| 評論員 |
時間 |
內容 |
標籤 |
| 關焯照 |
2026-04-17T15:54 |
美國科技股持續強勢，升勢主要集中係晶片及費城半導體指數(SOX)，並已連升12個交易日，相關板塊，包括存儲、光通訊及儲能，投資者可以點部署？ 冠域商業及經濟研究中心主任關焯照認為，其實主要同資金流動有關，今輪大跌市當中，最強勢板塊係存儲、光通訊、儲能及記憶體股，幾乎所有資金都追逐呢些板塊，因為要建設數據中心，大企業就要投放好多錢去做基建。 關博士又話，科技股都有個Pattern，就係「其他股跌，佢就破頂」，當大市跌定後，因為已經賺左唔少，就會係高位沽貨獲利，然後再買返指數股「科技7雄」(Magnificent 7)，就帶動「M7」急升。 佢續指，昨日(16日)開始，光通訊股如Lumentum，股價開始反彈，反映資金開始由指數股轉投呢類強勢股。關博士估計，未來幾日強勢股會繼續升，但由於已極度超買，要小心唔應該再追指數。 |
|
| 關焯照 |
2026-03-27T17:56 |
美國總統特朗普(Donald Trump)今個星期就中東局勢多次轉軑，市場反應一次比一次平淡，有「恐懼指數」之稱慨VIX繼續係35至36窄幅上落，明顯低於過往爆發危機時慨60至70，係咪反映市場已經唔係太擔心？ 冠域商業及經濟研究中心主任關焯照表示，雖然TACO效應仍然存在，而市場亦確實繼續跟隨特朗普慨言論波動，但效應愈黎愈短暫。佢又指，近期特朗普已反覆TACO左4至5次，早前，宣布推遲攻擊伊朗能源設施時，市場一度大幅反彈，但今次美國提出15項停火條件，又聲稱同伊朗埋檯傾，但今次市場反應非常溫和，10年期債息只係輕微下跌，反映市場對特朗普慨言論已視為「狼來了」，變得麻木，反映市場唔再相信佢慨言論。 關博士又話，係過往慨危機中，美國短債一般會表現較好，但今次已經唔奏效，意味著未來債務問題將會更棘手。佢續指，其實都睇到美國想縮，但冇一個下台階，但由於市場力量已經大過特朗普，但無論如何，佢都要係未來2至3個星期內搵到方法解決事件，令戰事平息。 |
|
| 關焯照 |
2026-03-06T15:12 |
美以伊戰事發展左右環球投資市場大局，亂局下要精準揀股絕對唔易，近期熱炒慨電力設備股，例如東方電氣(01072)、哈爾濱電氣(01133)，以及人工智能(AI)相關股濰柴動力(02338)係咪可以繼續睇好？ 冠域商業及經濟研究中心主任關焯照表示，由於內地要持續發展AI，AI數據中心需要龐大慨電力供應，加上有「以舊換新」等政策支持，設備需求較大，所以見到過去幾季，電力設備股表現亮麗，值得留意係，東方電氣依家可以從外國客戶拿到定單，令定單量急增，因此，預期股價未來會持續強勢。 關博士又話，濰柴近年重新專注電力設備業務，加上儲能方面出現突破，尤其氫氣、電池等，令集團慨電力設備基礎性變強，雖然現時股價相對落後，但相信未來會轉強。 |
|
| 關焯照 |
2026-02-20T15:25 |
今日(20日)係港股馬年第一個交易日，可惜未能紅盤高開，恆生指數一度挫逾300點，重磅科技股弱勢，其中，騰訊控股(00700)、阿里巴巴(09988)、百度集團(09888)、網易(09999)及快手(01024)跌至最少1個月低位，不過，地產收租股及國產人工智能(AI)概念股買盤好勁，大股唔得，指數又弱，馬年開局似乎都考起唔少散戶？ 冠域商業及經濟研究中心主任關焯照指，恆指支持位暫時係50天及100天線交匯點，依家市場冇乜特別消息，A股又「放假」，現時外圍擔心美國向伊朗發動軍事行動，加上美股近期回落，恆指都會受外圍情緒影響。佢補充，依家大股冇乜動力，投資者可以觀望下周三(25日)發表慨《財政預算案》，同埋3月召開慨「兩會」有冇重磅政策出台，為市場帶黎新刺激。 關博士又話，雖然港股慨大型科企都有投資AI，但市場擔心可能會步美國「科技7雄」後塵，擔心資本開支(CapEx)慨盈利轉化能力，再加上內需疲弱兼有「內捲」問題，短線而言，建議盡量避開呢類股份，轉向一些容易炒慨板塊。 |
|
| 關焯照 |
2026-02-06T16:03 |
美股3大指數昨晚都要跌，其中，納指已連跌3日，今年更由升轉跌，雖然美國經濟有轉差跡象，地緣局勢又不穩，但內需股相對強勢，呢類股份係咪值得跟進？ 冠域商業及經濟研究中心主任關焯照博士認為，其實已經有部分資金轉戰內需股，例如Dollar General呢類有折扣慨舖頭，股價其實一直有得升，Johnson & Johnson亦升左唔少，而GAP更升上近期高位。 關博士解釋，呢些都係消費及醫藥股，如果有資金流入，係股市震盪時一般都會升，佢又話，內需股其中一個賣點係有好高防守力。 |
|
| 關焯照 |
2026-01-23T18:03 |
日本首相高市早苗今日(23日)宣布解散國會，提前下月舉行大選，市場料有利她日後推行寬鬆政策，加重日本債務負擔。日本債券被拋售，債息急升。日本10年期債息一度升至2.35厘，近日稍微回落，但央行今日調升通脹預測，令加息預期升溫，10年期債息再回升。不少人擔心日本債市會爆，日債息急升會影響美國債息等，投資者有什麼要留意？ 冠域商業及經濟研究中心主任關焯照指，日本過往維持債息0水平多年，現在息口逐步提升，因為近年日本通脹攀升，加息壓力令長債息上升。另外，高市早苗贏面大，又稱會推行擴充性財政政策，日本政府開支增加，加大發債也是原因之一。 關博士表示，不擔心日本債市爆煲，事關日本老齡化嚴重，60歲或以上人口是最有錢的一群，他們的資產以現金為主，有買長債的需求，而且日本人愛國，90%以上國債由日本國民持有，相信不會對本土經濟不利。 |
|
| 關焯照 |
2026-01-09T15:58 |
踏入2026年，港股拿完頭彩之後，似乎無以為繼，1月首3個交易日累升千點，但之後連續兩個交易日回套，累跌逾500點。雖然內地最新通脹數據符預期，令通縮憂慮略為紓緩，但港股仍然彈唔起，但恆生指數暫時仍可企穩26000關樓上，港股要出現突破欠缺咩關鍵因素？ 冠域商業及經濟研究中心主任關焯照表示，依家港股市盈率(PE)約13倍，雖然估值較外圍市場低，但估值低唔代表有買入價值，投資者更著重市場增長動力，現時港股欠缺強勁慨企業盈利支持，同埋鮮明慨投資主題。 關博士又指，市場估計，港企今年盈利增長介乎7%至9%，相比之下，美國企業增長強勁得多，佢認為，除非出現突發性利好因素，例如美國聯儲局減息幅度超預期，或者內地有政策因素利好香港，否則，單靠A股上升或小幅減息，港股好難大升向上突破。 |
|
| 關焯照 |
2025-12-19T15:26 |
美國勞工統計局昨晚(18日)出左11月消費物價指數(CPI)，按年升2.7%，低過市場預期，不過，有唔少市場分析指，通脹爆冷急降溫同政府停擺有關，原因係收集唔到數據，令數據參考價值性不足，點解讀上月CPI數據？ 冠域商業及經濟研究中心主任關焯照指，經濟數據當然以最新數字為準，所以10月份數據已冇乜參考價值，美國政府11月上旬結束停擺，有足夠時間收集數據，整體通脹本身就處於一個「down trend」狀態。 關博士又話，美國通脹會逐步受控，重返一個溫和增長趨勢，CPI唔係一個政策性通脹目標，而個人消費支出物價指數(PCE)較聯儲局預期行得快，變相比多左空間聯儲局減息。 |
|
| 關焯照 |
2025-12-05T14:54 |
美國聯儲局將於下周議息，市場預期好大機會減息0.25厘，相信會利好股市表現，之後就輪到日本央行議息，依家加息預期明顯升溫，兩大央行議息結果會點影響市場？ 冠域商業及經濟研究中心主任關焯照認為，日央行係有機會加息，但加幅唔會考慮市場反應，上次日圓拆倉潮拖累日股單日暴瀉幾千點，若日圓急速下滑一定會影響全球股市。佢又話，上了寶貴一課後，相信日央行會更懂得管理市場期望，所以日圓未來會逐步轉強，唔使太擔心加息會引爆拆倉潮。 美國息口方面，關博士就話，要留意聯儲局主席鮑威爾(Jerome Powell)慨言論，尤其近日美國勞動市場疲弱，相信聯儲局會以勞動市場風險為主軸去平衡美國通脹，因此，預期明年減息次數應多於1次。 |
|
| 關焯照 |
2025-11-21T14:54 |
美股昨晚(20日)又林，仲要單日轉向，如果睇返納指100已自高位回落近5%，值得留意係，今次支大陰燭同10月10日那次跌市有些相似，都係當日跌完又升過，點睇今輪跌浪，會唔會依家先係林市慨開始？ 冠域商業及經濟研究中心主任關焯照指，10月10日業績期仲未開始，所以些人都唔敢沽落去，翌日就彈返上去，開始冚倉夾返上去兼破頂，但今次就有少少特別，因為英偉達(Nvidia)都出左業績，加上大市係高位行左咁耐，一般都會借業績好消息出貨。 關博士續指，依家估值過高之餘，又擔心人工智能(AI)泡沫，標指市盈率(PE)高過10年平均，所以就借勢調整，而AI概念股更被「腰斬」，跟住就輪到「科技7雄」(Magnificent 7)，但蘋果公司(Apple Inc.)跌得唔多，因為佢冇AI。佢又話，今輪跌市主要受去槓桿等3個因素影響。 |
|
| 關焯照 |
2025-11-05T16:34 |
美國高估值科技股大跌，市場關注美國最高法院周三(5日)審理美國總統特朗普(Donald Trump)實施「對等關稅」是否合法，加上聯邦政府進入第36日停擺，各種不明朗因素影響下，美股科技股可如何部署？ 冠域商業及經濟研究中心主任關焯照指，法院審理關稅案非常值得關注，如果對等關稅被判不合法，會增加美股不確定性，已收取的關稅要退回各國，但另一方面可減輕通脹壓力，令聯儲局有更大減息空間。不過若判為合法，意味對等關稅塵埃落定，可減低美股的不確定性，只要英偉達(Nvidia)業績造好，可帶動美股科技股升勢，但通脹壓力仍會阻礙聯儲局減息，不利經濟前景。 關博士又指，相信未來兩至三年Nvidia的增長加快，加上持續與不同公司合作，可考慮趁低吸納。 |
|
| 關焯照 |
2025-10-17T16:21 |
美國兩間地區性銀行Zions Bancorp(齊昂銀行)及Western Aliance Bancorp(西聯銀行)披露左涉及欺詐、壞帳慨貸款問題，需進行大額撥備，令市場擔心地區銀行爆煲危機再現，加上中美緊張關係，又憂慮科技股估值過高，以及市寬唔夠闊，升勢愈黎愈集中，美股今季表現係咪要睇得審慎些？ 冠域商業及經濟研究中心主任關焯照指，唔會改變標指年底見6800點慨目標，依家市場由人工智能(AI)革命主導，加上普遍大型銀行第3季業績相當理想，只係依家美國銀行股股價炒得太高，業績期撞正地區性銀行慨問題，正好係價格回調慨契機，但業績期有價格波動慨風險，投資者宜酌量減磅。 關博士又指，市寬唔係影響市況慨因素，市值較高慨公司都係做AI相關工作，持有資金亦比較多，股價升時自然會帶動市場。 |
|
| 關焯照 |
2025-10-10T15:32 |
今個星期初，市場再出現質疑人工智能(AI)投資回報慨聲音，摩根大通行政總裁戴蒙(Jamie Dimon)比左個溫馨提示，叫市場及投資者小心AI泡沫。到底有冇出現AI泡沫，第4季應唔應該加倉？ 冠域商業及經濟研究中心主任關焯照認為，AI熱潮仍未退卻，而係岩岩開始，佢形容係一場革命，呢類股份未來會呈震盪上升格局，雖然升得快，但唔需要擔心，因為之後會逐步自行修正，亦唔存在所謂慨泡沫。 美股方面，關博士估計，業績期結束後，大市將會出現調整，之後會再發力向上，不妨等標指由6700點調整至6400點，再睇下邊類板塊硬淨，到時再考慮入市或加倉。 |
|
| 關焯照 |
2025-09-26T16:14 |
美股估值一直偏高，尤其係科技股，納指市盈率(PE)最新高達35倍，近來美國科技巨企有互相投資及入股慨動作，到底呢些科企巨無霸結盟會唔會造成泡沫？還是係建立緊一個人工智能(AI)生態圈？ 冠域商業及經濟研究中心主任關焯照認為，唔需要太擔心納指PE高，因為AI市場仍處於成長階段，先行者如「科技7雄」(Magnificent 7)會最先「收成」，由於市場預期市長快速增長，股價必定會被推高，令納指PE行得好快。 對於呢些科企巨無霸結盟，關博士認為，現階段屬於正常發展，因為AI市場都需要有先行者打好基礎，後來者學習及拉近差距，甚至好似當年蘋果公司(Apple Inc.)，完全改變行業生態，佢又認為，真正慨「科技股王」仍未出現。 |
|
| 關焯照 |
2025-09-19T16:38 |
美國聯儲局日前啟動左今年首次減息，刺激美股3大指數連同反映中小型股表現慨羅素2000指數齊齊破頂，大市似乎形勢大好，第4季可唔可以延續升勢？ 冠域商業及經濟研究中心主任關焯照指，雖然幾個指數齊破頂，但其實絕對唔平均，其中，羅素2000仍然係大落後，今次聯儲局減息符合預期，但只係一種保險做法，反映美國經濟仍有韌性，減息主要係一個平衡作用。 關博士又話，美國企業盈利理想，加上人工智能(AI)推動，相信美股升勢可延續至第4季，雖然「三巫日」(即股票期貨、股票指數期貨及個股期貨同時到期)會有少少技術波動，但都屬於正常，始終整體大市趨勢向上，建議有貨慨投資者，可以考慮「慢慢坐」。 |
|
| 關焯照 |
2025-08-29T16:13 |
恆生指數今個星期一度迫近26000關，再衝上4年高位，但美團(03690)交出一份令市場驚嚇慨業績後，拖累恆指掉頭向下，冠域商業及經濟研究中心主任關焯照早前將恆指目標定係26500點，依家需唔需要調整？ 關焯照指，港股受惠於A股強勢，4月至今A股升幅相當理想，過去1年，上證綜合指數累升約35%，恆指更累升約40%。佢又話，內地股市造好，加上資金持續流入及減息，理論上港股仍然有運行，雖然美團業績差過預期令市場大失信心，但美團係恆指慨比重只佔約4%，所以影響唔大。 關博士又相信，匯豐控股(00005)、中國移動(00941)能夠向上，友邦保險(01299)有維穩動作，如果內銀出完業績後可以企穩，恆指未來幾個月有機會向上，因此，26500點呢個目標年底前仍有機會達到。 |
|
| 關焯照 |
2025-08-15T15:55 |
美國7月消費物價指數(CPI)及生產物價指數(PPI)已先後出爐，正當市場以為CPI數據令聯儲局9月減息機會大增之際，PPI升幅爆冷遠超市場預期，或令8月CPI急升，點解7月PPI高過市場預期咁多？月初非農數據公布後，美股出現波動，但3大指數昨晚(14日)表現冷靜，係咪相比通脹，市場更擔心勞工市場慨情況？ 冠域商業及經濟研究中心主任關焯照指，7月PPI可以睇到關稅慨影響，尤其係原材料大幅加稅後，佢又指，CPI走勢要視乎企業會唔會將關稅成本轉嫁畀消費者，但係經濟環境欠佳時，企業就會諗辦法自己「啃」關稅，例如用人工智能(AI)技術降低成本，所以8月CPI未必一定大升，現時數據模型預測，美國通脹會升0.3%至0.4%。 關博士又提及，勞工市場數據滯後，亦好影響消費情緒，所以比通脹更能反映經濟，雖然勞動市場情況較2、3年前有改善，但仍然唔係一個理想水平。 |
|
| 關焯照 |
2025-08-01T15:39 |
今日(1日)係美國對等關稅(Reciprocal Tariff)「大限」慨大日子，美國總統特朗普(Donald Trump)已簽左行政命令，向69個貿易伙伴徵收10%至41%關稅，將會係7日後生效，不過，加拿大關稅就加到35%，到底仲有冇得傾？對市場氣氛有咩影響？ 冠域商業及經濟研究中心主任關焯照指，大部分國家慨關稅已經落實，一些未傾掂數慨國家就被徵收較高關稅，當中有「懲罰」意味，由於加拿大政府慨代表態度強硬，所以最終關稅稅率仍然係未知之數，但特朗普都要考慮通脹壓力問題，所以最終稅率有機會係25%或以下。 關博士又指，整體稅收水平明顯較以往高，亦符合特朗普政府希望改善財赤慨目標，雖然政策短期有助改善財政狀況，但長遠有機會影響同盟友慨關係，貿易政策變左戰略工具，令其他國家對美國戒心更大，或會減少跟美國慨貿易比重。 |
|
| 關焯照 |
2025-07-11T15:45 |
人工智能(AI)晶片龍頭英偉達(Nvidia)市值，昨日(10日)收市首次升穿4萬億美元，更成為美國首家市值突破呢個水平慨企業。自美國總統特朗普(Donald Trump)係4月2日宣布對等關稅(Reciprocal Tariff)以黎，Nvidia市值已累升48%，呢隻AI晶片股王「身價」可唔可以更上層樓？ 冠域商業及經濟研究中心主任關焯照指，Nvidia市值到現水平，短期好難再急升，但集團仍有增長空間，計返大行畀Nvidia慨目標價平均約180美元，現價就係160美元水平，即係仲有逾10美元上升空間。 關博士續指，Nvidia市值會慢慢再升，雖然美股之中仍有一些單日可以大升逾10%慨股份，但Nvidia相比其他公司，除左生態圈較強，亦主導AI發展，所以論安全性，都係建議揀返Nvidia。 |
|
| 關焯照 |
2025-07-04T16:47 |
金融管理局係短短1個星期內，4度出手買入港元，累計接左591億港元沽盤，由於資金流出港元，恆生指數今日(4日)一度瀉逾300點，之後係科技股帶動下，一度重上24000關，由於港股市底唔算太差，資金都繼續買貨，近期較偏好高息股，息率6厘以上兼穩定派息慨股份，係咪可以睇高一線？ 冠域商業及經濟研究中心主任關焯照指，唔排除未來幾個月係美元轉弱下，會短暫推高恆指，不過，早前有大量資金流走令市場氣氛轉差，雖然阿里巴巴(09988)及阿里健康(00241)今日受消息影響異動，但由於A股表現唔錯，可以為港股帶來一些支持。 關博士又話，資金偏好香港電訊(06823)、恆生高息股(03466)等高息股，尤其係美國減息預期下令息差擴闊，資金有好大誘因流入呢些股份。 |
|
| 關焯照 |
2025-06-20T15:37 |
以伊戰亂、關稅戰及俄烏戰事相繼惡化，雖然面臨呢3個重大不明朗因素，美股表現仍然硬淨，其中，標指更出現黃金交叉訊號，而每次出現呢個情況，美股都會輾轉向上，係咪意味美股有機會破頂？港股方面，恆生指數上半年曾突破24000關，下半年有冇機會再推高些？ 冠域商業及經濟研究中心主任關焯照指，自1980年以黎，美股出現過14次大幅調整慨熊市，每次係低位反彈都出現20天線升穿200天線慨情況，大市都錄得可觀升幅，甚至破頂，用黃金交叉計，每次最少升逾20%，最多更高達60%至70%，雖然依家離低位過千點，但根據過往經驗，相信美股仲有上望空間，破頂機會亦非常高，想打安全牌慨投資者，可以選擇買交易所買賣基金(ETF)。 港股方面，關博士指，恆指依家已經係23000點水平，認為上望空間唔大，雖然下半年應該可以爬返上24000至25000點，但要升上更高水平，就要有中央慨新經濟政策推動。 |
|
| 關焯照 |
2025-06-06T16:13 |
國家主席習近平跟美國總統特朗普(Donald Trump)昨日(5日)通話氣氛唔錯，但市場似乎冇乜反應，始終對話未有實質內容，市場普遍預期，中美談判唔會咁快有結果，加上特朗普處事太反覆，市場擔心會再出現變數。另一方面，Tesla行政總裁馬斯克(Elon Musk)炮轟減稅法案《大而美法案》(One Big Beautiful Bill Act)，導致兩人決裂，特朗普威脅終止馬斯克旗下公司慨政府合約，導致Tesla股價昨晚大林，市值單日蒸發逾千億美元，點睇美股6月表現？ 冠域商業及經濟研究中心主任關焯照指，特馬不和短期對Tesla肯定冇好處，依家股價正反映緊呢個不明朗因素，因為唔知特朗普會唔會再出招對付馬斯克，不過，廢除減稅法案亦唔係一個好主意，雖然減稅法案會增加債務及財政負擔，但冇左呢個法案，特朗普可能會出另一招，不確定性會更大。 關博士估計，美股已見底，暫時已經脫險，但短期將持續波動，可唔可以破頂要視乎標指企業盈利表現，同埋美國之後會唔會推出利好美股慨政策。 |
|
| 關焯照 |
2025-05-23T16:15 |
1個月拆息今日(23日)一度跌至0.58厘，市場認為，拆息回落同資金預備認購大型新股寧德時代(03750)有關，寧德時代上市後，新股接連有好表現，係咪代表認購寧德時代慨資金有意接力抽其他新股？ 冠域商業及經濟研究中心主任關焯照指，美國政策帶來慨不確定性，令美元資產需求減弱，資金就會流入其他市場，包括亞洲區，香港只係其中一個受惠慨市場，所以資金流入同香港本身慨優勢冇關。 關博士又話，資金流入香港會推低拆息，有助市場資金流動性，以及帶動市場氣氛，但佢認為，流入香港慨資金未必全部都同抽新股有關。 |
|
| 關焯照 |
2025-05-15T11:02 |
美國總統特朗普(Donald Trump)率領科技企業代表團出訪中東，成功簽左好多大Deal，市傳英偉達(Nvidia)將會向中東國家出售大量先進人工智能(AI)晶片，晶片企業似乎係今次中東之旅慨大贏家，係咪可以帶挈相關股份再展升浪？ 冠域商業及經濟研究中心主任關焯照認為，Nvidia股價逐步破頂主要係近日走強，主要受市場利好消息及risk on mode推動。佢又認為，今次係中東拿到大生意係時機問題，因為呢些國家現時有龐大慨科技需求。 關博士續指，投資者毋須擔心Nvidia業績，因為今次係中東接到慨額外定單，業績慨利好預期可以持續至明年，佢又估計，Nvidia股價仍有上升空間，但要升穿高位有難度。 |
|
| 關焯照 |
2025-05-09T15:43 |
美國昨晚(8日)同英國達成今輪貿易戰以黎首份貿易協議，帶動美股3大指數隔晚一度大升，收市升0.5%至逾1%，升幅收窄係受富人稅消息拖累，中美今個周末就會展開貿易談判，會點反映係美股身上？會唔會好似英美一樣傳黎好消息？ 冠域商業及經濟研究中心主任關焯照指，美英達成今輪貿易戰首份協議，市場認為氣氛好轉，但英國唔係美國主要入口慨貿易伙伴，所以重要性唔大，投資者唔好將美英協議睇得太重。 關博士又話，依家中國係美國第2大入口國，所以要達成協議慨難度幾高，timing上係對美國不利，因為特朗普(Donald Trump)慨民望愈黎愈低落，加上唔可以將關稅拖延到中期大選之後，最少要係明年初之前同中國傾掂數，所以有好大迫切性，佢估計，美國最後只會向中國貨品加徵20%至25%關稅。 |
|
| 關焯照 |
2025-04-25T15:48 |
美股幾乎重返4月初特朗普(Donald Trump)政府公布關稅詳情慨水平，雖然市場對中美關稅談判有唔同揣測，但近期慨消息明顯紓緩投資市場對關稅戰持續惡化慨憂慮，而特朗普近期慨態度，似乎反映佢係關稅問題上有軟化跡象。此外，據《彭博》最新報道，中國考慮豁免部分美國進口貨反制關稅，包括醫療設備、乙烷等化工原料，睇返關稅戰最新發展，再睇埋美股3大指數近日走勢，美股係咪已經脫險？ 冠域商業及經濟研究中心主任關焯照指，其實中美「一刀切」只會令雙方利益受損，佢相信中美會進行貿易談判，而呢類消息可大大紓緩市場恐慌情緒。 值得留意係，美股幾個主要指數如納指、羅素2000及標指，最少連續兩日企係20天線樓上，已經去返一個比較安全慨地帶，佢又認為美股會慢慢回穩。 |
|
| 關焯照 |
2025-04-17T10:24 |
聯儲局主席鮑威爾(Jerome Powell)昨晚(16日)指，關稅可能令通脹升溫及經濟增長下降，坦言對局方帶黎挑戰，但佢冇就今年利率走向作出任何暗示。如果睇返鮑威爾昨晚慨言論，聯儲局緊急減息都應該唔使諗，現階段係咪要避開美元資產？ 冠域商業及經濟研究中心主任關焯照指，依家慨情況未需要急於減息，因為經濟數據仲未出，尤其近期慨通脹數據低過預期，雖然預期通脹未來有上升壓力，加上美元轉弱，雖然有入口通脹會令人擔心，但實際上消費信心會唔會令經濟轉差，因為密歇根大學消費信心指數大幅下滑，呢個係一個衰退水平。 關博士又話，依家有兩個問題，首先係預期通脹升上高水平，其次係失業率飆升，會慢慢形成滯脹風險，不過，呢個唔會係一個極大風險，但當失業率大升及好多企業破產時，聯儲局就要緊急減息，但就算未來一至兩季減息，幅度及次數都唔會好多。 美元資產方面，佢認為，若特朗普(Donald Trump)政府慨政策繼續擺動性咁高，投資者一定會失去興趣。 |
|
| 關焯照 |
2025-03-28T16:05 |
美國總統特朗普(Donald Trump)將會係下周三(4月2日)公布新一輪關稅措施，政策公布前，市場充斥不確定性及憂慮，對美股後市有咩影響？上半年個頂係咪已經見左？ 冠域商業及經濟研究中心主任關焯照認為，美股應該已見頂，依家最大問題係業績期就快殺到，而市場對政策慨不明朗慨憂慮太大，所以大部分企業慨業績指引都比較保守，其中，聯邦快遞(FedEx)下調左全年指引，美國達美航空(Delta Air Lines)就調低首季收入及盈利預測，企業指引保守一般都會拖低股價。 關博士續指，就算係過去兩年表現強勁慨「科技七雄」(Magnificent 7)，股價都要受壓，暫時表現最強勢慨Facebook及Instagram母公司Meta，股價都只係可以守住600美元，所以整體美股都因為業績期來臨而變得唔太樂觀，現階段係易跌難升。 佢又話，依家最重要係4月2日公布慨新關稅政策，如果同之前差唔多，投資者憂慮細左，美股有機會輕微反彈。 |
|
| 關焯照 |
2025-03-14T17:35 |
美國今晚(14日)將會公布3月密歇根大學消費者信心指數初值，市場預期數據將會向下，要留意對已經「見熊」慨美股有咩影響。此外，雖然納指已跌入調整區，但昨晚(14日)英偉達(Nvidia)及軟件公司Palantir股價冇跟納指100破底，係咪預示納指有機會出現超賣反彈？ 冠域商業及經濟研究中心主任關焯照表示，指數已嚴重超賣，係有機會反彈，如果今晚公布慨數據差，就「撳佢一下」，然後趁勢平倉，今日已經係星期五，如果期權借數據「隊落下」平倉，再部署技術性反彈，首先係比美國總統特朗普(Donald Trump)一個警號，就係市民信心開始轉差，通脹預期仍然係升，佢就好難解釋，跟住就可能會「鬆手」，所以呢個Weekend有可能講返一些比較溫和慨說話。 Nvidia方面，關博士就話，納指100近期破底，但Nvidia股價係升，Palantir亦冇跌穿之前個底，反而開始有些穩定，呢兩隻股王應該對市況有幫助。至於台積電(TSMC)市盈率(PE)已跌到17倍，投資者可以留意返一些有實力、穩定慨股票，呢幾隻博反彈都可以考慮。 |
|
| 關焯照 |
2025-02-28T15:47 |
「科技7雄」(Magnificent 7)之一慨Tesla，佢慨創辦人馬斯克(Elon Musk)帶領美國「政府效率部」(DOGE)，大刀闊斧兼手起刀落削政府開支，早前宣布慨裁員行動已惹怒唔少美國人，就連歐洲方面對佢慨好感度都急跌，為Tesla業務帶黎慨負面影響逐步浮現，除歐洲銷量大跌，股價今個月已累跌近30%，市值累計蒸發3900億美元，有貨慨投資者應唔應該沽出？ 冠域商業及經濟研究中心主任關焯照指，馬斯克做左一些其他人唔認同慨舉動，例如美國國內慨裁員潮，同埋佢干涉歐洲政治，惹黎歐洲民眾強烈不滿，導致Tesla係歐洲銷量暴跌，佢相信，就算美股可以企返穩，Tesla都會繼續跌，加上基本因素唔好，公司都要面對通脹風險，所以Tesla係「7雄」中跌得最甘，又認為短期內都不宜沾手。 關博士建議投資者可以考慮反手部署，例如T-Rex 2X Inverse Tesla Daily Target ETF(TSLZ)等逆向型產品，但投資者必須控制風險，始終Tesla仲未跌完。 |
|
| 關焯照 |
2025-02-14T16:09 |
DeepSeek引爆港股今輪升浪，恆生指數昨日(13日)一度衝破22000點關口，但其後係高位回套，最終由飆逾600點變倒跌完場，但今日(14日)再度發力，迫近22600點，仲升穿昨日高位，港股今輪升浪會持續幾耐？ 冠域商業及經濟研究中心主任關焯照指，呢個係等左一段短時間慨調整，過去1個月恆指累升逾3000點，期間冇乜回套，所以今次即日回套都會令投機者知驚，而一些權重股都有回落，例如騰訊控股(00700)、阿里巴巴(09988)等，昨日慨回調都算係一次健康調整。 關博士又認為，就算冇DeepSeek，港股都會係低位反彈，因為一般係「兩會」前，市場都會有政策憧憬，呢段時間慨人工智能(AI)發展只係令大市彈多些，佢又估計，今輪升浪最少持續至「兩會」前，不過，如果「兩會」期間指數升得太多，中央可能會減低政策慨力度，因為內地股市近期偏向「慢牛」，所以到時會出現更大幅度慨回套。 |
|
| 關焯照 |
2025-01-24T16:23 |
美國總統特朗普(Donald Trump)最新表示，如非必要唔會加中國關稅，市場解讀得非常正面，但仍要等到2月1日先有最終決定，下星期就係農曆新年長假，港股下周只有1日半市，港股放假期間，美國有唔少大事件，「科技7雄」(Magnificent 7)會出業績、聯儲局議息及關稅死線，投資者應該點部署？ 冠域商業及經濟研究中心主任關焯照認為，投資者唔需要「減磅」過年，因預期大市係農曆新年長假前好會有得升，除非大市已見頂，依家恆生指數係20000關上落，有貨慨投資者可以等過年後，等港股復市睇定些再做決定。 美股「7雄」業績方面，關博士話，唔需要太擔心，因為現時美股慨權重股如金融股等，交到好業績後，股價炒上後都冇回落，呢個主要同美國總統特朗普正式上場有關。 佢續指，「7雄」之中，Meta、亞馬遜(Amazon)、Google都會係業績前炒起，市場預期呢些公司業績唔會太差，唯一要擔心係蘋果公司 (Apple Inc.)，因為昨晚(23日)納指自低位反彈，但Apple都跟唔上，市場普遍認為，Apple已經冇新意，手機銷售又唔理想，除非公司有重大消息或產品發布，股價先有望出現突破，否則，唔建議投資者持有。 |
|
| 關焯照 |
2025-01-03T16:24 |
美匯指數持續強勢，今日(3日)一度升穿109水平，美國總統當選人特朗普(Donald Trump)將會係2025年1月20日上任，意味加中國貨關稅慨日子愈黎愈近，呢些因素都不利人仔，究竟應該點投資好？ 冠域商業及經濟研究中心主任關焯照指，特朗普本身就係最大不明朗因素，因為佢所有政策都會推高通脹，不利股市。佢又話，美元強勢係因為長息扯高，而長息升意味通脹預期轉強，亦代表投資者沽美國長債，但仍持有美元。值得留意係，美元強勢亦同歐元疲弱有關，歐元兌美元已失守1.03。 關博士認為，短期而言，係美元強勢下，亞洲股市都應該冇乜運行，而隨著特朗普上任，好多消息及政策都會落實，政策細節會逐步曝光，睇返大環境係對港股及A股不利，因為美國係唔會「放過」中國。佢建議投資者可以考慮保守型股票，但要係內地推政策後立即行動，如果唔想跟咁貼，就可以考慮防守型板塊。 |
|
| 關焯照 |
2024-12-20T15:44 |
據聯儲局最新「點陣圖」顯示，美國明年有可能只減息兩次，每次0.25厘，即時震散美股，當晚道指急瀉逾點，但昨晚(19日)已經喘定，收市升15點，扭轉連跌10個交易日慨劣勢，係咪反映市場已消化聯儲局或放慢減息步伐呢個消息？ 冠域商業及經濟研究中心主任關焯照指，市場已消化左部分有關減息慨消息，美股今輪調整黎得比預期快，佢認為，美股之後大升慨機會唔高，始終黎緊仲有好數據，都會影響整體大市表現，包括今晚(20日)出爐慨核心個人消費支出(PCE)，如果數據超預期，相信美股仍有下調壓力。 關博士又指，「點陣圖」其實係向特朗普(Donald Trump)發警示，暗示佢要重新審視加息慨諗法，今次只係釋出局方明年有機會放慢減息步伐，市場已經咁大反應，而特朗普一向好重視美股表現，若聯儲局加息有機會拖林美股，呢個亦係局方「放鷹」慨原因之一。 |
|
| 關焯照 |
2024-12-06T17:39 |
港股今日(6日)突然好興奮，半日成交已超過800億元，一度上返19900點樓上，市傳中央經濟工作會議下周三(11日)及下周四(12日)召開，市場係咪又開始炒政策憧憬？2024年只剩返10幾個交易日，恆生指數有冇機會黎個「最後衝刺」上返20000點？ 冠域商業及經濟研究中心主任關焯照認為，恆指上返20000點結束2024年機會唔大，反而有可能係中經會前見返2字頭，有機會上返50天線水平，即20300點水平，但睇返「往績」，開完中經會之後，大市就會插水，曾經試過會後兩個星期累跌逾3000點，佢估計，今次都會出現呢個情境，會前炒政策憧憬，會後就急散水。 關博士提醒，一旦恆指真係上返20000點水平唔好再追，因為之後有機會返落19000至19300點。 |
|
| 關焯照 |
2024-11-22T16:37 |
金融科技公司SoFi Technologies(SOFI.US)股價靠人工智能(AI)技術，今年已累升逾50%，到底AI為公司帶黎咩好處？此外，比特幣(Bitcoin)持倉大戶，狂掃Bitcoin慨企業軟件商MicroStrategy(MSTR)股價，係Bitcoin價格升唔停之下，股價昨晚(21日)突大林逾16%，原來畀沽空機構香櫞研究(Citron Research)狙擊，投資者應對點應對？ 冠域商業及經濟研究中心主任關焯照解釋，SoFi本身係做學生貸款生意，有左AI可以幫公司挑戰更合適慨借貸對象，令拖欠比率顯著下降，加上SoFi開始發展金融借貸服務，產品種類大增，現時AI商業應用比例已達27%，相信未來仍有好大上升空間。 至於MSTR，關博士就話，Bitcoin已出現史上最大泡沫，MSTR股價之前急升，係靠槓桿出售Bitcoin，股價昨日因被香櫞狙擊而急挫，反映公司易受消息影響。佢又提醒，若Bitcoin價格繼續升，MSTR短期仍可保持強勢，但當Bitcoin價格見頂，股價就會急插，形容投資者要「食得咸魚抵得渴」。 |
|
| 關焯照 |
2024-11-08T17:06 |
軟件公司Palantir(PLTR)公布季度業績後大升20%，隔晚(7日)高位一度升至56.47美元，第3季收入比預期高3%，第4季指引收入就比市場預期高3%，其實季績比預期高出不算多，但市場反應相當正面，當中原因為何？投資者又應否這個時候入手？ 冠域商業及經濟研究中心主任關焯照指，主要由於公司目前有多個包括微軟(Microsoft)等的大型客戶，加上利用人工智能(AI)提升企業決策效率，所以市場對公司未來數季業績有頗大憧憬，前景可期。 關博士預料Palantir股價會在隔晚收市55.88美元這個水平徘徊一、兩日，即使出現回套，幅度亦不會多，因為股份在績前曾經急挫，不少人因此離場，不過公布業績之後股價反應出乎意料地正面，但投資者已經難以追貨，他又形容此股份是「AI產品界中的英偉達(Nvidia)」，股價雖較之前貴，但仍然值得考慮入手。 |
|
| 關焯照 |
2024-10-25T16:45 |
受惠於中央自9月底頻頻出招救市，恆生指數曾衝上23000點，但之後無以為繼，更一度失守20000點。美國總統大選已進入倒數階段，選情及結果點影響港股後市？ 冠域商業及經濟研究中心主任關焯照認為，港股衝高後回調慨幅度比預期大，有機會係炒港股慨投資者係大市仲升緊時已經獲利離場，然後再吼低位買貨，令港股冇辦法再衝高。佢又話，未來兩周會有美國大選及議息會議等事件，所以港股要等2至3周後，先可以掃除不明朗因素，估計11月中前，港股會係20000點至21100點上落。 關博士續指，內地未來有機會再出大招救經濟，恆指年底前有機會上試21600點，即較現水平仲有約5%上升空間，明年就要留意可唔可以衝破22700點，呢個亦係過去2至3年慨阻力位。 |
|
| 關焯照 |
2024-09-27T18:47 |
自從周二(24日)內地3大金融部門出招後，港股升勢幾乎無停過，今日(27日)半日成交額已經超過2300億，下午更破港股成交額紀錄，收市前已經突破4000億，今次升勢強勁，短線升勢可以延續？阻力位及支持位在甚麼水平？ 冠域商業及經濟研究中心主任關焯照指，恆指短時間內衝破前高位19700點，亦有成交量配合，近幾日成交量都比今年4月恆指向上時的成交量高，如果今日(27日)出現回調亦不足為奇，因為恆指短短幾日已經有超過2000點升幅，是非常強勁的升勢，估計20000點至20200點會出現支持位，而短期阻力大約處於21000點，之後要一段短時間橫行後才能破頂，突破後第4季可以上望22500點。 |
|
| 關焯照 |
2024-09-13T17:32 |
美國聯儲局將於本港時間下周四(19日)凌晨公布議息結果，依家市場對減息幅睇返有分歧，但睇返最新利率期貨，減0.25厘慨機會約70%，減0.5厘就約30%，似乎大手減息慨機會仍較細。港股投資者係議息會議前後應該點部署？ 冠域商業及經濟研究中心主任關焯照指，現時美國通脹仍略高於預期，所以減息0.25厘息慨機會較大，但唔排除今年會合共減息1厘。 關博士又話，若港股係議息前造好，指數股就可以食糊，不過，若今次議息後，聯儲局繼續減息，意味將繼續美國金髮女孩經濟(Goldilocks Economy)，估計美股會繼續升，但港股仍可能受內地市況拖累，但政策憧憬會對第4季市況有幫助，要留意議息後美股慨反應，預期美股展開新一輪升勢前，或會先行回套，而港股投資者可以考慮係恆生指數見17200點水平時買入，博第4季彈上至18000點。 |
|
| 關焯照 |
2024-08-29T11:36 |
交通銀行(03328)及中信銀行(00998)昨日(28日)派左中期成績表，並雙雙宣布派中期息，交行派0.182元人仔，信行派0.1847元人仔，前者係首次派中期息。交行指，派息比率維持約30%，但其實係咪將末期息「一拆二」，拿部分出黎做中期息？ 冠域商業及經濟研究中心主任關焯照認為，今次派息的確有「拉上補下」慨情況，但「提早」派息可以帶黎正面心理作用，雖然交行派息比率僅約30%，但相比派息理想及高派息率慨企業，交行派息空間其實相對較大。 關博士又指，若美國聯儲局減息，相信內銀都會跟，減息會令息差壓力變大，所以要留意係息差收窄下，公司預期盈利能否保持穩定，但宏觀而言，減息會利好整體內銀股。 |
|
| 關焯照 |
2024-08-23T17:12 |
市場預期，美國聯儲局將於9月開始減息，但對減幅仍有分歧，聯儲局主席鮑威爾(Jerome Powell)今晚(23日)會係Jackson Hole全球央行年會發表演講，佢慨講話會唔會令減息時間及幅度明朗化？ 冠域商業及經濟研究中心主任關焯照預期，鮑威爾慨言論會較中性，甚至偏鴿，因為唔想令市場受驚，但佢提醒，市場唔好期望9月會減息0.5厘，因為參考過往數據，每逢聯儲局減息0.5厘，美國經濟就會出現衰退，加上現時經濟數據唔算太差，所以好大機會減息0.25厘以穩定市場信心。 關博士又話，早前股市大林市係擔心因為衰退而減息，但依家股市表現正面，亦冇受日圓強勢影響，未來減息次數及時間仍然要睇9月估計慨終端利率，如果今個減息周期慨終端利率維持3.1厘水平，市場普遍認為經濟穩定，股市下半年有望繼續升。 |
|
| 關焯照 |
2024-08-09T18:58 |
今個星期一(5日)全球林市，亞太區股市以日本及台灣股市「災情」最嚴重，港股表現相對硬淨，之後受內地數據帶動，恆生指數出現反彈，到底內地經濟下半年形勢係點？港股又應該點部署？ 冠域商業及經濟研究中心主任關焯照認為，內地跟本港經濟融合已有一段時間，全球林市當日港股冇受外圍明顯著拖累，除左內地數據帶來支持外，亦因為港股之前已跌左唔少，削弱外圍慨殺傷力，加上臨近業績期，港股亦借一些外圍利好因素反彈。 至於內地下半年經濟表現，關博士認為唔會太理想，但今日(9日)出爐慨7月內地居民消費價格指數(CPI)好過預期，反映通縮情況有改善。 投資部署方面，關博士指出，投資者要見機行事，進取型投資者可以考慮押注ATM業績，佢就睇好阿里巴巴(09988)及美團(03690)。至於恆指預期會係19000點見頂，短期會繼續係16000至17700點上落。 |
|
| 關焯照 |
2024-07-26T16:09 |
三中全會結束後，可能政策憧憬落空，加上受外圍拖累，恆生指數連跌3日後，今日繼續打17000關攻防戰，250天牛熊線亦危危乎，重磅股方面，依家只得騰訊控股(00700)頂得下，到底港股會跌到邊個水平，幾時先值得吸納？此外，「中特估」概念股都有沽壓，獲利盤開始湧現，其中，中國聯通(00762)今日(26日)一度挫逾7%，呢類股份係咪唔應該再沾手？ 冠域商業及經濟研究中心主任關焯照指，港股最值得入手係16000至16200點，騰訊係造返好些，但其實之前跌左唔少，不過，佢仍睇好騰訊，指343元有一定值博率。佢又提醒，港股業績期快到，個別股份係下個月可能有意外發揮。 至於關博士之前一直睇好慨「中特估」概念股，佢依家都唔建議沾手，因為上半年造好慨電力股、電訊股及油股，最近都守唔住，因此，建議投資者等業績期展開，等內地電訊股等沽完先再買入。 |
|
| 關焯照 |
2024-07-12T16:11 |
美國通脹全面降溫，昨晚(11日)出左消費物價指數(CPI)數據後，據最新利率期貨顯示，聯儲局9月減息機會率急升至逾90%，到底美國今年會減幾多次息？ 冠域商業及經濟研究中心主任關焯照估計，美國9月及11月都有機會減息，不過，睇返聯儲局內部做慨經濟增長預測，第2季增長約2%，連同第1季都係低過去年第3及第4季，依家好似行緊1995年條路，即係今年及明年唔會減好多次息。 至於可受惠於減息慨地產股、REITs及公用股，其中，地產股仍面對供應問題，拖住復甦慨後腿，地產股反彈係咪只係死貓彈？關博士指，地產股反彈唔代表樓市反彈，純粹係之前跌得多，依家減息預期升溫，部分投資者就冚淡倉，部分短期就楂上去，一旦政府出招，例如將公私營房屋比例改為8比2，起多些公屋，就會有些支持，但都要搞返好經濟，外圍減息係幫唔到太多，佢又建議，地產股已升左唔少，宜減磅套現。 |
|
| 關焯照 |
2024-07-05T15:19 |
港股7月開局唔錯，但恆生指數今日(5日)一度挫逾200點，過去3日慨升幅幾乎化灰，三中全會將會係7月15日至18日召開，港股下周表現係咪唔使太擔心？指數成分股之中，暫時以美團(03690)升得最靚，值博率係咪最高？ 冠域商業及經濟研究中心主任關焯照認為，恆指會有反彈，但如果期望有新一輪升勢就睇得太樂觀，最初市場對股息稅等政策有一定期望，但愈來愈覺得「冇乜野講」，所以恆指都由19700點水平回落至17700點水平，近期續受制18000關，市場會認為下星期會有風聲漏出黎，借勢掃高恆指幾百點，估計會彈到18500點左右，市況唔會太差。 美團方面，關博士就話，年初跌到60幾蚊時，之後出現一個大浪，急升至130元水平，之後落返250天線，但冇跌穿，走勢仲強過騰訊控股(00700)，如果要推上去係比較易，因為業務能見度高，亦有做回購及業績有改善，亦留意到每當恆指「郁」，美團通常會行多些。 |
|
| 關焯照 |
2024-06-28T15:49 |
美國總統大選首場電視辯論係本港時間今朝(28日)9點舉行，據即時民調顯示，67%觀眾認為特朗普(Donald Trump)表現較好，認為拜登(Joe Biden)表現較好只有33%，美股期貨市場即時反應亦顯示特朗普佔上風，會更利好股市表現，美國總統大選係咪會為下半年投資市場焦點？ 冠域商業及經濟研究中心主任關焯照指，呢場選舉只係其中一個因素，美國總統將會係11月舉行，其實市場都有心理準備，如果特朗普辯論表現理想，就會睇好美股後市，因為特朗普在任期間，道指大幅飆升，若特朗普真係再入主白宮，預期美股表現會同上次一樣。 關博士續指，即使拜登成功連任，美股都未必一定跌，因為美國經濟表現更關鍵，其他左右股市走勢因素，包括美國聯儲局下半年減息次數、2025年息口走向、歐洲右翼抬頭慨影響等，都要留意。 |
|
| 關焯照 |
2024-06-07T17:49 |
港股近期似乎有「畏高」問題，恆生指數今日(7日)午後愈跌愈多，一度險守18300點。市場焦點除左美國聯儲局到底幾時減息外，亦包括黎緊慨陸家嘴論壇，以及7月召開慨三中全會，係咪可以憧憬會再有利好股市慨國策出台？ 冠域商業及經濟研究中心主任關焯照指，港股係19700點超買得好緊要，所以之後係高位回落，返做個調整。港股係14800點起步，升到19700點，差唔多升左5000點或近30%，咁短時間升可以升咁多，對港股黎講已經係一個奇跡，如果由19700點回落到18000點，即保歷加通道中軸或下軸，之後再彈上18600至18700點，預期會係20天線及250天線間上落，即17600點至18800點。 關博士又預期，港股走勢下周有望好轉。 |
|
| 關焯照 |
2024-05-31T16:02 |
雖然港股早前表現強勢，單日成交更一度大增至2000億元，但仍未能斷言為大升市，恆生指數果然係19800點前止步，一度高見19706點，但之後掉頭連跌3日，大市近期慨調整及估值修復係咪已經完成？ 冠域商業及經濟研究中心主任關焯照指，如果睇返保歷加通道，恆指已接近下限，即18000點水平，係一個心理關口，如果守唔住，可能會進一步回落至250天線。 關博士亦指，若估值修復完成，意味大市已觸頂，而恆指之前一度高見19700點水平，同摩根士丹利慨目標價好接近，問題係如果完成估值修復，恆指唔應該仲係一個咁平慨水平，而係回歸中位數市盈率(PE)，即20000點以上水平，所以仍未到「均值回歸」水平，今次可能係超跌後反彈，因為相比其他股市，港股估值仍然平好多，最終資金可能由較貴慨市場重投港股，再加上有內地政策支持，估計恆指有機會自低位反彈近5000點水平。 |
|
| 關焯照 |
2024-05-17T16:34 |
港股升唔停，恆指今日(17日)一度升穿19600關，應該可以確認步入牛市，早前，冠域商業及經濟研究中心主任關焯照已提醒要留意重磅股，例如騰訊控股(00700)，結果業績後走勢強勁，股價連日挑戰400元，有貨應唔應該再加注？如果想係現水平買貨，應該追邊類股份？ 關焯照指，如果騰訊可以企穩405元樓上，升勢應該可以持續，因為公司回購力度大過大股東沽貨力度，所以即使大股東再沽貨都唔會掟散股價，令騰訊可以繼續升。 關博士又指，因為外圍有機會減息，雖然會令淨息差收窄，但隨著中央不斷出手救內房，會帶動內銀股反彈，而內銀股係恆指佔比大，對恆指慨影響可以大過騰訊，所以有唔少板塊都配合到今次反彈，所以後市可以睇住ATMJ及內銀股。 |
|