
美股昨日(19日)因假期休市，美国总统特朗普(Donald Trump)向欧盟国家再发动贸易战，多方地缘政治因素影响下，金、银价表现未有再创新高，而大行又继续唱好，如何评估金价后市走势？ 高富金融集团投资总监梁伟民指，今年金价破每盎司5000美元大关并不意外，因特朗普的各种政策，制造不少地缘政治冲突，无论是早前对伊朗的威胁，还是现在与欧盟的关税贸易战，市场通通解读为地缘政治不稳定，令避险需求大大增加。 Wyman又话，2025年内，金价已升逾60%，本已踏入调整期，去年最后一个交易日更跌穿4300美元，但现在受特朗普不同的政治因素影响，令市场忧虑情绪增加，对金价有利，未来再升多5%至10%亦属正常状况。 |
|
| 梁伟民 |
2026-01-13T10:14 |
美国总统特朗普(Donald Trump)突然宣布，对所有同伊朗有生意往来嘅国家加征25%关税，即时生效。中国同伊朗一直都有能源、基建等合作，中美虽然喺早前达成贸易休战一年协议，中美关系会唔会因此再受到考验？ 高富金融集团投资总监梁伟民表示，虽然早前两国元首会面后，贸易气氛一度有所缓和，但预计只系短暂现象。除咗今次伊朗事件，其实早前涉及台湾的问题都对中美关系构成影响。佢指出，美国始终将中国视为主要威胁，压制中国发展系美国嘅长远战略任务，所以除咗关税之外，针对科技嘅遏制，甚至围堵政策都有出现嘅可能。 Wyman又话，市场一直对中美关系持较乐观嘅态度，认为双方可以维持相对友好嘅状态。但佢提醒，无论系港股定系内地股市，投资者今年都唔能够忽略中美关系变差嘅风险。 |
|
| 梁伟民 |
2026-01-09T10:08 |
美国今晚(9日)将会有唔少重磅消息及数据出炉，包括非农数据、最高法院公布对等关税(Reciprocal Tariff)意见，甚至系裁决，市场估计，非农新增职位约7万个，略多过2025年11月，不过，日前公布有“小非农”之称嘅ADP就业数据就差过预期，预期今晚嘅非农数据都会偏弱，联储局月底减息机会系咪仍然偏高？ 高富金融集团投资总监梁伟民认为，美国2026年上半年减息机会唔大，联储局依家处于一个两难局面，面对美国就业市场显着转弱，而通胀就持续不明朗，虽然去年11月消费物价指数(CPI)轻微回落，但市场担心呢个数字嘅准确性，因为期间有美国政府停摆事件，所以一定要睇实下周出炉嘅最新CPI数据，因为好影响联储局今年上半年嘅减息步伐。 |
|
| 梁伟民 |
2026-01-06T09:57 |
市传内地金融监管机构要求银行，汇报对委内瑞拉嘅贷款风险敞口，内银股昨日(5日)受压系咪受呢单消息拖累？值得留意系，中国系委内瑞拉最大贷款国，透过国有银行向该国提供逾600亿美元石油担保贷款，而当地石油产业好大机会由美国主导，呢啲贷款要撇帐机会大唔大？ 高富金融集团投资总监梁伟民指，都有呢个可能，因为委内瑞拉政局好大机会由美国控制，中国喺当地嘅融资系有机会出现坏帐，但暂时对内银及石油股嘅影响唔系咁直接，首先系金额唔系太大，其次系呢啲融资都预咗唔系全部收得返。 Wyman又话，到底呢啲融资有几多喺上市公司，因为可能喺一啲冇上市嘅国有银行或油企身上，而市场认为委内瑞拉政局仍有变数，虽然港股嘅内银股昨日(5日)跌咗少少，但佢相信，对内银唔会有好直接影响，尤其业绩方面。 |
|
| 梁伟民 |
2025-12-30T10:17 |
嚟到年底贵金属有新一轮行情，其中以白银价格最癫，破顶后出现大震荡，冲上每盎司84美元后，再急“跳水”，直插至70美元水平，更引发其他贵金属波动。市传有欧洲大行白银期货爆煲，美国联储局要紧急注资救市。技术上白银的确已超买，市场都预咗升得急、回得急，但点解会出现昨晚(29日)呢个情况？ 高富金融集团投资总监梁伟民认为，其中一个原因系市场担心要加按金，会令市场流动性减少，更重要系白银价格今年已累升1.6至1.7倍，系1979年以来最大年度升幅。 Wyman又话，除咗基本因素，市场热钱流入及投机炒作，都令白银价格过去2至3个月升势加剧，所以当价格突然急回，投机资金及热钱就会好快流走，令昨日嘅回调速度更急。佢续指，白银价格暂时回调约10%，仍算系正常水平，至于市传有大行爆煲，佢认为呢个可能性相对细。 |
|
| 梁伟民 |
2025-12-23T10:13 |
美国科技股近日扭转之前嘅弱势，股价持续造好，更带动美股3大指数持续向上，其中，标指昨晚(22日)再升不足1%，收报6878点，迫近历史高位，科技股呢轮调整似乎已经完成。不过，Netflix同派拉蒙天舞(Paramount Skydance)拟收购华纳兄弟探索(Warner Bros Discovery)，最终花落谁家仍未明朗，而甲骨文(Oracle)联合创办人埃利森(Larry Ellison)为咗支持Paramount，同意为呢单收购进行股权融资，提供404亿美元个人担保，似乎Paramount胜算系咪更大？ 高富金融集团投资总监梁伟民指，近日科技股回升，相信主要系美国日前公布通胀数据后，令减息预期升温，带动科技股升势，但长远嚟讲，估值问题始终系一个隐忧。 至于华纳争夺战，Wyman就话，市场普遍认为Netflix赢面较大，但Netflix股价暂时反应唔大，始终收购价格高，加上现时观众可能较偏好创新剧集、纪录片等，未必着重串流平台嘅IP数量，但收购最主要目的系减少竞争。 |
|
| 梁伟民 |
2025-12-16T10:39 |
投资者观望快出炉嘅经济及就业据，美股3大指数昨晚先升后回，但联储局减息后，市场或憧憬美股年底会再冲高，会唔会再出现板块轮动情况？ 高富金融集团投资总监梁伟民指，美股暂时都只系正常上落，虽然近日市场再次担心龙头科技股表现，例如甲骨文(Oracle)、博通(Broadcom)、英伟达(Nvidia)等，股价近期都比较弱，但始终呢啲股份今年已累积咗唔少升幅，所以回返少少都好正常，市场最近可能担心Oracle嘅人工智能(AI)投资太大，令集团财政状况恶化及引发其他问题。 Wyman续称，市场认为估值贵，导致股价调整系常态，估计2026年会继续出现呢个情况，所以投资者要继续留意情况会唔会明显冷却。 |
|
| 梁伟民 |
2025-12-09T10:01 |
Netflix计划收购华纳兄弟探索(Warner Bros Discovery，WBD)几乎日日都有新发展，继日前传出美国总统特朗普(Donald Trump)表明会介入后，最新又杀出程咬金，派拉蒙天舞(Paramount)提以每股30美元，涉及逾1000亿美元，仲要系全现金收购WBD，出手高过Netflix，被市场解读为“敌意收购”(Hostile Bid)，到底边个胜算大啲？ 高富金融集团投资总监梁伟民指，由于依家情况仍然唔明朗，所以好难预测WBD最落入边个手上，虽然派拉蒙出价更高，但收购部分更多，所以好难估计Netflix股东最后会点拣。不过，Netflix股价昨晚(8日)受压，反映市场担心出价太高，同埋收购内容未必对Netflix吸新客有太大帮助。 |
|
| 梁伟民 |
2025-12-02T09:49 |
美股昨晚(1日)喺12月开局未能有个好开始，3大指数全线下挫，但睇返过往嘅Santa Claus Rally(圣诞行情)，自1950年以来平均升逾1%，而喺圣诞后最后4个交易日及新年后首2个交易日，自1993年以来有67%机会升，今年会唔会出现Santa Claus Rally？ 高富金融集团投资总监梁伟民估计，美股今个12月表现会差啲，始终今年已经升咗好多，3大指数已累升15%至20%，其实去年12月美股都系升唔起，甚至要跌，所以投资者都要小心，因为市场过去两三个月已price in咗好多利好因素，所以要再谷美股向上似乎已冇乜筹码，预期美股今个月会以整固为主。 |
|
| 梁伟民 |
2025-11-25T10:08 |
恒生指数昨日(24日)飙近500点，阿里巴巴(09988)放榜前亦强势，加上中美关系回暖，港股今日(25日)应该都可以继续向上，而阿里业绩系咪都可以带动到大市？ 高富金融集团投资总监梁伟民指，港股今日上返26000点绝对唔出奇，不过，问题系上到26000点楼上之后，仲有几多动力？佢认为，大市气氛及动力仍相对弱，尤其科技股，而科技指数已自高位跌咗15%，反映投资者喺过去两三个月，对呢类股份嘅热情已大幅冷却。 Wyman又指，阿里今日出业绩，市场都系睇实云端业务表现，预期增长会继续理想，但电商方面仍然困难，加上价格战影响盈利，都会拖住其他科技股后腿，甚至有机会令呢类股份进一步弱势。 |
|
| 梁伟民 |
2025-11-21T11:35 |
港股过去1星期跑输咗亚太区股市，虽然恒生指数昨日(20日)终止4日跌势，但只系轻微反弹4点，就算传出内地再连出3招救楼市，港股仍然弹唔起，到底大市依家受咩因为困扰，中日关系恶化系咪主因？ 高富金融集团投资总监梁伟民指，中日关系唔系港股弱势嘅主要负面因素，反而同投资者对中资科技股热情显着降温有关，导致科指回调，睇返技术走势，科指已跌穿200天线，明显处于弱势。 Wyman又话，人工智能(AI)憧憬降温，晶片股由高位回落，连一啲受AI带动而被炒上嘅股份都转弱，继而影响港股整体表现，虽然依家仲有高息股撑市，但估计都唔撑得几耐。 |
|
| 梁伟民 |
2025-11-18T11:09 |
加密货币比特币(Bitcoin)跌势未止，价格一度跌至9.11万美元水平，不过，之前有消息指捷克央行首次买入Bitcoin，就连哈佛大学都喺第3季增持，美国政府刚刚重启，理论上会利好呢类风险资产，但点解币市仍然低迷？ 高富金融集团投资总监梁伟民指，无论加密货币、Bitcoin，好大程度都受市场情绪影响，而最近就较为负面，首先系之前币市大爆仓，资金对币市前景有忧虑，加上市场担心Bitcoin每4年就出现一次大调整，佢相信短期仍会受压。 Wyman又话，睇返技术走势，除非Bitcoin价格未来几个星期可以企稳，市场睇法才会转为中性，甚至较乐观，加上冇特别利好消息，所以价格反覆向下机会较大，后市要留意会唔会喺8万美元水平见底。 |
|
| 梁伟民 |
2025-11-11T11:08 |
美国政府停摆风波有望喺几日之内正式结束，睇返对上一次停摆结束后，即2018/19年，标指、金价喺1个月后分别升咗约5%及约2%，再睇埋历史数据，11月系美股全年表现最好嘅月份之一，今个月都见到具指标性嘅Palantir及英伟达(Nvidia)股价反弹力度好强，市场系咪又将估值贵呢个问题摆埋一边？ 高富金融集团投资总监梁伟民指，市场上星期仍担心科技股估值贵问题，导致相关股份经历咗两日较深嘅调整，但昨日(10日)政府停摆有望结束消息带动，股价出现反弹，但佢认为，宜再观察多几日，睇下市场系咪仍然对估值问题有戒心。 Wyman又话，市盈率(PE)去到咩水平叫做贵，甚至出现泡沫都系好主观，如果同过去10年平均比较，PE确实有啲贵，个别科技公司股价上升幅度，已大幅抛离盈收增长，依家市场就系买呢啲公司嘅“未来”，佢又认为，PE贵会成为美股后市调整其中一个主要藉口，所以仍然要小心。 |
|
| 梁伟民 |
2025-11-04T11:09 |
美股传统10月股灾没有应验，标普500指数自4月初以来更反弹37%，而以往股市每年表现最好的月份是11月，今次会不会反传统有意外？后市部署需要留意甚么？ 高富金融集团投资总监梁伟民指，现在科技股升不停，估值亦越来越贵，开始在一个未必有长期支持的位置，出现忧虑，不过，市场气氛完全无理会估值问题，不少大定单出现，令投资者觉得人工智能(AI)相关概念股会继续火热。 Wyman提醒，来到这个位置，11月要特别小心，始终美股升了一段时间，且升势夸张，无论估值又好、企业背后是否有足够盈利支持又好，对股市支撑都不太足够，目前市场主要是炒气氛，留意这个气氛未来会否冷却或逆转，特别美股业绩期后，市场没有太多新消息再次推动大市。 |
|
| 梁伟民 |
2025-10-28T11:30 |
昨日(27)外长王毅跟美国国务卿鲁比奥(Marco Rubio)通电话，市场乐观情绪高涨，日股、韩股、台股先后破顶，美股3大指数及罗素2000昨晚(27日)齐破顶，但其实投资者心目中都有个底，今次会唔会系反应过大？ 高富金融集团投资总监梁伟民指，乐观情绪升温系合理反应，但当全球股市因为呢个因素而大升，反而要小心会唔会睇得太乐观，虽然中美贸易谈判传嚟好消息，但双方一直以来累积嘅冲突，唔系一次会面就可以解决。 Wyman又话，美方似乎开始让步，不过，美国始终盘算紧点样喺稀土问题上，减低中国嘅制约，若美国未来唔再制中国嘅稀土政策，双方好大机会再“开火”，佢估计，未来呢几个月会较平稳，但唔代表呢个状况可以持续至2026年底，因此，呢个风险一直隐藏喺市场中，虽然短期未必会爆，但投资者仍要小心。 |
|
| 梁伟民 |
2025-10-21T11:17 |
美国政府停摆有望本周结束，美股3大指数昨晚(20日)高收，而“科技7雄”(Magnificent 7)中，终于轮到苹果公司(Apple Inc.)破顶，据Counterpoint Research数据显示，iPhone 17系列喺内地及美国首10日销量，按年增长14%，Apple股价破顶外，集团市值亦升至3.89万亿美元，踢走微软(Microsoft)成为美国市值No.2企业，Apple股价系咪可以继续上？ 高富金融集团投资总监梁伟民指，由于iPhone 17销量好过之前两代，股价短期有支持系合理，但值得留意系，Apple股价8月至今已累升20%，但今年以来只有单位数升幅。 Wyman又话，Apple股价主要受2个因素影响，首先系人工智能(AI)发展仍令市场失望，未消费者冇换机意欲，其次系公司估值喺科技股嚟讲唔算好贵，但逾30倍市盈率(PE)亦唔算特别平，佢预期，Apple股价短线仍有3%至5%上望空间，但要追落后就有一定难度。 |
|
| 梁伟民 |
2025-10-14T11:23 |
美国财贝森特(Scott Bessent)最新指，中美紧张局势已熕缓和，又话中美元首仍有机会月底喺南韩会面，刺激美股昨晚(13日)显着反弹，道指及标指弹逾1%，纳指更升逾2%，但未完全收复之前嘅失地。 高富金融集团投资总监梁伟民相信，市场暂时仍观望事态发展，虽然美方言论转趋温和，令投资者昨日反应乐观，但中美冲突仍处于高风险阶段，尤其系稀土问题，所以要继续关注后续发展。 Wyman又话，中国对美国嘅态度强硬，唔似会轻易让步，双方会唔会再起冲突，关键落喺美国总统特朗普(Donald Trump)身上，佢又话，唔排除中美紧张关系年底或明年初再度升温。 |
|
| 梁伟民 |
2025-09-30T11:07 |
美国副总统万斯(JD Vance)话，美国政府正步向停摆，政府一旦关门，就会影响数据公布。此外，金价又破顶，高见每盎司3800美元，到底美国政府停摆机会大唔大？应唔应该依家追入黄金？ 高富金融集团投资总监梁伟民指，要对停摆有心理准备，始终民主共和两党仍未倾掂数，不过，市场唔使太担心，因为停摆对经济、金融市场唔会造成结构性影响，重点系要睇返停摆嘅时间及点收科。 投资黄金方面，Wyman就话，唔太建议喺美国政府停摆危机时追入黄金，依家避险情绪唔算高涨，债息亦轻微回落，金价上升系因为去美元化，加上担心金价短期升过龙会出现整固，所以唔建议现价追入。 |
|
| 梁伟民 |
2025-09-23T12:37 |
受大型科技股带动，美股3大指数昨晚(23日)再创新高，连续3个交易日破顶，但早段昨晚早段曾出现过沽压，因为圣路易联储银行行长穆萨勒姆(Alberto Musalem)指，考虑到通胀仍然偏高， 进一步减息空间有限，但另一方面，美国总统特朗普(Donald Trump)亲信，由佢任命嘅联储局理事米兰(Stephen Miran)就认为要大手减息，因为要避免经济受损，但市场似乎仍倾向预期美国会继续减息。 高富金融集团投资总监梁伟民指，市场的确对联储局继续减息有憧憬，认为年内好大机会再减两次息，美国今年仲有两次议息会议，就算博其中一次减息嘅机率都高，睇返最新“点阵图”，局内官员预期年底前将减息两次，除非通胀突然飙升。 Wyman又提醒，通胀风险绝对唔可以忽视，因通胀未来一定会反弹，但由于反弹幅度难料，所以未知会唔会阻碍联储局减息，另一个关键因素系美国就业市场。 |
|
| 梁伟民 |
2025-09-16T11:10 |
美国科技股持续强势，“科技7雄”(Magnificent 7)当中，Tesla受大股东马斯克(Elon Musk)大手增持刺激，股价昨日(15日)再炒高逾7%，另一只科技股Google母公司Alphabet亦升逾4%，依家14天RSI已升至近90嘅极超买水平，点睇呢两只科技股前景？ 高富金融集团投资总监梁伟民指，Tesla股价今年有机会破顶，但未必会不断传嚟好消息，首先系业务基本面仍然较差，电动车销售疲弱，估计仍未见底，其次系估值贵，依家市盈率(PE)约250倍，短线而言，虽然投资者乐观情绪高涨，但睇唔到有咩因素可以继续撑起股价。 Wyman又话，“7雄”中较睇好Alphabet，主要系公司估值唔贵，PE仅约20倍，虽然担心科技股升过龙，但Alphabet仍相对平，不过，近期已累升近40%，已经比较夸张，亦相信利好因素已差唔多反映晒，短线建议投资者先食糊，等股价回调返少少时再部署。 |
|
| 梁伟民 |
2025-09-15T11:33 |
Tesla主席德诺姆(Robyn Denholm)喺上周五(12日)确认，行政总裁马斯克(Elon Musk)已完成对特朗普(Donald Trump)政府嘅工作，已重返Tesla工作，又反驳界指马斯克搞政治拖累Tesla销量。至于Tesla股价9月至今累升18%，表现系“科技7雄”(Magnificent 7)之中最强势，Tesla股价系咪可以继续跑嬴？ 高富金融集团投资总监梁伟民认为，Tesla股价近期升得咁靓，可以归功于马斯克回归Tesla，令股东重拾信心，为股价带嚟正面影响。不过，睇返公司基本面，Tesla销量喺全球多个地方持续下跌，当中包括中国，欧洲销售亦明显疲弱，因此，Tesla嘅电动车发展仍未走出困局，毛利仍受压。 Wyman又估计，由于市场憧憬集团嘅无人驾驶及机械人开发，加上减息预期升温，因此，就算唔系有好多利好消息下，Tesla股价仍然强势，所以后市仍要小心。 |
|
| 梁伟民 |
2025-09-09T11:39 |
日本首相石破茂突然喺周日(7日)宣布辞职，投资者忧虑下任首相主张宽松财政及货币政策，日圆汇价昨日(8日)向下，但日本股市持续造好，日经平均指数今日(9日)一度突破44000关，点睇日圆及日股前景？ 高富金融集团投资总监梁伟民指，日股呢两日造好系因为市场认为换首相后，新政府将会加大财政刺激力度谷经济，货币政策有机会转为中性或放宽，甚至鼓励日本央行减息。 Wyman又话，市场已借换新首相炒咗一转，日股升至44000点楼上，相关刺激因素已经反映晒，估计好快就会出现回调。日圆方面，由于美元今年已累跌10%，短期未必会再跌，预期日圆会喺区间横行整固。 |
|
| 梁伟民 |
2025-09-02T11:24 |
阿里巴巴(09988)放榜后被大行唱行，刺激股价昨日(1日)劲升逾18%，更推高恒生指数逾300点，重上25600点水平，不过，大市升势其实唔算全面。恒指其实多次受制26000关，点睇港股后市？ 高富金融集团投资总监梁伟民指，港股后市未必可以再靠科技股，睇返今次业绩期，造好嘅科技股都系以人工智能(AI)、云端业务为主，另一方面，由于电商竞争仍十分激烈，导致相关企业利润率持续受压，因此，京东集团(09618)、美团(03690)短线积弱，不过，由于A股畅旺，令H股前景变得中性。 Wyman又话，喺A股火热下，港股可以跟住一齐炒，又指可以留意晶片股、贵金属或生物科技相关板块，今轮有机会继续向上，虽然估值贵，但短期仍可跟进，若之后气氛转弱就要吼位“落车”。 |
|
| 梁伟民 |
2025-08-29T12:43 |
美国科技股最够份量及压轴登场，人工智能(AI)晶片“股王”英伟达(Nvidia)已经派咗季度成绩表，虽然业绩好过预期，但股价喺榜后受压。点睇Nvidia前景？ 嘉宾高富金融集团投资总监梁伟民指，喺AI Bubble下唔应只睇Nvidia业绩，更应该关注其他科技巨企嘅资本投入，因为Nvidia基本人都系被动，集团可以做到几多生意，都要睇其他科技巨企嘅AI投资趋势，如果呢啲科技巨企每年继续花几百亿，甚至乎过千亿美元投资AI，Nvidia嘅生意一定会继续唔忧做。 Wyman又指，科技巨企嘅AI投资暂时仍未可以变现，依家Nvidia唯一要做嘅事，就系继续保持龙头地位，抛离竞争对手AMD，但睇返集团嘅技术水平，暂时都唔会受到竞争对手严重威胁。 |
|