| 评论员 |
时间 |
内容 |
标签 |
| 关焯照 |
2026-04-17T15:54 |
美国科技股持续强势，升势主要集中喺晶片及费城半导体指数(SOX)，并已连升12个交易日，相关板块，包括存储、光通讯及储能，投资者可以点部署？ 冠域商业及经济研究中心主任关焯照认为，其实主要同资金流动有关，今轮大跌市当中，最强势板块系存储、光通讯、储能及记忆体股，几乎所有资金都追逐呢啲板块，因为要建设数据中心，大企业就要投放好多钱去做基建。 关博士又话，科技股都有个Pattern，就系“其他股跌，佢就破顶”，当大市跌定后，因为已经赚咗唔少，就会喺高位沽货获利，然后再买返指数股“科技7雄”(Magnificent 7)，就带动“M7”急升。 佢续指，昨日(16日)开始，光通讯股如Lumentum，股价开始反弹，反映资金开始由指数股转投呢类强势股。关博士估计，未来几日强势股会继续升，但由于已极度超买，要小心唔应该再追指数。 |
|
| 关焯照 |
2026-03-27T17:56 |
美国总统特朗普(Donald Trump)今个星期就中东局势多次转軑，市场反应一次比一次平淡，有“恐惧指数”之称嘅VIX继续喺35至36窄幅上落，明显低于过往爆发危机时嘅60至70，系咪反映市场已经唔系太担心？ 冠域商业及经济研究中心主任关焯照表示，虽然TACO效应仍然存在，而市场亦确实继续跟随特朗普嘅言论波动，但效应愈嚟愈短暂。佢又指，近期特朗普已反覆TACO咗4至5次，早前，宣布推迟攻击伊朗能源设施时，市场一度大幅反弹，但今次美国提出15项停火条件，又声称同伊朗埋台倾，但今次市场反应非常温和，10年期债息只系轻微下跌，反映市场对特朗普嘅言论已视为“狼来了”，变得麻木，反映市场唔再相信佢嘅言论。 关博士又话，喺过往嘅危机中，美国短债一般会表现较好，但今次已经唔奏效，意味着未来债务问题将会更棘手。佢续指，其实都睇到美国想缩，但冇一个下台阶，但由于市场力量已经大过特朗普，但无论如何，佢都要喺未来2至3个星期内揾到方法解决事件，令战事平息。 |
|
| 关焯照 |
2026-03-06T15:12 |
美以伊战事发展左右环球投资市场大局，乱局下要精准拣股绝对唔易，近期热炒嘅电力设备股，例如东方电气(01072)、哈尔滨电气(01133)，以及人工智能(AI)相关股潍柴动力(02338)系咪可以继续睇好？ 冠域商业及经济研究中心主任关焯照表示，由于内地要持续发展AI，AI数据中心需要庞大嘅电力供应，加上有“以旧换新”等政策支持，设备需求较大，所以见到过去几季，电力设备股表现亮丽，值得留意系，东方电气依家可以从外国客户攞到定单，令定单量急增，因此，预期股价未来会持续强势。 关博士又话，潍柴近年重新专注电力设备业务，加上储能方面出现突破，尤其氢气、电池等，令集团嘅电力设备基础性变强，虽然现时股价相对落后，但相信未来会转强。 |
|
| 关焯照 |
2026-02-20T15:25 |
今日(20日)系港股马年第一个交易日，可惜未能红盘高开，恒生指数一度挫逾300点，重磅科技股弱势，其中，腾讯控股(00700)、阿里巴巴(09988)、百度集团(09888)、网易(09999)及快手(01024)跌至最少1个月低位，不过，地产收租股及国产人工智能(AI)概念股买盘好劲，大股唔得，指数又弱，马年开局似乎都考起唔少散户？ 冠域商业及经济研究中心主任关焯照指，恒指支持位暂时喺50天及100天线交汇点，依家市场冇乜特别消息，A股又“放假”，现时外围担心美国向伊朗发动军事行动，加上美股近期回落，恒指都会受外围情绪影响。佢补充，依家大股冇乜动力，投资者可以观望下周三(25日)发表嘅《财政预算案》，同埋3月召开嘅“两会”有冇重磅政策出台，为市场带嚟新刺激。 关博士又话，虽然港股嘅大型科企都有投资AI，但市场担心可能会步美国“科技7雄”后尘，担心资本开支(CapEx)嘅盈利转化能力，再加上内需疲弱兼有“内卷”问题，短线而言，建议尽量避开呢类股份，转向一啲容易炒嘅板块。 |
|
| 关焯照 |
2026-02-06T16:03 |
美股3大指数昨晚都要跌，其中，纳指已连跌3日，今年更由升转跌，虽然美国经济有转差迹象，地缘局势又不稳，但内需股相对强势，呢类股份系咪值得跟进？ 冠域商业及经济研究中心主任关焯照博士认为，其实已经有部分资金转战内需股，例如Dollar General呢类有折扣嘅铺头，股价其实一直有得升，Johnson & Johnson亦升咗唔少，而GAP更升上近期高位。 关博士解释，呢啲都系消费及医药股，如果有资金流入，喺股市震荡时一般都会升，佢又话，内需股其中一个卖点系有好高防守力。 |
|
| 关焯照 |
2026-01-23T18:03 |
日本首相高市早苗今日(23日)宣布解散国会，提前下月举行大选，市场料有利她日后推行宽松政策，加重日本债务负担。日本债券被抛售，债息急升。日本10年期债息一度升至2.35厘，近日稍微回落，但央行今日调升通胀预测，令加息预期升温，10年期债息再回升。不少人担心日本债市会爆，日债息急升会影响美国债息等，投资者有什么要留意？ 冠域商业及经济研究中心主任关焯照指，日本过往维持债息0水平多年，现在息口逐步提升，因为近年日本通胀攀升，加息压力令长债息上升。另外，高市早苗赢面大，又称会推行扩充性财政政策，日本政府开支增加，加大发债也是原因之一。 关博士表示，不担心日本债市爆煲，事关日本老龄化严重，60岁或以上人口是最有钱的一群，他们的资产以现金为主，有买长债的需求，而且日本人爱国，90%以上国债由日本国民持有，相信不会对本土经济不利。 |
|
| 关焯照 |
2026-01-09T15:58 |
踏入2026年，港股攞完头彩之后，似乎无以为继，1月首3个交易日累升千点，但之后连续两个交易日回套，累跌逾500点。虽然内地最新通胀数据符预期，令通缩忧虑略为纾缓，但港股仍然弹唔起，但恒生指数暂时仍可企稳26000关楼上，港股要出现突破欠缺咩关键因素？ 冠域商业及经济研究中心主任关焯照表示，依家港股市盈率(PE)约13倍，虽然估值较外围市场低，但估值低唔代表有买入价值，投资者更着重市场增长动力，现时港股欠缺强劲嘅企业盈利支持，同埋鲜明嘅投资主题。 关博士又指，市场估计，港企今年盈利增长介乎7%至9%，相比之下，美国企业增长强劲得多，佢认为，除非出现突发性利好因素，例如美国联储局减息幅度超预期，或者内地有政策因素利好香港，否则，单靠A股上升或小幅减息，港股好难大升向上突破。 |
|
| 关焯照 |
2025-12-19T15:26 |
美国劳工统计局昨晚(18日)出咗11月消费物价指数(CPI)，按年升2.7%，低过市场预期，不过，有唔少市场分析指，通胀爆冷急降温同政府停摆有关，原因系收集唔到数据，令数据参考价值性不足，点解读上月CPI数据？ 冠域商业及经济研究中心主任关焯照指，经济数据当然以最新数字为准，所以10月份数据已冇乜参考价值，美国政府11月上旬结束停摆，有足够时间收集数据，整体通胀本身就处于一个“down trend”状态。 关博士又话，美国通胀会逐步受控，重返一个温和增长趋势，CPI唔系一个政策性通胀目标，而个人消费支出物价指数(PCE)较联储局预期行得快，变相比多咗空间联储局减息。 |
|
| 关焯照 |
2025-12-05T14:54 |
美国联储局将于下周议息，市场预期好大机会减息0.25厘，相信会利好股市表现，之后就轮到日本央行议息，依家加息预期明显升温，两大央行议息结果会点影响市场？ 冠域商业及经济研究中心主任关焯照认为，日央行系有机会加息，但加幅唔会考虑市场反应，上次日圆拆仓潮拖累日股单日暴泻几千点，若日圆急速下滑一定会影响全球股市。佢又话，上了宝贵一课后，相信日央行会更懂得管理市场期望，所以日圆未来会逐步转强，唔使太担心加息会引爆拆仓潮。 美国息口方面，关博士就话，要留意联储局主席鲍威尔(Jerome Powell)嘅言论，尤其近日美国劳动市场疲弱，相信联储局会以劳动市场风险为主轴去平衡美国通胀，因此，预期明年减息次数应多于1次。 |
|
| 关焯照 |
2025-11-21T14:54 |
美股昨晚(20日)又冧，仲要单日转向，如果睇返纳指100已自高位回落近5%，值得留意系，今次支大阴烛同10月10日嗰次跌市有啲相似，都系当日跌完又升过，点睇今轮跌浪，会唔会依家先系冧市嘅开始？ 冠域商业及经济研究中心主任关焯照指，10月10日业绩期仲未开始，所以啲人都唔敢沽落去，翌日就弹返上去，开始冚仓夹返上去兼破顶，但今次就有少少特别，因为英伟达(Nvidia)都出咗业绩，加上大市喺高位行咗咁耐，一般都会借业绩好消息出货。 关博士续指，依家估值过高之余，又担心人工智能(AI)泡沫，标指市盈率(PE)高过10年平均，所以就借势调整，而AI概念股更被“腰斩”，跟住就轮到“科技7雄”(Magnificent 7)，但苹果公司(Apple Inc.)跌得唔多，因为佢冇AI。佢又话，今轮跌市主要受去杠杆等3个因素影响。 |
|
| 关焯照 |
2025-11-05T16:34 |
美国高估值科技股大跌，市场关注美国最高法院周三(5日)审理美国总统特朗普(Donald Trump)实施“对等关税”是否合法，加上联邦政府进入第36日停摆，各种不明朗因素影响下，美股科技股可如何部署？ 冠域商业及经济研究中心主任关焯照指，法院审理关税案非常值得关注，如果对等关税被判不合法，会增加美股不确定性，已收取的关税要退回各国，但另一方面可减轻通胀压力，令联储局有更大减息空间。不过若判为合法，意味对等关税尘埃落定，可减低美股的不确定性，只要英伟达(Nvidia)业绩造好，可带动美股科技股升势，但通胀压力仍会阻碍联储局减息，不利经济前景。 关博士又指，相信未来两至三年Nvidia的增长加快，加上持续与不同公司合作，可考虑趁低吸纳。 |
|
| 关焯照 |
2025-10-17T16:21 |
美国两间地区性银行Zions Bancorp(齐昂银行)及Western Aliance Bancorp(西联银行)披露咗涉及欺诈、坏帐嘅贷款问题，需进行大额拨备，令市场担心地区银行爆煲危机再现，加上中美紧张关系，又忧虑科技股估值过高，以及市宽唔够阔，升势愈嚟愈集中，美股今季表现系咪要睇得审慎啲？ 冠域商业及经济研究中心主任关焯照指，唔会改变标指年底见6800点嘅目标，依家市场由人工智能(AI)革命主导，加上普遍大型银行第3季业绩相当理想，只系依家美国银行股股价炒得太高，业绩期撞正地区性银行嘅问题，正好系价格回调嘅契机，但业绩期有价格波动嘅风险，投资者宜酌量减磅。 关博士又指，市宽唔系影响市况嘅因素，市值较高嘅公司都系做AI相关工作，持有资金亦比较多，股价升时自然会带动市场。 |
|
| 关焯照 |
2025-10-10T15:32 |
今个星期初，市场再出现质疑人工智能(AI)投资回报嘅声音，摩根大通行政总裁戴蒙(Jamie Dimon)比咗个温馨提示，叫市场及投资者小心AI泡沫。到底有冇出现AI泡沫，第4季应唔应该加仓？ 冠域商业及经济研究中心主任关焯照认为，AI热潮仍未退却，而系啱啱开始，佢形容系一场革命，呢类股份未来会呈震荡上升格局，虽然升得快，但唔需要担心，因为之后会逐步自行修正，亦唔存在所谓嘅泡沫。 美股方面，关博士估计，业绩期结束后，大市将会出现调整，之后会再发力向上，不妨等标指由6700点调整至6400点，再睇下边类板块硬净，到时再考虑入市或加仓。 |
|
| 关焯照 |
2025-09-26T16:14 |
美股估值一直偏高，尤其系科技股，纳指市盈率(PE)最新高达35倍，近来美国科技巨企有互相投资及入股嘅动作，到底呢啲科企巨无霸结盟会唔会造成泡沫？还是系建立紧一个人工智能(AI)生态圈？ 冠域商业及经济研究中心主任关焯照认为，唔需要太担心纳指PE高，因为AI市场仍处于成长阶段，先行者如“科技7雄”(Magnificent 7)会最先“收成”，由于市场预期市长快速增长，股价必定会被推高，令纳指PE行得好快。 对于呢啲科企巨无霸结盟，关博士认为，现阶段属于正常发展，因为AI市场都需要有先行者打好基础，后来者学习及拉近差距，甚至好似当年苹果公司(Apple Inc.)，完全改变行业生态，佢又认为，真正嘅“科技股王”仍未出现。 |
|
| 关焯照 |
2025-09-19T16:38 |
美国联储局日前启动咗今年首次减息，刺激美股3大指数连同反映中小型股表现嘅罗素2000指数齐齐破顶，大市似乎形势大好，第4季可唔可以延续升势？ 冠域商业及经济研究中心主任关焯照指，虽然几个指数齐破顶，但其实绝对唔平均，其中，罗素2000仍然系大落后，今次联储局减息符合预期，但只系一种保险做法，反映美国经济仍有韧性，减息主要系一个平衡作用。 关博士又话，美国企业盈利理想，加上人工智能(AI)推动，相信美股升势可延续至第4季，虽然“三巫日”(即股票期货、股票指数期货及个股期货同时到期)会有少少技术波动，但都属于正常，始终整体大市趋势向上，建议有货嘅投资者，可以考虑“慢慢坐”。 |
|
| 关焯照 |
2025-08-29T16:13 |
恒生指数今个星期一度迫近26000关，再冲上4年高位，但美团(03690)交出一份令市场惊吓嘅业绩后，拖累恒指掉头向下，冠域商业及经济研究中心主任关焯照早前将恒指目标定喺26500点，依家需唔需要调整？ 关焯照指，港股受惠于A股强势，4月至今A股升幅相当理想，过去1年，上证综合指数累升约35%，恒指更累升约40%。佢又话，内地股市造好，加上资金持续流入及减息，理论上港股仍然有运行，虽然美团业绩差过预期令市场大失信心，但美团喺恒指嘅比重只占约4%，所以影响唔大。 关博士又相信，汇丰控股(00005)、中国移动(00941)能够向上，友邦保险(01299)有维稳动作，如果内银出完业绩后可以企稳，恒指未来几个月有机会向上，因此，26500点呢个目标年底前仍有机会达到。 |
|
| 关焯照 |
2025-08-15T15:55 |
美国7月消费物价指数(CPI)及生产物价指数(PPI)已先后出炉，正当市场以为CPI数据令联储局9月减息机会大增之际，PPI升幅爆冷远超市场预期，或令8月CPI急升，点解7月PPI高过市场预期咁多？月初非农数据公布后，美股出现波动，但3大指数昨晚(14日)表现冷静，系咪相比通胀，市场更担心劳工市场嘅情况？ 冠域商业及经济研究中心主任关焯照指，7月PPI可以睇到关税嘅影响，尤其系原材料大幅加税后，佢又指，CPI走势要视乎企业会唔会将关税成本转嫁畀消费者，但喺经济环境欠佳时，企业就会谂办法自己“啃”关税，例如用人工智能(AI)技术降低成本，所以8月CPI未必一定大升，现时数据模型预测，美国通胀会升0.3%至0.4%。 关博士又提及，劳工市场数据滞后，亦好影响消费情绪，所以比通胀更能反映经济，虽然劳动市场情况较2、3年前有改善，但仍然唔系一个理想水平。 |
|
| 关焯照 |
2025-08-01T15:39 |
今日(1日)系美国对等关税(Reciprocal Tariff)“大限”嘅大日子，美国总统特朗普(Donald Trump)已签咗行政命令，向69个贸易伙伴征收10%至41%关税，将会喺7日后生效，不过，加拿大关税就加到35%，到底仲有冇得倾？对市场气氛有咩影响？ 冠域商业及经济研究中心主任关焯照指，大部分国家嘅关税已经落实，一啲未倾掂数嘅国家就被征收较高关税，当中有“惩罚”意味，由于加拿大政府嘅代表态度强硬，所以最终关税税率仍然系未知之数，但特朗普都要考虑通胀压力问题，所以最终税率有机会系25%或以下。 关博士又指，整体税收水平明显较以往高，亦符合特朗普政府希望改善财赤嘅目标，虽然政策短期有助改善财政状况，但长远有机会影响同盟友嘅关系，贸易政策变咗战略工具，令其他国家对美国戒心更大，或会减少跟美国嘅贸易比重。 |
|
| 关焯照 |
2025-07-11T15:45 |
人工智能(AI)晶片龙头英伟达(Nvidia)市值，昨日(10日)收市首次升穿4万亿美元，更成为美国首家市值突破呢个水平嘅企业。自美国总统特朗普(Donald Trump)喺4月2日宣布对等关税(Reciprocal Tariff)以嚟，Nvidia市值已累升48%，呢只AI晶片股王“身价”可唔可以更上层楼？ 冠域商业及经济研究中心主任关焯照指，Nvidia市值到现水平，短期好难再急升，但集团仍有增长空间，计返大行畀Nvidia嘅目标价平均约180美元，现价就喺160美元水平，即系仲有逾10美元上升空间。 关博士续指，Nvidia市值会慢慢再升，虽然美股之中仍有一啲单日可以大升逾10%嘅股份，但Nvidia相比其他公司，除咗生态圈较强，亦主导AI发展，所以论安全性，都系建议拣返Nvidia。 |
|
| 关焯照 |
2025-07-04T16:47 |
金融管理局喺短短1个星期内，4度出手买入港元，累计接咗591亿港元沽盘，由于资金流出港元，恒生指数今日(4日)一度泻逾300点，之后喺科技股带动下，一度重上24000关，由于港股市底唔算太差，资金都继续买货，近期较偏好高息股，息率6厘以上兼稳定派息嘅股份，系咪可以睇高一线？ 冠域商业及经济研究中心主任关焯照指，唔排除未来几个月喺美元转弱下，会短暂推高恒指，不过，早前有大量资金流走令市场气氛转差，虽然阿里巴巴(09988)及阿里健康(00241)今日受消息影响异动，但由于A股表现唔错，可以为港股带来一啲支持。 关博士又话，资金偏好香港电讯(06823)、恒生高息股(03466)等高息股，尤其喺美国减息预期下令息差扩阔，资金有好大诱因流入呢啲股份。 |
|
| 关焯照 |
2025-06-20T15:37 |
以伊战乱、关税战及俄乌战事相继恶化，虽然面临呢3个重大不明朗因素，美股表现仍然硬净，其中，标指更出现黄金交叉讯号，而每次出现呢个情况，美股都会辗转向上，系咪意味美股有机会破顶？港股方面，恒生指数上半年曾突破24000关，下半年有冇机会再推高啲？ 冠域商业及经济研究中心主任关焯照指，自1980年以嚟，美股出现过14次大幅调整嘅熊市，每次喺低位反弹都出现20天线升穿200天线嘅情况，大市都录得可观升幅，甚至破顶，用黄金交叉计，每次最少升逾20%，最多更高达60%至70%，虽然依家离低位过千点，但根据过往经验，相信美股仲有上望空间，破顶机会亦非常高，想打安全牌嘅投资者，可以选择买交易所买卖基金(ETF)。 港股方面，关博士指，恒指依家已经喺23000点水平，认为上望空间唔大，虽然下半年应该可以爬返上24000至25000点，但要升上更高水平，就要有中央嘅新经济政策推动。 |
|
| 关焯照 |
2025-06-06T16:13 |
国家主席习近平跟美国总统特朗普(Donald Trump)昨日(5日)通话气氛唔错，但市场似乎冇乜反应，始终对话未有实质内容，市场普遍预期，中美谈判唔会咁快有结果，加上特朗普处事太反覆，市场担心会再出现变数。另一方面，Tesla行政总裁马斯克(Elon Musk)炮轰减税法案《大而美法案》(One Big Beautiful Bill Act)，导致两人决裂，特朗普威胁终止马斯克旗下公司嘅政府合约，导致Tesla股价昨晚大冧，市值单日蒸发逾千亿美元，点睇美股6月表现？ 冠域商业及经济研究中心主任关焯照指，特马不和短期对Tesla肯定冇好处，依家股价正反映紧呢个不明朗因素，因为唔知特朗普会唔会再出招对付马斯克，不过，废除减税法案亦唔系一个好主意，虽然减税法案会增加债务及财政负担，但冇咗呢个法案，特朗普可能会出另一招，不确定性会更大。 关博士估计，美股已见底，暂时已经脱险，但短期将持续波动，可唔可以破顶要视乎标指企业盈利表现，同埋美国之后会唔会推出利好美股嘅政策。 |
|
| 关焯照 |
2025-05-23T16:15 |
1个月拆息今日(23日)一度跌至0.58厘，市场认为，拆息回落同资金预备认购大型新股宁德时代(03750)有关，宁德时代上市后，新股接连有好表现，系咪代表认购宁德时代嘅资金有意接力抽其他新股？ 冠域商业及经济研究中心主任关焯照指，美国政策带来嘅不确定性，令美元资产需求减弱，资金就会流入其他市场，包括亚洲区，香港只系其中一个受惠嘅市场，所以资金流入同香港本身嘅优势冇关。 关博士又话，资金流入香港会推低拆息，有助市场资金流动性，以及带动市场气氛，但佢认为，流入香港嘅资金未必全部都同抽新股有关。 |
|
| 关焯照 |
2025-05-15T11:02 |
美国总统特朗普(Donald Trump)率领科技企业代表团出访中东，成功签咗好多大Deal，市传英伟达(Nvidia)将会向中东国家出售大量先进人工智能(AI)晶片，晶片企业似乎系今次中东之旅嘅大赢家，系咪可以带挈相关股份再展升浪？ 冠域商业及经济研究中心主任关焯照认为，Nvidia股价逐步破顶主要系近日走强，主要受市场利好消息及risk on mode推动。佢又认为，今次喺中东攞到大生意系时机问题，因为呢啲国家现时有庞大嘅科技需求。 关博士续指，投资者毋须担心Nvidia业绩，因为今次喺中东接到嘅额外定单，业绩嘅利好预期可以持续至明年，佢又估计，Nvidia股价仍有上升空间，但要升穿高位有难度。 |
|
| 关焯照 |
2025-05-09T15:43 |
美国昨晚(8日)同英国达成今轮贸易战以嚟首份贸易协议，带动美股3大指数隔晚一度大升，收市升0.5%至逾1%，升幅收窄系受富人税消息拖累，中美今个周末就会展开贸易谈判，会点反映喺美股身上？会唔会好似英美一样传嚟好消息？ 冠域商业及经济研究中心主任关焯照指，美英达成今轮贸易战首份协议，市场认为气氛好转，但英国唔系美国主要入口嘅贸易伙伴，所以重要性唔大，投资者唔好将美英协议睇得太重。 关博士又话，依家中国系美国第2大入口国，所以要达成协议嘅难度几高，timing上系对美国不利，因为特朗普(Donald Trump)嘅民望愈嚟愈低落，加上唔可以将关税拖延到中期大选之后，最少要喺明年初之前同中国倾掂数，所以有好大迫切性，佢估计，美国最后只会向中国货品加征20%至25%关税。 |
|
| 关焯照 |
2025-04-25T15:48 |
美股几乎重返4月初特朗普(Donald Trump)政府公布关税详情嘅水平，虽然市场对中美关税谈判有唔同揣测，但近期嘅消息明显纾缓投资市场对关税战持续恶化嘅忧虑，而特朗普近期嘅态度，似乎反映佢喺关税问题上有软化迹象。此外，据《彭博》最新报道，中国考虑豁免部分美国进口货反制关税，包括医疗设备、乙烷等化工原料，睇返关税战最新发展，再睇埋美股3大指数近日走势，美股系咪已经脱险？ 冠域商业及经济研究中心主任关焯照指，其实中美“一刀切”只会令双方利益受损，佢相信中美会进行贸易谈判，而呢类消息可大大纾缓市场恐慌情绪。 值得留意系，美股几个主要指数如纳指、罗素2000及标指，最少连续两日企喺20天线楼上，已经去返一个比较安全嘅地带，佢又认为美股会慢慢回稳。 |
|
| 关焯照 |
2025-04-17T10:24 |
联储局主席鲍威尔(Jerome Powell)昨晚(16日)指，关税可能令通胀升温及经济增长下降，坦言对局方带嚟挑战，但佢冇就今年利率走向作出任何暗示。如果睇返鲍威尔昨晚嘅言论，联储局紧急减息都应该唔使谂，现阶段系咪要避开美元资产？ 冠域商业及经济研究中心主任关焯照指，依家嘅情况未需要急于减息，因为经济数据仲未出，尤其近期嘅通胀数据低过预期，虽然预期通胀未来有上升压力，加上美元转弱，虽然有入口通胀会令人担心，但实际上消费信心会唔会令经济转差，因为密歇根大学消费信心指数大幅下滑，呢个系一个衰退水平。 关博士又话，依家有两个问题，首先系预期通胀升上高水平，其次系失业率飙升，会慢慢形成滞胀风险，不过，呢个唔会系一个极大风险，但当失业率大升及好多企业破产时，联储局就要紧急减息，但就算未来一至两季减息，幅度及次数都唔会好多。 美元资产方面，佢认为，若特朗普(Donald Trump)政府嘅政策继续摆动性咁高，投资者一定会失去兴趣。 |
|
| 关焯照 |
2025-03-28T16:05 |
美国总统特朗普(Donald Trump)将会喺下周三(4月2日)公布新一轮关税措施，政策公布前，市场充斥不确定性及忧虑，对美股后市有咩影响？上半年个顶系咪已经见咗？ 冠域商业及经济研究中心主任关焯照认为，美股应该已见顶，依家最大问题系业绩期就快杀到，而市场对政策嘅不明朗嘅忧虑太大，所以大部分企业嘅业绩指引都比较保守，其中，联邦快递(FedEx)下调咗全年指引，美国达美航空(Delta Air Lines)就调低首季收入及盈利预测，企业指引保守一般都会拖低股价。 关博士续指，就算系过去两年表现强劲嘅“科技七雄”(Magnificent 7)，股价都要受压，暂时表现最强势嘅Facebook及Instagram母公司Meta，股价都只系可以守住600美元，所以整体美股都因为业绩期来临而变得唔太乐观，现阶段系易跌难升。 佢又话，依家最重要系4月2日公布嘅新关税政策，如果同之前差唔多，投资者忧虑细咗，美股有机会轻微反弹。 |
|
| 关焯照 |
2025-03-14T17:35 |
美国今晚(14日)将会公布3月密歇根大学消费者信心指数初值，市场预期数据将会向下，要留意对已经“见熊”嘅美股有咩影响。此外，虽然纳指已跌入调整区，但昨晚(14日)英伟达(Nvidia)及软件公司Palantir股价冇跟纳指100破底，系咪预示纳指有机会出现超卖反弹？ 冠域商业及经济研究中心主任关焯照表示，指数已严重超卖，系有机会反弹，如果今晚公布嘅数据差，就“揿佢一下”，然后趁势平仓，今日已经系星期五，如果期权借数据“队落下”平仓，再部署技术性反弹，首先系比美国总统特朗普(Donald Trump)一个警号，就系市民信心开始转差，通胀预期仍然系升，佢就好难解释，跟住就可能会“松手”，所以呢个Weekend有可能讲返一啲比较温和嘅说话。 Nvidia方面，关博士就话，纳指100近期破底，但Nvidia股价系升，Palantir亦冇跌穿之前个底，反而开始有啲稳定，呢两只股王应该对市况有帮助。至于台积电(TSMC)市盈率(PE)已跌到17倍，投资者可以留意返一啲有实力、稳定嘅股票，呢几只博反弹都可以考虑。 |
|
| 关焯照 |
2025-02-28T15:47 |
“科技7雄”(Magnificent 7)之一嘅Tesla，佢嘅创办人马斯克(Elon Musk)带领美国“政府效率部”(DOGE)，大刀阔斧兼手起刀落削政府开支，早前宣布嘅裁员行动已惹怒唔少美国人，就连欧洲方面对佢嘅好感度都急跌，为Tesla业务带嚟嘅负面影响逐步浮现，除欧洲销量大跌，股价今个月已累跌近30%，市值累计蒸发3900亿美元，有货嘅投资者应唔应该沽出？ 冠域商业及经济研究中心主任关焯照指，马斯克做咗一啲其他人唔认同嘅举动，例如美国国内嘅裁员潮，同埋佢干涉欧洲政治，惹嚟欧洲民众强烈不满，导致Tesla喺欧洲销量暴跌，佢相信，就算美股可以企返稳，Tesla都会继续跌，加上基本因素唔好，公司都要面对通胀风险，所以Tesla系“7雄”中跌得最甘，又认为短期内都不宜沾手。 关博士建议投资者可以考虑反手部署，例如T-Rex 2X Inverse Tesla Daily Target ETF(TSLZ)等逆向型产品，但投资者必须控制风险，始终Tesla仲未跌完。 |
|
| 关焯照 |
2025-02-14T16:09 |
DeepSeek引爆港股今轮升浪，恒生指数昨日(13日)一度冲破22000点关口，但其后喺高位回套，最终由飙逾600点变倒跌完场，但今日(14日)再度发力，迫近22600点，仲升穿昨日高位，港股今轮升浪会持续几耐？ 冠域商业及经济研究中心主任关焯照指，呢个系等咗一段短时间嘅调整，过去1个月恒指累升逾3000点，期间冇乜回套，所以今次即日回套都会令投机者知惊，而一啲权重股都有回落，例如腾讯控股(00700)、阿里巴巴(09988)等，昨日嘅回调都算系一次健康调整。 关博士又认为，就算冇DeepSeek，港股都会喺低位反弹，因为一般喺“两会”前，市场都会有政策憧憬，呢段时间嘅人工智能(AI)发展只系令大市弹多啲，佢又估计，今轮升浪最少持续至“两会”前，不过，如果“两会”期间指数升得太多，中央可能会减低政策嘅力度，因为内地股市近期偏向“慢牛”，所以到时会出现更大幅度嘅回套。 |
|
| 关焯照 |
2025-01-24T16:23 |
美国总统特朗普(Donald Trump)最新表示，如非必要唔会加中国关税，市场解读得非常正面，但仍要等到2月1日先有最终决定，下星期就系农历新年长假，港股下周只有1日半市，港股放假期间，美国有唔少大事件，“科技7雄”(Magnificent 7)会出业绩、联储局议息及关税死线，投资者应该点部署？ 冠域商业及经济研究中心主任关焯照认为，投资者唔需要“减磅”过年，因预期大市喺农历新年长假前好会有得升，除非大市已见顶，依家恒生指数喺20000关上落，有货嘅投资者可以等过年后，等港股复市睇定啲再做决定。 美股“7雄”业绩方面，关博士话，唔需要太担心，因为现时美股嘅权重股如金融股等，交到好业绩后，股价炒上后都冇回落，呢个主要同美国总统特朗普正式上场有关。 佢续指，“7雄”之中，Meta、亚马逊(Amazon)、Google都会喺业绩前炒起，市场预期呢啲公司业绩唔会太差，唯一要担心系苹果公司 (Apple Inc.)，因为昨晚(23日)纳指自低位反弹，但Apple都跟唔上，市场普遍认为，Apple已经冇新意，手机销售又唔理想，除非公司有重大消息或产品发布，股价先有望出现突破，否则，唔建议投资者持有。 |
|
| 关焯照 |
2025-01-03T16:24 |
美汇指数持续强势，今日(3日)一度升穿109水平，美国总统当选人特朗普(Donald Trump)将会喺2025年1月20日上任，意味加中国货关税嘅日子愈嚟愈近，呢啲因素都不利人仔，究竟应该点投资好？ 冠域商业及经济研究中心主任关焯照指，特朗普本身就系最大不明朗因素，因为佢所有政策都会推高通胀，不利股市。佢又话，美元强势系因为长息扯高，而长息升意味通胀预期转强，亦代表投资者沽美国长债，但仍持有美元。值得留意系，美元强势亦同欧元疲弱有关，欧元兑美元已失守1.03。 关博士认为，短期而言，喺美元强势下，亚洲股市都应该冇乜运行，而随着特朗普上任，好多消息及政策都会落实，政策细节会逐步曝光，睇返大环境系对港股及A股不利，因为美国系唔会“放过”中国。佢建议投资者可以考虑保守型股票，但要喺内地推政策后立即行动，如果唔想跟咁贴，就可以考虑防守型板块。 |
|
| 关焯照 |
2024-12-20T15:44 |
据联储局最新“点阵图”显示，美国明年有可能只减息两次，每次0.25厘，即时震散美股，当晚道指急泻逾点，但昨晚(19日)已经喘定，收市升15点，扭转连跌10个交易日嘅劣势，系咪反映市场已消化联储局或放慢减息步伐呢个消息？ 冠域商业及经济研究中心主任关焯照指，市场已消化咗部分有关减息嘅消息，美股今轮调整嚟得比预期快，佢认为，美股之后大升嘅机会唔高，始终嚟紧仲有好数据，都会影响整体大市表现，包括今晚(20日)出炉嘅核心个人消费支出(PCE)，如果数据超预期，相信美股仍有下调压力。 关博士又指，“点阵图”其实系向特朗普(Donald Trump)发警示，暗示佢要重新审视加息嘅谂法，今次只系释出局方明年有机会放慢减息步伐，市场已经咁大反应，而特朗普一向好重视美股表现，若联储局加息有机会拖冧美股，呢个亦系局方“放鹰”嘅原因之一。 |
|
| 关焯照 |
2024-12-06T17:39 |
港股今日(6日)突然好兴奋，半日成交已超过800亿元，一度上返19900点楼上，市传中央经济工作会议下周三(11日)及下周四(12日)召开，市场系咪又开始炒政策憧憬？2024年只剩返10几个交易日，恒生指数有冇机会嚟个“最后冲刺”上返20000点？ 冠域商业及经济研究中心主任关焯照认为，恒指上返20000点结束2024年机会唔大，反而有可能喺中经会前见返2字头，有机会上返50天线水平，即20300点水平，但睇返“往绩”，开完中经会之后，大市就会插水，曾经试过会后两个星期累跌逾3000点，佢估计，今次都会出现呢个情境，会前炒政策憧憬，会后就急散水。 关博士提醒，一旦恒指真系上返20000点水平唔好再追，因为之后有机会返落19000至19300点。 |
|
| 关焯照 |
2024-11-22T16:37 |
金融科技公司SoFi Technologies(SOFI.US)股价靠人工智能(AI)技术，今年已累升逾50%，到底AI为公司带嚟咩好处？此外，比特币(Bitcoin)持仓大户，狂扫Bitcoin嘅企业软件商MicroStrategy(MSTR)股价，喺Bitcoin价格升唔停之下，股价昨晚(21日)突大冧逾16%，原来畀沽空机构香橼研究(Citron Research)狙击，投资者应对点应对？ 冠域商业及经济研究中心主任关焯照解释，SoFi本身系做学生贷款生意，有咗AI可以帮公司挑战更合适嘅借贷对象，令拖欠比率显着下降，加上SoFi开始发展金融借贷服务，产品种类大增，现时AI商业应用比例已达27%，相信未来仍有好大上升空间。 至于MSTR，关博士就话，Bitcoin已出现史上最大泡沫，MSTR股价之前急升，系靠杠杆出售Bitcoin，股价昨日因被香橼狙击而急挫，反映公司易受消息影响。佢又提醒，若Bitcoin价格继续升，MSTR短期仍可保持强势，但当Bitcoin价格见顶，股价就会急插，形容投资者要“食得咸鱼抵得渴”。 |
|
| 关焯照 |
2024-11-08T17:06 |
软件公司Palantir(PLTR)公布季度业绩后大升20%，隔晚(7日)高位一度升至56.47美元，第3季收入比预期高3%，第4季指引收入就比市场预期高3%，其实季绩比预期高出不算多，但市场反应相当正面，当中原因为何？投资者又应否这个时候入手？ 冠域商业及经济研究中心主任关焯照指，主要由于公司目前有多个包括微软(Microsoft)等的大型客户，加上利用人工智能(AI)提升企业决策效率，所以市场对公司未来数季业绩有颇大憧憬，前景可期。 关博士预料Palantir股价会在隔晚收市55.88美元这个水平徘徊一、两日，即使出现回套，幅度亦不会多，因为股份在绩前曾经急挫，不少人因此离场，不过公布业绩之后股价反应出乎意料地正面，但投资者已经难以追货，他又形容此股份是“AI产品界中的英伟达(Nvidia)”，股价虽较之前贵，但仍然值得考虑入手。 |
|
| 关焯照 |
2024-10-25T16:45 |
受惠于中央自9月底频频出招救市，恒生指数曾冲上23000点，但之后无以为继，更一度失守20000点。美国总统大选已进入倒数阶段，选情及结果点影响港股后市？ 冠域商业及经济研究中心主任关焯照认为，港股冲高后回调嘅幅度比预期大，有机会系炒港股嘅投资者喺大市仲升紧时已经获利离场，然后再吼低位买货，令港股冇办法再冲高。佢又话，未来两周会有美国大选及议息会议等事件，所以港股要等2至3周后，先可以扫除不明朗因素，估计11月中前，港股会喺20000点至21100点上落。 关博士续指，内地未来有机会再出大招救经济，恒指年底前有机会上试21600点，即较现水平仲有约5%上升空间，明年就要留意可唔可以冲破22700点，呢个亦系过去2至3年嘅阻力位。 |
|
| 关焯照 |
2024-09-27T18:47 |
自从周二(24日)内地3大金融部门出招后，港股升势几乎无停过，今日(27日)半日成交额已经超过2300亿，下午更破港股成交额纪录，收市前已经突破4000亿，今次升势强劲，短线升势可以延续？阻力位及支持位在甚么水平？ 冠域商业及经济研究中心主任关焯照指，恒指短时间内冲破前高位19700点，亦有成交量配合，近几日成交量都比今年4月恒指向上时的成交量高，如果今日(27日)出现回调亦不足为奇，因为恒指短短几日已经有超过2000点升幅，是非常强劲的升势，估计20000点至20200点会出现支持位，而短期阻力大约处于21000点，之后要一段短时间横行后才能破顶，突破后第4季可以上望22500点。 |
|
| 关焯照 |
2024-09-13T17:32 |
美国联储局将于本港时间下周四(19日)凌晨公布议息结果，依家市场对减息幅睇返有分歧，但睇返最新利率期货，减0.25厘嘅机会约70%，减0.5厘就约30%，似乎大手减息嘅机会仍较细。港股投资者喺议息会议前后应该点部署？ 冠域商业及经济研究中心主任关焯照指，现时美国通胀仍略高于预期，所以减息0.25厘息嘅机会较大，但唔排除今年会合共减息1厘。 关博士又话，若港股喺议息前造好，指数股就可以食糊，不过，若今次议息后，联储局继续减息，意味将继续美国金发女孩经济(Goldilocks Economy)，估计美股会继续升，但港股仍可能受内地市况拖累，但政策憧憬会对第4季市况有帮助，要留意议息后美股嘅反应，预期美股展开新一轮升势前，或会先行回套，而港股投资者可以考虑喺恒生指数见17200点水平时买入，博第4季弹上至18000点。 |
|
| 关焯照 |
2024-08-29T11:36 |
交通银行(03328)及中信银行(00998)昨日(28日)派咗中期成绩表，并双双宣布派中期息，交行派0.182元人仔，信行派0.1847元人仔，前者系首次派中期息。交行指，派息比率维持约30%，但其实系咪将末期息“一拆二”，攞部分出嚟做中期息？ 冠域商业及经济研究中心主任关焯照认为，今次派息的确有“拉上补下”嘅情况，但“提早”派息可以带嚟正面心理作用，虽然交行派息比率仅约30%，但相比派息理想及高派息率嘅企业，交行派息空间其实相对较大。 关博士又指，若美国联储局减息，相信内银都会跟，减息会令息差压力变大，所以要留意喺息差收窄下，公司预期盈利能否保持稳定，但宏观而言，减息会利好整体内银股。 |
|
| 关焯照 |
2024-08-23T17:12 |
市场预期，美国联储局将于9月开始减息，但对减幅仍有分歧，联储局主席鲍威尔(Jerome Powell)今晚(23日)会喺Jackson Hole全球央行年会发表演讲，佢嘅讲话会唔会令减息时间及幅度明朗化？ 冠域商业及经济研究中心主任关焯照预期，鲍威尔嘅言论会较中性，甚至偏鸽，因为唔想令市场受惊，但佢提醒，市场唔好期望9月会减息0.5厘，因为参考过往数据，每逢联储局减息0.5厘，美国经济就会出现衰退，加上现时经济数据唔算太差，所以好大机会减息0.25厘以稳定市场信心。 关博士又话，早前股市大冧市系担心因为衰退而减息，但依家股市表现正面，亦冇受日圆强势影响，未来减息次数及时间仍然要睇9月估计嘅终端利率，如果今个减息周期嘅终端利率维持3.1厘水平，市场普遍认为经济稳定，股市下半年有望继续升。 |
|
| 关焯照 |
2024-08-09T18:58 |
今个星期一(5日)全球冧市，亚太区股市以日本及台湾股市“灾情”最严重，港股表现相对硬净，之后受内地数据带动，恒生指数出现反弹，到底内地经济下半年形势系点？港股又应该点部署？ 冠域商业及经济研究中心主任关焯照认为，内地跟本港经济融合已有一段时间，全球冧市当日港股冇受外围明显着拖累，除咗内地数据带来支持外，亦因为港股之前已跌咗唔少，削弱外围嘅杀伤力，加上临近业绩期，港股亦借一啲外围利好因素反弹。 至于内地下半年经济表现，关博士认为唔会太理想，但今日(9日)出炉嘅7月内地居民消费价格指数(CPI)好过预期，反映通缩情况有改善。 投资部署方面，关博士指出，投资者要见机行事，进取型投资者可以考虑押注ATM业绩，佢就睇好阿里巴巴(09988)及美团(03690)。至于恒指预期会喺19000点见顶，短期会继续喺16000至17700点上落。 |
|
| 关焯照 |
2024-07-26T16:09 |
三中全会结束后，可能政策憧憬落空，加上受外围拖累，恒生指数连跌3日后，今日继续打17000关攻防战，250天牛熊线亦危危乎，重磅股方面，依家只得腾讯控股(00700)顶得下，到底港股会跌到边个水平，几时先值得吸纳？此外，“中特估”概念股都有沽压，获利盘开始涌现，其中，中国联通(00762)今日(26日)一度挫逾7%，呢类股份系咪唔应该再沾手？ 冠域商业及经济研究中心主任关焯照指，港股最值得入手喺16000至16200点，腾讯系造返好啲，但其实之前跌咗唔少，不过，佢仍睇好腾讯，指343元有一定值博率。佢又提醒，港股业绩期快到，个别股份喺下个月可能有意外发挥。 至于关博士之前一直睇好嘅“中特估”概念股，佢依家都唔建议沾手，因为上半年造好嘅电力股、电讯股及油股，最近都守唔住，因此，建议投资者等业绩期展开，等内地电讯股等沽完先再买入。 |
|
| 关焯照 |
2024-07-12T16:11 |
美国通胀全面降温，昨晚(11日)出咗消费物价指数(CPI)数据后，据最新利率期货显示，联储局9月减息机会率急升至逾90%，到底美国今年会减几多次息？ 冠域商业及经济研究中心主任关焯照估计，美国9月及11月都有机会减息，不过，睇返联储局内部做嘅经济增长预测，第2季增长约2%，连同第1季都系低过去年第3及第4季，依家好似行紧1995年条路，即系今年及明年唔会减好多次息。 至于可受惠于减息嘅地产股、REITs及公用股，其中，地产股仍面对供应问题，拖住复苏嘅后腿，地产股反弹系咪只系死猫弹？关博士指，地产股反弹唔代表楼市反弹，纯粹系之前跌得多，依家减息预期升温，部分投资者就冚淡仓，部分短期就揸上去，一旦政府出招，例如将公私营房屋比例改为8比2，起多啲公屋，就会有啲支持，但都要搞返好经济，外围减息系帮唔到太多，佢又建议，地产股已升咗唔少，宜减磅套现。 |
|
| 关焯照 |
2024-07-05T15:19 |
港股7月开局唔错，但恒生指数今日(5日)一度挫逾200点，过去3日嘅升幅几乎化灰，三中全会将会喺7月15日至18日召开，港股下周表现系咪唔使太担心？指数成分股之中，暂时以美团(03690)升得最靓，值博率系咪最高？ 冠域商业及经济研究中心主任关焯照认为，恒指会有反弹，但如果期望有新一轮升势就睇得太乐观，最初市场对股息税等政策有一定期望，但愈来愈觉得“冇乜嘢讲”，所以恒指都由19700点水平回落至17700点水平，近期续受制18000关，市场会认为下星期会有风声漏出嚟，借势扫高恒指几百点，估计会弹到18500点左右，市况唔会太差。 美团方面，关博士就话，年初跌到60几蚊时，之后出现一个大浪，急升至130元水平，之后落返250天线，但冇跌穿，走势仲强过腾讯控股(00700)，如果要推上去系比较易，因为业务能见度高，亦有做回购及业绩有改善，亦留意到每当恒指“郁”，美团通常会行多啲。 |
|
| 关焯照 |
2024-06-28T15:49 |
美国总统大选首场电视辩论喺本港时间今朝(28日)9点举行，据即时民调显示，67%观众认为特朗普(Donald Trump)表现较好，认为拜登(Joe Biden)表现较好只有33%，美股期货市场即时反应亦显示特朗普占上风，会更利好股市表现，美国总统大选系咪会为下半年投资市场焦点？ 冠域商业及经济研究中心主任关焯照指，呢场选举只系其中一个因素，美国总统将会喺11月举行，其实市场都有心理准备，如果特朗普辩论表现理想，就会睇好美股后市，因为特朗普在任期间，道指大幅飙升，若特朗普真系再入主白宫，预期美股表现会同上次一样。 关博士续指，即使拜登成功连任，美股都未必一定跌，因为美国经济表现更关键，其他左右股市走势因素，包括美国联储局下半年减息次数、2025年息口走向、欧洲右翼抬头嘅影响等，都要留意。 |
|
| 关焯照 |
2024-06-07T17:49 |
港股近期似乎有“畏高”问题，恒生指数今日(7日)午后愈跌愈多，一度险守18300点。市场焦点除咗美国联储局到底几时减息外，亦包括嚟紧嘅陆家嘴论坛，以及7月召开嘅三中全会，系咪可以憧憬会再有利好股市嘅国策出台？ 冠域商业及经济研究中心主任关焯照指，港股喺19700点超买得好紧要，所以之后喺高位回落，返做个调整。港股喺14800点起步，升到19700点，差唔多升咗5000点或近30%，咁短时间升可以升咁多，对港股嚟讲已经系一个奇迹，如果由19700点回落到18000点，即保历加通道中轴或下轴，之后再弹上18600至18700点，预期会喺20天线及250天线间上落，即17600点至18800点。 关博士又预期，港股走势下周有望好转。 |
|
| 关焯照 |
2024-05-31T16:02 |
虽然港股早前表现强势，单日成交更一度大增至2000亿元，但仍未能断言为大升市，恒生指数果然喺19800点前止步，一度高见19706点，但之后掉头连跌3日，大市近期嘅调整及估值修复系咪已经完成？ 冠域商业及经济研究中心主任关焯照指，如果睇返保历加通道，恒指已接近下限，即18000点水平，系一个心理关口，如果守唔住，可能会进一步回落至250天线。 关博士亦指，若估值修复完成，意味大市已触顶，而恒指之前一度高见19700点水平，同摩根士丹利嘅目标价好接近，问题系如果完成估值修复，恒指唔应该仲喺一个咁平嘅水平，而系回归中位数市盈率(PE)，即20000点以上水平，所以仍未到“均值回归”水平，今次可能系超跌后反弹，因为相比其他股市，港股估值仍然平好多，最终资金可能由较贵嘅市场重投港股，再加上有内地政策支持，估计恒指有机会自低位反弹近5000点水平。 |
|
| 关焯照 |
2024-05-17T16:34 |
港股升唔停，恒指今日(17日)一度升穿19600关，应该可以确认步入牛市，早前，冠域商业及经济研究中心主任关焯照已提醒要留意重磅股，例如腾讯控股(00700)，结果业绩后走势强劲，股价连日挑战400元，有货应唔应该再加注？如果想喺现水平买货，应该追边类股份？ 关焯照指，如果腾讯可以企稳405元楼上，升势应该可以持续，因为公司回购力度大过大股东沽货力度，所以即使大股东再沽货都唔会掟散股价，令腾讯可以继续升。 关博士又指，因为外围有机会减息，虽然会令净息差收窄，但随着中央不断出手救内房，会带动内银股反弹，而内银股喺恒指占比大，对恒指嘅影响可以大过腾讯，所以有唔少板块都配合到今次反弹，所以后市可以睇住ATMJ及内银股。 |
|