| 评论员 |
时间 |
内容 |
标签 |
| 陈建良 |
2026-04-10T16:07 |
内地车企销售一哥上季执位，吉利汽车(00175)以70.9万架嘅总销量，力压比亚迪股份(01211)嘅70万架，相隔3年，重夺内地自主汽车品牌销售一哥宝座，对行业或车企系咪意义重大？ 胜利证券首席顾问陈建良指，吉利销售表现的确强劲，但投资者唔会单睇销量，又或系咪重夺龙头地位而作出投资决定，因为两家车企嘅策略完全不同。佢续指，吉利唔少汽车零部件靠组装，唔系完全自主生产，反观比亚迪除咗玻璃及车胎外，几乎所有零部件都已经实现自主生产，令集团喺控制成本方面有绝对优势，如果纯粹打“内卷”价格战，比亚迪应该会赢。 但KL认为，依家市场焦点已转向海外销售，令吉利同比亚迪势均力敌，睇返数据，吉利上季出口增速及比例大升，就解释咗点解股价近期大幅跑赢其他电动车股。 不过，陈建良建议投资者不妨保守啲，喺现时市宽唔高之下，去高追一只股份会有风险，亦反映市场资金非常集中，吉利股价现时呈上上落落、波幅收窄嘅态势，仍未到重拾升浪嘅时机，所以投资者宜审慎部署。 |
|
| 陈建良 |
2026-03-20T16:10 |
美以伊战事唔经唔觉即将进入第4个星期，有唔少迹象显示美国总统特朗普(Donald Trump)唔想战事拖得太耐，之前都放过风话战事好快就会结束，不过，伊朗到依家态度仍然都好强硬，斗长命、唔伯捱打系伊朗嘅强项，呢场战事对环球股市，以至经济嘅影响已逐步浮现，港股近日持续受压，恒生指数守唔守得住25000点关口？ 胜利证券首席顾问陈建良表示，全球股市都不宜睇得太乐观，港股方面，虽然近日有唔少公司交出唔错嘅业绩，但估计恒指仍会下试25000点，以地平线机器人(09660)为例，出完业绩后，股价今日(20日)一度劲升8.5%，高见7.87元，但之后升幅逐步收窄，仅升约1%，佢认为，可能要等大市跌得更多时，交到靓业绩嘅公司，股价先可以弹得起。KL又估计，恒指3月好大机会跌穿25000点。 美股方面，陈建良认为，中东战事对美国经济嘅影响仍未完全反映，依家唔少中东资金都有投资美股，如果战事持续下去，资金有机会减少流入美股，到时美股弹完就会掉头向下。 |
|
| 陈建良 |
2026-03-13T16:08 |
开源人工智能代理(AI Agent)OpenClaw近期爆红，内地称为“龙虾”，更迅速掀起一股“养龙虾”热潮，不过，内地多个部门先后针对呢只“龙虾”发风险提示，甚至限制国企及政府机构喺办公室使用OpenClaw。不过，呢股“龙虾热”似乎持续，内地几大科技巨头都推出相关应用，包括阿里巴巴(09988)旗下阿里云手机版JVS Claw、腾讯控股(00700)嘅WorkBuddy、百度集团(09888)嘅DuClaw，边问内地科企可以喺呢场“龙虾竞赛”中跑出？ 胜利证券首席顾问陈建良指，点解中国要禁？OpenClaw同互联网冇关，只系装喺自己嘅电脑，但内地生态同外国唔同，好多人屋企冇电脑，好嘢都喺手机里面，所以就装喺公司电脑，可能会有潜在安全隐患。 KL又话，内地好多大平台都有自己嘅OpenClaw，即系唔同版本，佢认为，冷却咗之后，可能会有多啲唔同嘅使用，当产品化之后，估计唔会容许“自己装自己用”，应该会用云端方式去使用，会成为一啲云端产品，虽然今日(13日)大市向下，但之前沽得比较残嘅科技股，例如阿里及腾讯都“郁下”，所以长远系应该会受惠，加上依家内地好多Super App，即系一个App就乜都做到，例如微信小程序，呢类平台系会相对受惠。 不过，KL认为，4月中之前都唔可以对市况睇得太乐观，等情绪完全冷却后，唔需要急于一窝蜂去“养龙虾”。 |
|
| 陈建良 |
2026-02-27T15:38 |
港股今日(27日)升得唔错，但恒生指数2月埋单好大机会要跌近3%，科技指数更累跌近10%，录得2024年1月以来最大单月跌幅。今年以来，资金为补捉人工智能(AI)浪潮，由中资科技巨头转投AI新力军、纯AI营运商，同埋传统股，展望3月，呢个势头会唔会持续？ 胜利证券首席顾问陈建良指，今年本地地产股处于复苏阶段，银行股亦升咗唔少，市场反而开始担心点解中国科技发展得快，但科指仲要跌，主要系内地科企开始“内卷”，又认为科企“内卷”好难停止，所以科技股系情有可原。 对于AI新力军及纯AI营运商，KL认为呢股热潮会慢慢消退，佢又认为，最近上市嘅新股已经唔及年初啲，依家竞争已经非常激烈，令人担心又出现“内卷”，因此，佢唔睇好3月至4月初市况。 |
|
| 陈建良 |
2026-02-13T15:23 |
港股今日(13日)承接美股昨晚(12日)跌势，恒生指数今日(13日)低开近400点，午后跌幅一度扩大至近600点。北水好快就“放年假”，近年喺北水“缺席”下，港股好多时反而有得弹，点睇港股后市？ 胜利证券首席顾问陈建良认为，港股农历新年后反弹机会唔大，北水“缺席”买卖盘都会减少，成交较淡静亦好正常，因此，佢认为北水系咪“缺席”同大市升跌冇太大关系联。 KL又话，虽然好多股民期待新年后“开红盘”，但佢认为纯粹攞个好意头。 |
|
| 陈建良 |
2026-01-30T15:39 |
港股今年1月开局表现强势，恒生指数之前连升7个交易日，更一度冲破28000关，大市今日(30日)显着回落，到底依家港股市况系咪健康？ 胜利证券首席顾问陈建良指，恒指今个月一度抽穿去年高位，所以回套都系预咗，佢估计，恒指会落返27000点水平，会先进行调整，其实大市升下跌下，又识得回套，反而唔会太快消耗晒升市动力。佢又话，睇返恒指1月走势，虽然有得升，但未算升得太急，所以市况仍然健康，又估计1月低位有机会系全年低位，但仍建议投资者喺2月、3月唔好太进取。 KL又提及，今年市况可能有1个“特色”，可能未必由最熟悉嘅大型成分股领跑，反而一啲非指数成分股有机会跑出，并留意一啲有基本面支持，或有结构性优势嘅板块，因为呢啲股份嘅表现可能更突出。 |
|
| 陈建良 |
2026-01-16T16:54 |
2026年初至今，本港地产及收租股股价表现走强，摩根大通表示，地产股整体反弹后，大部分已恢复到合理水平，部分估值更是偏高，地产板块是否还适合部署？ 胜利证券首席顾问陈建良指，香港商业地产中，酒店会较快复苏，因为在香港举行的商务会议或者展览数目不断上升，另外，香港留学生住宿需求大，不少投资人开始收购二、三线酒店，改为学生宿舍放租。他认为，未来香港酒店的供应会按年减少，现时酒店房间的入住率或者房租已经开始呈上升趋势，相信酒店需求会持续增加。 KL建议，投资者可拣选资产净值折让(NAV Discount)幅度大的地产发展股做中线部署，例如新世界、九龙仓置业(01997)和长实集团(01113)。 |
|
| 陈建良 |
2026-01-02T18:07 |
今日(2日)系港股2026年第1个交易日，开局表现强势，依家大行及市场都继续看好中资股。恒生指数喺2025年累升逾27%，系其中1个表现靓仔嘅股市，恒指今年开局有个好开始，点睇新一年表现？ 胜利证券首席顾问陈建良认为，恒指今个月头2至3个星期，应该维持到升势，主要由喺靠去年第4季表现较差嘅科技股带动，因为腾讯控股(00700)及阿里巴巴(09988)呢啲重磅股，对拉动指数非常重要，呢啲股份大升，就会推高大市。 KL提醒，依家有大量科技相关新股排队上市，如果呢啲新股一直向上，到时唔止科指升，亦可以带动整体大市造好。 |
|
| 陈建良 |
2025-12-22T16:05 |
2025年即将完结，好快就踏入2026年，年底前股市会点行？点睇明年大市嘅气氛？ 胜利证券首席顾问陈建良指，美股及港股喺年尾呢几个星期观望气氛浓厚，但唔排除今年最后一个星期会有“Year End Rally”，如果大市喺圣诞后真系弹高，2026年第1季好大机会回调，所以唔弹反而更安全。 KL又话，今年唔少新兴市场都跑赢美股，未来最大浮动因子(Swing Factor)系美国联储局明年嘅货币政策取向，近期债息向上，反映市场唔相信美国嘅通胀数据。 佢续指，如果联储局挽回唔到市场信心，美债、美汇都会同时跌，喺唔暴跌嘅情况下对新兴市场仲有利，不过，若失业情况严重，局方因经济陷入衰退而减息，新兴市场就唔再系“避难所”。 |
|
| 陈建良 |
2025-12-10T16:07 |
百度集团(09888)旗下昆仑芯最新推出嘅自研P800晶片，市传唔系传统GPU晶片，而系专门针对深度学习嘅ASIC晶片，并指已有电讯、金融等行业客户订购，昆仑芯可唔可喺一众国产晶片中突围而出？ 胜利证券首席顾问陈建良指，现时除咗百度，阿里巴巴(09988)都有涉足ASIC晶片，呢类产品较易向外供应，而AI训练晶片“国产GPU四小龙”都有生产，但仍未可以同英伟达(Nvidia)嘅H200比较，不过，百度分拆昆仑芯融资系无问题。 KL认为，同ATMXJ比较，百度晶片业务上市嘅机会大，亦会系最早，亦解释咗点解百度系呢个板块嘅强势股，相信市场会对百度有一定憧憬。 |
|
| 陈建良 |
2025-11-28T15:58 |
今日(28日)系港股11月最后一个交易日，恒生指数喺月结日反覆向下，继续受制26000关，至于美股11月走势同港股差唔多，截至昨日(27日)止，标指今个月仅微跌0.4%，但科技股走势转差，点睇港股及美股12月嘅表现？ 胜利瑞柏基金管理合伙人暨投资总监陈建良估计，美国联储局12月减息后，大市就会稳定返，到时可以再夹返上去，如果下次议息会议前冇特别新消息传出，估计美股会轻微反弹。 港股方面，KL指出，依家市场关注科技股现金流多过前景，同埋担心内地科技股进步得太快会引爆“内卷”，令呢啲公司好难有钱赚，喺暂时未有明确方向前，港股可能要再横行多一段时间。 |
|
| 陈建良 |
2025-11-14T15:51 |
腾讯控股(00700)昨日(13日)交咗份靓季绩，第3季赚逾631亿人仔，当中以游戏业务增长最标青，游戏收入按年升15%，海外更按年急升43%，首度突破200亿人仔，但值得留意系，集团资本开支减少，高盛估计，系同晶片供应有关，而腾讯亦下调全年资本开支指引，集团人工智能(AI)策略系咪有变？ 胜利证券首席顾问陈建良指，腾讯本身唔需要咁多资本开支，因集团已经有一个完整嘅微信生态圈，游戏、广告、社群、支付等功能集于一身，腾讯嘅AI发展有“后发先至”嘅优势。 KL又话，依家因为GPU缺货先导致市场疯抢，就算腾讯迟啲先买GPU，仍可以做到强劲嘅产品，市场唔需要担心腾讯嘅能力，佢又估计，腾讯股价有力跑赢恒生指数。 |
|
| 陈建良 |
2025-10-31T15:54 |
“习特会”中美达成第5轮经贸协议，美国联储局又一如预期减息0.25厘，不过港股不升反跌，10月份恒生指数暂时跌约3%，连升5个月的势头会否终止？11月资金会否以保守为主？ 胜利证券首席顾问陈建良指，10月中内地限制稀土出口的消息一出，资金开始转为流入“中特估”，尤其是能源股，能源股优势在于电力比美国稳定，即使全球发电量庞大，内地仍然继续开发新能源，所以最近低估值的能源股上升，而科技股出现回落。KL估计，11月资金会持续流入“中特估”。 |
|
| 陈建良 |
2025-10-24T16:00 |
四中全会为中国未来5年发展定调，大方向包括科技自立自强、推动新质生产力、提振内需等，当中有咩投资机会，又或者需要注意嘅地方？ 胜利证券首席顾问陈建良指，睇返“十五五”规划嘅大方向，可以确认中央未来会重点发展高质量工业，例如航天、晶片及机械人等，相信相关科技股可以受惠，不过，由于内需唔系单靠政策就可以谷得起，所以内需股未必太受惠。 KL提醒，投资者唔好见政策一出就急于买货，因为呢啲政策唔系即时执行，最多只可以作为参考，去做未来3至5年嘅投资部署。 |
|
| 陈建良 |
2025-10-03T17:22 |
虚拟货币8月中破顶后，静咗个几月，近期价格自低位反弹，比特币(Bitcoin)价格昨日(2日)重上12万美元，以太币(Ethereum)亦上返4.4万美元。Bitcoin一直有“4年周期”呢个说法，即每隔4年发行量就会减少，改变供需平衡，继而推高Bitcoin价格，对上一次“减半”系去年4月，Bitcoin依家处于周期咩位置，投资者可以点部署？ 胜利证券首席顾问陈建良表示指，依家市场准备迎接Bitcoin熊市，因为Bitcoin“减半”后，一般会再升十几个月，然后就会见顶回调，进入“寒冬期”，估计价格会大跌60%至70%，甚至更多，如果相信“4年周期”就应该减持。 KL又话，依家全球唔少国家已接受Bitcoin作为储备货币，其他币种如以太币等亦有不同作用，又指依家机构投资者对虚拟资产嘅投入比例仍然好低，但相信去美元化会带动需求，所以佢睇好今季Bitcoin以外嘅虚拟资产表现。 |
|
| 陈建良 |
2025-09-12T16:02 |
港股踏入9月持续强势，恒生指数已升至逾4年高位，今朝(12日)大幅高开逾450点后，升幅一度扩大至近500点，高见26585点。星展最新上调恒指12个月目标至28000点，又话喺最牛嘅情况下，恒指有望升至30500点，但有3个前提，就系更明确基本面稳定迹象、更强刺激政策，或有更充裕流动性。恒指系咪有力再上？ 胜利证券首席顾问陈建良指，现时全球大部分机构投资者都低配A股及港股，若恒指升势持续，将会吸引一批原本冇留意A股及港股嘅资金流入。佢又估计，恒指将逐步推升，但如果升得太急，例如1个星期升逾1500至2000点，投资者就要小心大市可能会出现大调整。 |
|
| 陈建良 |
2025-09-05T16:26 |
“人形机械人第一股”优必选(09880)日前宣布夺得一份2.5亿人仔嘅合同，刺激股价大升，但其实公司仍蚀紧钱，点睇内地机械人概念股前景？呢类股份系咪值得投资？ 胜利证券首席顾问陈建良指，中国发展机械人绝对有优势，制造机械人需要好多雷达及感知组件，而雷达等相关零件被中国垄断，量产雷达自然令价格大幅下跌，对呢啲企业有利，中国生产制造机械人元素嘅供应链非常完整。 KL又话，昨日(4日)机器人相关股下跌，主要系中央压制投资者对A股炽热气氛，虽然机械人产业长远会发展得好，但依家唔系追入好时机，佢建议，想增加港股配置嘅投资者，可以留意一啲估值平或“中特估”概念股。 |
|
| 陈建良 |
2025-08-22T16:01 |
【Now财经台】全球瞩目嘅Jackson Hole全球央行年会，将会喺美国时间周四至周六(21日至23日)，喺怀俄明州杰克逊湖旅馆(Jackson Lake Lodge)举行，重头戏系美国联储局主席鲍威尔(Jerome Powell)，将会喺本港时间今晚10点发表演讲，市场可唔可喺佢嘅言论中搵到减息线索？点睇美股后市？ 胜利证券首席顾问陈建良认为，联储局9月好大机会唔减息，又认为投资者未来3个月不宜对美股睇得太乐观，建议减少持仓。 KL续指，市场依家受关税、俄乌战事等因素影响，仍有好多不确定，相信鲍威尔同美国总统特朗普(Donald Trump)嘅角力会令股市出现动荡，而美股系倾向升慢急跌，如果持有大量贵价股会好难转身。佢又估计，美股有机会出现大调整，其中，纳斯达克100指数有机会挫3000点至21000点水平。 |
|
| 陈建良 |
2025-08-08T15:31 |
九龙仓置业(01997)昨日(7日)派咗中期成绩表，基础盈利近乎持平，主席吴天海话，本港零售及餐饮业仍面对挑战，估计零售市道下半年好难出现突破性发展。此外，由于市道唔理想，生意难做，唔少本地银行都频频Call Loan。对九置未来营运有几大影响？ 胜利证券首席顾问陈建良指，九置业绩最能够反映内地旅客心态，广东道一直系内地旅客主要“朝圣地”，睇返九置业绩，上半年海港城收入及盈利变动不足1%，其中，酒店业务更录得轻微增长，虽然冇突破性发展，但未至于好差，加上海港城系大型商场，可以举办多元化活动，会较其他商场有优势。 KL又话，虽然恒生银行(00011)及其他港资银行有借钱畀地产商，但更多系借钱畀投资者买地铺或细商场铺，呢类铺位灵活性唔及大商场，加上租客抗逆力低，变相要减租吸引租客，导致铺位估值下跌，最终被银行Call Loan。不过，KL指，呢类Call Loan唔会影响大商场，反而当零售回稳时，大型商场可以更占优。 |
|
| 陈建良 |
2025-07-30T15:56 |
恒生指数喺今日(30日)期指结算日继续向下，一度泻逾400点，跌至25000点边缘，值得留意系，北水日录得净流入，后市系咪继续靠北水撑？有咩板块值得留意？ 胜利证券首席顾问陈建良指，港股8月会进入业绩期，虽然之前估计港股可以趁势再上，但结果今个星期仍要回调，特别系之前升得多嘅科技股，同埋车股都要跌，但医药股就升返上嚟，反映板块不停轮动。 KL又话，虽然北水连日录得净买入，但只系反映多咗内地投资者或资金参与港股，而港股其中一个好处系冇“升/跌停板”机制，睇返A股，当股份单日触及升或跌10%嘅限制，就必须停牌，而内地推出“反内卷”政策，受惠股或会大升，基于“升/跌停板”机制嘅考虑，投资者就会偏向拣喺香港上市嘅同类股份，因为股价都有机会受惠于政策。 |
|
| 陈建良 |
2025-07-25T15:27 |
“反内卷”已成为国策，中央昨日(24日)再出手，发改委及市监局就修订《价格法》公开征求意见，明确不正当价格行为，花旗认为，修订草案利好太阳能行业，因为内地大部分太阳能光伏产品都系以蚀本价出售，究竟内地点解决“内卷”问题？ 胜利证券首席顾问陈建良指，因为未来嘅人工智能(AI)及高质素生产力，都需要大量低成本电力供应，所以每个国家都用紧自己嘅方法抢占紧能源市场，美国系狂开采石油，而内地就靠太阳能。 KL续指，太阳能行业已经斗到烂晒，喺过去几年都冇见过人LONG，斗得太烂时就要蚀住卖，即中国要贴钱畀外国增加能源供应，佢相信，中国会出手禁止呢个情况出现，反而会crack down太阳能产能，然后发展垃圾发电、核能发电、水力发电。 佢认为，内地今次会花更多精力喺能源基建上，因为呢啲行业喺“反内卷”及大部分资金严重不足下，相对容易有曙光。 |
|
| 陈建良 |
2025-07-18T16:04 |
虽然中央不断出招力谷及扩大内需，但消费仍相对疲弱，原因都离唔开价格战及“内卷式”竞争，如果情况持续，长远更会影响内地经济发展，投资者做部署时有咩要留意？ 胜利证券首席顾问陈建良指，过去一段时间经常听到“内卷”呢两个字，即系竞争非常激烈，基本上市场谂得到嘅行业都有“内卷”，外卖平台、电商，甚至人工智能(AI)都有。 KL又话，面对呢个情况，相信投资者要减持嘅股份都已经减持晒，见到过去两个月嘅投资方向都系避开“内卷”严重嘅板块，转拣有定价权、“内卷”情况轻微嘅股份。 佢又估计，8月嘅投资方向都会偏向拣“反内卷”嘅行业，而“内卷”相对轻微嘅行业板块。 |
|
| 陈建良 |
2025-06-27T15:27 |
恒生指数今年暂时累升近21%，虽然第2季经历过4月美国总统特朗普(Donald Trump)突然发动关税战，以及中东局势急升温，但单计第2季，恒指仍升5%，点睇下半年走势？边啲股份买得过？ 胜利证券首席顾问陈建良指，美国关税战仍然唔明朗，而中国制定嘅经济措施就要睇关税战嘅发展，佢估计，恒指第3季将会维持“慢升急跌”格局，导致长线资金要继续坐货，但反而对港股有利。 KL又话，恒指第3季有机会见25000点，又话二、三线股可能会跟住唔同主题炒作，尤其系二线科技股及个别医药股。此外，亦可以留意第2季表现唔好嘅股份，例如电动车股，当唔同主题轮流炒嘅时候，呢啲股份有机会受惠。 |
|
| 陈建良 |
2025-06-13T16:06 |
以色列接连空袭伊朗，伊朗亦表明会报复，外电形容今次系上世纪80年代两伊战争后，伊朗遭受最严重嘅袭击。中东局势持续恶化，港股亦连跌两日，恒生指数今日(13日)失守24000关，并插穿10天线，一度低见23774点。不过，地缘局势急升温刺激金价、油价急升，金矿及石油相关股亦炒上，依家应唔应该追入呢啲板块？ 胜利证券首席顾问陈建良指，港股无可避免会出现调整，估计恒指高低波幅约500至1000点。佢又话，唔建议投资者追入今日大升嘅油股，反而可以留意一啲今日会跟大市跌，但长线值得睇好嘅股份，尤其系可受惠于人工智能(AI)嘅二线科技股，先可以做到低买高沽。 |
|
| 陈建良 |
2025-05-30T16:08 |
美国关税政策执行情况陷入乱局，美国联邦巡回上诉法院昨日(29日)就特朗普(Donald Trump)政府提出上诉，暂时搁置美国国际贸易法院(Court of International Trade)日前叫加关税嘅裁决，即上诉期间关税继续生效，不过，美股昨晚反应唔大，港股今日(30日)更回套返昨日因关税暂缓而反弹嘅升幅，点解会出现呢个情况，港股即将踏入“六绝月”，投资者应该点部署？ 胜利证券首席顾问陈建良指，特朗普上任后，市场一直关注佢喺社交平台X嘅言论，因为觉得佢喺X讲嘅嘢都会执行，但经过呢几个月，发现特朗普嘅言论其实系一种讨价还价嘅策略，另一方面，美国总统嘅权力系会受到限制，佢讲嘅嘢未必可以完全执行到，令市场反应愈嚟愈平淡，KL相信，呢个情况将会持续。 港股方面，KL估计，要小心6月上旬第1个突破有机会系假突破，投资者唔好跟车太贴，亦唔好对一啲消息太敏感，至6月下旬或会出现同美债及关税嘅传言，佢又认为，6月尽量避免追细，亦可能会出现资金轮动情况。 |
|
| 陈建良 |
2025-05-21T15:29 |
三生制药(01530)昨日(20日)日公布，同辉瑞(Pfizer)签独家许可权，而辉瑞有机会入股三生制药，刺激三生制药股价急升。个别药股有正面消息利好整个板块投资气氛，内地药企有一定水平，又有成本优势，连外资都睇中，内地医药业前景系咪可以继续睇好？ 胜利证券首席顾问陈建良认为，内地人口老化问题令医药需求增加，而人工智能(AI)协助开发新药，逐渐取代进口药物，因此，内地医药股长远前景值得睇好。佢又指，现时唔少国家都倾向购买较平嘅内地药物，令内地药企攞到更多出口生意。 不过，KL认为，内地生物制药股或创新药股嘅portfolio唔及外国公司，而内地药企又要持续面对内卷问题，令投资者会较难预测药股走势。佢提醒，对药股有兴趣嘅投资者宜打散嚟买，佢相信未来整体药股嘅市值膨胀机会仍然好高。 |
|
| 陈建良 |
2025-05-16T16:46 |
阿里巴巴(09988)上季收入按年增长逾6%，经调整EBITDA就按年增长逾35%，其中，淘天客户管理收入(CMR)按年增长12%至710亿人仔，好过预期，阿里股价今日(16日)显着受压，一度重挫6.6%，险守120元，到底业绩出咗咩问题？ 胜利证券首席顾问陈建良指，阿里第4季业绩收货，其中，电商业务表现唔错，但电商盈利增速反映内地经济及消费趋势仍需时解决，亦要面对竞争对手京东集团(09618)、美团(03690)及拼多多嘅补贴抢客，加上市场对人工智能(AI)投入及业绩期望过高，又担心电商业务可能会受美国小额包裹关税影响，呢啲都反映喺股价上。 KL认为，阿里AI业务未来会受惠于阿里云增长，但由于阿里云占比较细，仅约10%，依家占比最大仍然系电商，因此，阿里需时修复估值。 |
|
| 陈建良 |
2025-05-02T14:57 |
近期不断传嚟为关税降温嘅消息，包括市传美国多次释出谈判讯号，中方就回应指，依家正在评估，似乎中美展开谈判现曙光，加上美国多家科技巨企季绩靓，带动股价业绩后造好，继而推升美股，其中，道指近期已自低位累计反弹逾3000点，今轮反弹可以持续几耐？不过，关税问题时好时坏，投资者应该点部署？ 胜利证券首席顾问陈建良认为，美股今轮反弹应该已接近尾声，早前大跌系因为市场担心关税问题，但之后传出中美谈判消息，更指会大幅下调关税，令市场开始变得乐观，带动美股反弹。 但KL认为，由于最终结果仍然系未知之数，因此，佢估计，美股5月市况会开始变Chok，但波幅会持续收窄，建议投资者高沽低买。 |
|
| 陈建良 |
2025-04-11T15:31 |
关税战升温之际，美股连日大波动，上日(10日)公布的美国3月消费物价指数(CPI)反映通胀回落，减息憧憬提高，但国债孳息率仍没有下跌，这些现象是否反映市场对美债及美金资产的可信性有所质疑？ 胜利证券首席顾问陈建良指，虽然昨日公布了CPI，但市场并没有太大关注，核心CPI按年放缓到2.8%，全线回落，正常情况下通胀受控后会减息，国债随之回升，但昨日CPI数据明显回落，美债却持续下跌，以往若面临经济衰退情况，资金都是流去美债和美金，但今次特朗普(Donald Trump)不断升温的关税政策导致美债重挫，所以市场担心美债现在是否还是终极避险资产。 KL又认为，美国现在面对两难，情况可能会维持一段时间，而在特朗普暂缓部分国家关税90日期间，金融市场的动荡会稍微缓解，但稍后时间可能会再次紧张起来，不排除是由国债市场引起，或会引致流动性问题，投资者需要有些警惕性。 |
|
| 陈建良 |
2025-03-21T16:02 |
港股继昨日(20日)急泻逾500点后，今日(21日)仍未止跌，恒生指数更一口气跌穿10天及20天线，插穿24000关，仲有约两个星期就踏入第2季，点评估恒指第2季表现？Long Short策略合唔合适？ 胜利证券首席顾问陈建良估计，恒指第2季会喺22800至25300点上落，依家港股Beta值正在下调，Beta值一般是用嚟衡量一只股份嘅风险大，佢认为，第2季唔会出现齐升齐跌嘅局面，个股表现会较为分化。 KL建议，做多啲Long Short及区间交易(Range Trade)，过咗3月又会有一批公司出业绩，相信市场会较为理性，并会对业绩有反应，因此，佢估计，港股第2季唔会暴泻，但亦好难日日创新高。 |
|
| 陈建良 |
2025-03-07T17:59 |
“两会”首次将稳住股楼写入政府工作报告，而《新华社》亦喺“两会”开幕前发表一篇题为“习近平:我是一贯支持民营企业的”文章，系咪反映再度重视民企？另一方面，内地人工智能(AI)模型百花齐放，AI领域会唔会出现内卷情况？ 胜利瑞柏基金管理合伙人暨投资总监陈建良表示，中央领导层对民企态度改变，足以令成个市场恢复，因为好少国家只靠国企或资源垄断性企业撑起成个市，因为好难产生一个好强劲嘅增长，不过，因为民企有能力去尝试唔同的机会，而环境又令佢哋有呢个机会，呢方面系重要，今次政府工作报告加入股楼，意味未来对民企嘅政策带嚟支持，其实楼市依家都稳定返，一线城市销售都好返啲，但依家冇乜人炒楼，已经帮到个市场，因为内地储蓄率一向唔低，涌返啲钱出嚟已经好足够了。 AI方面，KL认为，应着重会用到AI嘅二线科技股。 |
|
| 陈建良 |
2025-02-21T15:54 |
阿里巴巴(09988)昨日(20日)派咗一份亮丽嘅季度成绩表后，股价升势持续，今日(21日)一度飙近15%，迫近140元关口，首席执行官吴泳铭指，未来3年会大增人工智能(AI)嘅投入，睇返股价表现，市场除咗满意呢份成绩表外，相信亦睇好集团AI发展前景，系咪都唔怕高追？此外，哔哩哔哩(B站)(09626)上市后终于首次实现季度盈利，股价前景系咪都可以睇好？ 胜利瑞柏基金管理合伙人暨投资总监陈建良认为，阿里业绩都算交到货，由于集团喺AI方面投入咁多资金，依家阿里旗下通义千问及DeepSeek喺大型语言模型相对较领先，加上阿里受惠于电商呢棵摇钱树，所以市场会对阿里较有信心，继而憧憬阿里嘅AI发展，但佢又认为，投资者唔应该高追阿里，宜等股价回落返先再做部署。 B站方面，KL觉得公司录得盈利，除咗动画方面受惠于AI，亦同Z世代用户有关，因为随着Z世代用户成长，佢哋嘅消费力提升会带动B站游戏业务盈利，不过，同阿里情况一样，B站股价已升咗唔少，因此，投资者宜等股价回调后再入手。 |
|
| 陈建良 |
2025-02-07T18:24 |
恒生指数今日(7日)重上21000点，突破去年12月10日高位，暂时睇嚟“中美贸易战2.0”似乎港股冇乜影响，虽然恒指冇破顶，但港股今轮升势相比去年9月至10月期间，内地推出救市组合拳时出现嘅大升市，表现系咪更实净？ 胜利瑞柏基金管理合伙人暨投资总监陈建良相信，今轮升浪同去年嗰浸升浪唔同，今次唔系一个流动性风险(Liquidity Driven)嘅升浪，今次系市场担心系咪有部分中资科技股及消费股嘅Fundamental真系变好，投资者介乎信同唔信之间。不过，由今年1月到依家，恒指未有一日系升得特别多，依家系技术性牛市，投资者唔使太心急去追。 KL又指，可以等港股回一回气之后，再留意市况如何，因为市场都追求增长，唔能够一味靠平，同埋靠啲钱冲入嚟，依家大家开始觉得中国喺人工智能(AI)方面有优势，因此，市场会投资返非国企嘅私人企业，令A股及港股市况好转，不过，指数未必会反映相关情况。 |
|
| 陈建良 |
2025-01-17T16:17 |
依家全球焦点都落喺特朗普(Donald Trump)身上，因为佢下星期一(20日)就会正式宣誓就任美国总统，市场非常关注佢嘅政策，同埋针对唔同范畴及国家点出招，其中，加关税会唔会系佢首要任务？税率最终会唔会缩水，系咪早前传出嘅渐进式加关税等，都系全球焦点。如果睇返金融市场表现，其中，美股近日表现都反映市场持观望态度。 胜利瑞柏基金管理合伙人暨投资总监陈建良指，美股依家的确系相当观望，市场过去一段时间已经对特朗普上场后嘅政策作出唔同预测，美股喺2024年10月就特朗普当选炒咗一转，依家外界就睇紧特朗普政策会唔会有副作用，同埋真系会执行。佢又话，美股跌得多又会弹返啲，升得多又会回套少少，反映观望气氛都几浓，例如美国通胀问题，市场有时好惊，但有时又觉得唔使太担心。 KL估计，特朗普上任第1个月关税政策就会出炉，但唔系“晒冷”一下子加60%关税，应该系加少少，如果对方唔执行某啲嘢或开放市场，90日或180日后再加关税，其实特朗普好钟意估一样嘢，就系睇准对方“最痛嗰点”质落去，对方如果觉得痛，佢就会叫对方让步，特朗普就会缩手，变相系佢冇做过乜嘢已有收获，呢个系佢嘅惯技。 |
|
| 陈建良 |
2025-01-10T16:05 |
公开招股超额认购近6000倍，史上第3大“超购王”，全城疯抢嘅玩具新股布鲁可(00325)今日(10日)首挂，股价表现十分对办，更一度变成“红底股”。事实上，近期招股嘅新股，好多只认购反应都好热烈，虽然呢啲热爆新股上市后，唔系只只都对办有好表现，但系咪反映新股市场喺2025年可以全面复苏？ 胜利瑞柏基金管理合伙人暨投资总监陈建良相信，内地监管当局未来会为更多内企境外上市“开绿灯”，香港就系主要选项，加上依家喺美国挂牌嘅中概股，亦有诱因嚟香港上市，呢啲股份会成为新股市场嘅催化剂，佢估计，今年港股嘅新股市场将会比前几年炽热。 KL补充，虽然新股类型多元化，亦预期今年会好多新股排队上市，但优质嘅新股好难抽得多，质素唔好嘅又未必会入飞抽，加上部分新股上市后跌穿招股价，所以佢倾向观望新股市场，好少“落场”抽新股。KL又提醒，不妨多留意新式零售股，因为业务较创新会有较大市场。 |
|
| 陈建良 |
2024-12-27T15:32 |
港股喺年底终于收复20000关，2024年收炉时，恒生指数有机会扭转连跌4年嘅劣势，依家市场正静待应该喺明年3月召开嘅“两会”，而“两会”前会进入政策真空期，点睇港股2025年开局表现？系咪倾向睇淡？ 胜利瑞柏基金管理合伙人暨投资总监陈建良估计，中央将因应农历新年期间整体消费，以及春节假后复工数据做部署，若消费数据向好，就唔需要推咁多刺激政策，反之亦然，所以的确会进入一个相对冇讨谈空间嘅时间。 KL续指，估计恒指明年较大机会呈横行格局，但同过往慢慢飘落去嘅横行唔同，因为外资唔会喺经济啱啱复苏后，就即刻投资港股及A股，所以佢认为港股明年唔会升好多，但亦唔会出现资金大举流走或沽空嘅情况。 佢又预期，港股明年板块轮动会几明显，唔同板块会轮流炒上，而且系短线升完一浸就跌，所以较难捕捉政策市反弹，佢建议投资者明年仅适量参与，唔好太进取。 |
|
| 陈建良 |
2024-12-13T15:40 |
港股昨日(12日)反弹，因为对中央经济工作会议有憧憬，其中，内需股表现最抢镜，不过，中经会结束后，恒生指数今日(13日)又跌过，午后更一度插穿20000关，泻逾400点，可能同会议仍然冇提及一啲实质数字有关，大行亦指，对中经会冇再提及具体楼市去库存措施有啲失望。其实中经会结果系咪预期之内？ 胜利瑞柏基金管理合伙人暨投资总监陈建良指，市场对中经会有两方面嘅预期，首先系希望中央扩大财政政策，结果冇提及，其次系希望有实际数字交代，但亦都冇公布，就令唔少投资者开始质疑，之前提出嘅政策系咪可以令房地产市场止跌回稳。 KL又指，其实市场由始至终嘅关注点都系中央救市、救经济嘅措施，到底成效有几大，依家比唔到个预期市场，有负面反应都系好正常，佢估计，恒指20000关好难守得住，但大市波幅年底好大机会慢慢收窄返。 |
|
| 陈建良 |
2024-11-29T15:34 |
国家医保局昨日(28日)首次就医保药品目录调整举行新闻发布会，并喺会上公布2024年国家医保药品目录调整情况及新版医保目录，医保局指，会以“前所未有嘅力度支持创新药”，背后原因系咩？整体又对中国药企有无帮助？ 胜利瑞柏基金管理合伙人暨投资总监陈建良指，内地首次举行发布会系想表示国家会支持医疗板块，令市民能够买到新生物制药。此外，医保局亦容许新生物制药适量加价。整体而言，国家希望令内地医疗水平上升，市民对未来嘅忧虑减少，从而带动消费上升。 KL续指，美国生物安全法案虽然禁止美国生物公司同中国企业合作，但欧洲一啲福利较为完善嘅国家，仍然需要靠中国生物制药公司提供廉价药物，因此，KL认为法案令美国药厂成本提高，最终系损害紧美国，相反对内地其实系有利。 |
|
| 陈建良 |
2024-11-15T15:57 |
特朗普(Donald Trump)胜出美国总统大选后，内阁及主要官员提名陆续曝光，睇返呢份名单，班底都系特朗普忠实支持者，而唔少都系对华强硬嘅人士，特朗普又扬言要打倒“深层政府”及扫清“官僚主义”，点睇呢个“特朗普2.0”班底？ 胜利瑞柏基金管理合伙人暨投资总监陈建良表示，对华鹰派嘅鲁比奥(Marco Rubio)获提名做国务卿后，拖累恒生指数周二(12日)失守20000关，不过，KL认为唔使太担心，因为民主党同共和党做法唔同，民主党偏向透过各部长及官员同中国沟通，而鲁比奥就偏向两国政府元首直接对话，所以最终重要嘅事务，较大机会由特朗普直接同国家主席习近平沟通。 此外，Tesla行政总裁马斯克(Elon Musk)、企业家拉马斯瓦米(Vivek Ramaswamy)将会联手领导新成立嘅“政府效率部”，KL认为，马斯克将会大刀阔斧削减政府庞大嘅开支及人手，有望令美国高企嘅赤字回落，支持美元强势，间接控制通胀。 |
|
| 陈建良 |
2024-11-06T16:42 |
若特朗普(Donald Trump)胜出美国总统大选，入主白宫，好有可能会随即对华加征关税，对中国企业影响大，中央又会怎样应对？有机会加码刺激？ 胜利瑞柏基金管理合伙人暨投资总监陈建良指，加征关税主要影响中国出口企业或部分科技企业，因为晶片可能会受到限制，中央会加大财政政策，集中刺激内需，部分美国零售企业依靠中国内需，例如苹果公司(Apple Inc.)及Starbucks。除了加大财政措施，中央亦会加大力度兴建及推动科技及电讯基建。 |
|
| 陈建良 |
2024-10-18T16:27 |
港股近期坐过山车，恒生指数急升完又急挫，早前由17000点冲上23000点，之后又回调，恒指昨日(17日)一度插穿20000关，期间，有唔少外资留意返内地及香港市场，临近年尾，外资开始部署明年资产配置，会唔会增加返中资股配置？ 胜利瑞柏基金管理合伙人暨投资总监陈建良认为，外资肯定会提高配置中国股票嘅比例，因为从唔同跟资产配置有关嘅会议中得知，唔少全球大型资金对中资股嘅配置系市非常低，对冲基金更沽空股票，经历今轮急升急跌后，估计资金唔敢再沽空港股及中资股，因为随时有政策推出再刺激港股向上，因此，沽空A股及港股嘅力度暂时偏细。 KL又话，资金重新流入A股及港股后，大部分都持观望态度(wait and see)，但由于本身对A股及港股嘅配置少，令资金倾向增持而非减持，加上美国总统大选临近，加上中央喺财政政策方面，未来会落实更多措施，相信外资2025年配置中资股嘅比例将会上升，带动A股及港股造好。 |
|
| 陈建良 |
2024-10-04T16:08 |
中央以出乎市场预期嘅力度救市，令A股及港股牛气冲天，截至8月底止，全球基金配置中国市场水平偏低，仅约5%，但随出内地上月推出多项重磅救市措施，配置水平应有所回升，到底基金完成配置未？市场对救市力度系咪有信心？ 胜利瑞柏基金管理合伙人暨投资总监陈建良指，主动型基金配置至8月底系5%，可能系基于唔同原因Short咗A股或港股，Short港股嗰啲如果下面冇平仓都夹死咗，所以估计嗰批应该已平晒仓。不过，如果要去返一个合理嘅比重，情况应该要持续，又认为相关配置应该未完。 佢又话，当中央嘅招数尽出后，就要观察两样嘢，首先系政策力度系咪符预期，因为市场预期一直升温，如果力度比预期大，个市会再抽上去，但可能好快就转弱，如果力度比预期细可能会回调，所以系考验决策者点样拿捏市场及民众嘅水平。佢认为，现水平应该系未加完仓，但会唔会不问价咁加仓，佢估计，第一下可能已完成咗大部分。 KL续称，长仓基金配置唔会好心急，会等回调买入(Pull Back)，亦会趁呢个浪睇下边啲股份或经济面会受惠，主要系仲有时间，同埋长仓配置唔可以斋睇momentum，虽然整体升浪未完，但现阶段需要先唞一唞。 |
|
| 陈建良 |
2024-09-20T15:28 |
美国启动减息周期后，港股连续第2日显着造好，恒生指数冲破18000关后，升势持续，今早(20日)一度突破18300点，升势亦有成交配合，呢浸升浪算唔算有惊喜？ 胜利瑞柏基金管理合伙人暨投资总监陈建良指，港股今转反弹幅度的确比想像中大，虽然成交增加，但同大市波动关系唔大，加上短期始终摆脱唔到上落格局，投资者对反弹嘅态度亦变淡，所以今轮升势唔算特别有惊喜。 KL又话，恒指依家嘅反弹幅度唔会再好似4月、5月咁，唔好睇得太乐观喺呢个时候追货，建议投资者今日做返止赚动作。 |
|
| 陈建良 |
2024-09-11T14:58 |
港股今日(11日)一度失守17000关，其后走势反覆，事实上，港股一直冇乜起色，下半年系咪都好难乐观？不过，美国联储局快将减息，如果唔系因为经济衰而减息，理应会利好股市，港股可唔可以受惠？ 胜利瑞柏基金管理合伙人暨投资总监陈建良估计，港股下半年高位已经见咗，即7月中高位，但下半年低位应该仍未见，估计最差嘅情况下恒生指数会跌穿16000点，但再急挫机会亦唔大，始终估值低，但市场对内地经济及企业盈利利前景都睇唔透，喺资金唔太充裕下，恒指未来仍会“弹下跌下”。 KL又话，港股主要卖点系平，但睇返消费、经济增长等数据，都担心内地再陷入通缩，事实上，情况的确系唔明朗。 |
|
| 陈建良 |
2024-08-30T16:25 |
整个人工智能(AI)行业都睇住英伟达(Nvidia)份业绩，虽然交到货，但市场对Nvidia及AI行业嘅期望愈嚟愈高，AI行业开始达唔到市场嘅高期望，对美股后市有咩影响？AI仲系唔系热炒嘅主题？ 胜利瑞柏基金管理合伙人暨投资总监陈建良指，相信纳斯达克100指数今年已经见顶，道指及标指近期都喺顶部徘徊，市场会形容为“板块轮动”，美国联储局喺通胀未完全受控之际开始减息，资金会转投小型及价值型股份，2000年科网股爆破时都出现过“板块轮动”，当时资金流出科技股，投资者要留意全球资金流出增长股或AI股，转投估值较平兼高息嘅股份。 |
|
| 陈建良 |
2024-08-16T16:02 |
长和系已陆续派发成绩表，其中，长和(00001)及长实集团(01113)昨日(15日)公布业绩后，股价今日(16日)向下，虽然市场对中期息减少有啲失望，但未至于感到意外，面对现时嘅经济环境等因素，未来息率又点睇？有兴趣入手长和系嘅投资者又应该点拣？ 胜利瑞柏基金管理合伙人暨投资总监陈建良指，集团指派息系因应业务重估而定，长和及长实业务平稳，但仍面对颇大挑战，股价折让咗唔少，希望公司可以定期派息，但认为派息喺全球经济放缓下，仍有机会再减少，不过，喺现时嘅经济环境下，长实及长和营运已经做得非常好，只系市场任由股价继续折让，所以会对派息失望。 拣股方面，KL就话，长和系之中可以考虑入手港灯(02638)，其次系长江基建集团(01038)，值得留意系，长建下星期会喺英国第2上市，有助提升成交量及减少折让，收购及集资渠道亦会增加，都对股价有利。佢又认为，长建现时估值偏低，但相信市场会给予长建更合理嘅价值。 |
|
| 陈建良 |
2024-08-02T17:51 |
最近投资市场气氛及市况明显转差，加上美国最新公布嘅经济数据唔理想，对美国经济陷入衰退嘅忧虑升温，令联储局会9月开始减息嘅机会进一步增加，今年余下嘅3次议息会议，甚至有机会每次都会宣布减息，美股后市都好难乐观？ 胜利瑞柏基金管理合伙人暨投资总监陈建良估计，美股应该已进入熊市，3大指数都已经见顶，过往冇通胀时，利率可以一次过减到零救市，但依家通胀仲未落到2%嘅目标水平就开始减息，反映联储局今次“弹药”有限。 KL又话，依家正值美股业绩期，暂时出咗嘅业绩有好有坏，但市场整体都系倾向睇淡，加上市场都心知肚明美息唔会不停减落去，所以焦点即时转移睇返经济转差嘅倩况会维持几耐，因此，佢估计，美股应该会再调整得深啲。 |
|
| 陈建良 |
2024-06-21T16:15 |
美股3大指数昨晚(21日)个别发展，其中，标指及纳指创新高后倒跌收市，主要受人工智能(AI)晶片股王英伟达(Nvidia)股价大幅波动影响，Nvidia昨晚早段再破顶，但收市倒跌3%，系咪同“四巫日”(Quadruple Witching Day)效应有关？ “四巫日”即指数期货、指数期权、个股期货及个股期权同日结算，于每年3月、6月、9月、12月的第3个星期五进行，而今晚(21日)就系第2季度嘅“四巫日”。 胜利瑞柏基金管理合伙人暨投资总监陈建良指，Nvidia属于大市值股份，股价两个月前仲升1倍，唔排除美股指数会喺短时间内形成一个“阶段性顶部”，而“四巫日”最大影响系，当中有好多价内期权(in the money call option)到期，相信大市之后会变得波动。 至于应唔应该趁低吸纳Nvidia，KL又话，Nvidia升到咁高，带挈唔少类似嘅晶片股一齐升，但睇Nvidia呢只股份最好小心啲，现阶段唔太建议趁低吸纳。 |
|
| 陈建良 |
2024-06-14T15:33 |
周大福(01929)全年业绩出炉后，股价今朝裂口低开，早段更一度急挫10%至逾3年低位，低见8.47元，午后仍跌约9%。 市场原本憧憬周大福派发95周年特别息，但最终落空。其实，集团现金及等价物已经连续2年减少，于2024财年减少40亿元至约76亿元，集团亦解释目前市况波动、利率高企，需要更稳健地管理财务。 周大福2025年财年指引营业额按年持平或小幅增长，胜利瑞柏基金管理合伙人暨投资总监陈建良认为，市况不稳下趋向更保守的经营策略，虽然对公司长远发展有好处，但现时投资者倾向短线获利，当公司业务状况短期内未见明显好转，便会借业绩消息回套。 KL续指出，周大福估值不算低，预测市盈率(PE)逾11倍，加上市场难以判断公司造黄金淡仓，是单纯为了对冲金价波动，还是趁机赌金价升跌来获利，忧虑今年业绩继续受累相关投资亏损，而选择先行沽货离场。 |
|
| 陈建良 |
2024-06-05T18:47 |
摩根士丹利最新一份有关内地经济嘅报告提及，内地新盘仍有需求，内房爆煲程度亦唔及1990年日本泡沫经济爆破咁严重，救楼市对内地经济可唔可以走出困局极之重要，系咪要等到7月三中全会先会再出招？之前会唔会再出台刺激经济政策？ 胜利瑞柏基金管理合伙人暨投资总监陈建良指，内地救楼市嘅政策变得较鸽派，令楼市唔会大跌，依家内房嘅情况已稳定咗，所以房企连环倒闭嘅机会好微。佢又话，三中全会一般都会有政策出台，但落实需时，KL建议投资者要继续观望，同埋唔应该持有太多货，但亦唔需要清仓。 佢睇好嘅股份大部分唔系指数成分股，首先呢啲股份市值唔会太大，通常唔超过500亿元，其次系股价接近52周高位，即使恒生指数跌到14000点，呢啲股份抗跌力较大，最后系唔会受内卷影响太大，海外业务又增长快。 |
|