| 评论员 |
时间 |
内容 |
标签 |
| 庄志雄 |
2026-04-08T15:29 |
伊朗局势出现突破性发展，美伊同意暂时停火两个星期，美国总统特朗普(Donald Trump)表示，收到伊朗提出嘅10点方案，伊朗亦发声明指会同美国埋台倾，而停火期间船只可以安全通过霍尔木兹海峡(Strait of Hormuz)。消息一出，国际油价应声插水，股市就大反弹。到底霍尔木兹海峡系咪可以复常，可以运到油？ “股市渔夫”创办人庄志雄指，呢个系最重要嘅问题，一直都话特朗普好大机会TACO(缩沙)，之后就要睇伊朗嘅反应，要睇霍尔木兹海峡通航情况，基本上喺特朗普TACO前，见到伊朗袭击邻国嘅次数系明显少咗，4月初讲紧每日逾百次嘅攻击，4月7日已减至43次，针对科威特嘅攻击更加系零，之前其实系主力攻击科威特，的确系有啲收敛，不过，要通航唔系少次数，而系要零，呢方面真系要睇美伊倾成点。 Lewis又话，依家两边都唔想打，各有各嘅讲法及宣传。 |
|
| 庄志雄 |
2026-04-01T15:35 |
正当美股自高位回调10%，债息又迫近征收对等关税(Reciprocal Tariff)时水平之际，美国总统特朗普(Donald Trump)最新话，美军会喺两至三周内撤出伊朗，暗示呢场战事有机会好快结束，佢又会喺本港时间明日(2日)早上9时发表全国讲话，而伊朗嘅态度亦冇之前咁强硬，值得留意系，美国10年期债息依家喺4.3厘至4.5厘嘅TACO水平。 “股市渔夫”创办人庄志雄指，上星期都讲过，最重要睇住10年期债息，其实一直都讲紧，如果去到4.3厘至4.5厘，意味特朗普有TACO(缩沙)压力，美国借咗咁多钱，总债务高达40万亿美元，当中10万亿美元要喺未来1年续期，所以佢唔可以比债息扯得太高。 Lewis又指，去年“解放日”之后，特朗普TACO最主要水平系4.5厘，今年初TACO水平系4.3厘，今次佢企硬咗一阵，但去到4.5厘前，佢已经TACO，依家好嘅地方系，伊朗态度冇咁强硬，特朗普话明日有嘢宣布，咁啱系“解放日”一周年，佢似乎好睇重呢两件事，问题系个烂摊子就留咗喺中东，霍尔木兹海峡(Strait of Hormuz)系咪可以好似之前咁全开，2000万桶石油运输复常，佢估计，未来1年都好难，但情况系比之前好咗，可能有1000万桶通过到海峡，需要由中东进口石油嘅国家，除咗要畀高油价，亦唔够石油用，呢啲国家有机会影响返当地经济。 |
|
| 庄志雄 |
2026-03-25T15:37 |
美伊战事持续，美国总统特朗普(Donald Trump)于周一(21日)将攻击伊朗能源设施嘅“最后通牒”由“48小时变5日”，另一方面又话两国已经埋台倾紧。由于市场解读为特朗普又TACO，对美股及债市都有影响，依家美国10年期债息约4.34厘，而2年期债息已高过联邦基金利率，呢两个数据对市场及联储局有咩影响？ “股市渔夫”创办人庄志雄认为，特朗普始终系一个生意人，每个举动都会考虑到债市及股市，现时10年期债息处于4.3厘及4.5厘嘅关键水平，市场都憧憬美国及伊朗有偈倾，所以10年期债息有机会进一步回落至4.3厘。 佢续指，特朗普依家TACO会令多国投资者重新检视系咪仲要买咁多美债，还是转买资源比较好，而昨晚(24日)2年期美债拍卖反应系3年以来最差，呢个正正系主要原因。 Lewis续称，联储局过往会参考2年期债息去做决策，现时已经高过联邦基金利率，代表市场现正向联储局发出“加息”讯号。佢认为，当经济周期向下，联储局又加息，就好似疫情前联邦基金利率高于消费物价指数(CPI)嘅情况，令市场出现一个负实质利率，甚至经济陷入衰退，加上市传联储局内部认为失业率及通胀会持续上升，会带嚟一定滞胀(Stagflation)风险，最终或对市场造成严重嘅负面攻击，拖累美国甚至环球经济。 |
|
| 庄志雄 |
2026-03-11T15:07 |
中东战事持续，但美国统特朗普(Donald Trump)日前暗示战事快将结束，战事发展令油价大幅波动，日前一度迫近每桶120美元，今日(11日)已回落到83.7美元，油价高企必定影响经济，但又有冇市场仍可以睇好？ “股市渔夫”创办人庄志雄认为，油价升10%会对新兴国家嘅实质国内生产总值(GDP)增长率带嚟负面影响，但由于巴西本身有出口石油，当地股市年初至今只系轻微回落，相对中国及俄罗斯市场可以睇高一线。 Lewis又提醒，投资者应留意多国股市表现，尤其南韩及日本股市，相关交易所买卖基金(ETF)升得劲，但亦跌得急，虽然A股冇乜点跌，但经济会唔会受其他因素影响，都要再睇定啲。 |
|
| 庄志雄 |
2026-03-04T15:26 |
中东战事持续，美国总统特朗普(Donald Trump)更声称稍后会向伊朗，发动真正及大规模攻击，投资者亦担心战事会拖长，亚洲股市今日(4日)爆发小股灾，其中，南韩股市曾暴泻逾12%，恒生指数一度插穿25000关，暂时投资市场都系跟住战事发展及消息走，美股昨晚(3日)都一度重挫，道指曾泻过千点，而油价就继续系赢家，金市及股市都好Chok。 “股市渔夫”创办人庄志雄指，1月时已经讲过，1月个市应该系OK，但2月之后就要小心，当时有好多人睇淡美元，其实都讲过好多次美元似乎唔肯跌，同埋喺特朗普第1及第2次任期，头280个交易日都系跌，但到某个时间就会升，而暂时都系咁，一升好多股市都会受压，尤其是新兴市场。 Lewis又话，3月开局当然系差，全球股市都要跌，新兴市场相对跌得多，而之前升得劲嘅市场，例如南韩股市。佢续指，如果由2月开始计，金价升完再跌返落嚟。 |
|
| 庄志雄 |
2026-02-25T14:54 |
近期外围市况波动，虽然美股及软件股昨晚反弹，但标指今年以嚟只系原地踏步，跑输唔少环球主要股市指数，点睇美股依家嘅弱势？ “股市渔夫”创办人庄志雄指，美股由上年开始已经跑输其他市场，今年情况再差啲，指数亦冇乜表现，多个板块都跌得好劲，尤其系“科技7雄”(Magnificent 7)、软件股，依家只系靠半导体、军工及防守股顶住个市，佢相信呢个情况会持续。 Lewis又话，依家嘅情况反映投资者开始将焦点放返喺估值上，亚太区股市、新兴市场靠盈利增长推动股价及指数向上，而美股估值已经好贵，唔能够再炒高，相比之下，亚太区股市、新兴市场更加吸引投资者。 |
|
| 庄志雄 |
2026-02-04T15:16 |
美国总统特朗普(Donald Trump)提名沃什(Kevin Warsh)出任联储局下任主席，消息公布后，美元回稳，但科技、软件类股就急挫，如果要分析后市，最重要睇咩因素？ “股市渔夫”创办人庄志雄指，目前睇美汇指数有一个走势陷阱，系假跌破，特朗普上一个任期当中，美汇首280个交易日都系跌，而到今次，今星期啱啱够280日后，美汇又上返趋势线，相信主要系流动性问题。 佢又话，美国流动性偏弱唔系第一次，2019年当时都出现同样问题，而今次主要因为政府停摆，令TGA抽走咗部份流动性，假设美汇今个星期转强，代表市场要更小心，因为波动性增加咗。 |
|
| 庄志雄 |
2026-01-28T15:15 |
美国总统特朗普(Donald Trump)唔认为美元表现差，又或者跌得多，市场解读为特朗普为美元贬值“开绿灯”，导致美汇指数一度插穿96，市场十分关注美元系咪会再跌，不过，特朗普经常一时一样，取态可能第二日又唔同咗。到底美元系咪会大幅贬值，金价走势系咪一个指标？ “股市渔夫”创办人庄志雄认为，弱美元应该系长期化，只系唔知系咪一跌穿就一泻如注，睇返以往嘅美汇熊市，自高位回落30%、40%都唔出奇，依家美汇指数跌穿咗2011年至今嘅15年长期上升轨，特朗普当选后已两度下试呢个支持线，之后都弹返上去，今次再失守，佢认为可以再睇多一至两星期，如果确认系长期大弱势，依家自高位跌咗11%、12%，喺呢个情况下仍有好多空间可以做嘢。 Lewis又话，今年嘅大主题系好多落后嘅嘢会炒返上去，去年造得最好系贵金属，大幅跑赢美股，其实系美元弱嘅讯号，特朗普当选咗272日，金价升咗近1倍，落后嘅金属银、铜、白金都喺去年第4季开始追返上嚟，部分甚至超越金。 |
|
| 庄志雄 |
2026-01-21T16:02 |
近日格陵兰事件令美欧关系再度紧张，美股周二(20日)复市后，股、汇、债都跌，今年初至今，表现最好仍然是黄金，最差是标普及美股“科技7雄”(Magnificent 7)，这个趋势是否会持续？现在有这么多不明朗因素，美股今年首季是否要看淡？ “股市渔夫”创办人庄志雄指，就格陵兰事件而言，现在欧美关系未正式变得很恶劣，不过消息一出，美国资产即股、汇、债全跌。Lewis话以往大市需要避险时，美金通常会强势，不过去年开始有变，所以他认为仍能明显地发挥避险作用的资产只有黄金，而金价由年初至今已经升超过10%。 |
|
| 庄志雄 |
2026-01-14T16:35 |
过去1个月，资源股表现仍然强劲，金价、银价继续维持高位，而股市层面上，新兴市场也优于美股，这个情况是否会延续？ “股市渔夫”创办人庄志雄指，今年开局延续了2025年的情况，去年趋势先是黄金相关股造好，随后是银价、铜价等追上，下半年更是变成基本金属强势，现在也是如此，自从美国联邦公开市场委员会(FOMC)会议于2025年12月9日召开后，至今仍然是金属类跑赢，银价升逾42%，铜矿股交易所买卖基金(ETF)升逾22%，金矿股ETF升逾18%，银及铜的表现甚至跑赢金。 不过，Lewis认为投资者应该减持贵金属。 |
|
| 庄志雄 |
2025-12-23T15:32 |
美国财政部正提供流动性，但支持去哂金矿股度，未见对成个股市有太大支持，点解会有呢个情况？ “股市渔夫”创办人庄志雄指，金价喺联储局讲嘢或做嘢咗前已经升咗60%，金矿股就升超过1倍，但联储局喺12月10日宣布减息后，金价、银价及金矿股继续升，并带动其他白金、铜及其他基本金属价格向上升，当呢啲价格郁，某程度反映市场担心美元明年将会跌得更多，若市场对美元失去信心，通常会买入金属类产品，所以就出现呢个情况。 Lewis又指，依家释放出来嘅流动性，似乎唔足以托起成个股市，只系见到个别范畴郁，以指数计郁得最好系中型股指数，联邦公开市场委员会(FOMC)宣布“放水”后，中型股指数升咗2.4%，标指只系升咗0.5%，纳指100就跌，所以流动性就算1个月有几百亿美元，都唔能够将成个市托起，只能托起个别范畴。 |
|
| 庄志雄 |
2025-12-17T15:39 |
美国联储局每月买入400亿美元短债，上星期都提到依家处于“Pre-QE”状态，估计最终都系好似2020年，即重启量化宽松政策(QE)，系咪反映市场忧虑通胀升温，经济有下行压力？ “股市渔夫”创办人庄志雄指，美国经济有放缓迹象，据过往数据显示，当失业率咁升法，经济最后都会陷入衰退，如无意外联储局都要减息，甚至做QE救经济。 Lewis又话，但今次做QE难度比2019年高，一方面每次议息都减息，但10年期债息都唔跌，加上新任联储局主席人选未定，若依家重启QE，美元有机会大跌20%至30%，今年好多非美投资，不论A股、日股、新兴市场股票都跑赢美股，令唔少投资者慢慢离开美元资产，未做QE已开始避险。 |
|
| 庄志雄 |
2025-12-12T17:31 |
美国联储局今日(12日)起，每月购买400亿美元短期债T-bills(1年内到期零息债券)，纾缓短期流动性问题，理论上唔算量化宽松(QE)，但道指昨晚(11日)破顶，资产市场反应唔算差，点睇买T-bills呢个动作？系咪QE前奏？ “股市渔夫”创办人庄志雄指，今次嘅行为属于准备量化宽松(Pre-QE)，对上一次最似今次系2019年，都系回购利率市场比较波动，波动较大嘅时候，联储局就会出来维持秩序。今次汲取咗2019年嘅经验，提早做好准备，尤其喺交税嘅月份，因为呢啲月份可能影响流动性，所以联储局要喺呢个月份之前做好准备。 Lewis又指，正式嘅QE系当央行将利率降到零之后，冇其他嘢可以做，唯有喺市场买长债，着重返长期资产，以支持整体经济，作出刺激作用，主要目的为压低长期利率。因此，联储局无论系今次定2019年嗰次，都表明唔系QE，佢哋买T-bills旨在提供短期流动性，而非压低长期利率。 他续指，今次同上次都有同样嘅背景，都系经济周期转弱，以及收税太多令流动性变差，喺两件事情夹击下，令联储局要出手维持秩序。 |
|
| 庄志雄 |
2025-11-26T15:45 |
有“恐慌指数”之称嘅VIX昨日(25日)跌至20楼下，但程式买盘方面，未来无论美股升定跌，投资者都会减仓，美股系咪失去咗1个带上升动力？ “股市渔夫”创办人庄志雄指，从中短线睇，程式买盘的确系几重要，虽然VIX昨晚跌至20以下，但唔知之后会唔会升返上去。佢又话，程式买盘有两大类，其中一类系(Wall Control Fund)，主要系睇住波幅做嘢，如果之后VIX抽返上去，投资者又会继续减仓。另一类系睇追踪趋势嘅程式买盘，值得留意系，依家呢类程式买盘系由买变成沽，估计未来1周，无论大市升定跌，投资者都会沽货，大市反弹系沽，如果大市跌，投资者甚至会沽多啲，比例会系1对4。 |
|
| 庄志雄 |
2025-11-19T15:28 |
今个星期程式买盘有压力，依家程式买盘持仓水平接近满仓，相信会减仓，估计会减几多仓位？ “股市渔夫”创办人庄志雄指，通常程式买盘系睇两大类，一类系动力及趋势，即CTA，另一类系波幅，波幅大嘅时候会减仓，波幅细就会加仓，通常都系呢啲做法。依家见到标普500指数仍处于高位，未系好明显出现减仓，不过，小型股已经跌紧，大型股都开始跌，当动力弱咗，例如标普500指数跌穿50天线，呢啲情况就会触发CTA，然后开始沽货。 Lewis续指，依家见到程式买盘系有沽货压力。 |
|
| 庄志雄 |
2025-11-12T17:28 |
日本软银集团(SoftBank Group)昨日(11日)披露已清仓英伟达(Nvidia)，套现逾58亿美元，转向押注OpenAI，不过，睇返微软(Mircosoft)早前公布嘅季绩，OpenAI仍未有钱赚，单季亏损更扩大至120亿美元，拖累微软股价，到底美国人工智能(AI)行业巨额投资系咪可以持续？几时先有钱赚？ “股市渔夫”创办人庄志雄指，呢啲都系未知之数，只可以从OpenAI自己嘅预测去睇，不过关于微软我哋可以留意股价喺7月已经见顶，约555美元，依家距离高位约10%，虽然公司话盈利有改善，但股价喺呢段时间向下，公司指出，原因系OpenAI仍然蚀紧钱，但其实呢件事好普遍，根本唔值得关注。 Lewis认为，未来更需要关注系，好似微软呢啲级数嘅公司。 |
|
| 庄志雄 |
2025-10-15T15:54 |
中美贸易紧张关系升温，引发市场恐慌情绪，芝加哥期权交易所波幅指数(VIX)急升后，似乎跌唔落，呢个情况系咪反映美股其实未跌定？ “股市渔夫”创办人庄志雄指，美股暂时未仍稳定落嚟，因为有一啲程式买卖，嗰个波幅扩大，即VIX读数高的话，机构投资者就会减仓，依家20系分水岭，当VIX升到25，佢哋就会大幅减持，喺依家嘅情况下，就要观察多几日。 Lewis又指，根据美银嘅基金经理调查显示，基金经理现金水平跌至10年低位，上次出现呢个跌势系2021年“契妈热潮”，当时个市好疯狂，但依家又去到呢个状态，相信机构投资者已经系满晒仓，等第4季炒上去，依家突然有美股震荡，机构投资者因为咁低嘅现金水平要加仓，系会有啲难度，加上9月联储局减息之后，未见环球流动性增加，反而系比以前少，按6个月变化嚟计，虽然仲有轻微增长，但已经接近0%条线。 |
|
| 庄志雄 |
2025-10-08T15:48 |
美国政府停摆近1个星期，不过，美股喺停摆期间照破顶，但3大指数昨晚(7日)先升后跌，值得留意系，今次政府停摆似乎对美股冇乜影响，到底资金买紧咩？ “股市渔夫”创办人庄志雄指，其实市场唔系好理停摆，亦听过唔少消息指，当政府停摆，美股有90%机会升，可能系呢啲情绪影响咗个市。依家见到指数完全冇受影响，暂时市场仍有动力，并由散户推动，尤其系4月之后，散户喺4月好进取咁入市，大市再升时，散户又再积极入市，据摩根士丹利嘅统计显示，不论交易所买卖基金(ETF)或股票，今年散户嘅需求都系有史以来最强劲，甚至超越2021年嘅“契妈热潮”。 Lewis续指，但今年嘅情况有少少唔同，2021年市场系倾向买多啲个股，而今次系买多啲ETF，但总量系劲过2021年，值得留意系，如果今年好似2021年咁过热，之后就会出现好大嘅调整，可以参考返2022年嘅数据，标普500指数最后系跌逾30%，所以市场就要留意，暂时系未知可唔可以炒埋传统旺季第4季。 |
|
| 庄志雄 |
2025-09-17T15:58 |
市场继续观望美国联储局(Fed)议息结果，市场依家普遍预期未来12个月，美国将会减息4次，但亦有人估减息5次，又或者只减息1次，减得多意味市场忧虑美国陷入衰退，要靠减息撑住经济，相反，反映市场对通胀高企有忧虑，市场系咪忽略咗减息5次或只减息1次呢啲情境？ “股市渔夫”创办人庄志雄指，其实Fed已经打晒开口牌，话未来1年减4次息，即每季减1次息，无论减3次定4次，基本上市场已经预测到，而市场已Price in晒，例如今次会议减0.25厘，呢个举动市场已经预期晒，所以市场应该冇乜大反应。 不过，问题系好多时做投资唔系睇大家嘅市场共识，因为当大家都睇相同嘅野，有啲位就会忽略咗，而嗰啲位先至系要留意，依家见到60%至70%嘅基金经理都话会减3至4次息，佢认为，市场忽略咗其余两个大嘅可能性，其中1个可能性系未来12个月减超过5次息，甚至一次过减息0.5厘，呢啲情况反映住美国经济大幅放缓，甚至系有明显嘅衰退风险，联储局先会咁做。 Lewis又话，亦有政治上嘅影响，美国总统特朗普(Donald Trump)迫Fed减息，但市场似乎认为特朗普系迫唔到，如果迫到9月就应该减息0.5厘，而唔系0.25厘，另1个可能性系依家通胀已慢慢升返，一旦减息，如果美国经济冇出现衰退，通胀可能会升得好快，导致未来只可能只减1至2次息，呢两个情况投资者系要留意。 |
|
| 庄志雄 |
2025-09-10T15:50 |
睇返过去10个交易日全球市场表现，明显见到新兴市场较已发展国家强势，点分析呢个现象？ “股市渔夫”创办人庄志雄表示，主要系如果美元回落，会较有利新兴市场，加上新兴市场有减息空间，两样嘢加埋就会见到同期，即过去10个交易日，美国就业数据显示当地经济有放缓嘅情况，加上美国趋向减息下，明显见到新兴市场系比其他成熟市场做得更好。 Lewis续指，连上半年做得好好嘅欧洲市场，最近都转弱咗好多，因为欧洲息口正在扯高，加上欧元转强，会对一啲资产价格造成压力，所以就会见到欧洲市场跑输其他市场。 |
|
| 庄志雄 |
2025-09-03T15:57 |
近期除咗美股波动，债市都好波动，因为市场担心唔同政府嘅财政情况，令好多地方嘅超长债息都升上高位，9月债价下行压力系咪都大咗？ “股市渔夫”创办人庄志雄指，各国债市最近都陆续出现奇怪现象，例如日本30年期债息居高不下，甚至喺7月突破3.2厘阻力位，以及英国喺过去几日升穿5.6厘水平，呢两个警号都反映住如果美国联储局或各国央行继续“放水”的话，会令环球通胀上升，值得留意系，昨日(2日)美国股市开始有压力，债息一接近5厘水平，标普500指数一度跌逾1.5%至1.6%。 佢续指，美国30年期债息一旦跌穿5.1厘，代表住联储局减息都会刺激通胀，而长债息率不跌反升的话，对好多风险资产都会有压力。 |
|
| 庄志雄 |
2025-08-20T16:07 |
纳斯达克100指数连日回落，昨晚(19日)跌跌逾1%至21314点，纳指中线市宽已跌穿50嘅强弱分界，系咪预示就算美国联储局减息，大市都已经反映得七七八八？美股后市会唔会出现回调？ “股市渔夫”创办人庄志雄指，现阶段要留意一啲高Beta、早前一窝蜂去炒嘅股份，情况就同2021年第1季“契妈热潮”一样，好多股票狂升，但之后好快就大跌。机构投资者唔会只买最大几只股份，而系增加对冲，依家嘅情况同2021年相似，所以有一定参考价值。 Lewis续指，未来40至50日有唔少重要事件可能会令波幅扩宽，包括Jackson Hole年会、英伟达(Nvidia)业绩、8月非农数据、通胀数字。此外，要留意联储局主席鲍威尔(Jerome Powell)9月会唔会减息，若最终唔减息，投资者应提前部署。 佢又话，7月纳指中线市宽跌穿50强弱分界，跌穿后要再回升有难度。“契妈”基金ARK Innovation ETF(ARKK)喺7月中开始见顶，之后畀市宽拉落嚟，依家超过一半呢类型嘅股份已经跌穿50天线，若指标跌到40以下，投资者就要小心指数会被大市拖累。 |
|
| 庄志雄 |
2025-08-13T15:53 |
美国7月消费物价指数(CPI)昨晚(12日)出炉，按年升2.7%，略低过预期，令联储局9月减息预期升温，年底前仲有3次议息会议，会唔会次次都减息？ “股市渔夫”创办人庄志雄指，如果跟据依家市场预期，嚟紧3次都会减，本身联储局会跟据利率期货情况去决定减唔减，7月尾嘅时候，主席鲍威尔(Jerome Powell)放鹰，市场就普遍认为唔减，但8月1日非农数据公布后，又比市场预期差，经济放缓减息预期突然又升温。 Lewis又话，利率期货浮动不定，容易被新消息影响走势，主要睇嘅超级核心通胀，指不包括食品、能源及租金过去几次都升，如果继续睇经济数据好难减到息，加上如果之后特朗普(Donald Trump)真系炒咗鲍威尔，联储局大换血，减完3次息之后，挞着通胀嘅机会好大，会好似2021至2022上半年咁控制唔到。 |
|
| 庄志雄 |
2025-08-06T15:21 |
美股“科技7雄”(Magnificent 7)中嘅Meta及微软(Microsoft)派完靓成绩表后，标指喺7月31日创过日内新高，但未能创收市新高，呢个情况已经系近年第3次，当中有咩启示？ “股市渔夫”创办人庄志雄指，7月25日标普500指数创收市新高后，连续出咗3支阴烛，Meta及Microsoft公布靓仔业绩后亦曾创日内新高，但就无法创收市新高，呢个情况对上两次分别系去年8月日圆爆拆仓潮，以及今年“解放日”(Liberation Day)前，两次美股都出现大调整。 Lewis补充，8月1日公布嘅美国就业数据远低于市场预期，令美国债息下跌，以往每当债息下跌都会有利美股，但今次美股反而跌得几急，情况少见，所以值得留意有无一啲突如其来嘅消息会影响股市。 佢认为，目前市场最容易忽略联储局主席鲍威尔(Jerome Powell)被解雇嘅风险，目前市场认为鲍威尔被解雇机率低于15%，但Lewis认为机率唔细，甚至可能高达50%，所以如果有消息刺激市场，造成嘅跌幅或会较大。 |
|
| 庄志雄 |
2025-07-23T15:07 |
若预期美国经济前景会较为暗淡，又或者会转差之下，投资者系咪都要密切留意美国长债息走向？尤其30年期长债息，依家已升至逾4.9厘。 “股市渔夫”创办人庄志雄指，股市短期未必同经济挂钩，尤其喺一个负利率环境下，其实系有利资产价格，依家处于一个相对稳定嘅情况，因为长债息仲未抽上去，之前试过几次冲上5厘水平，其后唔知系咪有一啲“有形之手”压返落去，到底压唔压得住都未知，对上一次冲上5厘系长债拍卖结果较差当日，之后又压返落去，呢个情况系要留意，如果联储局嚟紧真系减3次息，应该会刺激通胀，长债息就会跟住升上去。 债息落唔到去之余，股市一样落唔到去。 |
|
| 庄志雄 |
2025-07-09T15:48 |
市场持续关注关税问题进展，美国国债孳息率上升，30年期债息见1个月高位，高见4.974厘，10年期息亦已整固两年多，并升穿4.4厘关口，至4.435厘，美国总统特朗普(Donald Trump)宣布征收关税以及2024年9月减息时，美债息亦曾经一度受刺激飙高，债息短线应该如何预测？ “股市渔夫”创办人庄志雄指，美国大幅加征关税，令市场担心通胀预期升温，所以推高债息率，未来要留意10年期债息会否升至4.6厘的关键水平，始终10年期债息能够反映长远通胀预期，而对于30年期债息，5厘亦是关键位，当债息升至高位时，风险资产包括股市或加密货币(Cryptocurrency)等会受很大影响，虽然美国已表明关税暂缓期至8月1日完结后不会再延期，亦要再观察特朗普就关税政策上会否再有其他变更。 |
|
| 庄志雄 |
2025-07-02T15:48 |
回顾上半年，以欧洲高息股表现最好，点解呢类股份可以跑出？美股方面，虽然标指创新高，但其实都系落后，下半年进一步出现技术突破嘅机会有几大？ “股市渔夫”创办人庄志雄指，先回顾上半年造好嘅市场，上半年由于美汇指数跌咗逾10%，导致非美股市造好，尤其系欧洲，因为欧洲将会加大财政刺激措施，喺主要欧洲国家中，见到德国最明显增加咗未来投放喺军备嘅资源，所以德国股市连埋欧元升咗35%，而欧洲嘅价值型类别，例如银行股或金融股就带动高息股表现，连埋欧元升咗41%。 Lewis续指，由于人民币升幅冇欧元咁大，港元又同美元挂钩，加上大部分MSCI中国股票都系用港元计价，所以升18%都算唔错，跑赢埋被印度拖累嘅新兴市场。 美股方面，标指受美元拖累而落后，Lewis认为。 |
|
| 庄志雄 |
2025-06-18T15:31 |
中东局势紧张，美国总统特朗普(Donald Trump)昨日(17日)呼吁民众离开德黑兰，各国都加紧当地撤侨。年初至今，贵金属、商品价格、军工股，甚至以色列股市都跑赢美股，呢个情况系咪会持续？ “股市渔夫”创办人庄志雄指，金价去年已经跑赢标普500指数，今年继续大幅跑赢，金价嘅升势同今次以色列伊朗局势关系唔大，主要系因为投资者睇淡美金，加上忧虑美国财赤问题，令金价呢两年造好。 佢续指，反而与今次战事有关嘅系银价，银价近期升得较急，追上金价。而最近战事令军工生意大增，美国军工股ETF大幅跑赢标普500。 佢又话，以伊爆发战争后，银价升势比军工股ETF更强，因为银系做军工武器嘅原料，所以带挈银价造好。另一方面，以色列指数创新高，就算打紧仗，都跑赢美股。昨晚商品市场ETF亦创新高，战事令商品市场追落后。 庄志雄又指，若伊朗封锁海峡，或会令油价再上升，现时美国战略石油储备升至约4亿桶，若美国加速储备石油，石油需求会增加，伊朗封锁海峡可能会影响石油供应量，令油价继续喺商品市场中追落后。 |
|
| 庄志雄 |
2025-06-11T15:54 |
中美贸易谈判气氛缓和，带动股市向上，现时标指同历史高位只相距约2%，美股有冇机会破顶？美国明晚(12日)会拍卖长债，会唔会成为破顶嘅绊脚石？ “股市渔夫”创办人庄志雄指，短期而言，市场气氛有改善，因为中美喺关税问题上倾得埋，睇返纳指，虽然指数向上，但市宽仲未收复到跌市前嘅失地，意味可以升穿200天线嘅股份少，依家系用紧少数股份撑市。 Lewis又话，明晚拍卖30年期长债，债息冲上，导致价格波动，同投资者买长债嘅意欲背驰，但亦反映市场对未来通胀嘅睇法，中长期要留意联储局及通胀数据嘅配合，美股先有机会破顶。 |
|
| 庄志雄 |
2025-06-04T15:16 |
美元汇价今年累跌8%，主要受美国总统特朗普(Donald Trump)发动嘅关税战拖累，虽然依家略为降温，但其实市场都观望紧谈判进展及结果，包括特朗普今个星期系咪会同国家主席习近平通话，美元今年余下时间系咪会继续向下？ “股市渔夫”创办人庄志雄认为，美元跌除关税会影响美国通胀外，根据过往经验，关税问题唔系几个月可以倾得掂，甚至会拖成年，但投资者似乎已经投咗票，认为美元会弱，所以见到今年trade通胀、trade美元下跌嘅工具，表现系特别好，尤其是金属，金银铜价格都升逾20%，比特币(Bitcoin)价格都跑输佢哋，而美元下跌最受影响系美国资产，见到美债及标指今年仅升逾1%。 Lewis又话，对欧洲投资者嚟讲，揸住美元资产单系蚀汇价都8%至9%，因为欧元今年升咗10%，日圆都升咗9%，所以美元跌对好多外国投资者嚟讲，美国资产吸引力会大减。 |
|
| 庄志雄 |
2025-05-28T15:31 |
自从美国总统特朗普(Donald Trump)上任以嚟，涉及关税、财政及外交等争议不绝，甚至触发金融市场动荡，之前中美为关税战设咗90日“休战期”，7月初就会结束，不过，近期美国部分经济数据仍然强劲，其中，昨晚(27日)出炉嘅消费信心，录得4年以来最大单月升幅，并好过预期，消费者系咪太乐观？ “股市渔夫”创办人庄志雄指，哈佛商学院有一个美国零售品价格指数，而呢个指数喺特朗普宣布完解放日就已经飙升，本土产品定进口产品都大升，反映咗通胀预期，而喺正常情况下，本土产品唔应该太受关税影响，但见到指数明显高过3月，虽然5月12日宣布暂停关税之后，指数有纾缓迹象，但估计指数未来会继续升。 Lewis又指，睇返美国网站Truflation嘅实时指标，见到美国实质通胀指数同1个月前相比，已经升咗0.5个百分点，而呢个升幅系受关税影响，反映美国关税开始影响通胀。此外，长债拍卖反应差，都系受美国长期通胀影响，加上财赤问题及特朗普嘅政策，每样嘢都反映今年嘅减息空间会愈来愈细。 |
|
| 庄志雄 |
2025-05-07T16:30 |
中美贸易谈判似乎有新进展，双方高层有机会喺周末见面，不过，美股3大指数持续下跌，到底系咩原因限制大市反弹？港股后市系咪会好过美股？ “股市渔夫”创办人庄志雄指，市场一早就预咗会倾，问题系最后倾成点，除非好快倾完，同埋结果理想，但有得倾市场都price in咗唔少，美国总统特朗普(Donald Trump)转口风后，个市就弹咗上去，依家最好嘅结果系，走势好似2022年咁，当年主要系联储局要“收水”控制通胀，依家有两样嘢，首先系联储局仍然想控制通胀，原本预佢5月减息，之后延至6月，依家再推迟到7月，原因系担心关税会推高通胀，到底7月减唔减息，就要睇关税嘅影响，如果通胀升咗上去，下半年都好难减息。其次系特朗普所做嘅事，为市场带嚟咁大不明朗，令机构投资者唔会咁进取。 Lewis又话，如果睇短线，港股表现未必好过美股。 |
|
| 庄志雄 |
2025-04-23T15:26 |
美国发动关税战令投资市场大幅震荡，市场近期十分关注资金流出美国资产，导致美国股汇债齐跌，反观畀美国征税嘅贸易伙伴墨西哥、加拿大等，表现都好过美国，资金未来系咪都以流出美元资产为主？不过，美国总统特朗普(Donald Trump)最新喺关税问题上嘅态度，似乎又有软化迹象。 “股市渔夫”创办人庄志雄指，最麻烦系特朗普转来转去，因为投资者最怕系不确定性，如果做长线投资系数以年计，尤其机构投资者，如果连佢嘅团队都唔知，喺佢出个贴文后，所有嘢又要掉转嚟做，长线投资者会认为唔可以摆咁多资产喺美国呢个地区。 Lewis又话，睇返过去10年，尤其欧洲资金不断加码美国市场。 |
|
| 庄志雄 |
2025-04-16T15:36 |
关税战新闻日日都有，仲日日有新发展，搞到市场都疲于奔命兼无所适从，喺呢个乱局下，有避险功能嘅黄金，价格不断破顶，过去几个月涌入金市嘅资金系咪好多？ “股市渔夫”创办人庄志雄指，近期涌入金市嘅资金应该系多咗，尤其之前见到央行系买多咗黄金，同埋要留意近期金价升主要喺亚洲交易时段，呢个现象几有趣，所以大家可以留意下。 Lewis又话，见到基金经理态度出现180度转变，因为2月及3月美银做调查时，冇基金经理话要买黄金，但依家有49%话要建立长仓，变成最挤拥交易。佢续指，依家美债波动，但揸美债系求稳阵，所以投资者对美债嘅信心都弱咗，加上外国投资者系咪会再增持美债都系一大问号，所以资金涌入金市系好合理。 佢续称，依家金价呈抛物线式上升，即系由情绪主导，出现一啲恐慌，当金价愈扯愈急时，再去追入就唔系咁好，佢又提醒，呢种抛物线式上升可以升得好急，如果依家沽空有机会被夹死，揸住黄金嘅投资者可以继续持有或减磅，冇货就不宜高追。 |
|
| 庄志雄 |
2025-04-09T16:19 |
“中美贸易战”全面升级，美股近几个交易日都波动，日内波幅大，标指过往大跌后就会反弹，加上被称为“恐慌指标”的VIX指数升至不寻常高位，以往都会有正回报，目前是否“捞底”美股的好机会？ “股市渔夫”创办人庄志雄指，未经历过美股熊市的投资者，对大跌印象会是“每次跌完都会V型上返嚟”，例如2020年COVID及2008年矽谷银行(SVB)“爆煲”时，其实都因为有联储局撑着，才会令市场认为大跌后很快会回升。 Lewis续指，2008年那次是大跌40%后，再出现双位数跌幅，投资者才买入，所以值博率高，最后也有赚，但如果今次只跌20%就买入其实值博率不高，所以一年后未必赚，中间波幅非常大，所以提醒投资者，即使有赚也要有心理准备，有可能要跌30%至40%后才会反弹。 |
|
| 庄志雄 |
2025-04-02T16:34 |
“股市渔夫”创办人庄志雄指，港股今年的升浪，是由年初DeepSeek热潮所“点燃”；若果比对上一次港股科技指数，升势结束后的回调幅度介乎50%至62%计算，今次回调幅度最深只约38%，即是说，不排除科指仍有下调空间。 不过，Lewis指出，相较美股、港股仍可睇高一线，因为美股估值贵，值博空间较低。反之，MSCI中国指数盈利数据，经历连续13季负数后，最新数据很大机会由负转正，即是说，未来内地及香港的上市企业，有机会被调高盈利预测，利好港股向上。 他补充，若未来美股转差，市场规避风险(risk-off)，资金可能流向美元避险，届时港股或受影响。 |
|
| 庄志雄 |
2025-03-19T16:08 |
早前，市场憧憬俄乌停火，带动美股反弹，中资股更跑赢美股，美股系咪要继续调整？投资者系咪可以继续睇好港股？ “股市渔夫”创办人庄志雄指，最近美股反弹，其中，中资股表现唔错，甚至A股都做得好过美股，呢几日炒憧憬俄乌停火，CSI中国互联网指数升6%，沪深300指数升逾2%，都高过标指及纳指，美股市宽要跌至2023年低位约20%，才会触发较强劲嘅超买反弹，否则，弹几日又跌过。佢续指，港股走势唔错，愈嚟愈多股份升穿长期平均线150天线，亦有超过一半股份企喺150天线以上。 Lewis又话，港股市宽向上，代表愈嚟愈多落后股会追上嚟，例如阿里巴巴(09988)1月底至今持续强势，但佢建议，就算落后股有得升，都唔系选股嘅首选。 |
|
| 庄志雄 |
2025-03-12T16:20 |
美国总统特朗普(Donald Trump)上任已满50日，但暂时美股表现与他4年前首次任期对比，相差很远，有甚么要留意？甚么时候才可以买美股？ “股市渔夫”创办人庄志雄指，股市中有两个事项要留意，第一是估值，美股估值一向都超贵，他建议是“炒”而不是投资，且要看第二个因素--动力，去年美国指数上的动力是正面的，所以用“炒”的角度而言，用指数权重的工具会较好，可是今年特朗普“回朝”时，美股却失去了动力，而在估值贵的情况下没有动力会很麻烦，假如估值及动力变负面后，就会影响投资气氛，即投资者情绪。 Lewis续指，要等投资者情绪去到极度悲观才可以博美股反弹或回升，若要博回升，则要看到些基本因素改变，可以是估值跌到够便宜，或是新政府做的事开始有效，成功帮美国政府减债，能提升美国政府效率，能控制通胀等，但这些改变不会是两三个月的时间就可见的，而是需要一些长期的政策。 |
|
| 庄志雄 |
2025-03-05T18:23 |
近两个星期市场出现调整，特别系美股，加上受美国关税政策影响，似乎整个投资市场规避风险(risk-off)情绪高涨，风险胃纳(Risk Appetite)正在减退？ “股市渔夫”创办人庄志雄指，要判断市场系咪risk-off，最主要睇资产价格表现，当中分为两大类，一类系避险类资产，例如美债，另一类就系风险资产，例如股票。如果市场担心环球经济衰退，通常避险类资产，例如美债会做好。今次明显见过去两星期美债，特别系长期债交易所买卖基金(ETF)升幅较大。 Lewis又指，长期资产例如科技股，以往被视为优质资产，但今次反而跌得最多。虽然市场预料联储局今年减息空间由年初预计1至2次，变成接近3次，理论上有利风险资产，但仍都无阻科技股跌势。 至于另一避险资产黄金之前做好，但今次都有轻微跌幅。 整体而言，佢认为目前市场可以话系risk-off状态。 |
|
| 庄志雄 |
2025-02-19T15:43 |
DeepSeek面世后，在人工智能(AI)领域掀起了一场大战争，不过，不少大行都预计这个AI大模型可以提升内地企业的盈利能力，事实又是否如此？如果与美股“科技七雄”(Magnificent 7)比较，AI中资相关股份，价值如何？ “股市渔夫”创办人庄志雄指，普遍见到AI大模型的确有助中国企业提升效益，生产力上升同时，又能减省成本，见到2016年至2023年间，MSCI中国指数每年都有增长，若企业收入及竞争力能进一步提升，自然有望一并提升内地股市的估值。加上对比美国科技七雄，现时17万亿美元的估值，内地AI相关股份，更有估值“追落后”的优势。 |
|
| 庄志雄 |
2025-02-12T17:09 |
美国总统特朗普(Donald Trump)2.0关税实施以来，被征关税嘅股市今年以来一直跑出，反而暂未未被征税嘅盟友，股市表现就麻麻，情况同去年相反，点解会出现呢个情况？ “股市渔夫”创办人庄志雄指，始终特朗普系生意人，初期讲嘅嘢，到后尾落实可能有好大差距，所以更重要系依家睇到嘅资产价格表现。佢又话，年初至今已经差唔多30个交易日，有关税消息嘅国家或地区，明显都系跑赢标普500指数，仲有较特别嘅巴西，系旧“金砖四国”其中一个重要嘅国家，竟然系做得最好。中国市场方面，港股表现真系较差，A股造得最好系科技股，CSI中国互联网股市ETF位列第2。 此外，墨西哥股市截至昨晚(11日)美股收市止，累升9%，富时欧洲都系跑赢，同去年有好大分别，巴西去年系做得最差嘅股市，累跌30%，所以与其听关税消息，不如留意影响股市嘅两大因素，就系资金流向及估值。 Lewis认为，配置喺新兴市场嘅资金，其实都系跟住指数去睇表现，过去几星期，甚至未来一两个月，其实都要增加返A股及港股配置，尤其内地大型科技股，因为以估值角度睇，印度系贵，中国相对平，如果以科技股角度睇，外国价值投资者都会揸重货喺中资科技股，例如阿里巴巴(09988)，导致有估值差距喺度，依家资金流向似乎开始逆转，由新兴市场转去巴西、中国，所以大家要留意呢啲资金流。 |
|
| 庄志雄 |
2025-02-05T16:41 |
近期内地人工智能(AI)大模型DeepSeek爆红，难免会动摇投资者对美国AI巨头嘅信心，系咪会影响OpenAI旗下嘅聊天机械人ChatGPT嘅领先地位？ “股市渔夫”创办人庄志雄指，先讲机构投资者睇法，高盛做咗客户调查，而高盛嘅主要客户就系机构投资者，参考返高盛嘅客户调查，喺DeepSeek面世后，客户依然认为ChatGPT领先市场。 Lewis续指，佢自己认为以技术优势而言，OpenAI个名系好有误导性，反而DeepSeek系真系开源(Open Source)，OpenAI得个名叫Open，原本系由Tesla行政总裁马斯克(Elon Musk)等创办，当初理念系想AI模型开源，结果被OpenAI行政总裁奥特曼(Sam Altman)用招数抢夺公司，所以依家先会系闭源(Close AI)，不过，系Close定Open赢，其实都好难讲。另外，Sam Altman唔系一个科技人，Lewis认为真系科技人嘅Elon Musk依家都做紧AI，所以佢认为美国嗰面嘅xAI都有机会挑战到ChatGPT。 |
|
| 庄志雄 |
2025-01-22T16:25 |
美国总统特朗普(Donald Trump)上任后，喺关税方面未有即时行动，但昨日(21日)讲咗会考虑向加拿大及墨西哥加关税25%，到咗今朝(22日)就话考虑紧喺2025年2月1日加中国10%关税，虽然未正式出手，但都睇到有呢方面嘅Plan，特朗普关税政可能推高美国通胀嘅忧虑系咪升温？ “股市渔夫”创办人庄志雄指，市场其实一早消化咗特朗普要加关税呢个消息，不过，特朗普系生意人，唔可能一次过加得咁夸张令通胀升返，之前市场忧虑加征关税会加得好劲，依家变咗循序渐进咁加，留返空间比公司谂办法纾缓问题。 Lewis又话，投资者太低估货币政策带来嘅影响，通胀预期会影响长期资产，睇返联储局喺2024年12月议息会议嘅点阵图，预示今年减息次数只系2次，甚至可能不减反加，令一啲人工智能(AI)相关嘅股份都要跌，资金开始偏流向咗一啲安全资产。 |
|
| 庄志雄 |
2025-01-08T16:01 |
债息喺减息周期中抽升，历史上系非常罕见，美股3大指数昨晚(7日)反应负面，科技股显着受压，其中，英伟达(Nvidia)股价破顶后倒插。如果债息升唔停，边类股票或资产会受最大影响？ “股市渔夫”创办人庄志雄指，美债系长期资产嘅基准，尤其是优质股，例如科技股交易所买卖基金(ETF)XLK，债息升就会令长期资产估值受压，债息扯得愈高，市场就会要求呢啲长期资产嘅估值下降。 佢续指，特朗普(Donald Trump)当选美国总统后，科技股ETF曾尝试突破2024年7月高位，但去年12月尝试突破失败，就系因为联邦公开市场委员会(FOMC)去年12月会议后，市场知道2025年会放慢减息步伐，XLK即失咗突破动力，已半年冇录得升幅，投资者要留意，过去半年冇升幅究竟系整固还是系派货，但正常整固系唔需要半年咁耐。 Lewis又话，企业高层亦冇买入自己公司嘅股份，知情人士交易亦系10年以嚟最少，若企业高层认为特朗普上任后，公司股价会升，理应喺现阶段入货，因此，佢建议散户先减少杠杆，再小心留意股价未来嘅走向。 |
|
| 庄志雄 |
2024-12-30T17:20 |
美股今年表现强劲，标普500指数累升约25%，主要系靠大股撑起整个升势，高盛估计，相比标指其他股份嘅股价，明年“科技7雄”(Magnificent 7)跑赢幅度将唔及今年及去年咁劲，估计只会跑赢7个百分点，而上一次出现相若情况系2018年，相比2018年，依家嘅情况系好咗还是更差？ “股市渔夫”创办人庄志雄指，依家嘅情况同2018年好唔同，市宽50%系牛熊分界，现时市宽低过50%，代表有超过一半嘅股票跌穿200天线，意味超过一半嘅股票有“蟹货”，睇返2018年初，市宽约65%，当时大部分股票都冇“蟹货”，并企喺200天线楼上，若2025年开局冇太大变化，2025年嘅市宽将会低过2018年，反映大市明显弱过2018年，当年“7雄”只系跑赢大市8个百分点，估计2025年“7雄”表现将会比大市更差。 Lewis又话，2018年第4季，标指迫近历史高位，但市宽跌穿50%，当时美国联储局做错决定，依家联储局亦有机会做错决定，所以要小心大市及大型科技股会大跌。 |
|
| 庄志雄 |
2024-12-11T15:20 |
美股近日受压，其中，道指已连跌4个交易日，系咪嚟到年底开始有啲疲态？展望明年，美股又会点走，特朗普将会喺明年1月20日正式上任，美股明年最大风险又喺边度？睇返特朗普上个任期，初期美元都强势，但好快就回落，今次会唔会历史重演机会大唔大？ “股市渔夫”创办人庄志雄指，上星期都提及，希望Trump Trade股票升完一浸后，科技股可以接力推高股市，最简单就睇科技指数交易所买卖基金(ETF)，呢只ETF唔包括Tesla，而苹果公司(Apple Inc.)、英伟达(Nvidia)及微软(Microsoft)呢3大股王占比高达40%，而上星期中就出现突破，冲破咗7月特朗普遇袭前后高位，呢个系一个主要阻力，原本走势几好，但去到昨晚(11日)跌返落嚟，依家希望可以守到趋势线，如果守唔到就要小心。 |
|
| 庄志雄 |
2024-12-04T15:39 |
自特朗普(Donald Trump)胜出美国总统大选后，美股上升速度似乎加快，佢主张嘅“美国优先”及减税措施，预期可惠及小型企业，特朗普嘅政策对美股以至其他股市有咩影响？ “股市渔夫”创办人庄志雄表示，喺特朗普当选后，美股整体表现结构出现转变，过往带动大市嘅功臣“科技7雄”(Magnificent 7)，喺呢段时间嘅表现反而较为失色，而特朗普当选至今，表现最好系标普600小型股指数，其次系标普400中型股指数。不过，自12月开始，纳指综合指数及纳指100指数都开始追紧上嚟，整体嚟讲，小型股表现好过大型股，希望科技股喺12月可以接力，延续美股嘅升势。 Lewis又话，特朗普当选后，对新兴市场影响较大，港股跌势亦加剧，因为市场始终忧虑关税问题，以及对华政策可能“偏鹰”，加上市场之前期望中央再推出大规模刺激经济措施，但最终失望而回。 |
|
| 庄志雄 |
2024-11-27T15:57 |
近年不断买入比特币(Bitcoin)嘅持仓大户MicroStrategy(MSTR.US)，再度成为热炒对象，触发点系特朗普(Donald Trump)赢咗美国总统大选，虽然之前畀沽空机构香橼研究(Citron Research)狙击，但股价今年升幅仲大过人工智能(AI)晶片股王英伟达(Nvidia)。 “股市渔夫”创办人庄志雄指，特朗普当选后，MicroStrategy更成为市场焦点，Bitcoin再受关注呢个都系触发点，而MSTR嘅操作更加系火上加油。 MicroStrategy主席Michael Saylor基本上一直系单边睇好Bitcoin，佢最新估计Bitcoin每粒可升至1300万美元，如果升到呢个价世界应该民不聊生。 |
|
| 庄志雄 |
2024-11-20T16:33 |
“特朗普(Donald Trump)2.0”时代来临，资金持续流入科技、通讯服务板块，但呢两个星期都见到医疗保健都有唔少资金流入，点解会出现呢个情况？短线再升空间大唔大？ “股市渔夫”创办人庄志雄指，之前提过特朗普一当选就会提名甘迺迪(Robert F. Kennedy Jr.)掌管卫生部门，令医疗相关股份例如药股、一啲大型药厂由高位跌咗20%至30%，一啲高位唔敢入场嘅投资者就趁机买入，有部分资金流入咗药股市场。 Lewis又提到，睇返美银报告，仍然最多资金流入科技、医师保健、通讯服务及非必需消费品呢4个板块，不过，即使绝大部分资金流入科技板块，都仍未破到7月顶位，因为投资者多数喺特朗普宣布当选后，先再追入科技股，或者喺高位等突破，令到啲货就锁住咗，变晒“蟹货”。 |
|
| 庄志雄 |
2024-11-01T15:25 |
美国总统大选已进入倒数阶段，不论资产市场表现、民调等，都显示特朗普(Donald Trump)好大机会再入主白宫。 “股市渔夫”创办人庄志雄指，仲有啲民调指贺锦丽(Kamala Harris)会赢，但如果睇博彩公司赔率、股市表现，同埋一啲有权威性嘅机构，因为佢哋唔止睇民调，仲会睇数据后做一啲模型，呢几方面都显示特朗普胜算较大，今日想讲下如果真系特朗普胜出，有边啲板块最受影响，市场好多时都系讲“Trump Trade”，有乜嘢系特朗普上场要买，但由于佢胜算增加，其实已偷步炒咗，但有部分就会受影响。 受影响会系乜嘢？科技股昨晚(10月31日)开始有受压嘅情况，纳指中线市宽失守50水平，科技股未来会唔会受影响？此外。 |
|