| 評論員 |
時間 |
內容 |
標籤 |
| 盧志威 |
2025-06-04T10:39 |
美股繼續造好，繼高盛及瑞銀5月調高標指目標後，最新輪到德銀上調標指年底目標至6550點，除左美國經濟穩健外，德銀亦提及TACO TRADE(Trump Always Chickens Out)，諷刺特朗普總係退縮慨效應，標指現價同德銀目標仲有10%水位，美股今年餘下時間係咪仍然樂觀？邊類股份可以睇高一線，繼續係人工智能(AI)相關股？ 潤淼資產管理董事盧志威指，與其話係TACO，倒不如話美國經濟夠強，可以捱得過關稅，睇返特朗普過去慨行事作風，係隨時有突如其來慨行動或政策，但佢有信心美股會繼續慢慢上，不過，始終要小心一些突發事情，所以投資者需控制注碼，同埋預留現金隨時撈底，又認為焦點放係個股會好過大市。 揀股方面，佢認為，Nvidia係納指大股之中。 |
|
| 盧志威 |
2025-05-28T11:36 |
內地多個行業「內捲」問題嚴重，除左汽車業，電商平台係另一個「主戰場」，拼多多亦無可避免受牽連，集團出完業績後，拼多多美股昨晚一度急瀉約14%，而在港上市慨美團(03690)等電商股，股價亦連日受「內捲」問題困擾，「內捲」係咪會繼續影響港股市況及投資氣氛？ 潤淼資產管理董事盧志威指，受「內捲」問題牽連慨板塊係全方位，包括車股、消費股及外賣等業務，核心原因係要為中美貿易戰避險，因為隨著貿易戰開打，就可能會少左個市場，所以相關行業會諗盡辦法去拿返內地市場，又認為「內捲」情況好難逆轉。 William又指，對存在「內捲」問題慨企業黎講，公司盈利短期一定受到衝擊，長遠就有可能觸發行業整合潮。 |
|
| 盧志威 |
2025-05-21T11:44 |
Tesla行政總裁馬斯克(Elon Musk)係一個經濟論壇上承諾，未來5年會繼續做Tesla CEO，又話會大幅削減政治開支。佢又透露Tesla慨無人駕駛的士Robotaxi，計劃6月係得州奧斯汀推出。消息一出，刺激Tesla股價昨晚(20日)一度升近3.8%，馬斯克唔搞咁多政治，專注返Tesla生意，係咪有利業務發展？ 潤淼資產管理董事盧志威認為，馬斯克慨言論澄清左之前Tesla搵新CEO慨傳聞，而大削政治開支市場及股東都會受落。佢又話，Tesla係得州有工廠，馬斯克可以直接要求當地政府配合Robotaxi測試，可以避開繁複慨規管問題，所以Tesla股價昨晚造好係合理。William又話，Robotaxi有機會成為Tesla股價催化劑，進一步推升股價。 |
|
| 盧志威 |
2025-05-14T11:35 |
美國4月消費物價指數(CPI)按年升2.3%，按月就升0.2%，兩者都低過預期，而扣除食品及能源慨核心CPI按年升2.8%，符預期，按月則升0.2%，低過預期。由於通脹壓力持續緩解，令市場對減息預期略為升溫，今次慨通脹數據有咩啟示？點評估聯儲局減息時間及次數？ 潤淼資產管理董事盧志威指，美國最新出爐慨通脹數據令人意外，市場開始評估關稅對美國整體通脹帶來慨影響，雖然暫時似乎影響唔大，但始終中美談判未有最終結果，樂觀之餘仍要注意相關風險。 William又話，聯儲局今年下時間有機會減息1至2次，但對市場黎講冇太大實際意義，只係釋出利率水平正處於下行周期慨訊號，係一個心理上慨利好。 |
|
| 盧志威 |
2025-05-09T11:32 |
美國跟英國達成貿易協議，英國同意增加美國農產品進口，美國牛肉關稅降到接近零水平，並承諾採購總值100億美元慨波音(Boeing)飛機，美國就會下調英國汽車關稅，由25%降至10%。有分析指，波音會係今次大贏家，受消息帶動，波音股價昨日(8日)顯著造好，一度升逾4%，高見194.75美元，依家值唔值得追入？ 潤淼資產管理董事盧志威指，內地原本計劃買波音慨飛機，但因關稅問題轉買空中巴士(Airbus)或自主生產部分型號，波音無可避免受到影響。佢又話，每次美國同其他國家達成貿易協議，都會推銷波音飛機，希望搶走Airbus生意，不過，其他國家本來就要買波音慨飛機，所以對佢地冇特別影響，雖然波音股價短線急升，但估計之後升勢會逐步放緩。 |
|
| 盧志威 |
2025-04-29T11:18 |
美國電動車巨頭Tesla行政總裁馬斯克(Elon Musk)自加入美國總統特朗普(Donald Trump)新成立慨政府效率部(DOGE)後，由於處事作風惹來極大爭議及反響，禍及Tesla銷售及股價，直至近期股價已收復唔少失地，但係300美元有較大阻力，Tesla正準備推出新車Model Q，可唔可以帶動股價突破300美元關口？ 潤淼資產管理董事盧志威指，依家市場對Tesla有幾個憧憬，首先係馬斯克回歸公司，其次係Tesla開始推出新產品，有機會幫到公司扭轉劣勢，投資者不妨留意例如Model Q定價。此外，CyberTruck亦可能有新消息，包括應用、測試等，佢又相信，Tesla股價走勢會比較反覆及波動性較大，但投資者仍可考慮係現階段做博反彈部署。 |
|
| 盧志威 |
2025-04-16T11:36 |
美股「科技7雄」(Magnificent 7)之一慨英偉達(Nvidia)周一(14日)收到美國政府通知，H20晶片銷售去中國要先獲華府許可，又估計會衍生55億美元開支，拖累Nvidia股價昨晚(15日)盤後挫6%，H20本身係配合美國政策為中國「度身訂造」慨降級晶片，依家要拿到許可先可以出口，對Nvidia打擊係咪好大？中芯國際(00981)會唔會受惠？ 潤淼資產管理董事盧志威指，雖然Nvidia可以申請許可證，但市場仍會擔心關稅、許可證等係點樣運作，所以即時對Nvidia股價造成衝擊。此外，絕大部分買家都會買高階晶片，唔會因貿易禁運或關稅問題調整自身需求，改用低階晶片，所以好難向其他買家銷售H20，華府要求Nvidia拿許可對H20庫存及商業模式都會造成重大打擊。 William續指，當購買外國晶片有困難，相信內地會集中資源，自行研發，中芯本身已經可以製造平靚正慨晶片，要進一步製造高階晶片只係時間問題，佢認為，依家整個格局都似乎利好中芯。 |
|
| 盧志威 |
2025-04-09T10:19 |
今日(9日)中午，美國將大機會向中國徵104%關稅，令市場恐慌情緒飆升，人民幣離岸價一度創新低，在7.4水平徘徊，今次人民幣貶值只是反映市場恐慌情緒，還是中央有特別用意，想讓出口價格更吸引？ 潤淼資產管理董事盧志威指，兩者都有可能是導致人民幣貶值的原因，他提出，現時中央要面對的最大問題是：失去美元的淨流入後，誰會代替美國成為人民幣的買家，及誰能取代美國市場去消化中國產能。 William指，最簡單、直接、可行的解決方法，就是將人民幣貶值，讓其他國家能快速吸納，短期內取代美國市場，所以他認為人民幣貶值是「半推半就」，中央都是有意朝貶值方向運作。 |
|
| 盧志威 |
2025-04-02T10:50 |
昨晚(1日)美股繼續波動，納指反覆升過百點，結束4日跌市，電動車巨擘Tesla連續兩日反彈，而Tesla會陸續公布歐洲首季的銷售數據，Tesla短線股價走向如何？ 潤淼資產管理董事盧志威指，雖然Tesla新推出的車型Model Y，改變不大；但相信推出新車型，仍有助刺激銷量；其次是馬斯克(Elon Musk)的臨時政府僱員期限即將屆滿，估計短期不會延續政府職位，令馬斯克可以專注Tesla等公司業務及新計劃。但要留意，Tesla已非單純依賴電動車業務，機械人業務及自動駕駛的發展，或更影響Tesla股價走勢。 |
|
| 盧志威 |
2025-03-26T11:31 |
美國總統特朗普(Donald Trump)慨關稅政策對美國消費信心慨影響開始浮現，繼密歇根大學公布慨2月消費信心指數及通脹預期令市場憂慮後，經濟諮商慨3月消費信心指數亦跌至4年低位，1年期通脹預期則升至2年高位，各項數據都反映美國人對經濟前景憂慮，美國經濟最終係咪會陷入衰退？對美股有咩影響？ 潤淼資產管理董事盧志威指，密歇根大學消費信心指數及通脹預期近期走勢比較飄忽，主要受特朗普政府慨對等關稅(Reciprocal Tariff)影響，由於市場預期實體商品價格向上，導致通脹預期上升，但佢提醒，關稅政策可以隨時有變，而未來市場預期慨變化可以好大。 William又認為，最終通脹情況或冇想像中咁差，現時市場對通脹及關稅慨預期，只係作最壞打算，中長期對非實體產品類慨美股影響有限。 |
|
| 盧志威 |
2025-03-19T11:14 |
人工智能(AI)晶片股巨頭英偉達(Nvidia)行政總裁黃仁勳係年度開發者大會(Game Developers Conference，GTC)上發布新AI晶片，下半年將會推出Blackwell Ultra芯片，Vera Rubin芯片就計劃2026年交付。Nvidia推新晶片可唔可以谷高股價？ 潤淼資產管理董事盧志威認為，投資AI慨熱潮已過，DeepSeek慨出現令訓練成本下降，或會衝擊Nvidia係晶片市場慨壟斷地位。佢又指，炒賣風潮已消退，之前市場price in得太多，估值已經撐唔住，股價未來有機會落返100美元水平。 |
|
| 盧志威 |
2025-03-12T10:53 |
美國總統特朗普(Donald Trump)早前提出對所有進口鋼鋁徵收25%關稅，今日(12日)將會生效，昨晚(11日)原本宣布會對加拿大鋼鋁產品額外收多25%，即係合共收50%關稅，但後來又取消額外加25%決定，拖累美股連跌第2日，雖然市場恐慌指數(VIX)指數回落3%，不過，美股反彈力度好弱，投資者暫時是否不宜低吸美股? 潤淼資產管理董事盧志威指，於技術分析上，整個美股走勢都較差，主要有兩大原因：關稅戰令市場氣氛差，通脹及企業成本升；投資者自DeepSeek出現後就離棄美股，對A股H股的科技股及相關人工智能(AI)應用類做大規模重估，轉「炒」A股H股。 Ｗilliam續指，未來美股走勢，要看關稅對經濟有多大衝擊，但他認為，互聯網類或AI應用類有關的美股受到影響不大，可趁低吸納。 |
|
| 盧志威 |
2025-03-05T11:52 |
第十四屆全國人大會議今早(5日)開幕，國務院總理李強發表政府工作報告，據《彭博》今早引述消息報道，今年國內生產總值(GDP)增長目標約5%，擬發4.4萬億人仔地方政府專項債，以及計劃發1.3萬億人仔超長期特別國債，初步睇呢幾個主要經濟目標有冇驚喜？ 潤淼資產管理董事盧志威指，依家市場估計「兩會」目標只係大致符合預期，冇太大驚喜，但呢個穩定性未必會利好股市，因為大部分消息已反映係股市上，如果今次欠缺新刺激，股市有機會回落。 佢又話，後市要留意會議公布慨措施再做部署，不過，依家股市資金充裕，可以輪流炒唔同板塊，所以即使大市出現調整都唔使太擔心。 |
|
| 盧志威 |
2025-02-26T11:47 |
美國昨晚(25日)出爐慨2月消費者信心指數跌至98.3，遠差過預期，反映美國總統特朗普(Donald Trump)慨政策為經濟帶黎不確定性，更令衰退憂慮再度升溫。美國10年期國債收益率更跌至今年最低水平，似乎反映「特朗普交易」(Trump Trade)正逐步降溫。若未來真係爆發大規模關稅戰，消費者及企業信心係咪會繼續下滑？ 潤淼資產管理董事盧志威指，消費信心下降係正常，因為關稅對消費者有直接影響，不過，唔需要對零售業下滑睇得太悲觀，如果真係爆發大規模關稅戰，零售業反而有機會出現反彈，因為加關稅前或會出現一波消費潮。 William又話，依家股市主要受兩大因素影響，首先係「Trump Trade」熱潮降溫，其次係內地人工智能(AI)大模型DeepSeek橫空出世，令成本大幅降低，長遠而言，對AI技術發展係好事。 佢又認為，消費信心短期仍會疲弱，但相信股市唔會因為咁而大幅調整。 |
|
| 盧志威 |
2025-02-19T10:45 |
英特爾(Intel)昨晚(18日)暴漲16%，創2020年以來最大單日升幅，作為美國晶圓代工龍頭，過去業務一直做得比同業差，繼之前傳台積電(TSMC)會接手晶片製造業務之後，現在又傳博通(Broadcom)都對設計業務感興趣，英特爾未來被分拆的機會大不大？ 潤淼資產管理董事盧志威指，英特爾曾是市場龍頭，但後來被英偉達(Nvidia)超越，如果能被併購，引入其他同行管理，市場價值將重新浮現，所以英特爾確有分拆業務憧憬。 William又提到，雖然今次英特爾，好大機會找到買家接收部分業務，惟之後料會涉及不少反壟斷審批，涉及風險較大，估計股價經過一輪急升後，未來一段時間會保持平穩，要等待下一步併購消息出來後，才能開展下一輪升浪，目前不宜高追。 |
|
| 盧志威 |
2025-02-12T11:00 |
國產人工智能(AI)大模型DeepSeek爆紅，引爆中美科技股潛在估值重估。市傳蘋果公司(Apple Inc.)揀左同阿里巴巴(09988)合作，內地iPhone用戶會用阿里慨AI功能，仲話等緊網信辦審批。今次Apple揀阿里，而唔係之前傳出慨百度集團(09888)，甚至DeepSeek，消息可唔可以帶動阿里股價突破去年10月高位？ 潤淼資產管理董事盧志威指，Apple除左考慮算力，亦需要企業後台慨強大支持，所以揀阿里唔揀DeepSeek都係合理。至於百度就會受消息拖累，美國預託證券(ADR)昨晚(11日)挫逾4%。 William估計，阿里仍有上升空間，但提醒投資者，阿里股價近期升得太急，短期可能會出現調整。佢續指，DeepSeek慨出現令AI投資格局出現變化，帶動資金流向不同領域，包括智能駕駛。 |
|
| 盧志威 |
2025-02-05T11:29 |
Google母公司Alphabet上季雲業務表現差過預期，加上今年資本開支預算高過市場預期30%，拖累股價係美股昨晚(5日)收市後延長交易時段曾瀉逾9%。內地人工智能(AI)初創企業DeepSeek慨出現，係咪會影響企業係AI方面慨投資？投資主題會唔會有新方向？ 潤淼資產管理董事盧志威指，DeepSeek慨出現令唔少投資者轉軑，因為部分覺得相關企業之前投資太多資金係AI算力方面，但DeepSeek證明研發AI未必要用好多錢及算力，投資意欲自然會細左。不過，係企業角度睇，仍然會繼續搶攻AI，唔會中途放棄。不過，他認為，隨著AI熱潮減退，未來將會有新投資主題出現。 William續指，對比投資顯卡或大企業，相信投資者會轉向投資應用層面，因為DeepSeek令到搭建平台成本下降，相信中小企會出現一個爆發期。 |
|
| 盧志威 |
2025-01-22T12:18 |
美國總統特朗普(Donald Trump)宣布1項名為「Stargate」(星際之門)慨大型人工智能(AI)投資計劃，OpenAI、日本軟銀集團(SoftBank Group)及甲骨文(Oracle)會透過成立一家合資公司，最少投資50000億美元打造大型AI基建。受消息帶動，相關股份係昨晚(21日)美股收市後延長交易時段有得升，AI股係咪仲有排炒？ 潤淼資產管理董事盧志威指，呢單巨額投資的確會利好AI相關股份，不過，呢個計劃表面睇聲勢浩大，但有機會只惠及一些傳統AI行業企業，所以呢個消息對整體大市黎講只係溫和偏正面。 William又話，投資者會因為呢個消息，認定AI公司基本面因素向好，帶動資金湧入相關股份，推高左股價，但之後仲會唔會急升仍要觀望，有機會升完呢浸後，之後只係平穩地緩慢上升。 |
|
| 盧志威 |
2025-01-08T11:10 |
雖然英偉達(Nvidia)行政總裁黃仁勳係「美國消費性電子展2025」 (CES 2025)宣布，推出一系列新產品，但Nvidia股價昨晚(7日)破頂後，創153.13美元新高後，掉頭向下，收市倒插6%，錄得2024年9月初以黎最大單日跌幅。Nvidia股價愈黎愈Chok，股價未來會點走？ 潤淼資產管理董事盧志威認為，Nvidia股價倒跌純粹係市場獲利回套，主要係市場之前對集團新產品及業績期望太高，Nvidia跌勢同基本因素冇關，而係市場情緒急劇變化，加上社交媒體慨影響，依家好多對沖基金用talking point作為投資策略，導致市場一擁而上。 William又話，Nvidia股價出現調整只係受短期心理因素影響，投資者唔使太擔心。 |
|
| 盧志威 |
2024-12-16T12:35 |
晶片股博通(Broadcom)交到靚業績之餘，公司又睇好今季人工智能(AI)產品銷售前景，刺激股價上周五(13日)收市勁升24%，市值更首次衝破1萬億美元，令美股又多1隻萬億美元市值股份，係咪應該沽英偉達(Nvidia)換馬博通，因為股份只係岩岩開始發力？ 潤淼資產管理董事盧志威表示，Nvidia係一家早已交出成績慨公司，亦係一個潮流，公司靠技術成為行業龍頭，博通就係客製化晶片(ASIC)，要衡量兩者有幾大差距，值唔值得畀一個溢價Nvidia，呢個就係佢地「蹺蹺板效應」慨分別。 William又話，依家市場非常睇好博通未來3至5年前景，仲可以搶佔到Nvidia慨市場，單係呢個因素都足以可以炒一輪，所以預期未來落博通慨資金應該唔少，所以睇好博通股價可以繼續上。 |
|
| 盧志威 |
2024-12-11T11:52 |
美國總統當選人特朗普(Donald Trump)下個月就「回歸」白宮，之前炒到癲慨「特朗普交易」(Trump Trade)仲有冇得炒？此外，雖然SpaceX未上市，但公司估值已升至3500億美元，太空概念又有冇得炒？ 潤淼資產管理董事盧志威指，特朗普媒體及科技集團(Trump Media & Technology Group)、Tesla、比特幣(Bitcoin)、Twitter，呢些熱炒Trump Trade慨資產，係特朗普上任後，點都會有一定利好，例如立法踢走TikTok就會利好Twitter。William認為，Trump Trade唔會咁快炒完，但要小心呢些資產價格短期有機會見頂回落。 William又話，市場對SpaceX慨樂觀情緒，主要來自Tesla股價已炒到好高，令樂觀情緒蔓延去另一個概念，但好多野始終要等SpaceX上市先知。 |
|
| 盧志威 |
2024-12-04T11:27 |
南韓總統尹錫悅昨晚(3日)突然宣布「戒嚴」，但國會迅速通過解除戒嚴令，其後尹錫悅亦正式宣布撤戒嚴令，結束僅持續逾6個鐘慨戒嚴事件，市場解讀為政黨爭拗，南韓股市今朝(4日)如常開市，首爾KOSPI指數今早低開約2%，今次事件對金融市場有咩影響？點睇高盛話依家係買韓股慨機會？ 潤淼資產管理董事盧志威指，今次戒嚴事件由開始到結束只係幾個鐘，令韓圜出現輕微震盪，但金融市場慨震盪已經完結，因為市場已經預左國會一定會「做野」，例如啟動彈劾總統程序，所以對金融市場影響唔大，短期內回穩完全冇問題，但股市要回升就有難度。 William續指，南韓政局一向複雜，今次突襲式戒嚴，短期黎講一定係負面，但由於國會反應迅速，令政局好快回復穩定，加強投資者對南韓股市慨信心，亦會對當地慨穩定性加分，中長線係一個買入機會。佢認為可以考慮買入龍頭股，例如三星電子(Samsung Electronics)呢類半導體股會較穩陣。 |
|
| 盧志威 |
2024-11-27T11:06 |
公開招股超額認購78倍，內地物流龍頭順豐控股(6936)今日(27日)上市，值得留意係暗盤價昨日(26日)高開後回軟，而順豐A股昨日收市就微升，H股招股價34.3元，較A股昨日收市價有逾20%折讓，如果H股今朝首掛表現對辦，抽到慨「幸運兒」係咪要止賺？ 潤淼資產管理董事盧志威指，順豐定價唔算高，問題係同華潤飲料(02460)及美的集團(00300)當日比較，依家市況係差左，所以表現好難直接比較，佢估計，順豐短期好難有突出慨表現，長線就留意公司有咩發展，始終都係龍頭企業，如果抽中，短線都有得賺，不如考慮食糊套現再買另一隻股份。 |
|
| 盧志威 |
2024-11-20T12:20 |
市場關注俄烏衝突事態發展，美股3大指數昨晚個別發展，道指4連跌，但納指及標指都有得升，高盛重申標指明年底見6500點慨目標。美股短線表現其中1個關鍵因素，就係今晚(20日)收市後出爐慨英偉達(Nvidia)季績，市場預期會交到一份靚業績，又估計股價未來1年睇升1倍，加上之前沃爾瑪(Walmart)季績好過預期，集團再上調年度銷售預測，畀左一個樂觀前景指引市場，刺激股價破頂。 潤淼資產管理董事盧志威指，依家市場焦點都係睇返業績，Walmart美國本土銷售較強勁，亦睇好今年「Black Friday」銷售，整體黎講都係靠業績基本因素推動。 美股方面，佢認為，去到現水平，明年底目標價及估值都係高，但因為公司表現夠強，所以買指數同買公司概念係好唔同，個股方面就可能出到好似Walmart呢些強勢股，股價今年已累升約60%，因此，暫時都係聚焦個別公司較好。 |
|
| 盧志威 |
2024-11-13T11:40 |
美國通脹數據出爐前夕，加上美債息抽高，美股3大指數昨晚(12日)全線低收，係總統大選後首次出現調整，由於「Trump Trade」略為降溫，Tesla股價昨晚收市挫6%，特朗普旗下Trump Media & Technology Group(DJT.US)更大跌9%，不過，比特幣(Bitcoin)價格仍企係88000美元，係咪可以趁美股回調，高追最受惠「Trump Trade」慨Bitcoin？ 潤淼資產管理董事盧志威指，雖然Bitcoin及Tesla股價都係特朗普勝選慨贏家之一，但佢認為市場有過分樂觀之嫌，特朗普慨政策唔會一夜間推出，依家市場主要由投資情緒驅動，所以呢類資產好難估頂，情況類似10月初慨港股，當時投資情緒好亢奮，不過，當呢些資產轉向時，可以大林近20%至30%，佢認為，現階段唔係入市好時機，唔建議高追。 William又指，如果真係想依家買Bitcoin，博幣圈之後傳黎好消息，建議小注買入，唔好訓身入市。 |
|
| 盧志威 |
2024-11-06T12:10 |
美股於總統大選有結果前，全線反彈，三大指數收市升逾1%，科技股亦都做好，英偉達(Nvidia)再升近3%，市值達到3.43萬億美元，超越蘋果公司(Apple Inc.)成全球市值最大公司，英偉達6月曾短暫成全球市值最大公司，不過短時間就見頂，今次又應該如何分析英偉達？ 潤淼資產管理董事盧志威估計，Nvidia調整後可以重拾上升動力，因為Nvidia股價是靠產品支撐，只要未有其他產品能夠動搖Nvidia晶片龍頭地位，市場都不需要擔心股價會出現大幅度下跌，只會出現短期調整，反觀Apple新產品缺乏以往的爆炸性及股價推動力。 William又指，美股大部分互聯網股都處於穩定向好階段，建議可分散買入，例如Nvidia估值已經偏高，高增長階段已過，年內難再出現倍升情況，但可以作為投資組合一部分。 |
|
| 盧志威 |
2024-10-30T11:49 |
美企繼續派成績表，昨晚(29日)輪到Google母公司Alphabet及晶片製造商AMD，其中，AMD業績令市場失望，雖然上季業績對辦，但今季營收展望差過分析員預期，拖累股價昨晚(29日)盤後大跌7%，係咪反映人工智能(AI)投資已由晶片基建，轉移至AI應用層面？如果依家買AI股應該點揀？ 潤淼資產管理董事盧志威指，隨著AI發展，未來大部分企業都會大量應用AI，但要分清楚企業公司同AI基建慨關係，例如晶片巨擘英偉達(Nvidia)係AI基建係不能被取代慨龍頭，令公司生意長做長有，但最近有半導體公司慨業務指引顯示增長放慢，所以揀半導體股要睇公司基本面，因為基本因素係反映公司係AI行業細分領域慨增長，以及可唔可以繼續支持股價繼續企係高位。 |
|
| 盧志威 |
2024-10-23T12:02 |
內地樽裝水品牌怡寶母企華潤飲料(02460)今日(23日)首掛，公開招股超額認購逾233倍，一手中籤率30%，要抽7手先可以穩獲1手，以上限14.5元定價，集資淨額約49億元，更成為今年「凍資王」，招股反應咁好，係因為樽裝水業務有吸引力，還是只係受惠於大市投資氣氛熾熱？上市後股價又會點走？ 潤淼資產管理董事盧志威指，中長期而言，隨著房地產及金融業好轉，消費股亦會跟住上，因此，投資者可以考慮現階段買消費股作中長線投資。 業務方面，William就話，一般樽裝水業務主要係投資消費長期增長概念，唔係睇基本面，所以呢類股份慨走勢好視乎資金配置，希望未來內地消費市場好轉，可以帶動股價，始終依家大部分消費股估值仍處於低位，但佢提醒，要留意內地係美國總統大選後，有冇相關政策出台影響消費股走勢。 |
|
| 盧志威 |
2024-10-16T11:52 |
美股昨晚(15日)結束兩連升，周一(14日)造好慨晶片股昨晚都轉差，其中，人工智能(AI)晶片「股王」英偉達(Nvidia)挫5%，主要受艾斯摩爾(ASML)業績拖累，ASML荷蘭股價係放榜後急瀉15%，ASML原本今日(16日)派成績表，但因為技術問題提早1日出爐，呢份季績差過市場預期，上季定單量僅及分析員預期一半，前景指引亦偏弱，對人工智能(AI)行業有咩啟示？ 潤淼資產管理董事盧志威表示，ASML慨問題在於美國實施出口管制，增加ASML係內地銷售產品慨難度，其次係面對周期性問題，ASML係光刻機巨頭，公司定單出現波動，令市場質疑上游受惠唔到AI熱潮，又或者熱潮只集中係某些產品，例如Nvidia某幾款晶片，而其他AI相關慨產品仍未能受惠。 |
|
| 盧志威 |
2024-10-09T11:33 |
摩根士丹利上調騰訊控股(00700)目標價至570元，又重申「股王」係行業首選，主要係睇好集團第3季業績，又估計遊戲收入持續強勁，雖然股價近排升左唔少，但估值仍然吸引，依家適唔適宜部署騰訊？美國人工智能(AI)晶片「股王」英偉達(Nvidia)指，新晶片Blackwell效能高，可以減低用電量，股價昨晚(8日)衝上3個月高位。港美兩大「股王」應點揀好？ 潤淼資產管理董事盧志威指，現階段宜部署騰訊，主要係市場普遍睇好，加上情緒主導市場，只要基本面唔係太差，資金都會流入藍籌，而騰訊就係行業首選。 至於Nvidia，William就話，Nvidia產品有些似以前慨iPhone，即係產品搶手，可以保持高毛利，亦唔使擔心銷情，加上Nvidia係依家已成為明星股，當美股向上，Nvidia就會係行業首選股。 |
|
| 盧志威 |
2024-10-02T11:36 |
近期中央密集出招救樓市，包括下調首期比例、減存量房貸息，以及放寬或撤銷限購等，有消息指，北京、杭州等地成交轉趨活躍，加上匯豐證券指最新救市政策，令該行認為內房出現轉捩點會提早1年至明年出現，並上調多隻內房股目標價。不過，高盛仍睇得較保守，雖然預期內房今輪反彈或較以往持久，但如果基本因素唔改善，內房仍好難轉勢，到底內房股值唔值博？ 潤淼資產管理董事盧志威指，近期內房股係較值博，始終係中央重點打救慨範疇，依家出台慨政策主要針對去庫存及穩定樓價，若要長期反彈，資金及就業等因素缺一不可，加上中央剛開始救樓市，要推高樓價仍然較難，但暫時出台慨措施相信都足夠，投資者可以博內房股有個短期反彈，但中長線而言，未必可以變成高增長板塊。 |
|
| 盧志威 |
2024-09-25T11:35 |
人民銀行昨日(24日)聯同國家金監總局及中證監推出一系列刺激經濟措施，救市「組合拳」刺激A股及港股大升，市場亦睇好後市表現，主要係今次慨救市措施中，有兩大新招撐股市，分別係互換便利首期操作規模5000億元(人民幣‧下同)，以及股票回購再貸款3000億元，合共向股市定向「放水」8000億元，究竟當中產生慨連鎖效應有幾大？成效又可以持續幾耐？ 潤淼資產管理董事盧志威指，動用8000億元撐股市會有乘數效應，因為保險公司會係其中1類受惠企業，有利A股向上。至於成效可以持續幾耐，因為臨近「十一國慶」，放假期間A股冇市，即係港股冇北水，股市係呢段期間或會出現調整，令定向「放水」成效冇咁顯著，所以短期會出現獲利回套情況，相信要等國慶假期結束後，先真正睇到「放水」成效。 |
|
| 盧志威 |
2024-09-11T10:24 |
美國總統大選重頭戲今朝(11日)上演，代表民主黨出戰慨現任副總統賀錦麗(Kamala Harris)，硬撼前總總、代表共和黨出選慨特朗普(Donald Trump)，進行兩人首場亦可能係最後一場辯論。美股3大指數昨晚變動唔大，似乎都係觀望緊呢場辯論，值得留意係，有「恐慌指數」之稱慨VIX指數昨晚略為回落，而部分資金似乎轉投債市，依家美股慨風險胃納有冇因為呢場辯論而轉變？兩黨慨稅項政策對企業又有咩影響？ 潤淼資產管理董事盧志威認為，係市場缺乏焦點下，呢場辯論有可能令市場波動，而相關板塊或會因應兩人表現而有郁動，此外，由於美股仍有唔少不確定性，依家最明朗係賭美息向下，而經濟數據差會令加息步伐及幅度快些和大些，由於唔知應該點部署，所以資金就流入債市避險。 佢又話，民主黨主張向大企業及富人加稅，對股市黎講長遠一定係利淡，加稅會令唔同範疇慨動力減弱，雖然特朗普主張減稅，但都會有其他影響，所以投資者可能會選擇係大選前放假，勢令市場變得波動，由於風險大左，呢段時間宜減少注碼。 |
|
| 盧志威 |
2024-09-04T11:44 |
市傳英偉達(Nvidia)已收到美國司法部傳票，意味對集團慨反壟斷調查升級，拖累Nvidia股價昨晚(4日)跌近10%，市值單日蒸發逾2700億美元，折合逾2.1萬億港元，仲拖林成板晶片股。Nvidia涉及慨反壟斷調查係咪要打定輸數？股價跌至現水平值唔值得撈貨？ 潤淼資產管理董事盧志威指，現階段唔使特別擔心Nvidia慨反壟斷調查，因為調查時間一般都好長，過程中亦涉及雙方談判及角力。佢又話，投資者不妨等估值再平些才買入，睇返股價走勢，要回落至100美元樓下應該唔使等好耐，所以不妨等股價跌穿呢個位再考慮做部署。 William估計，Nvidia股價甚至會係上月底部，即90美元水平出現第2隻腳，投資者可以睇長少少，因為集團業績其實冇乜瑕疵，反壟斷事件只係短期消息。 |
|
| 盧志威 |
2024-08-28T11:43 |
係美國上市慨內地電商股拼多多(美股:PDD)出完業績後，股價暴瀉，昨晚(27日)仍未止跌，再挫4%，收報95.91美元，到底拼多多現價係咪已反映所有利淡因素？ 潤淼資產管理董事盧志威指，作為一隻高增長股，拼多多市盈率(PE)跌到10倍樓下，雖然已反映左利淡因素，但市場仍對內地消費有降級預期，所以拼多多短線而言，100美元關口係好難頂得住，但中長線而言，等股價落到90美元水平買入，贏面仍然好大。 此外，拼多多競爭對手京東集團(09618)公布新一輪回購計劃，未來36個月會動用唔超過50億美元回購股份，雖然回購價高過上次，但市場仍然睇得唔樂觀。佢認為，市場睇淡慨唔止係消費股，而係整個投資市場氣氛。 |
|
| 盧志威 |
2024-08-14T12:07 |
美國7月生產物價指數(PPI)低過預期，按年及按月升幅都放緩，整體及核心PPI按年升2.2%和2.4%，反映通脹持續放緩，刺激美股3大指數昨晚(13日)齊升，其中，道指大升逾400點，納指更升2.4%。美國今晚(14日)會出消費物價指數(CPI)，數據係咪繼續左右美股大局？ 潤淼資產管理董事盧志威表示，睇返聯儲局長期溫和通脹目標，PPI升2.2%其實都收貨，所以昨晚美股表現興奮。另一方面，市場對聯儲局減息慨信心好大，包括短期減息慨持續性，以及幅度會較大，都對大市及資產價格有正面作用。 William又指，經濟數據主要反映個別業績表現，其實金融市場對利率變化較敏感，因為會直接影響融資、貸款等活動，可更大程度超前反映投資者行為。佢續指，如果CPI冇明顯走弱，再加埋各項數據指標及組成部分冇異動，基本上美股今晚易升難跌，同埋PPI數據靚仔，相信CPI應該唔會令市場失望。 |
|
| 盧志威 |
2024-08-07T11:32 |
周一(5日)出現慨「黑色星期一」股災，有指由日本央行爆冷加息引爆慨日圓拆倉潮係「元兇」，雖然日圓近期轉強，但摩根大通指，日圓仍嚴重被低估，之前慨利差交易(Carry Trade)平倉或拆倉潮仲未結束，現時投機領域拆倉只係完成左50%至60%，日圓依家去返144、145，係咪只係大跌過後短暫企穩？若日圓繼續升值，速度係咪會比之前慢？此外，日本6月實際工資數據按年升1.1%，係27個月以來首次有得升，呢些數據都會係日本央行再加息及「收水」慨理據，日圓會升到咩水平？ 潤淼資產管理董事盧志威指，到底日圓未來會點走，如果要拆Carry Trade慨倉，可以需時好耐，所以日圓短線會比較波動，繼續升慨機會仍較大，對日股黎講係非常不利。 William又話，其實日圓之前係跌過龍，每百日圓兌港元兌到5算樓下，雖然日圓依家升返，但都唔係一個離譜慨水平，所以應該仲有上升空間，短線係會波動，但迎來新一輪升勢亦係合理，不過，受拆倉潮等影響，投資者再入市會更加小心，所以短期離場慨人會較多，會出現日圓易升日股易跌慨局面。 |
|
| 盧志威 |
2024-07-31T11:24 |
大型科技股微軟(Microsoft)及超微半導體(AMD)，昨晚(30日)係美股收市後出左季績，其中，微軟因雲服務收入差過預期，股價盤後一度挫7%，不過，AMD業績好過預期，股價盤後大升8%，不過，出業績前半導體板塊已偷步跌，費城半導體指數收市亦跌3.8%，微軟業績唔好，大型科技股係咪都冇運行？ 潤淼資產管理董事盧志威指，市場情緒比業績更重要，過去1年，科技股升勢強勁，係人工智能(AI)熱潮下，微軟股價大升，市場開始留意有冇資產錯配，而微軟業績可以跟住市盈率(PE)上，所以問題唔大。 William續指，依家市場最關注美國總統大選，前總統特朗普(Donald Trump)競選時指，要將半導體公司回流美國，由於市場認為科技股未來走勢唔明朗，所以調整資金配置避險，減少科技股持倉，導致近期科技股處於一個反覆調整格局。 |
|
| 盧志威 |
2024-07-24T10:46 |
美股近日焦點除左業績及周五(26日)出爐慨個人消費支出(PCE)物價指數，當然包括美國總統大選形勢，參考《路透》及《彭博》引用慨民調結果，應該會代表民主黨出戰慨賀錦麗(Kamala Harris)，削弱左特朗普(Donald Trump)慨領先優勢，其中，不論《路透》或普益索慨民調，賀錦麗支持度領先對手2個百分點。摩根大通提醒投資者，大選前美股會持續波動，亦要留意兩黨候選人慨政策，但無論邊個當選相信都係打中國牌。 潤淼資產管理董事盧志威指，依家總統大選形勢係叮噹馬頭，相信呢個情況會持續，又認為換賀錦麗出選係正確慨決定，因為可以將勝負拉返近些，係對民主黨有利。不過，會增加美股慨不確定性，因為基於勝負考慮去買慨股份係好唔同，未來逾3個月，美股會因選戰變得更波動，包括晶片股都跌左落黎， William又話，基於選舉因素，美股係第3及第4季未必有好慨投資機會，除非大市大幅急挫。 |
|
| 盧志威 |
2024-07-17T10:35 |
港股連跌兩日，累跌逾560點，上周升幅已全部化灰，跌市原因包括市場擔心特朗普一旦再當選，將會再收緊對華貿易限制，其次係內地宏觀數據唔理想，以及憂慮三中全會最終冇驚喜。恆生指數昨日(16日)再失18000關，10天及20天線都守唔住，後市係咪唔太樂觀？ 潤淼資產管理董事盧志威認為，一旦特朗普成功再入主白宮係不利港股，睇返佢上次當選美國總統，中美爆發貿易戰，對華關稅係非常高，首先係中美會唔會再爆貿易戰，其次係內地已推出唔少政策，包括放寬內房、互聯網遊戲政策，但關鍵係呢些資金會唔會釋放出黎，佢又話，一旦再爆貿易戰，但美國大手減息，就有條件放寬貨幣政策，如果出現呢個情況就會利好股市。 不過，William提醒，都要視乎出現呢些情況慨時機，到底係係咪過左三中全會，等特朗普上任後，以及聯儲局亦已減息。佢估計，若美國9月開始減息，下半年慨銀根會較鬆動，繼而帶動股市向上。 |
|
| 盧志威 |
2024-07-10T10:26 |
聯儲局主席鮑威爾(Jerome Powell)一連兩日到國會作證，佢昨日(9日)指，雖然擔心利率持續高企會危害經濟，但亦暗示唔急於今個月減息。美股昨晚已連續第2日個別發展，其中，納指已連續第6個交易六創收市新高，升勢繼續集中係「科技7雄」(Magnificent Seven)，其中，Tesla股價已連升第10個交易日，今年暫時累升5%，成功翻身。美國明晚(11日)會出通脹數據，有機會令市況波動，美股後市係咪仍然要靠「7雄」？ 潤淼資產管理董事盧志威指，直接解讀鮑威爾慨言論就係依家唔會減息，但之後好大機會減息，所以今年應該會減息1至2次，但長遠減息空間有幾多仍然未明朗，導致美國10年及30年期長債息落唔到去，已經同短息倒掛。 股市方面，William就話，納指近期都係靠「7雄」輪動不斷破頂，整體走勢仍然係向上，隨著美國非常緩慢地步入減息周期，債券表現將會好轉，此外，追短線固定收益如定存慨投資者，有可能會「出返黎」去返股市，呢個係推動股市中長期向上非常重要慨因素。 |
|
| 盧志威 |
2024-07-03T11:16 |
美國電動車龍頭Tesla第2季交付量超預期，刺激股價昨晚(2日)收市大升10%，Tesla上季交付約44.4萬架電動車，按年跌近5%，已連跌兩個季度，跌幅細過預期，但按季增長近15%，係咪反映Tesla業務已見底？想買車股Tesla係咪首選？ 潤淼資產管理董事盧志威指，可以從兩個層面睇Tesla，首先集團交付量按季見底回升係好事，亦係股價向上慨主因，其次係睇內地市場增長放緩問題，主要係有太多唔同品牌慨電動車推出，市場仍未完成整合，但Tesla勝在係巨無霸，加上生產成本較低，如果打價格戰，Tesla有一定優勢。 William又認為，汽車股龍頭始終係Tesla，即使業績短期唔好，但仍值得考慮，內地市場方面，如果想穩陣些都係揀返比亞迪股份(01211)，因為行業完成整合後，價格有望回升，長遠仍然睇好。 |
|
| 盧志威 |
2024-06-26T11:31 |
美國聯儲局理事鮑曼(Michelle Bowman)指，通脹仍有上行風險，估計局方今年唔會減息，美股3大指數昨晚(25日)個別發展，其中，道指收市瀉近300點，另一名理事庫克(Lisa Cook)亦對減息持保守態度。此外，雖然美國6月消費者信心指數下滑，但其實同過去兩年比較差距唔大，點解官員會咁「鷹派」？ 潤淼資產管理董事盧志威指，原因係聯儲局最新慨「點陣圖」有少少滯後，加上美國最近出爐慨經濟數據並非急降溫，雖然利率見頂，但經濟仍正常運行，所以美國的確冇減息迫切性。 William又話，由於美國高息環境比預期持續更耐，令美元比預期強勢，導致其他貨幣出現沽壓，若美息持續高企，聯儲局減息步伐都唔會太快。 |
|
| 盧志威 |
2024-06-12T11:26 |
蘋果公司(Apple Inc.)備受外界關注慨人工智能(AI)技術Apple Intelligence，終於係日前舉行慨全球開發者大會(WWDC)壓軸登場，但股價到昨晚(11日)先有反應，收市大升逾7%兼破頂，市值單日進帳2150億美元，創單日最大增幅，市值升至3.18萬億美元，進一步超越英偉達(Nvidia)，係咪反映市場對Apple慨AI前景有好大憧憬？ 潤淼資產管理董事盧志威指，Apple今次趁WWDC提升返集團硬件以外慨產品吸引力，因為之前推出慨產品，銷售一直谷唔起，加上憧憬加左AI元素慨iPhone 16將會引爆換機潮，吸引唔少投資者再追入Apple。 William又話，Apple後市主要視乎兩大因素，首先係加左AI功能慨iPhone 16好大機會掀起換機潮，其次係資金流走向，由於Nvidia拆細後股價一定會調整，部分較保守慨投資者會換馬至Apple，佢估計，Apple股價短期將會繼續升。 |
|
| 盧志威 |
2024-06-05T11:00 |
日本央行副行長冰見野良三昨日(4日)表示，日央行指導貨幣政策時，必須要非常警惕日圓波動對經濟及通脹慨影響。此外，《彭博》又引述消息指，日央行最快會係下周會議討論縮減買債規模，係咪央行認為日圓太弱要出手撐價？ 潤淼資產管理董事盧志威表示，放慢買債步伐係推高長債息其中1個方法，相比美元，日圓利率較低，唔少投資者會借日圓進行投資，包括直接買入資產，或兌換其他貨幣。佢又話，如果日央行認為日圓太波動，放慢買債步伐係對症下藥慨做法，只要融資成本上升，日圓再跌機會就較細，William估計，日圓有機會反彈，因為日央行呢個策略對日圓有較大支持。 |
|
| 盧志威 |
2024-05-29T11:16 |
美股3大指數走勢罕有出現分化，睇返最新慨標普500行業輪動圖，處於弱勢慨科技股有轉強跡象，但值得留意係，標普500分類中，公用、能源及通訊服務股一直係升市領頭羊，點解科技股會突然出現轉強跡象？ 潤淼資產管理董事盧志威認為，科技股出現轉強跡象係基於資金流變化，佢提醒，公用股及能源股股價一向較穩定，係長楂慨首選，早前，因為經濟數據出爐後，令市場對聯儲局減息，甚至加息預期有變，帶動公用及能源呢類息口敏感股向上，依家息口問題冷卻返，資金又再轉投科技股，包括持續強勢慨英偉達(Nvidia)，帶動科技板塊回暖。 William又話，Nvidia近期宣布將股份拆細，仲有20%回報係錦上添花，雖然股價短期或會比較波動，但中長線而言，由於人工智能(AI)晶片熱潮好難逆轉，所以佢認為Nvidia股價中長線仍會向上。 |
|
| 盧志威 |
2024-05-22T12:13 |
近期商品及有色金屬價格急升，睇返《彭博》大宗商品指數，短短3個月內累升25%慨商品數目回升，跑出慨商品及有色金屬包括銅、鎳、銀、錫、鋅、可可、橙汁，係2022年以黎最多。回顧2021至2022年，曾經有逾20隻商品出現類似升勢，值得留意係，之後美國通脹急升，商品市場今輪升浪，係咪美國通脹再度失控慨先兆？ 潤淼資產管理董事盧志威指，通脹預期要綜合工資、樓價及商品等因素去睇，現時因為伊朗、以色列等地緣政治因素，導致商品價格易升難跌，睇返依家商品價格慨升勢，的確有機會令通脹回落速度放慢。 不過，William補充，除非油價、樓價等都急升，否則，美國通脹仍然可控。佢又指，貴金屬等都係投資避險需求為主，對民生影響較小，如果呢輪升勢只限於貴金屬，相信對通脹慨影響唔大。 |
|
| 盧志威 |
2024-05-08T11:07 |
蘋果公司(Apple Inc.)昨晚(7日)舉行名為「Let Loose」線上發布會，新iPad正式亮相，其中，最矚目係係iPad Pro搭載最新及功能最強慨M4晶片，Apple形容M4性能可以媲美其他大廠慨人工智能(AI)晶片。不過，Apple股價昨晚反應十分冷靜。 潤淼資產管理董事盧志威認為，Apple股價近期回升主要受回購推動，雖然AI概念係市場焦點，但今次加入AI功能係iPad，唔係公司主要收入來源慨iPhone，對於今年將會推出慨iPhone 16，市場估計，銷售情況同之前差唔多，不論銷情及增長等都唔會係爆發性，所以股價表現都要等iPhone 16登場後先可以再評估到，不過，由於之前慨回購計劃太厲害，所以股價短期應該仍會偏強。 |
|
| 盧志威 |
2024-04-24T10:44 |
昨日(23日)美股收市後Tesla公布首季業績，純利、收入、汽車毛利率均下跌及遜預期，創辦人馬斯克(Elon Musk)指，新車投產時間會提早至今年年底或明年初，更會以平價出售新車，呢個消息抵銷純利下跌負面因素，帶動股價係延長交易時段大升逾10%，仲有冇其他好處？此外，Tesla競爭對手比亞迪(01211)及小米集團(01810)均有推平車，持續減價戰有機會令賣車利潤歸零，點解都仲要鬥平咁賣車？ 潤淼資產管理董事盧志威指，因為要推平車，Tesla有用機械人加速自動化生產，令成本更平，加上推行自動駕駛同無人駕駛的士(Tesla Robotaxi)，令業務拓展至人工智能(AI)、大數據(Big Data)方向，對股價會有幫助。 William續指，依家行業處於整合，減價戰會淘汰現金流歸零慨車企，因為未來些車價趨勢都係向下，就睇係環境差時，邊個車廠搶到市佔率。 |
|
| 盧志威 |
2024-04-17T11:11 |
美國10年期債息升至近4.7厘水平，事關聯儲局主席鮑威爾(Jerome Powell)同副主席傑斐遜(Philip Jefferson)都暗示或要推遲減息步伐，指去年底起抗通脹缺乏進展，愈黎愈多券商下調今年減息次數預測，其中，瑞銀預期今年減息兩次後，明年有機會掉頭加息。 雖然金價仍處於每盎司2380美元水平慨高位，不過，潤淼資產管理董事盧志威認為，後市10年期債息有機會上到5厘，長遠不利金價走勢，加上中東局勢繼續升溫，最新以色列明言會報復伊朗，短期金價未見進一步動力向上，建議投資者趁而家市場氣氛好就適量減持黃金。 |
|
