| 評論員 |
時間 |
內容 |
標籤 |
| 陳偉聰 |
2026-04-09T10:46 |
美伊日前同意停戰兩周，停火期間船隻可以安全通過霍爾木茲海峽(Strait of Hormuz)，市場樂觀情緒急升溫，美股3大指數昨晚(8日)狂飆，其中，道指收市勁升1384點，不過，油價暴跌，紐約期油一度急瀉逾20%。美股業績期快將展開，其中，美國能源行業龍頭埃克森美孚(ExxonMobil)預告，戰事中斷煉油業務將令收益損失4億至8億美元，點解係油價高企下，反而不利油企？ 東亞證券高級投資策略師陳偉聰認為，埃克森係卡塔爾慨液化天然氣設施受到破壞，要完全恢復及重新投產需時，當中會涉及額外成本，所以不利短期能源產出。佢續指，雖然集團第1季業績因油價飆70%至近1倍而造好，但受油價降溫、航運成本存在不確定性、企業未能及時大量供應能源等因素影響，能源企業係第2及第3季仍要面對較大衝擊，因此，戰事推升油價，唔一定對能源企業及油股帶來絕對正面影響。 Jason又話，油價急升對美國工業、製造業、交通運輸行業慨實際影響，會係第2及3季陸續反映，至於其他板塊受影響程度有幾大，就要視乎停戰時間先可以再判斷。 |
|
| 陳偉聰 |
2026-04-01T16:40 |
美國總統特朗普(Donald Trump)最新暗示中東戰事有機會好快結束，佢將會係本港時間明日(2日)早上9時發表全國講話，而伊朗慨態度亦冇之前咁強硬，雖然未知特朗普明日慨講話內容，但美股昨晚(31日)已率先爆上，點睇美股昨晚呢個報復式反彈？ 東亞證券高級投資策略師陳偉聰認為，依家美伊雙方都似乎妥協，停火及達成協議基礎有正面進展，過去數周，市場因擔心美伊局勢發展，導致美股急挫及長期債息扯高，特朗普民望亦插水式下跌，係呢個情況下，或會引發TACO交易。 Jason指出，仍然唔排除短期可能再有軍事行動，但對市場黎講，戰事係未來4星期結束慨機會較大，令市場風險胃納有改善，科技股、增長型股份等估值亦有回落，如果市場真係炒停戰，即時會有估值修復憧憬。 |
|
| 陳偉聰 |
2026-03-26T10:35 |
據報Tesla行政總裁馬斯克(Elon Musk)旗下太空探索公司Space X最快這個星期向美國證交會(SFC)提交首次公開招股(IPO)申請，集資逾750億美元，預計6月中上市，有望超越沙特阿美成為史上最大新股集資。上市前有它撐住美市，美股係唔係想跌都難? 東亞證券高級投資策略師陳偉聰指，戰事仍存在不確定因素，但若單純看Space X及人工智能(AI)相關業務最新估值1.75萬億美元，比兩個月前大約1.25萬億至1.3萬億左右提升不少。而且這幾個星期美股AI類股份出現一定回調。 Jason續指，若Space X能以更高估值上市，心理層面上對美股科技及AI等相關行業會有一定支持。他相信Space X這種股份獨特而且罕有，認購反應都不會太差。他認為結合現在愈來愈高的估值，如果認購反應熱烈，戰事又無明顯惡化，Space X上市會對美股帶來一定支持。 |
|
| 陳偉聰 |
2026-03-12T10:58 |
美國總統特朗普(Donald Trump)輸左對等關稅(Reciprocal Tariffs)官司後再出招，華府宣布針對16個主要貿易伙伴，啟動新一輪301貿易調查，包括中歐日韓等，目的係鋪路加新關稅。此外，私募信貸市場危機持續升溫，點睇呢兩個不明朗因素帶來慨影響？ 東亞證券高級投資策略師陳偉聰認為，關稅慨實際影響已經唔大，無論透過301調查或向個別行業收稅，根據條款稅率都唔可能太辣，亦有時限性，再加上市場已預左特朗普會再出手，所以唔會帶黎好大衝擊。 Jason續指，私募信貸危機方面，佢認為要關注違約的風險。 |
|
| 陳偉聰 |
2026-02-12T10:17 |
美國非農就業數據昨晚(11日)出爐，新增就業人口13萬，遠高於市場預期慨6.5萬，數據一出，市場對減息時間慨預測又再推遲，點評估聯儲局未來慨減息時間？數據點影響美元走勢？ 東亞證券高級投資策略師陳偉聰指，雖然非農數字遠超預期，但就業數據仍比較分化，能源價格、油價跌勢喘定，甚至出現輕微反彈，相信通脹要進一步向下或多或少會有阻力，短期要更進取咁減息，難度比之前更大。 Jason又估計，美國今年將會減息2至3次，同市場預期差唔多，但聯儲局減息空間會更大，預期最快6月會再出手，債市方面，佢認為市場對美元資產慨擔心「過左龍」，相信美元中期會持續偏弱。 |
|
| 陳偉聰 |
2026-01-22T10:14 |
美歐貿易緊張關係不需1星期就有轉機，美國總統特朗普(Donald Trump)與北約秘書長呂特(Mark Rutte)會晤後稱，不會對歐洲八國加關稅，不會以武力奪取格陵蘭，這次TACO(Trump always chicken out)是否較市場預期快？轉機是什麼？ 東亞證券高級投資策略師陳偉聰指，美國內部及民調不支持用武力奪取格陵蘭，加上，特朗普需要為共和黨在年底中期大選爭取選票，所以他在民意及黨內議員壓力下提早讓步。 Jason又指，市場預期無論收取關稅或動武，都會對市場產生較大影響，如之後股市繼續有較大動蕩，會損害美國經濟，所以特朗普儘早讓步，以穩定股市及美國經濟。 他續稱，美國只是想要格陵蘭的稀土資源，依靠簽訂採礦協議或租用當地採礦權基本上就能達成，所以市場有即時反應及回升是預期之內。 |
|
| 陳偉聰 |
2025-12-31T10:10 |
環球股市陸續「收爐」，美股都進入最後倒數，經歷3年牛市後，標指由唔夠4000點，升到昨晚(30日)收市慨6896點，累升逾72%，但仍有唔少大行睇好2026年表現，普遍預期標指可以升上8000點，點睇呢個預測？明年有冇潛在「黑天鵝」事件？ 東亞證券高級投資策略師陳偉聰指，展望2026年，標指上半年有機會見7500點，下半年就要留意美國總統特朗普(Donald Trump)係中期大選前有咩動作，其中1個關鍵變數係中美關係。 Jason續指，「黑天鵝」事件方面，要留意個別人工智能(AI)公司高槓桿及融資問題，又提醒投資者要關注違約風險。 |
|
| 陳偉聰 |
2025-11-27T11:14 |
港股3大指數今年累計全部有得升，今日(27日)係期指結算日，恆生指數係結算前後會點走？今年仲有約1個月就要「埋單計數」，點睇2025年餘下時間慨表現？ 東亞證券高級投資策略師陳偉聰估計，港股係今年餘下時間繼續反覆整固，大跌機會唔大，恆生指數有機會落返逾24000點、25000點樓下，到時會係一個買貨時機，相反，若夾上27000點水平，甚至可以升穿，短線就要小心。 Jason又話，相信要去到明年先會有一個較明確慨方向，尤其要留意內地明年第1季重要會議、中美關係發展，都有機會成為大市重要催化劑。 |
|
| 陳偉聰 |
2025-11-13T11:21 |
美國總統特朗普(Donald Trump)快將簽署法案正式結束政府停擺，期間由於政府長時間停擺，近期慨市場分析都係依賴民間數據，冇左官方數據會唔會影響聯儲局慨決策？隨著政府作復常，官方數據逐步出爐，市場對美國經濟前景慨憂慮會唔會加劇？ 東亞證券高級投資策略師陳偉聰指，由於短期內官方會出返10月停擺高峰期慨經濟數據，估計數值都會較差，加上11月且密歇根大學消費者信心指數跌至50.3，創新低，同埋預期第4季國內生產總值(GDP)將跌至1.5%，反映停擺影響美國市民消費及就業信心，但亦為聯儲局12月再減息提供條件，因此，就算經濟短期差少少，但係減息憧憬下，市道亦唔會太差。 Jason又估計，美國政府重啟後，明年第1季經濟數據將出現報復式增長。 |
|
| 陳偉聰 |
2025-10-09T12:02 |
匯豐控股(00005)建議私有化恆生銀行(00011)，每股作價155元，較昨日(8日)收市價119元，有約30%溢價，按私有價計，恆生市帳率(PB)1.8倍，現時行業PB中位數僅約0.4倍，反映匯控出手非常闊綽，但30%溢價對呢家本地老字號銀行慨小股東黎講吸唔吸引？點睇今次私有化？ 東亞證券高級投資策略師陳偉聰指，作價相當進取，始終過去幾年銀行業面對唔少挑戰，加上恆生股價過去幾年都比較低迷，私有化後恆生PB達1.8倍，本地銀行好難做到呢個水平，因此，出價算相當吸引，議案通過慨機會都較大。 Jason又話，唔會對匯控未來係香港慨發展睇得太負面，若恆生解決唔到壞帳問題，一旦違約匯控都可能要出手，雖然匯豐銀行同恆生同系，但或多或少會互相競爭，私有化後資源分配可以做得更好，不過，由於出價太高，今次私有化要動用過千億元，市場原本預期匯控會回購股份，依家可能未必做到，所以短期會對匯控股價有負面影響。 |
|
| 陳偉聰 |
2025-09-25T11:33 |
美國科技巨企英偉達(Nvidia)繼入股英特爾(Intel)後，再入股OpenAI，而OpenAI又跟甲骨文(Oracle)相互投資，市場憂慮呢些科技巨企慨「關係」外，亦擔心出現人工智能(AI)泡沬，點睇呢些互相投資入股慨操作？ 東亞證券高級投資策略師陳偉聰認為，Nvidia跟以做晶片代工為主慨Intel加強合作，對雙方都有好處，首先對Intel係AI晶片開發有幫助，其次係Nvidia可以係美國本土搵到自家代工商。 Jason又話，雖然市場擔心AI企業會隨著競爭加劇互相「開戰」，但暫時睇黎，上述提及慨科技巨企互相入股、投資都以合作為主，因此，暫時睇唔到呢些龍頭企業會出現惡性競爭。佢續指，相信市場估值時，呢些科技巨企之間慨戰略性合作，會係考慮因素之一，而短期內亦會對股價有支持作用。 |
|
| 陳偉聰 |
2025-08-28T12:17 |
美國人工智能(AI)晶片「股王」英偉達(Nvidia)出左第2季業績，收入按年增長56%至逾467億美元，純利按年增長59%至逾264億美元，好過預期。雖然期內冇向中國客戶銷售H20晶片，但對收入影響唔大。雖然集團預期今季可以向中國付運最多50億美元H20晶片，但中美關係仍然緊張，係咪都唔可以忽視呢個問題？ 東亞證券高級投資策略師陳偉聰指，Nvidia聲稱未來有機會向中國銷售H20晶片，但集團指引未完全反映到，可能公司對幾時再向中國銷售H20都存疑，就算美國總統特朗普(Donald Trump)「開綠燈」，但同中國推動晶片自給自足慨方向背道而馳，所以中國未必會再依賴外國進口晶片，因此，呢方面慨變數好大。 Jason又話，中國對高端晶片需求仍然好大，如果Nvidia未來可以向中國銷售更強慨Blackwell，就會成為Nvidia未來增長慨關鍵。 |
|
| 陳偉聰 |
2025-08-14T11:08 |
市場呢幾日著眼於美國總統特朗普(Donald Trump)新政，指有意向英偉達(Nvidia)及AMD徵15%中國收入以換取晶片出口許可，亦傳出佢有意擴展到其他行業，不過，美國國內就有聲音指呢個做法違憲，消息對企業黎講係好定壞？政策最終會唔會成事？ 東亞證券高級投資策略師陳偉聰指，對公司而言可能係正面作用，特別對於科技股或晶片公司，佢地可以保留到中國呢個較大慨市場，繼續向中國供應人工智能(AI)晶片等產品，所以係收入上可以維持一個唔錯慨增長，當然部份業務可能要交15%稅，但對Nvidia呢類公司黎講，未必會太介意呢個比例，但Jason就覺得，出口關稅推到其他行業慨機會未必咁大。 至於違憲方面，Jason話，過去特朗普都有一些被懷疑係違憲慨舉動，最終都透過行政命令或者上訴去令到法院判決未必咁有效，所以都要繼續觀望。 |
|
| 陳偉聰 |
2025-07-24T11:42 |
繼美日菲達成貿易協議後，市傳美國及歐盟亦好快傾掂數，刺激美股昨晚(23日)大升，道指收市升逾500點，納指及標指就雙雙破頂。據LSEG最新數據顯示，分析師普遍預期，標指成分股第2季純利按年增長7.5%，主要由市值高慨科技股帶動，公司業績樂觀，加上關稅又陸續有好消息，美股係咪可以繼續上衝？ 東亞證券高級投資策略師陳偉聰認為，關稅拹議進展樂觀，美國已經同東南亞、英國傾掂數，而美日慨15%關稅對美歐談判有參考價值，加上歐盟之前提及慨反制措施，會迫使美國作出讓步，因此，預期美國同其他主要貿易伙伴達成貿易拹議慨機會好大。 Jason又指，公司業績方面，由於4月至5月受關稅戰影響，市場對美企第2季業績慨盈利預測較保守，即使之後傳黎關稅進入「休戰期」呢些利好消息，整體上調幅度都唔會太大。佢又估計，美股將會維持破頂勢頭。 |
|
| 陳偉聰 |
2025-07-10T10:32 |
雖然美國總統特朗普(Donald Trump)慨「新關稅List」陸續出爐，其中，巴西貨品面臨50%高關稅，消息一出，即重挫巴西貨幣雷亞爾。雖然特朗普陸續向各國派新關稅信件，但未有股匯債三殺現象，點解讀呢個情況，係咪關稅問題逐步明朗化，投資者反而可以放心入市？ 東亞證券高級投資策略師陳偉聰指，特朗普慨談判技倆市場都見怪不怪，到底最後係咪真係徵收50%關稅，佢認為變數仍然好大，始終美國同巴西慨貿易關連度較高，因為美國對巴西慨農產品、大宗商品有一定程度慨依賴，若真係徵收50%關稅，對美國通脹都有影響，並估計巴西亦會作出妥協。 Jason又話，其實投資市場唔太關心巴西被徵收幾多關稅，反而關注歐盟、日本及印度等較大經濟體，如果呢些經濟體慨關稅最終只係10%至20%，對美國經濟、通脹壓力就冇想像中咁大。 |
|
| 陳偉聰 |
2025-06-30T11:17 |
今日(30日)係6月最後一個交易日，投資者都準備做下半年部署，雖然傳出中美談判有進展，但另一方面亦傳黎美加暫停貿易談判慨消息，美國總統特朗普(Donald Trump)揚言要加徵加拿大關稅，目前，加拿大要為《美墨加協議》(USMCA)以外慨輸美商品支付25%芬太尼(Fentanyl)關稅，以及50%鋼鋁及汽車關稅，貿易談判仍有唔少不確定性，不過，美股持續強勢，其中，標指上周五(27日)又破頂，係咪意味美國係貿戰方面佔上風？點睇美股後市？ 東亞證券高級投資策略師陳偉聰指，美國同加拿大慨磨擦唔係一時三刻可以化解，但唔係冇得傾，只係雙方需時緩衝，亦要留意美國針對大部分國家慨對等關稅(Reciprocal Tariffs)90日暫緩期，將會係下周三(7月9日)屆滿，到時未必可以同所有貿易伙伴達成協議，但相信仍未傾掂數慨國家，影響力都係較細，所以市場對貿易談判仍有憧憬，相佔美股仍會向好。 Jason又話，股份方面，傾向睇好美股慨大型股份，尤其同資訊科技、人工智能(AI)等科技行業有關慨股份，因為呢些公司慨企業盈利，一般都可以領先其他行業，所以睇高一線。 |
|
| 陳偉聰 |
2025-06-26T11:17 |
美股昨晚(25日)個別發展，其中，科技股持續強勢，美國人工智能(AI)晶片巨企英偉達(Nvidia)股價3連升，再破頂，至今已自4月低位反彈逾60%，佔集團收入逾40%慨超級大客如微軟(Microsoft)，Meta等慨AI開支未見減少，Nvidia及AI相關股前景點睇？ 東亞證券高級投資策略師陳偉聰指，依家全球係AI應用層面方面仍處於起步階段，近年唔少公司都升級AI大模型，例如由一開始只能生成文字，到可以係短時間內製造短片，背後都需要高端晶片、雲計算慨基建，以及硬件設備支持發展，因此，Nvidia呢類上游公司，尤其資料中心(Data Center)方面會有好大增長空間。 Jason又補充，Nvidia表示，未來唔止發展晶片，仲會發展埋雲計算業務，呢些範疇都有較大發展空間。此外，相信自動駕駛及機器人係未來幾年都會高速發展，有咁多業務處於高增長期，Jason又指睇好Nvidia股價前景。 |
|
| 陳偉聰 |
2025-06-12T11:34 |
美國昨晚(11日)出左5月通脹數據，整體及核心消費物價指數(CPI)都低過預期，並較4月進一步降溫，據最新利率期貨顯示，聯儲局9月減息機會逾50%，但美股3大指數昨晚全線低收，係咪因為之前都升左唔少，同埋中美經貿談判因素都反映左？睇返上月CPI，關稅影響係咪要係6月慨數據先反映？ 東亞證券高級投資策略師陳偉聰表示，5月CPI數據有驚喜，雖然依家有關稅緩衝期，稅率亦大幅下調，但5月徵收慨關稅仍比3月、4月多，見到以進口為主慨貨品價格係升左，但其他貨品升幅唔大，因此，令美國通脹保持溫和。 Jason又指，加關稅後，美國通脹未見大升，令市場之前擔心滯脹或惡性通脹慨風險情緒降溫，除非美國再徵高關稅，否則，估計CPI之後未必會大升。不過，佢提醒，需留意油價走勢。 |
|
| 陳偉聰 |
2025-05-07T12:05 |
中央再出「組合拳」救市，內地3大金融巨頭今早(7日)出招，其中，人民銀行宣布降準0.5個百分點，並下調多項政策利率，加上中美關稅談判傳出有新進展，市場氣氛明顯改善，刺激恆生指數今朝大幅高開逾500點。東亞證券原本估計恆指今年睇26000點，依家係咪可以再睇高些？投資者短線可以點部署？ 東亞證券高級投資策略師陳偉聰指，今次呢些措施其實唔係新鮮事，但力度明顯較大，為市場帶黎驚喜，加上財政部表明有信心實現今年經濟增長5%慨目標，一定對市場短線氣氛有支持作用。 不過，Jason提醒，真正焦點仍然係中美貿易談判進展，如果短期內仍然達唔到共識，關稅唔會大幅下調，投資者可能會再次擔心第2季經濟表現。 佢又認為，關稅消息導致恆指4月中急挫，依家成功收復失地，其實部分樂觀預期已經消化左，所以暫時維持今年睇26000慨目標，但前提係中美談判問題唔會惡化。短線部署方面，恆指已自低位回升逾4000點，Jason認為，現階段應該偏向審慎，適時獲利回套。 |
|
| 陳偉聰 |
2025-04-14T11:08 |
特朗普(Donald Trump)政府慨關稅政策一時一樣，例如突然煞停針對智能手機、電腦及其他電子產品慨對等關稅(Reciprocal Tariffs)，之後白宮慨聲明或美國商務部長又稱，電子產品對等關稅豁免只係暫時性，又話會啟動國家安全調查，會係未來一至兩個月向電子產品徵收個別關稅，情況似乎愈來愈混亂，對相關股份會有咩影響？ 東亞證券高級投資策略師陳偉聰指，特朗普讓步或放寬呢些措施，呢一刻一定對市場氣氛有幫助，未來要留意會唔會下調針對電子產品，尤其智能手機慨稅率，如果半導體關稅只係10%至30%，都一定利好市況。 Jason又話，晶片股短期一定會有反彈，因為過去兩星期慨關稅消息。 |
|
| 陳偉聰 |
2025-04-01T11:42 |
2025年首季結束，港股第一季表現最好藍籌大多數是科技股或人工智能(AI)相關公司，其中包括阿里巴巴(09988)、小米集團(01810)等，展望第2季，科技股可以延續強勢？ 東亞證券高級投資策略師陳偉聰指，第2季AI相關及科技股份會借勢回調，因為相關股份首季已有明顯升勢，在未有可見盈利情況下，這類公司估值已經大升，加上不少公司都加大AI基建資本投入，令市場對盈利及變現能力有疑慮。他認為現時科技股已達到合理水平，不算貴亦不算平，未來要再推升市盈率(PE)，需要推出新的應用產品及技術。 |
|
| 陳偉聰 |
2025-03-10T11:12 |
DeepSeek引爆慨國產人工智能(AI)熱潮及「兩會」效應接力炒起港股，恆生指數上周累升近1300點，企穩24000點樓上，睇返依家慨市場氣氛，港股今年仲有幾多上升空間？目標睇幾多？ 東亞證券高級投資策略師陳偉聰估計，恆指今年可上望26000點，主要有兩大因素支持，首先係AI技術突破超市場預期，其次係發改委設立萬億創投引導基金，利好一些在港上市及權重高慨科技股估值重估，繼而推升大市。 佢又話，雖然內地推出財政政策穩定消費，所以唔使睇淡企業盈利前景，但都唔可以忽略一些環球性風險，例如美國總統特朗普(Donald Trump)搖擺不定慨行政命令、一些針對AI慨制裁，以及市場氣氛轉變。 |
|
| 陳偉聰 |
2025-02-13T11:25 |
DeepSeek熱潮除左帶挈中資科技股，更不斷推高恆生指數，指數正逐步挑戰去年9月、10月慨政策升市高位，大市今輪次升勢全唔全面？有冇機會突破去年高位，升至23000點水平？ 東亞銀行高級投資策略師陳偉聰指，如果只計過去幾星期，大市升勢比較集中係人工智能(AI)相關概念股，反而一些價值型股份，甚至之前較強勢慨中特估概念股，似乎唔係好跟得上今輪升勢，整體資金部署亦唔及去年咁多元化。 Jason又提及，唔好忽視相關潛在風險，唔排除之後人工智能(AI)熱潮減退，又或者市場開始意識到DeepSeek未必可以幫到AI企業加快商業化，繼而提振盈利，加上內地3月會召開「兩會」，之前市場炒憧憬炒得好勁，如果到時中央推出慨政策唔符合預期，恆指就會有調整壓力，後市要留意資金會唔會轉炒個別落後板塊。 |
|
| 陳偉聰 |
2025-01-06T12:52 |
東亞銀行財富管理處發表2025年第1季投資展望，環球股市方面，係美國總統當選人特朗普(Donald Trump)上個任期出現「紅色浪潮」期間，標指累升約33%，「特朗普2.0」時代月底就來臨，市場普遍共識係美股係2025年會延續2023及2024年強勢，如果真係咁，標指今年上半年目標應該定係邊個水平？ 東亞銀行財富管理處高級投資策略師陳偉聰表示，標指今年上半年目標大約介乎6178點至6335點，同現水平比較有約10%上升空間，但係一個較中線慨目標，短期而言，指數反覆波動慨機會較大。 Jason續指，過去兩個月，美股慨金融、科技、非必需消費等板塊，受惠於「特朗普交易」 (Trump Trade)已升左一浸，估值已偏高，因此，短期再炒Trump Trade風險會較大，如果預期仍有上升空間，必須密切留意市況變化，因為大市有可能先行回調及整固。 |
|
| 陳偉聰 |
2024-12-03T12:00 |
中央經濟工作會議將於月中舉行，市場等緊會唔會有措施出台，若中經會都令市場失望，港股後市係咪更難樂觀？ 東亞銀行高級投資策略師陳偉聰指，炒內地政策對A股及港股有支持作用，市場一定對中經會有憧憬，一般黎講，中經會將會為明年經濟定調，以及提出發展方向等，不過，明年經濟增長目標、財政政策、發特別國債等，就要等明年3月慨「兩會」先會公布，所以投資者唔需要對中經會有太大期望。 Jason又話，中央係9月底出「組合拳」救經濟，主要係當時市場氣氛悲觀，依家恆生指數企穩19000點水平，上證綜合指數亦持續係3300點水平上落，所以中央冇再出招慨迫切性。佢估計，短線港股將會再向下調整，直至中經會或「兩會」釋出積極訊號，所以可能要等到明年3月有實質政策出台，到時港股先有機會出現明顯升勢。 |
|
| 陳偉聰 |
2024-11-05T11:27 |
隔晚(4日)美股開始出現輕微的「Trump Trade」退潮現象，人民幣今早(5日)亦有異動，中間價大幅轉強近200點子，如何解讀人民幣的升勢？是與美國總統大選，還是人大常委會開會有關？ 東亞銀行財富管理處高級投資策略師陳偉聰指，美國大選對人民幣影響比人大會議更大，若特朗普(Donald Trump)勝出大選，就會加徵關稅、進一步制裁中國企業，對人民幣匯價或出口影響大。 他續指，今日人民幣回升，不代表「Trump Trade」會冷卻，始終大選結果仍是未知數。若特朗普勝選，短線人民幣受壓，對A股及港股波動性大，而人大可能會大規模刺激經濟，反而對人民幣有支持。 |
|
| 陳偉聰 |
2024-10-08T14:48 |
A股今日(8日)國慶長假後復市，滬深各主要指數全線高開，不過，港股驚現大林市，恆生指數一度急瀉逾2000點，失守21000關，科技指數一度重挫逾14%，跌至4600點邊緣，點睇A股及港股今日市況？後市又會點走？ 東亞證券高級投資策略師陳偉聰認為，恆指近3周累升逾6000點，可能同市傳內地會額外發行10萬億人仔國債有關，但佢認為呢個傳聞已炒過龍。發改委今日會開記者會公布增量措施，但如果國債發行規模遜預期，港股有機會出現獲利回套情況，尤其要小心早前已經升左唔少慨中資券商股及保險股等。 Jason認為，港股成交要突破早前慨5000億元唔容易，雖然過去兩三個星期有好多外資增配港股或中資股，但呢個行情未必可以持續太耐，因為資金市較大，波動性亦較大，所以股市未來點走係好難預測。 |
|
| 陳偉聰 |
2024-08-26T12:10 |
美國聯儲局主席鮑威爾(Jerome Powell)係Jackson Hole全年央行年會上，直指減息時機已到兼「放鴿」，明確為減息「開綠燈」，但未有提及實際減息時間及幅度，到底聯儲局係咪如市場預期9月出手？ 東亞證券高級投資策略師陳偉聰認為，市場對聯儲局減息預期經常有變，早前美國公布慨就業數據欠佳，加上拆倉令美股大跌，令市場一面倒認為9月會減息0.5厘，甚至今年可能要減息1.25厘至1.5厘。不過，由於近期慨經濟數據反映經濟「硬著陸」及陷入衰退慨機會唔大，相信聯儲局減息時間及步伐始終要睇數據，若數據反映經濟持續穩健增長，未有大幅放緩，相信局方會循序漸進減息，9月可能先減0.25厘，之後兩次議息就每次減息0.25厘。 Jason又話，美國今個減息周期會持續幾耐好難講，因為要視乎近期經濟數據及整體通脹表現，但據市場統計顯示，預期今個減息周期會持續至明年。 此外，據美國芝加哥商品交易所(CME)FedWatch最新顯示，聯邦基金利率明年底會落到3厘水平，意味聯儲局要減息約2.25厘至2.5厘。 |
|
| 陳偉聰 |
2024-08-02T14:54 |
內地日前公布慨官方製造業採購經理指數(PMI)，繼續處盛衰線以下，昨日(1日)出爐慨財新7月製造業PMI相隔8個月再跌入收縮區，並差過預期，呢些數據係咪反映內地經濟仍然有好多隱憂？ 東亞證券高級投資策略師陳偉聰指，內地6月起公布慨經濟數據普遍都係偏弱，不論零售、地產投資及近期慨PMI，尤其製造業PMI，之前大半年都係50樓上，今次跌到只得49.4，反映沿海慨中小企之前主要靠出口作為支撐點，睇返上半年咁多經濟數據，出口係做得比較好，但呢方面要小心，點解第2季出口特別強，可能係歐美廠商擔心下半年會有關稅調整，所以提早採購。 展望下半年，Jason認為有兩個問題要留意，首先係咪會加關稅，其次係歐美經濟顯著放緩，會令補庫存意欲減少，將對內地出口造成一定衝擊。 |
|
| 陳偉聰 |
2024-07-04T12:12 |
美國總統大選首場電視辯論後，前總統特朗普(Donald Trump)慨支持度拋離現任慨拜登(Joe Biden)。 東亞證券高級投資策略師陳偉聰表示，人工智能(AI)熱潮略為降溫後，美股投資者似乎搵到下一個主題，市況開始反映特朗普勝算大增慨預期。佢指出，特朗普傾向放寬金融監管，所以美股最近炒起左銀行及金融股，工業相關股亦會受惠，Jason又話，市場估計，一旦特朗普當選將會推出更多減稅、補貼措施來吸引美國企業回歸本土開廠，支持本土製造業。此外，傳統資源股亦獲睇好。 Jason續指，因為往年大選慨前一季，美股表現普遍跑贏環球股市，睇好美股第3季繼續造好。不過，佢提醒短期有調整風險，因為納指100慨14日相對強弱指數(RSI)近日曾升至80以上慨嚴重超買水平，而縱觀過去6年，當RSI超過80後，美股通常於3個月內會調整約10%。 |
|
| 陳偉聰 |
2024-06-03T12:29 |
歐洲央行今個星期減息似乎已成定局，如果歐洲搶閘早過美國聯儲局減息會有咩影響？此外，一旦外圍啟動減息周期，會唔會利好亞洲股市？例如帶動資金流入亞太區。 東亞證券高級投資策略師陳偉聰認為，近期瑞士、澳洲通脹數據都偏高，就連歐元區通脹都未必可以太快回落，一旦減息周期展開，就要留意國央行對息口走向有冇進一步暗示，若歐央行只係下半年再減多1次息，相信滿足唔到市場預期。不過，佢認為對港股影響唔大，因港股慨成份股中，較少同歐洲有直接關係。 Jason又指，外圍減息唔一定會帶動資金流入亞太區，相信要等美國聯儲局減息先有機會利好亞洲市場。 |
|
| 陳偉聰 |
2024-04-23T11:55 |
市場靜待電動車龍頭Tesla今晚美股收市後出業績之際，瑞銀最新下調除Tesla外科企7雄(Magnificent 7)評級，英偉達(Nvidia)、蘋果公司(Apple Inc.)、Facebook母公司Meta、亞馬遜(Amazon)、微軟(Microsoft)及Google母公司Alphabet全部由「增持」降至「中性」評級。 雖然標普500指數屢創新高，但其實標指內唔少科技股近日見頂回落，東亞銀行高級投資策略師陳偉聰亦指出，市場對標指成分股首季盈利預測，已經下調近2%。 Jason續指，標指升勢同企業盈利預測走勢背馳，係因為人工智能(AI)概念股過熱，股價出現超買情況增加，依家業績期開始見真章，市場或對標指企業盈利增長信心減弱而出現估值下調，料標指未來或要經歷較深度調整。 |
|
| 陳偉聰 |
2024-04-05T11:37 |
聯儲局主席鮑威爾(Jerome Powell)日前繼續「放鷹」，指美國經濟及就業市場強勁，加上通脹高過預期，局方仍有時間觀察通脹情況，小心考慮首次減息時間。不過，最新有聯儲局官員指，今年有可能唔減息，市場減息預期隨即，更拖累美股昨晚(4日)下挫，亞太區股市今早(5日)普遍受壓，究竟官員慨言論參考價值大唔大？ 東亞銀行財富管理處投資策略師陳偉聰指，鮑威爾一直都冇畀一個清晰慨息時間點，只不斷重申要觀察通脹，而所有數據都反映美國經濟仍然強勁，包括美國樓市銷售數據強勁、3月消費物價指數(CPI)及生產物價指數(PPI)高企，所以官員慨言論有變係合理。 不過，Jason認為，聯儲局「放鷹」都同市場預測太進取有關，因此，官員慨言論其實冇太大參考價值，佢又提醒，投資者要繼續留意數據，例如今晚出爐慨非農就業數據，唔好只著眼於新職位有幾多，亦要留意失業率及修訂數字等。佢又指，要出現極端情況先會令市況壓力增加，只要唔係「黑天鵝事件」，對美股或外圍股慨影響唔大。 |
|
| 陳偉聰 |
2024-03-12T12:04 |
「人工智能+」及「新質生產力」首次被列入政府工作報告，市場普遍認為，人工智能(AI)發展可刺激用電需求，會唔會帶動相關板塊造好？ 東亞財富管理處投資策略師陳偉聰指，現時內地經濟發展強調重質唔重量，可能會利用AI或科技提升生產力，相信支持相關產業慨終極目的係提振經濟。 Jason又指，美國唔少科企開始建立AI大模型，整個過程慨電力消耗好大，如果全世界都以AI為主要產業，電能消耗必定會增加，若內地AI快速發展，雖然需求及使用量都會增加，但未必可以一面倒利好電能股，因為亦會受發電成本、煤炭價格及國策等因素影響，例如新能源補貼開始減少，實施「平價上網」，電價回報一定唔及5至6年前咁吸引。不過，由於投資成本下降，加上新能源股過去兩三年跌左好多，可能盈利已經見底，估值會慢慢修復。 |
|
| 陳偉聰 |
2024-02-14T11:31 |
美國1月消價指數(CPI)超預期，令市場對聯儲局可能係上半年減息慨預期降溫，最新估計減息時間會由3月推遲至5月、6月，減息次數亦由7次減至3、4次，CPI昨晚(13日)出爐後，即震散美股，其中，道指收市瀉逾500點，美股係咪會繼續調整，資金流向又會出現咩變化？ 東亞財富管理處投資策略師陳偉聰指，依家美股估值近24倍，由於市場之前高估減息次數，依家美國10年期債息反彈，相信市場調整預期後，美股估值應會回落至約20倍，佢認為，公司業績唔對辦、預期經濟陷入衰退等因素，都唔係影響市場慨主因。 資金流向方面，Jason認為，基金等避險資產回報率已不及去年，市場預期，美國經濟仍會錄得增長，之前升左唔少慨人工智能(AI)概念股及科技股，適度回調後或獲利回套，估計資金會轉投非必須消費股、金融股，甚至公用股。 |
公司業績 , 資金流向 , 美股 , 公司業績 , 科技 |
| 陳偉聰 |
2024-01-11T12:01 |
有分析指，雖然港股係2024年持續弱勢，但可以炒股唔炒市，而優質高息股會係今年焦點，如果想買呢類股份，應該點揀好？ 東亞銀行財富管理處投資策略師陳偉聰指，過去1年，內地電訊、能源及石油股明顯跑贏，主要係內地整體息口低，黎緊又唔會大手減息，加上中國10年期國債息跌穿2.5厘，如果買無利率風險慨債券產品，都只係收2.5厘息，不如揀有穩陣現金流及負債比例唔高慨股份，除左高息，派息持續性又可以維持，呢類股份係入市首選。 至於幾時係入市好時機？Jason就話，能源及煤炭股息率係2023年高峰時期有12厘至13厘，平均股息率唔算低，煤炭及石油股都有7厘至9厘，亦算吸引。佢提醒，近期呢些股份破頂，逆市升至超賣水平，唔排除短期會有調整，而當能源股開始回落時，資金有機會流向中資電訊股。 |
能源 , 東亞銀行 , 石油 , 港資流向 , 港股 |
| 陳偉聰 |
2023-10-30T12:35 |
10月快到尾聲，月初至上個交易日，恆生指數跌約2%，更一度跌穿17000點，究竟過左「股災月」後，11月港股係咪會見底？ 東亞銀行財富管理處投資策略師陳偉聰認為，上月內地經濟數據明顯好轉，加上上周北向資金終於扭轉連續10周淨流出慨形勢，意味外資沽貨離場對A股及港股慨壓力有所減弱，而恆指預估市盈率(Forward PE)僅8倍，預期即使下個月港股再次失守17000點關口，下行空間有限。 Jason又指，如果只係想避險，相比高息股普遍有6至7厘慨股息率，目前短期或1個月定存利率都做到約5厘，造短期定存慨回報確實比較吸引。 不過，佢提醒，造定存前要考慮埋美國聯儲局11月1日(周三)同12月議息慨影響，若官員釋出息率有可能見頂慨訊號，造太長年期慨定存反而會錯失股市反彈慨獲利機會。 |
港股 , 東亞銀行 , 港銀 , 港資流向 , 恒生銀行 |
| 陳偉聰 |
2023-10-19T11:45 |
美國長債息再度抽升，進一步逼近5厘水平，不過，聯儲局官員過去兩周不停「放鴿」，或多或少債息升勢有所收斂，債息噚隔扯高係咪反映下月加息預期可能有變？ 東亞銀行財富管理處投資策略師陳偉聰認為，近期美國公布慨經濟數據都比預期強勁，加上油價近期向上，市場憂慮會令通脹壓力升溫，聯儲局11月加唔加息一定對債息有影響，但唔係唯一慨影響，其他因素包括美國財政部發新債，市場都十分關注。 Jason又指，近兩年美國債孳息曲線不斷倒掛，近期美國經濟好轉，照計應該會重返正常水平，但由於短息仍高企，因此，長息就要升返一定幅度，先可以做到。佢續指，如果「短息高、長息低」慨情況持續，相信孳息曲線正常化進程仍未結束，一旦聯儲局年內再加息，債息有機會升穿5厘。 |
東亞銀行 , 港銀 |
| 陳偉聰 |
2023-09-25T11:39 |
美國今個星期五(29日)會公布聯儲局最關注慨個人消費開支(PCE)物價指數，市場估計，扣除食品及能源慨核心PCE按年升幅將會由4.2%放緩至3.9%，按月升幅則維持於0.2%，而個人開支按月升幅則收窄至0.4%，如果呢些預測正確，係咪反映美國消費者面臨慨壓力愈來愈大，最終導致經濟放緩？ 東亞銀行投資策略師陳偉聰表示，由於能源價格及油價近期都升得比較多，一定會對PCE造成壓力，因此，市場預期，整體PCE按年可能會進一步反彈，月中出爐慨核心消費物價指數(CPI)升幅都比預期高，核心PCE按月亦可能出現同樣情況，佢又話，市場預期個人開支會減少，令消費市道逐步降溫。 Jason續指，只要按年核心PCE維持係4%水平，短期而言，美國貨幣政策都唔會有太大放鬆空間。 |
能源 , 東亞銀行 , 港銀 , 食品 |
| 陳偉聰 |
2023-08-23T11:22 |
大市今日繼續跌，恆生指數預測市盈率(PE)接近9倍，市帳率(PB)就唔夠1倍。《彭博》統計，約一半藍籌的14天RSI，已落到30樓下慨超賣水平。恆指8月暫時跌約11%，係去年10月以來最大跌幅，恆指後市走勢會點？ 東亞銀行投資策略師陳偉聰表示，最近一周已將未來一年恆指目標價，降至20700點。相比起新冠疫情時期，佢認為依家恆指PB同PE其實唔算低，有可能修正返小小再反彈。技術層面RSI方面，佢就指，雖然睇日線圖係去到20幾的超賣水平，但週線圖顯示仲係34水平附近，未去到好嚴重超賣慨地步。 |
東亞銀行 , 港銀 , 恒生銀行 , 港股 , 企業評級 |
| 陳偉聰 |
2023-07-31T12:40 |
中證監日前召集多家大型券商開會，就提振資本市場及投資者信心慨政策徵求意見，市傳有與會人士建議減印花稅、暫緩IPO等。消息一出，中資券商股上周五(28日)隨即跑出，今朝再升一浸。 東亞銀行投資策略師陳偉聰認為，未來政策大方向會令A股市況好轉，但唔會一面倒利好券商股。佢指出，減印花稅唔係新鮮事，過往A股市況唔好，都會用呢招谷成交。佢又話，如果市場熱議慨「T+0」交易機制成真，容許內地股民炒「即日鮮」，相信亦會增加即市成交量，兩項措施都對主營股票經紀服務慨傳統券商有幫助。 不過，Jason表示，若當局決定暫緩IPO，會影響主營投資銀行業務慨龍頭券商，減少佢地做包銷商或保薦人慨收入，而近月中證監要求券商及基金公司減交易費，亦會影響主營資產管理慨券商。 Jason又認為，內地實行新股註冊制，放寬上市門檻後，大型企業就未必考慮來港上市。除非港股估值明顯上調，例如新經濟股慨估值上返3至4年前水平，先會有返新股集資慨吸引力。 |
東亞銀行 , 新股IPO , 新股IPO , 港股 , 港銀 |
| 陳偉聰 |
2023-07-03T12:17 |
花旗下半年選股名單出現唔少行業代表，包括上半年表現最好慨藍籌之一網易(09999)、周大褔(01929)、金沙中國(01928)、比亞迪股份(01211)、申洲國際(02313)、友邦保險(01299)、華潤燃氣(01193)。 其他大行又點睇呢？東亞銀行財富管理處投資策略師陳偉聰表示，下半年睇好服務式消費相關板塊，尤其旅遊消費股將受惠於暑假及「十．一」黃金周出遊需求慨高增長。 此外，Jason認為，電力及新能源板塊會受惠原材料同部件成本下降，而推升下游慨發電公司回報率，而內地減息亦有助負債普遍高企慨電力股降低融資成本。佢續指「中國特色估值」概念股，例如基建、國企內房、內銀、電訊板塊，都值得留意。 Jason又話，短期可留意7月底中央政治局會議前有冇更多刺激經濟政策出台，或會帶動港股反彈，不過下半年仲有美國加息等不明朗因素，佢預期港股難出現大牛市。 |
東亞銀行 , 中電力 , 港股 , 能源 , 內房 |
| 陳偉聰 |
2023-05-30T12:05 |
計埋今日，港股係「五窮月」只剩返兩個交易日，截至噚日止，恆指今個月暫累跌逾1300點，而3大指數開關重啟慨升幅全部化灰，反觀外圍，美股、日股、韓股走勢強勁，同港股表現差天共地，點解會出現「港股獨憔悴」慨情況？係咪受A股及內地因素影響？ 東亞銀行財富管理處投資策略師陳偉聰指，港股年初其實因憧憬美國加息周期結束升左一輪，但近期美國公布慨數據仍然偏強，令市場認為聯儲局6月加息慨機會又大左，而當債息上升時，的確令港股面對唔少壓力，見到科技股及高息股都跌左落黎。 Jason又話，內地4月經濟數據大部分都差過預期，同市場預期有好明顯落差，令市場對內地經濟重啟、復甦動力，係第2季係咪可以持續存疑，再加上其他因素，導致外資沽A股，再加上中美一些衝突，令港股整體估值都受到一些壓力。 |
港股 , 東亞銀行 , 港銀 , 科技 , 美股 |
| 陳偉聰 |
2023-04-06T11:24 |
美國噚晚出爐慨服務業及私人企業職位等數據都差過預期，令經濟陷入衰退慨憂慮升溫，亦令聯儲局5月暫停加息慨預期再升溫，下月暫停加息慨機會升至57%，加息0.25厘慨機會降至43%。今個星期初因為石油輸出國組織及盟友(OPEC+)突然宣布減產，市場擔心會刺激通脹升溫，令聯儲局5月加息0.25厘慨機會增加，但依家因為經濟數據差又跌返，5月議息結果似乎仍有好多變數。 東亞銀行財富管理處投資策略師陳偉聰指，美國有銀行倒閉後，開始見到市場有些炒作，佢估計，聯儲局黎緊都會放慢加息步伐，甚至會係5月暫停加息，不過，之後OPEC+減產、油價升，以及聯儲局官員繼續放鷹等，都會令利率走向、利率期貨係未來幾個星期，就聯儲局下月係咪加息慨預測搖擺不定，佢認為，美國5月係咪加息暫時都係「五十五十」。 |
石油 , 東亞銀行 , 港銀 |
| 陳偉聰 |
2023-03-01T10:50 |
中資電訊股近排升得幾誇張，中國電信(00728)及中國聯通(00762)等成板仲升緊，主要係炒作數字經濟憧憬及概念，因為當中會涉及基礎設施，加上全球熱炒慨ChatGPT概念。此外，摩根士丹利最新估計，未來60日，3大中資電訊股有80%機會升，係市場仍有唔少不確定性下，呢類股份係咪有得諗？ 東亞銀行財富管理處投資策略師陳偉聰指，港股舊年第3季開始向下時，中資電訊股仍然好硬淨，到大市升返亦可以跟到，過去好多投資者認為呢類係防守股，但基於一些元素，例如新產業工業互聯網，包括雲計算、AI等，令市場覺得中資電訊股有增長空間，因為面向好多企業客，而過往主要炒tech股，但隨著市場份額慨轉變，中資電訊股慨份額不斷升緊，雖然唔係直接參與，但背後慨產業鏈都好強，所以有呢方面慨增長概念。 Jason又話，如果睇返估值，市盈率(PE)仍然係單位數，息率有7厘至8厘，對比傳統科網股係有一定吸引力。 |
東亞銀行 , 中國聯通 , 港股 , 中國電信 , 港銀 |
| 陳偉聰 |
2023-02-03T11:55 |
全球3大主要央行已先後公布今年首次議息結果，央行對息口係咪已見頂、加息周期幾時完結仍有分歧，舊年市場主題係聯儲局加息遏通脹，呢個投資主題今年會唔會持續發酵？ 東亞銀行財富管理投資策略師陳偉聰指，雖然聯儲局主席鮑威爾暗示今年最少再加兩次息，但市場就解讀為第4季可能會減息，反而歐央行加息步伐比聯儲局更進取。 Jason又話，亦要留意經濟放緩速度，市場已開始消化美國經濟轉弱慨消息，相信未必會陷入嚴重衰退，加上歐洲經濟似乎冇市場睇得咁悲觀，因此，若環球經濟增長前景較預期樂觀，將會成為環球股市、風險資產好有力慨催化劑。 |
東亞銀行 , 港銀 |
| 陳偉聰 |
2022-12-28T11:16 |
內地宣布將「新冠肺炎」改名為「新冠病毒感染」，並將「乙類甲管」調整為「乙類乙管」。此外，亦宣布多項優化措施，包括將恢復辦理內地居民旅遊及商務赴港簽注，以及逐步恢復陸路口岸客運通關等，市場對進一步放寬其實係咪已有一定憧憬？ 東亞銀行財富管理處投資策略師陳偉聰指，相信的確為市場帶黎少少驚喜，因為市場之前估計內地會係春節後，或「兩會」前後先會放寬，加上今次唔止針對商務旅客，連一般旅遊都一齊放寬，對市場黎講一定係正面消息。 不過，Jason提醒，若放寬後內地疫情升溫，可能令春運需求不似預期，亦會影響消費、工廠復工復產等環節，因此，雖然放寬慨利好層面係大過預期，但政策後遺症及成本代價值亦不容忽視。 |
東亞銀行 , 港銀 |
| 陳偉聰 |
2022-11-22T11:31 |
內地早前推出「優化防疫20條」，市場解讀為釋出微調或放寬疫情控制措施慨訊號，消息一出，股市表現亢奮，恆生指數裂口大升，更炒到逼近18500點，但1星期過去，冷靜落黎，見到社會活動限制根本冇放寬，反而因疫情再升溫而有收緊跡象，港股亦掉頭回落。市場本來對內地放寬防疫措施有好大憧憬，結果係咪證明又炒錯？ 東亞銀行投資產品及顧問部股票策略師陳偉聰指，其實可以先觀察市場反應，根據過往經驗，當內地單日感染個案達20000宗，或收緊疫情防控措施，大市應該唔止跌百幾點，如果好似年初全面封城，恆指單日跌500至600點，甚至跌更多。 Jason又話，雖然內地疫情近期持續升溫，封控措施亦持續，但市場表現相對冷靜，原因係大家都有一個共識，就係所有防疫政策都係慢慢微調，但動態清零慨大方向政策亦講明唔會變。 |
港股 , 東亞銀行 , 港銀 , 恒生銀行 |
| 陳偉聰 |
2022-10-11T12:20 |
港股不斷尋底，恆指今朝已失守17000點，淡友繼續發力，噚日港股整體沽空比率升至24.5%，仲高過8月30日約23%慨紀錄高位，重磅股如阿里巴巴(09988)沽空比率升至近31%，但如果掉返轉去睇，港股跌到咁殘咁平，反而有機會夾淡倉，短線有機會反彈？ 東亞銀行財富管理處股票策略師陳偉聰指，依家港股充斥負面消息，而令市場最驚係觸摸不定，加息、經濟差仲有數得計，但地緣政治如俄烏局勢有機會升級，甚至俄羅斯發動核戰，會唔會令烏克蘭能源、糧食出口受限制？令高通脹問題又要再持續一段時間。 此外，香港呢邊正進行中概股慨審計底稿工作，如果調查結果唔理想，甚至有中概股明年要除牌，港股中線壓力都幾大，依家沽空比率去到24%係有些極端，恆指預測市盈率(PE)只得9.5倍，係2017年以後每次熊市低位，而恆指RSI已落到19水平，過去30年都冇見過咁超賣慨情況，依家市場明顯Discount左一些好極端或類似「黑天鵝」事件，若後市有返些好消息，即使唔係立即轉勢，間中有些夾淡倉，夾返2000、3000點上去都唔出奇，現階段造淡都要小心報復式反彈風險。 |
港股 , 東亞銀行 , 港銀 , 能源 , 阿里巴巴 |
| 陳偉聰 |
2022-09-14T11:52 |
內地通過新一批遊戲版號，合共73款國產遊戲獲批，當中電腦遊戲佔3款、主機遊戲佔1款，其餘全屬手遊，除左中手游(00302)、心動公司(02400)、嗶哩嗶哩(09626)有份，遊戲股龍頭網易(09999)及騰訊控股(00700)旗下騰訊遊戲今次終於有份。 不過，東亞銀行投資產品及顧問部股票策略師陳偉聰指，對遊戲股仍然審慎，雖然內地今年第1季已復批遊戲版號，但大部分獲批都係迷你遊戲及休閒遊戲，吸金力、吸客力都唔及硬核遊戲，加上內地仍未放寬成年人打機時間限制，反映當局仍未放寬遊戲監管，相關企業慨盈利仍面對挑戰。 另一方面，市場憧憬iPhone 14可刺激內地手機需求及出貨量，但摩根士丹利就潑冷水，指手機行業係明年上半年前都冇復甦潛力。 Jason就話，依家內地經濟下行，消費者換機會比以前謹慎，所以需求亦會細左，不過，內地有好多iPhone死忠粉絲，加上新機定價唔算進取，相信仍會掀換機潮，相關設備供應商或會受惠，相反，中低檔定位慨內地安卓手機品牌就冇咁吃香。 |
東亞銀行 , 騰訊控股 , 港銀 , 中電控股 , 中手游 |