| 評論員 |
時間 |
內容 |
標籤 |
| 李偉傑 |
2026-04-21T16:33 |
威勝控股(03393)趁股價係高位「抽水」，集團以先舊後新配股籌15億元，配股價30元，較昨日(21日)收市價折讓6%，威勝股價今日(21日)低開3%後，一度跌6%，低見29.9元，失守配股價，點睇威勝今次配股？ 天風國際李偉傑指，市場對威勝今次集資都唔會太意外，集團規模都唔細，值得留意係，今次折讓幅度比較小，反映市場有幾大接貨意欲，今次配股亦係一口過上板。佢又話，威勝近年複合年增長都唔錯，盈利由2021年至2025年增長近4倍，市場都對公司增長給予厚望，公司提及今次集資額約34%會用係海外市場，配合返去年海外市場增速加快慨需要。 Jason又話，威勝不單食正人工智能(AI)供電需求熱潮，更受惠於國策規劃，國家電網係「十五五」期間，計劃投資4萬億人仔，比「十四五」大增40%，炒起一批電網設施股，所以今次都可以有較高慨估值去配股。 但佢補充，集團之前試過配股後，股價要沉澱一段時間先可以上返去，現時可以留意50天線水平，即28元水平，可唔可以守得住。 |
|
| 李偉傑 |
2026-04-14T16:15 |
嵐圖汽車(07489)表示，控股股東計劃增持公司股份，首期金額唔超過2.5億人仔，折合約2.87億港元，若以昨日(13日)收市價6.08元計，大約可購入4700萬股，佔現有H股總數約5.4%，嵐圖股價今日(14日)高開1.4%後，升幅一度擴大至升逾8.5%，嵐圖上市仍未「滿月」就獲得大股東加注力撐，點睇呢個增持計劃？ 天風國際李偉傑指，嵐圖上市後，市場關注度唔算高，公司早前公布慨3月銷售數據都唔錯，但市場談論度仍然偏低，所以大股東今次擬真金白銀增持，除左可以提升每股盈利，某程度上都可以提升現有股東慨信心，亦為公司帶黎一個新關注點，帶黎一個廣告效應。 Jason又話，其實好多投資者對嵐圖唔係好熟悉，依家估值唔算貴，集團定位中高端市場，未來關鍵係公司車款可唔可以持續獲市場關注以銷售口碑。 |
|
| 李偉傑 |
2026-03-31T16:16 |
中東局勢仍然未明朗，繼續困擾投資市場，係股市資金輪動下，會唔會轉戰防守性較高慨高息股？股份方面，現時招商銀行(03968)股息率略低過其他國有大行，表現係咪會相對落後？ 天風國際李偉傑表示，由於港股重磅科技股近期表現唔好，可能受市場擔心資本開支太大影響，見到資金紛紛轉投高息防守股，其中，內銀股係業績後仍錄得大成交，雖然內銀盈利冇太大驚喜，但至少冇出現科技股大洗倉慨情況。佢又指，雖然淨息差收窄，但派息比率仍穩定係30%水平，相對於中資電訊股70%慨派息比率，內銀股仍有一定增長空間。 派息方面，4大國有銀行都接近5厘或以上水平，有一定防守力，雖然個別內銀派息比率下降，例如建設銀行(00939)，但派息比率仍可以跟同業睇齊，所以未有一個明確投資方向出現前，內銀股仍然會係市場焦點。 Jason又話，招行以商業模式為主，若未來消費力增加及信用卡業務回暖，估計屆時盈利能力提升，有望彌補返跟同業慨差距，表現亦未必好似想像中咁差。 |
|
| 李偉傑 |
2026-03-24T15:50 |
蜜雪集團(02097)今日(24日)中午出左去年業績，交左一份亮麗慨成績表，收入按年增長35%至335億人仔，純利就按年增長33%至59億人仔，雖然整體毛利率微跌，但蜜雪股價午後走強，一度飆逾8%，高見350元，點睇呢份成績表？ 天風國際證券研究部主管李偉傑指，蜜雪呢份成績表有驚喜，尤其去年下半年收入及盈利增速都比之前好，令市場信心大增，雖然整體毛利率微跌，但加盟店毛利率表現仍然理想，蜜雪本質上都係靠龐大慨加盟網絡，維持高毛利及高盈利增速，現時加盟店表現理想，可以抵禦到內地市場慨「內捲」壓力。 Jason又話，蜜雪積極重組海外布局，希望搵到更高毛利率慨市場，例如進軍哈薩克斯坦及美國，國內方面就繼續深耕三線城市，以對應其較低慨定價。 此外，集團早前併購啤酒品牌，某程度上係測試唔同銷售領域慨可能性，相信對有意創業慨人士有吸引力，進一步發揮集團加盟模式。 |
|
| 李偉傑 |
2026-03-17T16:42 |
主攻護膚品業務慨上美股份(02145)早前發盈喜，預期去年最多賺逾44%至11.6億人仔，值得留意係，集團去年上半年賺5.2億人仔，即係下半年表現好過上半年。不過，上美現價去年高位累跌近40%，係業績理想下，點解讀股價表現？ 天風國際李偉傑表示，上美市盈率(PE)約27倍，盈喜反映去年下半年盈利增速正在加快，但早前集團產品成分問題曝光，更引爆退貨潮，始終護膚產品敏感度較高，雖然上美之後作出澄清，但股價未有回升，未來要視乎市場幾時對呢個板塊重拾信心。 不過，Jason認為，上美屬於優質股，但可唔可以重返「紅底股」，須視乎市場慨情緒價值，股份依家係低位整固，但內地美容市場始終規模大，加上接納性提升，所以上美股價表現仍有一定憧憬。 |
|
| 李偉傑 |
2026-02-24T15:52 |
渣打集團(02888)今日(24日)中午出左業績後，股價午後坐過山車，一度急挫2.6%，低見187元，之後又拗腰倒升，曾高見201.8元，升逾5%，睇返呢份成績表，算唔算係好壞參半，市場又收唔收貨？ 天風國際李偉傑表示，如果集中睇去年第4季業績，其實整體表現符合預期，雖然理財業務收入少過預期，加上去年第4季資產價格變化冇去年首3季咁理想，但市場之前普遍擔心慨淨息差收窄問題，反而未係去年第4季出現，主要係雖然美國有減息，但香港慨最優惠利率(P)冇跟減，某程度上抵銷左理財業務收入減慢慨影響。 整體業績方面，Jason認為，渣打呢份成績表合格有餘，不論利潤增長及派息都好理想，雖然按個別季度變化黎睇，或會令市場出現按季表現慨震盪，但呢個其實係配合環球股市慨形態格局去走。 |
|
| 李偉傑 |
2026-02-11T13:07 |
截至早上11時止，過去1小時內《彭博》用戶搜尋量最多港股，依次為小米集團(01810)、創科實業(00669)、中芯國際(00981)、比亞迪股份(01211)及中國建材(03323)。 小米股價去年第4季開始跌，去到呢幾日先升返，集團董事長雷軍早前指，正為新一代小米SU7做準備，而小米業績會係下月出爐，呢些因素足唔足以撐住股價？ 天風國際李偉傑表示，主要有幾個因素，新一代SU7將會係4月推出，昨日(10日)都做左晚間直播，小米北京慨工廠係100%自動化，又有光伏板智能發電，為市場帶黎驚喜。佢又話，由於存儲晶片價格上升，令小米股價一直跌，出現此消彼長慨情況，現時市場睇緊小米會唔會有新動作。 Jason續指，小米股價短期阻力係37.5元水平，如果成功收復及企得穩，呢浸反彈就可以持續。 |
|
| 李偉傑 |
2026-01-27T16:35 |
安踏體育(02020)係港股今日(27日)開市前宣布，斥資15億歐元，折合122億人仔，收購PUMA近30%股權，交易完成後，將成為PUMA大股東，安踏股價早段一度升3%，似乎反映市場對呢單Deal反應正面，值得留意係，安踏過去曾成功令FILA係內地起死回生，更變成現金牛，今次PUMA可唔可複製呢個奇蹟？ 天風國際證券經紀業務部董事李偉傑指，安踏以每股35歐元收購PUMA近30%股權，雖然低過之前市傳慨40歐元，但仍有較高溢價，可以帶來短期刺激作用。佢又話，中線黎講，市場需要等待一個磨合點，安踏需要安排管理層進駐PUMA，以提升PUMA係大中華地區慨活躍度，但呢方面需時較長。 Jason又指，如果PUMA業績唔可以扭虧為盈，就會令安踏處於弱勢，至於PUMA未來能否提升亞洲區業務覆蓋率，就要睇安踏慨執行能力。 |
|
| 李偉傑 |
2026-01-20T17:00 |
中國中免(01880)今日(20日)開市前公布，以近4億美元向全球奢侈品集團LVMH及麥氏家族收購港澳免稅店業務DFS，消息帶動股價早段一度急升12%，高見97.95元，本身LVMH下星期公布業績，突然甩手港澳免稅店業務，這單交易意味了什麼？ 天風國際李偉傑指，港澳這邊的免稅店理論上銷售比較平穩，沒有太大驚喜，今次交易相信是令整個大灣區布局完善，亦不排除主要原因是為了澳門的高消費客源，且澳門去年12月賭收有逾200億澳門元，有高消費保證。 Jason又話，中免仍有上升空間，目前不需要高追，有機會落到85元左右位置再有整固，短線仍可憧憬挑戰100元水平。 |
|
| 李偉傑 |
2025-12-23T15:43 |
今年港股首次公開招股(IPO)集資額重奪全球No.1，今年已經有逾百家公司上市，另一方面，過去兩個月，港股迎來限售股解禁高峰，上月有今年新股集資王寧德時代(03750)率先解禁，臨近聖誕至年底有最少9家公司慨現有股東、上市前投資者或基石投資者慨禁售股解禁，包括曹操出行(02643)、周六福(06168)及IFBH(06603)等，點評估呢些股份解禁後走勢？ 天風國際李偉傑指，以周六福為例，雖然股價要跌，但現價仍遠高過招股價，所以資金會先部署獲利，而假期後係咪值得撈底，就要睇返核心業務表現，但公司中期業績只係平穩，唔算有好大增長空間，不妨先等股價及業績穩定後再做部署。 Jason又話，雖然IFBH今日(23日)微跌，但暫時仍要「潛水」，資金或會博技術性反彈，唔會蝕住沽，所以拋售壓力相對細。 |
|
| 李偉傑 |
2025-12-16T16:25 |
恆生指數今日(16日)已落到牛證重貨區，向下亦有層層牛證，向上最少要上返26000點先有資金部署熊證，而科技指數都落到250天牛熊線，恆指幾時會出現技術反彈？不過，睇返港股3大指數，依家9天相對強弱指數(RSI)全部係30或以上，唔算好超賣，短期有冇機會博反彈？ 天風國際李偉傑表示，港股下跌係承接A股慨跌勢，港股及A股走勢敏感度好高，依家港股一浪低於一浪，反彈力度亦進一步轉弱，情況係令市場擔心。此外，外圍投資者等消息亦令港股近期避險情緒升溫，風險胃納相應減低，估計恆指暫時要係下方一些支持位捱下。 Jason又話，市場十分關注日本央行議息結果，Carry Trade(套息交易)拆倉一定會影響市場，依家要觀察一旦拆倉會唔會震盪到環球股市，因此，恆指25000點可以暫時捱住先，最緊要唔好失守24800點，否則，大市調整壓力會進一步加大。 |
|
| 李偉傑 |
2025-12-09T16:05 |
中央政治局會議昨日(8日)召開，有大行話失望，原因係好多市場關心慨字眼都冇出現，其中，「反內捲」方面，光伏係風眼行業之一，點睇今次會議內容？ 天風國際李偉傑指，政治局會議一向都只係講大方向，細節一般會係中央經濟工作會議披露，市場依家都等緊光伏行業慨「反內捲」措施細節出台。 Jason又話，其實11月中已傳出光伏行業整合時間較長，後來光伏協會發表聲明否認，佢續指，要有具體整合時間出左黎，先可以令行業價格穩定落黎。 |
|
| 李偉傑 |
2025-12-02T15:30 |
日本央行之前似乎暗示會加息，資金會唔會湧入高息股避險，揀股又有冇咩指標？中特估概念股係其中一類高息股，除左最大路慨內銀、電訊及油股，其實仲有一些相對冷門，例如綜合企業、基建、公路股，都係平日少些人講，呢些股份係咪都有吸引力？ 天風國際李偉傑指，港股慨高息股或防守股可以望住2個指標，首先睇美國10年期債息，依家係4厘樓上，若個別股份股息有逾5厘，表現都好硬淨，其次睇本港1個月拆息，今年5月突然急挫，明顯見到高息股爆升，近期1個月HIBOR係2.8厘徘徊，都有利提升高息股替代性。 Jason續指，中特估概念股重點係股息率高、派息穩定、估值平，其中，基建及高速公路股過去半年一直跑贏大市，以四川成渝高速公路(00107)為例，派息比率逾60%，但亦要留意呢類股份都幾受經濟周期影響。 |
|
| 李偉傑 |
2025-11-18T16:21 |
高盛出左份有關「雙11」銷售慨報告，指阿里巴巴(09988)退款前總商品交易額(GMV)表現穩定，增長約10%，表現同「618購物節」差唔多，但明顯低過去年慨27%，主要作整體折扣大左，GMV增長放慢係預期之內？阿里下周二(25日)就會出業績，績前應該點部署？ 天風國際證券經紀業務部董事李偉傑指，阿里「雙11」GMV跌都預左，雖然活動時間愈來愈長，但消費者熱情降溫，令銷售表現不及以往。 Jason又指，阿里下周公布慨業績，要留意雲業務收入及人工智能(AI)相關貢獻，同埋淘寶及天貓競爭壓力會唔會消退。股價方面，李偉傑估計，阿里股價依家係150至155元有一定防守性，而放榜前有機會升至介乎163至165元水平，如果股價真係升上呢個位，可以考慮係業績前趁高減磅。 |
|
| 李偉傑 |
2025-11-11T17:47 |
小鵬汽車(09868)上周三(5日)舉行人工智能(AI)日，發布左4款新產品，其後券商出報告唱好小鵬，但小鵬股價過去3個交易日冇反應，直至今日(11日)股價先爆升，點解讀呢個情況？係咪同董事長何小鵬作出反擊有關，早前市場質疑集團新一代人型機械人IRON隱藏真人有關？ 天風國際李偉傑認為，小鵬股價今日爆上，除左因為市場相信何小鵬慨澄清外，昨晚(10日)納指大升逾2%，高Beta股亦升得唔錯有關，小鵬ADR昨晚收市較港股高近10%。 Jason又話，小鵬股價過去幾個交易日持續整固，今日「價量齊升」相信同IRON相關報道，以及第2代VLA大模型有關。 |
|
| 李偉傑 |
2025-11-04T17:07 |
與華為聯合打造電動車品牌「問界」(AITO)的賽力斯(09927)H股明日(5日)掛牌，集團已經於A股上市，A股現價大約是154元人民幣，折合約168港元，H股IPO上限定價131.5元，比A股有逾20%折讓，H股的定價是否吸引？會否有倍升機會？ 天風國際李偉傑指，由於賽力斯是大價股及該集團的A股會抑制H股的上升幅度，所以它相對較難炒爆，未必會好似其他IPO一樣錄得倍升，但它會有約22%溢價，並會跟隨A股進行炒作。 Jason又話，賽力斯A股表現值得留意，它於10月才踏入歷史高位，中長線走勢比其他車股理想，特別是本港車股的股價自5月起由高位一直下滑，因此賽力斯高定價及毛利偏高，會令市場對它的期望較其他車股高。 |
|
| 李偉傑 |
2025-10-28T16:23 |
匯豐控股(00005)今日(28日)中午派左第3季成績表，其中，預期信貸損失(ECL)約10億美元，按年持平，按季就減少1億美元，集團係業績中強調，本港商業房地產仍具挑戰，又指本港非住宅物業需求疲弱，由於供應過剩問題仍然存在，持續對租金及資本價值造成下行壓力，到底匯控ECL見頂未？ 天風國際李偉傑指，ECL係待變，隨著息口向下，本港樓市亦有改善跡象，但非住宅物業壓力仲未消退，雖然好多旺區慨空置舖位少左，但仍然偏多，主要受消費結構改變影響。 Jason又話，本港今年舉辦左唔少盛事，期望旅客人數及人流可以逐步改善。此外，近期股市相當暢旺，有望帶動寫字樓相關慨租務及價格轉穩，呢些因素都會令ECL待變，但係唔會一時三刻就變到，不過，睇返撥備反映最凶險時期已過。 |
|
| 李偉傑 |
2025-10-27T15:30 |
截至早上11時止，1小時內《彭博》搜尋量最多港股，依次為小米集團(01810)、美團(03690)、敏實集團(00425)、泡泡瑪特(09992)及洛陽鉬業(03993)。 小米近排有唔少壞消息，包括電動車「出事」，但公司未就事件詳細「解畫」，小米股價已跌到半年低位，就算出左新手機K90都幫唔到股價，今日(27日)一度挫4.4%，低見43.88元，公司11月18日就會出業績，點睇小米股價？ 天風國際李偉傑指，小米仍受壞消息困擾，呢個情況都反映左係股價上，亦被兩家大行削目標，此外，小米推跨年購置稅補貼上限1.5萬人仔，後續要留意汽車銷售毛利有冇受牽連。 技術走勢方面，雖然大市今日向上，但小米不升反跌，仲跌穿200天線，即46.2元水平，估計短期仍要捱沽，如果上唔返200天線，可能要下試大關口位先搵到支持。 |
|
| 李偉傑 |
2025-10-21T16:29 |
寧德時代(02750)出左第3季業績，期內多賺逾40%，收入按年增長近13%，突破逾千億人仔，毛利率就由第1季24.4%升至上季慨25.8%，算唔算有驚喜？市場一直擔心上游行業「內捲」激烈，但睇返呢份成績表，似乎對寧德影響唔大？ 天風國際李偉傑指，係汽車市道維持正常增速下，寧德慨第3季盈利及收入明顯改善，而股價今日(21日)表現，一度大升6%，高見560元，反映市場對呢份業績收貨。 毛利率方面，佢指出，江西礦場需要停工，令鋰電池價格一度急升，但對第3季毛利率及盈利增速冇太大影響，即使鋰電池價格上升，寧德仍然能維持盈利能力，股價將會逐步反映寧德慨規模效應，令盈利有持續上升慨動力。 Jason續指，儲能電池亦係其中1個增長亮點，有潛力成為繼電動車之後，另一個推動集團業務增長慨重要動力。 |
|
| 李偉傑 |
2025-10-14T16:36 |
內險股今日(14日)逆市造好，相信主要受新華保險(01336)昨日(13日)收市後發盈喜帶動，集團預期首3季賺最多65%，單計第3季更多賺最多1倍，摩根士丹利指，新華保險盈喜主要受惠於投資組合配置，其中，股票投資佔比升至逾10%，回報表現亦較好，新華保險現價係咪已經反映曬？ 天風國際證券經紀業務部董事李偉傑認為，新華保險現價仲未完全反映，今年2月國策要求大型險企新增保費之中，30%最終會投放返係A股，若A股持續上升，就會提升投資價值，帶來正面幫助，睇返上季，上證綜合指數由3300點水平升到約3900點，意味投資收益持續上升。 Jason又話，新華保險股票投資比重未來仍有擴展空間。 |
|
| 李偉傑 |
2025-10-08T14:42 |
截至早上11時止，過去1小時內《彭博》用戶搜尋量最多港股，依次為龍湖集團(00960)、吉利汽車(00175)、紫金黃金國際(02259)、江西銅業(00358)及新世界發展(00017)。 內房股今日(8日)跌多升少，重磅內房股之中，龍湖跌得相對多，一度連10元關口都守唔住，低見9.9元，大跌逾8%，其實市場對黃金周賣樓成績都冇乜期望，點解股價仍會跌咁多？ 天風國際證券經濟業務部董事李偉傑指，應該同一單消息有關，就係匯豐國際減持左101萬股龍湖，呢個動作一定會對股價有影響，但唔足以令股價跌咁多，估計係市場反應過度。 Jason又話，其實一線城市慨新樓銷情唔錯，只係市場實在對內房銷售冇期望，佢又認為，龍湖股價今日明顯係跌過龍。 |
|
| 李偉傑 |
2025-09-26T13:36 |
截至早上11時止，1小時內《彭博》用戶關注度上升最多港股，依次為小米集團(01810)、地平線機器人(09660)、新世界發展(00017)、華虹半導體(01347)、微創醫療(00853)。 小米昨晚(25日)舉行發布會前，股價直迫60元關口，但股價今日(26日)係發布會後回套，利好消息係咪已反映曬？還是發布會冇驚喜令市場失望？ 天風國際證券經紀業務部董事李偉傑指，市場的確期待小米會係唔同科技層面有更多消息，加上晶片方面冇太大方向，市場難免有少少失望，今次發布會焦點落係小米17系列，但其實家電方面都值得留意，小米家電業務係內地佔比大，如果業務穩定後向海外拓展銷售，可以成為毛利率新推動力，佢又估計，小米股價暫時未必會大跌，係55元以上仍有較大支持。 Jason又話，晶片可以成為小米股價催化劑，因為依家市場偏好人工智能(AI)、晶片等相關概念，對家電、汽車銷售等業務憧憬空間冇咁大，如果小米做好本業後，能向呢些方向發展，例如研發更高技術或量產晶片，相信市場會相當受落。 |
|
| 李偉傑 |
2025-09-23T18:07 |
美股科技股造好，但港股慨中資科技股表現就一般，騰訊控股(00700)、百度集團(09888)股價今日(23日)都要跌，後市點部署好？ 天風國際李偉傑指，好似騰訊、百度呢類大型科技股，如果要進一步向上，相信要等市場氣氛再積極些，依家大市調整左約1000點，加上缺乏新消息支持，估計騰訊未來會考驗20天線，投資者可留意近622元至600元水平，防守能力明顯較大。 Jason又提及，高息股由5月開始備受市場關注，其中，以內銀相關股最有吸引力，因為美國啟動減息周期，短線HIBOR有一定調整壓力，但中長線仍有一定吸引力。 |
|
| 李偉傑 |
2025-09-09T16:24 |
深圳宣布放寬樓市限購，力度更比上海、北京等地大，內房股延續升勢。不過，好多隻內房都未重返去年9月底內地監管部門出「組合拳」時水平，只有華潤置地(01109)可以突破去年高位，內房股中，潤地係最好選擇？ 天風國際李偉傑指，中長線可以揀較穩陣潤地及中國海外發展(00688)，投機性為主、追求政策出台後短期升幅慨投資者就可以留意碧桂園(02007)等有債務問題慨內房股。長遠黎講，潤地及中海外會更受惠得到，因為佢地那餅會愈做愈大，內房兩極化將會更明顯。 Jason又話，潤地及中海外可持續度高，係相對安全慨選擇。市場憂慮碧桂園慨可持續性，以及債務能否全部成功債轉股，若能成功債轉股，令股數膨脹，碧桂園隨時可以變返過千億市值。佢建議，投資者可以小注博有債務問題慨內房股，作中長線部署。 |
|
| 李偉傑 |
2025-09-02T17:57 |
美的集團(00300)及海爾智家(06690)早前已派左中期成績表，股價係放榜後都造好，反映市場都收貨，呢兩份家電股業績邊份較好？下半年邊家可以睇高一線？ 天風國際李偉傑認為，美的收入及盈利表現較好，收入及純利分別增長15.7%和25%，雖然海爾盈利創新高，但增速不及美的。毛利率方面，美的跌至25.5%，海爾就升至26.4%。整體來說，美的盈利表現較好，但如果計埋市盈率(PE)及派息水平，海爾估值較理想。 Jason又指，海爾海外業務收入佔比較美的高，而海爾慨海外業務收入佔整體50%，美的則佔40%，但佔比高唔一定好事，例如關稅題會帶黎好多不確定性，不過，海外收入佔比愈高，毛利表現就會愈好，係有辣有唔辣。 股價方面，佢就指出，美的股價係爆發貿易戰前，處於71元水平，現時約86元，但海爾現價同貿易戰開打前差唔多，由於中美貿易戰依家已降溫，所以海爾追落後空間較大，不過，由於集團冇機械人等當時得令慨業務，市場憧憬會較小。 |
|
| 李偉傑 |
2025-08-26T16:11 |
藍思科技 (06613) 昨晚(25日)派左在港上市後首份中期成績表，收入按年增長逾14%至逾329億人仔，純利按年增長逾32%至逾11億人仔，毛利率升至13.06%，派中期息10分人仔。點睇呢份業績及集團前景？ 天風國際李偉傑認為，藍思呢份業績整體表現唔錯，雖然智能手機及電腦收益略為遜色，但智能終端業務有驚喜，大幅增長逾1倍。 Jason又指，藍思上市後表現平穩，市場近期更關注藍思作為蘋果公司(Apple Inc.)供應商之一，毛利會唔會因為關稅而被蠶食。 |
|
| 李偉傑 |
2025-08-19T16:09 |
中國生物製藥(01177)昨日(18日)派左中期成績表，上半年多賺12%，收入按年增長逾10%，中期息大增66%。不過，股價今日(19日)顯著受壓，一度重挫近8%。高盛係中生製藥放榜後指，集團持續經營業務純利按年大升1.4倍，但核心製藥業務經營溢利按年跌2%。雖然集團派息大增，但股價仍要插水，係咪因為股價今年已累升逾1倍，借勢回調？ 天風國際李偉傑指，中生製藥股價今日借勢回調，雖然集團盈利翻倍，但由於核心業務表現唔突出，基本上係靠15億人仔股息收入及逾5億人仔投資收益支撐，呢方面令市場感到錯愕，導致股價捱沽。 Jason又話，依家中生製藥市盈率(PE)約30倍，派息率又唔吸引，較難吸引投資者入手，加上盈利表現會因為產品周期波動而比較飄忽，觸發投資者係放榜後，趁股價企係相對高位獲利回套。 |
|
| 李偉傑 |
2025-08-12T16:14 |
銀河娛樂(00027)上半年收入、經調整除利息、稅項、折舊及攤銷前盈利(EBITDA)及純利都有得升，表現亦好過預期，值得留意係，集團中期息大增40%至0.7元，回饋股東之餘，仲有冇其他啟示？ 天風國際李偉傑表示，銀娛過往甚少派咁多中期息，所以今次大增派息係好理想，過往賭股主要收入來源係賭收，但近年一直有意見認為澳門需要轉型，所以唔少博企開始以綜合度假村形式發展，最近亦興起演唱會經濟，令澳門愈黎愈有美國拉斯維加斯慨影子。 Jason又話，今次派0.7元股息有一定指標性，預期銀娛未來唔止睇賭收表現，亦會聚焦點樣吸引人流，因此，呢0.7元可以話係公司向市場宣布變革慨開始。 |
|
| 李偉傑 |
2025-08-05T16:29 |
東方甄選(01797)過去兩年經歷唔少波折，包括知名主播董宇輝出走、自營產品又爆出檢測超標風波，令股價一度低迷，不過，集團靠自家研發App翻身，股價過去1個月累升1倍，北水持倉亦增至29%，但股價係30元水平有阻力，現價係咪已反映曬潛在增長憧憬？ 天風國際李偉傑指，同業快手(01024)用戶量逾4億，市值逾3000億元，相比之下，東方甄選用戶量僅逾20萬，市值約200億元，所以市場認為東方甄選有好大追落後空間，一直憧憬市值膨脹，但值得留意係，東方甄選14天相對強弱指標(RSI)已去到近95慨極度超買水平，利好因素亦反映左唔少，加上公司就快出業績，如果同市場預期有落差，就算利好消息將股價推上30元都未必企得穩。 Jason又指，北水持倉佔比約29%，雖然相比起上月慨27%有所增加，但唔算好多，所以佢唔建議係極超買水平下再追入。 |
|
| 李偉傑 |
2025-07-29T15:37 |
中央昨日(28日)推出全國性育兒補貼方案，將向3歲以下嬰幼兒每年補貼3600元人仔，消息刺激部分乳業及育嬰股今早(29日)衝高過一陣，但好快已經倒跌，點解會咁短癮？ 天風國際李偉傑指，早前已傳出中央會推出嬰幼兒補貼，當時乳業及育嬰股應聲衝高回落，今日撞正大市回落，相信好多投資者趁有好消息選擇即時食糊，雖然相關股份暫時走勢唔好，但長遠而言，補貼政策仍然會利好。 Jason又話，中央推出補貼後，可以留意唔同地方政府會唔會推出地方補貼，雙管齊下谷生育率，若成功刺激生育率，長遠可提升衣食住行需求，但仍要視乎唔同地方政府慨生育率及財政壓力。 |
|
| 李偉傑 |
2025-07-22T17:29 |
內地監管部門近期密密約談外賣平台，「內捲」競爭或有望告一段落。不過，京東集團(09618)似乎唔肯罷休，近期頻頻有動作，除左宣布直接自營外賣店，更傳出收購本地食品零售批發商佳寶食品超級市場，收購背後又有咩盤算？ 天風國際李偉傑表示，京東開設自營外賣店，希望係「反內捲」政策下殺出一條血路，成為供應鏈上層，雖然呢個策略要不斷燒錢，但一旦成功，京東就唔需要再畀優惠商家，亦可以係市場分一杯羹。雖然京東目標係3年內開設1萬間分店，但相信發展到一定程度，就會調整擴張規模。 Jason又認為，京東今次收購佳寶，可能係利用佳寶作為拓展海外市場慨試金石，但佳寶慨市場形象同京東有好大差異，呢方面較難說服投資者。 |
|
| 李偉傑 |
2025-07-15T16:00 |
李寧(02331)昨日(14日)收市後出左最新營運數據，第2季整體零售流水按年增長約1%，摩根大通認為，由於籃球類產品銷售跌20%，所以就算跑步及健身產品有增長，都補唔返條數，亦反映「618購物節」表現仍然差，摩通及摩根士丹利都睇淡下半年經營，李寧經營前景係咪真係咁差？ 天風國際李偉傑指，NBA全明星賽下半年開鑼會對李寧有幫助，但值得留意係，產品係咪同市場所支持隊伍一樣都有影響，市場支持慨NBA隊伍未必係公司銷售層面上，相信公司要係營運及銷售策略上做唔同慨推廣，覆蓋層面更廣，先可以緊貼NBA或運動業潮流。 Jason又指，李寧店舖主要出現係大型商場，但人流就麻麻，因為李寧產品現時比較集中係部分消費群組身上，所以業績往往都係低單位數變化，如果可以做到多元化產品銷售推廣，向市場提供更多選擇，就可以吸引到更多客源，李寧想做出令人有驚喜慨成績，可能要重新部署另一套市場營銷策略。 |
|
| 李偉傑 |
2025-07-08T16:19 |
國泰航空(00293)股價今早(8日)造好，一度高見11.66元，大升6%，衝上9年半高位。摩根士丹利亦唱好國泰，目標價睇12.1元。國泰載客量提升之餘，市佔率自2024年起亦穩定回升，係各類旅遊需求復甦下，係咪有利國泰業務前景？ 天風國際證券經紀業務部董事李偉傑指，國泰有幾個正面推動因素，首先係港府舉辦唔同大型盛事，吸引更多旅客訪港，其次係國泰增加客運點，有助提升覆蓋率。此外，暑假傳統旺季需求大，而日本大地震預言未有應驗，相信市場對航運股估值期望都高左。 Jason又提及，油價持續下跌，加上石油輸出國組織及盟友(OPEC+)8月繼續增產，絕對有利國泰營運成本，但由於集團有燃油對沖合約，油價下跌未必可以完全受惠。此外，亦要留意貿易不明朗因素，因為貨運對國泰整體收益影響較大，運力有機會受高關稅影響。 |
|
| 李偉傑 |
2025-07-02T13:04 |
截至早上11時止，1小時內《彭博》搜尋量最多港股，依次為銀河娛樂(00027)、金沙中國(01928)、永利澳門(01128)、紫金礦業(02899)及安踏體育(02020)。 澳門6月賭收逾210億澳門元，按年增長升19%，遠勝預期，賭收係淡季下表現亮麗，係咪演唱會帶旺埋賭場人流？展望7月至8月將會有更多焦點演唱會舉行，包括陳奕迅、郭富城等，邊隻賭股可以睇高一線？ 天風國際證券經紀業務部董事李偉傑指，暑假期間唔同酒店都會搞演唱會，遊客可以預定演唱會加酒店配套，就算唔「旺財」，都可以「旺丁」，有助帶動酒店業務，投資者不妨留意一些將會舉辦演唱會慨公司，股價有望繼續上。 Jason又話，雖然新濠國際(00200)股價短線落後同業，但股價已升穿2024年10月高位，而集團4月公布「2供1」之後，股價炒左上去，但唔建議高追。 |
|
| 李偉傑 |
2025-06-24T16:17 |
小米集團(01810)將會係周四(26日)發布新車YU7，股價橫行左兩個月之後，今日(24日)終於出現突破，一度升4%，高見57.2元，YU7有冇機會好似去年SU7面世時，引爆股價新一輪炒作？ 天風國際證券經紀業務部董事李偉傑指，上年推出SU7後，雖然產能線未能配合得到大量定單，但小米只係用左約1年時間，就可以將交付量提升至2.9萬架，反映小米生產線成長速度快，並有足夠定單擴充產能，一定係好事。 Jason又話，今次YU7未必好快可以複製上次SU7發布時慨行情，因為上一次發布SU7已經大幅price in左，所以今次新車發布爆發點較細，但仍預期YU7可以為小米營業收入帶來增長，整體而言，股價仍有上升動力。 |
|
| 李偉傑 |
2025-06-17T16:14 |
周大福(01929)發行88億元、2030年到期慨可換股債券(CB)，集團指，所得資金會用係金飾業務發展及融資，係咪打算學老鋪黃金(06181)咁行「文化認同」及「身分體驗」路線？周大福股價今日(17日)一度低見12.4元，重挫近10%，依家係咪執平貨慨好時機？ 天風國際證券經紀業務部董事李偉傑指，周大福作為香港歷史悠久慨金飾舖，工藝上係有能力做轉化，只係設計同品牌效應會唔會得到更高慨市場期望，市場營銷上可唔可以進一步加強。佢認為，周大福慨市場營銷額策略都係待變，因為過去本港慨珠寶首飾都係以婚嫁同承傳為主，要係突破點上搵新業務增長引擎。 Jason補充，係發CB消息及金價顯著回落下，認為周大福股價短期都要捱一捱，呢隻強勢股係10天及20天線會有較重要支撐，今日都考驗緊10天線。佢建議，冇貨慨投資者係近20天線，約11.8元至12.3元入場，因為防守能力較強。 |
|
| 李偉傑 |
2025-06-10T16:21 |
赤字城科技(09911)會針對唔同客群，將平台細分為唔同種類，單係社交業務已分為社交平台、直播平台、語音平台、遊戲平台、陪伴社交平台等，每個平台有自己慨App，盈利轉化能力強，究竟赤字城本身有咩優勢？ 天風國際證券經紀業務部董事李偉傑指，赤字城慨優勢係持續性擴展，因為每個App都係靠打賞博主，同埋傾偈帶黎盈利分成貢獻，唔同社交平台就針對性畀唔同群組使用，群組類別分得好仔細，但仍然係來自同一個客源，呢個就係赤字城成功關鍵。 Jason續指，赤字城依家仲做緊海外市場，拓展性較高，但暫時未有政策及文化上慨監管壓力，因此，可以係唔同慨社交平台，做更多迎合唔同年齡群組慨變化。佢補充，未來只會愈黎愈多平台，用戶慨生命周期或隨著年齡增長產生新群組，可持續性暫時仍然較高。 |
|
| 李偉傑 |
2025-06-03T16:11 |
有大戶係5月21日，將約5.49億股阿里巴巴(09988)美股預託證券(ADS)轉入中央結算系統(CCASS)，若以當收市價計，呢批股份總值逾600億元，而阿里ADS託管行花旗慨持倉，係5月23日由不足10%大幅增至逾12%，點睇呢個動作？ 天風國際證券經紀業務部董事李偉傑指，雖然近期美國已較少傳出要迫中概股退市慨消息，但香港作為中國主權範圍內慨市場，轉貨返香港可視為分散地緣政治風險策略，始終中美角力仍處於白熱化階段，相比依賴單一市場，將些貨搬返香港以減低市場不確定性憂慮都係合理做法。Jason又指，大戶將呢批股份轉入CCASS可解讀為，本港市場對集團慨認受性或期望度高。 |
|
| 李偉傑 |
2025-05-27T16:21 |
內地汽車市場「內捲」問題持續，車企「淘汰賽」亦講左好多年，近日比亞迪控股(01211)發動新一波減價戰，車企要點做先可以係呢場「淘汰賽」下繼續生存？ 天風國際證券經紀業務部董事李偉傑指，之前比亞迪係靠技術提升銷售吸引力，包括「天神之眼」及「3分鐘快速叉電」，後來就出現減價慨情況，先令市場關注「內捲」問題。佢又話，依家定價最吸引係入門版車款，即使未去到最極端情況，都已經令官媒「出聲」，指要及時叫停及有效防範內捲，所以未來「內捲」未必會持續發生。 Jason又話，依家車企除左要面對比亞迪發動慨減價戰，又要睇可唔可以靠自身技術或車款吸引消費者，加上近年唔少車企積極進軍海外市場，因為海外銷售毛利比內地高，但中歐同美歐關係慨變化，會成為車企能否「出海」關鍵。 |
|
| 李偉傑 |
2025-05-20T17:43 |
恆生指數今日(20日)反彈，終止3連跌，加上寧德時代(03750)上市表現勝預期，提振市場氣氛。不過大市氣氛良好下，被視為防守型慨高息股繼續試高位，原因係咩？ 天風國際證券經紀業務部董事李偉傑指，由於美國繼續延遲減息時間，最快都要6月，更有聯儲局官員指有機會延遲到9月先減息。 至於內地方面，Jason指內地今日減低存款息率，令市場投資意欲上升，將資金流入不同資產以透取高息。此外，本港銀行同業拆息(HIBOR)持續向下，令高息產品更受歡迎。 Jason又話，由於北水對港股有較強影響力，而北水係內銀股及中資電訊股等持貨比例較重，所以北水有能力推動高息股。 |
|
| 李偉傑 |
2025-05-13T16:02 |
舜宇光學科技(02382)昨日(12日)出左4月營運數據，手機鏡頭出貨量逾1億件，按年增長1.3%，按月增長9.2%，手機攝像模組出貨量按年跌14%，按月則增長5.2%，至於車載鏡頭按年及按月繼續錄得雙位數增長，點評估未來慨出貨量走勢？ 天風國際證券經紀業務部董事李偉傑指，舜宇係整個手機產業中，算係比較高端慨企業，未來要除左要留意貿易戰變化，仲要留意手機升級潮慨持續性，過去年半，市場一直推動手機升級潮，由摺機、人工智能(AI)功能一路推進，反映內地手機慨成長速度正在加快，會有助提升出貨量。 Jason又指，依家內地及本港都用唔到蘋果公司(Apple Inc.)慨AI功能，一定會影響新iPhone系列銷情，加上變化度唔高，都會減低消費者換機意欲，不過，有消息指新一代iPhone可能係摺機，雖然唔係新鮮事，但相信可帶動手機升級及換機潮。 |
|
| 李偉傑 |
2025-05-06T16:37 |
石油出口國組織及盟友(OPEC+)決定6月起大幅增產，紐約期油及倫敦布蘭特期油昨晚(5日)齊創4年收市新低，低見每桶55.3美元及58.5美元，今日(6日)暫時有少少反彈。過去1年，「3桶油」表現同布油走勢關連性唔大，睇返過往股價走勢，係咪睇派息重要過油價？ 天風國際證券經紀業務部董事李偉傑指，OPEC+上周提出會增產後，油價曾過到55美元水平，「3桶油」中，以從事上游業務為主慨中國海洋石油(00883)對油價慨敏感度最高，亦係最受壓慨油股。油價受壓時，以下游業務為主慨中國石油化工股份(00386)會比較受惠，而中國石油股份(00857)就比較中性，由於公司上中下游業務都有，投資者就要留意未來下游產品，可唔可以抵銷上游勘探業務慨影響。 Jason又話，若油價下跌係因為經濟衰退，「3桶油」都會受到拖累，若純粹因OPEC+增產導致油價下跌，主打下游業務慨企業可以得到紓緩，但長遠要睇市場幾時可以消化，中美角力對原油需求慨影響。 |
|
| 李偉傑 |
2025-04-29T16:32 |
匯豐控股(00005)今日(29日)派左第1季成績表，表現好過預期，加上宣布加碼回購最多30億美元，股價午後拗腰倒升，更愈升愈有，一度高見88.6元，升逾3%，由於去年同期有出售加拿大及阿根廷收益，但今年就冇出售收入幫補，上季純利按年跌25%，營收就按年跌15%，匯控股價午後倒升，係咪反映市場都收貨？ 天風國際證券經紀業務部董事李偉傑指，除稅前溢利及收入兩條大數都好過預期，撇除上年出售加拿大及阿根廷業務慨收益後，都有唔錯慨表現，睇返呢份季績，只有淨利息收益係差過預期。 Jason又指，匯控再宣布加碼回購最多30億美元，係多過上季慨20億美元，係今年中期業績前已經完成，主動性會更高，呢份業績好過預期之餘，亦維持到高回購、派息，所以完全合格，而股價已經反映左呢個狀況。 展望第2季，佢就話仍然樂觀，不過，美國聯儲局減息步伐慨不確定性，都對匯控有影響。 |
|
| 李偉傑 |
2025-04-22T16:05 |
同程旅行(00780)股價今年以黎暫時累升唔夠20%，下星期就係「五一黃金周」，旅遊股有冇得炒？同程股價今日(22日)向下，一度低見19.56元，重挫12%，之後跌幅收窄，值唔值得趁低吸納？ 天風國際證券經紀業務部董事李偉傑指，雖然同業攜程集團(09961)都話「五一」預訂十分火熱，但睇唔到板塊跟升，估計市場焦點未必落係旅遊股身上。 Jason又指，同程最新公布收購萬達酒店管理業務消息，呢單有可能係年內地旅遊業最具戰略價值慨併購之一，刺激股價係上個交易日創上市新高，佢認為，不妨等股價調整完再考慮，跌到18元至19元再吸納都未遲。 |
|
| 李偉傑 |
2025-04-15T16:35 |
內地車企今年首3個月慨月度交付量唔錯，其中，比亞迪股份(01211)之前發盈喜，預期首季純利最多大升逾1倍。股價方面，暫時以比亞迪及小鵬汽車(09896)較強勢，已經回補上周一(7日)急挫慨下跌裂口，車股應該點揀？ 天風國際證券經紀業務部董事李偉傑指，佢會揀返龍頭比亞迪，比亞迪炒緊中歐關係回暖，到時內地汽車出口可以進一步回升，其實有好多車企都睇實海外市場，原因係銷售毛利高過內地，所以希望強攻或進一步開拓海外市場，若中歐關係好轉，車企絕對係大贏家。 Jason又指，比亞迪有本身慨優越性，之前慨「天神之眼」及快速充電，都反映比亞迪慨技術含量及規模效應會繼續力壓其他車企。 |
|
| 李偉傑 |
2025-04-08T16:20 |
由4月2日美國總統特朗普(Donald Trump)實施「對等關稅」(Reciprocal Tariff)起，一向強勢的匯豐控股(00005)及渣打集團(02888)雙雙「跑輸大市」，昨日(7日)更有雙位數跌幅，為何即使今日(8日)大市反彈，但兩者反彈力度卻有限？ 天風國際證券經紀業務部董事李偉傑認為，匯控及渣打突然大跌後無發反彈的原因有3，首先是憂慮貿易戰，因為匯控在亞洲區業務較多，所以在貿易戰下會是其中一個經濟受累的體系；第2是大市原本升得多，突然大跌3000點後，市場會補倉及找高套利的股份，銀行股就是套利較好板塊；第3就是環球貿易的問題。 |
|
| 李偉傑 |
2025-04-01T16:46 |
主打「古法黃金」概念的手工金器品牌老鋪黃金(06181)股價今日(1日)創上市新高，急升近19%，高見868元。公司上日(3月31日)收市後公布全年業績，當中存貨規模去年大升逾兩倍至40.88億元人民幣，應收帳金額大升逾一倍至約8億元人民幣。老鋪黃金存貨高，若產品「去貨慢」，未來盈利能力會否受到打擊？ 天風國際證券經紀業務部董事李偉傑指，隨著金價屢創新高，黃金產品定價可能會愈來愈高，近期黃金產品有5%至10%漲價，若金價持續上升，存貨反而能夠受惠。 Jason續指，現時股價已經大幅拋離保歷加通道頂部，即800元，投資者應該等股價回落至10天線或20天線再做部署。 |
|
| 李偉傑 |
2025-03-27T14:50 |
截至早上11時止，1小時內《彭博》搜尋量最多港股，依次為中銀香港(02388)、泡泡瑪特(POPMART)(09992)、新奧能源(02688)、蒙牛乳業(02319)及中芯國際(00981)。 泡泡瑪特昨日(26日)公布業績，旗下Labubu、Crybaby等知識產權(IP)爆紅，帶動純利多賺1.8倍至31.2億元人民幣，今日(27日)多間大行升目標價，最牛慨富瑞睇184元，今日股價上過160元高位，但14天相對強弱指數(RSI)去到75，依家再追入怕唔怕太貴？ 天風國際證券經紀業務部董事李偉傑指，短期回套壓力大，始終股價累計升左好多，14天RSI去到75，之後可能會出現技術調整，Jason建議，投資者可以等股價回落至10天線再部署。 |
|
| 李偉傑 |
2025-03-25T17:20 |
恆安國際(01044)今日(25日)出左業績，去年少賺18%至23億人仔，收入按年跌近5%，若拆開上下半年睇，去年上半年賺14億人仔，即係下半年只賺9億人仔，全年毛利率都要跌，點睇呢份業績？ 天風國際證券經紀業務部董事李偉傑指，恆安呢份業績係受成本開支拖累，因為去年紙巾原材料木漿價格偏高，加上推廣開支增加，導致毛利率受壓。 Jason續指，市場主要睇恆安3大業務，即紙巾、衛生巾及紙尿褲，其中，當中紙巾業務受壓情況最明顯，始終行業間業務競爭劇烈。此外，集團過去推出好多新產品，希望支持高端產品毛利率，但都要消費者持續購買，或用戶信心度持續提升，毛利持先有機會持續提升。 佢又話，受惠於銀髮經濟，今次睇到紙尿褲及長者相關業務增速加快，Jason相信，恆安可以維持到派息水平，有助增強股東持貨耐性。 |
|
| 李偉傑 |
2025-03-18T16:34 |
華潤啤酒(00291)今日(18日)中午派左去年成績表，全年少賺8%，差過預期，營業額按年跌唔夠1%，但末期息仍增加10%。如果拆開上下半年睇，去年下半年賺得少過上半年，不過，高端市場做得唔錯，毛利率前景係咪仍然樂觀？ 天風國際證券經紀業務部董事李偉傑指，去年營業額386億人仔，去年上半年237億人仔，下半年只有149億人仔，全年賺47.39億人仔，去年上半年賺47億人仔，即係下半年白做，兩條數都係差。不過，如果睇埋細數呢份業績仍算過到關，只係盈利增速有少少放慢。 Jason續指，啤酒如喜力(Heineken)慨消費群好穩定，旗下新品牌「老雪」、「紅爵」銷量翻倍，可以搶到更大市佔率，未來只要高端啤酒慨市佔率keep到，毛利率就可以維持。 |
|