| 評論員 |
時間 |
內容 |
標籤 |
| 盧楚仁 |
2026-04-17T17:59 |
受美伊戰爭影響，外匯市場暫時都係窄幅波動為主，加元近日表現較為突出，已連升多日，加元有咩支持因素？後市係咪可以繼續睇好？ 獨立外匯商品分析師盧楚仁表示，分析加元時，好多時都會用能源、油價、天然氣黎判斷，而油價最近一度急升，但當時加元就不升反跌，反而利好左美元，市場預期，美國聯儲局短期內未必可以減息，就算能源出口大國之一慨加拿大，加元都要受壓，由於油價近期回落，美元就跟住跌，帶挈加元反彈。 此外，加拿大係全球數一數二慨天然氣出口大國，開戰後，天然氣價格持續急挫，亦係拖低加元其中一個元兇。 Jasper又認為，近期美元轉弱會有利加元，但亦唔代表一面倒睇好加元後市，更唔排除美元稍後回勇，加元又再急挫，所以宜睇定些先。 |
|
| 盧楚仁 |
2026-04-10T18:05 |
美伊達成停火2周協議，十國集團(G10)貨幣今個星期全線升，當中以挪威克朗最強勢，累升近3%，紐元、澳元緊隨其後，連較弱慨日圓都升0.3%，導致美匯指數跌至99以下。雖然市場對美伊談判傾向樂觀，但戰局仍有唔少變數，美匯指數下周有冇機會反彈？ 獨立外匯商品分析師盧楚仁表示，除左戰事發展，相信市場焦點都落係美國今晚(10日)出爐慨3月消費物價指數(CPI)，如果CPI大升，理論上會利好美元，但如果公布時油價急挫，反而不利美元，現時大部分金融市場及產品慨走勢都同油價息息相關，而油價走向又要視乎局勢發展，所以都要睇埋美伊談判係咪順利，若談判有實質成果，相信下周一(13日)油價勢大跌，相反，若談判破裂，油價或會衝高，但要小心衝高回落風險。 Jasper估計，美元向下慨機會仍較大，屆時會利好非美貨幣，若美匯指數失守98.5水平，相信美元強勢將暫告一段落。 |
|
| 盧楚仁 |
2026-03-27T17:38 |
美以伊戰事仍未知幾時結束，如果再拖多1至2個月，資金就會繼續流出非美貨幣，亞洲貨幣之中，日圓係咪會受最大影響？日本財務大臣山皋月最新表示，或會採取較大膽慨行動應對匯率波動，若日圓轉弱至160水平，日本央行會唔會出手干預？ 獨立外匯商品分析師盧楚仁估計，日央行短期出手干預慨機會較小，可能只係「出口術」，又預期日圓見162水平先會出手，市場甚至擔心會聯同美國聯儲局干預。 Jasper又認為，日圓係現水平楂同沽都唔係咁合適，並要留意日圓守唔守到162關口，如果守得住就可以博反彈。 |
|
| 盧楚仁 |
2026-03-20T18:22 |
中東局勢發展持續緊張，倫敦金屬交易所(LME)期銅價格今個星期累跌4%，銅價一向被視為一個領先指標，依家銅價下跌有咩啟示？未來會點行？ 獨立外匯商品分析師盧楚仁指，銅庫存輕微減少，理論上應該利好銅價，但環球股市不斷下挫，拖累銅價表現，加上各國經濟數據較差，對銅需求相應減少，相信銅價短期會持續弱勢，估計係每磅4.9美元，即每噸10800美元水平會有支持。 Jasper又話，銅係基本金屬龍頭，一旦價格大跌，其他金屬都會受牽連，現時金價似乎有機會先下試每盎司4400美元，如果之後上唔返5500美元，估計短期會係4400美元水平橫行。 |
|
| 盧楚仁 |
2026-03-13T18:03 |
美以伊戰事開打以來，外圍主要農產品期貨價格未見明顥炒作，雖然化工、化肥供應受阻，同埋有加價風險，但暫時未見轉嫁至主要農產品。 獨立外匯商品分析師盧楚仁認為，其實農產品價格都有炒作，如果睇返俄烏戰事，其中，由於玉米可以用黎生產酒精作醫學用途，所以變成其中一類能源原材料，當油價上升時，都會利好糖及玉米價格。 Jasper又指，大豆價格亦因玉米價格上升而跟升，中美元首稍後有可能會面，市場憧憬中國將會購買更多大豆，繼而推高大豆價格，只係升幅唔及俄烏戰事期間，佢又估計，係咁多農產品之中，大豆今年有望跑贏大市。 |
|
| 盧楚仁 |
2026-03-06T18:12 |
美以伊戰局持續緊張，金價及美元成為今次中東戰事贏家，鋁業有冇受戰事影響，鋁價未來會點走？ 獨立外匯商品分析師盧楚仁指，現時卡塔爾因戰事暫停生產及出口鋁，預期消息會刺激鋁價持續上升，值得留意係，鋁及銅都係製造軍事用品慨原材料，相信短期呢類原料需求會急升，加上鋁庫存本來已告急，所以直至戰事緩和前，鋁價仍可睇高一線，暫時睇每噸3500美元。 |
|
| 盧楚仁 |
2026-02-27T17:46 |
貴金屬價格1月底單日暴跌後，2月出現反彈，期金及期銀最少彈10%，兩者走勢其實差唔多，但黃金又唔少基本因素支持，值博率係咪較白銀高？ 獨立外匯商品分析師盧楚仁認為，都要視乎情況，若為左避險，黃金功能毋庸置疑，如果受地緣政治因素影響，買金係穩陣過銀。佢續指，銀價通常會跟金價升，有時甚至升得更多，如果屬進取型投資者，睇好銀價升幅會繼續跑贏金價，就可以買白銀。 不過，Jasper提醒，每次銀價升至高位時，都會有大戶減倉，佢都擔心之後都會有同樣情況，因此，雖然銀價後市樂觀，但係咪可以再創新高仍然係未知數。 |
|
| 盧楚仁 |
2026-02-13T18:00 |
資金流入避險資產，包括美債、日圓及瑞士法郎，其中，日圓係日本大選結束後才轉強，但瑞郎近年持續強勢，呢兩種傳統避險貨幣，邊隻先至係避險首選？ 獨立外匯商品分析師盧楚仁指，以往日圓係遠勝瑞郎，不過，日圓自去年開始已發揮唔到避險作用，所以資金流入黃金及瑞郎，市場主要擔心日本央行加息會令日圓受壓，除非爆發股災導致拆倉。 Jasper認為，若美元持續弱勢，瑞郎避險功能今年會比日圓更勝一籌。 |
|
| 盧楚仁 |
2026-02-06T17:34 |
阿拉比卡咖啡期貨今個星期跌至6個月低位，全周累跌逾7%。由於全球主要出口國巴西天氣好，預期供應將會增加。與此同時，美國總統特朗普(Donald Trump)周二(3日)係白宮首次同哥倫比亞總統佩特羅(Gustavo Petro)會面，兩國緊張關係似乎降溫。現時哥倫比亞係全球第3大咖啡生產國，消息會唔會間接拖累咖啡期貨價格？ 獨立外匯商品分析師盧楚仁指，之前因為擔心美國同哥倫比亞關係緊張，導致咖啡價格高企，但依家已開始下跌，佢又認為，係呢個情況下，只要咖啡豆供應充足，阿拉比卡咖啡價格就有下跌壓力，又提醒要留意超賣及反彈再跌慨情況，短期宜睇淡。 |
|
| 盧楚仁 |
2026-01-30T18:30 |
美元貶值，歐元一度衝上1.2樓上，升穿2018年以來慨8年阻力，算唔算係假突破？還是歐元都有條件站上1.2樓上，甚至更高水平？ 獨立外匯商品分析師盧楚仁指，美元向下突破長期支持位，肯定係不利，但會帶動歐元不斷破位向上，歐元後市或可借助美元今輪跌勢反彈，因為歐元係美匯指數佔比最大，如果美元弱，歐元後市應可睇高一線， Jasper續指，依家歐元係1.19水平打緊底，一旦失守1.19，下一個關鍵位係1.18，歐元可以先係呢個範圍打底，之後再發力向上，加上睇歐洲央行慨貨幣政策，都幾肯定息口已經見底，意味已經冇減息壓力，一定利好歐元。 |
|
| 盧楚仁 |
2026-01-23T17:53 |
黃金升勢未停，金價再度破頂，高見每盎司4967美元，距離5000美元僅一步之遙。本周金價已升近8%，市場是不是開始對黃金有FOMO(錯失恐懼症)情緒？一旦有機會回套，要把握入市機會？ 獨立外匯商品分析師盧楚仁指，支撐金價上升因素包括美元走弱和地緣政局緊張，格陵蘭風波令歐洲資金拋售美元資產，以及美國和伊朗有機會打仗，令資金流入黃金市場避險。現時的金價水平是嚴重超賣，5000美元屬於世紀心理關口，或出現獲利回套和技術調整。 Jasper又指，黃金現階段不宜高追，投資者可以先平倉離場，觀望這個周末有沒有特別消息再作部署，或者等下星期金價回落至10天線左右再吸納，如果金價突破5000美元水平，就看5100至5200美元。 |
|
| 盧楚仁 |
2026-01-16T17:50 |
加拿大總理卡尼(Mark Carney)今早(16日)在北京與國家主席習近平會面，習近平表示兩國部門恢復重啟各領域合作，取得積極成果。今次中加會面可否幫助加拿大經濟，如何預測加元走勢？ 獨立外匯商品分析師盧楚仁指，中加關係改善能否幫助加拿大經濟仍有待觀察，因為暫時未見合約簽署和訂單，而加元是商品貨幣，與能源包括石油和天然氣等價格息息相關，現時中東局勢緊張，不排除開戰會令油價短線出現反彈，但最終都會因為全球需求疲弱而回落，如果打不成，油價將會跌得更厲害。 Jasper續指，油價疲弱令加拿大能源出口收入減少，經濟放緩，料加元未來維持橫行。 |
|
| 盧楚仁 |
2026-01-09T17:43 |
近日地緣政局焦點必定係美國突襲委內瑞拉，據《彭博》最新報道，美國總統特朗普(Donald Trump)將會見近20名油企高層，又話希望美國油企可以重返委內瑞拉，連串事件會點影響油市？ 獨立外匯商品分析師盧楚仁認為，油價好大機會重返每桶50美元水平，美國之前持續購入石油做戰略儲備，令油價可以企穩55美元以上，但依家特朗普表明要油價跌，加上未來委內瑞拉會有源源不絕慨供應，相信油價好快就會失守55美元，雖然近日美國威脅印度唔可以買俄羅斯石油，帶動油價反彈，但相信油價未來仍會持續向下。 |
|
| 盧楚仁 |
2026-01-02T18:12 |
踏入2026年，匯市比較淡靜，美匯指數守住98美元水平，變動唔大。美匯指數係2025年累跌9%，表現係2017年以來最差，但去年1月表現其實唔算差，點睇今個月走勢？ 獨立外匯商品分析師盧楚仁指，大方向都係預期美國聯儲局今年仍有減息壓力，美元會走弱，關鍵在於幾時減，究竟係今個月減息，還是等新主席上場先減，雖然依家美元偏弱，但最近有見底回升跡象，佢估計，美匯指數今個月會繼續偏淡，不過，都要留意美國今晚(2日)及下星期出爐慨經濟數據，若數據反映當地經濟仍然強勁，美元或會反彈。 |
|
| 盧楚仁 |
2025-12-19T17:41 |
日本央行一如預期加息，美元兌日圓最新跌至156水平，擔唔擔心再爆拆倉潮？ 獨立外匯商品分析師盧楚仁認為，現階段對日圓拆倉放下戒心係言之尚早，日央行行長植田和男日表明，只要經濟及通脹符合預期，就會繼續加息。匯市方面，日圓又升又跌，同美元互相牽制，佢認為，投資者有機會係假期前平倉離場，由於日央行態度「鷹得黎又有些鴿」，有機會令以為可以拆倉慨投資者沽返轉頭。 Jasper建議，投資者留意明年美國及日本慨貨幣政策，包括兩國加息情況，由於美國減息會對日圓構成壓力，令其他非美貨幣被睇高一線，因此，不宜對日圓睇得太淡。 |
|
| 盧楚仁 |
2025-12-17T17:31 |
雖然美國總統特朗普(Donald Trump)下令全面封鎖委內瑞拉受制裁慨油輪，加大向該國政府施壓力度，加上俄烏有機會停火，但呢些消息仍不足以扭轉油價弱勢？ 獨立外匯商品分析師盧楚仁指，油價之前受唔同地緣政治利好消息帶動，但僅帶來短暫反彈，而油價未來走向仍受唔同因素影響，例如環球經濟不景氣、委內瑞拉政局不穩定等。 Jasper表示，看淡油價後市，但某程度上仍取決於美國會唔會吸納，若沒有或等油價再跌先買入，油價就會持續向下，他又稱，依家50美元係重要心理關口。 |
|
| 盧楚仁 |
2025-12-12T17:47 |
巴西慨阿拉比卡(Arabica)咖啡豆供應持續減少，按年跌近20%，阿拉比卡咖啡豆價格連升3日，雖然美國已放寬對巴西咖啡關稅，但都刺激唔到出口，阿拉比卡咖啡豆價格未來會點走？ 獨立外匯商品分析師盧楚仁指，暫時仍然係高位爭持，由於近期不斷受好淡消息影響，令阿拉比卡咖啡豆價格持續大上大落，不過，若美元持續偏弱，巴西供應又持續減少，價格就有機會向上。 不過，佢認為暫時都唔可以完全睇好，始終全球經濟疲弱，對咖啡豆慨需求未必太大，加上阿拉比卡咖啡豆現價唔算高，估計暫時係385美元水平有阻力。 |
|
| 盧楚仁 |
2025-12-05T17:16 |
日本央行將會係兩周後議息，即12月19日，交易員及市場突然押注日央行或於短期內加息，如果真係加息，日圓會唔會再爆發大規模拆倉潮？ 獨立外匯商品分析師盧楚仁指，暫時未見有大規模拆倉跡象，依家市場觀望情緒仍較濃厚，一方面假期前夕有部分交易員放假，另一方面美國聯儲局今年減左兩次息，未來要留意日美央行議息後慨動向及言論，若聯儲局下周議息後暗示未來會再減息，而日央行亦暗示進一步加息，呢個行情先有機會引爆拆倉潮。 |
|
| 盧楚仁 |
2025-11-28T17:52 |
市場對美國12月減息預期升溫，美匯指數今個星期轉弱，好大機會令美元11月埋單計數由升轉跌，但暫時僅微跌約0.2%，其中1個主因係聯儲局官員「放鴿」，依家市場聚焦明年減息次數，美元後市會點走？ 獨立外匯商品分析師盧楚仁認為，美元出現下跌趨勢仍言之尚早，又指市場主要炒減息，若未來慨經濟、就業數據較差，到時投資者應該會炒減息，但如果數據強勁，資金仍炒減息，未必可以進一步推低美元，但如果數據強又繼續減息，投資者可能覺得今個減息周期已到尾聲。Jasper建議，投資者下周要留意數據表現，以判斷美元走向。 |
|
| 盧楚仁 |
2025-11-21T18:45 |
日圓今日(21日)有唔少消息，日本財務大臣片山皋月今早(21日)預告，唔排除出手干預匯市，日圓一度轉強，其後日本首相高市早苗慨內閣通過逾萬億元刺激經濟方案，又指一旦額外稅收不足，將會考慮加大發債力度，日圓再度轉弱，於157至156水平徘徊，點睇日圓後市？ 獨立外匯商品分析師盧楚仁指，高市早苗慨刺激經濟政策勢在必行，未來極有可能加大發債力度，不過，大量發債對日圓十分不利，因為國家債務增加會對國家貨幣不利。此外，若刺激經濟措施見效，日本央行就會放慢加息步伐，會令日圓轉弱，相信日圓未來會係156至158元水平徘徊。 |
|
| 盧楚仁 |
2025-11-14T18:05 |
近期比特幣(Bitcoin)價格大跌，已自10月高位回落20%，技術上已步入熊市，雖然今年仍累升約4%，但今個星期已跌穿50周線，即10.3萬美元慨關鍵水平，下一個支持位置係咩水平？ 獨立外匯商品分析師盧楚仁指，Bitcoin近期走勢都係「彈散」，令人失望，主要受2大因素困擾，首先係美股呢兩日回調，其次係美元反彈，都會對Bitcoin不利。 Jasper又認為，Bitcoin後市好大程度要睇美股走勢，若美股今次回調之後成功築底回升，Bitcoin亦有望跟隨大市反彈，建議投資者可以留意9.7萬美元關口，相信短期可以企穩，並留意可唔可以上返去10.5萬美元。 |
|
| 盧楚仁 |
2025-10-24T16:44 |
美國總統特朗普(Donald Trump)宣布終止同加拿大慨貿易談判，加元應聲下跌，跌穿1.4水平，若特朗普態度持續強硬，點睇加元後市？ 獨立外匯商品分析師盧楚仁指，加拿大陷入經濟衰退，當地實施寬鬆貨幣政策，加拿大央行未來或會繼續減息，相信加元會持續弱勢。 佢又話，特朗普終止同加拿大慨貿易談判，令加元走勢雪上加霜，Jasper又話，後市要留意加元可唔可以企穩1.415水平，若再有不利消息，有機會見1.44水平。 |
|
| 盧楚仁 |
2025-10-17T18:26 |
大豆價格本周變動唔大，但中國5月起已冇買美國大豆，轉為向巴西、阿根廷入貨，美國總統特朗普(Donald Trump)指，考慮停買用黎製造生物燃料慨中國廢棄食用油UCO，每年9月至11月係美國大豆收成季節，係中美貿易戰下，美國大豆或會滯銷，會唔會令大豆期貨價格受壓？ 獨立外匯商品分析師盧楚仁指，近期大豆及豆油價格上升，係因為特朗普呼籲美國轉用大豆製造「大豆油」，取代由中國輸入慨食用油，繼而提高大豆需求，雖然呢個舉動令行情好轉，但如果中國真係唔買美國大豆，即使近期大豆價格反彈，之後都會再轉弱，相反，如果中國重新購買大豆，美國大豆價格就會回升轉機。 |
|
| 盧楚仁 |
2025-10-10T17:34 |
美國政府出手干預阿根廷匯市，同阿根廷政府達成一項200億美元貨幣互換協議，披索隨即大升近4%。雖然干預他國匯市唔係冇先例，但肯定係相當罕見慨情況，到底美國今次出手係出於經濟還是政治考慮？ 獨立外匯商品分析師盧楚仁相信，美國干預阿根廷匯市以政治考慮居多，因為美國總統特朗普(Donald Trump)同阿根廷總統關係良好，先至會出招撐披索。 不過，Jasper形容披索係「長貧難顧」慨弱勢貨幣，亦唔睇好後市。 |
|
| 盧楚仁 |
2025-10-03T17:59 |
日本自民黨總裁選舉將於明日(4日)投票，有分析估計，將會係農相小泉進次郎及前經濟安保大臣高市早苗之爭，爭取成為下任首相，今次選舉結果對日圓有咩影響？ 獨立外匯商品分析師盧楚仁指，高市早苗取態較鴿派，小泉進次郎就較鷹派，市場暫時持觀望態度，佢估計，小泉勝算較大，因為佢有打擊通脹慨決心，相信黨員會投票支持小泉。 佢續指，若小泉勝出，市場會憧憬日本央行未來加息步伐將會加快，繼而利好日圓，但投資者要留意日央行月底召開慨議息會議，一旦宣布加息，投資者就要小心爆發拆倉危機。 |
|
| 盧楚仁 |
2025-09-26T17:33 |
美元反彈，令加密貨幣(Cryptocurrency)市場停唔停，其中，比特幣(Bitcoin)價格失守11萬美元關口，以太幣(Ethereum)則跌穿4000美元水平，周一(22日)至昨日(25日)，以太幣交易所買賣基金(ETF)已有近3億美元流走，今個星期整體數字資產價值已蒸發逾1400億美元，有咩原因令資金對加密幣興趣大減？Bitcoin價格係咩水平才有支持？ 獨立外匯商品分析師盧楚仁指，虛擬貨幣一般跟隨納指升跌，當納指回調時，虛擬貨幣回調速度及幅度會更快更大，加上美國聯儲局減息力度不及預期積極，令美股進一步回調，估計虛擬資產短期會繼續跟隨回調，不過，如果之後美國經濟數據好轉，又配合減息預期，美股就有支持，到時Bitcoin及以太幣就會跟隨回升，估計Bitcoin價格係10.7萬美元水平有支持，不過，一旦失守呢個位，就要係10萬美水平才有支持。 Jasper又話，以太幣上升空間較Bitcoin大，所以更值博。 |
|
| 盧楚仁 |
2025-09-19T18:38 |
日本央行議息後維持利率不變，並指會減持交易所買賣基金(ETF)及房地產投資信託基金(J–REIT)，係咪反映未來加息機會大左？ 獨立外匯商品分析師盧楚仁指，日央行按兵不動係意料之內，但減持ETF及J-REIT就有些意外，但其實過去係量化寬鬆(QE)時期，有部分資金流入股市買ETF、日股，所以依家趁日股升上高位減持都好正常。 Jasper相信，日央行未來會陸續減持手上慨ETF，或繼續暗示將會加息，但應該會等美國聯儲侷減息周期告一段落，大概明年才會加息。 |
|
| 盧楚仁 |
2025-09-12T17:40 |
國際金價持續破頂，一度衝上每盎司3673美元，再創新高，金價已連升4周，技術上已經超買，係咪已到左獲利離場慨時候？ 獨立外匯商品分析師盧楚仁指，的確可以考慮先行獲利，始終金價已嚴重超買，值得留意係，美元唔算弱，地緣政治暫時未見升溫，金價炒上或代表已Price In左下周美國聯儲局減息慨憧憬，後市要留意美國減息後金價有幾大回套壓力，同埋減息後美元會否轉強，金價係高位回套壓力愈來愈大，估計較大機會係議息後回調。 佢續指，如果投資者仍睇好金價，暫時黎講短炒會比較適合，或者吼高位造淡亦可以考慮，估計金價係3700美元水平會有唔少投資者獲利。 |
|
| 盧楚仁 |
2025-09-05T18:35 |
美日終於傾掂貿易協議，美國總統特朗普(Donald Trump)簽署行政命令，將日本汽車進口關稅由27.5%降至15%，其他商品關稅上限定於15%，日本就會加碼投資美國，同埋買美國農產品，外電形容今次係日本勝利，美國減日本關稅對日圓後市有咩影響？ 獨立外匯商品分析師盧楚仁指，若特朗普慨關稅政策被否決，將會利淡美元，美國金融市場亦有機會出現動盪，繼而利好日圓，到時日圓將會有明顯升幅，加上日央行有機會加息，或出現日圓拆倉，令日圓走勢強勁。 Jasper又話，日圓近期表現反覆偏軟，佢估計，日圓短期仍然會處於上落市格局，若冇特別消息刺激，日圓將會維持146至149水平區間上落，日圓暴跌慨機會唔大，但呢些潛在消息可能會令日圓暴升。 |
|
| 盧楚仁 |
2025-08-29T18:47 |
國際金價持續橫行差唔多5個月，高低波幅約140美元，而過去一段時間未見出現爆邊情況，金價應該點部署？ 獨立外匯商品分析師盧楚仁指，金價做槓桿及炒孖展都有一定波幅，其實依家上落市對投資者黎講仲好炒，不過，下周一(9月1日)係美國假期，要小心呢個長周末及今晚(29日)聯儲局慨官司結果，如果今晚有利好消息，唔排除金價會夾高少少，之後就會見頂回落，暫時睇每盎司3350美元。 |
|
| 盧楚仁 |
2025-08-22T18:04 |
金價近日出現回調，依家投資市場焦點落係聯儲局主席鮑威爾(Jerome Powell)今晚係Jackson Hole全球央行年會慨演講，希望搵到一些美息走向慨線索，但依家市場9月減息慨預期降溫，金價現水平係咪已Price In左今年美國將會減息？如果鮑威爾慨言論偏「鷹」，金價係咩位置會有支持？ 獨立外匯商品分析師譚家康指，相信金價現水平已Price In美國下月會減息，如果之後再減息，就會不利美元，但會帶動金價向上。 佢又話，市場依家普遍擔心鮑威爾會「放鷹」，所以美元持續回升，金價就回套，若鮑威爾「放鷹」，估計金價有機會跌穿每盎司約3311美元，之後可能要落到3298美元先有支持。 |
|
| 盧楚仁 |
2025-08-06T17:40 |
美國總統特朗普(Donald Trump)公布慨「等對關稅」(Reciprocal Tariff)將會係明日(7日)生效，稅率介乎10%至約40%，近期美國與印度、俄羅斯關係惡化，但金市似乎未見避險需求，金價會唔會繼續係區間上落？ 獨立外匯商品分析師盧楚仁指，美國非農就業數據差，刺激金價大升，市場繼續觀望美匯指數走勢，估計金價暫時會係高位爭持。另一方面，以色列指將會全面佔領加沙，亦有利金價。 Jasper估計，金價短期走勢反覆，有機會升至每盎司3390美元，升穿後下一站睇3440美元。 |
|
| 盧楚仁 |
2025-07-18T17:39 |
美國眾議院周四(17日)通過3項加密貨幣(Cryptocurrency)法案，今日(18日)交由美國總統特朗普(Donald Trump)簽署正式成為法律，而且最新據報特朗普會簽署另一項新慨行政命令，允許美國國民以401(K)退休福利計劃帳戶投資加密貨幣、貴金屬、私募股權、基建資產等，消息支持比特幣(Bitcoin)重上12萬美元，仲有冇動力再破頂？ 獨立外匯商品分析師盧楚仁指，Bitcoin一連有多個好消息，相信能夠繼續支持Bitcoin再破頂，加上香港亦即將會係8月舉行國際矚目慨比特幣大會Bitcoin Asia 2025，令市場對Bitcoin更有憧憬，進一步支持再破頂，因此，預期Bitcoin下一站睇13萬美元水平，若能突破，唔排除年底有機會挑戰15萬美元水平。 |
|
| 盧楚仁 |
2025-07-11T17:52 |
美國總統特朗普(Donald Trump)表示，快將開徵銅關稅50%，至於加拿大輸美商品就開徵35%關稅，加元即時轉弱至1.373兌1美元，跌至今個月跌位，跌幅亦較其他十國集團(G10)貨幣大，若關稅協議冇彎轉，加元係咪會持續轉弱？ 獨立外匯商品分析師盧楚仁認為，關稅問題一定會影響加元，依家美加關係惡劣，所以關稅問題仲有冇彎轉好難講。 Jasper又話，雖然加元上半年有得升，但明顯跑輸其他貨幣，跌幅亦較其他貨幣大。佢認為，早前加元可能已係1.354見頂，後市有機會轉弱至1.38。 |
|
| 盧楚仁 |
2025-07-04T17:19 |
加元係本周暫時表現最好慨十國集團(G10)貨幣，主要受惠於油價，本周暫時累升近2%，加上美加貿易談判傳出正面消息，點評估美加談判結果，同埋加元未來走勢？ 獨立外匯商品分析師盧楚仁指，加元今年先跌後升，之前美加貿易談判氣氛相當惡劣，美國揚言要加拿大成為美國第51個州，拖累加元跌至1.48水平，但之後情況逆轉，加拿大總理杜魯多(Justin Trudeau)更宣布辭職，令雙方氣氛趨向緩和，加上油價早前急升，亦有利加元造好。 Jasper又指，唔排除加元短線試1.354水平，若試穿後，下個支持位可以睇1.34水平。佢又認為，美元後市不宜睇得太淡，因為美國有幾個數據真係非常強勁。 |
|
| 盧楚仁 |
2025-06-27T17:24 |
受惠於中東局勢緩和及貿易戰風險降溫，加上美元持續弱勢，新台幣進一步轉強，升至3年高位，已連續4日轉強，累計升值3%，似乎升得好急，點睇新台幣後市？ 獨立外匯商品分析師盧楚仁指，新台幣轉強，唔止因為美元弱，今輪升勢都有基本因素支持，年初至今累計升幅唔少，所以成功跑贏區內其他貨幣，而台灣經濟數據正在好轉，主要係半導體及晶片行業帶動經濟增長，佢估計，新台幣升勢持續，今年第3季有機會見27.5至28兌1美元。 |
|
| 盧楚仁 |
2025-06-20T17:44 |
英倫銀行一如預期維持利率不變，聲明提及未來仍會逐步減息，並指擔心中東緊張局勢會對當地經濟造成影響。此外，英國出左5月零售數據，按年及按月都轉跌，差過預期，英鎊應聲由1.35水平跌至1.347，地緣政治因素點影響英鎊走向？ 獨立外匯商品分析師盧楚仁指，英國通脹偏高，雖然經濟放緩，零售銷售數據亦顯示經濟進一步轉差，通脹率由3.5%降至3.4%，係日本之以外通脹第2高慨國家，所以減息會有困難。 Jasper又話，現時英國利率4.25厘，通脹率3.4%，係呢個情況下減息壓力唔大，但另一方面，經濟數據帶黎減息壓力，因此，英倫銀行都進退兩難。一旦經濟數據轉差或通脹有機會回落，英鎊就會更弱，佢估計，英鎊下周會繼續走弱。 |
|
| 盧楚仁 |
2025-06-12T17:37 |
美國5月通脹進一步降溫，整體及核心消費物價指數(CPI)都低過預期，似乎未受關稅戰影響，美匯指數亦反應唔大，係98至99水平徘徊，美國今晚(12日)會拍賣一批30年期國債，美匯指數會點走？ 獨立外匯商品分析師盧楚仁預期，美匯指數短期仍會受壓，雖然中美經貿會談傳黎好消息，但利淡美元慨消息更多，除左通脹數據，伊朗聲稱會襲擊美軍及美國洛杉磯亂局等因素，短期都會困擾美匯指數。 Jasper認為，市場需時消化利淡消息，亦要留意美國經濟數據及財赤問題，相信要等呢些不明朗因素消退後，美匯指數先有機會回升，佢建議留意上次低位，即97.92水平，一旦失守，有機會跌至97.5，甚至要落到97水平先搵到支持。 |
|
| 盧楚仁 |
2025-06-06T16:30 |
歐洲央行一如預期減息0.25厘，但暗示減息周期或結束，自去年6月起，歐央行累計減息8次，累減逾200點子。歐元區最新通脹率已降至略低於2%，歐央行減息周期係咪快將完結？貿易戰會唔會令更多資金流入歐元資產，刺激歐元向上？ 獨立外匯商品分析師盧楚仁指，雖然歐央行連續減息8次，但歐元未見轉弱，反而繼續向上，主要係美匯指數弱勢，令非美貨幣強勢。若歐洲通脹率維持現水平，歐央行未必有減息壓力，不過，若通脹率持續偏低，唔排除歐央行會繼續減息。 Jasper又話，昨日(5日)歐元升到1.15之後顯著回落，投資者要留意貿易談判慨進展，以及今晚美國公布慨非農數據對美匯指數有咩影響，佢估計，歐元係1.15水平已見頂，一旦再有不利消息，或會下試1.1357水平。 |
|
| 盧楚仁 |
2025-05-16T17:26 |
中美貿易談判本周初出現重大突破，互相大幅下調對方慨關稅，為市場帶黎驚喜。美國總統特朗普(Donald Trump)預期，有機會係周末同國家主席習近平通電話，但至今官方仍未確認兩人係咪會通話，人仔後市能否突破7.18？ 獨立外匯商品分析師盧楚仁認為，人仔未必可以突破7.18，即使互減關稅，經濟始終會受影響，唔同層面有唔同程度慨負面效應，係經濟欠佳下，人民銀行繼續減息降準會係大方向。佢又話，中央及人行係咪想人仔升值，呢個問題都要思考下。 Jasper補充，係貿易戰下，其實人仔貶值或更有利，如果關稅加、人仔又升值，內地出口貨品會變得更貴，完全不利出口，佢認為，人仔升值空間唔會太大。 |
|
| 盧楚仁 |
2025-04-29T18:17 |
金價及油價都受關稅戰影響，但表現天與地，油價今個月見過4年低位，相反，金價今個月曾破頂，並有望連升4個月，係避險需求下，金價由每盎司3500美元回落至3300美元水平，係咪已經調整夠？ 獨立外匯商品分析師盧楚仁相信，金價仍未完成調整，現時局勢開始緩和，除左地緣政治，貿易戰都有所緩和，不論中方還是其他貿易伙伴，都願意同美國談判。 此外，美國總統特朗普(Donald Trump)近排都釋出「善意」，係美股反彈下，會對金價帶來一定壓力。 Jasper又指，如果今個星期冇特別利好消息出現，相信金價會持續回調，但係3260美元會有支持位，一旦失守，可能要落到3167美元水平先再搵到支持。 |
|
| 盧楚仁 |
2025-02-28T18:36 |
日圓係2月持續強勢，兌美元累計升值逾3%，主要係憧憬日本央行下月繼續加息，不過，日央行行長植田和男今日(28日)警告，美國關稅政策將會對全球經濟帶來巨大不確定性，日央行再加息機會有幾大？ 獨立外匯商品分析師盧楚仁認為，日央行一定會再加息，只係唔知會唔會押後加息時間，加息力度亦存在不確定性，不過關鍵係，如果日股今次下跌同日圓上升有關，日央行就可能暫時唔加息，但如果同關稅或納指有關。 |
|
| 盧楚仁 |
2025-02-25T17:48 |
睇返過去8個星期，係美國總統特朗普(Donald Trump)慨關稅政策，以及市場憧憬各國央行會繼續增持黃金，刺激金價8周累升12%，大行最新將目標價上調至每盎司3100美元或以上，而包括銀在內另外3類貴金屬，慨價格今年累升3%至11%，不過，一旦俄烏停戰會唔會令金價大幅回套？ 獨立外匯商品分析師盧楚仁指，唔排除金價會回套，始終近期金價係被短暫慨避險情緒推高，若俄烏停戰將成為利淡金價慨因素，加上市場普遍認為現時金價過高，而唔願意入市，相信金價係現水平已初步見頂，唔排除超買後回落，暫時可留意2956美元，若失守2916美元水平，估計金價會出現大調整。 |
|
| 盧楚仁 |
2025-01-22T18:12 |
美國總統特朗普(Donald Trump)行事作風經常估佢唔到，今早(22日)終於向中國開出第1槍，話正研究下個月向中國貨品加10%關稅的可能性，離岸人民幣即時向下，返近7.29兌1美元，雖然美國加中國關稅已經係市場共識，問題只係加幾多，人民幣未來會點走？ 獨立外匯商品分析師盧楚仁指，人民銀行唔會樂見人仔大幅貶值，但循序漸進貶值就無可避免，無論加唔加關稅，由於美元持續強勢，包括人仔在內慨非美貨幣，基本上都同步受壓，包括有加息壓力慨日圓。 不過，Jasper估計，特朗普唔止加中國10%關稅，只會愈加愈多，佢認為，人仔反彈已初步見頂，唔排除之後因特朗普加關稅或美元強勢，人仔會試7.37，甚至7.4水平，除非中美談判成功，美國唔加中國關稅，否則，人仔將會持續弱勢。 |
|
| 盧楚仁 |
2025-01-02T17:48 |
今日(2日)係商品期貨2025年首個交易日，之前出爐慨美國聯儲局「點陣圖」，預示2025年減息次數少過預期，金價係2024年12月明顯缺少上升動力，依家金價係每盎司2630美元徘徊，如果再冇力向上突破，守唔守得住2600美元呢關？ 獨立外匯商品分析師盧楚仁指，現階段會比較睇淡金價，上到2600美元水平只係借地緣政局炒作，其實冇任何實質支持，若金價2025年開始走強，再加上債息升，相信金價過左呢輪反彈浪見頂後，就會展開新一輪跌勢。 佢又話，一旦展開新一輪跌勢，或要跌到2580美元先搵到支持，但呢個位仍有機會失守，若再跌深些，就要落到2500美元才有支持。 |
|
| 盧楚仁 |
2024-12-12T18:18 |
阿拉比卡咖啡期貨周二(10日)曾創紀錄新高，雖然昨日(11日)出現回套，但仍然係今年表現最好慨商品之一，到底呢浸升浪可以持續幾耐？ 獨立外匯商品分析師盧楚仁指，近期可可豆、咖啡豆價格因巴西乾旱而上升，但乾旱只係短暫性因素，所以唔排除咖啡豆價格短期有回套壓力。佢又話，要留意特朗普(Donald Trump)上任後會對巴西慨關稅政策，因為美國商家、消費者或會係佢上任前大手買入咖啡豆，都會利好近期價格表現。 Jasper續指，除非巴西乾旱情況好快過去，同埋特朗普唔向巴西徵收關稅，否則，阿拉比卡咖啡期貨有機會再作歷史新高。 |
|
| 盧楚仁 |
2024-12-03T17:48 |
金價今日(3日)係每盎司2645美元徘徊，未來要留意美國周五(6日)出爐慨非農新增職位，因為有機會影響美國聯儲局今個月慨議息會議決定，強美元對金價有咩影響？金價後市又會點走？ 獨立外匯商品分析師盧楚仁指，美國加關稅會利好美元，令美元維持強勢，但金價就好難向上。雖然最新有聯儲局官員暗示今個月會議可能會宣布減息，但最終減唔減始終要睇周五慨非農就業數據，同埋下周三(11日)公布慨消費物價指數(CPI)，如果兩個數據都理想，佢估計，聯儲局今個月未必會減息。 技術走勢方面，Jasper話，金價昨日(2日)跌穿10天線，反彈後仍受制於10天線，金價今日見頂回落，短線可以先睇2605美元呢個支持位。 |
|
| 盧楚仁 |
2024-11-21T18:08 |
比特幣(Bitcoin)價格不斷破頂，今日升穿95000美元後再上衝，一度逼近98000美元，主要受多個利好消息帶動，包括美國下任總統特朗普(Donald Trump)旗下Trump Media，正洽購數字資產交易平台Bakkt，以及白宮計劃破天荒新設負責加密貨幣政策慨官職等，有咁多利好消息，Bitcoin衝破10萬美元關口似乎都冇難度？ 獨立外匯商品分析師盧楚仁表示，的確有唔少利好消息帶動Bitcoin價格不斷破頂，其實Bitcoin突破10萬美元已經係市場共識，但要留意衝破10萬美元後，可能會出現獲利回套，短炒可以10萬美元為目標，如果想做中長線部署，不妨等價格回調至85000美元水平再吸納，相信Bitcoin係呢個位會有幾大支持。 |
|
| 盧楚仁 |
2024-11-15T18:25 |
昨日(14日)澳洲最新就業數據差過預期，市場估計，新職位增加2.5萬份，結果只增加逾1萬份，更同9月慨6.1萬份相差好遠，數據出爐後，澳元曾跌至0.6430水平，澳洲央行現時有冇減息壓力未？ 獨立外匯商品分析師盧楚仁指，澳洲現時有減息壓力，澳元初時較硬淨，但現時經濟環境較差，通脹數據回落，所以市場都覺得澳州央行會步紐西蘭央行後塵，步入減息周期。 Jasper續指，澳元短線將向0.6350水平進發，唔排除呢個位會有少少支持，但隨著明年步入減息周期，係沽盤湧現下，澳元或見0.6水平。 |
|
| 盧楚仁 |
2024-10-15T17:41 |
中東局勢發展持續影響油價表現，據《華盛頓郵報》報道，以色列唔會攻擊伊朗慨能源及核設施，重申報復行動只限於軍事目標，令市場對於石油供應憂慮紓緩，加上，石油輸出國組織(OPEC)已連續3個月下調今、明兩年需求預測，係供需因素夾擊下，拖累油價3連跌，係咪代表地緣局勢帶動慨反彈已完結？ 獨立外匯商品分析師盧楚仁指，受地緣政局帶動，油價由每桶65美元彈上78美元，由於局勢降溫，以色列亦講明唔會炸伊朗煉油廠作報復，變相冇左利好因素支撐油價，令油價焦點重返基本面。 Jasper續指，由於OPEC睇淡環球經濟前景，令油價持續向下，又認為油價今輪回調有機會落返低位，估計油價有機會跌至65美元才有支持。 |
|