| 評論員 |
時間 |
內容 |
標籤 |
| 梁偉源 |
2025-04-25T14:39 |
截至早上11時止，1小時內《彭博》用戶關注度上升最多慨港股，依次為新世界發展(00017)、地平線機器人(09660)、龍湖集團(00960)、金沙中國(01928)及泡泡瑪特(POPMART)(09992)。 金沙昨日(24日)派左季度成績表，表現差過預期，多家大行都唔收貨，但股價今日(25日)又有得升，一度升逾5%，高見14.34元，係咪開始炒「五一」行情？ 大華繼顯執行董事梁偉源指，「五一黃金周」長假期會吸引好多內地觀光客去澳門玩，但依家澳門觀光模式已經唔同左，就算酒店入住率高、旅客人數增加，對賭業盈利都幫助唔大。 Steven又話，金沙母公司拉斯維加斯金沙(LVS)有意繼續回購金沙股份，目標係增持至74.9%，呢個消息反而對金沙股價有支持作用。 |
|
| 梁偉源 |
2025-04-11T14:41 |
截至早上11點，過去1小時內《彭博》用戶搜尋量最多港股，依次為華虹半導體(01347)、H&H國際控股(01112)、紫金礦業(02899)、碧桂園(02007)及普拉達(01913)。 國產晶片股華虹半導體今早(11日)高開近1%，午前發力曾抽升19%至36元，中午收市報35.95元，收復自「黑色星期一」以來的失地。在關稅戰下，「芯片自強」的概念能炒作多久？ 大華繼顯執行董事梁偉源指，美國總統特朗普(Donald Trump)的政策變化太快，雖然目前關稅問題未涉及芯片，但不排除未來會將關稅延伸到芯片相關業務。 Steven續指，在關稅戰下，市場憧憬國內會有圍繞消費及科創的刺激政策，如果中央持續推動科創，芯片必定會有較大政策支持。 他補充，由於華虹市值偏低，較為容易炒作，所以股價波動性較大，而中芯國際(00981)風險則會較低。 |
|
| 梁偉源 |
2025-03-28T15:30 |
截至早上11時止，《彭博》用戶關注最多港股依次是李寧(02331)、永利澳門(01128)、毛戈平(01318)、小米集團(01810)及中國海洋石油(00883)。 李寧去年少賺5%，差過預期，但扣除投資項目減值損失，核心盈利其實比過預期，派息亦多左，股價今日(28日)弓度上返18元樓上，點睇李寧前景？ 大華繼顯執行董事梁偉源指，睇返李寧呢份業績，表現唔及同業安踏體育(02020)，而今季表現好過上一季少少，整體表現算唔錯。 Steven續指，體育用品股最重要睇內地消費力有冇回升，未來要特別要留意「兩會」後，會唔會推出更多刺激政策解決內需問題，佢坦言，如果單睇業績，李寧暫時未必可以吸引到更多投資者。 |
|
| 梁偉源 |
2025-03-21T15:44 |
截至早上11時止，過去1小時內《彭博》用戶搜尋量最多港股，依次為比亞迪股份(01211)、長實集團(01113)、中國移動(00941)、同程旅行(00780)及高偉電子(01415)。 比亞迪今晚(21日)會舉行「騰勢N9上市科技之夜」，預期會接入阿里巴巴(09988)慨阿里雲模型，比亞迪下周一(24日)就會放榜，但股價係業績前急挫，到底有咩啟示？ 大華繼顯執行董事梁偉源相信，今晚慨發布會一定係矚目，因為市場關注公司慨發展，比亞迪接入阿里雲計算及智能駕駛，好大機會帶動比亞迪係車價相若慨汽款銷售中跑出。 股價方面，佢認為，比亞迪股價短線已經升左好多，所以出現獲利回套情況，另一方面，市傳歐盟調查比亞迪匈牙利工廠慨補貼問題，呢個有機會成為比亞迪被沽落黎慨藉口。 Steven又話，比亞迪基本因素仍然理想，加上又推出新車及新高效能電池，雖然股價今日大林，但投資者可以趁機買入。 |
|
| 梁偉源 |
2025-03-14T15:16 |
截至早上11時止，過去1小時內《彭博》用戶搜尋量最多港股，依次為長和(00001)、藥明生物(02269)、友邦保險(01299)、蒙牛乳業(02319)、中國飛鶴(06186)。 友邦今日(14日)開市前出左業績，新業務價值繼續創新高，集團又宣布新一輪價值16億美元慨股份回購計劃，但股價今日持續向下，係咪市場嫌回購規模細？股價有冇追落後空間？ 大華繼顯執行董事梁偉源認為，其實回購金額唔算少，新業務價值增長亦好理想，股價由2月中約51元升到依家慨60元水平，已經升左唔少，集團基本因素好，新業務價值增長又理想，其實股價都唔算跑輸大市好多。 Steven又話，友邦股價現時只係短暫獲利回套，若大市仍有上升動力，友邦股價係60元水平會有較大支持。 |
|
| 梁偉源 |
2025-03-07T15:15 |
截至早上11時止，過去1小時內《彭博》用戶搜尋量最多港股，依次為快手(01024)，京東物流(02618)、京東健康(06618)、長和(00001)、國泰航空(00293)。 係人工智能(AI)熱潮下，只要有AI呢個字就可以點石成金，快手自家AI大模型「可靈AI」升級後，帶挈股價連日炒上，港股今日(7日)走勢反覆，中午前一度倒升，全靠重磅科網股撐起。呢股中國AI熱似乎唔係3分鐘熱度，繼之前慨DeepSeek後，最新又有國產慨Manus接力，科技發展亦係「兩會」重點之一，AI概念股及科網股係咪仲有排升？ 大華繼顯執行董事梁偉源指，近期港股重上高位明顯係靠科網股，自從DeepSeek一夜爆紅後，唔少科企都陸續推出自家AI模型，其中1個賣點係功能勁過外國慨AI模型，而「兩會」昨日(6日)亦提及設國家創投基金，市場猜測基金慨錢會唔會用黎發展AI。 AI概念股方面，雖然港股慨相關股份升左唔少，但相對美股同類股份，估值仍然較平，所以見到近期有外資流入港股及A股AI概念股，配合到港股今輪由AI引發慨升浪，Steven又估計，港股呢浸升浪仍未結束。 |
|
| 梁偉源 |
2025-02-28T15:23 |
截至早上11時止，1小時內《彭博》用戶搜尋量最多港股，依次為新鴻基地產(00016)、碧桂園(02007)、小米集團(01810)、融創中國(01918)及安踏體育(02020)。 新地昨日(27日)派左成績表，基礎溢利年增長17%，物業銷售溢利更按年增長23%，但純利按年跌17%，新地股價今早(28日)一度挫逾4%，業績未有明顯復甦訊號，派息冇加碼，《財政預算案》又冇特別利好樓市措施，本港樓市前景係咪仍然未明朗？ 大華繼顯執行董事梁偉源指，近期投資者將資金All-In人工智能(AI)及科技相關股，睇返新地財務報告其實都見到有增長，但因為所以發展商都想盡快減少持貨量，所以就調整左價格，利潤率進一步跌至約15%，所以依家為左快些賣樓套現減債，寧願放棄部分利潤率。 Steven又話，雖然新地旗下元朗YOHO Club上半年賣出唔少單位，但售價較低，變相會拖低利潤率，市場依家地產股興趣唔大，始終樓市未有明顯起色，因此，就算新地現金流相對強勁，短期仍難吸引資金。 |
|
| 梁偉源 |
2025-02-14T14:13 |
截至早上11時止，過去1小時內《彭博》用戶搜尋量最多港股，依次為泡泡瑪特(09992)、藥明生物(02269)、阿里健康(00241)、友邦保險(01299)、美團(03690)。 泡泡瑪特假期後重拾升勢，最新獲匯豐證券上調目標價，睇120元以上，係全城最牛，股價今早(14日)一度衝破110元關口，高見112.8元，大升9.1%，係擁有自創及其他熱賣IP產品加持下，係咪到價在望？若集團發盈喜，股價可唔可以更上層樓？ 大華繼顯執行董事梁偉源指，「谷子經濟」之前炒得幾熱，但近期市場焦點轉移至人工智能(AI)、智能駕駛後，呢些概念股慨關注度就降溫，但由於最新有大行跟進，認為集團銷售有更大增長空間，並相信內地會制定更多政策刺激內部消費，除左傳統經濟，「谷子經濟」呢些新產業都有其吸引力，加上下周五(21日)恆生指數公司將會公布季檢結果，由於泡泡瑪特市值已升至1500億元，市場認為，公司好大機會「柒藍」，所以都吸引唔少資金流入。 Steven又認為，泡泡瑪特股價已升至高位，即使發盈喜，都唔會對股價有太大推動力。 |
|
| 梁偉源 |
2025-02-07T14:57 |
截至早上11時止，過去1小時內《彭博》用戶搜尋量最多港股，依次為聯想集團(00992)，小米集團(01810)、比亞迪股份(01121)、金蝶國際(00268)、吉利汽車(00175)。 昨日(6日)傳出比亞迪將於下周一(10日)晚上在深圳總部召開智能化戰略發布會，估計到時將會透過發布智駕系統「天神之眼」提升智駕體驗，會唔會令資金持續湧入汽車板塊？ 大華繼顯執行董事梁偉源指，自動駕駛已經係內地發展左一段時間，並係好多地方應用緊，但今次主要炒高階智駕及平價概念，比亞迪可能係智駕方面出現重大技術突破，價格方面，如果唔使100萬元就買到自動駕駛汽車，相信內地需求未來會好大，又認為美國及日本等競爭對手好難追趕。 佢又話，如果內地自動駕駛大幅領先全球競爭對手，未來唔使擔心外來競爭會影響到內地車企，所以資金趁今次呢個機會繼續湧入車股都唔出奇。 |
|
| 梁偉源 |
2025-01-24T15:11 |
截至早上11時止，1小時內《彭博》用戶搜尋量最多港股，依次為新世界發展(00017)、長飛光纖光纜(06869)、亞盛醫藥(06855)、小米集團(01810)及安踏體育(02020)。 小米及手機設備股今日(24日)今日齊齊炒上，其中，舜宇光學科技(02382)及小米係表現最強勢藍籌，早前消息面都係以手機設備上游為主，依家連小米都炒起，係咪因為手機設備股板塊基本面唔差，借勢炒多浸？ 大華繼顯執行董事梁偉源指，今日(24日)除左人工智能(AI)概念股炒起，手機設備股、電動車及機械人概念股亦有得升，小米係呢幾方面都有一定業務，手機業務受惠於手機補貼、電動車銷售理想，公司亦開始發展AI，所以今日大市向上，由於小米利好因素多，所以成為炒作焦點，小米今日價量齊升，後市有力突破前高位。 |
|
| 梁偉源 |
2025-01-17T13:01 |
截至早上11時止，過去1小時內《彭博》用戶搜尋量最多港股，依次為萬科企業(02202)、中芯國際(00981)、龍湖集團(00960)、新世界發展(00017)及美團(03690)。 內媒昨日(16日)報道，萬科總裁祝九勝被公安帶走，又話集團可能被接管改組，不過，其後又傳出祝九勝深夜更新微信朋友圈，仲同傳媒有簡短對話。除萬科AH股今日(17日)大跌，集團兩隻境內債更跌停板，集團至今都未有正式回應傳聞，係咪都要同投資者交代一下？ 大華繼顯執行董事梁偉源指，依家市場無法掌握萬科最新情況，一定令投資者不安，導致股債受壓。佢提醒，要留意萬科慨大股東深圳地鐵集團有冇動作，如果大股東再加碼注入新項目，又或者接管部分業務，可以令萬科情況穩定落黎。 佢又話，萬科兩隻境內債今朝跌停，但下午將會復牌，如果公司仍然冇正式公告，向市場交代最新情況，估計債價會持續受壓。 |
|
| 梁偉源 |
2025-01-10T13:13 |
截至早上11時止，過去1小時內《彭博》用戶搜尋量最多港股，依次為布魯可(00325)，融創中國(01918)、微盟集團(02013)、碧桂園(02007)、李寧(02331)。 內地玩具積木商布魯可孖展超額認購逾6000倍，昨日(9日)暗盤已收高逾70%，今朝(10日)首掛一度炒高逾80%，衝破100元關口，晉身「紅底股」，市值已達220億元水平，對應約10億收入，市銷率(PS)逾20倍，雖然集團收入仍係高增長期，但股價炒高到呢個水平合唔合理？ 大華繼顯執行董事梁偉源指，布魯可公開招股超購幾千倍，明顯睇到投資者係抱短炒心態，再配合2024年谷子經濟泡泡瑪特(09992)慨表現，帶動股價今早大幅高開，單睇布魯可基本因素，好難判斷佢值唔值呢個價。 Steven又指，只要谷子經濟概念仲係度，布魯可仍可睇好，若股價未來兩日守得住85元至90元以上，可以再炒多浸，相反，如果跌穿85元，投資者就要小心。 |
|
| 梁偉源 |
2025-01-03T13:06 |
截至早上11點，過去1小時內《彭博》用戶搜尋量最多港股，依次為小米集團(01810)、紫金礦業(02899)、商湯(00020)、高鑫零售(06808)及港鐵公司(00066)。 小米係今朝(3日)升幅最大慨恆生指數及科技指數成分股，股價一度升穿36元，創新高。發改委今朝開記者會，宣布「以舊換新」政策會擴至手機等數碼產品，補貼個人消費者購買相關數碼產品，呢個消息係咪今日股價破頂慨關鍵？ 大華繼顯執行董事梁偉源指，小米近期有唔少消息，例如發展人工智能(AI)及機械人、電動車交付達標等，今朝發改委補貼消息一出，市場更加聚焦係小米身上。 Steven續指，新數碼產品慨功能有冇好大突破，以及補貼力度都會影響消費者換機意欲，若數碼產品會加入AI相關功能，而政府補貼金額又夠多，相信可以吸引消費者換機。 |
|
| 梁偉源 |
2024-12-27T13:05 |
截至早上11時止，過去1小時內《彭博》用戶搜尋量最多港股，依次為聯想集團(00992)，小米集團(01810)、萬科企業(02202)、金山軟件(03888)、李寧(02331)。 聯想股價今日(27日)抽升，一度大升逾9%，高見10.58元，集團曾提及配備個人智能代理慨人工智能電腦(AI PC)，第2季佔內地筆記型電腦總出貨量14%，滲透率唔算高，未來係咪仲有提升空間？ 大華繼顯執行董事梁偉源指，投資者繼續積極追捧AI概念，雖然聯想今年出左唔少AI電腦，但佔整體比例仍唔高，加上睇唔到AI相關功能可以帶黎重大盈利貢獻，雖然外圍炒作AI已經一段時間，但內地仍有追落後慨機會，如果明年希望用高盈利增長呢個概念吸引資金，AI相關股始終都係比較重要慨板塊。 Steven又話，聯想有足夠能力將產品推向應用層面，加上集團提及會用火山引擎慨AI功能，希望係搜尋、寫作及聊天等層面協助AI發展，因此，預期聯想AI業務發展可以錄得高增長。 |
|
| 梁偉源 |
2024-12-20T13:25 |
截至早上11時止，1小時內《彭博》搜尋量最多港股，萬科企業(02202)、騰訊控股(00700)、銀河娛樂(00027)、中芯國際(00981)及萬洲國際(00288)。 騰訊旗下微盟小程序接入微信小店，刺激微盟集團(02013)股價昨日(19日)狂飆35%，今日(20日)微信小店測試「送禮物」新功能，有分析指，將有助提升騰訊電商滲透率，近年微盟大力布局人工智能(AI)業務，雖然微盟股價近日爆升，但仍然低殘，係咪反映強攻AI都幫唔到股價？ 大華繼顯執行董事梁偉源指，雖然中央過去1年不停出招谷經濟，但市民消費心態仍然保守，今次小程序接入微信小店可以話係一個新出路，可以吸引到較年輕慨消費群體。 但佢認為，線上禮物價錢平，對電商成交金額幫助唔大，但呢個新玩法有利微盟繼續研發新程序，所以微盟股價近日表現搶鏡。 |
|
| 梁偉源 |
2024-12-13T13:58 |
截至早上11時止，1小時內《彭博》搜尋量最多港股，龍湖集團(00960)、百威亞太(01876)、萬科企業(02202)、希慎興業(00014)及中國海外發展(00688)。 中央經濟工作會議定調同中央政治局會議差唔多，繼續推動房地產市場止跌回穩，內房股今日(13日)跌幅顯著，其中，龍湖及中海外更打入藍籌5大跌幅榜，係咪市場之前對中經會期望太大？ 大華繼顯執行董事梁偉源指，每年會議政策都只係定出一些方向性目標，唔會講到執行細節，但每次開會前都一定有炒作，今次都唔例外，其實中央今年以來已推出唔少同房地產相關慨政策，只係今次冇更新慨政策，導致市場咁失望。 佢又話，雖然內房股股價跌左落黎，但唔需要睇得太悲觀，因為中央會持續推出政策，加上10月及11月一手銷售已有改善左，相信明年第1季按年銷售將錄得顯著升幅，屆時市場氣氛將會好轉。 |
|
| 梁偉源 |
2024-12-06T14:57 |
截至早上11時止，過去1小時內《彭博》用戶搜尋量最多港股，依次為平安好醫生(01833)，普拉達(01913)、康方生物(09926)、建設銀行(00939)、藥明生物(02269)。 平醫今日(6日)除淨，公司之前宣布可「以股代息」，股價一度抽升逾24%，市場猜測持股逾39%慨中國平安(02318)會因今次收特別息觸發全面收購，但仍要等明年1月24日正式派息時，先知道平保收錢還是收股，如果大股東選擇「以股代息」，當中有咩盤算？ 大華繼顯執行董事梁偉源指，如果大股東揀股唔揀錢，純粹係一個技術性因素，要按例提全面收購，但相信收購價未必吸引，因為相對每股資產淨值(NAV)有一定距離，而小股東接受全面收購亦冇乜著數，但值得留意係，大股東透過今次「以股代息」，變相增持約2%股權，但又唔使自己出錢，呢個可能先至係大股東真正慨考慮。 Steven又指，雖然股價由高位跌左落黎，平之餘亦幾吸引，但全面收購涉及好大筆資金，所以平保未必想係呢個時候做呢件事。 |
|
| 梁偉源 |
2024-11-29T16:06 |
截至早上11時止 ，過去1小時內《彭博》用戶搜尋量最多港股，依次為新世界發展(00017)、ESR(01821)、康方生物(09926)、萬科企業(02202)及美團(03690)。 新世界負債比率持續高企，市場十分關注集團債務問題，新世界下周將正式被剔出藍籌，雖然集團已「兩出兩入」，但係咪仍會加劇股份沽壓？還是市場對集團減債進度都樂觀，對新世界睇法會比之前正面？ 大華繼顯執行董事梁偉源指，新世界股價持續低迷，但市場基本上已消化左要繼續減債、踢出恆指成分股呢些負面因素，但出售啟德體育園消息，對股價及債務幫助唔大，因為僅涉及逾4億元，相對於公司慨債務，或出售新創建集團(00659)、前海大廈部分股權，講緊係近240億元，市場依家較關注新世界未來出售資產情況，希望可以拿返多些現金返黎還債。 Steven又話，另一方面亦要睇美國減息步伐，因為市場預期明年減息步伐可能較慢，不利高負債企業，佢估計，新世界剔出藍籌後，股價仍會持續低迷。不過，如果公司係出售資產方面有較理想進展，現價其實係偏低。 |
|
| 梁偉源 |
2024-11-22T13:21 |
截至早上11時止，1小時內《彭博》用戶搜尋量最多港股，依次為新世界發展(00017)、舜宇光學科技(02382)、小米集團(01810)、中國銀行(03988)及萬科企業(02202)。 新世界昨日(21日)舉行股東周年大會，主席鄭家純重申要繼續減債，又話唔考慮做併購，新世界股價今日(22日)繼續跌，一度再挫逾3%，低見6.94元，係咪市場對新世界減債能力冇信心？股價會唔會進一步尋底？ 大華繼顯執行董事梁偉源指，美國聯儲局減息步伐有機會放慢，特朗普(Donald Trump)上場或令通脹有上升壓力，導致本地地產股近期表現唔好。 佢又話，減債係新世界首要任務，當資產市場冇咁活躍，新世界慨減債難度就會增加，而市場對新世界慨憧憬亦會降溫，繼而拖累股價表現，要等落實減債計劃，股價才有望重拾上升動力。 |
|
| 梁偉源 |
2024-11-08T14:42 |
截至早上11時止，1小時內《彭博》用戶搜尋量最多港股，依次為小米集團(01810)、建設銀行(00939)、聯想集團(00992)、融創中國(01918)及中銀航空租賃(02588)。 小米創辦人雷軍指小米SU7 Ultra將於下周五(15日)舉行的廣州車展首次公開亮相，預計明年3月正式上市，定價81.49萬人民幣起，上月下旬開始預訂，首10分鐘預訂量逾3680部。小鵬汽車(09868)的新AI車小鵬P7+亦熱賣，點睇電動車板塊？ 大華繼顯執行董事梁偉源指，近期電動車企出新車帶動相關板塊造好，小米股價更創52周新高，後續要留意市場對新車款的反應，又指小米SU7 Ultra與小鵬P7+的市場完全不同。 Steven續指，SU7 Ultra是內地少見的高檔車款，估計會有不錯的反應。反而若車廠繼續推出中檔價位的車，市場競爭大，公司面對的困難就更大。 |
|
| 梁偉源 |
2024-11-01T12:16 |
截至早上11時止，1小時內《彭博》用戶搜尋量最多港股，依次為石藥集團(01093)、中遠海控(01919)、信達生物(01801)、路勁基建(01098)及長城汽車(02333)。 市傳長汽發可換股債(CB)，集資最多10億美元，若消息屬實，就籌近78億港元，相等於依家市值逾25%，攤薄效應都幾大，不過，股價今朝(1日)先跌後回升，應該點解讀市場慨反應？真係咁快消化左呢個消息，還是暫時都覺得唔太可信？ 大華繼顯執行董事梁偉源指，其實今朝車股普遍都係先跌後回升，近期因為歐盟關稅事件令車股調整左唔少，股價落到現水平開始吸引資金撈底，長汽方面，由於市傳發CB慨規模唔細，依家亦唔知換股價，係一個比較大慨隱憂，因此，即使成個汽車板塊反彈，長汽反彈幅度都好難跟得上。 |
|
| 梁偉源 |
2024-10-25T15:31 |
截至早上11時止，過去1小時內《彭博》用戶搜尋量最多港股，依次為中國鋁業(02600)、信義光能(00968)、華潤電力(00836)、小米集團(01810)及地平線機器人(09660)。 鋁業股今日(25日)係基本金屬當中特別弱，有大行提過擔心供應擴張，導致鋁價跌，但又有分析睇好水力發展會提升鋁慨需求，鋁價未來會點走？中鋁下周二(29日)會派季度成績表，鋁價上季升勢持續，中鋁盈利係咪值得憧憬？ 大華繼顯執行董事梁偉源表示，鋁價唔同金價或銅價會明顯受單一因素影響，其實有唔少因素都可以影響鋁慨供應及需求，鋁價近排比較牛皮，係每噸2500至2700美元水平徘徊，所以鋁業股慨股價近期都變化唔大。 業績方面，Steven認為，中鋁未必可以維持到第2季慨表現，而係近期鋁價走勢平平下，相信中鋁股價仍會持續牛皮一陣，暫時唔會出現太大突破。 |
|
| 梁偉源 |
2024-10-18T12:56 |
截至早上11時止，1小時內《彭博》用戶搜尋量最多港股，依次為聯想集團(00992)、紫金礦業(02899)、國泰航空(00293)、中國移動(00941)及普拉達(01913)。 聯想於周二(15日)舉行Lenovo Tech World 2024大會，會上公布一系列人工智能(AI)產品，英偉達(Nvidia)行政總裁黃仁勳亦有站台發言，Nvidia股價昨晚(17日)破頂，加上台積電(TSMC)業績理想，整個產業鏈氣氛返曬黎，聯想股價沉寂左一排又有返起色，今日(18日)早段一度升逾5%，逼近月初高位，後市有冇條件繼續上？ 大華繼顯執行董事梁偉源指，全球投資者一直密切關注AI產業，加上近期半導體龍頭業績好過預期，業務指引亦樂觀，令投資者重新買入聯想炒AI概念，加上市場憧憬集團同Nvidia會有合作，聯想近日股價強勢，即使港股波動都無礙聯想股價。 佢又話，要留意市場對聯想之後推出慨AI產品有咩反應，以及同Nvidia未來深化合作，都有望帶動股價突破前高位。 |
|
| 梁偉源 |
2024-10-04T15:16 |
截至早上11時止，1小時內《彭博》用戶搜尋量最多港股，依次為中芯國際(00981)、中遠海控(01919)、融創中國(01918)、中國移動(00941)及阿里健康(00241)。 晶片股今日(4日)集體爆上，昨晚(3日)傳黎英偉達(Nvidia)新一代旗艦人工智能(AI)晶片Blackwell投產消息，加上美國高純度石英供應受颱風影響，刺激晶片股炒上。美國東南部高純度石英礦場已停運1周，當地兩個礦場佔全球供應80%至90%，全球多家晶片公司都關注石英供應問題，天氣因素影響有幾大？此外，近期傳出中芯突破美國禁令，有望實現7納米晶片技術，中資晶片股係咪有望追落後？ 大華繼顯執行董事梁偉源指，天氣因素只會對石英供應造成短暫影響，所以唔會對晶片製造商造成好大影響，價格之後亦可望回穩。 Steven又話，過去有唔少半導體相關消息困擾中芯發展，雖然有政府資金支持，但亦要有設備配合，技術上先可能追上國際水平，但呢個絕對唔容易。不過，一傳出技術突破消息，資金就會不斷湧入，但必須留意呢類消息慨真確性，始終技術水平會直接影響成本及生產質素等。 |
|
| 梁偉源 |
2024-09-27T13:24 |
截至早上11時止，1小時內《彭博》用戶搜尋量最多慨港股，依次為金沙中國(01928)、新世界發展(00017)、龍湖集團(00960)、聯想(00992)及中國海外發展(00688)。 新世界發展連續兩日上榜，公司公布業績的同時宣布家族第三代的鄭志剛辭任CEO，由執行董事並曾任發展局局長的馬紹祥接任，不少大行仍維持新世界發展「減持」、「跑輸大市」評級，主要由於公司負債重，減債去槓桿過程將會很痛苦，但今日復牌的新世界發展及新世界百貨(00825)升勢都不錯，人事調動短期內能否為股價帶來正面影響？ 大華繼顯執行董事梁偉源指，仍要觀察一段時間才可見到效果，但一般而言家族地產公司較少見以外人或專業人士出任CEO，不過新世界過去股價跑輸其他本地地產股，主要因為市場認為管理層表現未如理想，今次的換人可為市場帶來希望，憧憬有專業人士能夠帶領公司加快資產出售及減債等，但長遠走勢仍要視乎能否做好基本面。 |
|
| 梁偉源 |
2024-09-20T13:04 |
截至早上11時止，1小時內《彭博》用戶搜尋量最多港股，依次為吉利汽車(00175)、碧桂園(02007)、金沙中國(01928)、創科實業(00669)及商湯(00020)。 有消息指，歐盟或押後表現向中國進口電動車加關稅，消息一出，吉利股價今日(20日)一度炒高近8%，高見10.06元，歐盟加徵關稅係咪出現轉機？汽車板塊今日表現唔錯，應唔應該趁機買入博歐盟最終唔加關稅？ 大華繼顯執行董事梁偉源指，歐盟最初提出向中國進口電動車加關稅慨方案，唔係即時實施，並有調整稅率，歐盟成員國對制裁方案都有唔同睇法，未能達成共識，加上中國提出新方案，所以今次押後投票，反映歐盟需要更多時間檢視政策，期望最終可達至雙贏。 Steven又話，現階段買車股風險高，除理想汽車(02015)外，蔚來(09866)及小鵬汽車(09868)每月銷售增長都唔顯著，加上現時內地電動車競爭大，但需求未見增加，若歐盟唔大幅下調關稅，將對車股構成壓力。 |
|
| 梁偉源 |
2024-09-13T14:47 |
截至早上11時止，1小時內《彭博》用戶搜尋量最多港股，依次為龍湖集團(00960)、華潤置地(01109)、中國人壽(02628)、中國移動(00941)及瑞安房地產(00272)。 今日(13日)上榜3隻內房股都有得升，據《彭博》報道，內地可能最快今個月減存量房貸利率，以減輕家庭買樓成本，繼而帶動消費，報道又指，減幅可能達50個基點，到底呢個政策幫唔幫到發展商及刺激消費？值得留意係，龍湖、潤地或中國海外發展(00688)呢類市場認為較穩陣慨內房股，其實銷售都大跌，其中，龍湖8月銷售更要「腰斬」，市值今年跌左逾30%，市場擔唔擔心呢些內房冇資金回籠？ 大華繼顯執行董事梁偉源指，減存量房貸息目的係谷消費，由於憂慮通縮問題，內地居民都未必願意消費，估計政策作用唔大。雖然市場憧憬中央會再推出更多支持政策，而呢類消息對內房股價會有幫助，但只有短暫作用。 Steven又話，現時不論有國企背景或民企內房，資金壓力都好大，如果冇新資金流入，賣樓情況又冇好大改善，資金問題會繼續困擾內房。 |
|
| 梁偉源 |
2024-08-30T13:02 |
截至早上11時止，1小時內《彭博》用戶搜尋量最多港股，依次為新世界發展(00017)、中國人壽(02628)、中銀香港(02388)、比亞迪股份(01211)及萬科企業(02202)。 市傳華潤隆地出價90億元洽購新世界旗下K11 Art Mall，新世界股價今早(30日)一度高見7.99元，炒高3.6%，跑贏同業，公司最新又話，過去兩個月完成逾160億元貸款安排及債務償還，集團積極減債，又有減息憧憬，對股價有冇幫助？ 大華繼顯執行董事梁偉源指，過去幾個月，新世界努力做債務重組，有出售資產及進行再融資計劃，減債進度亦唔錯，不過，公司負債比率始終較高，減債後債務仍比同業多，需進一步減債。 佢又話，若成功出售K11 Art Mall，對公司債務問題會有明顯幫助，未來要留意出售進度，一旦事成，將會對股價有支持，新世界現價已反映減債動作，若要突破8元關口，需落實更多減債計劃。 |
|
| 梁偉源 |
2024-08-27T15:48 |
截至早上11時止，過去1小時內《彭博》用戶搜尋量最多港股，依次為中國石油股份(00857)、中國石油化工股份(00386)、中國海洋石油(00883)、建設銀行(00939)及新奧能源(02688)。 中石油昨日(26日)已出左業績，上半年多賺近4%，派中期息0.22元人仔，另一方面，利比亞東部政府暫停原油生產，加上中東局勢緊張，刺激油價昨晚(26日)升3%，中石油股價今日(27日)一度升逾5%，高見7.23元，到底邊個先係中石油股價慨「幕後推手」？股價仲有幾多水位？ 大華繼顯執行董事梁偉源指，油價係今年第2季呈上落市格局，紐約期油係每桶70至80美元上落，未見出現明顯突破，令油股冇辦法向上突破。佢又話，近期油價急升推高油股股價，所以同業績及憧憬冇關。 不過，油價受制於全球經濟增長放慢，石油需求難有太大增長空間，因此，油價好難衝破80美元阻力，估計油股後市會係現水平上落。 |
|
| 梁偉源 |
2024-08-23T14:06 |
截至早上11時止，1小時內《彭博》用戶搜尋量最多港股，依次為海底撈(06862)、中國平安(02318)、龍湖集團(00960)、東方海外國際(00316)及萬科企業(02202)。 平保昨日(22日)收市後出左業績，半年多賺近7%，中期息0.93元人民幣。中信里昂指，平保呢份業績符合預期，係充滿挑戰慨環境下，業務表現仍然穩定。平保股價今日(23日)重上50天線，如果企得穩，仲有冇上升空間？ 大華繼顯執行董事梁偉源指，平保出業績前，大行對保險業睇法比較悲觀，主要係內地經濟及A股表現都唔好，平保有房地產相關投資，導致平保及其他保險股表現唔好。 Steven續指，平保係咁困難慨環境下，主要業務壽險慨新業務價值仍增長11%，估計全年增長10%，事實上，市場對下半年新業務價值增長睇法樂觀，現時資金已重新流入平保，加上市場對下半年業績有憧憬，股價有機會收復失地。 |
|
| 梁偉源 |
2024-08-16T13:26 |
截至早上11時止，1小時內《彭博》用戶關注度上升最多港股，依次為長和(00001)、港鐵公司(00066)、中銀航空租賃(02588)、聯想集團(00992)、長實集團(01113)。 長和減派息令股價今日(16日)受壓，中信里昂指，集團上半年負債水平仍然穩健，經調整經常性盈利增長7%，又指係現時慨環境下減派息係審慎做法。高盛就話，有信心長和全年派息增長12%。集團股價今日向下係咪市場反應太大？ 大華繼顯執行董事梁偉源指，市場認為長和業績唔太理想，令股價今日向下，其實集團慨業務預測或派息一向都比較審慎，若下半年表現穩定，業績或有改善，屆時將會調整派息。 佢又話，長和業務遍布全球，海外業務慨美元收入兌港元報業績時有匯率壓力，但預期美國下半年啟動減息周期後，美元兌港元匯率將會轉弱，匯率仍會對業績有幫助。 |
|
| 梁偉源 |
2024-08-09T13:16 |
截至早上11時止，1小時內《彭博》用戶關注度上升最多港股，依次為中芯國際(00981)、萬科企業(02202)、快手(01024)、太古地產(01972)、中國移動(00941)。 中芯昨日(8日)出左中期業績，股價今朝(9日)成為升幅最大藍籌，一度大升9.5%，高見17.3元，集團上季收入符合預期，毛利率超預期，前景指引亦唔錯，預期第3季收入按季最多增長15%，料毛利率升至介乎18%至20%，遠高於上季慨13.9%。反觀同業華虹半導體(01347)第3季指引就唔係太進取，毛利率同第2季差唔多，係咪意味中芯前景較樂觀？ 大華繼顯執行董事梁偉源指，人工智能(AI)相關發展對晶片慨需求好大，雖然中芯慨技術水平未去到好先進，但有國家支持發展，上季業績又令人滿意，公司亦睇好前景，所以大幅上調今季毛利率預測。 Steven估計，中芯下半年業績繼續向好，股價今日跑贏其他成分股，未來仍會對中芯股價有好大刺激作用。 |
|
| 梁偉源 |
2024-08-02T13:40 |
截至早上10時45分止，1小時內《彭博》搜尋量最多港股，依次為新世界發展(00017)、新奧能源(02688)、港交所(00388)、吉利汽車(00175)及信達生物(01801)。 昨日(1日)有研究指出，美國大型藥廠禮來(Eli Lilly)旗下減肥藥，可有效降低心臟衰竭風險，其實信達早於2月已披露過，有份同禮來合作研發減肥藥，所以信達股價今日(2日)都有得升，不過，今年市場炒作減肥藥消息明顯少左好多，今次呢個利好消息，可唔可以帶挈禮來及信達股價？ 大華繼顯執行董事梁偉源指，同上年比較，今年炒作減肥藥相關消息的確明顯少左，加上大市氣氛差，投資者今早就炒作呢個利好消息，唔少資金再湧入藥物相關股份。 但佢提醒，相信呢個只係短線炒作，尤其係美國昨晚公布慨經濟數據唔好，市場開始擔心美國經濟出現衰退跡象，因此，藥股長線未必會有支持。 |
|
| 梁偉源 |
2024-07-26T15:16 |
截至早上11點，過去1小時內《彭博》搜尋量最多港股，依次為長和(00001)、中國移動(00941)、中國電信(00728)、港交所(00388)及新鴻基地產(00016)。 長和7月中分拆歐洲業務上市消息炒到依家，股價繼續係10天線徘徊，表現強勢，雖然近日跟大市略為調整，但幅度唔多，而4月以黎慨升勢仍未被破壞，近日稍稍回調後，息率仍有6厘，當「中特估」概念股都要調整，長和股價表現係咪已經好靚及都收資？ 大華繼顯執行董事梁偉源指，長和業務遍布全球，係本港一手樓市場亦唔係重貨，加上環球股市資金撤出之前升得比較急慨科技股，從整體市場去睇，長和係有一定吸引力，雖然業務方面冇好大突破，但勝在穩定，始終投資者依家慨避險心態比較重，所以部分資金會買入呢類業務唔算刺激慨股份。 Steven又話，集團一些分拆計劃亦可以為市場帶來一些憧憬，係市況不明朗下，長和係會有一定吸引力。 |
|
| 梁偉源 |
2024-07-12T15:27 |
截至早上11時止，1小時內《彭博》用戶關注度上升最多首5隻港股，依次為龍湖集團(00960)、領展房產基金(00823)、恆基地產(00012)、新世界發展(00017)、中國鋁業(02600)。 美國昨晚(11日)出左通脹數據後，9月減息預期急升溫，摩根大通亦預測美國減息時間，由原來11月調整至9月，若美國9月真係減息，內地人民銀行減息彈性會唔會大左？不過，人行年初已下調5年期中期借貸便利(MLF)利率，內地樓市始終未明顯復甦，息口對樓市刺激作用有限，係咪都要等經濟有起色先救到樓市？內房股今日炒起係咪純粹趁港股大升市反彈？ 大華繼顯執行董事梁偉源指，其實美國減唔減息對內地經濟影響唔大，所以人行減息機會唔會因此而增加，佢又認為，人行未來有機會降準。Steven又指，內房股今日炒上同美國減息因素冇關，反而同下周開幕慨三中全會有更大關係，不過，可以推出慨政策其實之前都推過，即使依家再推都作用唔大。 內地樓市方面，Steven指，內房銷售仍未有起色，而個別民企內房債務重組問題仍未解決，相信內房需要一段較長時間才能復甦。 |
|
| 梁偉源 |
2024-07-05T13:43 |
截至早上10時45分止，1小時內《彭博》搜尋量最多港股，依次為新世界發展(00017)、華潤建材科技(01313)、中國石油股份(00857)、瑞安房地產(00272)及長城汽車(02333)。 新世界同遠東發展(00036)合作展慨啟德跑道項目柏蔚森昨日(4日)開價，首批涉及60個位，其中，1房入場費係啟德區歷來最平，約376萬元，折實價亦係近8年以來最低，反映發展商去貨決心好大，到底本港樓市前景係點？ 大華繼顯執行董事梁偉源指，本港樓市「撤辣」後曾短暫反彈，成交量亦回升，但樓價未見明顯回升，加上「撤辣」效應逐步消退，唔少發展商都希望可盡快套現，利用資金減債，所以唔會高價賣樓。 佢又話，政府今季只推1幅住宅用地，涉及570伙，反映政府帶頭睇淡樓市，所以發展商冇太大加價意欲，相信未來一段時間都以減價去貨為主要目標，希望可以「一Q清袋」。 |
|
| 梁偉源 |
2024-06-28T15:30 |
截至早上11時止，1小時內《彭博》用戶關注度上升最多首5隻港股，依次為中國中藥(00570)、新世界發展(00017)、小米集團(01810)、遠洋集團(03377)、國泰航空(00293)。 今日(28日)上榜慨國泰，股價變動唔大，提高訪港內地旅客免稅額終於傳來好消息，佢地去港澳購物慨免稅額提高至12000人仔，連同原本在入境口岸免稅店額外購物3000人仔免稅商品政策，額度合共15000人仔。國泰可唔可以受惠於新政策？ 大華繼顯執行董事梁偉源認為，提高免稅額對國泰冇乜幫助，首先係額度增幅低過預期約30000人仔好多，加上現時內地居民主要透過陸路來港，較少搭飛機。Steven又指，睇返國泰股價走勢，市場似乎對公司仍然睇得唔係太樂觀，運力恢復係一大關注點，若短期內提升唔到，國泰生意始終有限。 |
|
| 梁偉源 |
2024-06-14T13:10 |
截至早上11時，1小時內《彭博》用戶搜尋量最多港股，依次為周大福(01929)、萬科企業(02202)、中國銀行(03988)、比亞迪股份(01211)及協鑫科技(03800)。 周大福業績出爐後，被多間大行下調目標價，市場關注金價，即使公司純利有增長，但去年黃金未變現虧損近25億元，高盛指下半年高達30億元，拖累整體業績。另外，上兩個月銷售下跌，市場擔心上半年金價高企下，令銷售繼續受壓，而且公司今年95周年，未有宣布派特別息，種種因素都令市場頗為失望，股價創逾3年新低，跌勢是否仍然未完？ 大華繼顯執行董事梁偉源指，相信周大福跌勢仍然未完，因為各種影響股價因素，於下半年仍然會持續，影響業務發展，其中金價於今年初有強勁升勢，如果美國一如預期下半年減息，將進一步推高金價，令周大福下半年黃金對沖虧損進一步擴大，亦影響銷售情況，各種因素令周大福股價短期內難以擺脫弱勢。 |
|
| 梁偉源 |
2024-06-07T15:00 |
截至早上11時止，過去1小時內《彭博》用戶搜尋量最多港股，依次為新世界發展(00017)、美團(03690)、聯想集團(00992)、海底撈(06862)及周大福(01929)。 周大福將於下周四(13日)出全年業績，美銀表示，市場關注集團新一年慨指引，以及派幾多特別息，該行估計，周大福將派末期息0.4元及特別息0.15元，按年大減45%，雖然過去1年金價破頂，但點解周大福業務都冇太大起色？ 大華繼顯執行董事梁偉源指，周大福去年派特別息0.72元，股息率已達10厘以上，對股價有好大刺激作用，但通關後，旅客消費模式改變令金舖客人減少，導致業績增長放緩，令派息能力轉弱。佢又話，周大福過去做金價對沖做得好足，所以金價上落對集團盈利影響唔大，因此，金價升亦唔代表周大福可以受惠。 |
|
| 梁偉源 |
2024-06-04T13:36 |
截至早上11點止，過去1小時內《彭博》用戶搜尋量最多港股，依次為長城汽車(02333)、越秀地產(00123)、美團(03690)、中國海洋石油(00883)及中國石油股份(00857)。 近日汽車股集體升，多家車企亦陸續出左5月銷售數據，表現都好好，不過，長汽就按年倒退9.5%，加上歐盟擬向中國電動車加徵關稅，長汽亦宣布8月會關閉德國慕尼黑慨歐洲總部，並裁員約100人，係冇個好消息下，長汽前景都好難樂觀？ 大華繼顯執行董事梁偉源指，長汽算係一眾汽車股之中表現最差慨股份，佢估計，股價今日(4日)大跌同上月銷售數字唔理想有關。 Steven補充，雖然內地電動車市場競爭好大，不過，長汽電動車銷售按年增長9%，但傳統車就倒退，反映集團面對減價戰慨同時，本身慨強項或SUV都做得唔太好。佢又話，歐盟擬加中國電動車關稅，加上競爭大，長汽關閉歐洲總部都係正常，佢亦認同集團下半年經營狀況唔樂觀。 |
|
| 梁偉源 |
2024-05-31T15:00 |
截至早上11時止，1小時內《彭博》用戶搜尋量最多港股，依次為康方生物(09926)、碧桂園(02007)、長和(00001)、申洲國際(02313)及中國神華(01088)。 康方上周公布旗下雙抗新藥「依達方」(依沃西注射液，PD-1/VEGF)臨床測試效果未如理想導致股價急瀉。集團今日(31日)再發通，指「依達方」試驗已達標，股價隨即反彈，一度高見60元，勁升87%，呢類股份係咪要睇住藥物測試結果黎炒？ 大華繼顯執行董事梁偉源指，買製藥股要睇兩大因素，首先新藥研發係咪有重大進展及獲批上市，因為可以大幅推高股價，其次係新藥係海外市場銷售，有冇受政治因素影響，例如近期美國對內地製藥生產設多項政策關卡，只要政策有變動，就會直接影響股價表現。 Steven又話，市埸普遍關注國家藥品監管局對康方新藥上市申請慨審批進度，依家傳黎好消息，後市可以睇得較樂觀。 |
|
| 梁偉源 |
2024-05-24T15:19 |
截至早上11時止 ，1小時內《彭博》用戶搜尋量最多港股，依次為港鐵公司(00066)、小米集團(01810)、新世界發展(00017)、蒙牛乳業(02319)及融創中國(01918)。 港鐵今日(24日)除淨，股價一度挫逾5%，集團股價係除淨日一向都跌得比較急，而領展房產基金(00823)股價亦被瑞銀「唱散」，加上市場對美國聯儲局加息預期升溫，呢些係咪港鐵股價急挫慨「死因」？ 大華繼顯執行董事梁偉源指，呢幾個因素今個星期都持續困擾地產股，雖然「撤辣」後樓市交投有改善，但一手供應仍然好多，加價慨機會好微，加上美息持續高企，地產商傾向盡量減少借貸利息開支，因此，有可能減價加快散貨套現。 Steven又指，若整體地產市道低迷，樓價升唔到，或多或少會影響港鐵股價，而集團未來5年涉及650億元慨維修開支，亦會加大集團開支壓力。 |
|
| 梁偉源 |
2024-05-17T15:00 |
截至早上11時止，1小時內《彭博》用戶關注度上升最多港股，依次為瑞聲科技(02018)、碧桂園(02007)、融創中國(01918)、中國石油化工(00386)及信義光能(00968)。 瑞聲股價已連跌第3日，今日(17日)一度挫7%，跑輸大市及其他手機設備股，股價3日已累跌逾10%，最新更插穿50天線，瑞聲股價4月底開始失守上升通道，但仍呈上升趨勢，因市場憧憬內地iPhone銷售好轉，有機會成為人工智能(AI)手機換機潮贏家慨瑞聲，股價近日出現回調，4月底反彈浪慨升幅已完全被蒸發，到底係咩原因令瑞聲急插？ 大華繼顯執行董事梁偉源指，瑞聲急挫主要係資金流走，始終iPhone係內地銷售唔太理想，反觀內地手機品牌銷售陸續回穩，雖然瑞聲股價連日下跌，但今年計仍有得升，另1隻手機設備股舜宇光學(02382)今年持續弱勢，股價累跌近38%，不過，睇返舜宇4月營運數據，業務增長漸見改善，相信有部分投資者部署抄底，令資金由瑞聲「轉場」至舜宇。 |
|
| 梁偉源 |
2024-05-10T15:07 |
截至早上11點止，過去1小時《彭博》用戶搜尋量最多港股，依次為建設銀行(00939)、中國移動(00941)、郵儲銀行(01658)、港交所(00388)及吉利汽車(00175)。 市傳內地免徵內地散戶炒港股慨股息稅，帶動內銀股愈升愈有，其中，建行股價今日(10日)衝上近6年高位，中信里昂估計，一旦落實減免股息稅會成為內銀H股催化劑，有利收窄AH股股息回報率差距，尤其係息率相對高慨國企內銀，中信里昂又話偏好建行。若政策真係實施，內地投資者係咪會由內銀A股換馬至內銀H股？ 大華繼顯執行董事梁偉源指，一旦落實減免港股通股息稅，短期爆炸力會好大，但中長線來講，2%股息稅對整體盤數又唔算重要，但由於消息令人覺得H股，尤其內銀H股長期同A股有較大折讓，所以減免股息稅只係一個短線催化劑。 Steven又指，建行今日成交量係昨日(9日)3倍，因為建行係一眾內銀股中派息率最高，依家有8厘，而AH股折讓幅度亦係最大，超過30%，所以唔少資金集中係建行身上。 |
|
| 梁偉源 |
2024-04-26T12:54 |
截至早上11時止，1小時內《彭博》用戶關注度上升最多港股，依次為中國海洋石油(00883)、龍湖集團(00960)、中國石油化工股份(00386)、中國移動(00941)、中國神華(01088)。 內房股繼續有唔錯反彈，摩通大根指，內房股過去1星期跑贏大市，其中，中國海外發展(00688)及華潤置地(01109)表現最好，摩通認為，近日慨強勢係單靠資金流入落後股份推動，A股唔會跟升，4月樓市數據仍然令人失望；不過，瑞銀睇好內房，認為已經準備好復甦，3年來壓抑慨需求會捲土重來，係唔係意味著基本面確實開始好轉？ 大華繼顯執行董事梁偉源指，內房最壞情況已經過去，前景慢慢好轉，包括銷售及房價都會穩定復甦，較高危慨民企債務風險都已經「爆雷」，但復甦速度唔會咁快，即使有政策支持，樓價仍缺乏動力，銷售情況亦唔太理想，以往大家憧憬「五一黃金周」改善銷售，但今年就有所保留，始終暫時未見市場有強勁慨復甦。 |
|
| 梁偉源 |
2024-04-19T14:59 |
截至早上11時止，1小時內《彭博》用戶關注度上升最多首5隻港股，依次為ASMPT(00522)、招金礦業(01818)、九龍倉置業(01997)、永利澳門(01128)、中國石油化工股份(00386)。 剛出左業績慨台積電下調全球晶圓代工業增長預測，荷蘭ASML上季新定單亦差過預期，近日環球晶片股都面臨較大調整壓力。今日(19日)排榜首慨ASMPT再度失守「紅底股」，股價之前彈左兩日，今朝跟隨外圍晶片股向下，一度挫逾7%，低見95.9元。 大華繼顯執行董事梁偉源認為，晶片行業基本面有變，預期板塊慨弱勢會持續一段時間，ASMPT股價今年已累升約30%，所以今日出現較大獲利回套壓力亦可以理解，佢又估計，唔少機構投資者未來會趁股價反彈時減磅，ASMPT股價可能要跌到85元至90元先有支持。 |
|
| 梁偉源 |
2024-04-12T14:45 |
截至早上11時止，1小時內《彭博》用戶搜尋量最多港股，依次為友邦保險(01299)、領展房產基金(00823)、新奧能源(02688)、新世界發展(00017)及港交所(00388)。 友邦股價持續弱勢，今日(12日)更跌穿50元，跌至逾6年半低位，到底係咪原因跌到咁？係咪同近期保監局及廉署展開聯合行動，打擊懷疑向內地旅客無牌銷售保單有關？ 大華繼顯執行董事梁偉源指，友邦出完全年業績後，股價係1個月內由65元急挫至49元水平，市場普遍認為同回購因素有關，擔心下次回購規模會縮水。其實集團新業務去年增長唔錯，但股價都跌到咁，的確令市場意外，加上保監局同廉署聯合執法，更令市場恐慌情緒加劇。此外，友邦業務增長以本港為主，過去亦有內地旅客來港投保，但最近內地大客愈黎愈少，所以市場擔心佔比最大慨本港業務今年第1季會轉差。 不過，摩根大通認為，友邦不利因素好快緩和，又話公司估值平，咁係咪可以趁機撈底？Steven表示，雖然本港業務增長放緩，但好多內地投保可能都會揀友邦，加上外幣保單亦有需求，所以本港連同內地慨業務增長唔會大幅放緩，而印度業務增長快速亦係另1個利好因素。 |
|
| 梁偉源 |
2024-04-09T15:18 |
截至早上11時止，1小時內《彭博》用戶搜尋量最多港股，依次為新奧能源(02688)、澳博控股(00880)、長城汽車(02333)、世茂集團(00813)、歐舒丹(00973)。 中信里昂最新上調今年澳門賭收預測，但輕微下調賭股EBITDA預測，今日(9日)上榜慨澳博股價已連升第6個交易日，逼近250天線，跑贏銀河娛樂(00027)、金沙中國(01928)，到底炒緊乜野？ 大華繼顯執行董事梁偉源指，澳博一直大幅落後其他賭股，近兩個月先追返上黎，依家股價上返去年10月高位，雖然近年市佔率、賭收表現唔算特別好，但因為大市氣氛有改善，農曆新年及清明節假期開始，旅遊相關概念股份表現唔錯，旅遊收入增加，資金就追入相對落後慨澳博。 至於賭股揀落後還是藍籌，Steven就話，金沙及銀娛近年表現唔突出，賭收及市佔率唔及永利澳門(01128)、美高梅中國(02282)，如果見唔到有改善跡象，都建議投資者揀返永利及美高梅。 |
|
| 梁偉源 |
2024-04-05T15:03 |
截至早上10時45分止，1小時內《彭博》用戶關注度上升最多港股，依次為中國石油化工股份(00386)、紫金礦業(02899)、港交所(00388)、藥明生物(02269)、金沙中國(01928)。 中石化股價今日(5日)一度急挫逾4%，插穿10天及20天線，表現係「三桶油」之中最差，中東緊張局勢進一步推高油價，不利下游業務較多慨中石化，摩根士丹利認為，中石化下游業務將持續疲弱，但股價已經反映，中石化前景係咪「三桶油」之中最差？ 大華繼顯執行董事梁偉源指，中石化股價今日急挫主要受下游業務拖累，近日油價急升，加上下游業績產品價格疲弱，導致生產成本持續上升，但短期難以轉嫁予客戶，的確對集團中長線盈利構成負面影響，而中東局勢似乎會進一步惡化，估計油價會持續高企，因此，「三桶油」之中以中石化慨處境最不利，反而中國海洋石油(00883)就相對受惠。 |
|
| 梁偉源 |
2024-03-22T16:31 |
截至早上11時止，1小時內《彭博》用戶搜尋量最多港股，依次為長實集團(01113)、東方海外國際(00316)、中國平安(02318)、中國移動(00941)及美高梅中國(02282)。 中移動及平保昨日(21日)先後放榜，其中，雖然去年平保新業務價值增長超預期，今季亦繼續維持良好增長，亦制定未來3年股東回報計劃，今年至2026年3個年度派息比率定於20%至50%，但股價今日(22日)都要捱沽。至於中移動季績差過預期，但派息比率上升，又有大行「祝福」，如果睇派息，係咪揀中資電訊股穩陣些？ 大華繼顯執行董事梁偉源指，係幾隻大跌股之中，平保可以考慮吼低位撈底，原因係困擾集團兩大因素，即A股及內房情況其實係農曆年後開始改善，估計今年表現會比去年更好，而新業務增長可帶動本業有改善空間，股價落到32元可分段小注買入。 Steven就話，中資電訊股係「中特估」慨代表行業之一，中移動業務穩定，發展5.5G業務未涉及太大開支，盈利增長又維持到，派息比率亦有上升空間，加上發展人工智能(AI)及伺服器服務係一個亮點，所以中移動股價落65元至66元都可以考慮入手。 |
|
