| 評論員 |
時間 |
內容 |
標籤 |
| 趙晞文 |
2026-09-29T17:30 |
快手(01024)發布新一代可靈AI(Kling AI)模型「可靈4.0」，但帶挈唔到股價，股價今日收市跌逾1%，外界將「可靈4.0」慨出現解讀為跟字節跳動(BytrDance)AI影片生成模型Seedance慨競爭，Seedance最新更新至2.5，有分析認為，兩者各有優勢，Seedance主打視覺震撼度強，但可靈4.0係分鏡與流暢度更勝一籌，點睇佢同Seedance慨競爭？ 元宇證券大中華區股票投資總監趙晞文表示，要視乎用戶追求震撼性還是流暢度，普通用家可能更著重視覺震撼度，但企業級用戶反而更關注影片流暢度，所以要睇邊個更吸引到專業用家，加快公司變現速度。 佢又指，可靈AI定位一直都係以專業、企業級用戶為主，如果真係做到業界最先進模型(SOTA)，專業用家願意以較高價錢去用當然最理想，不過，若客戶黏性唔夠高，而10月面世慨完整版效果不似預期，或令變現速度放慢，未來Seedance再次升級，可靈AI與Seedance慨差距又會再次擴大。 |
|
| 黃偉豪 |
2026-09-29T12:16 |
港股昨日(28日)反彈，好友食糊離場，好倉連續4個交易日淨流入後，昨日轉為淨流出6660萬元，而淡倉就連續3日淨流出後，昨日再流入逾5000萬元，熊證各倉位都有增無減，重貨區由25400點下移至25000點。牛證倉位移曬去貼價位置，重貨區上移至24200點。「十一」假期前，大家都快炒一轉短，而長假期間北水「缺席」，要到下周四(10月8日)先重臨，想部署恆指牛熊證，收回價點擺位？ 胤源世創家族辦公室(香港)第一副總裁黃偉豪表示，如果只係擺呢2日，博大市上落係可以，但如果想擺過「十一」假期就要擺遠少少，以牛證為例，呢幾日支持位係24300點水平，暫時仍未跌穿，但如果想擺過假期，建議擺23900點樓下。熊證方面，要擺過「十一」黃金周就擺遠少少，收回價擺25000點樓上。 |
|
| 梁偉民 |
2026-09-29T11:23 |
OpenAI年度開發者大會(DevDay 2026)會係美國時間周二(29日)係三藩市舉行，原本預期會發布慨新模型「GPT6.1 Astra」，因為有欺騙等安全問題，臨時取消發布。此外，Meta、OpenAI等行政總裁將會同美國總統特朗普(Donald Trump)會面，估計會傾人工智能(AI)安全及發展問題。「習特會」結束後，科企巨頭就急急會面，係咪代表美國AI發展有機會要放慢？ 高富金融集團投資總監梁偉民認為，AI公司自發放慢發展步伐機會唔大，雖然有唔少AI公司高層提醒，發展AI慨同時都要兼顧安全性、對人類慨威脅，不過，AI市場競爭激烈，加上利益考慮，放慢發展步伐代價太大。佢又估計，大模型密集推出慨情況應會持續。 Wyman又話，AI發展步伐唔減慢，唔代表前景一定好，AI公司變現問題仍未畀到市場足夠信心，而呢些公司大部分仍處於開發階段，真正賺到錢慨唔多，即使有錢賺都唔足以令公司資本開支達至平衡，因此，半導體股未來會唔會繼續火熱，關鍵仍在於可唔可以開拓到變現途徑。 |
|
| 聶振邦 |
2026-09-29T10:23 |
高歌證券金融首席分析師聶振邦推介零跑汽車(09863) 推介原因： -2026年上半年多賺5倍。 |
|
| 鄭家華 |
2026-09-28T22:47 |
亨得利(03389)建議派發特別股息，每股派0.266元，總額11.7億元。 阿仕特朗資產管理董事鄭家華表示，亨得利手頭淨現金約14億元，今次計劃豪派股息，一來公司業務乏善足陳，二來可能因為大股東家族有資金需要，理論上豪派股息，股價應炒上，不過大股東家族正捲入官司，公司最終能否成功派息，仍有不確定因素。 |
|
| 梁傑文 |
2026-09-28T15:15 |
嬰兒產品產銷商好孩子國際(01086)創辦人兼主席宋鄭還提出，以每股1.5元私有化公司，較上周五(25日)收市價有逾38%溢價，涉資逾13億元，又話成功私有化後會維持上市地位。受消息刺激，集團股價今早一度狂飆逾35%，高見1.465元。至於私有化理由又係股份成交長期低迷、提供一次性套現機會等，值得留意係，好孩子成交係9月明顯增加，疑似有春江鴨，同埋中期業績突然豪派股息，對私有化係咪有特別意義？ 《香港股票財技密碼》作者梁傑文指，一般黎講，大股東會係公司業績比較差，股價比較殘慨時候，趁機將公司私有化，但今次就比較奇怪，好孩子股價近半年輾轉向上，而最新中期業績亦好靚仔，利潤大升逾倍，又恢復派中期息，係公司有咁多好消息下，主席仍願意用高溢價提私有化，只能夠話同過去慨私有化個案完全相反。 |
|
| 郭思治 |
2026-09-28T11:15 |
大市已接近9月份之尾聲，即本月先高後低之形態或已成定局。恆指暫時由4日之高位25,791點跌至25日之低位24,275點，即月內之波幅暫為1,516點。由於1,516點之波幅已不算少，或已可滿足月內之所需，加上本月高低位之距離該已符合慣性之最低要求。 故在本月月底前，即使大市再稍作反覆，但估計祇會在本月之低位附近爭持而已。但有一點留意，大市經過月內之一輪反覆後，恆指曾跌穿各組平均移動線，即表示後市已進入反覆欲試底之弱態。如買盤態度持續保守，而零碎沽壓又不斷滲著湧現，論形勢確頗不利10月上旬之發展。加上外圍因素又持續不明，即是說，投資者宜抱較保守之態度。 上文提及之移動線，直到目前一刻止計，排列上仍暫屬倒序模式。現各組平均移動線之排列由上而下： 250天線 (約在25,705點左近) ， 50天線 (約在25,332點左近)， 100天線 (約在25,049點左近)， 20天線 (約在25,036點左近) 及10天線 (約在24,789點左近)。 單從技術上看，恆指如反覆或拉鋸於上述5組平均移動線之下，即表示大市已進入反覆欲試底之弱態，同時亦頗不利10月上旬之發展。筆者已多次提及，大市如欲擺脫續試底之弱態，恆指必須先成功重越10天線並穩守其上，此乃大市欲回穩之首要條件。另外，由於大市之交投已日趨淡薄，故即使市勢能偶作反彈，但可能亦祇屬有波幅而冇升幅，有反彈而冇大升之技術性後抽而已。 拉闊一點看，今年大市之形態仍暫屬先高而後低。恆指暫時由1月29日之高位28,056點跌至6月26日之低位22,518點，即年內之波幅暫仍為5,538點。單論波幅確相對為細，從量度上計，在年內5,538點之波幅內，其中位數該為25,287點，即是說，以恆指現正身處於25,287點之下計，即大市正位於全年波幅中位數之下半段。單從形勢上看當屬偏淡。從上述之技術分析來看，大市於本年第4季之發展確頗不樂觀。 |
|
| 黃敏碩 |
2026-09-25T16:05 |
內地企業所得稅標準稅率係25%，不過，當局會針對唔同企業規模，以及產業提供稅務優惠。匯豐證券周三(23日)出報告，指內地大型科企慨有效稅率按年大升，以快手(01024)為例，有效稅率交12.3%，比2025年上半年高6.4個百分點，阿里巴巴(09988)有效稅率甚至升14.6個百分點。點睇呢個現象？下半年行業有效稅率係咪會繼續按年上升？ 王道資本及家族資產管理執行董事黃敏碩指，其實稅務優惠政策主要都係針對公司成熟度，例如手遊、雲音樂、廣告等業務較成熟，唔再係新起步企業，公司只係需要諗點樣去推動業務發展，因此有效稅率會較高，但會係合理範圍之內。 Michael續指，雖然市場好多科網新企業，但市場路線好唔同，企業對顧客(B2C)慨業務需要徵稅推動能見度，有效稅率會較高，但企業對企業(B2B)慨業務仍然處於投放期，低稅率會較好。 |
|
| 關焯照 |
2026-09-25T15:42 |
全球國債孳息率向上，市場對各類資產重新定價，依家最大變數除息口走向、美伊關係，仲有11月舉行慨美國中期選舉，係複雜多變慨形勢下，第4季應該點揀股？ 冠域商業及經濟研究中心主任關焯照指，投資者需留意系統性風險，中東局勢仍然緊張，不斷推高通脹，導致長債息不斷衝高，當利息支出加大，還錢能力下降，市場擔心會進入債券漩渦。 關博士續指，美國總統特朗普(Donald Trump)現時民望較低，估計11月中期大選有機會輸，到時美股或會出現震盪，不過，只要投資者避開息口敏感股，揀優質股票投資就冇問題，例如擁有新盈利引擎慨Meta，以及網絡安全類股分，都係唔錯慨選擇，但硬件股就要小心，部分資產重、債務高慨公司或受影響。 |
|
| 梁偉源 |
2026-09-25T13:09 |
截至早上11時止，1小時內《彭博》搜尋量最多港股，依次為濰柴動力(02338)、友邦保險(01299)、騰訊控股(00700)、快手(01024)及周大福創建(00659)。 友邦今日(25日)拖低大市，股價一度低見72.8元，挫近4%，友邦持有美債，債息扯高對內含值及盈利都有影響，每升0.5厘就會影響內含值。此外，美元持續上升，友邦大部分業務來自亞太區，匯兌因素都會有影響，點睇呢些情況？ 大華繼顯執行董事梁偉源指，上述提及慨因素全部都會影響友邦內含價值，當中以匯率影響最大，由於集團持有債券，短期會因債息升令債價下跌，不過，由於一般都會持有至到期，所以對投資影響唔大，都可以拿返本金。 Steven坦言，債息升到咁高，若友邦賣同投資回報相關慨保單會更困難，因為當債息高企，買投資相關產品時，回報要再定高些先可以吸引客人投保，所以呢方面又會為新業務帶黎負面影響。 |
|
| 彭偉新 |
2026-09-25T10:40 |
獨立股評人彭偉新推介中國神華(01088) 推介原因： -一體化業務受惠煤價回落因素 -相信煤炭需求會持續上升 建議買入價：44.0元 目標價：49.4元 止蝕價：43. |
|
| 林嘉麒 |
2026-09-24T23:34 |
周大福創建(00659)全年多賺約10%，派末期息33仙，並10送1紅股，元宇證券基金投資總監林嘉麒認為，純利有增長，但末期息少左，投資者可能會失望。 KK又指，周大福創建調整業務重心，著重發展金融服務業務，但佢認為，仍需時間觀察金融業務是否持續表現理想，可有助抵銷其他業務的負面影響。 |
|
| 盧楚仁 |
2026-09-24T17:21 |
日本國債遭拋售，5年期債息升至2.38厘慨歷史高位，10年期亦升至約3厘，衝上30年高位。日本股市今日(24日)假後復市造好，但日圓係流動性回升下，落到158水平，自日本央行上周宣布加息後，日圓走勢差，係咪好快就跌到160水平，唔使咁心急買日圓？ 獨立外匯商品分析師盧楚仁估計，日圓應該好快見160，當美元及日股都強，一定利淡日圓，消化加息呢個利好消息後，就好大機會一如以往出現逆轉。 Jasper認為暫時先睇160，之後再視乎會唔會有干預行動，一旦穿左160，如果去到163就要留意，如果開左淡倉，要考慮先行獲利離場。 |
|
| 李偉傑 |
2026-09-24T15:55 |
途虎(09690)開市前公布，以約4億澳元收購德國Continental旗下澳洲汽車服務業務，近年途虎業績持續下滑，但今次收購目標營運情況唔錯，利息、稅項、折舊及攤銷前盈利(EBITDA)達1.78億人仔，相當於途虎去年盈利42%，雖然公布交易前幾日，股價累跌19%，但股價今日(24日)強勢，一度大升11%，高見11.4元，呢單收購似乎唔錯，係咪代表途虎今年業績有保證？股價又可以彈到幾高？ 元宇證券證監會持牌人李偉傑指，呢單收購的確可以令途虎業績有保證，係收購價唔算太高下，可以令集團毛利及盈利水平更穩定，不過，毛利仍有可能因內地汽車銷售壓力大，導致車價下跌而有影響。 Jason又話，途虎股價暫時收復左近期跌浪一半失地，估計要去返上周四(17日)「大陰燭」頂，沽壓先算係完全消化曬，不過，至少今日開出「大陽燭」，短線仍有反彈空間，而12.5元會係較重要慨阻力。 |
|
| 陳偉聰 |
2026-09-24T11:07 |
國家主席習近平抵達美國，美國總統特朗普(Donald Trump)親自接機，同一時間，美國財長貝森特(Scott Bessent)宣布，中美貿易「休戰期」延長2個月至2027年1月10日，較市場預期慨3至6個月短，會唔會令市場失望？今次中國企業高層未有隨行，對今次中美領導人會面成果有咩影響？ 東亞證券高級投資策略師陳偉聰相信，市場都唔會太失望，關鍵係中美元首會談後，可唔可以落實更實際慨協議，例如中方願意加碼購買美國產品，例如能源、飛機或農產品等，到時「休戰期」可能係兩個月有再延長慨空間，甚至可能爭取到部分商品豁免關稅或下調稅率。 Jason又話，雖然之前特朗普訪華時，有好多美國巨企大佬隨行，但最終係商業層面慨實質定單冇明顯增加，今次冇中企高層隨行，唔代表兩國商貿往來疏離，不過，係特定產業慨討論，尤其高科技及半導體等領域，相信要達成共識慨機會可能較低。此外，市場都比較關注，早前美方提出放寬部分高端人工智能(AI)晶片出口、中方採購意願，以及近期AI安全爭議，能否係未來兩日會談中取得進展。 |
|
| 許繹彬 |
2026-09-24T10:24 |
本周市場最火熱的焦點，定必是中美元首即將進行會面。全球市場全神貫注於這場一連三日峰會的具體內容及後續反應；各大投行亦相繼發布預測，且眾說紛紜。當中，美銀直言市場對今次峰會期望不宜過高；瑞銀和花旗看法則較正面，預期雙方有機會在關鍵科技及貿易問題上取得重大突破，為市場帶來驚喜。受樂觀情緒與憧憬帶動，全球主要金融市場本周初普遍平穩。 此外，美國美股市場亦帶來驚喜：社交平台Meta（Facebook 母公司）本月初在美國推出名為「Muse」的人工智能代理（AI Agent），該功能具備讀取社交關係並連結郵件、行事曆、購物及訂餐等各類API的能力。Muse 推出後在美國迅速爆紅，登上下載應用程式排行榜首位，引發市場對 AI 概念股的高度關注。主角 Meta 股價本周曾高見757.27美元，創下去年10月以來最高收市價；納指在AI股帶動下，更創下 27,288 點的歷史新高。 港股方面，本周初在科技股帶動下一度重越25,000點大關。本周二（9月22日），市場傳出「股王」騰訊(00700)旗下原生 AI 代理「小微」與Muse的產品邏輯相似，帶動騰訊股價曾高見463.4元。在重磅科技股及生物科技股推動下，港股曾一度高見25,255點。儘管「北水」連續第12日淨流入，單日更掃貨近127億元，惟大市成交始終未見突出，僅約2,500億元。 可惜港股升勢未能持續，重上25,000點後獲利盤及沽盤湧現，最終「虎頭蛇尾」收告。昨日（23日）受內地股市調整影響，港股順勢回吐，再度失守25,000點，一度下探至24,800點水平，最終收報24,834點，僅勉強守住10天線，成交額亦縮減至1,843億元的慘淡水平。 筆者認為，早前走勢相對滯後的納指，在本周憑藉Meta旗下AI代理Muse急速爆紅帶動股價創新高，加上老牌晶片商SanDisk發表新晶片技術刺激股價上揚，成功推動納指破頂；日韓相關 AI 概念股及指數亦隨之穩步上揚。雖然港股結構上欠缺同類型純 AI 巨頭，但在騰訊及阿里巴巴(09988)帶領「ATMXJ」一同發力下，港股一度突破20天線（25,171點）並高見25,254點。然而，在成交量未能進一步配合下，大市攻破阻力區後顯得後勁不繼，投資者選擇獲利離場亦屬無可厚非，顯見市場對港股的信心危機尚未完全消除。 展望後市，美伊局勢未見進一步惡化，油價有所回落，對全球股市起到穩定作用。惟內地中秋及國慶長假期將至，預計港股成交可能進一步萎縮，上攻動力將受制約。就算短線出現反彈，亦多屬低成交下的抽升，投資者不宜盲目跟進。期望港股能穩守在24,600點支持位，上望阻力仍看25,200點水平。 板塊方面，受到中美經貿磋商傳出政策鬆綁，以及國內「十五五」規劃政策利好的雙重催化，近期資金大幅湧入醫藥板塊，帶動相關股份異動。當中藍籌成員藥明康德(02359)基本面紮實，不妨多加留意。 |
|
| 阮子曦 |
2026-09-24T09:57 |
華富建業證券投資策略聯席總監阮子曦推介立訊精密(02475) 推介原因： -市場普遍預料蘋果公司(Apple Inc.)新一代手機銷售。 |
|
| 羅尚沛 |
2026-09-23T22:42 |
玖龍紙業(02689)全年多賺一倍，恢復派末期息，每股10分人民幣。 銀河證券業務發展董事羅尚沛表示，玖紙上年度業績強勁，估計今年度盈利仍能維持增長，不過公司早前發盈喜當天，股價大成交下，急跌近17%，可能是大戶大手減持，亦令投資者有戒心。 |
|
| 文錦輝 |
2026-09-23T18:03 |
「習特會」即將舉行，咁岩又召開聯合國大會，美國總統特朗普(Donald Trump)係大會上發言時，趁機宣揚美國實力，美匯指數之前出現回調，現時已彈上100.5，現時已過左呢個黃金分割，睇返美國經濟表現，加上通脹問題及加息憧憬，美元後市會唔會進一步轉強？ 艾德金融投資執行董事文錦輝指，美國聯儲局加息，其他國家都會跟加，但美國經濟相對強勁，加上係美國債息支持，以及資金流入美股，均利好美元，美匯指數有機會升至101.5，建議投資者等美匯指數落到介乎98至100再考慮買入美元。 |
|
| 林嘉麒 |
2026-09-23T16:46 |
美國科技媒體《The Information》引述消息報道，內地監管機構已對DeepSeek及「Kimi」開發商月之暗面(Moonshot AI)展開數據安全調查，因為美國人工智能(AI)巨頭Anthropic，早前指控月之暗面秘密將數千條用戶請求轉發至大模型Claude，再直接用Claude慨答案回覆Kimi用戶，即係用左「蒸餾」(Distillation)技術，變相洩漏內地資料，事件會唔會令AI發展步代放慢？ 元宇證券基金投資總監林嘉麒指，如果消息屬實，未來當局或會對AI有新監管，因為內地屬於計劃型經濟，若行業發展一段時間後出現問題，政府就會出手，若負面因素發酵或會影響整個板塊發展。 KK續指，如果真係有針對「蒸餾」技術慨新規範出現，算力一定受影響，甚至可能會叫停新項目，等監管機構先研究舊版本，才可以推新版本，到時可能會有呢些指導意見出現，減慢商業化進程。 佢又話，雖然暫時只係傳聞，但可能涉及呢些指控慨公司，例如MiniMax(00100)慨商業部署都會受影響，更新速度或有別於以往，甚至影響係國際慨競爭力。 |
|
| 莊志雄 |
2026-09-23T15:33 |
美股經歷近期長債息高企、聯儲局加息，以至高油價等問題困擾後，科技股連日回勇，更帶動納斯達克指數連日破頂，市場係咪已經消化曬之前慨負面因素？近日美國科技股回勇反映咩情況？ 「股市漁夫」創辦人莊志雄表示，若單看指數，情況係好正面，但其實美股市寬好差，逾60%股份低於50天線，港股都接近60%，大部分股票都因為加息受壓。佢又認為，市場變得兩極化，而加息壓力仍未完全消化，資金重新集中買入有增長故事、人工智能(AI)背景慨股票，半導體股例如AMD、英特爾(Intel)，股價過去1周升得好厲害，反映投資者相信AI慨盈利增長及未來生產力，可以抵銷高利率壓力。 Lewis又話，參考過往7次加息，加息後3個月股市都要跌，不論平均回報還是中位數回報，不過，今次納斯達克100指數ETF(Invesco QQQ)短短1周累升6%，值得留意係，係正常情況下，如果美元走強，新興市場就會跌，但當周新興市場整體累升約5%。 |
|
| 彭偉新 |
2026-09-23T13:03 |
截至早上11時止，過去1小時內《彭博》搜尋量最多港股，依次為萬科企業(02202)、騰訊控股(00700)、華潤置地(01109)、濰柴動力(02338)及友邦保險(01299)。 萬科股價今早(23日)一度爆升15%，高見2.875元，A股更一度漲停。據《路透》引述消息指，內地監管部門要求銀行暫緩將萬科逾期貸款列為不良貸款。早前，萬科指集團經營狀況穩定，內外部經營環境未出現重大變化。市場關注係咪反映內地進一步支持萬科，穩定內房流動性？ 資深證券分析師彭偉新指，如果萬科逾期貸款轉為壞帳，或會進入法律程序，對整個內房行業都會構成負面影響。近期內房陸續出現正面消息，例如透過補貼按揭改善市場氣氛，但如果債務問題未能配合解決，再出現負面消息，就會抵銷政策利好，依家市場仍關注政策點樣扶持整個行業，因此，萬科股價今日大升。 Castor又話，要扭轉內房長期下行局面，單靠短期措施未必足夠，政策需要一方面穩定樓市，另一方面逐步改善房企財務狀況，避免資金鏈持續斷裂，雙管齊下先有助逐步恢復市場信心。 |
|
| 譚智樂 |
2026-09-23T11:55 |
全球即將舉行慨「習特會」，市場估計，今次峰會重點議題包括美中藥廠慨授權協議係咪好大機會獲放行，以及關鍵礦產、稀土供應等，「習特會」前後有咩板塊值得留意？ 易方達資產管理(香港)高級策略師譚智樂指，現階段需要做好多元化資產配置，毋須集中係生物科技股，因為部分政策預期可能之前已price in左，市場亦可能過分樂觀。 佢又話，生物科技及人工智能(AI)產業都係推動經濟增長、促進社會進步慨典型產業，值得優先考慮，雖然近期資源股弱勢，油價持續回落，不過，AI產業鏈涉及稀土等唔同資源，甚至再延伸至農產品等領域，所以資源股亦值得留意。 投資部署方面，除左AI、生物科技外，亦可以考慮高股息、現金流類型產品、短債及貨幣基金，甚至一些較穩定慨固定收益投資，做好多元化配置，分散風險同時對抗通脹。 |
|
| 梁偉民 |
2026-09-23T11:35 |
流入納斯達克100指數ETF(Invesco QQQ)慨資金係1年最多，期權市場亦反映緊納指100本周破頂機會達67%，期權價格就反映最有機會推動指數破頂係Meta、英特爾(Intel)，同埋本周後期出第4季業績慨美光(Micron)，而市場都估計呢3隻股份年底前有機會破頂，係咪真係可以再創新高？ 高富金融集團投資總監梁偉民指，Meta推出人工智能代理(AI Agent)，市場認為Meta有領先優勢，集團客戶群龐大，社交媒體客戶黏性又高，再配合AI代理，係有相得益彰慨效果。不過，AI發展太快，隔幾個月就有新模型面世，所以Meta可唔可以持續領先仲要觀察。現時Meta股價距離高位，即700至800美元唔遠，所以短期再破頂唔出奇。 Intel方面，現價距離高位仲有一段距離，但過去1年升得好誇張，估值絕對唔平，而市場亦擔心集團代工業務可唔可以扭虧為盈，呢方面都需時觀察。 |
|
| 黃偉豪 |
2026-09-22T12:10 |
恆生指數連升3個交易日，大市今朝(22日)高開128點，好倉獲利流出規模增至5210萬元，5日合計，有1180萬元資金坐貨，淡友昨日流入3790萬元，5日合計逾4400萬元資金離場。牛證重貨區24300點倉位有所減少，最多人加倉係24500點至24700點，熊證重貨區係25300點，恆指3日累升近500點，差少少就收回熊證重貨，牛熊證點擺位較合適？ 胤源世創家族辦公室(香港)第一副總裁黃偉豪指，現階段太貼價有一定收回風險，近期大市走勢強勁，幾日時間已經反彈500點，無論部署牛證定熊證，比較適合做即市部署，若擺過夜就要揀遠少少。 Ravi又指，近日大市氣氛有改善，恆指回升至25100點樓上，重現7月尾至9月中橫行區間，如果投資者認為大市可以挑戰26100點水平，牛證可以擺24300點樓下，收回風險較低，熊證可以擺較近慨25700點，26100點樓上就更加安全，呢些位置做收回價比較合適。 |
|
| 梁偉民 |
2026-09-22T11:14 |
美股3大指數昨晚(21日)高收，科技股表現特別強勢，帶挈納指收市升逾2%，創收市新高，標指距離歷史高位亦只差約1%，費城半導體指數(SOX)更大升近4%。人工智能(AI)股成焦點，究竟呢輪強勢係咪可以延續？ 高富金融集團投資總監梁偉民指，近日晶片股升勢相當誇張，超微半導體(AMD)、英特爾(Intel)等單日升幅都超過10%，加上Meta推出人工智能代理(AI Agent)後反應熱烈，市場更加睇好AI競爭力及盈利前景。 Wyman續指，AI Agent除左帶動圖形處理器(GPU)需求，亦會增加中央處理器(CPU)需求，令AMD、Intel等受追捧。不過，呢類股份已經升左好多，其中，AMD股價突破600美元，市盈率(PE)超過100倍，投資者要留意CPU需求及盈利增長係咪真係可以跟得上，因為部分利好因素可能已price in左。 |
|
| 黃敏碩 |
2026-09-22T10:10 |
王道資本及家族資產管理執行董事黃敏碩推介中遠海運港口(01199) 推介原因： -港口覆蓋內地五大港口群，並在東南亞甚至歐洲布局 -受惠新興市場貿易暢旺 -業績理想。 |
|
| 阮子曦 |
2026-09-21T23:32 |
中集安瑞科(03899)調高向中集集團(02039)採購設備的關連交易年度上限，原因是手頭訂單及潛在訂單超出預期。 華富建業證券投資策略聯席總監阮子曦表示，根據中集安瑞科的講法，意味公司生意較原先預期強勁，應可利好股價，但要留意基於多種原材料價格亦上升，訂單與盈利增幅未必成正比。 |
|
| 梁傑文 |
2026-09-21T15:16 |
早前，俊知集團(01300)公布，計劃收購光纖產銷商青海中利全部股權，涉資逾5億元，將全數以內部資源支付。此外，青海中利上半年扭虧為盈，稅前轉賺7000萬元人民幣。雖然今次收購幾乎用曬集團所有現金，更要揹3億元人民幣債務上身，但目標公司慨光纖資產質素已執靚曬，今次俊知係咪買到好野？俊知股價今日(21日)一度爆升逾26%，高見3.73元。 《香港股票財技密碼》作者梁傑文表示，俊知今日股價表現反映市場對呢單收購反應正面，近年人工智能(AI)急速發展，帶動光纜業務需求大增，而集團財務狀況亦比市場預期好。俊知本身傾向做下游光纜業務，但光纖業務屬於上游，Mike認為，今次公司不惜清空現金進行收購，主要係希望把握機會整合上游業務。 佢續指，由於AI發展迅速，但唔係有客或下游有需求就一定賺錢，若上游零件供應不穩，都會影響業務，因此，如果今次收購目標本身慨業務已開始賺錢，加上可以整合上下游業務，市場自然好受落。 |
|
| 李浩然 |
2026-09-21T10:52 |
（續上文） 要精準理解今天的 AGG，不妨把它當作一部剛大修完的升降機。它曾從極高的樓層 free fall 急墜，嚇破了機廂內所有乘客的膽。現在，鋼纜看起來粗壯了，樓層也降得七七八八，維修保養員還拍心口說每年大概能賠償你 5% 壓驚費。 |
|
| 郭思治 |
2026-09-21T10:11 |
大市已開始步入9月份之下旬，故即月期指轉倉及結算等相關活動將漸主導大局。而直到執筆一刻止計，本月大市之形態仍暫屬先高而後低。 恆指暫時由4日之高位25,791點跌至17日之低位24,357點，即月內之波幅已再擴闊至1,434點。首先，本月高低位之距離該已符合最低之要求，但至於1,434點之波幅則祇屬一般，或未能滿足月內之所需，故在本月餘下之交易日，理論上該有更大之波幅點出現。 而從目前大市之表現看，由於恆指不但已漸跌離月內之高位25,791點，反之卻頗貼近月內之低位24,357點，故在買盤持續保守下，祇要沽壓再略作主動，大市確有機會進一步下創月內之新低。 移動線之表現持續示弱，目前各組平均移動線之排列仍暫屬倒敘模式，現由上而下： 250天線 (約在25,739點左近) ， 50天線 (約在25,304點左近)， 20天線 (約在25,217點左近)， 100天線 (約在25,103點左近) 及10天線 (約在25,944點左近)。 單從排列上看，已表示大市目前正處反覆欲試底之弱態中。如沽壓持續，估計20天線將快跌穿100天線，即其時移動線方面又再呈另一個死亡交叉。到稍後各組平均移動線會有可能回復標準之倒序模式，即技術上處續試底或續尋底之中。 大市自6月26日低位22,518點開始之反彈，暫該已受制於8月4日之高位26,187點，即在短短6週內恆指共上升3,669點。由於目前恆指已再跌穿所有平均移動線，故該表示大市已進入大幅反彈後之回吐中。大市如需回吐3,669點升幅之二份一，則技術支持該會在24,352點，但如大市需回調升幅3,669點之三分二，則另一個技術支持將退守至23,741點 。 |
|
| 郭家耀 |
2026-09-21T10:07 |
港灣家族辦公室業務發展總監郭家耀推介長江基建集團(01038) 推介原因： -出售資產帶來豐厚收益 -資產負債表強勁。 |
|
| 趙晞文 |
2026-09-18T22:40 |
中信資源(01205)將於9月30日舉行董事會，考慮宣派特別股息。 元宇證券大中華區股票投資總監趙晞文表示，中信資源之前減持美國鋁業，套現後令手頭淨現金大幅增加，截至六月底，手頭淨現金相等於市值84.6%，有足夠彈藥派發特別股息，不過股民別過份期望會派發絕大部分，因為公司應會儲備現金作潛在收購。 |
|
| 盧楚仁 |
2026-09-18T17:34 |
美國聯儲局3年以來首度加息，高盛認為，美國加息唔會打斷金價升勢，維持明年底見每盎司5400美元慨預測，係咪真係咁樂觀？ 獨立外匯商品分析師盧楚仁指，對金價走勢都樂觀，雖然美國加息，但美元唔係因為加息而上升，係因為油價開始見頂回落，令市場認為聯儲局未必會好進取咁加息，反而美股轉弱令金價兜底上。 Jasper又認為，黃金基本因素冇變，油價就繼續回落，暫時先上望4700美元，若成功突破，再向高盛目標價進發。 |
|
| 黃敏碩 |
2026-09-18T17:24 |
順豐同城(09699)今日(18日)中午出通告，指獲控股股東順豐控股(06936)增持，透過大宗交易買入4584萬股H股，佔已發行股本約5%，消息公布後，順豐同城股價午後抽高，收市勁升11％，以全日高位9.49元收市。係咪純粹炒增持消息？理論上有人沽先有得買，若賣家係阿里巴巴(09988)應該點解讀？ 王道資本及家族資產管理執行董事黃敏碩指，增持消息都屬於正面，睇返公司上半年業績，都反映順豐同城處於高質量、增長健康慨狀況，亦配合返成個網絡、數字化能力，因此，把握到餐飲、服務、零售行業慨趨勢，今次控股股東增持，對推動未來業務發展屬正面。 Michael又話，過往市場聽到阿里呢類巨企係一家公司慨投資者，感覺上會信心大些，但佢認為，依家反而留意公司自身業務質量、效益，咁樣會比較實際。 |
|
| 聶振邦 |
2026-09-18T15:58 |
光通信概念股納真科技(09856)昨日(17日)截飛，公司計劃發行1.72億股，當中10%會係本港公開發售，招股價32.96元，每手100股，入場費約3329元，集資約5.67億元，股份預期係下周二(22日)首日掛牌。納真上市前，人工智能(AI)概念股今日(18日)有唔錯慨反彈，可唔可幫手造下勢，納真掛牌有冇機會響頭炮？ 高歌證券金融首席分析師聶振邦指，睇返納真基本面，不論用市盈率(PE)、市帳率(PB)，還是市銷率(PS)計，公司數值都低過行業，所以初步睇黎定價有一定吸引力。此外，集團上半年收入及盈利按年增長約30%，再配合基石投資者佔招股規模50%，因此，投資者認購做中長線部署都係合理。 不過，聶Sir提醒，納真短線表現仍要視乎市況，同埋會唔會有不確定性。 |
|
| 陳建良 |
2026-09-18T15:38 |
今年中秋同國慶黃金周假期中間，只相隔3個工作日，所以內地打工仔請3日假，就可以連放13日假，有一個悠長假期，會唔會刺激到旅遊消費？雖然人仔轉強，但內地經濟麻麻，消費降級，油價又高，點睇內地旅遊業前景？ 勝利證券首席顧問陳建良指，內地旅遊業前景唔係唔樂觀，今次中秋及國慶長假期可以鼓勵到旅遊消費，雖然內地有資金外流憂慮，但唔會嚴重打擊外遊意欲，加上國內遊亦好普遍，境內機票、高鐵、酒店預訂按年都錄得升幅，未受高油價等因素影響，而隨著內地居民慢慢富起來，外遊意欲更愈來愈大。 KL續指，依家流行「形象經濟」(Image Economy)，相信都有利內地旅遊業發展。 |
|
| 梁偉源 |
2026-09-18T13:02 |
截至早上11時止，過去1小時內《彭博》用戶搜尋量最多港股，分別係英矽智能(03696)、聯想集團(00992)、新世界發展(00017)、MiniMax(00100)及智譜(02513)。 金瑞斯生物科技(01548)同禮來公司(Eli Lilly and Company)昨日(17日)公布合作消息，推高英矽智能股價，英矽智能本身做生成式人工智能(Gen AI)平台業務，例如Phrama AI等慨相關業務，但市場現時係咪更關注AI製藥、AI測試等業務？ 大華繼顯執行董事梁偉源認為，呢個消息令投資者重新評估AI平台發展研究製藥慨潛力，過往較少呢方面慨大型合作消息，消息一出，同類股份呢兩日都有得升，英矽智能上半年收入按年勁升2.9倍，相信今年有望扭虧為盈，估值有較大上升空間。 股價方面，Steven認為，英矽出完業績後，短短1個月，由40元水平升至現時約60元，相信需要抖一抖，更重要係，今次始終係金斯瑞同禮來合作，唔係英矽智能有業務新發展，相信要等英矽智能未來有類似合作計劃，先可以再推升股價。 |
|
| 盧志明 |
2026-09-18T10:12 |
大唐資本投資策略部總監盧志明推介聯想集團(00992) 推介原因： -估值被低估 -x86伺服器出貨量按年增長45%。 |
|
| 植耀輝 |
2026-09-17T17:23 |
金斯瑞生物科技(01548)今日(17日)公布同禮來公司(Eli Lilly and Company)達成合作，消息刺激股價破頂，收市報36.78元，飆近13%，市場依家熱炒公司AI製藥(AIDD)驗證業務，點睇公司未來發展？ 獨立股評人植耀輝指，金斯瑞AIDD業務增速好快，發展空間亮麗，雖然本地相關概念股唔係特別多，但其實AI醫療概念係美股已經炒左1至2季，相信股價可以受惠於愈來愈多公司參與，以及市場認知度提升，金斯瑞上次配股後，股價表現硬淨，雖然業務仍處投資階段，規模亦有待擴大，但相信集資後，投資者會憧憬其未來發展更有保證。 Stanley又話，市場預期，AIDD係2026至2035年間，複合年增長率可達24.8%至33%，係醫療科技中發展算快，未來呢個範疇對集團慨貢獻只會持續擴大。 估值方面，按業務慨藥物驗證工作而言，金斯瑞同傳統藥明系較為接近，但依家藥物驗證規模或比以前大好多，加上算係新概念，兩者身處慨位置都有些分別，所以未必可以同舊有概念作比較。 |
|
| 李偉傑 |
2026-09-17T16:42 |
濰柴動力(02338)股價今日(17日)大幅高開10%，其後升幅一度輕微擴大，高見32.54元，濰柴合作供應商Generac(GNRC)近日同亞馬遜(Amazon)簽左大定單，其實濰柴同Generac早係去年4月已經有合作，當時2隻股份走勢相若，但Generac股價近月顯著回落，濰柴就冇乜點跌，濰柴係咪可以複製今年2月中，上調指引時升勢？ 元宇證券證監會持牌人士李偉傑指，今年6月30日前，人工智能(AI)相關業務受惠於AI熱造好，但7月2日後，相關板塊全面被洗倉，依家AI算力硬件股整固緊，所以未有明確方向。 Jason續指，雖然濰柴有機會因為合作公司造好而跟隨，但中長線而言，仍要視乎亞洲區係AI算力公司慨資金投放程度，暫時睇黎濰柴股價未必可以上返2月時水平，即使合作伙伴Generac拿到Amazon大定單，對濰柴黎講係正面，但未必會咁快係股價反映。 |
|
| 王良享 |
2026-09-17T15:32 |
美國聯儲局一如預期加息0.25厘，係沃什(Kevin Warsh)接任後「頭炮」，亦係3年以黎首度加息，睇返美國最新通脹數據，美國今年仲會唔會加息？今次加息點影響美國經濟？ 臻享顧問董事總經理王良享指，據「點陣圖」(Dot Plot)顯示，12月應該有機會加息，美國長債息8月開始持續上升，市場透過長債息扯高觀察聯儲局遏通脹能力及決心，美國總統特朗普(Donald Trump)唔想加息，但沃什似乎目標明確，就係要將通脹降至2%，雖然加息冇辦法壓低油價，亦唔能夠令特朗普停止加關稅，係控制唔到外部價格下，聯儲局唯有透過加息令經濟放緩，待失業率上升、美國經濟增長放緩先會停手。 Tommy又認為，美國經濟結構近年出現轉變，唔再單靠消費，自去年《大而美法案》推行企業投資100%紅利折舊(Bonus Depreication)後，今年企業投資佔美國增長好大部分，尤其人工智能(AI)，加上美國家庭債務佔國內生產總值(GDP)比例，已由2008年100%降至71.6%，債務與資產比例僅約15%至20%，反映美國消費者有能力借錢，不過，現時比較擔心AI企業相繼搶高原材料價格，未來一旦有大型雲端製造商削減投資，高度依賴資金投入慨AI產業鏈或面臨考驗。 |
|
| 陳偉明 |
2026-09-17T10:49 |
港股在過去兩周，經歷了由政策喘息期走向內憂外患的深水區。追溯至前周五（9月4日），受惠於美國8月ADP就業數據爆冷及ISM非製造業PMI穩守榮枯線，市場對美國硬著陸恐慌降溫，疊加聯儲局加息威脅短暫暫緩，引發環球資金一度啟動風險偏好。在美匯指數走弱及人民幣反彈三重刺激下，港股當天飆升至25,791點高位。 然而，這波由「壞消息即好消息」堆砌的虛假繁榮轉瞬即逝。隨著官方8月非農就業職位大增16.2萬，薪酬通脹頑固，市場對新任聯儲局主席沃什（Kevin Warsh）的鷹派加息預期死灰復燃。與此同時，中東局勢全面失控，美伊在荷姆茲海峽互相襲擊運油輪，也門胡塞武裝更攻佔紅海航運咽喉曼德海峽的祖卡島。加上OPEC報告驚爆沙特原油日產量跌至623.8萬桶的36年新低，引發國際能源供應極度恐慌，紐約期油暴衝至104美元，布蘭特期油高見109美元。通脹海嘯與高息陰霾相互交織，美國10年期債息瘋狂突破4.9厘心理大關。在強美元與高息環境的無情絞殺下，外資對亞洲離岸資產展開全方位提款，重擊了香港實施聯繫匯率下的資產估值，導致恆指隨後連跌5個交易日，至上周五（11日）跌至24,570點低位。 港股自上周五（11日）低見24,570點至本周三（16日）陷入極致膠著狀態，恆指在這4日內只在364點的極窄幅區間內拉鋸。這種窒息的牛皮格局，表面上是全球市場在聯儲局議息大考前夕集體躺平，深層原因卻是港股內部多空板塊發生了極端的結構性對沖。一方面，科技板塊遭遇地緣政治科技戰與行業價格戰的骨牌式重擊。美國政府日前指控6個中國人工智能模型「大規模蒸餾」美國技術並揚言擴大制裁，隨後DeepSeek宣布大模型API價格調降8成引發踩踏。更致命的是，一線獨角獸智譜(02513)突發公告配股發債集資391.5億元，兩個月內累計在市場抽水700億元，而壁仞科技(06082)亦在禁售期滿前夕傳出擬急配股78億元。兩大巨頭在OpenAI宣布2026年不上市及AI三巨頭高呼放慢發展步伐的寒冬前夕「瘋狂搶錢儲糧」，向二級市場施加了極嚴重的流動性虹吸。 科技板塊大失血形成沉重沽壓，但與此同時，5厘美債息又吸引避險資金與南下北水瘋狂湧入高股息的「中特估」金融防線，匯豐控股(00005)及內銀股發揮了強大的剛性護盤作用。「買金融、賣科網」的多空拉扯，最終將恆指死死鎖定在364點的窒息區間之內。 這場虛假的平衡在本周一（14日）曾短暫延續。當天美國8月核心CPI按月微升0.3%完全符合市場整體預期，觸發外圍市場演繹「靴子落地」的技術性反彈。前期恐慌超跌的港股引發淡頭集體平倉，配合日間國家統計局公布內地8月工業增加值按月升5.2%勝預期，令恆指當天反彈111點，收報24,917點，連同上周五（11日）出現連續兩日跑贏亞洲主要股市的表現。 然而，實體經濟「工業強、內需弱」的隱憂隨即在本周二（15日）全面爆發。內地8月社會消費品零售總額僅升0.4%接近停滯，固定資產投資跌7.2%，創6年最差，其中房地產開發投資更暴瀉19.9%。傍晚人民銀行公布的金融數據進一步落入冰點，8月新增人民幣貸款僅600億元，遠遜預期的4,000億元，其中住戶貸款淨萎縮2,029億元，證實居民正瘋狂去槓桿，實體經濟深陷「錢送不出去」的流動性陷阱。 信貸需求崩盤意味著銀行業未來的淨息差面臨嚴重惡化，疊加美國銀行（美：BAC）總裁深夜預警第三季投行收入疲弱，美債息向上突破5厘，導致恆指本周二（15日）開市即為全天最高位的24,934點，隨後沽壓傾瀉。一直死守大盤的匯控及內銀股集體補跌回落，中銀香港(02388)大跌4.57%，建設銀行(00939)跌2.83%，大市失守最後防線重挫250點。 到了本周三（16日），港股跌勢持續，日間在市場對聯儲局宣判的最高戒備中震盪尋底，恆指最低曾見24,574點。雖然下午傳出中國外長王毅在北京秘密斡旋伊朗外長阿拉格齊，伊朗承諾為國際航運安全提供再保證，令國際油價連續兩天高位急回，且美國8月零售銷售按月顯著增加1.2%證實經濟軟著陸，推動外圍納指100指數及美國費城半導體指數在本周三晚（16日）早段微彈。 然而，本周四（17日）凌晨2時聯儲局公布的議息結果給了全球離岸市場致命一擊。聯儲局如期加息0.25厘，但18名儲局官員提交的點陣圖中，竟有16人預期年內會繼續加息。主席沃什隨後在記者會上拒絕承諾停止加息，表態「broad金融狀況不具限制性」，其極端鷹派姿態徹底粉碎了市場的降息幻覺。 這觸發資金再度瘋狂拋售現貨債券，美國10年期債息在深夜呈倒V型暴衝回升至5.025%的歷史高位，美匯指數更強勢衝破100阻力。強美元與5厘美債息形成了強烈的環球流動性絞殺，外資在深夜無條件清倉中港跨國資產，導致恆指夜期崩跌287點，失速砸穿二萬五關口收報24,401點，港股再度表現全亞墊底。 展望未來一星期，港股大概率將持續跑輸亞洲主要股市。本周五（18日）日本央行即將公布利率決議，若跟隨共同社所傳加息至1.25%，全球Carry Trade套利資金將面臨二次清倉，加劇新興市場失血。而香港主要銀行亦面臨跟隨美國調升最優惠利率的壓力，本港港元拆息將被死釘在高位。這將直接推升本地企業與房地產的資產融資成本，地產與本地銀行股將首當其衝承受高息痛苦。在內地LPR利率宣判前夕，港股缺乏本土資金剛性護盤，極易在強美元周期中形成單邊下跌的流動性黑洞。 |
|
| 趙晞文 |
2026-09-17T10:17 |
元宇證券大中華區股票投資總監趙晞文推介藥明康德(02359) 推介原因： -業績勝預期 -手頭訂單持續增加 建議買入價：185元 目標價：220元 止蝕價：160元 |
|
| 許繹彬 |
2026-09-17T10:14 |
恆指本周波幅顯著收窄，截至昨日（9月17日），首四個交易日高低位對比只有272點（於低位24,662點至高位24,934點之間徘徊）。儘管港股上周累跌845點後本周呈現反彈，但此反彈顯然屬於「乾升」，成交持續萎縮。 自本周二（15 日）起，大市成交更不足2,000億元，昨日（16日）全日成交僅約1,811億元，創今年五月以來新低。鑑於全球主要股市本月集體陷入「乍暖還寒」狀態，忽上忽落已成常態；在主要市場未有明確方向下，本已疲弱的港股顯得格外脆弱。昔日堅守許久的25,000點大關原本是強勁支持位，但在跌穿後缺乏成交配合，現已轉化為關鍵阻力區。 筆者認為，全球股市陷入膠著，主因是美國最新通脹數據再度升溫，市場普遍預估聯儲局本周加息機會高達九成。再者，美股三大AI龍頭Anthropic、OpenAI及SpaceX傳出放緩AI投資的消息，令依賴AI發展的科技股首當其衝，相關軟硬件股份普遍受壓，進而拖累日、韓、台等亞洲三大股市急促回吐。期間雖有反彈，可惜僅屬「死貓彈」，缺乏成交支持，足見市場對後市信心不足。 不過，市場亦非一面倒受利淡消息包圍，仍有為投資者帶來憧憬的消息。中美兩國元首下周將於華盛頓會面，這場矚目的會談勢將牽動環球金融市場。外間預料，雙方除討論傳統的大宗商品與晶片議題外，熱門的人工智能（AI）安全問題亦是一大焦點。美資大行高盛早前就兩國元首會面進行調查，發現約38%內地投資者預計會面有望取得突破性進展，逾半受訪者則預期人民幣升值步伐保持不變，可見此會談對後市走向影響舉足輕重。 談回港股，現階段走勢與方向確實未明。適逢中秋及國慶長假期將至，「無成交、無波幅」的局面恐怕要維持至十月初。在觀望氣氛濃厚下，防守性強及高收息的板塊頓成資金避風港，內銀股相信能發揮「避風塘」的作用，當中招商銀行(03968)不妨多加關注。 |
|
| 羅尚沛 |
2026-09-16T22:45 |
智譜(02513)調高今年底年度經常性收入(ARR)指引至30億美元，又表明回A前不會再進行股本融資。 銀河證券業務發展董事羅尚沛表示，AI發展日新月異，智譜給予的收入指引未必一定做到，而且即使收入大升，虧損亦可能加劇，相信股價回升，純粹是超跌後反彈。 |
|
| 林嘉麒 |
2026-09-16T16:26 |
香港首個五年規劃其中1個重點係打造「留學香港」品牌，吸引更多內地及海外學生，在港修讀本地評審全日制專上課程慨非本地生數目，預期由2024-25學年慨7.98萬人，增至2029-30學年慨10萬人，升幅高達25%。早前，差餉物業估價署公布7月慨樓價指數13連升斷纜，但租金繼續破頂，隨著更多人才及學生來港，係咪可以繼續撐起租金，甚至為本港樓價帶黎支持？ 元宇證券投資總監林嘉麒指，《施政報告》強調，要推進香港成為國際人才集聚高地，並推動專才計劃，再加上積極發展人工智能(AI)、北部都會區、大學城等，唔止非本地生數量增加，更會吸引大批專才來港，尤其係內地專才，佢又話，過去幾年，留學生熱門居住地區慨租金飆升，亦變相推高樓價。 KK又話，人才集中對本港樓價一定有幫助，但都要視乎供應、租金、回報點樣拿個平衡，近兩年租金回報非常誇張，租金差唔多升左10%至20%，若未來整體流量再升，而供應相對唔多，有望進一步推高租金，繼而令樓價受惠。 |
|
| 聶振邦 |
2026-09-16T15:58 |
政府公布本港首份五年規劃，指要鞏固香港領先全球慨跨境財富管理中心地位，推動人民幣櫃台納入港股通，並研究以人仔支付政府開支。匯豐證券降港交所(00388)評級至「持有」，目標價削至410元，原因是銀行、資本市場及地產活動，係6月初開始減慢，為港交所收入及盈利帶來壓力，不過，摩根士丹利上調港交所目標價至538元，主要是預期未來資本市場活動持續活躍。大行對港交所睇法好壞參半，投資者應該點部署？ 高歌證券金融首席分析師聶振邦認為，短期黎講，匯證慨預測較可信，2022年至今，港交所股價走勢同恆生指數息息相關，佢又指，若港股成交唔活躍就無法帶動恆指，並估計港交所股價未來兩月好難上返460元。 聶Sir續指，大摩慨報告係偏向長線慨分析，但未知幾時可以到價，因為當中可能有唔少變數。他提醒，如果想做長線部署，港交所係一個唔錯慨選擇，建議等股價落到370元水平再考慮入手，即較現水平再跌逾6%。 |
|
| 莊志雄 |
2026-09-16T15:23 |
沙特阿拉伯東西原油管道遇襲受損需暫時關閉，紐約期油及倫敦布蘭特期油昨晚(15日)再飆3%至4%，依家原油供應問題係咪比之前封鎖霍爾木茲海峽(Strait of Hormuz)時更嚴重？油價又點影響債息走勢？ 「股市漁夫」創辦人莊志雄指，當前局勢完全冇改善，沙特8月產量已係1990年以來最少，雖然美國話幾日內可修復受損輸油管道，但亦有人估計要停運5至6周，國際能源資訊署(IEA)已警告，2026年全球原油日供應會減少近600萬桶，唔止影響供應，亦會影響埋需求，依家油價企係100美元樓上，IEA將2026年原油需求下調至每日減少250萬桶，反映高油價引發需求破壞，令消費者開支緊縮。 此外，美國原油庫存爆冷大增逾700萬桶，反映當地實體需求受損，而高度依賴紅海重要港口延布(Yanbu)慨歐洲，冬季能源價格或受到重大衝擊，現時確立左全球供應鏈極度緊繃及脆弱慨結構，並非短時間內可以解決。 Lewis又話，最近油價同債息慨1個月滾動相關性升至0.96，即油價每升1美元，長債息就升1至2個基點，呢個情況並唔常見，如果兩者唔能夠盡快脫鉤，加上胡塞武裝控制紅海關鍵島嶼，油價恐進一步推高債息。 佢認為，聯儲局今晚(16日)加息0.25厘已係市場共識，重點在於會後聲明會否展現偏鷹言論以壓抑市場需求，先有望壓住債息，並打破油價主導債息慨關係。 |
|
| 彭偉新 |
2026-09-16T12:47 |
截至早上11時止，過去1小時內《彭博》用戶搜尋量最多港股，依次為智譜(02513)、濰柴動力(02338)、壁仞科技(06082)、聯想集團(00992)及MiniMax(00100)。 市傳OpenAI擬啟動新一輪融資，令爭奪資本市場資金戰升級，智譜繼7月之後再開「抽水機」，股價繼昨日(15日)插穿配股價後，今朝(16日)一度低見655元，再跌3.6%，但其後回升，更收復714元配股價，中午收市報736.5元，升逾8%，智譜兩度配股係咪可以應付到人工智能(AI)發展要不斷燒錢？ 資深證券分析師彭偉新指，依家最大問題唔係集唔集到資，而係幾時會出現集資困難，市傳月之暗面(Moonshot AI)及DeepSeek計劃來港上市，估計到時整體估值會破紀錄，集資能力或會出現好大折扣，所以要趕係「巨無霸」公司未黎上市之前集資，至少現時睇好AI慨資金仍願意買貨。 Castor又話，隨著AI相關股自高位回調近一半，依家呢個買入時間感覺上平左好多，加上早前公布慨半年業績反映整體收入有改善，唯一要留意係，如果集資後要係市場上投放數據中心所需慨硬件，金額可能又會好龐大，所以若唔及早集資、未來冇錢燒，分分鐘比人搶走市場份額，所以完成集資後，股價有機會逐步回穩，甚至有輕微反彈慨機會。 |
|