| 評論員 |
時間 |
內容 |
標籤 |
| 盧志威 |
2026-07-29T10:45 |
SK海力士今早(29日)出左第2季業績，季度收入創新高，按年勁升2.57倍，經營溢利更按年狂飆5.57倍，連續第5個季度破紀錄，業績咁強勁，不過，南韓股市繼昨日(28日)暴瀉近11%後，今朝仍未止跌，首爾綜合指數一度再挫近6%，點睇SK海力士呢份業績？ 泓瀚資本董事盧志威指，雖然SK海力士產品加左價，但仍賣到斷市，未來幾年產能已被訂滿，係呢個情況下增加資本開資(CapEx)係正常，不過，亦有些場外因素不利股價，而政府加強監管槓桿ETF，純粹要睇住股票慨估值，或者監控炒作力度，呢些都係股價慨負面因素。 William又話，基本上可以當整個存儲類股份，已到左利潤周期頂峰，過左呢個周期就會好似些妖股咁跌返落去，依家進入跌盪期，但係咪跌完仲要觀察，個別股份自高位回落最少40%至50%，擔心景氣一過，潮退慨時就見到半導體股「冇著褲」，不過，佢認為唔會連帶需求都減少，只係股價會隨著市場心理因素大幅波動，需適當地管理風險。 |
|
| 盧志威 |
2026-07-22T10:32 |
晶片股昨晚(21日)造好帶動下，美股終止3連跌，其中，納指反彈逾1%，費城半導體數(SOX)就連彈兩日，昨晚再升5%。此外，南韓半導體股回調後亦急彈，睇返現時慨形勢，半導體股跌完未？ 泓瀚資本董事盧志威認為，由於市場認為企業資本開支大，導致自由現金流剩返好少，加上內地人工智能(AI)初創公司月之暗面(Moonshot AI)慨人工智能(AI)模型「Kimi K3」，因為成本低及高效大受追捧，擔心美國同業OpenAI及Anthropic定單被搶走，投資者因而睇淡半導體股，導致呢些股份跌唔停。 不過，William認為，當生產相關部件慨過程愈來愈複雜，各大企業都需要採購唔同硬件，硬件需求就由幾家大型語言模型公司變成企業，雖然客戶唔同左，但仍有一定實際需求，因此，預期半導體及AI股調整後會彈返上去。 |
|
| 盧志威 |
2026-07-15T10:25 |
雖然美股3大指數昨日(14日)高收，但只係微升完場，相信同成分股IBM第2季初步業績差有關，IBM預期，第2季收入172億美元，低過分析師預期，集團又指面對多項困難，包括z17大型主機銷售遜預期等，IBM變相發盈警，拖累IBM股價暴瀉25%，會唔會燒埋其他軟件股？ 泓瀚資本董事盧志威指，IBM前景似乎都唔樂觀，軟件業務受人智能(AI)打擊，因為唔少軟件服務客戶都轉用AI，反而令大模型公司、相關應用受惠，直接影響IBM收入。 William又話，IBM本身有賣傳統伺服器，但整體表現都唔太理想，食唔到今輪資本開支浪潮，但賣硬件又唔輪到IBM，令硬件業務翻唔到身，軟件業務又畀AI撳住打，成個形勢都唔樂觀，更拖累軟件股估值。 |
|
| 盧志威 |
2026-07-08T10:32 |
昨日(7日)美股慨科技、半導體股被視為擁擠交易(Crowded Trade)，出現平倉、獲利情況，加上中東局勢再升溫，拖累3大指數低收，費城半導體指數(SOX)就挫逾4%，其中，成分股英特爾(Intel)瀉近10%，其實呢類股份已自6月高位回調左唔少，擁擠交易係咪比左一個藉口市場沽貨？ 泓瀚資本董事盧志威指，極度擁擠慨交易都係來自半導體、硬件類股份，呢些股份慨升幅以倍數計，所以出現獲利或平倉情況好正常。 William又提及，雖然長線比較難講，但短線而言，呢類公司未來2至3年慨產能已被預約，即使加價後仍然售罄，業績方面似乎已好穩固，只係股價超前反映，由於唔少市場普遍都唔太接受呢個估值邏輯，同埋都想沽貨套現。 佢相信，半導體、硬件股跌到某個水平就會有反彈，不過，現時市場仍由情緒主導，所以暫時仍要等一等。 |
|
| 盧志威 |
2026-06-24T11:42 |
美股3大指數昨日(25日)全線向下，其中，標指挫逾2%，納指1.4%，費城半導體指數(SOX)更急瀉近8%，主要受半導體股沽壓、通脹及加息預期、地緣不確定性等因素影響，不過，道指表現就幾硬淨，只係跌45點，有恐慌指數之稱慨VIX都唔高，點睇美股市況，跌勢有冇機會加劇？ 泓瀚資本董事盧志威指，美股跌勢主要集中係跟人工智能(AI)相關慨硬件、軟件公司，睇返依家慨市況，個別股份因為炒得太高太癲而出現調整。 William又指，如果用4月低位計，唔少大價股慨股價已經翻倍，因此，就算跌返20%至30%，仍較低位升左50%至60%，累積慨回套壓力都幾大，所以就算冇壞消息慨情況下，去到呢些位出現較深調整都唔出奇。 |
|
| 盧志威 |
2026-06-17T10:21 |
聯儲局已展開一連兩日慨議息會議，今次係新主席沃什(Kelvin Warsh)「頭炮」，首次主持議息會議及會後記者會，市場焦點落係沃什慨言論，值得留意係，債息連日反覆回落，係咪預示聯儲局未來加息唔使咁進取？ 泓瀚資本董事盧志威表示，市場之前預期美國通脹持續升溫，以及油價會繼續企係高位，所以估計聯儲局最快年底開始加息，但油價現時已回落至每桶80美元以下，加息預期亦出現變化。 William又指，當供應鏈回復正常，油價有可能進一步跌至70美元，甚至更低水平，中長線而言，若美國通脹紓緩，儲聯局加息壓力會大大減少，而市場對利率慨預期亦會影響大市氣氛。 |
|
| 盧志威 |
2026-06-10T10:30 |
美伊戰事再度惡化，美股3大指數昨晚(9日)個別發展，道指收市升86點，標指及納指就向下，而油價昨晚跌3%，但今早(10日)係亞洲交易時段反彈，紐約期油最新報每桶88.84美元，倫敦布蘭特期油報92.23美元，油價走勢反覆對美股有咩影響？ 泓瀚資本董事盧志威認為，雖然美伊持續爆發衝突，但油價近期一直上唔返100美元以上高位，反映市場可能有新供應，所以未有引發恐慌性「搶油」，因此，暫時毋須太擔心石油庫存問題。佢又提及，即使市場再Price in地緣政治衝突，但由於油價穩定會逐步利好通脹及金融市場，所以道指昨晚可以收高。 William又話，由於依家受美國加息預期升溫﹑美伊戰事拉鋸、大型IPO融資活動等夾擊，而且係負面消息居多，所以好難要求股市只升不跌，佢又估計，美股係世界盃期間成交將會縮減，而指數會係高位整固橫行一段時間，表現會較為「牛皮」。 |
|
| 盧志威 |
2026-06-03T10:35 |
英偉達(Nvidia)創辦人黃仁勳施展「點石成金」魔法，佢點名美國晶片製造商Marvell可以成為下一家萬億企業，刺激係美國上市慨Marvell股價昨晚(2日)狂飆逾32%，市值已突破2500億美元，市盈率(PE)飆升至193倍，預測PE則約72倍，呢個「預言」係咪會成真？ 泓瀚資本董事盧志威指，半導體市場慨存儲問題仍可以透過產能解決，但樽頸位逐漸轉移至連接及通訊慨技術層面，係有龐大資料需要快速傳輸慨時代下，市場都傾向搵一些可以幫手解決問題慨公司，將成為市場下一個投資焦點。 William又話，雖然未必下季就反映到，但過去半年，半導體板塊走勢好瘋狂，不論存儲或通訊相關股，概念一旦爆發，股價升幅就可以好誇張，所以有資金選擇提早落注都合理。佢建議，投資者揀股時，最好選擇一些概念處於初期、估值唔係太離譜慨股份。 |
|
| 盧志威 |
2026-05-27T11:12 |
美股太空及衛星相關股昨晚(26日)齊「升空」，Redwire、AST Space、MobileFirefly等勁升10%至30%，主要係受惠於SpaceX IPO效應，太空概念股係咪一個值得做長線部署慨板塊？ 泓瀚資本董事盧志威指，如果用一個長線角度睇，就要視乎投資者信唔信太空經濟會逐步興起，因為用任何估值去計SpaceX都係好貴，但對佢比公司可以產生慨野，2萬億美元慨估值又好似唔係太貴，所以都係視乎用咩角度去睇呢件事，佢認為，因為SpaceX上市初期貨唔多，加上呢隻股份一定會納入指數，上市之後再炒多轉都OK，但呢件事係由資金推動，但亦要從實際業務去睇。 William又話，如果係人工智能(AI)加太空概念咁炒，估計要等AI巨無霸上埋市，熱度先會降溫，又預期暑假仍會繼續熱炒。 |
|
| 盧志威 |
2026-05-20T11:10 |
英偉達(Nvidia)將會係美股今晚(20日)收市後派季度成績表，呢份業績有咩要留意？點評估放榜後股價走勢？近日人工智能(AI)及半導體相關股獲利壓力唔細，而資金就流向防守股，其中，可口可樂(Coca-Cola)股價破頂，更連升7個交易日，股價已突破81美元。港股方面，明星AI股都跟隨外圍回調，係咪大型科技股始終較穩陣？ 泓瀚資本董事盧志威指，三星電子(Samsung Electornics)工會明日(21日)開始大罷工，一定對整個半導體產業帶來衝擊，令相關股份出現回套，不過，今次大罷工屬於人為因素，估計情況仍然可控。 Nvidia股價今年都升左唔少，最新已突破220美元，創新高，今晚出爐慨季績要留意定單數量及新產品有咩進展，佢估計，Nvidia業績問題唔大，主要留意業績指引。 港股方面，William話，市場似乎對港股新興大模型相關股熱情減退，現時大型科技股如騰訊控股(00700)及阿里巴巴(09988)估值算平，若估值調升，可以博10%至20%升幅。 |
|
| 盧志威 |
2026-05-13T10:27 |
美國晶片及半導體股昨晚(12日)普遍成拋售對象，拖累費城半導體指數(SOX)自歷史高位回落，一度急挫近7%，其後跌幅收窄，收市跌逾3%，部分晶片股重挫，其中，高通(Qualcomm)瀉逾10%，英特爾(Intel)亦挫近7%，而美國10年期債就升至4.4厘，呢些因素再結合超級周期，點分析依家慨情況？ 泓瀚資本董事盧志威認為，依家只係一個短期波動，現時呢個超級周期慨動力係來自資金，但市場係咪有堅定慨投資意志及財力都係未知之數。 美國10年期債息方面，William話依家約4.4厘，升左唔夠1厘，上升速度唔算急，所以唔會對金融市場帶黎太大影響，但佢提醒，一旦10年期債息升至5厘或以上，投資者就要小心，到時要留意對市場帶黎慨影響。 |
|
| 盧志威 |
2026-05-06T11:09 |
美股近排強勢，記憶體3大龍頭之一美光科技(Micron)，股價更衝破600美元，連帶向企業提供SSD或HDD數據儲存慨SanDisk、西部數據(Western Digital)都好強勢。早前，高盛指出，記憶體價格係4月按年錄得倍數升幅，雖然部分投資者會Strong Hold，但股價升到冇頂咁，投資者好難搵到靚位買貨，呢個趨勢會持續幾耐？ 泓瀚資本董事盧志威表示，如果睇返業績，好多科企巨無霸仍將資金投放係新硬件或人工智能(AI)相關慨伺服器、晶片等，擬發展AI相關應用產品，係科企願意泵本下，投資者依家都估緊呢些錢會使係邊個範疇。 佢續指，科企慨使錢速度冇慢落黎，例如記憶體已供不應求，已經唔止掃GPU(圖形處理器)/CPU(中央處理器)，而係乜都買，係呢個浪潮下，唔少企業都有巨大價值重估空間，佢估計，呢個周期最少去到明年或2028年。 |
|
| 盧志威 |
2026-04-29T10:44 |
人工智能(AI)相關股出現疲態，費城半導體指數(SOX)昨晚(28日)一度挫逾5%，市傳OpenAI業務未達標，未來或冇錢畀已簽慨數據中心合約費，呢個消息係咪一個好大警號，AI慨巨額投資幾時先可以回本？ 泓瀚資本董事盧志威指，OpenAI呢個消息都幾令人震驚，令成個硬件類板塊股份出現大調整，有合作慨甲骨文(Oracle)、CoreWeave股價都要跌，但之後升返上去又令人有些意外，佢相信，就算對OpenAI慨需求下跌，但其他方面慨增長都可以抵銷返。 William又話，大型科企季績會對美股後市有幫助，但資本開支一定要夠高，Google本身有「內循環」可以自用，但OpenAI就做唔到，雖然會擔心回唔到本，但亦唔需要太恐慌。 美國科企季績方面，William表示，較睇淡硬件類公司業績。 |
|
| 盧志威 |
2026-04-22T10:31 |
美國總統特朗普(Donald Trump)係美伊停火期「死線」倒數前，宣布延長停火期，市場憂慮中東局勢前景，美股3大指數昨晚(21日)全線低收，而油價係消息公布前已偷步抽升，因為知道副總統萬斯(J.D.Vance)已經取消左去巴基斯坦慨行程，倫敦布蘭特期油一度迫近每桶100美元。雖然延長停火期，但美國繼續封鎖伊朗港口，伊朗就話必要時會用武力打破美國封鎖，點睇局勢發展及對金融市場影響？ 泓瀚資本董事盧志威指，市場開始對呢些消息冇乜反應，或者習慣左，以美股為例，以往驚開火個市就跌，但依家一邊談判一邊封鎖，已達到經濟制裁及物質封鎖慨目標，而市場亦收貨。 佢又估計，停火期未來有機會不斷延長，而市場亦已經消化左呢個消息，預期油價暫時都會企係100美元水平，因為需時消息相關影響。William又認為，美股其實已經開始唔睇呢件事，相信美伊戰事會逐漸走出股市視線及淡化。 |
|
| 盧志威 |
2026-04-15T11:49 |
中東戰事持續，投資者繼續重點關注霍爾木茲海峽(Strait of Hormuz)情況，美國中央司令部封鎖霍爾木茲海峽後，有消息指，頭24小時冇任何船隻通過，其後就有6艘商船按美軍指示順利通過海峽。此外，據《華爾街日報》報道，有20艘船成功通過海峽。呢些消息點影響金融市場？ 泓瀚資本董事盧志威表示，投資者可以留意美伊雙方有咩動作，例如伊朗慨核心係要將霍爾木茲海峽作為談判籌碼，要求非伊朗慨船隻畀左「買路錢」先獲放行，美國慨核心要係禁止一些同伊朗夾過慨國家船隻通過，雙方都有各自慨盤算及要求。佢又指，亦要留意有冇船隻肯冒險，博唔會被攻擊，直接通過海峽。 William認為，其實唔可能完全冇船隻可以通過海峽，只係依家風險高左，唔係好多人願意去博。 |
|
| 盧志威 |
2026-04-08T11:00 |
伊朗局勢係長假結束後傳黎好消息，美國及伊朗同意停火2周進行談判，期間所有船隻都可以安全通過霍爾木茲海峽(Strait of Hormuz)，戰事係咪已去到尾聲？消息一出，油價應聲插水，落返每桶100美元樓下，油價未來會點行？ 泓瀚資本董事盧志威認為，暫時停火係一個好開始，亦可以紓緩油價升壓，佢估計，2星期後美伊談判或會再延長，又認為戰事發展趨向正面。油價方面，係正常供求下，價格應介乎60至80美元，所以未來慢慢下跌都係合理。 霍爾木茲海峽通航問題，William認為唔會成為談判障礙，因為美國是石油出口國，要買油慨國家船隻才需要通過海峽，所以就算收「買路錢」都對美國影響唔大。 美股方面，William就話，大市應該已經觸底，加上美伊戰爭似乎已近尾聲，市場亦重新關注返企業基本因素。 |
|
| 盧志威 |
2026-04-01T11:29 |
回顧今年第1季，先有人工智能(AI)顛覆傳統軟件行業，後有金屬市場爆發私募信貸危機(private credit crisis)，展望第2季，市場有咩要特別留意？ 例如留意金融股撥備？軟件即服務(SaaS)公司訂閱？ 泓瀚資本董事盧志威指，軟件行業方面，需視乎AI出現對軟件慨影響程度，呢方面可以留意公司業績、數據及展望，例如靠勞動力密集慨軟件公司，以前係「堆人力」，但日後需變做「堆算力」，加上算力成本較低，變相呢類公司門檻降低，競爭力亦會變低，但值得留意係，已掌握用戶人口或有IP保護慨軟件公司，變相成為一個機遇，所以睇業績時要同其他軟件股分開睇。 私人信貸方面，William指，主要分為騙局及非騙局兩種，前者如同一資產多次抵押等信貸騙局，其實已經冇得救，不過，隨住3月伊朗戰事開始，呢些表現較差、需要殺倉慨私募信貸應該係當時就清曬，所以William認為，只要唔係騙局，私募信貸市場情況都唔會太差，可以有待觀察。 |
|
| 盧志威 |
2026-03-25T10:58 |
美國總統特朗普(Donald Trump)最新指，伊朗希望就停火達成協議，其後有以色列傳媒報道，美國正尋求停火1個月，並列出10幾項條件，但美股3大指數昨晚(24日)都要低收。美國科技股方面，軟件股昨晚又林過，原因係市傳亞馬遜(Amazon)旗下雲計算部門AWS，正開發一種人工智能代理(AI Agent)，目的係取代部分部門慨職能，消息一出即震散軟件股。美國科技股係開戰前已經跑輸傳統股，依家應唔應該入手呢類股份？ 泓瀚資本董事盧志威認為，其實每次市場有全新AI功能推出，就會成為投資者沽軟件股慨誘因，由於AI會重塑生產成本及運作流程，過程中必定涉及裁員，並透過AI功能簡化後台降本生利，即使企業將流程改為自動化，重塑過程複雜，但企業仍會照做，務求令成本降到最低。 另一方面，過往唔少軟件公司都係靠企業定單搵食，當被AI進一步取代時，市場認為呢個情況會不利軟作公司，所以就會沽貨離場。 其他科技股方面，佢直言唔太睇好微軟(Mircosoft)前景，市場需要考慮及反思未來仲需唔需要App及作業系統，同埋AI係咪已經成作業系統等，呢些都會影響公司未來發展，不過，現時未去到咁極端慨情況，所以Mircosoft股價短期唔使睇得太悲觀。 港股方面，William認為，雖然AI轉型仍處於摸索階段，但投資者仍可考慮趁近日一些穩定慨大型科技股，包括阿里巴巴(09988)及騰訊控股(00700)股價回落逐步吸納。 |
|
| 盧志威 |
2026-03-18T11:01 |
外電報道，內地當局近期擬加強對紅籌公司來港上市的監管審查，例如將註冊地由海外轉為中國內地，以防資本外流，加上中美元首峰會好大機會推遲，怎麼看港股後市？ 泓瀚資本董事盧志威指，因為太多公司來港上市，所以近期才會出現這些關於首次公開招股(IPO)的措施，值得留意是，因為現在有太多項目，中證監不怕沒有項目上市才會加高門檻，進行嚴格篩選，對於港交所(00388)而言，這是一個利淡因素，很多公司因此要重新排隊輪侯。 整體而言，Ｗilliam認為這件事影響暫時可控，但近期熾熱的市況或要冷卻一段時間。 |
|
| 盧志威 |
2026-03-11T10:35 |
七國集團(G7)周一(9日)責成國際能源署(IEA)籌備釋放緊急石油儲備方案，美國能源部長Chris Wright昨晚(10日)亦係社交平台發文，指美軍協助1艘油輪成功通過霍爾木茲海峽(Strait of Hormuz)，兩單消息令油價連續兩日著顯回落，加上市場憧憬美以伊戰事好快結束，油價短期係咪都好難上返每桶100美元？ 泓瀚資本董事盧志威指，中東局勢已開始回穩，美以伊戰事開打時，油價由約60美元至70美元，衝上至120美元水平，最新回落至80美元水平，大部分升幅已經蒸發左，除非短期內出現突發消息，例如油輪受襲，否則，油價都好難炒返上100美元。 William續指，依家油價只係回復至穩定狀態，短期而言，估計油價會企穩係80美元水平，甚至進一步落至70美元水平。 |
|
| 盧志威 |
2026-03-04T10:29 |
美以伊戰事已踏入第4日，戰火愈燒愈烈，但睇返2022年慨俄烏戰事、2014年伊斯蘭國攻打伊拉克北部等戰事慨數據，雖然遇上重大地緣政治衝突，但美股一般都「消化」到呢些事件帶黎慨衝擊，整體仍可錄得正回報。此外，而當重大地緣政治事件爆發6個月後，標指平均回升約9%，其實依家係咪一個趁低撈貨等升慨契機？ 泓瀚資本董事盧志威指，每次爆發地緣政治衝突，美股一般跌約10%至20%，但投資者應該等局勢開始好轉，先開始入貨，值得留意係，其實去到最後，地緣政治衝突都唔會對市場造成好大影響，反而基本因素慨影響更大，例如人工智能(AI)等，William又話，唔少企業慨股價已經係高位回調約10%，甚至更多，投資者可以吼位買貨。 |
|
| 盧志威 |
2026-02-25T11:02 |
Anthropic宣布推出新人工智能(AI)工具，並同多家金融機構、企業軟件公司，聯手開發唔同場景應用慨工具，消息刺激近期重挫慨軟件股反彈，值得留意係，其實今次同集團旗下慨法務AI工具係同一樣野，點解市場反應又冇咁誇張？ 泓瀚資本董事盧志威指，對軟件公司黎講，今次主要都係一個合作模式，而唔係要取代，市場就覺得岩聽些及安心，一開始時軟件股係畀基本因推低，如果繼續行代工模式，程序員會首先被取代。 William又話，如果可以多於代工，例如有IP、網絡安全機制等，相信軟件股之後唔會好似依家咁被一窩蜂拋售，可以回復至冷靜分化慨情況，佢相信，呢一波唔係金融海嘯，而係產業轉移，客戶慢慢轉走，令企業價值及前景有變，建議投資者要小心分清利害。 |
|
| 盧志威 |
2026-02-11T11:02 |
美國昨日(10日)公布去年12月零銷售數據，幾乎同去年11月持平，拖累零售股之餘，美元亦一齊跌，整體大市都冇乜方向，美國今日(11日)會公布重磅非農數據，數據出爐前係咪應該先睇定些，唔使心急做部署？ 泓瀚資本董事盧志威指，暫時的確唔適宜做太多部署，美國近期慨經濟數據都比較弱，如果唔係同人工智能(AI)相關慨股份，基本上都見唔到有太多資金流入，另一方面，科技公司亦開始裁員，令大市處於一個兩極化狀態。 William又話，科技股因為升得太勁，導致係現水平較波動，雖然美國經濟唔好、企業增長慢，但仍有唔少投資者買入傳統股，但呢個趨勢要持續，前提係要有穩定增長，佢又提醒，一些業績唔好慨傳統股，其實都有向下風險。 |
|
| 盧志威 |
2026-02-04T10:47 |
美國晶片巨企AMD出左上季業績，純利按年勁升2倍至約15億美元，不過，股價昨晚(3日)係美股收市後延長交易時段大跌近8%，情況同之前慨英特爾(Intel)一樣，到底係咩原因？ 潤淼資產管理董事盧志威指，AMD業績係冇問題，但市場依家普遍對大型科技股睇得遠些，而近期慨消息都對硬件類股份不利，例如英偉達(Nvidia)本來最多向OpenAI投資1000億美元，但之後開始策略性縮水。 William又話，呢些消息令本身推動緊資本開支慨公司都會手緊左，依家市場慨樂觀情緒未必維持到好耐，佢認為，硬件類股份除左Intel可以睇好外，其他幾隻都有下跌風險。 |
|
| 盧志威 |
2026-01-28T10:31 |
美國總統特朗普(Donald Trump)最新慨言論似乎支持弱美元，拖累美匯指數急挫，但佢首個任期時係支撐美元，特朗普轉軑係咪反映弱美元對美國黎講係好處多過壞處？ 泓瀚資本董事盧志威認為，特朗普慨態度唔係太負面，而潛台詞係美元唔係重點，因為對佢黎講美股表現更重要，例如美軍突襲委內瑞拉都係揀周末出手，就係唔想影響金融市場表現，佢慨解讀係，特朗普意思係依家美元情況冇乜特別，唔需要特別去處理。 William續指，由於美元弱會利好股市，有助吸引資金流入美股，而特朗普就係因為呢個原因，唔太關心美元下跌。 |
|
| 盧志威 |
2026-01-21T10:50 |
美歐緊張關係升溫，貿易戰不知道會否開打，同時中美貿易又有消息傳出，美國總統特朗普(Donald Trump)4月訪華前，兩國或會進行新一輪貿易談判，當美歐關係緊張，是否能期望中美有更多談判空間？ 泓瀚資本董事盧志威指，環球貿易此消彼長，現在狀況下各樣談判不斷，無論中歐或中美也好，但談判並不代表甚麼，除非能成功簽上協議、達成共識，對大市才會有幫助，可留意未來中美之間會否有緩和跡象。 William又話，無論如何現時市場情緒都較差，避險情緒升溫，要看中長線才會有機會，假設美國與格陵蘭、委內瑞拉維持現況，但關稅、聯儲局主席等內部問題仍會影響股市以至整個金融市場，相信未來還要發酵一段時間，令目前市場投資取向保守。 |
|
| 盧志威 |
2026-01-14T10:55 |
美國最新通脹數據出爐，去年12月消費物價指數(CPI)按年升2.7%，核心CPI升2.6%，低過預期，但市場就認為最新通脹數據不足以令聯儲局近期再減息，1月份維持息率不變機會升至98%，如何評估息口未來走勢？對股市又有什麼影響？ 泓瀚資本董事盧志威指，減息大方向大致不變，但速度就比較難以定奪，除了看經濟數據之外，還有聯儲局主席新人選、鮑威爾(Jerome Powell)自己本身的官司等因素影響，市場認為減息步伐比預期慢，對股市助力少。 William又話，美股三大指數變動不是太大，主要留意返人工智能(AI)、電芯、電力相關需求，個引伸動力比較大，現時大市勢頭好，2026開年以來，存儲類相關概念股都升得多，反映投資者都在尋找新概念，資金偏向造好，但要買岩概念，回報先會高。 |
|
| 盧志威 |
2026-01-07T11:31 |
地緣緊張局勢一波未平一波又起，繼突襲委內瑞拉生擒總統馬杜羅(Nicolas Maduro)夫婦後，白宮公開話，總統特朗普(Donald Trump)指唔排除使用武力奪取格陵蘭。係地緣局勢動盪下，貴金屬慨避險功能顯得更重要，摩根士丹利估計，金價係2026年第4季有望升至每盎司4800美元，黃金及銀都係熱門產品，投資者應該點揀？ 泓瀚資本董事盧志威指，地緣政治不穩一定利好貴金屬價格，又認為黃金比銀更值得投資，由於銀價係2025年已升左逾1.4倍，累積太大升幅，今年再大升慨機會唔大，而黃金慨特性更能應對突發事件，所以黃金比銀更可取。 |
|
| 盧志威 |
2025-12-24T10:20 |
貴金屬價格今年升得好靚，金銀銅價格齊破頂，銅破每噸12000美元， 銀價升穿每盎司70美元，金價就衝上4500美元樓上，而白金價格都終於破頂，首度突破2300美元，貴金屬價格明年會點走？ 泓瀚資本董事盧志威指，貴金屬價格上升動力主因來自美國減息，另一股動力就來自美元下跌，令資金湧入金銀市場。佢估計，明年全球央行都以減息為主，金銀價格好大機會向上，建議投資者可適量配置。 William續指，金價明年要升上5000美元難度唔大，又估計至少明年初減息周期都唔會逆轉，貴金屬牛市仍可持續。 |
|
| 盧志威 |
2025-12-17T10:23 |
股價之前大落後慨Tesla昨晚(16日)破頂，因為Tesla行政總裁馬斯克(Elon Musk)證實正在測試無人駕駛的士Robotaxi，有分析估計，集團市值明年底有機會升至3萬億美元。不過，競爭對手如Google母公司Alphabet旗下Waymo及Uber，都開始係唔同區域做測試，其實Tesla呢項技術冇好大領先優勢，分析員對Tesla慨市值預測係咪太樂觀？ 泓瀚資本董事盧志威指，全球都加快無人駕駛商業化應用，估計明年會係爆發點，Tesla本身有生態鏈優勢，可以自行生產汽車，加上軟件等配合，都有助扭轉現時慨銷售困境。 William又話，雖然Tesla股價今年表現唔突出，但估計年底及明年有機會繼續追落後。 |
|
| 盧志威 |
2025-12-10T10:09 |
美國總統特朗普(Donald Trump)就英偉達(Nvidia)對華出口H200人工智能 (AI) 晶片「開綠燈」，但美國晶片股昨晚(9日)反應唔大，其中，「主角」Nvidia收市要跌，係咪同市傳中國擬限制企業用H200有關？ 泓瀚資本董事盧志威指，要從兩方面去分析，首先係Nvidia股價前一晚已偷步升左上去，昨晚股價跌明顯同美國放行，但中國未必鼓勵企業用有關，而H200亦唔係最高端晶片，其次係面對華為、百度集團(09888)等國內強勁競爭對手，而中央亦大力培育國產晶片品牌。 William又認為，下一步要留意有邊些買家會訂購H200，始終中國政府似乎唔太鼓勵採用。 |
|
| 盧志威 |
2025-12-03T09:49 |
Bitcoin價格昨晚(2日)勁彈，錄得4月以黎最大升幅，上返92000美元水平，超跌反彈唔出奇，但咁強勢反彈，再睇埋消息面及技術走勢，Bitcoin價格走勢係咪有望好轉？ 泓瀚資本董事盧志威指，包括Bitcoin在內慨加密貨幣，10月開始都要跌，而且跌幅顯著，原因包括調倉及殺倉，以及涉及加密幣交易慨人被控告， 而呢些人士持有慨加密幣就被充公或扣住，呢兩個因素加埋就會影響整體加密幣走勢。 William又話，依家保值類資產仍處於有利位置，估計加密幣應會係現水平企穩，但要升上去仍需時，以Bitcoin為例，單日可以升5%至8%，雖然依家未有大幅推高價格因素，但由於價平，所以都會有投資者趁機買入。 |
|
| 盧志威 |
2025-11-26T11:34 |
市傳雲端服務供應商Meta洽購Google研發的專用加速器(ASIC)晶片，母企Alphabet股價昨日(26日)一度升逾3%，高見328.67元，Google未來係咪會成為市場美股持倉慨核心股？ 泓瀚資本董事盧志威指，Google有好強大慨用戶基礎，技術同OpenAI差唔多，某些部分甚至比OpenAI做得好，雖然系統更新之後或會弱過OpenAI，但兩者仍可以係同一水平競爭。 William續指，相比其他晶片商，Google有張量處理單元(TPU)，加上係首家全產業鏈都做到慨人工智能(AI)公司，由於有太多利好因素，相信Google絕對係美股持倉慨「明星股」。 |
|
| 盧志威 |
2025-11-12T12:18 |
雖然港股昨日(11日)動力麻麻，但恆生指數埋單仍有得升，連升兩個交易日，主要由傳統板塊領軍，包括內銀及內險股，但成交方就唔係太配合，全日成交僅逾2000億元，點睇港股後市？投資者應該點部署？ 泓瀚資本董事盧志威認為，新股炒風已過，加上減息潮殺到，建議投資者轉戰傳統股，值得留意係，內銀係靠機構保險類資金做長期配置，所以當市況唔明朗時，只要防守性股份、內銀股或大型股仍keep住派息，投資者就可以考慮買入。 |
|
| 盧志威 |
2025-11-05T11:40 |
港股近期進一步轉弱，昨日(4日)阿里巴巴(09988)股價跌穿160元，下試10月中低位，見資金轉為流向油股、內銀股等傳統股，科技股是否無力再帶動大市？ 泓瀚資本董事盧志威指，過去是靠阿里及騰訊控股(00700)等科技股支撐大市，但從形勢上看，由年初至今科技股熱炒期已過，科技股開始有調整跡象，料暫時無力再支撐大市。 William續指，港股處於橫行整固階段，建議投資者更改配置，將高增長板塊換作防守型板塊。 |
|
| 盧志威 |
2025-10-22T15:14 |
金價及銀價昨天(21日)突然閃崩，但似乎搵唔到「元兇」，市場其中幾個揣測分別係獲利盤、美元轉強及避險需求減弱等，更合理慨估計可能係金價已出現泡沫，投資者依家應該點部署？ 泓瀚資本董事盧志威指，雖然金價自高位回落，但唔建議依家買入，央行不斷買入黃金係擔心美元貶值。他又指，投資者或預期回落後再發力向上，但他認為，金價只係跌左1日，由於依家好難評估箇中風險，所以唔建議依家買入。 William又建議，若投資者想投資避險資產，可以考慮買長債。 |
|
| 盧志威 |
2025-10-15T10:58 |
中美關係持續緊張，美國總統特朗普(Donald Trump)最新指，會因應中國故意唔買美國大豆，考慮限制中美食用油交易。不過，今次慨威脅相對上周慨言論溫和，中美係咪繼續係亞太經合組織(APEC)峰會舉行前，為兩國元首可能會面儲更多談判籌碼？ 潤淼資產管理董事盧志威指，依家投資者似乎都傾向等中美會面有成果，先再做部署，所以投資市場氣氛暫時比較平靜，佢認為，雖然近期雙方都各自出招，但中美關係已逐步降溫，並傾向穩定。 William又話，雙方搞咁多「大龍鳳」之後又和好，反映中美其實仍有偈傾，現階段只係繼續拳來腳往，直至達成某些符合兩國利益慨協議先會停手。 |
|
| 盧志威 |
2025-10-08T11:13 |
金價今年表現強勢，更不斷破頂，現貨金價繼周一(6日)衝破每盎司3900美元，昨日(7日)更上到4000美元，而多家投行繼續睇好金價，高盛最新睇4900美元，投資者係咪可以繼續買金或金礦股，還是有其他更好慨選擇？ 資產管理董事盧志威指，黃金及港美股市慨金礦股都係較好慨選擇，另一項值得留意慨投資係銅，除左人工智能(AI)帶黎慨需求利好外，今年發生多宗銅礦事故，例如全球第2大銅礦印尼格拉斯伯格礦發生泥流事故，導致銅供應減少，帶動銅價開始發力追上黎，佢相信，未來金價及銅價升勢好大機會更凌厲。 |
|
| 盧志威 |
2025-09-17T11:40 |
美國聯儲局議息前，國際金價又破頂，突破每盎司3700美元。匯市方面，美匯指數則失守97水平，歐元衝上4年高位，美元兌日圓就上返146水平。債市方面，債券價格向上，美國10年期債息落返4厘水平。美國議息結果出爐後，商品價格及匯市會唔會係「升慨升更多，跌慨跌更深」？ 資產管理董事盧志威指，現時有2個動力係度拉扯緊，首先係價格升得太急，令市場情緒太樂觀，一旦轉向負面就會令市場急速波動，但依家債息向下，長遠係向好，因為資金會搵野做配置，例如資金流入股市，或由長債變短債，就會產生換馬需求，William又估計，換馬資金長線都係流入股市機會較大。 |
|
| 盧志威 |
2025-09-11T11:47 |
受惠於雲端業務表現亮麗，美國科技巨企甲骨文(Oracle)股價昨晚(10日)一度飆約40%，收市仍升逾35%，創辦人埃利森(Larry Elison)身家水漲船高，身家更超越Tesla創辦人馬斯克(Elon Musk)，收登上世界首富。企業繼續加碼投資人工智能(AI)，加上雲服務需求急增，Oracle股價係咪未升完？ 潤淼資產管理董事盧志威認為，Oracle同OpenAI簽下呢張3000億美元算力合約，對前者有好大利好效果，Oracle專門幫AI公司做雲服務慨「護城河」去定位，加上產品成本比現時主流用緊慨商業雲低，令公司可以突圍而出。雖然Oracle股價近日狂飆，但相信仍有唔少上升空間。 至於Oracle係咪太集中係OpenAI呢個大客身上，William就指，如果OpenAI對同Oracle合作感到滿意，未來可以吸引更多公司同Oracle合作，所以唔使擔心呢個問題。 |
|
| 盧志威 |
2025-09-03T11:39 |
美國法院係當地時間周二(2日)裁定，Alphabet旗下Google毋須出售瀏覽器Chrome，亦唔需要分拆Android系統，但須分享搜尋數據，受消息刺激，Alphabet股價係昨晚美股收市後延長交易時段飆近7%，近期美國巨無霸科企股價表現較弱，呢單消息可唔可以扭轉科技股弱勢？ 潤淼資產管理董事盧志威指，Google唔使賣走Chrome，但要同競爭對手分享搜尋數據，變相令對手可以得到呢些數據協助研發及發展，例如OpenAI及Perplexity等人工智能(AI)企業。佢又話，蘋果公司(Apple Inc.)都可以受惠，所以呢單消息絕對利好科技股，甚至係一個長期利好因素。 William續指，美國科技股近期弱勢係因為之前升得多，市場要獲利回套，但短線仍有沽壓，所以科技股暫時仍未能轉勢，佢建議現階段入場慨投資者，揀中長期仍有增長慨股份比較好。 |
|
| 盧志威 |
2025-08-27T12:18 |
聯儲局理事庫克(Lisa Cook)被美國總統特朗普(Donald Trump)指控，涉嫌係按揭貸款文件中作出虛假陳述，有呃樓按貸款之嫌，特朗普日前宣布解除庫克職務，即日生效，庫克昨日(26日)發聲明反擊，直指特朗普冇權炒佢，係法律上冇任何理據，表明唔會辭職，會繼續履行職責，佢慨律師就話，會採取一切必要措施阻止特朗普慨非法行動。呢件事會帶黎咩影響？若特朗普係聯儲局慨控制力更大，減息係咪變得更易？ 潤淼資產管理董事盧志威指，特朗普唔可能單憑一份文作就試圖炒庫克，由於當中涉及慨法律程序繁複，佢認為，事件有可能隨時間慢慢被掉淡。佢又指，由於9月好大機會減息，所以事情唔會繼續發酵，而市場亦唔會有太大反應。 William續指，如果特朗普換更多「自己人」入聯儲局，美國減息頻率及幅度一定會增加，但呢些部署係需要唔少時間。 |
|
| 盧志威 |
2025-08-13T12:03 |
港元再觸及弱方兌換保證，金融管理局再出手接錢，係紐約交易時段再買入逾70億港元，不過，人仔走強，其中，離岸人仔升穿7.18水平，近日高盛都睇好人仔走勢，估計有機會見7算。港股今早(13日)大升，恆生指數升逾400點，人仔強勢係咪港股後市一大推動力？ 資產管理董事盧志威指，人仔強勢一定會利好港股，雖然本港銀行同業拆息(HIBOR)近排升左少少，但走資幅度唔算升得多，呢個情況都會帶黎利好。 William又話，人仔升或美元跌，會利好港股或人民幣資產，所以港股會出現一浸追落後慨動力都唔出奇。 |
|
| 盧志威 |
2025-08-06T11:15 |
美國總統特朗普(Donald Trump)預告將會係1星期內，公布進口藥物及晶片關稅稅率，其中，藥物稅率有機會由最初較低水平，最終大增至250%，目的係迫使藥物係美國本土生產，措施對藥股及生物科技股造成幾大衝擊？ 潤淼資產管理董事盧志威指，美國藥價及醫療費好貴，要解決呢個問題，除左當地藥廠要減價外，對外就要加關稅，但呢兩個做法都對美國藥股造成影響，暫時睇黎前景唔太樂觀，建議暫時避開美股慨藥股。 至於在港上市慨生物科技股，William就話，措施對生物科技股及藥股有長遠負面影響，若措施令整體市場收縮，估值或要折讓，估計相關股份短期會出現回調。 |
|
| 盧志威 |
2025-07-30T13:03 |
美股「科技7雄」(Magnificent 7)繼續派成績表，今晚(30日)會輪到微軟(Microsoft)及Meta，而市場對呢兩份成績表期望好高，其中，最關注微軟Azure雲端平台慨人工智能(AI)貢獻增長幅度，Meta方面，市場聚焦集團大規模建設AI數據中心，以及高薪搶AI人才對毛利率慨影響，呢兩份成績表對美股有咩影響？ 潤淼資產管理董事盧志威指，近期出爐慨美國企業業績的確麻麻，所以美股3大指數昨晚都受到拖累，佢建議投資者分散投資，雖然科技巨企整體形勢慢慢向上，但美股依家已升至高位，由於市場期望好高，一旦業績有少少瑕疵，個別公司股價跌5%至10%都唔出奇。 |
|
| 盧志威 |
2025-07-23T10:01 |
美股今晚(23日)收市後就輪到Google母公司Alphabet，同埋Tesla派季度成績表，其中，Alphabet股價係放榜前已連升10個交易日，累升約10%，升幅睇落唔算大，但對一家萬億美元市值慨科企黎講，呢個升幅都唔細。Alphabet季績值唔值得憧憬，Google Cloud增長係咪亮點？市場亦關注集團人工智能(AI)模型Gemini發展。 潤淼資產管理董事盧志威估計，Alphabet業績應該唔差，雖然Google Search肯定會走下坡，亦拖低左集團估值，反而變成預期之內，要留意Google service及Google Cloud收入，會唔會因為出左AI而好左，所以整體表現應該係向好。 |
|
| 盧志威 |
2025-07-09T11:08 |
恆基地產(00012)計劃發行80億元有擔保可換股債券(CB)，年息0.5厘，集資主要用作再融資，換股價每股36元，比上日(8日)收市價有近27%溢價，通告指周二已與認購人簽署協議，換股價能否反映投資者對恆地，甚至本地樓市前景重拾信心？ 潤淼資產管理董事盧志威指，地產股能夠融資已經可以跑出，發CB融資成本低，雖然80億元數目不多，但可見有投資者撈底看好股價表現。雖然發CB令股價受壓，但長期會帶給市場信心，亦有利公司發展，因為不是所有地產商都有能力發CB。 |
|
| 盧志威 |
2025-07-02T12:03 |
港匯再觸及弱方保證，金融管理局唔夠一星期又再度入市，今早(2日)承接200億港元沽盤，其實港美息差大，係聯匯制度下都預左會引發套息交易，令港匯觸及7.85慨弱方兌換保證，金管局都要再出手，但呢個情況係半年結後明顯加劇，拆息係咪會大幅抽升？ 潤淼資產管理董事盧志威指，拆息走向係由市場決定，因為受資金進出影響，其中1個因素可能係郁到好多錢慨股息結算，另1個因素可能係之前要預備半年前慨首次公開招股(IPO)。 William續指，今年IPO集資金額大，有一批資金入黎抽IPO，但其實抽IPO都有季節性，通常係半年及全年尾段最旺。 佢補充，關鍵係港元流出量有幾大，雖然依家仲有新股排隊招股，但如果預備IPO慨因素消退，就會影響資金流。 |
|
| 盧志威 |
2025-06-25T10:59 |
美股今年以來跑輸歐洲股市及港股，3大指數及納指100僅錄得低至中單位數升幅，展望下半年，有冇機會發力追落後？投資者應該點部署？ 潤淼資產管理董事盧志威指，今年跑贏大市慨股份主要係半導體及科技股，反映當市場脫離危機後，投資者仍偏好創新科技產業，例如人工智能(AI)。佢又話，由於以伊戰事對AI產業鏈影響好細，因此，可以考慮做長線部署，並增加資產配置。 William續指，以伊戰事問題基本上已解決，所以油、金暫時唔值得再部署，至於落後慨板塊，例如受關稅影響慨消費股，表現相對其他板塊弱，雖然關稅問題轉趨明朗化，消費板塊增速亦加快，但由於不確定性仍大，所以只適合配合政策做短線部署博反彈。 |
|
| 盧志威 |
2025-06-18T12:06 |
據內媒報道，京東集團(09618)創始人劉強東指，集團要進軍酒店及旅遊業，又話今日(18日)會有公布，京東繼參與「外賣戰」後，依家又做埋酒店及旅遊預訂服務，對業界黎講「內捲」情況係咪會加劇？攜程集團(09961)係咪又多左一個對手？ 潤淼資產管理董事盧志威認同，又指京東做埋酒店及旅遊業，就係要用互聯網平台黎「捲」，將中間慨傭金點數向下推，所有人都冇錢賺，值得留意係，現階段大家只係想搶生意、流水及份額等，所以最終賺唔賺到錢係其次。 William又指，依家京東係對手或市場眼中，只係一個利用補貼去搶生意慨平台。 |
|