| 评论员 |
时间 |
内容 |
标签 |
| 陈伟聪 |
2026-04-09T10:46 |
美伊日前同意停战两周，停火期间船只可以安全通过霍尔木兹海峡(Strait of Hormuz)，市场乐观情绪急升温，美股3大指数昨晚(8日)狂飙，其中，道指收市劲升1384点，不过，油价暴跌，纽约期油一度急泻逾20%。美股业绩期快将展开，其中，美国能源行业龙头埃克森美孚(ExxonMobil)预告，战事中断炼油业务将令收益损失4亿至8亿美元，点解喺油价高企下，反而不利油企？ 东亚证券高级投资策略师陈伟聪认为，埃克森喺卡塔尔嘅液化天然气设施受到破坏，要完全恢复及重新投产需时，当中会涉及额外成本，所以不利短期能源产出。佢续指，虽然集团第1季业绩因油价飙70%至近1倍而造好，但受油价降温、航运成本存在不确定性、企业未能及时大量供应能源等因素影响，能源企业喺第2及第3季仍要面对较大冲击，因此，战事推升油价，唔一定对能源企业及油股带来绝对正面影响。 Jason又话，油价急升对美国工业、制造业、交通运输行业嘅实际影响，会喺第2及3季陆续反映，至于其他板块受影响程度有几大，就要视乎停战时间先可以再判断。 |
|
| 陈伟聪 |
2026-04-01T16:40 |
美国总统特朗普(Donald Trump)最新暗示中东战事有机会好快结束，佢将会喺本港时间明日(2日)早上9时发表全国讲话，而伊朗嘅态度亦冇之前咁强硬，虽然未知特朗普明日嘅讲话内容，但美股昨晚(31日)已率先爆上，点睇美股昨晚呢个报复式反弹？ 东亚证券高级投资策略师陈伟聪认为，依家美伊双方都似乎妥协，停火及达成协议基础有正面进展，过去数周，市场因担心美伊局势发展，导致美股急挫及长期债息扯高，特朗普民望亦插水式下跌，喺呢个情况下，或会引发TACO交易。 Jason指出，仍然唔排除短期可能再有军事行动，但对市场嚟讲，战事喺未来4星期结束嘅机会较大，令市场风险胃纳有改善，科技股、增长型股份等估值亦有回落，如果市场真系炒停战，即时会有估值修复憧憬。 |
|
| 陈伟聪 |
2026-03-26T10:35 |
据报Tesla行政总裁马斯克(Elon Musk)旗下太空探索公司Space X最快这个星期向美国证交会(SFC)提交首次公开招股(IPO)申请，集资逾750亿美元，预计6月中上市，有望超越沙特阿美成为史上最大新股集资。上市前有它撑住美市，美股系唔系想跌都难? 东亚证券高级投资策略师陈伟聪指，战事仍存在不确定因素，但若单纯看Space X及人工智能(AI)相关业务最新估值1.75万亿美元，比两个月前大约1.25万亿至1.3万亿左右提升不少。而且这几个星期美股AI类股份出现一定回调。 Jason续指，若Space X能以更高估值上市，心理层面上对美股科技及AI等相关行业会有一定支持。他相信Space X这种股份独特而且罕有，认购反应都不会太差。他认为结合现在愈来愈高的估值，如果认购反应热烈，战事又无明显恶化，Space X上市会对美股带来一定支持。 |
|
| 陈伟聪 |
2026-03-12T10:58 |
美国总统特朗普(Donald Trump)输咗对等关税(Reciprocal Tariffs)官司后再出招，华府宣布针对16个主要贸易伙伴，启动新一轮301贸易调查，包括中欧日韩等，目的系铺路加新关税。此外，私募信贷市场危机持续升温，点睇呢两个不明朗因素带来嘅影响？ 东亚证券高级投资策略师陈伟聪认为，关税嘅实际影响已经唔大，无论透过301调查或向个别行业收税，根据条款税率都唔可能太辣，亦有时限性，再加上市场已预咗特朗普会再出手，所以唔会带嚟好大冲击。 Jason续指，私募信贷危机方面，佢认为要关注违约的风险。 |
|
| 陈伟聪 |
2026-02-12T10:17 |
美国非农就业数据昨晚(11日)出炉，新增就业人口13万，远高于市场预期嘅6.5万，数据一出，市场对减息时间嘅预测又再推迟，点评估联储局未来嘅减息时间？数据点影响美元走势？ 东亚证券高级投资策略师陈伟聪指，虽然非农数字远超预期，但就业数据仍比较分化，能源价格、油价跌势喘定，甚至出现轻微反弹，相信通胀要进一步向下或多或少会有阻力，短期要更进取咁减息，难度比之前更大。 Jason又估计，美国今年将会减息2至3次，同市场预期差唔多，但联储局减息空间会更大，预期最快6月会再出手，债市方面，佢认为市场对美元资产嘅担心“过咗龙”，相信美元中期会持续偏弱。 |
|
| 陈伟聪 |
2026-01-22T10:14 |
美欧贸易紧张关系不需1星期就有转机，美国总统特朗普(Donald Trump)与北约秘书长吕特(Mark Rutte)会晤后称，不会对欧洲八国加关税，不会以武力夺取格陵兰，这次TACO(Trump always chicken out)是否较市场预期快？转机是什么？ 东亚证券高级投资策略师陈伟聪指，美国内部及民调不支持用武力夺取格陵兰，加上，特朗普需要为共和党在年底中期大选争取选票，所以他在民意及党内议员压力下提早让步。 Jason又指，市场预期无论收取关税或动武，都会对市场产生较大影响，如之后股市继续有较大动荡，会损害美国经济，所以特朗普尽早让步，以稳定股市及美国经济。 他续称，美国只是想要格陵兰的稀土资源，依靠签订采矿协议或租用当地采矿权基本上就能达成，所以市场有即时反应及回升是预期之内。 |
|
| 陈伟聪 |
2025-12-31T10:10 |
环球股市陆续“收炉”，美股都进入最后倒数，经历3年牛市后，标指由唔够4000点，升到昨晚(30日)收市嘅6896点，累升逾72%，但仍有唔少大行睇好2026年表现，普遍预期标指可以升上8000点，点睇呢个预测？明年有冇潜在“黑天鹅”事件？ 东亚证券高级投资策略师陈伟聪指，展望2026年，标指上半年有机会见7500点，下半年就要留意美国总统特朗普(Donald Trump)喺中期大选前有咩动作，其中1个关键变数系中美关系。 Jason续指，“黑天鹅”事件方面，要留意个别人工智能(AI)公司高杠杆及融资问题，又提醒投资者要关注违约风险。 |
|
| 陈伟聪 |
2025-11-27T11:14 |
港股3大指数今年累计全部有得升，今日(27日)系期指结算日，恒生指数喺结算前后会点走？今年仲有约1个月就要“埋单计数”，点睇2025年余下时间嘅表现？ 东亚证券高级投资策略师陈伟聪估计，港股喺今年余下时间继续反覆整固，大跌机会唔大，恒生指数有机会落返逾24000点、25000点楼下，到时会系一个买货时机，相反，若夹上27000点水平，甚至可以升穿，短线就要小心。 Jason又话，相信要去到明年先会有一个较明确嘅方向，尤其要留意内地明年第1季重要会议、中美关系发展，都有机会成为大市重要催化剂。 |
|
| 陈伟聪 |
2025-11-13T11:21 |
美国总统特朗普(Donald Trump)快将签署法案正式结束政府停摆，期间由于政府长时间停摆，近期嘅市场分析都系依赖民间数据，冇咗官方数据会唔会影响联储局嘅决策？随着政府作复常，官方数据逐步出炉，市场对美国经济前景嘅忧虑会唔会加剧？ 东亚证券高级投资策略师陈伟聪指，由于短期内官方会出返10月停摆高峰期嘅经济数据，估计数值都会较差，加上11月且密歇根大学消费者信心指数跌至50.3，创新低，同埋预期第4季国内生产总值(GDP)将跌至1.5%，反映停摆影响美国市民消费及就业信心，但亦为联储局12月再减息提供条件，因此，就算经济短期差少少，但喺减息憧憬下，市道亦唔会太差。 Jason又估计，美国政府重启后，明年第1季经济数据将出现报复式增长。 |
|
| 陈伟聪 |
2025-10-09T12:02 |
汇丰控股(00005)建议私有化恒生银行(00011)，每股作价155元，较昨日(8日)收市价119元，有约30%溢价，按私有价计，恒生市帐率(PB)1.8倍，现时行业PB中位数仅约0.4倍，反映汇控出手非常阔绰，但30%溢价对呢家本地老字号银行嘅小股东嚟讲吸唔吸引？点睇今次私有化？ 东亚证券高级投资策略师陈伟聪指，作价相当进取，始终过去几年银行业面对唔少挑战，加上恒生股价过去几年都比较低迷，私有化后恒生PB达1.8倍，本地银行好难做到呢个水平，因此，出价算相当吸引，议案通过嘅机会都较大。 Jason又话，唔会对汇控未来喺香港嘅发展睇得太负面，若恒生解决唔到坏帐问题，一旦违约汇控都可能要出手，虽然汇丰银行同恒生同系，但或多或少会互相竞争，私有化后资源分配可以做得更好，不过，由于出价太高，今次私有化要动用过千亿元，市场原本预期汇控会回购股份，依家可能未必做到，所以短期会对汇控股价有负面影响。 |
|
| 陈伟聪 |
2025-09-25T11:33 |
美国科技巨企英伟达(Nvidia)继入股英特尔(Intel)后，再入股OpenAI，而OpenAI又跟甲骨文(Oracle)相互投资，市场忧虑呢啲科技巨企嘅“关系”外，亦担心出现人工智能(AI)泡沬，点睇呢啲互相投资入股嘅操作？ 东亚证券高级投资策略师陈伟聪认为，Nvidia跟以做晶片代工为主嘅Intel加强合作，对双方都有好处，首先对Intel喺AI晶片开发有帮助，其次系Nvidia可以喺美国本土搵到自家代工商。 Jason又话，虽然市场担心AI企业会随着竞争加剧互相“开战”，但暂时睇嚟，上述提及嘅科技巨企互相入股、投资都以合作为主，因此，暂时睇唔到呢啲龙头企业会出现恶性竞争。佢续指，相信市场估值时，呢啲科技巨企之间嘅战略性合作，会系考虑因素之一，而短期内亦会对股价有支持作用。 |
|
| 陈伟聪 |
2025-08-28T12:17 |
美国人工智能(AI)晶片“股王”英伟达(Nvidia)出咗第2季业绩，收入按年增长56%至逾467亿美元，纯利按年增长59%至逾264亿美元，好过预期。虽然期内冇向中国客户销售H20晶片，但对收入影响唔大。虽然集团预期今季可以向中国付运最多50亿美元H20晶片，但中美关系仍然紧张，系咪都唔可以忽视呢个问题？ 东亚证券高级投资策略师陈伟聪指，Nvidia声称未来有机会向中国销售H20晶片，但集团指引未完全反映到，可能公司对几时再向中国销售H20都存疑，就算美国总统特朗普(Donald Trump)“开绿灯”，但同中国推动晶片自给自足嘅方向背道而驰，所以中国未必会再依赖外国进口晶片，因此，呢方面嘅变数好大。 Jason又话，中国对高端晶片需求仍然好大，如果Nvidia未来可以向中国销售更强嘅Blackwell，就会成为Nvidia未来增长嘅关键。 |
|
| 陈伟聪 |
2025-08-14T11:08 |
市场呢几日着眼于美国总统特朗普(Donald Trump)新政，指有意向英伟达(Nvidia)及AMD征15%中国收入以换取晶片出口许可，亦传出佢有意扩展到其他行业，不过，美国国内就有声音指呢个做法违宪，消息对企业嚟讲系好定坏？政策最终会唔会成事？ 东亚证券高级投资策略师陈伟聪指，对公司而言可能系正面作用，特别对于科技股或晶片公司，佢哋可以保留到中国呢个较大嘅市场，继续向中国供应人工智能(AI)晶片等产品，所以喺收入上可以维持一个唔错嘅增长，当然部份业务可能要交15%税，但对Nvidia呢类公司嚟讲，未必会太介意呢个比例，但Jason就觉得，出口关税推到其他行业嘅机会未必咁大。 至于违宪方面，Jason话，过去特朗普都有一啲被怀疑系违宪嘅举动，最终都透过行政命令或者上诉去令到法院判决未必咁有效，所以都要继续观望。 |
|
| 陈伟聪 |
2025-07-24T11:42 |
继美日菲达成贸易协议后，市传美国及欧盟亦好快倾掂数，刺激美股昨晚(23日)大升，道指收市升逾500点，纳指及标指就双双破顶。据LSEG最新数据显示，分析师普遍预期，标指成分股第2季纯利按年增长7.5%，主要由市值高嘅科技股带动，公司业绩乐观，加上关税又陆续有好消息，美股系咪可以继续上冲？ 东亚证券高级投资策略师陈伟聪认为，关税拹议进展乐观，美国已经同东南亚、英国倾掂数，而美日嘅15%关税对美欧谈判有参考价值，加上欧盟之前提及嘅反制措施，会迫使美国作出让步，因此，预期美国同其他主要贸易伙伴达成贸易拹议嘅机会好大。 Jason又指，公司业绩方面，由于4月至5月受关税战影响，市场对美企第2季业绩嘅盈利预测较保守，即使之后传嚟关税进入“休战期”呢啲利好消息，整体上调幅度都唔会太大。佢又估计，美股将会维持破顶势头。 |
|
| 陈伟聪 |
2025-07-10T10:32 |
虽然美国总统特朗普(Donald Trump)嘅“新关税List”陆续出炉，其中，巴西货品面临50%高关税，消息一出，即重挫巴西货币雷亚尔。虽然特朗普陆续向各国派新关税信件，但未有股汇债三杀现象，点解读呢个情况，系咪关税问题逐步明朗化，投资者反而可以放心入市？ 东亚证券高级投资策略师陈伟聪指，特朗普嘅谈判技俩市场都见怪不怪，到底最后系咪真系征收50%关税，佢认为变数仍然好大，始终美国同巴西嘅贸易关连度较高，因为美国对巴西嘅农产品、大宗商品有一定程度嘅依赖，若真系征收50%关税，对美国通胀都有影响，并估计巴西亦会作出妥协。 Jason又话，其实投资市场唔太关心巴西被征收几多关税，反而关注欧盟、日本及印度等较大经济体，如果呢啲经济体嘅关税最终只系10%至20%，对美国经济、通胀压力就冇想像中咁大。 |
|
| 陈伟聪 |
2025-06-30T11:17 |
今日(30日)系6月最后一个交易日，投资者都准备做下半年部署，虽然传出中美谈判有进展，但另一方面亦传嚟美加暂停贸易谈判嘅消息，美国总统特朗普(Donald Trump)扬言要加征加拿大关税，目前，加拿大要为《美墨加协议》(USMCA)以外嘅输美商品支付25%芬太尼(Fentanyl)关税，以及50%钢铝及汽车关税，贸易谈判仍有唔少不确定性，不过，美股持续强势，其中，标指上周五(27日)又破顶，系咪意味美国喺贸战方面占上风？点睇美股后市？ 东亚证券高级投资策略师陈伟聪指，美国同加拿大嘅磨擦唔系一时三刻可以化解，但唔系冇得倾，只系双方需时缓冲，亦要留意美国针对大部分国家嘅对等关税(Reciprocal Tariffs)90日暂缓期，将会喺下周三(7月9日)届满，到时未必可以同所有贸易伙伴达成协议，但相信仍未倾掂数嘅国家，影响力都系较细，所以市场对贸易谈判仍有憧憬，相占美股仍会向好。 Jason又话，股份方面，倾向睇好美股嘅大型股份，尤其同资讯科技、人工智能(AI)等科技行业有关嘅股份，因为呢啲公司嘅企业盈利，一般都可以领先其他行业，所以睇高一线。 |
|
| 陈伟聪 |
2025-06-26T11:17 |
美股昨晚(25日)个别发展，其中，科技股持续强势，美国人工智能(AI)晶片巨企英伟达(Nvidia)股价3连升，再破顶，至今已自4月低位反弹逾60%，占集团收入逾40%嘅超级大客如微软(Microsoft)，Meta等嘅AI开支未见减少，Nvidia及AI相关股前景点睇？ 东亚证券高级投资策略师陈伟聪指，依家全球喺AI应用层面方面仍处于起步阶段，近年唔少公司都升级AI大模型，例如由一开始只能生成文字，到可以喺短时间内制造短片，背后都需要高端晶片、云计算嘅基建，以及硬件设备支持发展，因此，Nvidia呢类上游公司，尤其资料中心(Data Center)方面会有好大增长空间。 Jason又补充，Nvidia表示，未来唔止发展晶片，仲会发展埋云计算业务，呢啲范畴都有较大发展空间。此外，相信自动驾驶及机器人喺未来几年都会高速发展，有咁多业务处于高增长期，Jason又指睇好Nvidia股价前景。 |
|
| 陈伟聪 |
2025-06-12T11:34 |
美国昨晚(11日)出咗5月通胀数据，整体及核心消费物价指数(CPI)都低过预期，并较4月进一步降温，据最新利率期货显示，联储局9月减息机会逾50%，但美股3大指数昨晚全线低收，系咪因为之前都升咗唔少，同埋中美经贸谈判因素都反映咗？睇返上月CPI，关税影响系咪要喺6月嘅数据先反映？ 东亚证券高级投资策略师陈伟聪表示，5月CPI数据有惊喜，虽然依家有关税缓冲期，税率亦大幅下调，但5月征收嘅关税仍比3月、4月多，见到以进口为主嘅货品价格系升咗，但其他货品升幅唔大，因此，令美国通胀保持温和。 Jason又指，加关税后，美国通胀未见大升，令市场之前担心滞胀或恶性通胀嘅风险情绪降温，除非美国再征高关税，否则，估计CPI之后未必会大升。不过，佢提醒，需留意油价走势。 |
|
| 陈伟聪 |
2025-05-07T12:05 |
中央再出“组合拳”救市，内地3大金融巨头今早(7日)出招，其中，人民银行宣布降准0.5个百分点，并下调多项政策利率，加上中美关税谈判传出有新进展，市场气氛明显改善，刺激恒生指数今朝大幅高开逾500点。东亚证券原本估计恒指今年睇26000点，依家系咪可以再睇高啲？投资者短线可以点部署？ 东亚证券高级投资策略师陈伟聪指，今次呢啲措施其实唔系新鲜事，但力度明显较大，为市场带嚟惊喜，加上财政部表明有信心实现今年经济增长5%嘅目标，一定对市场短线气氛有支持作用。 不过，Jason提醒，真正焦点仍然喺中美贸易谈判进展，如果短期内仍然达唔到共识，关税唔会大幅下调，投资者可能会再次担心第2季经济表现。 佢又认为，关税消息导致恒指4月中急挫，依家成功收复失地，其实部分乐观预期已经消化咗，所以暂时维持今年睇26000嘅目标，但前提系中美谈判问题唔会恶化。短线部署方面，恒指已自低位回升逾4000点，Jason认为，现阶段应该偏向审慎，适时获利回套。 |
|
| 陈伟聪 |
2025-04-14T11:08 |
特朗普(Donald Trump)政府嘅关税政策一时一样，例如突然煞停针对智能手机、电脑及其他电子产品嘅对等关税(Reciprocal Tariffs)，之后白宫嘅声明或美国商务部长又称，电子产品对等关税豁免只系暂时性，又话会启动国家安全调查，会喺未来一至两个月向电子产品征收个别关税，情况似乎愈来愈混乱，对相关股份会有咩影响？ 东亚证券高级投资策略师陈伟聪指，特朗普让步或放宽呢啲措施，呢一刻一定对市场气氛有帮助，未来要留意会唔会下调针对电子产品，尤其智能手机嘅税率，如果半导体关税只系10%至30%，都一定利好市况。 Jason又话，晶片股短期一定会有反弹，因为过去两星期嘅关税消息。 |
|
| 陈伟聪 |
2025-04-01T11:42 |
2025年首季结束，港股第一季表现最好蓝筹大多数是科技股或人工智能(AI)相关公司，其中包括阿里巴巴(09988)、小米集团(01810)等，展望第2季，科技股可以延续强势？ 东亚证券高级投资策略师陈伟聪指，第2季AI相关及科技股份会借势回调，因为相关股份首季已有明显升势，在未有可见盈利情况下，这类公司估值已经大升，加上不少公司都加大AI基建资本投入，令市场对盈利及变现能力有疑虑。他认为现时科技股已达到合理水平，不算贵亦不算平，未来要再推升市盈率(PE)，需要推出新的应用产品及技术。 |
|
| 陈伟聪 |
2025-03-10T11:12 |
DeepSeek引爆嘅国产人工智能(AI)热潮及“两会”效应接力炒起港股，恒生指数上周累升近1300点，企稳24000点楼上，睇返依家嘅市场气氛，港股今年仲有几多上升空间？目标睇几多？ 东亚证券高级投资策略师陈伟聪估计，恒指今年可上望26000点，主要有两大因素支持，首先系AI技术突破超市场预期，其次系发改委设立万亿创投引导基金，利好一啲在港上市及权重高嘅科技股估值重估，继而推升大市。 佢又话，虽然内地推出财政政策稳定消费，所以唔使睇淡企业盈利前景，但都唔可以忽略一啲环球性风险，例如美国总统特朗普(Donald Trump)摇摆不定嘅行政命令、一啲针对AI嘅制裁，以及市场气氛转变。 |
|
| 陈伟聪 |
2025-02-13T11:25 |
DeepSeek热潮除咗带挈中资科技股，更不断推高恒生指数，指数正逐步挑战去年9月、10月嘅政策升市高位，大市今轮次升势全唔全面？有冇机会突破去年高位，升至23000点水平？ 东亚银行高级投资策略师陈伟聪指，如果只计过去几星期，大市升势比较集中喺人工智能(AI)相关概念股，反而一啲价值型股份，甚至之前较强势嘅中特估概念股，似乎唔系好跟得上今轮升势，整体资金部署亦唔及去年咁多元化。 Jason又提及，唔好忽视相关潜在风险，唔排除之后人工智能(AI)热潮减退，又或者市场开始意识到DeepSeek未必可以帮到AI企业加快商业化，继而提振盈利，加上内地3月会召开“两会”，之前市场炒憧憬炒得好劲，如果到时中央推出嘅政策唔符合预期，恒指就会有调整压力，后市要留意资金会唔会转炒个别落后板块。 |
|
| 陈伟聪 |
2025-01-06T12:52 |
东亚银行财富管理处发表2025年第1季投资展望，环球股市方面，喺美国总统当选人特朗普(Donald Trump)上个任期出现“红色浪潮”期间，标指累升约33%，“特朗普2.0”时代月底就来临，市场普遍共识系美股喺2025年会延续2023及2024年强势，如果真系咁，标指今年上半年目标应该定喺边个水平？ 东亚银行财富管理处高级投资策略师陈伟聪表示，标指今年上半年目标大约介乎6178点至6335点，同现水平比较有约10%上升空间，但系一个较中线嘅目标，短期而言，指数反覆波动嘅机会较大。 Jason续指，过去两个月，美股嘅金融、科技、非必需消费等板块，受惠于“特朗普交易” (Trump Trade)已升咗一浸，估值已偏高，因此，短期再炒Trump Trade风险会较大，如果预期仍有上升空间，必须密切留意市况变化，因为大市有可能先行回调及整固。 |
|
| 陈伟聪 |
2024-12-03T12:00 |
中央经济工作会议将于月中举行，市场等紧会唔会有措施出台，若中经会都令市场失望，港股后市系咪更难乐观？ 东亚银行高级投资策略师陈伟聪指，炒内地政策对A股及港股有支持作用，市场一定对中经会有憧憬，一般嚟讲，中经会将会为明年经济定调，以及提出发展方向等，不过，明年经济增长目标、财政政策、发特别国债等，就要等明年3月嘅“两会”先会公布，所以投资者唔需要对中经会有太大期望。 Jason又话，中央喺9月底出“组合拳”救经济，主要系当时市场气氛悲观，依家恒生指数企稳19000点水平，上证综合指数亦持续喺3300点水平上落，所以中央冇再出招嘅迫切性。佢估计，短线港股将会再向下调整，直至中经会或“两会”释出积极讯号，所以可能要等到明年3月有实质政策出台，到时港股先有机会出现明显升势。 |
|
| 陈伟聪 |
2024-11-05T11:27 |
隔晚(4日)美股开始出现轻微的“Trump Trade”退潮现象，人民币今早(5日)亦有异动，中间价大幅转强近200点子，如何解读人民币的升势？是与美国总统大选，还是人大常委会开会有关？ 东亚银行财富管理处高级投资策略师陈伟聪指，美国大选对人民币影响比人大会议更大，若特朗普(Donald Trump)胜出大选，就会加征关税、进一步制裁中国企业，对人民币汇价或出口影响大。 他续指，今日人民币回升，不代表“Trump Trade”会冷却，始终大选结果仍是未知数。若特朗普胜选，短线人民币受压，对A股及港股波动性大，而人大可能会大规模刺激经济，反而对人民币有支持。 |
|
| 陈伟聪 |
2024-10-08T14:48 |
A股今日(8日)国庆长假后复市，沪深各主要指数全线高开，不过，港股惊现大冧市，恒生指数一度急泻逾2000点，失守21000关，科技指数一度重挫逾14%，跌至4600点边缘，点睇A股及港股今日市况？后市又会点走？ 东亚证券高级投资策略师陈伟聪认为，恒指近3周累升逾6000点，可能同市传内地会额外发行10万亿人仔国债有关，但佢认为呢个传闻已炒过龙。发改委今日会开记者会公布增量措施，但如果国债发行规模逊预期，港股有机会出现获利回套情况，尤其要小心早前已经升咗唔少嘅中资券商股及保险股等。 Jason认为，港股成交要突破早前嘅5000亿元唔容易，虽然过去两三个星期有好多外资增配港股或中资股，但呢个行情未必可以持续太耐，因为资金市较大，波动性亦较大，所以股市未来点走系好难预测。 |
|
| 陈伟聪 |
2024-08-26T12:10 |
美国联储局主席鲍威尔(Jerome Powell)喺Jackson Hole全年央行年会上，直指减息时机已到兼“放鸽”，明确为减息“开绿灯”，但未有提及实际减息时间及幅度，到底联储局系咪如市场预期9月出手？ 东亚证券高级投资策略师陈伟聪认为，市场对联储局减息预期经常有变，早前美国公布嘅就业数据欠佳，加上拆仓令美股大跌，令市场一面倒认为9月会减息0.5厘，甚至今年可能要减息1.25厘至1.5厘。不过，由于近期嘅经济数据反映经济“硬着陆”及陷入衰退嘅机会唔大，相信联储局减息时间及步伐始终要睇数据，若数据反映经济持续稳健增长，未有大幅放缓，相信局方会循序渐进减息，9月可能先减0.25厘，之后两次议息就每次减息0.25厘。 Jason又话，美国今个减息周期会持续几耐好难讲，因为要视乎近期经济数据及整体通胀表现，但据市场统计显示，预期今个减息周期会持续至明年。 此外，据美国芝加哥商品交易所(CME)FedWatch最新显示，联邦基金利率明年底会落到3厘水平，意味联储局要减息约2.25厘至2.5厘。 |
|
| 陈伟聪 |
2024-08-02T14:54 |
内地日前公布嘅官方制造业采购经理指数(PMI)，继续处盛衰线以下，昨日(1日)出炉嘅财新7月制造业PMI相隔8个月再跌入收缩区，并差过预期，呢啲数据系咪反映内地经济仍然有好多隐忧？ 东亚证券高级投资策略师陈伟聪指，内地6月起公布嘅经济数据普遍都系偏弱，不论零售、地产投资及近期嘅PMI，尤其制造业PMI，之前大半年都喺50楼上，今次跌到只得49.4，反映沿海嘅中小企之前主要靠出口作为支撑点，睇返上半年咁多经济数据，出口系做得比较好，但呢方面要小心，点解第2季出口特别强，可能系欧美厂商担心下半年会有关税调整，所以提早采购。 展望下半年，Jason认为有两个问题要留意，首先系咪会加关税，其次系欧美经济显着放缓，会令补库存意欲减少，将对内地出口造成一定冲击。 |
|
| 陈伟聪 |
2024-07-04T12:12 |
美国总统大选首场电视辩论后，前总统特朗普(Donald Trump)嘅支持度抛离现任嘅拜登(Joe Biden)。 东亚证券高级投资策略师陈伟聪表示，人工智能(AI)热潮略为降温后，美股投资者似乎搵到下一个主题，市况开始反映特朗普胜算大增嘅预期。佢指出，特朗普倾向放宽金融监管，所以美股最近炒起咗银行及金融股，工业相关股亦会受惠，Jason又话，市场估计，一旦特朗普当选将会推出更多减税、补贴措施来吸引美国企业回归本土开厂，支持本土制造业。此外，传统资源股亦获睇好。 Jason续指，因为往年大选嘅前一季，美股表现普遍跑赢环球股市，睇好美股第3季继续造好。不过，佢提醒短期有调整风险，因为纳指100嘅14日相对强弱指数(RSI)近日曾升至80以上嘅严重超买水平，而纵观过去6年，当RSI超过80后，美股通常于3个月内会调整约10%。 |
|
| 陈伟聪 |
2024-06-03T12:29 |
欧洲央行今个星期减息似乎已成定局，如果欧洲抢闸早过美国联储局减息会有咩影响？此外，一旦外围启动减息周期，会唔会利好亚洲股市？例如带动资金流入亚太区。 东亚证券高级投资策略师陈伟聪认为，近期瑞士、澳洲通胀数据都偏高，就连欧元区通胀都未必可以太快回落，一旦减息周期展开，就要留意国央行对息口走向有冇进一步暗示，若欧央行只系下半年再减多1次息，相信满足唔到市场预期。不过，佢认为对港股影响唔大，因港股嘅成份股中，较少同欧洲有直接关系。 Jason又指，外围减息唔一定会带动资金流入亚太区，相信要等美国联储局减息先有机会利好亚洲市场。 |
|
| 陈伟聪 |
2024-04-23T11:55 |
市场静待电动车龙头Tesla今晚美股收市后出业绩之际，瑞银最新下调除Tesla外科企7雄(Magnificent 7)评级，英伟达(Nvidia)、苹果公司(Apple Inc.)、Facebook母公司Meta、亚马逊(Amazon)、微软(Microsoft)及Google母公司Alphabet全部由“增持”降至“中性”评级。 虽然标普500指数屡创新高，但其实标指内唔少科技股近日见顶回落，东亚银行高级投资策略师陈伟聪亦指出，市场对标指成分股首季盈利预测，已经下调近2%。 Jason续指，标指升势同企业盈利预测走势背驰，系因为人工智能(AI)概念股过热，股价出现超买情况增加，依家业绩期开始见真章，市场或对标指企业盈利增长信心减弱而出现估值下调，料标指未来或要经历较深度调整。 |
|
| 陈伟聪 |
2024-04-05T11:37 |
联储局主席鲍威尔(Jerome Powell)日前继续“放鹰”，指美国经济及就业市场强劲，加上通胀高过预期，局方仍有时间观察通胀情况，小心考虑首次减息时间。不过，最新有联储局官员指，今年有可能唔减息，市场减息预期随即，更拖累美股昨晚(4日)下挫，亚太区股市今早(5日)普遍受压，究竟官员嘅言论参考价值大唔大？ 东亚银行财富管理处投资策略师陈伟聪指，鲍威尔一直都冇畀一个清晰嘅息时间点，只不断重申要观察通胀，而所有数据都反映美国经济仍然强劲，包括美国楼市销售数据强劲、3月消费物价指数(CPI)及生产物价指数(PPI)高企，所以官员嘅言论有变系合理。 不过，Jason认为，联储局“放鹰”都同市场预测太进取有关，因此，官员嘅言论其实冇太大参考价值，佢又提醒，投资者要继续留意数据，例如今晚出炉嘅非农就业数据，唔好只着眼于新职位有几多，亦要留意失业率及修订数字等。佢又指，要出现极端情况先会令市况压力增加，只要唔系“黑天鹅事件”，对美股或外围股嘅影响唔大。 |
|
| 陈伟聪 |
2024-03-12T12:04 |
“人工智能+”及“新质生产力”首次被列入政府工作报告，市场普遍认为，人工智能(AI)发展可刺激用电需求，会唔会带动相关板块造好？ 东亚财富管理处投资策略师陈伟聪指，现时内地经济发展强调重质唔重量，可能会利用AI或科技提升生产力，相信支持相关产业嘅终极目的系提振经济。 Jason又指，美国唔少科企开始建立AI大模型，整个过程嘅电力消耗好大，如果全世界都以AI为主要产业，电能消耗必定会增加，若内地AI快速发展，虽然需求及使用量都会增加，但未必可以一面倒利好电能股，因为亦会受发电成本、煤炭价格及国策等因素影响，例如新能源补贴开始减少，实施“平价上网”，电价回报一定唔及5至6年前咁吸引。不过，由于投资成本下降，加上新能源股过去两三年跌咗好多，可能盈利已经见底，估值会慢慢修复。 |
|
| 陈伟聪 |
2024-02-14T11:31 |
美国1月消价指数(CPI)超预期，令市场对联储局可能喺上半年减息嘅预期降温，最新估计减息时间会由3月推迟至5月、6月，减息次数亦由7次减至3、4次，CPI昨晚(13日)出炉后，即震散美股，其中，道指收市泻逾500点，美股系咪会继续调整，资金流向又会出现咩变化？ 东亚财富管理处投资策略师陈伟聪指，依家美股估值近24倍，由于市场之前高估减息次数，依家美国10年期债息反弹，相信市场调整预期后，美股估值应会回落至约20倍，佢认为，公司业绩唔对办、预期经济陷入衰退等因素，都唔系影响市场嘅主因。 资金流向方面，Jason认为，基金等避险资产回报率已不及去年，市场预期，美国经济仍会录得增长，之前升咗唔少嘅人工智能(AI)概念股及科技股，适度回调后或获利回套，估计资金会转投非必须消费股、金融股，甚至公用股。 |
公司业绩 , 资金流向 , 美股 , 公司业绩 , 科技 |
| 陈伟聪 |
2024-01-11T12:01 |
有分析指，虽然港股喺2024年持续弱势，但可以炒股唔炒市，而优质高息股会系今年焦点，如果想买呢类股份，应该点拣好？ 东亚银行财富管理处投资策略师陈伟聪指，过去1年，内地电讯、能源及石油股明显跑赢，主要系内地整体息口低，嚟紧又唔会大手减息，加上中国10年期国债息跌穿2.5厘，如果买无利率风险嘅债券产品，都只系收2.5厘息，不如拣有稳阵现金流及负债比例唔高嘅股份，除咗高息，派息持续性又可以维持，呢类股份系入市首选。 至于几时系入市好时机？Jason就话，能源及煤炭股息率喺2023年高峰时期有12厘至13厘，平均股息率唔算低，煤炭及石油股都有7厘至9厘，亦算吸引。佢提醒，近期呢啲股份破顶，逆市升至超卖水平，唔排除短期会有调整，而当能源股开始回落时，资金有机会流向中资电讯股。 |
能源 , 东亚银行 , 石油 , 港资流向 , 港股 |
| 陈伟聪 |
2023-10-30T12:35 |
10月快到尾声，月初至上个交易日，恒生指数跌约2%，更一度跌穿17000点，究竟过咗“股灾月”后，11月港股系咪会见底？ 东亚银行财富管理处投资策略师陈伟聪认为，上月内地经济数据明显好转，加上上周北向资金终于扭转连续10周净流出嘅形势，意味外资沽货离场对A股及港股嘅压力有所减弱，而恒指预估市盈率(Forward PE)仅8倍，预期即使下个月港股再次失守17000点关口，下行空间有限。 Jason又指，如果只系想避险，相比高息股普遍有6至7厘嘅股息率，目前短期或1个月定存利率都做到约5厘，造短期定存嘅回报确实比较吸引。 不过，佢提醒，造定存前要考虑埋美国联储局11月1日(周三)同12月议息嘅影响，若官员释出息率有可能见顶嘅讯号，造太长年期嘅定存反而会错失股市反弹嘅获利机会。 |
港股 , 东亚银行 , 港银 , 港资流向 , 恒生银行 |
| 陈伟聪 |
2023-10-19T11:45 |
美国长债息再度抽升，进一步逼近5厘水平，不过，联储局官员过去两周不停“放鸽”，或多或少债息升势有所收敛，债息噚隔扯高系咪反映下月加息预期可能有变？ 东亚银行财富管理处投资策略师陈伟聪认为，近期美国公布嘅经济数据都比预期强劲，加上油价近期向上，市场忧虑会令通胀压力升温，联储局11月加唔加息一定对债息有影响，但唔系唯一嘅影响，其他因素包括美国财政部发新债，市场都十分关注。 Jason又指，近两年美国债孳息曲线不断倒挂，近期美国经济好转，照计应该会重返正常水平，但由于短息仍高企，因此，长息就要升返一定幅度，先可以做到。佢续指，如果“短息高、长息低”嘅情况持续，相信孳息曲线正常化进程仍未结束，一旦联储局年内再加息，债息有机会升穿5厘。 |
东亚银行 , 港银 |
| 陈伟聪 |
2023-09-25T11:39 |
美国今个星期五(29日)会公布联储局最关注嘅个人消费开支(PCE)物价指数，市场估计，扣除食品及能源嘅核心PCE按年升幅将会由4.2%放缓至3.9%，按月升幅则维持于0.2%，而个人开支按月升幅则收窄至0.4%，如果呢啲预测正确，系咪反映美国消费者面临嘅压力愈来愈大，最终导致经济放缓？ 东亚银行投资策略师陈伟聪表示，由于能源价格及油价近期都升得比较多，一定会对PCE造成压力，因此，市场预期，整体PCE按年可能会进一步反弹，月中出炉嘅核心消费物价指数(CPI)升幅都比预期高，核心PCE按月亦可能出现同样情况，佢又话，市场预期个人开支会减少，令消费市道逐步降温。 Jason续指，只要按年核心PCE维持喺4%水平，短期而言，美国货币政策都唔会有太大放松空间。 |
能源 , 东亚银行 , 港银 , 食品 |
| 陈伟聪 |
2023-08-23T11:22 |
大市今日继续跌，恒生指数预测市盈率(PE)接近9倍，市帐率(PB)就唔够1倍。《彭博》统计，约一半蓝筹的14天RSI，已落到30楼下嘅超卖水平。恒指8月暂时跌约11%，系去年10月以来最大跌幅，恒指后市走势会点？ 东亚银行投资策略师陈伟聪表示，最近一周已将未来一年恒指目标价，降至20700点。相比起新冠疫情时期，佢认为依家恒指PB同PE其实唔算低，有可能修正返小小再反弹。技术层面RSI方面，佢就指，虽然睇日线图系去到20几的超卖水平，但周线图显示仲系34水平附近，未去到好严重超卖嘅地步。 |
东亚银行 , 港银 , 恒生银行 , 港股 , 企业评级 |
| 陈伟聪 |
2023-07-31T12:40 |
中证监日前召集多家大型券商开会，就提振资本市场及投资者信心嘅政策征求意见，市传有与会人士建议减印花税、暂缓IPO等。消息一出，中资券商股上周五(28日)随即跑出，今朝再升一浸。 东亚银行投资策略师陈伟聪认为，未来政策大方向会令A股市况好转，但唔会一面倒利好券商股。佢指出，减印花税唔系新鲜事，过往A股市况唔好，都会用呢招谷成交。佢又话，如果市场热议嘅“T+0”交易机制成真，容许内地股民炒“即日鲜”，相信亦会增加即市成交量，两项措施都对主营股票经纪服务嘅传统券商有帮助。 不过，Jason表示，若当局决定暂缓IPO，会影响主营投资银行业务嘅龙头券商，减少佢哋做包销商或保荐人嘅收入，而近月中证监要求券商及基金公司减交易费，亦会影响主营资产管理嘅券商。 Jason又认为，内地实行新股注册制，放宽上市门槛后，大型企业就未必考虑来港上市。除非港股估值明显上调，例如新经济股嘅估值上返3至4年前水平，先会有返新股集资嘅吸引力。 |
东亚银行 , 新股IPO , 新股IPO , 港股 , 港银 |
| 陈伟聪 |
2023-07-03T12:17 |
花旗下半年选股名单出现唔少行业代表，包括上半年表现最好嘅蓝筹之一网易(09999)、周大褔(01929)、金沙中国(01928)、比亚迪股份(01211)、申洲国际(02313)、友邦保险(01299)、华润燃气(01193)。 其他大行又点睇呢？东亚银行财富管理处投资策略师陈伟聪表示，下半年睇好服务式消费相关板块，尤其旅游消费股将受惠于暑假及“十．一”黄金周出游需求嘅高增长。 此外，Jason认为，电力及新能源板块会受惠原材料同部件成本下降，而推升下游嘅发电公司回报率，而内地减息亦有助负债普遍高企嘅电力股降低融资成本。佢续指“中国特色估值”概念股，例如基建、国企内房、内银、电讯板块，都值得留意。 Jason又话，短期可留意7月底中央政治局会议前有冇更多刺激经济政策出台，或会带动港股反弹，不过下半年仲有美国加息等不明朗因素，佢预期港股难出现大牛市。 |
东亚银行 , 中电力 , 港股 , 能源 , 内房 |
| 陈伟聪 |
2023-05-30T12:05 |
计埋今日，港股喺“五穷月”只剩返两个交易日，截至噚日止，恒指今个月暂累跌逾1300点，而3大指数开关重启嘅升幅全部化灰，反观外围，美股、日股、韩股走势强劲，同港股表现差天共地，点解会出现“港股独憔悴”嘅情况？系咪受A股及内地因素影响？ 东亚银行财富管理处投资策略师陈伟聪指，港股年初其实因憧憬美国加息周期结束升咗一轮，但近期美国公布嘅数据仍然偏强，令市场认为联储局6月加息嘅机会又大咗，而当债息上升时，的确令港股面对唔少压力，见到科技股及高息股都跌咗落嚟。 Jason又话，内地4月经济数据大部分都差过预期，同市场预期有好明显落差，令市场对内地经济重启、复苏动力，喺第2季系咪可以持续存疑，再加上其他因素，导致外资沽A股，再加上中美一啲冲突，令港股整体估值都受到一啲压力。 |
港股 , 东亚银行 , 港银 , 科技 , 美股 |
| 陈伟聪 |
2023-04-06T11:24 |
美国噚晚出炉嘅服务业及私人企业职位等数据都差过预期，令经济陷入衰退嘅忧虑升温，亦令联储局5月暂停加息嘅预期再升温，下月暂停加息嘅机会升至57%，加息0.25厘嘅机会降至43%。今个星期初因为石油输出国组织及盟友(OPEC+)突然宣布减产，市场担心会刺激通胀升温，令联储局5月加息0.25厘嘅机会增加，但依家因为经济数据差又跌返，5月议息结果似乎仍有好多变数。 东亚银行财富管理处投资策略师陈伟聪指，美国有银行倒闭后，开始见到市场有啲炒作，佢估计，联储局嚟紧都会放慢加息步伐，甚至会喺5月暂停加息，不过，之后OPEC+减产、油价升，以及联储局官员继续放鹰等，都会令利率走向、利率期货喺未来几个星期，就联储局下月系咪加息嘅预测摇摆不定，佢认为，美国5月系咪加息暂时都系“五十五十”。 |
石油 , 东亚银行 , 港银 |
| 陈伟聪 |
2023-03-01T10:50 |
中资电讯股近排升得几夸张，中国电信(00728)及中国联通(00762)等成板仲升紧，主要系炒作数字经济憧憬及概念，因为当中会涉及基础设施，加上全球热炒嘅ChatGPT概念。此外，摩根士丹利最新估计，未来60日，3大中资电讯股有80%机会升，喺市场仍有唔少不确定性下，呢类股份系咪有得谂？ 东亚银行财富管理处投资策略师陈伟聪指，港股旧年第3季开始向下时，中资电讯股仍然好硬净，到大市升返亦可以跟到，过去好多投资者认为呢类系防守股，但基于一啲元素，例如新产业工业互联网，包括云计算、AI等，令市场觉得中资电讯股有增长空间，因为面向好多企业客，而过往主要炒tech股，但随着市场份额嘅转变，中资电讯股嘅份额不断升紧，虽然唔系直接参与，但背后嘅产业链都好强，所以有呢方面嘅增长概念。 Jason又话，如果睇返估值，市盈率(PE)仍然系单位数，息率有7厘至8厘，对比传统科网股系有一定吸引力。 |
东亚银行 , 中国联通 , 港股 , 中国电信 , 港银 |
| 陈伟聪 |
2023-02-03T11:55 |
全球3大主要央行已先后公布今年首次议息结果，央行对息口系咪已见顶、加息周期几时完结仍有分歧，旧年市场主题系联储局加息遏通胀，呢个投资主题今年会唔会持续发酵？ 东亚银行财富管理投资策略师陈伟聪指，虽然联储局主席鲍威尔暗示今年最少再加两次息，但市场就解读为第4季可能会减息，反而欧央行加息步伐比联储局更进取。 Jason又话，亦要留意经济放缓速度，市场已开始消化美国经济转弱嘅消息，相信未必会陷入严重衰退，加上欧洲经济似乎冇市场睇得咁悲观，因此，若环球经济增长前景较预期乐观，将会成为环球股市、风险资产好有力嘅催化剂。 |
东亚银行 , 港银 |
| 陈伟聪 |
2022-12-28T11:16 |
内地宣布将“新冠肺炎”改名为“新冠病毒感染”，并将“乙类甲管”调整为“乙类乙管”。此外，亦宣布多项优化措施，包括将恢复办理内地居民旅游及商务赴港签注，以及逐步恢复陆路口岸客运通关等，市场对进一步放宽其实系咪已有一定憧憬？ 东亚银行财富管理处投资策略师陈伟聪指，相信的确为市场带嚟少少惊喜，因为市场之前估计内地会喺春节后，或“两会”前后先会放宽，加上今次唔止针对商务旅客，连一般旅游都一齐放宽，对市场嚟讲一定系正面消息。 不过，Jason提醒，若放宽后内地疫情升温，可能令春运需求不似预期，亦会影响消费、工厂复工复产等环节，因此，虽然放宽嘅利好层面系大过预期，但政策后遗症及成本代价值亦不容忽视。 |
东亚银行 , 港银 |
| 陈伟聪 |
2022-11-22T11:31 |
内地早前推出“优化防疫20条”，市场解读为释出微调或放宽疫情控制措施嘅讯号，消息一出，股市表现亢奋，恒生指数裂口大升，更炒到逼近18500点，但1星期过去，冷静落嚟，见到社会活动限制根本冇放宽，反而因疫情再升温而有收紧迹象，港股亦掉头回落。市场本来对内地放宽防疫措施有好大憧憬，结果系咪证明又炒错？ 东亚银行投资产品及顾问部股票策略师陈伟聪指，其实可以先观察市场反应，根据过往经验，当内地单日感染个案达20000宗，或收紧疫情防控措施，大市应该唔止跌百几点，如果好似年初全面封城，恒指单日跌500至600点，甚至跌更多。 Jason又话，虽然内地疫情近期持续升温，封控措施亦持续，但市场表现相对冷静，原因系大家都有一个共识，就系所有防疫政策都系慢慢微调，但动态清零嘅大方向政策亦讲明唔会变。 |
港股 , 东亚银行 , 港银 , 恒生银行 |
| 陈伟聪 |
2022-10-11T12:20 |
港股不断寻底，恒指今朝已失守17000点，淡友继续发力，噚日港股整体沽空比率升至24.5%，仲高过8月30日约23%嘅纪录高位，重磅股如阿里巴巴(09988)沽空比率升至近31%，但如果掉返转去睇，港股跌到咁残咁平，反而有机会夹淡仓，短线有机会反弹？ 东亚银行财富管理处股票策略师陈伟聪指，依家港股充斥负面消息，而令市场最惊系触摸不定，加息、经济差仲有数得计，但地缘政治如俄乌局势有机会升级，甚至俄罗斯发动核战，会唔会令乌克兰能源、粮食出口受限制？令高通胀问题又要再持续一段时间。 此外，香港呢边正进行中概股嘅审计底稿工作，如果调查结果唔理想，甚至有中概股明年要除牌，港股中线压力都几大，依家沽空比率去到24%系有啲极端，恒指预测市盈率(PE)只得9.5倍，系2017年以后每次熊市低位，而恒指RSI已落到19水平，过去30年都冇见过咁超卖嘅情况，依家市场明显Discount咗一啲好极端或类似“黑天鹅”事件，若后市有返啲好消息，即使唔系立即转势，间中有啲夹淡仓，夹返2000、3000点上去都唔出奇，现阶段造淡都要小心报复式反弹风险。 |
港股 , 东亚银行 , 港银 , 能源 , 阿里巴巴 |
| 陈伟聪 |
2022-09-14T11:52 |
内地通过新一批游戏版号，合共73款国产游戏获批，当中电脑游戏占3款、主机游戏占1款，其余全属手游，除咗中手游(00302)、心动公司(02400)、哔哩哔哩(09626)有份，游戏股龙头网易(09999)及腾讯控股(00700)旗下腾讯游戏今次终于有份。 不过，东亚银行投资产品及顾问部股票策略师陈伟聪指，对游戏股仍然审慎，虽然内地今年第1季已复批游戏版号，但大部分获批都系迷你游戏及休闲游戏，吸金力、吸客力都唔及硬核游戏，加上内地仍未放宽成年人打机时间限制，反映当局仍未放宽游戏监管，相关企业嘅盈利仍面对挑战。 另一方面，市场憧憬iPhone 14可刺激内地手机需求及出货量，但摩根士丹利就泼冷水，指手机行业喺明年上半年前都冇复苏潜力。 Jason就话，依家内地经济下行，消费者换机会比以前谨慎，所以需求亦会细咗，不过，内地有好多iPhone死忠粉丝，加上新机定价唔算进取，相信仍会掀换机潮，相关设备供应商或会受惠，相反，中低档定位嘅内地安卓手机品牌就冇咁吃香。 |
东亚银行 , 腾讯控股 , 港银 , 中电控股 , 中手游 |