| 評論員 |
時間 |
內容 |
標籤 |
| 梁偉民 |
2026-06-09T10:27 |
雖然美匯、芝加哥期權交易所波幅指數(VIX)及油價等風險指標全線回落，但債息不跌反升，市場係咪仍憂慮通脹及加息風險？美股昨晚(8日)一度反彈，可能受Google加單、OpenAI已交IPO申請等消息刺激，但收市都要跌，點睇美股後市？ 高富金融集團投資總監梁偉民指，近期債息有明顯上升趨勢，主因係美國經濟數據強勁，雖然美國10年期債息未去到令人最擔心慨水平，但2年期債息已升上逾5月高位，而債息一向行得快過聯儲局慨貨幣政策決定，就算市場開始擔心加息風險上升，都只係提早反映年底有機會加息1次，佢估計，聯儲局未來幾個月都會按兵不動，投資者要留意美國明晚(10日)出爐慨通脹數據。 Wyman又話，科技股相關消息短線有利市場氣氛，市場對人工智能(AI)慨信念仍然好大，只要科企繼續投入資本開支，即使息口上升會令估值受壓，半導體及記憶體公司慨盈利及收入，未來1至2年仍可持續高企。 不過，最近好多科企都要發債或發新股集資，所以要留意明年科企資本開支，仲可唔可以維持大幅增長，以及投資變唔變到現，以支撐未來開支。 |
|
| 梁偉民 |
2026-06-02T10:35 |
英偉達(Nvidia)創辦人黃仁勳昨日(1日)係台北GTC大會(GPU Technology Conference)公布一系列新產品，刺激Nvidia股價昨晚大升逾6%，黃仁勳提及，Nvidia將會踩入個人電腦(PC)市場，推出CPU+GPU一體化產品，並宣布新一代人工智能(AI)晶片Rubin已全面量產，點睇呢個消息？CPU大戰係咪已白熱化？ 高富金融集團投資總監梁偉民指，市場擔心其他科技巨企自行研發AI晶片，會威脅到Nvidia慨市佔率，所以依家有1個新增長點，對投資者黎講都係好消息，但問題在於PC及CPU市場本身競爭已經好大，例如傳統參與者英特爾(Intel)、超微半導體(AMD)等，因此，Nvidia可唔可以突圍仍要觀望，雖然Nvidia股價被炒起，但Wyman認為，短線未必對實質業績有好大幫助。 佢又話，過去兩個月，市場投資焦點落係CPU身上，今年以來，Intel股價已飆近2倍，但CPU新貴當中，Arm反而更突出，因為係AI應用方面，Arm耗電量相對較少，未來科技企業係人工智能代理(AI Agent)方面，或會選擇有慳電優勢慨Arm架構，投資者要留意市場格局或會出現變化。 |
|
| 梁偉民 |
2026-05-26T11:40 |
沃什(Kevin Warsh)上周正式宣誓就任聯儲局主席，他的發言強調聯儲局應以獨立性、清晰判斷及堅定立場去控制通脹及實現充分就業，但在息口政策方向上未有釋放訊號，目前應如何預測息口去向？ 高富金融集團投資總監梁偉民指，相信沃什言論滿足到市場預期，聯儲局決定觀察經濟數據而訂立貨幣政策，沒有一個非常明確的立場加息或減息，正正反映其中立性，若他有既定立場，或會令市場質疑他受到美國總統特朗普(Donald Trump)的影響。 Wyman補充，目前雖然油價因美伊重啟談判而回落，但通脹仍有一定壓力，而美國現時經濟不算太差，未需要透過減息去刺激經濟，預料聯儲局在未來2、3次議息中，仍會按兵不動，最快或要到今年年底才有較大機會出現變動。 |
|
| 梁偉民 |
2026-05-19T10:59 |
美股昨日(18日)個別發展，其中，道指升過百點，但標指及納指就輕跌，股份方面，記憶體晶片股普遍受壓，主要受硬碟製造商希捷(Seagate)CEO指出，新工廠要好長時間先起好，令市場對行業產能不足慨憂慮急升溫，到底係之前升得太多出現回套，還是借消息調整？ 高富金融集團投資總監梁偉民指，其實呢個消息對市場黎講唔算係壞消息，因為產能暫時提升唔到，意味供不應求情況持續，變相令記憶體晶片價格會持續高企係一個火熱水平，相信昨日純粹係冇乜特別消息，借勢回調。 Wyman估計，行業未來幾季收入及盈利，可望繼續錄得爆炸性升幅，始終記憶體仍供不應求，加上近期三星電子(Samsung Electronics)有大罷工風險，短期有機會令記憶體供應不足情況惡化。 佢又話，依家Seagate估值相對偏貴，其他記憶體晶片股未來4季預測市盈率(PE)，可能只係約10倍或以下，但Seagate預測PE去到30倍，如果真係要入場，佢建議買返美光(Micron)及SanDisk等。 |
|
| 梁偉民 |
2026-05-18T11:15 |
中美元首會面結束，美國白宮表示，中國承諾連續3年每年最少購買170億美元農產品，中國商務部亦發聲明指，中美同意設立貿易理事會和投資理事會，通過一系列互相互降關稅推動雙向貿易。投資者應該怎麼看待這次美國訪華成果？ 高富金融集團投資總監梁偉民表示，自從美國對中國加徵關稅後，兩國間的貿易障礙增加，交流明顯減少。不過他相信，美國產品本身有一定競爭力，只要美國總統特朗普(Donald Trump)不再加收中國關稅且不再施加新限制，中國依然會樂意購買美國的產品。 他續指，由於目前尚未清晰知道中國會如何執行所提出的承諾，加上特朗普未來仍繼續對中國實施針對性行為，中美關係有機會再次陷入緊張，因此提醒投資者不應因中國購買量增加而認為中美關係有好轉。 |
|
| 梁偉民 |
2026-05-12T11:18 |
美股持續造好，標指及納指昨晚(11日)再創新高，前者更首度升穿7400關收市，晶片股方面，高通(Qualcomm)、美光科技(Micron)齊破頂，英特爾(Intel)及英偉達(Nvidia)亦有得升，有分析預測，標指年底有望突破8000關，不過，電影《沽注一擲》(The Big Short)主角原型、著名對沖基金經理Michael Burry認為，科技股估值太貴，建議沽貨獲利，同埋唔好沽空，但唔少投資者認為，夠膽高追人工智能(AI)上游硬件股就會贏錢。 高富金融集團投資總監梁偉民表示，當市場好火熱時，估值短期可能已被撥埋一邊，如果單純因估值貴去做空，投資者未必會理，甚至導致進一步上升。依家市場情緒高漲，Intel、超微半導體(AMD)、Micron、SanDisk等，股價係過去1個月累升1倍或以上，即使睇岩方向做空，只要唔係即時，要1至2個月後先發生，可能會造成幾十個百分點，甚至逾倍虧損，佢直言，方向可能會估中，但幾時出現調整就好難估。 Wyman建議，若擔心風險就要減低注碼或繼續持貨，直至指數自高位回落約10%再止賺。此外，唔少投資者覺得之前錯過機會，想呢一刻追入，但Wyman話，依家追落去可能1至2周會賺好多，不過，一旦回套跌幅可以好大。 |
|
| 梁偉民 |
2026-05-04T11:06 |
國際油價持續高企，紐約期油及倫敦布蘭特期油齊齊企係每桶100美元樓上，不過，美國總統特朗普(Donald Trump)話，美國好快又會有行動，導致被困霍爾木茲海峽(Strait of Hormuz)慨中立船隻駛離海峽。此外，7個石油出口國組織及盟友(OPEC+)主要產油國宣布，6月開始會每日增產18.8萬桶原油，呢些因素可唔可以令油價回落？ 高富金融集團投資總監梁偉民指，幾個OPEC+成員國增產未必可以推低油價，因為部分成員國係中東國家，佢地依家出口仍然受阻，所以增產其實意義唔大，加上增產慨成員國主要來自非中東，或者進出霍爾木茲海峽冇受限慨國家，增產數目唔算多，大概每日20萬桶。 Wyman又認為，雖然美伊重啟和談短期有機會傾掂數，但由於前景唔明朗，估計油價仍會高企一段時間，直至中東問題真正解決。 |
|
| 梁偉民 |
2026-04-28T11:27 |
據報高通(Qualcomm)正跟OpenAI、台灣聯發科及內地立訊精密合作，聯手研發智能手機慨人工智能(AI)晶片，預期2028年量產，如果落實，對手機產業有幾大影響？ 高富金融集團投資總監梁偉民指，要視乎智能手機智能化程度、設計及創意，以及對傳統手幾使用量有幾大影響，雖然AI運算十分強勁，過去唔少手機開發商，如蘋果公司(Apple Inc.)、三星電子(Samsung Electronics)及小米集團(01810)等，都話要將AI技術加入智能手機，但其實AI未必配合到消費者需要，所以唔係太受消費者重視。 Wyman又指，智能手機AI晶片對手機供應商來講，的確係一項潛在威脅，但未必可以即時打破現時慨格局，相信要等實物出現及公布相關功能，但佢提醒，AI係可以影響任何一個行業慨市場格局，所以市場都要做好心理準備。 |
|
| 梁偉民 |
2026-04-27T11:27 |
投資者憧憬美伊重啟和談，美股3大指數上周五(24日)個別發展，其中，標指及納指又破頂，而業績及指引都好過預期慨美國晶片製造商英特爾(Intel)，股價上周五一度狂飆27%，再破頂，而其他晶片股如博通(Broadcom)及AMD，股價上周五亦最少升10%，人工智能(AI)晶片龍頭英偉達(Nvidia)就升逾4%，雖然股價冇破頂，但市值已重上5萬億美元。至於費城半導體指數(SOX)已連升18個交易日。 今個星期會有「科技7雄」(Magnificent 7)出業績，有冇機會進一步推動AI及半導體股氣氛？M7邊份成績表可睇高一線？ 高富金融集團投資總監梁偉民指，M7業績其實同半導體冇太大關係，僅Nvidia比較有關連性，佢認為，依家半導體同M7已經脫離左關係，市場焦點未必再落係M7業績增長，反而會關注呢些科企資本開資係咪持續咁巨大。 Wyman又話，M7之中暫時只睇好Nvidia及Alphabet，前者可直接受惠於成個AI基建發展，例如數據中心，因為企業都一定要用Nvidia慨晶片。至於Alphabet係因為集團慨AI發展好全面，有自家大模型，亦有數據中心出租及晶片研發業務，只要有一瓣成功，市場都會認為Alphabet會大幅受惠於成個AI潮流。 |
|
| 梁偉民 |
2026-04-21T10:21 |
美伊局勢持續緊張，美國總統特朗普(Donald Trump)態度仍然好強硬，指唔太可能再延長停火期，指美伊須達成協議，否則，美軍會再有行動。美股3大指數昨晚(20日)收市微跌，美元、美債亦幾乎冇變動，點睇依家慨局勢發展？ 高富金融集團投資總監梁偉民指，投資者要有心理準備美股會出現調整，昨晚慨市況仍比較樂觀，相對平穩，即使油價抽返上去，標指及納指只係微跌0.2%，過去兩周，美股自低位大幅回升，甚至再破頂，不過，短線都傾向較悲觀及審慎。 Wyman又話，呢一刻都唔肯定美伊談判會有正面發展，當中仍有好大變數，所以後市必須小心。佢認為，股市似乎有些過分樂觀之嫌，睇返依家中東及油價慨情況，美股仲企係歷史高位係唔太合理，因為戰事問題仍未解決，只係有機會「將會解決」，而呢幾日更加唔可能百分百解決，認為市場係price in得過分樂觀。 至於有「恐慌指數」之稱慨VIX，雖然升左，但仍處於相對低慨水平。 |
|
| 梁偉民 |
2026-04-14T11:00 |
繼美國銀行股後，科技股會接力派成績表，市場對硬件企業慨業績有頗大期望，點預測美國科技股業績？此外，全球NAND快閃記憶體企業SanDisk晉身納指100，將會係下周生效，刺激股價昨晚(13日)飆逾10%，今年以黎已累升約3倍，仲值唔值得高追？ 高富金融集團投資總監梁偉民估計，硬件股業績會繼續造好，因為科技巨企不斷發展人工智能(AI)，令硬件需求維持熾熱，出現供應緊張慨情況，令呢些公司有主導價格慨本錢，繼而大幅推高毛利率。至於記憶體板塊，受惠於供不應求，價格大幅飆升，相信都可以交出靚業績，甚至高過市場預期。 不過，Wyman提醒，呢些股份慨股價已經升唔少，要留意股價到底反映左幾多盈利增長，雖然供不應求慨周期或維持1至2年，但如果年底至明年初供應增加，屆時股價有機會回落，建議投資者以短期操作為主。 佢又話，好難估計SanDisk股價幾時見頂，始終業績仍然強勁，上季盈利較預期高出70%，市場預期，集團今、明兩年盈利將持續增長，現時預測市盈率(PE)約20倍，明年都有約10倍，所以SanDisk短期仍有炒作空間。 |
|
| 梁偉民 |
2026-03-31T10:32 |
美股係3月份都幾傷，如果以昨晚(30日)收市計，美股3大指數中，標指已自高位回落左近10%，摩根士丹利最新亦下調全球股票評級，由「增持」降至「與大市同步」，主要係油價干擾市場慨時間、規模慨不確定性仍然較大。高盛交易員就認為，對沖基金大舉做空，一旦戰事降溫，股市有望迎來大反彈，而同經濟主題有關慨交易產品空倉，升至10年以黎最高水平。點睇美股後市？ 高富金融集團投資總監梁偉民認為，美股暫時調整左約10%，佢覺得反而係合理些，因為美股之前只係調整左約5%，其實唔係太足夠，始終油價升左好多，影響全球經濟及通脹，股市應該有一個更明顯慨調整，以反映返呢些負面或不明朗因素。 Wyman又話，呢一刻係咪可以撈底？佢認為回調幅度仍未夠，如果睇返2022年，俄烏戰事開打導致油價飆升，當時美股曾重挫20%至30%，始終股市要有一定跌幅，先可以足夠反映油價飆升、局勢不明朗等負面因素，因此，佢認為股市起碼要回調15%，意味等股市再跌多約5%，到時先再考慮撈唔撈貨。 |
|
| 梁偉民 |
2026-03-24T10:53 |
美國總統特朗普(Donald Trump)向伊朗發出「48小時最後通牒」後，突然係本港時間昨晚(23日)7點左右話，將「死線」推遲5日，又話同伊朗慨對話有成效，但之後遭伊朗摑一巴，否認同美國談判。 特朗普係美股兩大指數自高位回調近10%之際，突然出手為場戰事降溫，可能考慮到今年有中期選舉，唔想美股係大選前林市，特朗普出手後，油價一度應聲急挫14%，債息急回，美股昨晚盤中一度彈逾千點，呢場戰事係咪唔會拖太耐？ 高富金融集團投資總監梁偉民坦言，唔會睇得太過樂觀，雖然特朗普昨日為市場送上驚喜，但唔代表係停戰，美軍會撤出中東，而市場最關注一定係伊朗係咪會解封霍爾木茲海峽(Strait of Hormuz)，就呢些問題下定論依家仲係言之尚早，特朗普向伊朗施壓冇成效，就被迫暫緩攻擊，美國一直唔敢攻擊能源設施，主要係擔心伊朗會作出大規模亡命報復，怕承受唔到當中慨後果。 Wyman又話，伊朗開出慨停火條件，其中最關鍵係要美國保證唔會再攻擊伊朗，估計特朗普好大機會唔接受，而戰事會持續幾個星期，甚至1至2個月。 金融市場方面，佢指出，睇返股市、債市、油價今日(24日)都開始縮緊，反映樂觀情緒冇昨日咁高漲之餘，亦顯示仍未睇到停火曙光。 |
|
| 梁偉民 |
2026-03-10T10:13 |
美國總統特朗普(Donald Trump)最新指，打擊伊朗軍事目標慨行動已「基本完成」，暗示戰事可能好快結束，風險資產價格全線應聲反彈，美股3大指數昨晚(9日)全線倒升收市。此外，有「恐慌指數」之稱慨VIX指數收市亦轉跌。不過，市場仍擔心美國有滯脹(Stagflation)風險，到底美國會唔會出現滯脹，係呢個陰霾下，邊些板塊可以受惠？ 高富金融集團投資總監梁偉民指，會唔會出現滯脹主要睇油價係咪持續高企，同埋會持續幾耐，如果只係持續1至2周，即使企係每桶100美元樓上，相信唔會大幅推高通脹，但如果長期企係80美元以上，甚至接近100美元，若呢個情況持續幾個月，對通脹慨影響就大好多。 Wyman又認為，係呢個情況下受惠慨板塊唔多，始終經濟真係受損，而通脹又升溫，對大部分行業都係負面，唯一諗到可以受惠就係能源股，其次係軍工股。 |
|
| 梁偉民 |
2026-03-03T09:50 |
伊朗局勢急升溫，美以針對伊朗慨軍事行動持續，伊朗亦作出反擊，包括向區內多個能源設施施襲，美國總統特朗普(Donald Trump)最新表示，唔會完全排除派出地面部隊慨可能，如果真係咁做係史無前例。不過，納指及標指昨晚(2日)收市仍可倒升，係咪反映戰事影響初步可控？ 高富金融集團投資總監梁偉民指，派唔派地面部隊的確會影響中東局勢，但投資市場最關注始終係油價，而現階段估計派地面部隊慨機會唔大，但如果出動地面部隊能成功控制伊朗局面，市場當然唔會覺得係壞事。佢又認為，依家油價唔穩定仍會帶黎好大風險，未來仍有機會上到每桶80美元樓上。 Wyman又話，雖然美股昨晚(2日)止跌回升，但只要油價仍向上，相關風險及憂慮仍然存在。至於資金昨晚係低位吸納無人機、國防及科技股，而有「恐慌指數」之稱慨VIX都只係升到約21，佢指出。 |
|
| 梁偉民 |
2026-02-24T09:55 |
美國總統特朗普(Donald Trump)輸左關稅官司後，隨即啟動Plan B，當中引發慨不確定性及憂慮，席捲歐美股市，美股3大指數昨晚(23日)跌逾1%，其中，道指收市瀉逾800點，資金湧入美債、黃金、白銀避險，雖然特朗普警告其他國家唔好「玩野」，但歐盟已經有行動，印度更暫停官員訪問，關稅裁決對市場慨影響係咪未反映曬？ 高富金融集團投資總監梁偉民指，依家市場關注美國同貿易伙伴慨關係，會唔會因為今次法院慨裁決而有變，之前同美國傾掂數慨國家，係新關稅Plan B下係唔著數，例如歐盟、日本及英國，取消對等關稅(Reciprocal Tariff)後，所有國家都係支付相同關稅，呢些國家可能會尋求修訂之前慨協議，但特朗普未必願意。 Wyman又話，依家市場觀望會唔會因此而出現新衝突，雖然有不明朗情況，但股市又唔係有太大隱憂。 |
|
| 梁偉民 |
2026-02-20T11:14 |
「兩會」將會係3月4日開幕，因為今年係「十五五」開局第1年，市場憧憬「兩會」將會提及未來規劃，以及推出科技、人工智能(AI)等相關針對性政策，係咪月底已經可以偷步炒「兩會」憧憬？ 高富金融集團投資總監梁偉民指，不論半導體生產還是AI模型開發，中央係政策上一定會支持，但支持力度有幾大仍然係未知之數，例如提供幾多補貼、撥款係相關行業。佢又提醒，內地AI相關股今年升幅已經好誇張，例如Minimax(00100)，某程度上已經唔需要靠政策刺激。 整體經濟方面，Wyman認為，內地過去2年已經用唔同方法去穩住經濟，所以今年都唔需要做太多令經濟大幅增長，佢相信，今年「兩會」政策都係以小修小補為主。 |
|
| 梁偉民 |
2026-02-16T10:24 |
近日市場對科技股，尤其係人工智能(AI)慨巨額投入有好大憂慮，以Google為例，股價上周累跌約10%，依家係咪撈底楂中長線慨好時機？ 高富金融集團投資總監梁偉民指，如果股價調整再深些，部分科技股可以考慮係低位買入，例如微軟(Microsoft)、Alphabet等，因為呢些公司估值唔貴，市盈率(PE)只係約30倍，加上自身業務強勁，即使AI投資帶動唔到盈利及收入上升，投資者仍可考慮係低位買入，但估值貴慨公司就要小心。 Wyman又指，依家AI應用層面最大問題係，未能將投資變成產品或服務，相信呢個問題會延續至年底，加上大部分AI服務都係免費，公司好難從中獲利，或者係明顯帶動收入及盈利，所以今年唔少科技公司都未必會有樂觀慨收入及盈利。 |
|
| 梁偉民 |
2026-02-10T10:24 |
美股3大指數造好，經歷上星期一輪調整後，暫時企返穩，但科技股近期面對資本支出(CapEx)太大慨質疑下，股價大幅波動，科技股昨晚(9日)又彈返上黎，話資金轉投科技股以外板塊係咪言之尚早，後市點睇？ 高富金融集團投資總監梁偉民指，後市發展要睇市場氣氛，科技股出現調整除質疑資本開支太大外，更擔心最後可唔可以收回成本，帶動盈利上升，科企依家訓身投資人工智能(AI)，例如大模型開發，但技術幾時可以變現仍然係未知之數，當市場情緒比較中性或悲觀時，呢個憂慮就更嚴重。佢又指，亦要留意會唔會出現算力供應過剩慨情況，又提醒今年要審慎部署。 Wyman續稱，依家見到有資金輪動慨情況，今年道指及部分傳統板塊，例如工業、能源都跑贏納指，但佢質疑傳統股升勢係咪有足夠基本面支持，又認為呢輪升勢未必可以延續到年底。 |
|
| 梁偉民 |
2026-02-03T10:15 |
之前崩盤慨金價及銀價，係今朝(3日)亞洲交易時段反撲，現貨金價一度彈逾3%，升穿每盎司4800美元，現貨銀價更彈逾5%，衝破83美元，之前連日插水，主要係投資者調整倉位，尤其係短炒白銀慨投資者，倉位退返出黎之後，金價及銀價後市會點行？ 高富金融集團投資總監梁偉民指，金價暫時低位係4500至4600美元水平，雖然金價近期出現較大調整，但資金冇明顯流走，反映黃金利好因素比白銀多。 Wyman又指，炒作白銀慨資金主要來自內地，現時國內銀價較國際市場銀價有逾20元美元溢價，反映國內投資者對白銀睇法樂觀，投資者不妨留意未來兩星期內地慨情況，如果資金繼續湧入就冇問題，相反，若投資者散水，要小心白銀再調整，而且幅度可能好誇張。 |
|
| 梁偉民 |
2026-01-27T11:00 |
國際金價不斷破頂，昨日(26日)衝破每盎司5100美元後回軟，不過，銀價升得更癲，昨日曾飆14%，高見每盎司117美元水平。除地緣局勢因素外，仲有咩原因推升銀價，呢個趨勢今季會唔會持續？目標價可以點擺？ 高富金融集團投資總監梁偉民指，金價及銀價都好難Set目標價，尤其係後者，因為投機味真係好重，短短1個月大升40%的確好誇張，比金價升得更癲，更大幅跑贏金價，其實都好難解釋到呢個情況，如果純粹避險及去美元化，黃金慨角色應該比白銀重要，理論上升幅會大過銀價。 Wyman續指，唯一解釋係大量熱錢係短時間內湧入白銀市場，短線黎講，銀價可能會再升，但升到現水平已偏離基本面，一旦熱錢唔再流入，調整幅度可以好誇張。 |
|
| 梁偉民 |
2026-01-20T10:47 |
美股昨日(19日)因假期休市，美國總統特朗普(Donald Trump)向歐盟國家再發動貿易戰，多方地緣政治因素影響下，金、銀價表現未有再創新高，而大行又繼續唱好，如何評估金價後市走勢？ 高富金融集團投資總監梁偉民指，今年金價破每盎司5000美元大關並不意外，因特朗普的各種政策，製造不少地緣政治衝突，無論是早前對伊朗的威脅，還是現在與歐盟的關稅貿易戰，市場通通解讀為地緣政治不穩定，令避險需求大大增加。 Wyman又話，2025年內，金價已升逾60%，本已踏入調整期，去年最後一個交易日更跌穿4300美元，但現在受特朗普不同的政治因素影響，令市場憂慮情緒增加，對金價有利，未來再升多5%至10%亦屬正常狀況。 |
|
| 梁偉民 |
2026-01-13T10:14 |
美國總統特朗普(Donald Trump)突然宣布，對所有同伊朗有生意往來慨國家加徵25%關稅，即時生效。中國同伊朗一直都有能源、基建等合作，中美雖然係早前達成貿易休戰一年協議，中美關係會唔會因此再受到考驗？ 高富金融集團投資總監梁偉民表示，雖然早前兩國元首會面後，貿易氣氛一度有所緩和，但預計只係短暫現象。除左今次伊朗事件，其實早前涉及台灣的問題都對中美關係構成影響。佢指出，美國始終將中國視為主要威脅，壓制中國發展係美國慨長遠戰略任務，所以除左關稅之外，針對科技慨遏制，甚至圍堵政策都有出現慨可能。 Wyman又話，市場一直對中美關係持較樂觀慨態度，認為雙方可以維持相對友好慨狀態。但佢提醒，無論係港股定係內地股市，投資者今年都唔能夠忽略中美關係變差慨風險。 |
|
| 梁偉民 |
2026-01-09T10:08 |
美國今晚(9日)將會有唔少重磅消息及數據出爐，包括非農數據、最高法院公布對等關稅(Reciprocal Tariff)意見，甚至係裁決，市場估計，非農新增職位約7萬個，略多過2025年11月，不過，日前公布有「小非農」之稱慨ADP就業數據就差過預期，預期今晚慨非農數據都會偏弱，聯儲局月底減息機會係咪仍然偏高？ 高富金融集團投資總監梁偉民認為，美國2026年上半年減息機會唔大，聯儲局依家處於一個兩難局面，面對美國就業市場顯著轉弱，而通脹就持續不明朗，雖然去年11月消費物價指數(CPI)輕微回落，但市場擔心呢個數字慨準確性，因為期間有美國政府停擺事件，所以一定要睇實下周出爐慨最新CPI數據，因為好影響聯儲局今年上半年慨減息步伐。 |
|
| 梁偉民 |
2026-01-06T09:57 |
市傳內地金融監管機構要求銀行，匯報對委內瑞拉慨貸款風險敞口，內銀股昨日(5日)受壓係咪受呢單消息拖累？值得留意係，中國係委內瑞拉最大貸款國，透過國有銀行向該國提供逾600億美元石油擔保貸款，而當地石油產業好大機會由美國主導，呢些貸款要撇帳機會大唔大？ 高富金融集團投資總監梁偉民指，都有呢個可能，因為委內瑞拉政局好大機會由美國控制，中國係當地慨融資係有機會出現壞帳，但暫時對內銀及石油股慨影響唔係咁直接，首先係金額唔係太大，其次係呢些融資都預左唔係全部收得返。 Wyman又話，到底呢些融資有幾多係上市公司，因為可能係一些冇上市慨國有銀行或油企身上，而市場認為委內瑞拉政局仍有變數，雖然港股慨內銀股昨日(5日)跌左少少，但佢相信，對內銀唔會有好直接影響，尤其業績方面。 |
|
| 梁偉民 |
2025-12-30T10:17 |
黎到年底貴金屬有新一輪行情，其中以白銀價格最癲，破頂後出現大震盪，衝上每盎司84美元後，再急「跳水」，直插至70美元水平，更引發其他貴金屬波動。市傳有歐洲大行白銀期貨爆煲，美國聯儲局要緊急注資救市。技術上白銀的確已超買，市場都預左升得急、回得急，但點解會出現昨晚(29日)呢個情況？ 高富金融集團投資總監梁偉民認為，其中一個原因係市場擔心要加按金，會令市場流動性減少，更重要係白銀價格今年已累升1.6至1.7倍，係1979年以來最大年度升幅。 Wyman又話，除左基本因素，市場熱錢流入及投機炒作，都令白銀價格過去2至3個月升勢加劇，所以當價格突然急回，投機資金及熱錢就會好快流走，令昨日慨回調速度更急。佢續指，白銀價格暫時回調約10%，仍算係正常水平，至於市傳有大行爆煲，佢認為呢個可能性相對細。 |
|
| 梁偉民 |
2025-12-23T10:13 |
美國科技股近日扭轉之前慨弱勢，股價持續造好，更帶動美股3大指數持續向上，其中，標指昨晚(22日)再升不足1%，收報6878點，迫近歷史高位，科技股呢輪調整似乎已經完成。不過，Netflix同派拉蒙天舞(Paramount Skydance)擬收購華納兄弟探索(Warner Bros Discovery)，最終花落誰家仍未明朗，而甲骨文(Oracle)聯合創辦人埃利森(Larry Ellison)為左支持Paramount，同意為呢單收購進行股權融資，提供404億美元個人擔保，似乎Paramount勝算係咪更大？ 高富金融集團投資總監梁偉民指，近日科技股回升，相信主要係美國日前公布通脹數據後，令減息預期升溫，帶動科技股升勢，但長遠黎講，估值問題始終係一個隱憂。 至於華納爭奪戰，Wyman就話，市場普遍認為Netflix贏面較大，但Netflix股價暫時反應唔大，始終收購價格高，加上現時觀眾可能較偏好創新劇集、紀錄片等，未必著重串流平台慨IP數量，但收購最主要目的係減少競爭。 |
|
| 梁偉民 |
2025-12-16T10:39 |
投資者觀望快出爐慨經濟及就業據，美股3大指數昨晚先升後回，但聯儲局減息後，市場或憧憬美股年底會再衝高，會唔會再出現板塊輪動情況？ 高富金融集團投資總監梁偉民指，美股暫時都只係正常上落，雖然近日市場再次擔心龍頭科技股表現，例如甲骨文(Oracle)、博通(Broadcom)、英偉達(Nvidia)等，股價近期都比較弱，但始終呢些股份今年已累積左唔少升幅，所以回返少少都好正常，市場最近可能擔心Oracle慨人工智能(AI)投資太大，令集團財政狀況惡化及引發其他問題。 Wyman續稱，市場認為估值貴，導致股價調整係常態，估計2026年會繼續出現呢個情況，所以投資者要繼續留意情況會唔會明顯冷卻。 |
|
| 梁偉民 |
2025-12-09T10:01 |
Netflix計劃收購華納兄弟探索(Warner Bros Discovery，WBD)幾乎日日都有新發展，繼日前傳出美國總統特朗普(Donald Trump)表明會介入後，最新又殺出程咬金，派拉蒙天舞(Paramount)提以每股30美元，涉及逾1000億美元，仲要係全現金收購WBD，出手高過Netflix，被市場解讀為「敵意收購」(Hostile Bid)，到底邊個勝算大些？ 高富金融集團投資總監梁偉民指，由於依家情況仍然唔明朗，所以好難預測WBD最落入邊個手上，雖然派拉蒙出價更高，但收購部分更多，所以好難估計Netflix股東最後會點揀。不過，Netflix股價昨晚(8日)受壓，反映市場擔心出價太高，同埋收購內容未必對Netflix吸新客有太大幫助。 |
|
| 梁偉民 |
2025-12-02T09:49 |
美股昨晚(1日)係12月開局未能有個好開始，3大指數全線下挫，但睇返過往慨Santa Claus Rally(聖誕行情)，自1950年以來平均升逾1%，而係聖誕後最後4個交易日及新年後首2個交易日，自1993年以來有67%機會升，今年會唔會出現Santa Claus Rally？ 高富金融集團投資總監梁偉民估計，美股今個12月表現會差些，始終今年已經升左好多，3大指數已累升15%至20%，其實去年12月美股都係升唔起，甚至要跌，所以投資者都要小心，因為市場過去兩三個月已price in左好多利好因素，所以要再谷美股向上似乎已冇乜籌碼，預期美股今個月會以整固為主。 |
|
| 梁偉民 |
2025-11-25T10:08 |
恆生指數昨日(24日)飆近500點，阿里巴巴(09988)放榜前亦強勢，加上中美關係回暖，港股今日(25日)應該都可以繼續向上，而阿里業績係咪都可以帶動到大市？ 高富金融集團投資總監梁偉民指，港股今日上返26000點絕對唔出奇，不過，問題係上到26000點樓上之後，仲有幾多動力？佢認為，大市氣氛及動力仍相對弱，尤其科技股，而科技指數已自高位跌左15%，反映投資者係過去兩三個月，對呢類股份慨熱情已大幅冷卻。 Wyman又指，阿里今日出業績，市場都係睇實雲端業務表現，預期增長會繼續理想，但電商方面仍然困難，加上價格戰影響盈利，都會拖住其他科技股後腿，甚至有機會令呢類股份進一步弱勢。 |
|
| 梁偉民 |
2025-11-21T11:35 |
港股過去1星期跑輸左亞太區股市，雖然恆生指數昨日(20日)終止4日跌勢，但只係輕微反彈4點，就算傳出內地再連出3招救樓市，港股仍然彈唔起，到底大市依家受咩因為困擾，中日關係惡化係咪主因？ 高富金融集團投資總監梁偉民指，中日關係唔係港股弱勢慨主要負面因素，反而同投資者對中資科技股熱情顯著降溫有關，導致科指回調，睇返技術走勢，科指已跌穿200天線，明顯處於弱勢。 Wyman又話，人工智能(AI)憧憬降溫，晶片股由高位回落，連一些受AI帶動而被炒上慨股份都轉弱，繼而影響港股整體表現，雖然依家仲有高息股撐市，但估計都唔撐得幾耐。 |
|
| 梁偉民 |
2025-11-18T11:09 |
加密貨幣比特幣(Bitcoin)跌勢未止，價格一度跌至9.11萬美元水平，不過，之前有消息指捷克央行首次買入Bitcoin，就連哈佛大學都係第3季增持，美國政府剛剛重啟，理論上會利好呢類風險資產，但點解幣市仍然低迷？ 高富金融集團投資總監梁偉民指，無論加密貨幣、Bitcoin，好大程度都受市場情緒影響，而最近就較為負面，首先係之前幣市大爆倉，資金對幣市前景有憂慮，加上市場擔心Bitcoin每4年就出現一次大調整，佢相信短期仍會受壓。 Wyman又話，睇返技術走勢，除非Bitcoin價格未來幾個星期可以企穩，市場睇法才會轉為中性，甚至較樂觀，加上冇特別利好消息，所以價格反覆向下機會較大，後市要留意會唔會係8萬美元水平見底。 |
|
| 梁偉民 |
2025-11-11T11:08 |
美國政府停擺風波有望係幾日之內正式結束，睇返對上一次停擺結束後，即2018/19年，標指、金價係1個月後分別升左約5%及約2%，再睇埋歷史數據，11月係美股全年表現最好慨月份之一，今個月都見到具指標性慨Palantir及英偉達(Nvidia)股價反彈力度好強，市場係咪又將估值貴呢個問題擺埋一邊？ 高富金融集團投資總監梁偉民指，市場上星期仍擔心科技股估值貴問題，導致相關股份經歷左兩日較深慨調整，但昨日(10日)政府停擺有望結束消息帶動，股價出現反彈，但佢認為，宜再觀察多幾日，睇下市場係咪仍然對估值問題有戒心。 Wyman又話，市盈率(PE)去到咩水平叫做貴，甚至出現泡沫都係好主觀，如果同過去10年平均比較，PE確實有些貴，個別科技公司股價上升幅度，已大幅拋離盈收增長，依家市場就係買呢些公司慨「未來」，佢又認為，PE貴會成為美股後市調整其中一個主要藉口，所以仍然要小心。 |
|
| 梁偉民 |
2025-11-04T11:09 |
美股傳統10月股災沒有應驗，標普500指數自4月初以來更反彈37%，而以往股市每年表現最好的月份是11月，今次會不會反傳統有意外？後市部署需要留意甚麼？ 高富金融集團投資總監梁偉民指，現在科技股升不停，估值亦越來越貴，開始在一個未必有長期支持的位置，出現憂慮，不過，市場氣氛完全無理會估值問題，不少大定單出現，令投資者覺得人工智能(AI)相關概念股會繼續火熱。 Wyman提醒，來到這個位置，11月要特別小心，始終美股升了一段時間，且升勢誇張，無論估值又好、企業背後是否有足夠盈利支持又好，對股市支撐都不太足夠，目前市場主要是炒氣氛，留意這個氣氛未來會否冷卻或逆轉，特別美股業績期後，市場沒有太多新消息再次推動大市。 |
|
| 梁偉民 |
2025-10-28T11:30 |
昨日(27)外長王毅跟美國國務卿魯比奧(Marco Rubio)通電話，市場樂觀情緒高漲，日股、韓股、台股先後破頂，美股3大指數及羅素2000昨晚(27日)齊破頂，但其實投資者心目中都有個底，今次會唔會係反應過大？ 高富金融集團投資總監梁偉民指，樂觀情緒升溫係合理反應，但當全球股市因為呢個因素而大升，反而要小心會唔會睇得太樂觀，雖然中美貿易談判傳黎好消息，但雙方一直以來累積慨衝突，唔係一次會面就可以解決。 Wyman又話，美方似乎開始讓步，不過，美國始終盤算緊點樣係稀土問題上，減低中國慨制約，若美國未來唔再制中國慨稀土政策，雙方好大機會再「開火」，佢估計，未來呢幾個月會較平穩，但唔代表呢個狀況可以持續至2026年底，因此，呢個風險一直隱藏係市場中，雖然短期未必會爆，但投資者仍要小心。 |
|
| 梁偉民 |
2025-10-21T11:17 |
美國政府停擺有望本周結束，美股3大指數昨晚(20日)高收，而「科技7雄」(Magnificent 7)中，終於輪到蘋果公司(Apple Inc.)破頂，據Counterpoint Research數據顯示，iPhone 17系列係內地及美國首10日銷量，按年增長14%，Apple股價破頂外，集團市值亦升至3.89萬億美元，踢走微軟(Microsoft)成為美國市值No.2企業，Apple股價係咪可以繼續上？ 高富金融集團投資總監梁偉民指，由於iPhone 17銷量好過之前兩代，股價短期有支持係合理，但值得留意係，Apple股價8月至今已累升20%，但今年以來只有單位數升幅。 Wyman又話，Apple股價主要受2個因素影響，首先係人工智能(AI)發展仍令市場失望，未消費者冇換機意欲，其次係公司估值係科技股黎講唔算好貴，但逾30倍市盈率(PE)亦唔算特別平，佢預期，Apple股價短線仍有3%至5%上望空間，但要追落後就有一定難度。 |
|
| 梁偉民 |
2025-10-14T11:23 |
美國財貝森特(Scott Bessent)最新指，中美緊張局勢已熕緩和，又話中美元首仍有機會月底係南韓會面，刺激美股昨晚(13日)顯著反彈，道指及標指彈逾1%，納指更升逾2%，但未完全收復之前慨失地。 高富金融集團投資總監梁偉民相信，市場暫時仍觀望事態發展，雖然美方言論轉趨溫和，令投資者昨日反應樂觀，但中美衝突仍處於高風險階段，尤其係稀土問題，所以要繼續關注後續發展。 Wyman又話，中國對美國慨態度強硬，唔似會輕易讓步，雙方會唔會再起衝突，關鍵落係美國總統特朗普(Donald Trump)身上，佢又話，唔排除中美緊張關係年底或明年初再度升溫。 |
|
| 梁偉民 |
2025-09-30T11:07 |
美國副總統萬斯(JD Vance)話，美國政府正步向停擺，政府一旦關門，就會影響數據公布。此外，金價又破頂，高見每盎司3800美元，到底美國政府停擺機會大唔大？應唔應該依家追入黃金？ 高富金融集團投資總監梁偉民指，要對停擺有心理準備，始終民主共和兩黨仍未傾掂數，不過，市場唔使太擔心，因為停擺對經濟、金融市場唔會造成結構性影響，重點係要睇返停擺慨時間及點收科。 投資黃金方面，Wyman就話，唔太建議係美國政府停擺危機時追入黃金，依家避險情緒唔算高漲，債息亦輕微回落，金價上升係因為去美元化，加上擔心金價短期升過龍會出現整固，所以唔建議現價追入。 |
|
| 梁偉民 |
2025-09-23T12:37 |
受大型科技股帶動，美股3大指數昨晚(23日)再創新高，連續3個交易日破頂，但早段昨晚早段曾出現過沽壓，因為聖路易聯儲銀行行長穆薩勒姆(Alberto Musalem)指，考慮到通脹仍然偏高， 進一步減息空間有限，但另一方面，美國總統特朗普(Donald Trump)親信，由佢任命慨聯儲局理事米蘭(Stephen Miran)就認為要大手減息，因為要避免經濟受損，但市場似乎仍傾向預期美國會繼續減息。 高富金融集團投資總監梁偉民指，市場的確對聯儲局繼續減息有憧憬，認為年內好大機會再減兩次息，美國今年仲有兩次議息會議，就算博其中一次減息慨機率都高，睇返最新「點陣圖」，局內官員預期年底前將減息兩次，除非通脹突然飆升。 Wyman又提醒，通脹風險絕對唔可以忽視，因通脹未來一定會反彈，但由於反彈幅度難料，所以未知會唔會阻礙聯儲局減息，另一個關鍵因素係美國就業市場。 |
|
| 梁偉民 |
2025-09-16T11:10 |
美國科技股持續強勢，「科技7雄」(Magnificent 7)當中，Tesla受大股東馬斯克(Elon Musk)大手增持刺激，股價昨日(15日)再炒高逾7%，另一隻科技股Google母公司Alphabet亦升逾4%，依家14天RSI已升至近90慨極超買水平，點睇呢兩隻科技股前景？ 高富金融集團投資總監梁偉民指，Tesla股價今年有機會破頂，但未必會不斷傳黎好消息，首先係業務基本面仍然較差，電動車銷售疲弱，估計仍未見底，其次係估值貴，依家市盈率(PE)約250倍，短線而言，雖然投資者樂觀情緒高漲，但睇唔到有咩因素可以繼續撐起股價。 Wyman又話，「7雄」中較睇好Alphabet，主要係公司估值唔貴，PE僅約20倍，雖然擔心科技股升過龍，但Alphabet仍相對平，不過，近期已累升近40%，已經比較誇張，亦相信利好因素已差唔多反映曬，短線建議投資者先食糊，等股價回調返少少時再部署。 |
|
| 梁偉民 |
2025-09-15T11:33 |
Tesla主席德諾姆(Robyn Denholm)係上周五(12日)確認，行政總裁馬斯克(Elon Musk)已完成對特朗普(Donald Trump)政府慨工作，已重返Tesla工作，又反駁界指馬斯克搞政治拖累Tesla銷量。至於Tesla股價9月至今累升18%，表現係「科技7雄」(Magnificent 7)之中最強勢，Tesla股價係咪可以繼續跑嬴？ 高富金融集團投資總監梁偉民認為，Tesla股價近期升得咁靚，可以歸功於馬斯克回歸Tesla，令股東重拾信心，為股價帶黎正面影響。不過，睇返公司基本面，Tesla銷量係全球多個地方持續下跌，當中包括中國，歐洲銷售亦明顯疲弱，因此，Tesla慨電動車發展仍未走出困局，毛利仍受壓。 Wyman又估計，由於市場憧憬集團慨無人駕駛及機械人開發，加上減息預期升溫，因此，就算唔係有好多利好消息下，Tesla股價仍然強勢，所以後市仍要小心。 |
|
| 梁偉民 |
2025-09-09T11:39 |
日本首相石破茂突然係周日(7日)宣布辭職，投資者憂慮下任首相主張寬鬆財政及貨幣政策，日圓匯價昨日(8日)向下，但日本股市持續造好，日經平均指數今日(9日)一度突破44000關，點睇日圓及日股前景？ 高富金融集團投資總監梁偉民指，日股呢兩日造好係因為市場認為換首相後，新政府將會加大財政刺激力度谷經濟，貨幣政策有機會轉為中性或放寬，甚至鼓勵日本央行減息。 Wyman又話，市場已借換新首相炒左一轉，日股升至44000點樓上，相關刺激因素已經反映曬，估計好快就會出現回調。日圓方面，由於美元今年已累跌10%，短期未必會再跌，預期日圓會係區間橫行整固。 |
|
| 梁偉民 |
2025-09-02T11:24 |
阿里巴巴(09988)放榜後被大行唱行，刺激股價昨日(1日)勁升逾18%，更推高恆生指數逾300點，重上25600點水平，不過，大市升勢其實唔算全面。恆指其實多次受制26000關，點睇港股後市？ 高富金融集團投資總監梁偉民指，港股後市未必可以再靠科技股，睇返今次業績期，造好慨科技股都係以人工智能(AI)、雲端業務為主，另一方面，由於電商競爭仍十分激烈，導致相關企業利潤率持續受壓，因此，京東集團(09618)、美團(03690)短線積弱，不過，由於A股暢旺，令H股前景變得中性。 Wyman又話，係A股火熱下，港股可以跟住一齊炒，又指可以留意晶片股、貴金屬或生物科技相關板塊，今輪有機會繼續向上，雖然估值貴，但短期仍可跟進，若之後氣氛轉弱就要吼位「落車」。 |
|
| 梁偉民 |
2025-08-29T12:43 |
美國科技股最夠份量及壓軸登場，人工智能(AI)晶片「股王」英偉達(Nvidia)已經派左季度成績表，雖然業績好過預期，但股價係榜後受壓。點睇Nvidia前景？ 嘉賓高富金融集團投資總監梁偉民指，係AI Bubble下唔應只睇Nvidia業績，更應該關注其他科技巨企慨資本投入，因為Nvidia基本人都係被動，集團可以做到幾多生意，都要睇其他科技巨企慨AI投資趨勢，如果呢些科技巨企每年繼續花幾百億，甚至乎過千億美元投資AI，Nvidia慨生意一定會繼續唔憂做。 Wyman又指，科技巨企慨AI投資暫時仍未可以變現，依家Nvidia唯一要做慨事，就係繼續保持龍頭地位，拋離競爭對手AMD，但睇返集團慨技術水平，暫時都唔會受到競爭對手嚴重威脅。 |
|
| 梁偉民 |
2025-08-19T11:49 |
市場觀望美國聯儲局主席鮑威爾(Jerome Powell)本周發表慨講話，美股3大指數昨晚(19日)變動唔大，不過，藥股表現搶鏡，包括獲「股神」巴菲特(Warren Buffett)旗下投資旗艦巴郡(Berkshire Hathaway)密密增持慨聯合健康(UnitedHealth Group Inc.)，不過，成個醫藥板塊近期好冇乜聲氣，係咪因為市場認為，係美國總統特朗普(Donald Trump)治下藥企冇運行？ 高富金融集團投資總監梁偉民指，醫藥板塊暫時未見有利好消息，特朗普更聲稱針對藥物慨關稅，或上調至200%，甚至更高，由於美國大部分藥物都唔係本土生產，一定會對藥廠造成衝擊。 Wyman又話，藥企另1個隱憂係特朗普為左減少政府開支，會控制藥價，禁止藥企加價，因此，預期美國醫藥板塊今年餘下時間繼續下跌。 |
|
| 梁偉民 |
2025-08-18T11:37 |
美國零售銷售數據上星期五(15日)已經出爐，按月升0.5%，符預期，美股3個指數個發展，依家市場全部聚焦係減息上，8月消費者情緒指數下跌，通脹預期升溫，呢些消息對減息預期有冇影響？炒減息又應該點部署？ 高富金融集團投資總監梁偉民指，雖然消費物價指數(CPI)和非農數字令減息情緒升溫，但後來生產物價指數(PPI)、零售銷售又降左，反映關稅對物價影響未完全浮現出來，無論聯儲局定市場都好，要再睇更多數據先做到判斷。 佢又話，依家經濟基本面和通脹情況多衝突，處於一個尷尬慨位置，之後年會，鮑威爾(Jerome Powell)慨演說亦未必會提出明確方向，如果炒減息要小心小型股，雖然會受惠，但減息情況始終未肯定，加上股市增幅已經反映曬盈利增幅，要小心睇仲有冇向上空間，目前值博率唔高。 |
|
| 梁偉民 |
2025-08-12T11:25 |
中美暫緩徵收對等關稅(Reciprocal Tariff)慨90日期限係今日(12日)屆滿，據白宮官員透露，美國總統特朗普(Donald Trump)已簽左行政命令，將「休戰期」再延長90日至11月初。點睇美國再延長關稅暫緩期？利好作用有幾大？ 高富金融集團投資總監梁偉民表示，仍對中美貿易戰睇法悲觀，特朗普想消除貿易逆差，但中國貨品價錢平，有成本優勢，加上面對出口高科技產品有好辣慨限制，而中方表明唔會單方面作出不平等讓利，所以要解決貿易不平衡問題絕對唔容易。 Wyman續指，特朗普再延長「休戰期」，目的係畀時間美國供應商做補貨準備，避免出現缺貨危機，佢相信美國會繼續找中國麻煩。 |
|
| 梁偉民 |
2025-08-05T10:41 |
美國上周五(1日)出爐慨非農數據為市場帶黎驚嚇，即時震散標指及納指，但昨晚(4日)3大指數大舉反撲，其中，道指收市勁升近600點，全因市場炒作減息，據Fed Watch顯示，9月減息機會已升至逾90%，到底下個月減息係咪已成定局？今年美國會減息幾多次？ 高富金融集團投資總監梁偉民指，非農數據的確令市場認為美國經濟有隱憂，聯儲局9月減息機會增加，而局方減唔減息主要考慮經濟及通脹，但佢認為，始終仍要睇返通脹慨情況，若通脹升溫一定會左右聯儲局慨決定。 Wyman又指，要留意未來1個月美國通脹點發展，因為之前都見到部分通脹數據有回升跡象，所以9月唔係百分百會減息。 |
|
| 梁偉民 |
2025-07-28T11:15 |
美股仍處於季績高峰，依家有約34%企業派左成績表，其中，Google母公司Alphabet季績好過預期，令市場對人工智能(AI)巨額投資信心大返，今個星期輪到Meta、微軟(Microsoft)公布季績，點睇今個業績期對美股整體影響？ 高富金融集團投資總監梁偉民認為，今個業績期美企業績達標機會好大，甚至可能超標，只係幅度未必好誇張，預期盈利普遍按年增長8%至10%，但佢提醒，相關利好已差唔多反映曬，所以唔會再大幅推高美股。 Wyman又話，市場憂慮美國下半年經濟轉弱，加上關稅問題未完全解決，令美國進口、零售、消費以至企業都受影響，雖然市場仍保持樂觀態度，但美股始終已升左唔少，所以未來要有更多正面因素，先可以進一步推升大市。 佢提醒，市場亦要小心判斷減息因素係咪真係利好股市。 |
|