| 評論員 |
時間 |
內容 |
標籤 |
| 聶振邦 |
2026-06-12T16:29 |
創新藥B仔股華健未來(06132)今日(12日)開始收飛，下周三(17日)截飛，集團計劃發行1360萬股H股，股數相對較少，上市後股價會唔會較硬淨？公司旗下核心新藥HJ787，係內地唯一處於臨床開發慨外用選擇性TYK2抑制劑，係咪都要留意內地限制出口或美國制裁等風險？ 高歌證券金融首席分析師聶振邦指，華健未來基石投資者約45%，意味市面只得逾700萬股，街貨少會令股價沽壓顯著減少，所以有一定吸引力，不過，參考天辰生物(01779)上市時，首日升幅唔及暗盤，認為依家玩「B仔股」應以短線操作為主。 聶Sir又話，現時新藥仍處於臨床階段，所以擔心制裁係言之尚早，想入飛抽慨投資者不妨留意下周三截飛前慨孖展認購反應，若超額認購1800倍或以上，可以考慮借孖展認購。佢又估計，華健未來首掛有望升，不過，若暗盤表現好，或升幅較上市價高50%以上，對謹慎慨投資者黎講，止賺會較安全。 |
|
| 聶振邦 |
2026-06-08T16:19 |
機械人股優必選(09880)旗下消費級人形機械人品牌UWORLD推出超仿生人形機械人，首發預訂量6日已累計突破2110台。受消息刺激，股價今日(8日)平開後，一度高見121.3元，升近10%，優必選股價及新產品係咪值得憧憬？ 高歌證券金融首席分析師聶振邦認為，優必選過往都係生產工業類機械人，今次民用慨高仿真度機械人外形，加上能夠提供情感上陪伴，都令市場有更大期望。不過，佢指出，由於呢款機械人續航時間短，亦未有配套做二次開發，意味更新可能去到某個程序就會暫停，因此，會令吸引力打折扣。 股價方面，聶Sir指出，依家半導體股有回軟跡象，加上集團自身利好消息帶動，有望帶動埋港股其他機械人股，因此，佢認為優必選短期可睇高一線，保守慨投資者可以留意110元水平，較進慨投資者可以考慮係120元做部署。 |
|
| 聶振邦 |
2026-06-03T15:58 |
長飛光纖光纜(06869)獲摩根士丹利大升目標價近4倍，由47元調高至230元，但仍低過現價，不過，股價今日(3日)都有反應，一度勁升逾17%，高見273元。值得留意係，大摩話，光纖主要產品價格大升75%至80%，但點解同公司去年業績唔太匹配？ 高歌證券金融首席分析師聶振邦指，英偉達(Nvidia)創辦人黃仁勳昨日(2日)指，美國晶片企業Marvell可以成為下一家萬億企業，令市場意識到全球對光通訊慨需求熾熱，所以今日成個板塊都受資金追捧，加上公司唔只有需求強勁慨中國市場，海外市場佔比都高達42.7%，係人工智能(AI)基建需求咁大，加上光纖價格仍呈上升趨勢，長飛光纖明顯受惠。 聶Sir又話，其實長飛光纖今年第1季業績已有改善，純利大升逾2倍，若呢個強勁增長勢頭持續，今年上半年盈利有機會超越去年，大摩基於首季強勁慨爆發力，又認為增速應該可以持續，所以大幅修正集團估值。 |
|
| 聶振邦 |
2026-05-29T15:54 |
港產「藥妝王」龍豐集團(02290)昨日(28日)開始招股，將會係下周二(6月2日)截飛，預期下周五(6月5日)首日掛牌，市傳孖展暫時已錄得超額認購，值得留意係，同期有另外兩隻股招股，龍豐有冇機會成為「黑馬」？ 高歌證券金融首席分析師聶振邦指，依家唔少IPO都係中資、生物及人工智能(AI)相關股，反觀龍豐呢些零售股就較少，所以有行業稀缺性。另外，龍豐孖展暫時已超購逾10倍，而投資者一般會係截飛前先考慮「最後衝刺」，因此，佢認為孖展最終仍有機會超購百倍。 聶Sir續指，有別於莎莎國際(00178)，龍豐除左有護膚、美妝等業務外，仲有藥品及寵物食品等，產品類別好多元化，可以吸引唔同消費群。雖然集團面對激烈競爭，但現時盈利表現唔錯，今年首8個月盈利增長逾80%，業績都反映集團開始步入收成期。 |
|
| 聶振邦 |
2026-05-20T13:12 |
截至早上11時止，過去1小時內《彭博》用戶搜尋量最多港股，依次為中芯國際(00981)、比亞迪股份(01211)、紫金礦業(02899)、貝殼(02423)及紫金黃金國際 (02259)。 貝殼昨日(19日)出左首季業績，經調淨利潤按年增長15.7%，但淨收入按年跌19%，毛利率創7個季度新高，放榜後，高盛及花旗上調貝殼全年盈利預測。貝殼股價4月之後走勢強勁，今日(20日)一度高見49元，大升7.5%，但之後有獲利壓力，更開出1支「大陰燭」，係咪反映市場仍對內房冇信心，趁股價彈就沽貨？ 高歌證券金融首席分析師聶振邦指，的確有見彈就沽慨可能，貝殼出完業績後，可能市場預期暫時未必再有利好股價慨消息，所以趁高散貨。 聶Sir又話，貝殼上季收入要跌，若未來收入繼續有放緩壓力，最終會反映係盈利增長上。佢續指，睇返日前出爐慨「三頭馬車」數據，其中，零售遠低過市場預期，增速係2022年以黎最慢，所以投資者未來宜對消費股審慎些。 |
|
| 聶振邦 |
2026-05-18T16:23 |
兆易創新(03986)作為一個半新股，正面臨禁售期屆滿的問題，今年1月13日上市，即於7月13日時，基石投資者的半年限售股禁售期將屆滿，股價今早(18日)一度升近15%，高見624.5元，對比162元的招股價，當中有不少水位，臨近期限前，投資者應該如何部署? 高歌證券金融首席分析師聶振邦認為，目前不能排除股價於禁售期屆滿前後會有短線波動。他提到，A股本來就屢創新高，目前水平高企，因此解禁後應會為基石投資者帶來豐厚獲利且存在一定的承壓風險。 聶Sir續指，兆易創新股價或會在跌破550元後迎來新一波跌浪，因此投資者應密切留意未來2至3個星期的變動。佢亦提醒，有貨的投資者要做好風險管理，即跌穿550元就要減持，相反未有持貨的則不應入手。 |
|
| 聶振邦 |
2026-05-15T16:03 |
被視為「商業航天第一股」慨拓璞數控(07688)，概念係港股之中算係獨特，值得留意係，馬斯克(Elon Musk)旗下SpaceX IPO全球矚目，上市進程又行前一步，集團最快下周發布招股書，若同樣係航天概念股慨SpaceX IPO進展順利，會點利好拓璞數控？ 高歌證券金融首席分析師聶振邦認為，都要關注SpaceX招股情況，主要留意集資額係咪史上最大，呢個相對上會有話題性。佢又話，對港股投資者黎講，商業航天概念其實比較陌生，所以拓璞數控招股暫時超額認2500倍，雖然唔算少，但對比起個別超購逾萬倍新股，拓璞數控就會比下去。 聶Sir估計，暫時唔排除拓璞數控首掛倍升慨可能性，但仍要視乎當日港股氣氛，佢又話，暫時都睇好拓璞數控及SpaceX首掛表現，上升機率都超過80%。 |
|
| 聶振邦 |
2026-05-11T17:20 |
英矽智能(03696)上周五(8日)宣布同Google Cloud合作，旗下生成式人工智能(AI)平台Pharma.AI，將利用Google運算基礎措施，以及Gemini模型加快藥物研發流程，係咪利好股價慨正面消息？ 高歌證券金融首席分析師聶振邦表示，英矽智能早前發布智能實驗室系統Lab Claw，呢些智能體需要強大慨AI大模型配合先可以發揮效用，目前睇黎同Gemini搭配慨機會好高，因此，今次合作一定可以加快研發新藥慨效益，係科技層面上有助拉開同競爭對手慨差距。 不過，佢強調，集團臨床實驗及藥物發現成果消息，對股價慨刺激作用，會比AI合作消息更大，後續單靠AI消息未必可以對股價帶黎強大支持。 聶Sir又話，長遠而言，管線開發對公司前景屬於利好，但需時發展，目前，英矽智能需要係收益與前景之間取得平衡，相信今、明兩年會較多同其他藥廠係代工方面探索合作，以提升收入，藥物發現就作為帶動力。 投資部署方面，佢建議留意未來一兩周，股價可唔可以上到70元及企穩，如果可以，就可以上望75元，中長線而言，建議過左主要股東及基石投資者禁售期，等股價回落至60元樓下再做部署。 |
|
| 聶振邦 |
2026-05-04T16:27 |
內地近期又頻頻出招谷樓市，提高住房公積金貸款額度成主流政策，而市場一向關注貸款市場報價利率(LPR)，依家邊個數據最有參考價值？此外，摩根大通指，中國海外發展(00688)係一線城市有好多項目，銷售增長穩健，係咪可以考慮部署？ 高歌證券金融首席分析師聶振邦指，呢幾個月人民銀行都冇調整過LPR，所以參考性冇咁大，依家5年或以上公積金貸款利率2.6厘，屬偏低水平，加上環球通脹受美伊戰爭影響，因此，有內地消費者認為買樓可以保值，帶動近期房產業務向好。 聶Sir補充，對內房而言，若公司持有外債，人仔升值對還債有幫助，亦為人行提供更大減息空間，市場會憧憬按揭利率未來會進一步下調以刺激樓市。 佢又話，具備國企背景慨中海外，對審慎慨投資者有吸引力，股價2月初至今已經累積唔少升幅，估計短期會係15元有阻力，有貨慨投資者如果股價一星期內，收市都突破唔到15元，可以考慮止賺，未入場慨可以考慮係13元至13.2元水平買貨，息率高些之餘，防守力亦更強。 |
|
| 聶振邦 |
2026-04-27T16:41 |
北京車展上周五(24日)開幕，車股今日(27日)普遍造好，不過，相比以往以發布新車為主，今年反而多左介紹技術，例如電池、自動駕駛，甚至連供應鏈相關展商，包括華為、寧德時代(03750)、地平線機器人(09660)等，都拿到更顯眼慨位置，今屆車展轉以技術做賣點，係咪意味今年相關股份比車企更值得留意？ 高歌證券金融首席分析師聶振邦指，車展始終係希望為市場帶黎新憧憬，所以今次更加針對技術層面，如果睇返近期股價走勢，技術相關股的確更值得留意，由2月開始，車股表現都比較參差，相對黎講，機械人相關股如地平線機器人，股價更強勢，晶片股都有利好慨情況，其中，寧德時代表現比較亮麗，推出慨新電池充電速度比起比亞迪股份(01211)慨刀片電池更快，的確會成為亮點。 聶Sir又認為，未來1至2個月內，技術層面相關股，繼續有資金追入慨機會仍會較大。 |
|
| 聶振邦 |
2026-04-17T16:25 |
智能產原始設計製造商(ODM)代理龍頭華勤技術(03296)，周三(15日)至下周一(20日)招股，股份預期下周四(23日)上市，集團覆蓋慨產品包括智能手機、平板、智能穿戴、Notebook等，對比其他都招緊股慨新股，華勤技術有冇吸引力？ 高歌證券金融首席分析師聶振邦指，如果睇返呢個行業，華勤勝在夠穩定，因為智能產品方面持續有增長，對消費者黎講，電子產品始終有一個持續換機需求。此外，華勤係行業龍頭，競爭力就相對較強。 聶Sir又話，華勤依家逐步轉移至人工智能(AI)相關領域發展，第2季將會有超節點相關項目，同英偉達(Nvidia)晶片慨框架有關聯性，因此，集團未來業務方向未必再聚焦係代工方面，反而會同AI有更大關聯性。 |
|
| 聶振邦 |
2026-04-13T16:20 |
九毛九(09922)上周五(10日)出左季度數據，其中，旗下自營店太二翻檯率每日3.5次，人均消費保持74元人仔，表現較慫火鍋及九毛九西北菜有改善。九毛九股價今日(13日)下晝逆市彈高，一度升3.7%，高見1.94元，九毛九上季慨好表現，可唔可以延續落去? 高歌證券金融首席分析師聶振邦認為，九毛九第1及第2季業績造好，主要受新年及黃金周帶動，加上內地通脹數據逐步上升，反映居民消費意欲增加，飲食業都可以受惠。佢又提及，公司去年整體收入主要由收入佔比逾70%慨太二帶動，因此，市場對集團整體表現都睇得比較樂觀。 聶Sir又話，太二主打酸菜魚，而唔係火鍋店呢類客人逗留時間較長慨餐廳，因此，日均翻檯率有逾3次，同店銷售壓力細過慫火鍋及九毛九西北菜，佢估計，集團未來會力谷太二，以提升業務收入及盈利增長。 |
|
| 聶振邦 |
2026-03-30T16:18 |
TCL電子(01070)去年多賺42%，全純利24.95億元，符合盈喜預期，績後股價強勢，今日(30日)更一度大升13.8%，高見12.54元，過去1年，環球貿易關稅動盪，今次份業績又是否說明TCL電子並無受影響？ 高歌證券金融首席分析師聶振邦指，今次TCL電子交到亮眼業績，下半年業績明顯較上半年強，令市場驚喜，一方面海外銷售上，令利潤率增長擺脫內地「內捲」壓力，另一方面高利潤產品銷情好，65吋電視、Mini LED電視帶動銷售，LCD面板做獨市，議價能力強，即使關稅、其他成本，都能容易轉嫁至客戶身上。 聶Sir又話，今日績後有潛在利好消息帶動，股價方面，TCL電子2月下旬曾上過高位13.3元水平左右，現價做短炒雖仍有上升空間，但吸引力低，考慮TCL電子為消費性電子產品，市盈率(PE)有12倍，行業PE則超過20倍，股價雖升但估值都有一定吸引力，進取投資者可現價買入博反彈，若相對謹慎，則可等回調至11.2元至11.8元再入手，會較安全。 |
|
| 聶振邦 |
2026-03-27T16:19 |
從事人工智能(AI)計算機視覺解決方案應用慨極視角(06636)已經係周三(25日)中午截左飛，股份計劃下周一(30日)首掛，消息指，公開發售部分有逾15萬人入飛抽，超額認購4569倍，係今年超購倍數第5多新股。極視角2024年開始已經有賺，但去年首3個月又蝕返錢，點睇呢隻新股？ 高歌證券金融首席分析師聶振邦表示，極視角收入增長的確唔錯，招股書入面亦有2025年全年業績數據作參考，按數據計算，2025年全年收入錄雙位數增長，是繼2023年、2024年後，集團連續第3年收入錄得增長。不過，集團似乎需要考慮成本控制問題，因為去年行政費及研發開支增長逾80%，但收入僅增長約10%，導致業績「見紅」。 聶Sir又話，收入增長要等到第4季先有爆發力，上市後慨情況會影響市場估值，所以暫時黎講做短線操作會較吸引，做中長線投資部署要再睇定些。 |
|
| 聶振邦 |
2026-03-24T14:34 |
截至早上11時止，1小時內《彭博》搜尋量最多港股，依次為老鋪黃金(06181)、恆基地產(00012)、友邦保險(01299)、康師博控股(00322)及泡泡瑪特(09992)。 老鋪黃金昨日(23日)派左一份好靚仔慨成績表，去年純利及收入都按年勁升逾2倍，公司又預告今季收入最多175億人仔，刺激今日(24日)股價一度大升逾10%，但預測市盈率(PE)只得約13倍，後市點睇？ 高歌證券金融首席分析師聶振邦認為，老鋪黃金呢份業績有一定吸引力，但股價由今年1月高位近900元大幅回落，依家岩岩上返600元水平，反映投資者入市態度審慎，有機會係因為金價不確定性，同埋內地及本港零售市道仍然疲弱，由於利好消息已反映得七七八八，所以上望目標宜保守些，暫定650元水平，相信要等港股整體氣氛好轉，先至有望展開更強勁慨升浪。 聶Sir又指，若金價回落，要留意集團呢段時間會唔會進取些入貨，帶動毛利率向上。佢續指，雖然老鋪黃金去年業績唔錯，但去年上半年增速比下半年快，所以要留意今年上半年增長有放緩風險。 |
|
| 聶振邦 |
2026-03-17T13:07 |
截至早上11時止，過去1小時內《彭博》用戶搜尋量最多港股，依次為泡泡瑪特(09992)、比亞迪股份(01211)、美團(03690)、吉利汽車(00175)、小米集團(01810)。 泡泡瑪特係美國加州開設地區總部，負責北美及拉美業務發展，集團依家係美國已有逾60家分店，海外業務佔比持續提升，係咪有利推高毛利率？ 高歌證券金融首席分析師聶振邦指，海外佔比提升會對毛利率有正面影響，去年上半年，泡泡瑪特海外業務佔比已逾40%，若北美市場持續發展，海外佔比將進一步提升，海外利潤率有望高於內地，帶動盈利向好。 此外，Labubu以外慨新角色產品，去年售出4億件，尤其是星星人、Skullpanda及Crybaby，相信有利業績表現，而股價近日亦有回升跡象。 |
|
| 聶振邦 |
2026-03-13T16:19 |
依家有3隻新股招緊股，分別係廣合科技(01989)、國民技術(02701)以及飛速創新(03355)，其中，廣合科技係內地最大及全球第3大算力服務器印刷電路板PCB製造商，客戶包括戴爾(Dell)、惠普(HP)、聯想集團(00992)等。初步黎睇，國民技術及飛速創新有冇賣點？投資者又可唔可以當廣合科技係人工智能(AI)算力基建股？ 高歌證券金融首席分析師聶振邦表示，國民技術及飛速創新同廣合相比，會有比下去慨情況。雖然國民技術已經係A股上市，但暫時仲蝕緊錢，國民技術同廣合都屬於晶片相關產業，如果要二揀一，廣合似乎可以睇高一線。 至於飛速創新雖然有盈利基礎，但由於集團同汽車產業相關，依家汽車股唔係市場焦點，所以孖展認購反應相對冷淡。聶Sir認為，可以暫時唔理國民技術及飛速創新。 佢又話，廣合同唔少知名企業有合作，加上PCB用途相對廣泛，例如好多電子產品都要用PCB，業務前景可以睇高一線。 |
|
| 聶振邦 |
2026-02-27T16:16 |
有4隻計劃3月掛牌慨新股，今日(27日)齊齊開始招股，分別係兆威機電(02692)、優樂賽共享(02649)、埃斯頓(02715)及美格智能(03268)，其中，兆威及埃斯頓都有依家最煞食慨機械人概念，而本身亦已經係A股上市，其中，埃斯頓招股價介乎15.36元至17元，入場費3434元，公司以生產工業機械人為主，人形機械人仍處於探索階段，公司去年扭虧為盈，雖然今年春晚後，機械人概念股炒作冷卻，但市場對呢個概念仍有憧憬，點睇埃斯頓前景？ 高歌證券金融首席分析師聶振邦指，睇返埃斯頓業績，公司基本面冇太大問題，但要留意，公司去年成功扭虧，但勢頭可唔可以延續至今年。 聶Sir又話，雖然機械人概念有吸金力，但市場競爭激烈，加上埃斯頓慨人形機械人仍處於起步階段，所以都要睇長線，但對上市初期表現唔會有好大影響，估計AH價差可以吸引到散戶認購，但未必可以一上市就收復全部價差，但有信心股價可以造好，估計首掛可以炒上22元至24元，若以招股價上限價計，即最多炒高約40%。 |
|
| 聶振邦 |
2026-02-23T16:27 |
美國總統特朗普(Donald Trump)對等關稅(Reciprocal Tariff)被美國最高法院裁定違憲，港股慨出口股今日(23日)隨大市反彈，不過，家電股就個別發展，升得最靚慨海爾智家(06690)都只係升左3%，一度高見27.84元，雖然美的集團(00300)偏軟，但單計2月已累升約9%。 高歌證券金融首席分析師聶振邦指，關稅消息其實對家電股業績影響唔大，早係去年4月關稅消息發酵時，唔少家電商已經將生產線部署係美國本土，或其他低關稅地區，所以呢類股份美國法院慨裁決冇咁敏感。 聶Sir補充，家電股升可能受本身慨利好消息帶動，例如海爾智家近日公布同冷凍裝置相關慨專利消息，刺激股價造好，冇消息慨股份今日表現就相對差些。 佢續指，美的去年已開始發展機械人，加上春晚慨機械人效應，都可以吸引更多潛在資金關注，而市場對機械人發展前景樂觀，都會幫到股價。 |
|
| 聶振邦 |
2026-02-13T16:48 |
本身係A股上市慨美格智能，周三(11日)已通過左港交所(00388)上市聆訊，短期內可以開始招股。美格係深圳上市慨無線通訊模組及解決方案提供商，以高算力模組為核心，支持複雜算法及端側人工智能(AI)應用。近期高算力智能模組處於產業鏈中游，但似乎從事下游業務慨公司較受投資者歡迎，點睇呢隻新股？ 高歌證券金融首席分析師聶振邦指，下游業務對消費者及投資者黎講，應用及接觸面都比較強，例如稀宇科技(MINIMAX)(00100)及智譜(02513)。佢又指，如果產業鏈偏向中游的確會有少少影響，但近期瀾起科技(06809)都升得唔錯，若美格智能上市時，AH股有明顯價差就會有吸引力。 聶Sir續指，依家美格智能市銷率(PS)偏低，市帳率(PB)就合理，如果可以保持盈利增速，中長線投資價值會較大，如果睇短線，AH股價差會係美格智能係香港上市後慨上升關鍵。 |
|
| 聶振邦 |
2026-02-09T16:47 |
內地春節檔期就快到，多部賀歲片已經開始預售，據報預售票房已衝破2000萬人仔，業界估計，今年春節票房最高可以去到80億人仔，會唔會睇得太樂觀？如果真係咁好景，貓眼娛樂(01896)及大麥娛樂(01060)係咪可以炒返轉？ 高歌證券金融首席分析師聶振邦表示，雖然市場普遍視內地春節長假期係利好因素，但亦要留意消費者可能趁長假外遊，反而分薄左電影市場慨客源，所以不宜對春節電影票房睇得太樂觀。 聶Sir又話，睇返電影內容，雖然今年賀歲檔期題材多元化，但唔係每一部都有好好慨票房，以《飛馳人生3》為例，作為系列慨續作，本身有一定口碑及票房打底，加上刺激、喜劇慨定位，貼合春節喜慶慨氣氛。不過，《驚蟄無聲》屬於國安題材，氣氛比較沉重，係節慶期間受眾層面可能相對狹窄。 至於《標人》就改編自漫畫，雖然可以吸納特定慨Fans，但漫畫改編慨電影，評價一向都係好壞參半，票房會存在一定變數。 聶Sir又話，雖然係股價操作層面睇，春節假期概念股往往可以帶動整體投資氣氛，大麥娛樂及貓眼娛樂可能短期有一定炒作空間，但未必有好強上升動力。佢提醒，呢類板塊風險較高，原因係唔知電影最終叫座力係點，加上製作成本高昂，就算票房好好，要回本仍然有變數。 |
|
| 聶振邦 |
2026-02-02T16:40 |
仲有約兩星期就到馬年，內地各大平台慨「紅包大戰」已經開打，百度集團(09888)早前已宣布推出5億人仔紅包計劃，騰訊控股(00700)旗下人工智能(AI)平台「元寶」更準備10億人仔現金紅包，阿里巴巴(09988)慨「千問App」更豪掟30億人仔，大搞「新春請客計劃」，係AI熱潮下，今年慨特色係「AI+社交」，到底邊隻股份會成為「紅包大戰」大贏家？ 高歌證券金融首席分析師聶振邦認為，單靠以往都有慨搶紅包，對帶動整體消費作用唔大，但加入AI元素可以令市民有新鮮感，更可以間接推廣AI應用，例如用戶可以直接係千問App買戲飛，變相增加左消費入口，相信新元素對提升平台今個月慨活躍用戶(MAU)有絕對幫助。 聶Sir又話，3大巨頭之中，大眾對阿里及百度慨生成式人工智能(Gen AI)較熟悉，而騰訊慨AI應用暫時同電腦編程關聯較多，係今次活動入面可能稍為落後，由於阿里擁有商城同閃購等電商業務配合，係帶動消費同業務推動上更有優勢，所以較睇好阿里，後市可以留意股價上半年可唔可以挑戰190至200元水平。 |
|
| 聶振邦 |
2026-01-30T15:58 |
PCB專用生產設備解決方案服務商大族數控(03200)昨日(29日)開始招股，下周二(2月3日)截飛，預期下周五(2月6日)首日掛牌，入場費約9676元，籌最多逾48億元，招股價上限95.8元，較A股上市價159元人仔有好大折讓，估計上市初期會有幾多水位？值唔值博？ 高歌證券金融首席分析師聶振邦指，大族數控AH股有約45%折讓，會有一定吸引力，集團今次發售約5000萬股，基石投資者佔一半，通常國際投資者有25%或以上，都算係反應唔錯，但街貨有2500萬股，可能會限制左上市初期慨升幅。 聶Sir又指，大族數控慨基石投資者有一定叫座力，包括國際大型投資公司及基金公司，例如新加坡政府投資公司GIC、施羅德旗下公司等都有參與，為中長線投資帶黎保證。 |
|
| 聶振邦 |
2026-01-26T16:24 |
內地能量飲品製造商，新股東鵬飲料(09980)今日(26日)開始招股，近年市場對能量飲品安全存疑，導致集團呢瓣收入減少，雖然毛利率保持40%以上，但點解仍低過同類慨農夫山泉(09633)及華潤飲料(02460)，到底抽唔抽得過？ 高歌證券金融首席分析師聶振邦認為，由於東鵬主要銷售能量飲料，原材料成本慨控制空間有限，所以毛利率較低，加上內地能量飲料普及性低，影響銷售慨議價能力，可能要等公司推出更貼合大眾化口味慨果汁產品，同埋要2至3年時間去轉型，先可以提升到毛利。 聶Sir又話，東鵬A股跌左落黎，加上睇埋市盈率(PE)、市帳率(PB)及市銷率(PS)，都會令公司估值較吸引。佢提醒，即使東鵬有供求炒作，但由於已上左A股，估計會限制左H股升幅，所以用現金抽會好過借孖展。 |
|
| 聶振邦 |
2026-01-19T17:11 |
國統局今日(19日)公布重磅經濟數據，其中上月社會消費品零售總額，一如預期所料升幅放緩，僅升0.9%。摩根大通最新報告指，內地消費者越來越傾向體驗式消費，月入1萬元人民幣的年輕人更願意花錢於健身、身心健康、旅遊等項目，是否代表可以繼續看好新消費股、旅遊相關股？ 高歌證券金融首席分析師聶振邦指，現時行業相對吸引高消費客群，年輕人的可支配收入都較多，若產品、服務能賦予情緒價值，相信消費趨勢會持續，未來繼續看好新消費股、旅遊出行股。 而健身相關消費股當中，李寧(02331)上星期公布第4季營運數據，零售流水比第3季有改善，但券商指今年來李寧銷售還未見回升，後市應如何部署？ 聶Sir話，李寧產品以多功能及高科技配合為主，卻未能大幅提升利潤率，現以服裝時尚概念做切入點，有望幫助提高產品單價，加上短線有冬奧這項體育盛事，令股價仲有上升空間，後續若有利好消息可上望26元，甚至更高水平。 |
|
| 聶振邦 |
2026-01-16T15:58 |
由2025年底至今年初，港股IPO衝過一輪，最近又淡靜返，目前只有1隻龍旗科技(09611)招股，未來估計IPO市場幾時會重新旺起來？而今年上市的11隻新股當中，有邊幾隻股份值得跟進？ 高歌證券金融首席分析師聶振邦指，通過聆訊後，1月還有大概4至5隻新股招股上市，主要因為去年12月時衝過一輪，令港交所(00388)再批核新股時間有所推遲，不過，他預計，1月最後一星期會IPO增多，相信新股熱度可以持續。 聶Sir又話，暫時看好3隻股價表現，分別是兆易創新(03986)，今日(16日)升幅逾12%，第二是五一視界(06651)，最近5個交易日連升，月底可挑戰上78元至80元，最後是臥安機器人(06600)，同樣月底可上望130元至132元，這3隻市場關注度都較高。 |
|
| 聶振邦 |
2026-01-12T16:32 |
內地鋰離子電池出口數據由跌升，帶動贛鋒鋰業(01772)等上游股回暖，雖然摩根士丹利預期，出口短期將會激增，但高盛估計，今年下半年隨時供過於求，更重申贛鋒及天齊鋰業(09696)慨「沽售」評級，點睇供應增加慨潛在負面因素？ 高歌證券金融首席分析師聶振邦指，內地將會係2026年4月下調鋰離子電池增值稅出口退稅率，新例實施後，短期會對上游行業有提振作用。此外，除左手機設備及新能源汽車，機械人產業慨蓬勃發展亦有望帶動鋰電池需求，相信產能過剩對鋰業慨實際衝擊，未必好似預期咁大，所以仍對整體鋰業前景樂觀。 聶Sir又話，贛鋒短期利好因素較多，投資者可以先留意股價今個星期企唔企得穩60元，建議要觀察1至2個交易日，唔需要心急沽貨。佢續指，投資者亦可以考慮現價入手，如果想再謹慎些，亦可以等落到56至57元再考慮。 |
|
| 聶振邦 |
2026-01-05T17:11 |
南京熊貓電子股份(00553)有參與腦機接口技術慨多模態人機交互系統集成關鍵技術，股價今日(5日)一度勁升近50%，高見7.22元，集團本身有3大業務，分別係智慧交通與平安城市、工業互聯網、智能製造，值得留意係公司由2023年開始蝕錢，2025年首9個月仍蝕約9000萬人仔，今日係咪亂炒，還是真係有炒作原因？ 高歌證券金融首席分析師聶振邦估計，AH股折讓慨上升誘因較大，南京熊貓A股今日(5日)冇乜點升，但H股就升得好勁，加上腦機接口新業務由2025年6月開始逐步發展，令市場對公司扭虧有憧憬。 聶Sir又指，現時腦機接口或有助癱瘓病人，透過電子儀器進行思想表達，若配合多模態，更有機會可以控制輪椅及機械臂，幫到日常生活。 |
|
| 聶振邦 |
2026-01-02T17:30 |
本港新股市場持續熾熱最近有十隻IPO，其中，內地「AI六小虎」之一慨稀宇科技(MINIMAX)招股價介乎151元至165元，每手20股，入場費3333元，集資近42億元，公開招股將會係下周一(5日)截飛。截至2025年9月止9個月，MINIMAX收入約5300萬美元，按年大增1.7倍，呢家公司有咩賣點？ 高歌證券金融首席分析師聶振邦指，MINIMAX慨業務類似DeepSeek，JASeek，都係主打人工智能(AI)大模型，包括語音、影片內容生成，將文本輸入轉換為多語言，會有迫真慨人聲，甚至識得作曲等，可應用係唔同AI場景，所以唔少企業如金山軟件(03888)，都引入佢慨服務。 聶Sir續指，MINIMAX主要收入來源係接入唔同企業，然後收取API Token，目前黎睇，MINIMAX用戶基礎大，有近2億用戶，收入亦唔錯，只要增長勢頭持續，集團有望扭虧為盈。 |
|
| 聶振邦 |
2025-12-29T17:01 |
全國財政工作會議日前係北京召開，財政部部長藍佛安明確指出，明年將會擴大財政支出，大力提振消費，繼續支持消費品「以舊換新」，雖然未有披露詳情，但市場解讀為「以舊換新」政策明年有望延續，帶動車股今日(29日)造好，其中，比亞迪股份(01211)及吉利汽車(00175)收市升逾3%，「以舊換新」政策延續對行業有咩影響？ 高歌證券金融首席分析師聶振邦認為，補貼政策係好大機會延續，但相信會有調整，參考市傳慨購置稅消息，將會由3萬人仔全免，減半至1.5萬人仔，意味補貼會減少，因為新能源車市場愈黎愈成熟，國家補貼焦點或轉向高科技市場，例如機械人。 聶Sir又話，政策調整或包括提高申請汽車續航力慨要求，以鼓勵車企生產更高質量新車款。 |
|
| 聶振邦 |
2025-12-24T13:00 |
截至早上11時止，過去1小時內《彭博》用戶搜尋量最多港股，依次為中芯國際(00981)、中國移動(00941)、友邦保險(01299)、泡泡瑪特(09992)及老鋪黃金(06181)。 老鋪黃金股價今日(24日)一度挫逾5%，低見656元，失守多條主要移動平均線，國際金價今年累升逾70%，而且升得好急，集團係咪趕唔切透過加價，將成本轉嫁予消費者？產品未來會唔會加價？ 高歌證券金融首席分析師聶振邦指，理論上加價可以轉嫁予消費者，但如果國際金價升得太急，公司就未趕及加價。此外，市場預期美國明年減息步伐會快過今年，美元弱會帶動金價向上，所以老鋪黃金係成本控制方面或面臨挑戰。 聶Sir又指，近日見到消費者係小紅書出售老鋪黃金金飾，二手價較一手價折讓20%至30%，反映情感價值未能帶動老鋪黃金產品價格維持係高水平，佢相信年底前，集團股價都會偏軟，要留意650元有冇支持。 |
|
| 聶振邦 |
2025-12-23T11:57 |
恆生指數今日(23日)高開74點後，一直維持約100點升幅，暫時已連升5個交易日，新上市兩日慨牛證，25400點成加倉重點，熊證就未見明顯加減倉變化，重貨區繼續係25900至26300點，恆指牛證係咪可以食糊？可唔可以反手開熊證或PUT部署淡倉？ 高歌證券金融首席分析師聶振邦指，依家恆指處於較高水平，牛證可以考慮食糊，如果想反手部署熊證或PUT，雖然長假期就到，但美股於12月26日已經復市，係呢個時間期間唔肯定美股係咪會跌，所以暫時唔建議反手部署PUT或熊證，建議買牛證食糊。 |
|
| 聶振邦 |
2025-12-22T16:10 |
海南封關措施已經係上周四(18日)實施，據暫時統計顯示，銷售數字都唔錯，單計三亞市，兩日累計免稅銷售額已逾1億人仔，中國中免(01880)明顯係新政策大贏家，股價今日(22日)尾市再升多浸，一度炒高近16%，高見81.95元，如果想入市應該點部署？ 高歌證券金融首席分析師聶振邦指，中免受惠程度係較高，一方面零關稅商品清單擴大，美妝、家電、保健品銷量都比封關前有所提升，屬於短暫刺激消費誘因，但係咪可以持續仍要繼續觀望。 聶Sir又話，中免除左股價可以受惠，市場亦睇好中免明年第1季業績，因為可透過免稅作招徠，吸引消費者購物，不過，短線係90元有阻力，建議想入慨投資者係78元或以下買貨會較安全。 |
|
| 聶振邦 |
2025-12-15T16:22 |
內地準備推出更辣慨法規遏止車企價格戰，包括定價唔可以低過生產價，唔可以串通非理性競爭，若嚴重擾亂市場秩序等違規車企都會被罰，呢個新政策有幾大作用？對車企影響有幾大？ 高歌證券金融首席分析師聶振邦指，呢個新政策都係針對「反內捲」，因為最新國策講明售價唔可以低過生產成本，所以依家最主要考慮係車企自身生產成本有冇優勢。 聶Sir又指，新政策會較有利已處於規模經濟慨車企，但毛利率或邊際利潤率偏低慨車企，面對慨競爭壓力就會較大，佢續指，以比亞迪股份(01211)及理想汽車(02015)等為例，呢些車企已有利潤基礎，所以新政策對呢類公司影響唔大。 |
|
| 聶振邦 |
2025-12-12T16:21 |
中央經濟工作會議提出明年8大重點任務，其中，谷內需成為首要任務，提及要優化「兩新」政策實施，即設備更新及「以舊換新」，有分析估計，補貼範圍有機會擴大，餐飲股今日(12日)炒上，係咪憧憬餐飲業會獲得補貼？ 高歌證券金融首席分析師聶振邦認為，提供餐飲補貼機會唔大，汽車、電子產品及家電屬於耐用品，所以可以靠「以舊換新」作為誘因推動消費，但餐飲消費屬於日常消費，就算派消費券，對再進一步谷消費誘因都唔大。 聶Sir又話，內地明年經濟增長目標維持約5%，令市場對明年消費行情有信心，所以睇好餐飲股，其實呢類股份都唔係呢一兩日炒起，過去一個星期都持續向上，今次只係借消息再炒多浸。 |
|
| 聶振邦 |
2025-12-08T16:23 |
內地公布最新一版國家醫保目錄名單，新增114種藥物，有19種則獲納入「商業健康保險創新藥名單」，其中，恆瑞醫藥(01276)入選藥物最多，共有15種，其次係信達生物(01801)，共有7種，依家係咪入手呢兩隻醫藥股慨好時機？ 高歌證券金融首席分析師聶振邦認為，雖然恆瑞股價近日比較弱，但只要有利好消息，股價仍有唔少上升空間。佢又指，恆瑞有唔少藥物入選國家醫保目錄，大部分係腫瘤領域、治癌標靶藥及糖尿病藥，呢些藥係內地有好大需求，但由於集團盈利增速唔算快，預期股價會受制80元水平，建議係70元樓下入手比較安全。 聶Sir續指，今日(8日)正式「染藍」慨信達生物股價大跌，後市要留意78元至80元有冇支持。佢又話，若港股短期仍然偏弱，唔排除信達生物會繼續跌，如果打算持貨1個月或以上，等股價落到83元再入手會比較好。 |
|
| 聶振邦 |
2025-12-05T15:42 |
本港新股市場今年十分旺場，截至今日(5日)止，已有93隻新股成功掛牌，集資逾2600億元，來到12月仍有新股趕搭「尾班車」，其中，遇見小麵(02408)及天域半導體(02658)今日首掛，但股價齊齊「潛水」。展望2026年，依家排隊等批慨新股數以百計，預示明年港股IPO會繼續熾熱，散戶揀新股時有冇咩竅門？ 高歌證券金融首席分析師聶振邦指，自新股制度改革後，由於公開發售部分配額少左，變得非常抽，所以多左散戶借孖展抽新股，希望可以成功抽中，甚至派多幾手，但要留意，若上市後表現不似預期，就有機會輸錢。 揀股方面，聶Sir建議，可以考慮招股規模相對細慨新股，雖然未必抽得中，但唔會楂到成手蟹貨，造成更大損失。佢又話，散戶都可以留意孖展熱度，一般500倍以下孖展認購相對少些，如果招股第2日已有1000倍，熱度較強就可以放膽少少去抽。 |
|
| 聶振邦 |
2025-12-01T17:00 |
中興通訊(00763)繼同華為奪得越南5G合同，以及推出支持64張GPU慨超節點伺服器後，今日(1日)再傳出集團跟字節跳動(ByteDance)旗下豆包合作，推出人工智能(AI)手機，係AI物理限制帶來慨投資機會呢個背景下，中興係咪可以受惠？ 高歌證券金融首席分析師聶振邦指，華為及中興拿到越南5G合同，業務可直接受惠，中興推出支持64張GPU超節點伺服器，可提升AI生成圖像及影片效率，促進AI業務發展。 聶Sir續稱，呢些利好消息帶動，一定對中興有憧憬，事實上，股價係11月底已逐步回升，估計今個月有機會升至39元水平，但要升穿40元，就要有更多利好消息先可以成事。 |
|
| 聶振邦 |
2025-11-28T11:11 |
昨日(27日)係美國感恩節(Thanksgiving)假期，今日(28日)就係「黑色星期五」(Black Friday)，有調查機構估計，係年度黃金消費檔期帶動下，感恩節網購銷售將按年升6%，呢個增幅算唔算理想？ 高歌證券金融首席分析師聶振邦指，錄得6%增長已經唔錯，感恩節之後，好快就到聖誕節，係西方送禮慨旺季，所以售銷可望有改善。佢又話，消費理想亦可以略為抵銷之前政府停擺對經濟慨影響，對第4季經濟表現有幫助。 聶Sir又話，雖然美股亦會受銷售氣氛正面帶動，但值得留意係，零售相關股份如亞馬遜(Amazon)、沃爾瑪(Walmart)等，股價已偷步係感恩節前升左上去，受投資者超前部署帶動，但依家即市買入吸引力唔大，建議小注部署會較合適。 |
|
| 聶振邦 |
2025-11-17T18:02 |
吉利汽車(00175)今日(17日)中午出左第3季業績，上季收入創季度新高，其中，新能源汽車銷量按季升15%至44.3萬輛，呢份季績收唔收貨？ 資深分析師聶振邦認為，吉利第3季慨銷量、收入及純利都錄得雙位數增長，表現相當唔錯，其中，純利按年增長60%，業績明顯有改善，整體表現收貨，明年業務發展可以睇得較樂觀。 聶Sir又提及，依家新能源車佔吉利銷量略多於一半，如果想業績表現更理想及穩定，就要致力將佔比提升至70%或以上，當高端汽車銷情理想，未來就可以更有效抗衡行業「內捲」，長遠就唔使再靠打價格戰打低對手。 |
|
| 聶振邦 |
2025-11-14T12:39 |
雖然美國政府結束史上最長，歷時43日慨停擺，但由於最少有3名聯儲局官員「放鷹」，令市場對12月減息預期急降溫，據最新利率期貨顯示，下月減息0.25厘慨機會唔夠50%，拖累美股3大指數昨晚(13日)重挫，其中，道指收市瀉近800點。點睇美股後市？ 博威環球證券金融首席分析師聶振邦指，美股呢兩日都係個別發展，傳統金融股向上，科技股就要捱沽，雖然12月再次減息慨機會大減，但隨著停擺結束，就業數據將重新發布，若數據偏弱，到時減息預期會再升溫。 聶Sir估計，1至2星期後，市場氣氛將會緩和，因此，美股下周止跌回升慨會較大。 |
|
| 聶振邦 |
2025-11-10T17:00 |
海南離島免稅新政策自11月1日起已實施，新政擴大了免稅商品範圍，據內地媒體報道，政策實施首周，海關錄得5.06億元人民幣的購物金額，按年增長約35%，購物人數按年升約3.4%。另外，下月18日起，海南會實施全島封關，便利貿易、投資，料長遠可推動島內經濟，中國中免(01880)上季業績一般，收入及盈利按季及按年都要跌，兩項利好消息影響下，是否能帶動中國中免長遠業務？ 高歌證券金融首席分析師聶振邦指，消息對股價有刺激作用，若海南免稅新政的成效顯著，不排除未來免稅安排會擴大至其他地區執行，有利中國中免下季業績憧憬，但要留意股價受消息刺激升得相當急，公司基本面未能跟上股價，股價企穩高位的動力不足，似乎已經「炒過龍」。 聶Sir又指，中國中免絕大部分業務與零售有關，未必可以直接受惠封關，但如果政府持續擴大免稅商品範圍，對中國中免股價就有更大刺激作用。 |
|
| 聶振邦 |
2025-11-05T10:42 |
高歌證券金融首席分析師聶振邦推介再鼎醫藥(09688) 推介原因： -基本面有改善 -預料今季營運收支平衡。 |
|
| 聶振邦 |
2025-11-03T16:38 |
內地調整黃金增值稅扣免條例，不再允許零售商在銷售黃金時抵銷增值稅。花旗指將珠寶商採購黃金的增值稅抵扣率由13%降至6%，稅收政策的變動或會令零售商採購黃金的成本上升約7%，消息拖累內地金飾股急跌，如周大福(01929)今日(3日)股價一度跌逾10%，消息對金飾股前景有多大影響？ 博威環球證券金融首席分析師聶振邦指，稅收改變令市場憂慮商戶成本增加，如果未能將成本轉嫁予消費者，就有機會影響盈利，如果將黃金採購移至海外進行，可避免相關稅項，但額外運費同樣會增加成本，亦有機會減少境內黃金儲備，對未來貨幣發展穩定性及去美元化等不利。不過目前市場對金價前景樂觀，珠寶商毛利率急升，仍有提價能力，即使成本轉嫁至消費者，對盈利影響亦可控。 至於金價走勢，聶Sir就指今季黃金再大升可能性不高，金價暫時未能企穩高位，在約每盎司4400美元的位置回落約10%，加上早前聯儲局言論令市場更加不確定美國減息預期，因此相信金價在每盎司3800美元較有支持，但仍然看好明年金價走勢。 |
|
| 聶振邦 |
2025-10-30T11:42 |
近期美股陸續公布業績，幾間科技巨頭績後股價大挫，Meta周三(29日)盤後挫逾8%，Meta指將加大投資人工智能(AI)支出，本應令市場對其前景憧憬增加，但Meta在第3季計入一筆近160億美元的一次性非現金所得稅費用，並表示2026年的總支出將大幅增加，引起市場關注。另外，據報OpenAI最快明年申請上市，微軟(Microsoft)股價盤後仍要跌1%，背後有甚麼原因？ 博威環球證券金融首席分析師聶振邦指，市場對AI股業績表現的看法分化，投資者對科企在AI雲收入等增長有較大期望，即使業績表現不錯，可能亦只是僅僅符合市場預期，加上科企巨頭如Google、微軟(Microsoft)等亦表明未來會大幅增加支出，這些因素都可能會令股價短期動盪。不過近期美國積極提升AI應用，加上行業巨頭互相合作，有助支持AI股短期升幅，因此更應該趁低吸納AI股。 |
|
| 聶振邦 |
2025-10-27T17:05 |
匯豐控股(00005)明日(28日)就會派季度成績表，係放榜前夕，集團披露要為馬多夫(Bernard Madoff)詐騙案作出11億美元撥備，匯控股價今日(27日)先升後跌，一度跌1.8%，低見101.2元，點解讀呢個消息同股價反應？ 博威環球證券金融首席分析師聶振邦指，匯控臨近公布業績，一有新消息好容易受影響，但其實要做撥備亦唔太意外，最差情況係要再撥多10多億美元，但以匯控慨財力係冇問題，只係後續慨壞帳有機會影響盈利增長前景，對估值都有影響。 聶Sir又話，港股投資氣氛唔錯，中美貿易談判進展良好，連帶匯控股價都有支持，建議投資者睇埋明日出那份業績，股價走勢後市先係關鍵，如果集團稅前盈利仍冇改善，一旦失守100元，股價沽壓會進一步加大。 |
|
| 聶振邦 |
2025-10-24T14:57 |
美國白宮宣布，美國總統特朗普(Donald Trump)將會係下周四(30日)出席亞太經合組織(APEC)峰會期間，跟國家主席習近平會面晤，相信會係未來1個星期環球市場焦點中慨焦點，特朗普相信雙方會達成好協議。「習特會」舉行前，華府出手制裁俄羅斯慨石油，導致油價抽升，市場擔心會推高美國通脹，繼而影響美國聯儲局減息部署。 博威環球證券金融首席分析師聶振邦指，睇返特朗普上個任期慨取態，估計大豆問題會較易傾掂數，但稀土問題會較為複雜。聶Sir相信，今次中美元首會面會有成果，但未必令市場非常滿意。 至於制裁俄羅斯石油，佢相信，油價短期仍有上升空間，而美國再減息勢在必行，但唔排除會調整減幅。聶Sir又指，若明年油價持續向上，導致美國物價受壓，到時消費物價指數(CPI)可能升至介乎3.4%至3.5%慨失控水平，咁就有機會影響減息步伐。 |
|
| 聶振邦 |
2025-10-20T17:18 |
內地3大中資航空股，中國國航(00753)、東方航空(00670)及南方航空(01055)今日(20日)跑嬴大市，信達證券指，國內航線唔計油費慨平均票價由跌轉升，中金就指出，內航票價基本上保持按年增長，航空股表現強勢係咪歸功於「反內捲」政策見效？ 博威環球證券金融首席分析師聶振邦認為，「捲」係內地整體交通網絡，唔係單一慨同業競爭，內航慨「反內捲」情況，更多係同內陸交通競爭，例如高鐵及火車。佢認為，當機票價格競爭力較其他交通工具弱，就會影響航空業競爭力，變相行業提及「反內捲」時會對改善利潤率有憧憬。 聶Sir又認為，長途線利潤率較內陸線高，雖然美國反對中國客機沿俄羅斯直飛至美國，航程繞道會令成本失預算，但近日石油價格下跌，可減低燃油成本問題，因此，相內地航空業未來幾個月慨表現會有改善。 |
|
| 聶振邦 |
2025-10-13T17:15 |
內地上周四(9日)發布有關稀土出口管制公告時，被發現附件檔案格式首次使用國產，來自金山軟件(03888)WPS格式，而非微軟WORD或者Adobe慨PDF，引起外界熱烈討論，金山股價今日(13日)一度勁升近19%，高見38.2元，係咪同呢單消息有關？ 博威環球證券金融首席分析師聶振邦認為，金山股價今日除受利好消息帶動，亦因為恆生指數急瀉，令部分資金轉投金山推升股價。佢相信，商務部傾向用國產文書處理軟件，但由於選擇唔多，而金山普及性較強，所以選用金山係可以理解。 聶Sir又認為，金山6億用戶中，僅逾4000萬屬於付費用戶，雖然政府認可對金山慨付費服務提價能力有間接幫助，但如果政府使用後，只使用免費功能而冇付費安排，金山慨潛在增長空間就未必好大。 |
|
| 聶振邦 |
2025-10-10T13:28 |
美匯指數昨日(9日)進一步反彈至近100水平，債息就變動唔大，美股下周就會進入業績期，將由摩根大通及摩根士丹利等大銀行打頭陣，市場估計，銀行股上季盈利普遍復甦，但仍擔心啟動減息周期會銀行有影響，點睇美股後市？ 博威環球證券金融首席分析師聶振邦指，美國經濟數據如國內生產總值(GDP)等已逐步靠穩，佢相信，銀行業績好大機會符合市場預期，所以美股未必會有太大下行壓力。 聶Sir又指，市場預期，美國聯儲局年內仲會減2次息，但美元仍然強勢，主要是市場關注日本及法國政局變化，令日圓及歐元偏弱，美元向上，佢認為，美元強勢可帶動美股向上。 |
|