| 評論員 |
時間 |
內容 |
標籤 |
| 羅明立 |
2024-07-25T17:34 |
美股進入重磅股業績期，科技股出現大調整，拖累美股3大指數顯著下挫，新屋銷售數係7個月以來最少，加上製造業採購經理指數(PMI)差過預期，市場對經濟前景慨憂慮再度升溫，雖然美股跌得急，但美匯指數昨晚(24日)冇太大影響，如果股市真係崩盤，會唔會令聯儲局提前減息？ 亨達集團助理總經理羅明立指，依家市場認為7月減息機會好微，聯儲局其實都唔急於減息，係美國經濟數據轉弱下，通脹亦冇上升空間，佢估計，9月極大機會減息，雖然市場對聯儲局減息預期升溫，但其他央行減息機會都唔細，其中，加拿大央行已連續兩個月減息，歐洲9月減息機會亦好大，所以各國貨幣政策唔會相差太遠。 Patrick又指，雖然歐美經濟唔樂觀，但美元唔算弱，美匯指數可企穩104水平，由於大市缺乏方向，短期以炒上落為主。 |
|
| 植耀輝 |
2024-07-25T16:33 |
港股今日(25日)顯著下挫，更一度失守17000關，不過，藍籌信義光能(00968)升得唔錯，依家公司收入大部分來自太陽能玻璃銷售，睇返去年業績，佔總營業額高達90%，不過，中信里昂近日全面下調光伏股盈利預測及目標價，又話現時多晶硅價格低於現金成本，需時1至2季先可以回復至溫和水平，係咪意味光伏行業毛利率會持續受壓？ 耀才證券研究部總監植耀輝指，影響毛利率慨關鍵因素係產能太勁，信光仲不斷增加生產線，令產能過剩情況惡化，又無法以出口抵銷，加上行業競爭激烈，毛利率短期好難改善。 此外，據《路透》引述印度官員指，當地計劃放寬中資對當地非敏感行業慨投資，包括太陽能電池板及電池製造，希望帶動本土製造業發展。不過，Stanley認為，依家只係一個市場傳聞，加上印度希望進一步保護本土企業，有起色後可能再收緊投資限制，雖然短線會有利好，但中長線唔係咁樂觀。 |
|
| 譚智樂 |
2024-07-25T10:11 |
富途證券首席分析師譚智樂推介大唐新能源(01768) 推介原因： - 市場預料電力需求較穩定，新能源需求仍然龐大 - 公司削債進度良好。 |
|
| 羅尚沛 |
2024-07-24T22:56 |
中國龍工(03339)預期，上半年賺4.1-4.61億元人民幣，按年增長33-50%。 銀河證券業務發展董事羅尚沛表示，龍工的盈喜原因，是毛利率改善及金融資產收益增加，但並沒提及收入回升，當中可能金融資產收益是推動盈喜的主力，意味上半年基本業務表現未必太理想，而目前公司估值只能說是合理。 |
|
| 莊志雄 |
2024-07-24T15:10 |
市場十分關注美國總統大選慨選情，交易員都睇到實，睇返博彩公司數據，依家兩大陣營勢均力敵，特朗普(Donald Trump)槍擊事件令民情大漲呢個因素係咪已經淡化？「Trump Trade」係咪已經炒完？ 「股市漁夫」創辦人莊志雄指，特朗普遭槍擊後民情大漲，勝選呼聲好高，月中時博彩公司數據顯示佢有70%機會贏，之後拜登(Joe Biden)退選，依家似乎好大機會由賀錦麗(Kamala Harris)出戰，但民主黨大佬未有明顯表態，例如奧巴馬(Barack Obama)，但拜登退選係掃除左1個不明朗因素，睇返博彩公司賠率，賀錦麗依家有45%機會勝選，特朗普仍以57%領先，但最有趣係特朗普贏面細左，重返槍擊事件前水平。 Lewis續指，睇返主要資產價格，由於特朗普支持比特幣(Bitcoin)，虛擬貨幣應該會升，但辯論結束後，價格冇因為佢勝選機會大左而即時上升，到槍擊事件後就回升，但到底係跌得太多夾返上去？呢個就不得而知，所以Bitcoin係咪一個「Trump Trade」都係一個疑問。 |
|
| 彭偉新 |
2024-07-24T14:45 |
截至早上11時止，過去1小時內《彭博》用戶搜尋量最多港股，依次為ASMPT(00522)、長城汽車(02333)、周大福(01929)、中廣核電力(01816)及新秀麗(01910)。 ASMPT公布業績後，股價今日(24日)急瀉，並愈跌愈多，除第2季業績唔好，今季收入指引亦差過預期，主要受公司主業「表面黏著技術」(SMT)收入下跌影響，而SMT就受工業需求疲弱拖累，呢個情況會唔會拖累未來業績？半導體業務迎來增長周期，未來公司半導體業務佔比可唔可超越SMT，帶返起業績？ 資深證券分析師彭偉新坦言，ASMPT指引好難令人安心，係一個上升周期下都未能做好，甚至落後，市場一定會擔心，尤其係SMT業務，雖然有好多消息及憧憬，包括英偉達(Nvidia)同台積電(TSMC)合作，帶挈ASMPT半導體定單增加。此外，內地成立半導體基金，用於投放實質高端晶片生產業務，到時可能有新半導體定單畀ASMPT，但數量及金額都係未知之數。 股價方面，由於業績及指引都唔理想，導致股價大林，進一步引發投資者「人踩人」，導致股價短時間內無法企穩。睇返技術走勢，相對強弱指標(RSI)不論9天或14天都跌至30水平，反映沽壓十分沉重，投資者短期或會爭相減磅，所以暫時唔建議係現水平博反彈。 |
|
| 盧志威 |
2024-07-24T10:46 |
美股近日焦點除左業績及周五(26日)出爐慨個人消費支出(PCE)物價指數，當然包括美國總統大選形勢，參考《路透》及《彭博》引用慨民調結果，應該會代表民主黨出戰慨賀錦麗(Kamala Harris)，削弱左特朗普(Donald Trump)慨領先優勢，其中，不論《路透》或普益索慨民調，賀錦麗支持度領先對手2個百分點。摩根大通提醒投資者，大選前美股會持續波動，亦要留意兩黨候選人慨政策，但無論邊個當選相信都係打中國牌。 潤淼資產管理董事盧志威指，依家總統大選形勢係叮噹馬頭，相信呢個情況會持續，又認為換賀錦麗出選係正確慨決定，因為可以將勝負拉返近些，係對民主黨有利。不過，會增加美股慨不確定性，因為基於勝負考慮去買慨股份係好唔同，未來逾3個月，美股會因選戰變得更波動，包括晶片股都跌左落黎， William又話，基於選舉因素，美股係第3及第4季未必有好慨投資機會，除非大市大幅急挫。 |
|
| 植耀輝 |
2024-07-24T10:20 |
耀才證券研究部總監植耀輝推介偉易達(00303) 推介原因： - 業務穩健，預期今年收入及盈利能力有所改善 - 派息慷慨。 |
|
| 聶振邦 |
2024-07-23T15:29 |
截至早上11時止，1小時內《彭博》用戶搜尋量最多港股，依次為比亞迪股份(01211)、金沙中國(01928)、路勁(01098)、港交所(00388)及中遠海能(01138)。 比亞迪再被「股神」巴菲特(Warren Buffett)旗下投資旗艦巴郡(Berkshire Hathaway)減持，持股量降至4.94%，意味日後再沽貨唔使再申報，「股神」最終係咪會清倉？ 博威環球證券金融首席分析師聶振邦指，巴菲特減持比亞迪係有跡可尋，唔夠兩年持股量由8%降至不足5%，佢估計，由於之後唔使再申報，相信巴菲特會繼續沽貨。 聶Sir續指，政治因素係巴菲特減持主因，除左美國，歐盟亦對中國進口電動車加徵關稅，所以睇淡內地新能源汽車慨發展前景，因為會繼續受複雜慨政治形勢影響。 比亞迪股價今日(23日)一度挫4%，低見236.2元，佢指出，一旦特朗普(Donald Trump)再入主白宮，都會不利內地車企，聶Sir認為，比亞迪股價係230元有支持，建議回落至230元水平先考慮吸納。 |
|
| 王良享 |
2024-07-23T12:00 |
三中全會提及要深化國資國企改革，提升核心功能及競爭力，「中特估」概念股上半年表現強勁，但係三中全會前後調整壓力開始浮現，「中特估」概念股估值今年升左唔少，資金食糊係咪因為估值已經太貴？ 臻享顧問董事總經理王良享指，依家內地市場焦點係「科特估」概念股，三中全會強調以科技為主，所以部分資金轉移至呢類股份。依家「中特估」概念股估值偏高，電訊股市盈率(PE)介乎11倍至12倍，能源股、油股PE就介乎7倍至9倍，現時出現調整主要係能源股及油股。 Tommy續指，特朗普(Donald Trump)有機會再入主白宮，佢慨政綱中有好大篇幅同油企及油價有關，為左遏通脹，特朗普可能會提高美國產油量及放寬監管，若美國石油產量及供應增加，就會令中資油股壓力大增。 另一方面，特朗普上場後可能會令俄烏停火，以及暫停向烏克蘭撥款，屆時石油供應就會增加。 |
|
| 黃偉豪 |
2024-07-23T11:43 |
恆生指數昨日(22日)升逾200點，好倉資金轉為流出，流出逾4300萬元，淡倉就轉為流入，流入逾5851萬元。此外，牛熊證街貨比例為60%對40%，牛證重貨區係17200點，熊證重貨區就繼續係18000點。 大市昨日反彈，但今日(23日)就冇乜方向，投資者做部署時應該點擺位？昨日最多人加倉慨牛證，收回價17200點，會唔會太貼？ 中薇證券研究部執行董事黃偉豪指，上述提及慨牛熊證重貨區，都係依家比較關鍵慨支持及阻力，睇返兩個位都反映投資者擺位都係揀一些重要關口，同埋預期大市短期波幅唔會太大，如果做擺少少慨部署，佢建議收回價揀遠些，減低收回風險，其次係避開重貨位，最少距離100至200點。 Ravi又話，如果睇好後市，牛證收回價宜擺17000點或低少少，槓桿唔算低，適合中線持有，熊證方面，佢建議收回價擺18000點以外。 |
|
| 陳鳳珠 |
2024-07-23T10:22 |
獨立股評人陳鳳珠推介大唐發電(00991) 推介原因： - 料上半年純利按年增加85%至124% - 中國氣象局料今年夏天廣泛地區較往年熱，部分地區用電負荷攀升，料增加用電需求 - 股價高位回調。 |
|
| 梁偉民 |
2024-07-23T10:01 |
資金吼美股回調趁低吸納，3大指數昨晚(22日)全線高收，其中，標指及納指升1%。目前，市場最重要考慮一定係美國總統大選形勢，總統拜登(Joe Biden)宣布退選後，副總統賀錦麗(Kamala Harris)將會參選，除拜登外，民主黨內重量級人馬佩洛西(Nancy Pelosi)，以及黨內多名潛在挑戰者最新亦表態支持佢，對美股有咩影響，科技股昨日反彈同選情有冇關？此外，Tesla及Google母公司Alphabet將會係今晚(23日)美股收市報出季績，有咩要留意？ 高富金融集團投資總監梁偉民指，科技股之前回套主要係之前升得太多，納指上星期回套前已累升20%，所以趁高獲利，但科技股近日反彈可唔可以持續，都要睇市場情緒係咪可以持續高漲，始終估值仍然係貴，同埋好難估頂。 Wyman又話，Tesla業績的確需要關注，集團現時仍然主要靠電動車業務撐業績，佢估計，今晚(23日)出慨業績唔會太好，市場有機會借勢回調，Tesla股價近期大升，主要炒無人駕駛及機械人業務，但短期唔可能帶來強勁收入及盈利，所以之前高追左Tesla慨投資者要特別留意。 |
|
| 鄭家華 |
2024-07-22T22:46 |
中海石油化學(03983)預告，上半年純利介乎6.7至7億元人民幣，按年跌60%，撇除去年同期的特殊收益，仍跌20%，主要因為尿素及磷複肥售價下降。 阿仕特朗資產管理董事鄭家華表示，中海化學盈警，股價或要下試2元水平，不過由於公司手頭現金充裕，全年派息或可維持不變，高股息率對股價有一定支持。 |
|
| 聶振邦 |
2024-07-22T18:33 |
康龍化成(03759)發盈喜，預期上半年多賺最多45%，最少賺逾10億人仔，值得留意係，中期盈利有一半來自出售事項，若扣除集團向強生公司(Johnson & Johnson)出售旗下藥物開發公司Proteologix慨收益，實際淨利潤跌36%至41%，不過，康龍股價今日(22日)照升，一度升逾8%，高見9.43元。 博威環球證券金融首席分析師聶振邦指，相比首季經調整盈利按年跌逾22%，若計及股息收益，康龍股價今年已調整逾40%，已充分反應盈利倒退因素。此外，市場原本預期醫藥外包研發(CRO)行業上半年表現麻麻，但康龍中期盈利已等同去年一半，令市場憧憬下半年增長會更勁。佢又認為，康隆股價開始轉強，估計升至10元至10.5元先會遇到阻力，可以考慮現價買入，如果保守些可以等股價回落至8.8元以下先再買貨。 聶Sir續指，憧憬行業下半年基本面向好，今日成板CRO股都有得升。 |
|
| 梁傑文 |
2024-07-22T16:51 |
知乎(02390)提出有條件自願回購，最多逾4690萬股A類普通股，佔已發行總股數近16%，每股現金要約價9.11元，較上周五(19日)收市價有7%溢價，較截至去年底止每股資產淨值(NAV)折讓47%，今次係咪小股東一個變現慨好機會？始終股份平時交投疏落，除左本港小股東，美國存託股投資者都可以接受要約，值得留意係，接受現金要約小股東有機會成手碎股，應唔應該接受？ 《香港股票財技密碼》作者梁傑文指，由於知乎現價低過回購價，估計大部分股東會接受要約，但係供過於求下，最終只會按比例收返小股東慨股份，計及今次回購涉及股數及已發行股本，比例約七分之一。佢估計，若小股東交返1000股畀知乎，當中最多六分之一慨股份先可以成功賣出。 Mike續指，對小股東黎講，雖然溢價唔係特別高，對現價冇好大慨刺激作用，但如果小股東唔接受，而其他大戶接受要約，小股東就會「蝕底」，因為小股東擁有慨七分之一股份，係唔可以高於市價沽出，所以對小股東而言，今次回購其實相當「雞肋」。 |
|
| 郭思治 |
2024-07-22T11:18 |
大市已開始步入7月份之下旬，而即月期指轉倉及結算等相關活動將漸主導大局，直到執筆一刻止計，本月大市之形態暫仍屬先低而後高，恆指暫是由9日之低位17,376點升至12日之高位18,317點，即月內之波幅暫為941點，由於941點之波幅仍細，該不能滿足月內之所需，加上一個月之高低位是不該同時出現於4個交易日之內，故在本月餘下之交易日，理論上該有更大之波幅點出現，從而擴闊月內之波幅以滿足所需，同時亦能拉闊月內高低位之距離以符合慣性之所需求。 再看移動線方面之表現，大市經過周來之一輪急跌後，技術上不但已明顯轉弱，且以恆指於19日低收於17,417點計，即大市目前已相繼跌穿50天線（約在18,287點左近），20天線（約在17,828點左近），10天線（約在17,732點左近），100天線（約在17,576點左近）及250天線（約在17,476點左近），即是說，大市目前已跌穿各組常用之平均移動線，論形勢當偏淡，技術上不但不利7月下旬之發展，同時亦對8月大市造成頗大壓力，因從小圖上看，恆指一旦跌穿100天及250天線，其時較具防守性之支持將退守至4月19日之低位16,044點，大市如欲擺脫反覆續尋底之威脅，恆指必需先成功重越100天線及250天線並穩守其上。 拉闊一點看，今年大市暫是由1月22日之低位14794點升至5月20日之高位19706點，即年內之波幅暫為4,912點，由於4,912點之波幅相對一年計仍頗偏細，故在本年餘下之交易日，理論上該有更大之波幅點出現，試舉例，2023年之波幅係跌6728點，2022年之波幅係跌10,453點，2021年之波幅係跌8,518點，到2020年之波幅係跌8,035點，從上述資料可見到，相比之下，本年大市之波幅確仍偏細，而照目前大市之表現看，情況確有點令人擔心。 |
|
| 李浩然 |
2024-07-22T10:51 |
在過去數年中，增長股的表現不斷壓倒價值股，這一趨勢在美國大型科技股的推動下愈發明顯。投資者習慣於將資金投入那些光芒四射的科技巨頭，而對那些默默無聞、似乎只會穩定帶來紅利的價值股視而不見。但是，隨著市場環境的變化，這場長跑是否即將迎來接力棒的交接？ 價值股是否真的只在經濟復甦期表現優異？歷史數據顯示，在過去九次經濟衰退後的六個月和十二個月中，價值股分別五次和六次表現優於增長股。儘管這種表現並不像某些經濟學家所堅持的那樣穩定，但事實上，價值股的表現周期和增長股相比，就像是一場持久戰——有時上升，有時下跌，讓人琢磨不透。 過去，投資者可能將價值股視為一潭死水——主要集中在金融、能源等傳統產業。然而，現在的情況已大不相同。價值股已經變得更加多元化，涵蓋了健康照護、工業、甚至是資訊科技等領域。這種轉變，讓價值股的顏色不再單一。 儘管中央銀行努力控制通膨，但結構性因素如勞動市場緊縮、地緣政治緊張等，可能會持續推高通脹率。此外，較高的實質利率環境可能為金融業的價值股帶來更多上升空間。不過，每當我們試圖透過舊有模型來預測未來時，風險總是潛伏其中。 然而，在AI的光環效應下，如果這些科技巨頭能夠持續實現獲利的爆炸性增長，那麼增長股可能仍將持續其市場的主導地位。儘管如此，市場開始更加細緻地區分這些科技巨頭，隨著經濟從衰退陰影中逐漸走出，價值股及其他市場也開始逐漸回升。 在增長股長期領先之後，投資者可能需要重新考慮自己的策略，尋找市場中那些被低估的潛在明星。雖然歷史數據提供了一些線索，但未來的市場贏家可能正在悄悄改變。在這場價值與增長的競賽中，唯一不變的是改變本身。 |
|
| 植耀輝 |
2024-07-19T22:52 |
中信國際電訊(01883)預告，上半年少賺約37%，主要因為訊息服務收入大幅減少。 耀才證券研究部總監植耀輝表示，中信電訊上半年業績延續去年下半年弱勢，而且有進一步惡化跡象，估計今年下半年亦難有改善，不排除公司會削減全年股息。 |
|
| 黃敏碩 |
2024-07-19T17:30 |
泡泡瑪特(09992)發盈喜，預期中期收入最少增長55%，盈利更最少增長90%，按半年計，係上市以來最好慨半年業績，盲盒呢類相對單價細慨「小玩意」，未來仲有幾大增長潛力？ 註冊財務策劃師協會會長黃敏碩指，其實市場對呢個盈喜消息仍有考量，擔心會唔會有賭博成分，但另一方面亦可發揮品牌IP作用，進一步發酵後，更可提升估值，對泡泡瑪特銷售有好大推動作用。 Michael又話，盲盒銷售模式有局限，要留意返業務定位及成本控制，唔止內地市場，更可以聚焦全球新興市場，把握唔同機遇，先有機會提升到市佔率。 |
|
| 趙晞文 |
2024-07-19T16:21 |
九興控股(01836)昨晚(18日)發中期盈喜，預期按年多賺63%，最少賺9000萬美元，不過，九興股價今日不升反跌，一度重挫近11%，100天線都守唔住，點解股價會反高潮？同產能利用率未恢復有冇關？ 信達國際研究部董事趙晞文指，九興股價今日(19日)下跌，係因為管理層冇交代Nike慨實際交貨時間，雖然九興生產情況唔錯，但交貨日期有機會係今年，又或者延至明年第1季，所以投資者對九興有戒心，繼而拖低股價。 佢續指，九興產能利用率正在恢復，但仍未重返正常水平，主要受大客Nike影響，上年Nike產品慨產能介乎60%至70%，今年就升至介乎80%至85%，但同90%慨正常水平仲有少少距離。 |
|
| 李偉傑 |
2024-07-19T15:26 |
截至早上10時45分止，1小時內《彭博》搜尋量最多港股，依次為停牌中的碧桂園(02007)、遠洋集團(03377)、萬科企業(02202)、華潤置地(01109)及龍湖集團(00960)。 今日(19日)上榜股份清一色係內房股，相信都係同昨日(18日)閉幕慨三中全會有關，會議公報對內房著墨唔多，只係話會有措施刺激內需，以及有全力去庫存，推新政策憧憬落空，內房股股價今日顯著受壓，點解會出現咁大落差？ 華盛證券財富管理部董事李偉傑指，相信主要同三中全會提及慨政策唔夠全面有關，大部分公布慨政策內容只係一個大方向，細節就欠奉，可能要等稍後慨政治局會議先會有詳情，所以內房股今日表現係合理。 Jason又話，「517」樓市新政推出後，房地產銷售曾經係5月出現短暫反彈，但好快又放緩，未來要繼續留意政策會唔會再發揮作用，銷售再度反彈，到時先有機會見到個別內房股可能有較似樣慨反彈。 |
|
| 聶振邦 |
2024-07-19T12:14 |
市傳美國總統拜登(Joe Biden) 被要求退選，依家市場消息滿天飛，美國總統大選會唔會令金融市場持續出現震盪？ 此外，內地近期出爐慨經濟數據欠佳，係咪會持續困擾港股？ 博威環球證券金融首席分析師聶振邦指，跟拜登關係友好慨前眾議院議長佩洛西(Nancy Pelosi)，以及前總統奧巴馬(Barack Obama)都勸退拜登，因此，市場認為佢好大機會退選，極有可能由民望較高慨副總統賀錦麗(Kamala Harris)出戰，佢又認為民主黨形勢未必係一面倒。聶Sir提醒，環球股市未來一至兩周走勢，有機會受環球貿易及地緣政治影響，所以唔好單睇美國大選。 內地經濟方面，聶Sir指出，早前公布慨經濟增長及「三頭馬車」數據都偏弱，令市場對內地經濟情況憂慮升溫，另一方面，若歐美等國家針對中國晶片慨限制不斷「加辣」，一定對內地科技發展造成阻礙，加上人仔今個星期仍然弱勢，人民幣走弱，都不利港股表現。 |
|
| 陳偉明 |
2024-07-19T11:48 |
自從國家隊出手認購港股央企交易所買賣基金(ETF)帶動港股於6月19日升至飆升逼近18,500點後，港股升勢便後勁不繼，在聯儲局官員「放鷹」不支持今年減息 下，美元續強、人民幣貶值壓力持續，恆指於6月20日於18,520點見頂後反覆 回落。雖然美國 6 月 28 日晚公布的通脹數據顯著放緩，令聯儲局9月減息機會 上升、美匯轉勢回落、人仔跌勢喘定，但港股只能弱勢反彈至萬八關。隨後因 為美國總統大選首場辯論上，拜登表現遜色、特朗普勝算增加，市場憂慮中美 關係惡化拖累港股再度回落，恆指於上周二(9 日)跌至低見17,376點，並於上周三(10 日)收市正式失守250天牛熊分界線大約17,500點。 聯儲局主席鮑威爾上周在聽證會上多番提及就業市場放緩的問題，並且「放鴿」表示無需等到通脹跌至 2%以下才減息，9月減息憧憬升溫，加上內地出招 暫停借貨沽空，港股扭轉4日跌勢，於上周四(11 日)大漲360點後，再在美國6月份消費物價指數(CPI)出乎意料地回落的利好消息刺激下，於上周五(11日)再飆升461點，美國9月減息的機會由通脹數據公布前約70%急升至逾90%。市場幾乎肯定聯儲局將於9月開始減息，恆指兩日累升逾800點並於上周五(12 日)升至高見18,317點。 美國前總統特朗普上周六(13 日)遭遇槍擊暗殺，事件令他再次贏得美國大選當 選總統的可能性升溫，加上內地第二季國內生產總值(GDP)遜於市場預期，在市 場憂慮中美關係惡化及內地經濟增長放緩下，港股本周弱勢回落跌至近17,600點。一連四日的三中全會於本周四(18日)完結，市場觀望三中全會會否有利好 消息刺激港股回升。 技術上，如恆指進一步「陰燭」跌穿本周四(18日)低位，反映三中全會不足以 支持港股回升，到時可考慮Long Put 7月17,000點恆指期權。即使三中全會有 利好消息出台，筆者傾向在中美關係有機會惡化的情況下，港股反彈空間有 限，傾向在恆指18,000點以上Long Put 7月價外600 點恆指期權。 |
|
| 許繹彬 |
2024-07-19T11:42 |
港股上周五(7月12日)毫無先兆在沉悶的氣氛下突然回勇，急升近461點，除一度升穿18,200點，更直逼18,300點，可謂悶氣全消；坊間更立即有聲音傳出，在美股日股台股相繼創新高後，港股應該有機會緊隨其後，作出相應的反彈，「七翻身」定必應驗。 由於是次反彈，可以說是雞犬皆升，港交所(00388)、科技股及久沉了的賭股，以及內房，一起作出反彈，氣勢一時無兩；外間又有聲音傳出，今次一定上20,000點；再加上，道指在本周二(16日)的交易日急升超過742點，除續創新高外，更創下2023年6月後的最大升幅；日經指數亦因此而受惠，直逼42,000關口。 全球股票市場再度聞雞起舞，但有份參與港股的投資者，如果仍然懷著上周五(12日)港股大好氣勢的興奮心情，來到本周相信又一次掉進萬丈深淵。事緣在本周一開始，港股可謂完全走樣，在輕微低開後，四方八面沽盤突然持續湧現，特別是一直肩負領航角色的藍籌股，不知何解全部跌至遍體麟傷，港股除只用2個交易日蒸發了上周五(12日)的升勢外，還要繼續下跌，合共跌近600點，連帶重要支持區17,800點亦在原本全球開香檳慶賀創新高的情況下再度失守，認真諷刺； 儘管昨日作出輕微反彈，但已令投資者不是味兒。 筆者在港股踏入七月後，一直存有患得患失的感覺，原因是成交不但不能維持，且持續萎縮，儘管北水依然是成交的主流支持，但額度已大不如前；而外資對投入港股及國內股市的熱情，可謂完全消失；一直為中港股市帶來生機的中央政策消息，踏入七月份可謂完全欠奉；上證綜合指數更在本月失守3,000點後，完全無力重返；港股則仍在18,000點以下苦苦掙扎。 上周五(12日)突然抽升的原因，又是舊瓶新酒的炒作，美匯指數回落、人民幣回升，驅使內地資產為主的港股有所回升；加上，內地本周在國內舉行的三中全會重要會議，亦傳出會有「國家隊」護盤買貨，令外間再次對港股產生憧憬及幻想，但這些舊瓶新酒消息未有成交增加的配合，加上消息最終未能得到進一步確認，港股便迅速打回原形，又掉下18,000點以下。 值得一提的是，美股去年至今已創下無數次新高，而港股除一向我行我素沒有跟隨外，反而在其創新高時作出掉頭回落的尷尬現象；出現此情況是因為基金經理存有跟紅頂白的心態，將資金先行調配至勝算較高的交易市場，總好過放在積弱已久的地方，亦屬正常的做法。 香港不論在七一回歸期間及本周的三中全會內，除未有聽到新一輪實質的挽救資本市場措施外，市場上反而傳出，由於美國總統大選上特朗普重返白宮的機會急增，因而憂慮中美關係再起波折和新一輪貿易戰再度發生；因而令港股再度踏入前景不明的道路；短期內如仍未能在成交配合下升穿20天線(即17,906點) ，在久守必失的情況下，港股有可能下試17,500點水平。 |
|
| 彭偉新 |
2024-07-19T10:18 |
獨立股評人彭偉新推介百威亞太(01876) 推介原因： - 去年毛利率擴闊至50.4%，純利倒退受內地消費市場降級影響 - 首季業績未完全改善，但毛利率好轉下，未來業績有望逐步改善 - 市場料本財年全年盈利預測增長9.3%。 |
|
| 羅明立 |
2024-07-18T17:38 |
英鎊突破近期阻力1.286後，愈升愈有，更一度試衝1.3水平，有消息指，英倫銀行8月減息機會僅32%，睇返最新就業數據，截至5月止3個月，就業人數增19000人，6月受薪員工增56000人，但新增失業補助申請人數亦有所增加，而上月通脹未如預期放緩，英國息口未來會點走？英鎊強勢可以維持幾耐？ 亨達集團助理總經理羅明立指，英國基本面比歐洲好，但由於通脹放緩速度較預期慢，導致英倫銀行至今仍按兵不動。 政治因素方面，英國已換上工黨執政，估計工黨政策方面會比之前慨保守黨貼地，短期英鎊走勢會比歐元好，阻力暫時睇1.315，但要再向上突破有難度，主要是美元弱，未必可以持續推高英鎊，建議投資者唔好高追英鎊，可以等英鎊回落至1.29水平再買入。 |
|
| 植耀輝 |
2024-07-18T16:48 |
全球晶片「代工王」台積電(TSMC)剛派左第2季成績表，上季多賺36%至逾2478億新台幣，超預期，毛利率升至53.2%，亦高過預期。集團估計，第3季將受智能手機及人工智能(AI)相關需求帶動，此外，集團調高今年收入增長目標至介乎24%至26%，略高於原來介乎21%至26%，集團又話，今年係強勁增長慨1年。台積電前景似乎無可挑剔？ 耀才證券研究部總監植耀輝指，由於台積電每月都會公布營業額，所以業績都有一定能見度，但今次表現仲好過市場預期，的確冇咩可以挑剔。睇返集團上季晶圓銷售，有15%來自3納米製程產品，5納米製程產品則佔35%，總計7納米及更先進製程產品收入佔比達67%，佢指出，由於3納米製程產品需求好大，加上供求關係緊張，毛利率又高，所以愈高端、高毛利慨產品佔比一定係愈大愈好，又話台積電現時慨營運狀況十分理想。 |
|
| 阮子曦 |
2024-07-18T10:20 |
華富建業證券投資策略聯席總監阮子曦推介瑞聲科技(02018) 推介原因： -蘋果公司(Apple Inc.)新世代人工智能(AI)手機有望提升出貨量，提升集團訂單水平 -開拓智能電動車揚聲器產品。 |
|
| 趙晞文 |
2024-07-17T22:46 |
高偉電子(01415)向上修訂三份關連交易的年度上限，理由是產品需求強勁。 信達國際研究部主管趙晞文表示，高偉電子無論手機攝像頭模組，抑或車載攝像模組訂單大增，今年收入有可觀增長，是毋庸置疑，但公司目前估值亦不便宜，加上其最大客戶是蘋果，其新手機未來銷情，將左右高偉電子股價走勢。 |
|
| 林嘉麒 |
2024-07-17T17:39 |
國際油價連日向下，拖累「三桶油」涯沽，其中，中國海洋石油(00883)今日(17日)收市跌5%，成交金額逾51億元，「Trump Trade」成為市場近日熱話，理應有利油價，但油價又彈唔起。油股大幅回落，加上維持高息率，係咪已經有一定吸引力？ 元宇證券投資總監林嘉麒指，雖然油股近日大跌，但投資者仍可留意「Trump Trade」及息率開始吸引，變相令油股前景好轉，佢提醒投資者可以開始重新部署，但短期仍然要捱價。此外，市場擔心內地經濟增長不似預期，但其實內地第2季經濟增長維持約5%，只要下半年增長平穩，而內需亦有機會回暖，所以現階段唔使太擔心石油需求大減，加上美元轉弱都會利好資源價格。 KK建議，投資者可留意營運狀況較佳慨中海油會唔會有價值體現，以現價計息率有6厘至7厘，加上市場預期集團今年盈利增長達20%，可以考慮做中長線部署。 |
|
| 彭偉新 |
2024-07-17T15:55 |
截至早上11時止，1小時內《彭博》用戶搜尋量最多港股，依次為中國石油股份(00857)、中國銀行(03988)、中國海洋石油(00883)、騰訊控股(00700)及中國鋁業(02600)。 中行股價今日(17日)偏弱，北水昨日(16日)減持約近1900萬股，已連續5個交易日減持，早前，大行擔心內地信貸疲弱，拖累內銀第2季收入及淨息差，情況係咪咁差？內銀股後市會點走？ 資深證券分析師彭偉新指，內地居民儲蓄率高，而市場廣義貨幣(M2)供應增長健康，但整體貸款需求仍未見回升，其中1個原因係樓市表現仍然唔理想，睇返過去兩年，內房每月公布慨整體合同銷售數據，按年都大幅下跌，跌幅高達70%，因此，唔能夠再靠樓市谷貸款需求，貸款需求萎縮影響內銀盈利增長能力，佢估計，內銀股短期仍然偏弱。 |
|
| 莊志雄 |
2024-07-17T15:30 |
特朗普遭槍擊後，令佢係今次美國總統大選慨勝在機會急升，過去幾日，金融市場都出現一些過往較少見慨情況，其中一個現象係小型股指數罕有跑出，升幅亦幾顯著。 「股市漁夫」創辦人莊志雄指，槍擊事件後，據博彩公司估算，特朗普勝選機會率達70%，依家市場慨炒法已當佢贏左，依家市場出現一些較少見慨情況，首先係中小型股造得好好，睇返過去1周各類資產價格表現，標普600小型股指數升近9.5個百分點，期間，標指僅升約0.6個百分點，係一個極罕見慨情況，表現第2好係中型股。 Lewis續指，另一個奇怪現象係金價跑贏標指，理論上中小型股造好，市場正處於risk on狀態，意味唔需要避險，投資者蜂擁去買風險資產。 |
|
| 盧志威 |
2024-07-17T10:35 |
港股連跌兩日，累跌逾560點，上周升幅已全部化灰，跌市原因包括市場擔心特朗普一旦再當選，將會再收緊對華貿易限制，其次係內地宏觀數據唔理想，以及憂慮三中全會最終冇驚喜。恆生指數昨日(16日)再失18000關，10天及20天線都守唔住，後市係咪唔太樂觀？ 潤淼資產管理董事盧志威認為，一旦特朗普成功再入主白宮係不利港股，睇返佢上次當選美國總統，中美爆發貿易戰，對華關稅係非常高，首先係中美會唔會再爆貿易戰，其次係內地已推出唔少政策，包括放寬內房、互聯網遊戲政策，但關鍵係呢些資金會唔會釋放出黎，佢又話，一旦再爆貿易戰，但美國大手減息，就有條件放寬貨幣政策，如果出現呢個情況就會利好股市。 不過，William提醒，都要視乎出現呢些情況慨時機，到底係係咪過左三中全會，等特朗普上任後，以及聯儲局亦已減息。佢估計，若美國9月開始減息，下半年慨銀根會較鬆動，繼而帶動股市向上。 |
|
| 郭家耀 |
2024-07-17T10:13 |
宏匯資產管理投資總監郭家耀推介山東黃金(01787) 推介原因： - 金價向好帶動業績 - 產量增長受惠新收購項目 建議買入價：17.0元 目標價：19.5元 止蝕價：15. |
|
| 林嘉麒 |
2024-07-16T22:37 |
藍月亮集團(06993)發盈警，預期上半年虧損擴大至6.65億元，主要因為銷售及分銷開支增加。 元宇證券基金投資總監林嘉麒表示，藍月亮加大電商渠道的投入，即使成功帶動收入上升，但銷售開支升幅更大，拖累業績表現，不排除股價會跌穿今年初低位，再創新低。 |
|
| 趙晞文 |
2024-07-16T18:49 |
東方海外國際(00316)第2季營運數據轉弱，摩根士丹利指，集團總載貨量按年升不足1%，每個標準箱整體平均收入按年只升13%，跑輸期內「中國出口集裝箱運價指數」逾50%慨升幅，而上季總收入只升14%，亦跑輸台灣同業。 大摩估計，東方海外股價未來60日最少有70%機會下跌，不過，集團股價已連跌8日，今日(16日)再要跌逾4%，收報109.1港元，目前累跌逾17%。 信達國際研究部董事趙晞文表示，雖然東方海外有上調運費價格，但紅海局勢拖累集團整體運載力，加價後反而流失部分訂單，而且載貨量按年持平，導致平均收入按年升幅跑輸市場。 佢續指，近日紅海局勢有緩和跡象，有望縮短運輸時間，並提升整體運載力，但唔少歐美客戶已經提早於下半年慨傳統消費旺季前出貨，而上周歐亞航線運費見4月中以來首次按周下跌，反映即期運費(Spot rates)向下，遠期運費協議(Forward Freight Agreement)亦開始受壓。 |
|
| 李偉傑 |
2024-07-16T18:13 |
小米集團(01810)今朝(16日)在微博宣布將於周五(19日)晚上7時舉行新品發布會，摺疊旗艦手機「小米MIX FOLD 4」將會亮相，董事長雷軍形容呢部係「真正頂配全能摺機」。過往雷軍一般會係8月發表年度演講，今年提早係周五傍晚，係咪為「小米MIX FOLD 4」造勢？之前小米推出電動車時，股價就大幅炒上，今次會唔會借「小米MIX FOLD 4」炒返轉？ 華盛證券財富管理部董事李偉傑指，小米一向好識把握發布新產品時機，估計小米股價今次都會借發布新手機炒高，加上呢部新摺機有人工智能(AI)加持，而售價會貴過上一代「小米MIX FOLD 3」，對小米毛利都有幫助。 Jason又話，有過汽車發布會慨成功例子，相信今次發布「小米MIX FOLD 4」都會為小米股價帶來驚喜作用，集團有可能一次過發布市場關注慨消息，例如手機及汽車業務。 |
|
| 盧志明 |
2024-07-16T15:25 |
截至早上11時止，1小時內《彭博》搜尋量最多首5隻港股，依次為中國平安(02318)、聯想集團(00992)、貝殼(02423)、東方海外國際(00316)、中國石油化工(00386)。 再有藍籌發可換股債券(CB)籌錢，今次輪到平保計劃集資35億美元，呢批CB 2029年到期，換股價43.71元，較上日收市溢價21%，集資所得主要用於發展以金融為核心慨業務。高盛分析指，平保發CB屬低成本融資，估計攤薄影響有限，但市場似乎唔太滿意發CB慨消息，平保今日(16日)股價仍跑輸大市，早段一度急挫近6%，見33.95元慨1個月低位。 大唐資本投資策略部總監盧志明認為，今次集資規模唔大，未必足夠支持業務發展，難免令市場質疑平保未必有需要向市場「伸手」。Ken續指，從基本面來看，今年初因中央連環出「組合拳」支持樓市而帶挈埋平保等一眾內險股，但最近慨三中全會未見有政策利好，加上內地消費降級慨現象令集團保單收益難有增長，唔排除今日資金借勢出貨而造成沽壓，料股價將受制於38元邊慨技術阻力區，繼續徘徊係32元至37.5元。 |
|
| 黃偉豪 |
2024-07-16T12:59 |
蘋果公司(Apple Inc.)股價昨晚(15日)再創新高，帶動港股慨Apple概念股今日(16日)逆市向上，其中，舜宇光學科技(02382)早段一度升5%，高見51.5元。 舜宇係今日較多資金流出慨個股，5日合計有逾390萬元資金坐貨，如果想買CALL輪，應選擇明年6月到期，長身及較遠價條款，還是今年9月到期，短身但較近價慨產品？ 中薇證券研究部執行董事黃偉豪認為，舜宇正股有望挑戰之前高位，即52.7元水平，如果想博短線升幅，宜小注買入今年9月慨近價CALL。 |
|
| 梁偉民 |
2024-07-16T12:24 |
美國前總統特朗普(Donald Trump)早前遇襲，令佢係11月慨總統大選勝出慨機會大增，唔少分析認為佢再度入主白宮已成定局，令資金押注聯儲局好大機會係9月減息，今年甚至有機會減息3次。美匯指數昨晚(15日)一度跌至104邊緣，金價就上返去每盎司2420美元樓上，美元及金價走勢反映市場押注聯儲局，將會係經濟唔會陷入衰退慨前提下減息，係咪意味聯儲局減息幅大過市場預期？ 高富金融集團投資總監梁偉民預期，聯儲局有70%機會係9月減息，全年就會減兩次息。Wyman又指，因為最新數據都有利聯儲局減息，令市場慨減息預期升溫，其次係聯儲局希望美國物價穩定及全民就業，不過，美國最新通脹數據放緩，就業市場亦轉弱，都成為聯儲局減息慨推手。 |
|
| 黃敏碩 |
2024-07-16T10:43 |
註冊財務策劃師協會會長黃敏碩推介京信通信(02342) 推介原因： - 5G網絡建設進入深度及容量覆蓋，新型工業化發展提供有力支撐 - 加強新業務，配合人工智能(AI)應用、雲計算、大數據等技術結合 - 打造全連接智慧算力平台FLeX5。 |
|
| 阮子曦 |
2024-07-15T22:49 |
哈爾濱電氣(01133)預告，上半年賺5.3億元人民幣，按年增長逾五倍。 華富建業證券投資策略聯席總監阮子曦估計，哈電半年盈利大升，可能因為較高毛利率的核電設備推動，而公司手頭現金充裕，相信全年派息亦會大幅增加，目前估值仍算吸引。 |
|
| 聶振邦 |
2024-07-15T18:13 |
重卡股濰柴動力(02338)發盈喜，預期中期盈利按年最多升約60%，受消息刺激，濰柴股價今日(15日)最多逆市升5%，早段高見13.14元，收市仍升1%，報12.64元。 博威環球證券金融首席分析師聶振邦認為，濰柴繼去年純利按年大升逾80%後，今年上半年再錄得雙位數增長，業務表現相當強勁。不過，內地經濟前景仍未明朗，佢預期，集團下半年難以突破去年同期慨高基數。 聶Sir續指，雖然濰柴股價升至高位後，唔少投資者趁好消息出貨，但睇返基本面，集團慨氫能電池業務，估計可受惠於國家推動新型能源政策，濰柴股價今年曾借氫能概念炒上17元，加上派息唔錯，股息率約4厘，有一定防守性，建議待股價回落至12元後入手，下半年目標價睇14.5元至15元。 |
|
| 梁傑文 |
2024-07-15T17:26 |
細價汽車服務股冠轈控股(01872)係3個月內進行多次股本融資，4月中「10合1」後，6月初就以每股0.63元配股集資1124萬元。上周五(12日)集團又出通告，建議以每股0.4元「1供4」，較上周五收市價折讓20%，料今次集資淨額有1.7億元，稱主要用來拓展泰國電動車業務。 冠轈今日(15日)低開後好快倒升，一度飆升24%至0.62元，不過升幅其後收窄，收報0.57元。 《香港股票財技密碼》作者梁傑文認為，1供4比例誇張，意味現有股東需要拿多4倍錢來供股，先可以避免股權被攤薄。Mike續指，冠轈供股集資慨規模遠大過市值，而集圖每股資產淨值(NAV)截至去年底值近4元，供股價較大幅折讓近90%。 佢估計，最極端情況係如果所有公眾股東都唔供股，到時承配人持股會升至80%，公眾股東就被攤薄至9.99%，變相易主。不過，佢唔排除大股東會搵友好人士參與承配，乘機執平貨，大幅增持股份。 |
|
| 姚浩然 |
2024-07-15T10:21 |
亨達財富管理董事總經理姚浩然推介中國聯通(00762) 推介原因： - 預測巿盈率(PE)約10倍，股息率約5.8厘，估值吸引 - 目前派息比率約55%。 |
|
| 郭思治 |
2024-07-15T10:11 |
7月大市相當反覆，恆指是由4日之高位18,133點急跌至9日之低位17,376點，即其時恆指一度跌穿各組常用之平均移動線，技術上已初呈續尋底之弱態，惟幸是低位沽壓漸消，加上維穩買盤又不斷滲著湧現，故大市卒急步反彈至12日之高位18,317點，從走勢上看，大市經過連續兩日之急升後，本月大市之形態現已扭轉成先低而後高，恆指暫是由9日之低位17,376點升至12日之高位18,317點，即月內大市之波幅已稍擴闊至941點，但一個月之高低位是不該同時出現於4個交易日之內，加上941點之波幅亦該不能滿足月內之所需，故在本月餘下之交易日，理論上該有更大之波幅點出現，從而擴闊月內之波幅以滿足所需，同時亦能拉闊月內高低位之距離以符合慣性之要求。 再看移動線方面之表現，目前各組平均移動線之排列由上而不為50天線（約在18,343點左近），20天線（約在17,921點左近），10天線（約在17,792點左近），100天線（約在17,501點左近）及250天線（約在17,493點左近），單從排列之方式看，大市暫仍身處反覆不明之中，惟經過連續兩日之急升後，恆指現已重越250天線，100天線，10天線及20天線之上，即衹要買盤不縮，恆指該可伺機上試50天線，衹要恆指能成功重越50天線並穩守其上，技術上該有利於再伺機上試6月20日之高位18,520點，甚至挑戰6月5日之高位18724點，但需留意，大市之成交金額持續偏疏，擔心在動力不配之下，大市之升勢會漸受規限，此亦為短期後市之隱憂。 拉闊一點看，今年首季恆指是由1月22日之低位14,794點升至3月13日之高位17214點，即首季大市屬先低而後高，而波幅則為2,420點，到第二季，恆指是由4月19日之低位16,044點升至5月20日之高位19,706點，即第二季大市之形態同樣屬先低而後高，而波幅則為3,662點，從上述資料看，大市於今年首兩季之表現確不差，且期間之成交金額亦尚算暢旺，但自踏進第三季後，大市之交投已明顯偏疏，且在零碎沽壓不斷滲著湧現下，大市之走勢亦逐步示弱，單從形勢上看，情況確開始令人擔心，尤其是大市之成交金額持續萎縮，即是說，由於動力不足，故即使市勢能偶見上升，但可能亦衹是有波幅而冇升幅，有反彈而冇大升之技術性後抽而已。 |
|
| 李浩然 |
2024-07-15T09:57 |
隨著時間的推移，股市似乎經歷了千變萬化。從指數基金的誕生、ETF的興起，到401ks和IRAs的普及，再到線上交易和零手續費交易的革命，股市的面貌正在不斷進化。然而，儘管市場的外表日新月異，其內核─人性的弱點，卻始終如一。 在過去的五十年中，股市技術的進步無疑是巨大的。數據顯示，自動化投資和對盤的引入，讓投資者能夠以前所未有的速度和精確度進行交易。高頻交易者利用毫秒差異獲利的故事，已不是秘密。然而，當市場在技術高峰狂舞時，人性的基本情緒─恐懼和貪婪，依然在角落里悄悄塑造著市場的真實面貌。 股市的波動性是衡量市場情緒的晴雨表。無論是大蕭條時期的劇烈震蕩，還是COVID-19疫情引發的金融風暴，市場的波動圖譜驚人地相似。這不禁讓人懷疑，所有的「創新」是否只是披上新衣的老朋友。市場的波動性，如同老戲新唱，觀眾雖然換了一批又一批，但戲碼卻驚人地一致。 Jesse Livermore的名言，似乎成了股市的永恆回聲：「華爾街沒有新事物。」看來，歷史不僅喜歡重演，還愛上了循環播放。投資者在這場永無止境的狂歡中，或許更應該學會的是辨識人性的老套路，而不是追逐科技的新玩意。 有趣的是，儘管市場上的裝備和武器升級了，戰場的塵土味卻始終未變。股市依舊是那個讓人既愛又恨的舞台，觀眾們在恐懼與貪婪之間，上演著一幕幕驚心動魄的戲碼。而這，也許正是股市吸引人的不變魅力所在。 總之，下次當有人向你炫耀他們的最新投資「革命」時，不妨輕笑一聲，想想那些股市的老戲碼，以及那些從未改變的人性弱點。畢竟，無論股市如何變化，它的核心故事似乎永遠固定在那些古老的情緒線上。 |
|
| 趙晞文 |
2024-07-12T22:43 |
中國中免(01880)的業績快報顯示，上半年收入減少12.8%，純利倒退14.9%。 信達國際研究部主管趙晞文指出，雖然中免於內地機場的免稅店收入大升，但海南的免稅店業務表現不濟，拖累盈利下跌，相信下半年情況會持續惡化，股價亦會受壓。 |
|
| 姚浩然 |
2024-07-12T17:38 |
京東集團(09618)股價今日(12日)一度升5.7%，高見112元，市傳集團旗下「京東MALL」將會進駐北京三環雙井，但現時內地消費力仍然疲弱，再擴大「京東MALL」版圖會唔會太進取？ 亨達財富管理董事總經理姚浩然指，京東以前主打線上業務，一般網上購物都講求效率及既定產品，集團依家增加實體店數目，相信係瞄準想睇實物及新產品慨顧客。Patrick認為，「京東MALL」慨出現其實只係想多一個渠道，而唔係取代線上業務，事實上兩者可以有互補作用。 股價方面，Patrick認為，京東股價炒高後，隨時出現調整，因為網購行業前景有隱憂，佢又建議，若投資者之前係低位買入京東，至今仍有錢賺，不妨等股價再升多少少，升至約115至118元，可以考慮先沽出約25%持貨。 |
|