| 評論員 |
時間 |
內容 |
標籤 |
| 關焯照 |
2024-08-23T17:12 |
市場預期，美國聯儲局將於9月開始減息，但對減幅仍有分歧，聯儲局主席鮑威爾(Jerome Powell)今晚(23日)會係Jackson Hole全球央行年會發表演講，佢慨講話會唔會令減息時間及幅度明朗化？ 冠域商業及經濟研究中心主任關焯照預期，鮑威爾慨言論會較中性，甚至偏鴿，因為唔想令市場受驚，但佢提醒，市場唔好期望9月會減息0.5厘，因為參考過往數據，每逢聯儲局減息0.5厘，美國經濟就會出現衰退，加上現時經濟數據唔算太差，所以好大機會減息0.25厘以穩定市場信心。 關博士又話，早前股市大林市係擔心因為衰退而減息，但依家股市表現正面，亦冇受日圓強勢影響，未來減息次數及時間仍然要睇9月估計慨終端利率，如果今個減息周期慨終端利率維持3.1厘水平，市場普遍認為經濟穩定，股市下半年有望繼續升。 |
|
| 梁偉源 |
2024-08-23T14:06 |
截至早上11時止，1小時內《彭博》用戶搜尋量最多港股，依次為海底撈(06862)、中國平安(02318)、龍湖集團(00960)、東方海外國際(00316)及萬科企業(02202)。 平保昨日(22日)收市後出左業績，半年多賺近7%，中期息0.93元人民幣。中信里昂指，平保呢份業績符合預期，係充滿挑戰慨環境下，業務表現仍然穩定。平保股價今日(23日)重上50天線，如果企得穩，仲有冇上升空間？ 大華繼顯執行董事梁偉源指，平保出業績前，大行對保險業睇法比較悲觀，主要係內地經濟及A股表現都唔好，平保有房地產相關投資，導致平保及其他保險股表現唔好。 Steven續指，平保係咁困難慨環境下，主要業務壽險慨新業務價值仍增長11%，估計全年增長10%，事實上，市場對下半年新業務價值增長睇法樂觀，現時資金已重新流入平保，加上市場對下半年業績有憧憬，股價有機會收復失地。 |
|
| 聶振邦 |
2024-08-23T11:57 |
美股經歷8月大林市後，美國經濟數據表現參差，其中，8月標普全球美國綜合採購經理指數(PMI)初值54.1，跌至4個月低位，製造業PMI更跌至48，跌至8個月低位之餘，更跌穿50慨盛衰分界線，反映製造業收縮。聯儲局主席鮑威爾(Jerome Powell)今晚(23日)會係Jackson Hole全球央行年會發表演講，經濟數據及鮑威爾慨講話，對聯儲局減息有咩影響？ 博威環球證券金融首席分析師聶振邦指，8月綜合PMI報54.1，製造業PMI及服務業PMI分別報48和55.2，平均為51.6，雖然綜合PMI偏向服務業PMI，反映服務業權重較大，但市場明顯關注製造業數據，要留意未來兩個月製造業PMI會唔會貼近返盛衰分界線，由於較7月慨49.6有一定跌幅，若PMI數據未來持續向下，勢影響聯儲局9月減息幅度。 |
|
| 趙晞文 |
2024-08-23T10:07 |
信達國際研究部董事趙晞文推介瑞聲科技(02018) 推介原因： -上半年業績勝市場預期。 |
|
| 林嘉麒 |
2024-08-22T22:49 |
雲音樂(09899)上半年多賺逾倍，毛利率大升至35%。 元宇證券基金投資總監林嘉麒表示，雲音樂中期業績表現強勁，不過，由於騰訊音樂(01698)公布季績後股價受壓，兩者預測市盈率已相若，而騰訊音樂應有估值溢價，因此相信雲音樂股價未必有很大上升空間。 |
|
| 羅明立 |
2024-08-22T18:00 |
美國聯儲局7月議息會議紀錄出爐，大部分官員認為9月減息是合適，又預期年底前最少再減息1次，美匯指數失守101水平，低見100.94，再創今年新低，係咪只要8月經濟數據唔太驚嚇，9月減息已成定局？美匯指數跌穿101後，好快又上返去，短期應該點部署？ 亨達集團助理總經理羅明立指，聯儲局9月幾乎肯定會減息，估計將會減息0.25厘，除非9月初公布慨就業數據好差。佢又指，最近美國零售數據唔錯，雖然有其他數據顯示美國經濟轉弱，但衰退風險仍然唔大。 美匯指數方面，羅明立指出，過去一段時間都係100至107上落，依家接近區間底部，大幅單邊下行機會唔大，現水平唔建議大倉位做淡美元，但美元短線仍有壓力，美匯指數或再向下。 |
|
| 植耀輝 |
2024-08-22T17:37 |
瑞聲科技(02018)中期純利飆2.5倍，毛利率急升至21.5%，而主要產品經營溢利全部有增長，聲學產品按年增長22%，光學產品業務更扭虧為盈，主要受惠於手機市場復甦。睇返過往數據，集團下半年收入及盈利都高過上半年，可能係過往下半年都會有較多手機推出。瑞聲交左一份唔錯慨成績表，係咪會令市場對公司有更大憧憬？ 耀才證券研究部總監植耀輝指，呢份業績的確會令市場對瑞聲有更高期望，尤其個別範疇慨毛利率明顯改善，下半年有唔少公司會推出旗艦手機，預期相關公司下半年業務表現會比上半年更理想，而人工智能(AI)熱潮亦會對呢些股份有幫助。 股價方面，Stanley表示，如果投資氣氛可以保持到，瑞聲股價好大機會挑戰年內高位，即34.6元水平，但值得留意係，瑞聲估值已經唔平，有貨可以繼續楂，但唔建議現價追入。 |
|
| 許繹彬 |
2024-08-22T11:40 |
本周全球市場的焦點，一定是耐心等待美國聯儲局主席鮑威爾周五出席傑克森霍爾全球央行年會的言論，希望再明確未來減息的路線及方向；金融市場往往會出現等待才有憧憬的現象，在仍未揭曉的情況下，美匯已顯著回落至102附近，更見7個半月低位；對國內及香港經濟影響深遠的離岸人民幣曾升穿7.13，因而曾帶動中港兩地股市在本周一作出反彈，港股最多更曾升至貼近100天線(17,692點)，可惜成交仍不足千億元，因而不能用轉勢來形容；而一向對港股有潤澤作用的北水，就罕有地出現流出的境況，是近5個月以來最多。由於港股成交持續不足已成為常態，就算偶有反彈亦難以挽回投資者的信心，加上北水呈現流出的情況，令港股飄搖程度更大；話說未完，港股在貼近100天線後，投資者見到未能進一步推進，以及上證指數作出調整下，港股沽盤又再相繼湧現，令恆指急促回調至17,300水平，前景變得更難捉摸。 據恆指服務公司最新數據顯示，截至本月16日，今年在港上市公司的回購金額已超越去年全年總額29.8%，達1,648億元，創下歷史新高，其中接近9成是由藍籌股回購造成。出現此情況，反映中港股市在持續低迷下，公司為穩定民心或股價，才作出回購的決定；未來如港股弱勢未改，回購潮相信仍會持續。但筆者認為，回購當然是可以穩定股民的信心，但要令股價不要回落，確實要「天時」來配合，而這「天時」，當然是市況的整體氣氛；儘管現時回購額度創歷史新高，但完全無助港股出現持續的反彈，足以印證回購並不是靈丹妙藥，大前提確實要市況回暖，才能真正挽回投資者對港股的信心。 對於久病未癒的港股，外資投行又突然作出「趁你病拿你命」的行為；在國際具權威性的投資銀行摩根士丹利（大摩）認為，中國通縮風險問題持續並且沒有改善，因而大幅調低中資股目標價；此外，更將滬深300指數調低至3,500點，恆指最新目標價調低至17,000點，國指則降至6,000點；而另一邊廂則指出，儘管全球市場風險仍存在，但認為美國經濟在軟著陸的預期下，對日本股市及印度股市雖然也有調低目標，但對其仍抱持堅定不移的信心，對大摩的言論可謂「榮辱互見」。 筆者認為，儘管外資投行確實在世界金融市場有一定的指引性，甚至有投資基金會參考其分析來制定未來的基金組合，但其行為有時會是「見好唱好、見淡唱淡」，又可用「跟紅頂白」來形容；何解有此看法？筆者尤記得，港股今年在農曆新年後，其走勢可以用「由衰轉盛」來形容，原因是港股當由1月低位14,794點起步，直至今年5月締造了19,706點的高位，成交在該期間更是穩步上揚，由不足800億急升至超過2,000億；出現此氣勢的整個期間，反而沒有任何一間投行對港股作出調高點數的行為。 但直至到今年5月，港股在突破19,000點之際，大摩當時突然走出來，表示恆指最樂觀可見22,500點；隨後多個投資銀行也相繼為港股作出加持，紛紛調高港股的評級，當時投資者看到此推測，當然信心返曬黎，對港股的態度由「唔信唔信」到「唔可以唔信」；報告一出，更將港股的投資比例提升；但好景不常，在五月後，恆指走勢當然是由「由盛轉衰」，現已沒有投資者提及何時會到22,500點，就連17,000點的水平也好像搖搖欲墜。因此，是次大摩突然出來「轉軑」調低港股的點數，如參考今年五月相反的數據，今次是否意味港股可能會出現反彈？大家不妨細心觀察，留意成交的變化，才是上策。 |
|
| 譚智樂 |
2024-08-22T10:45 |
富途證券首席分析師譚智樂推介第一拖拉機股份(00038) 推介原因： -短期內繼續受益於國四切換 -補貼政策開始成熟，產能過剩風險不大 -高瑞化進度良好，行業集中度有望繼續提升。 |
|
| 羅尚沛 |
2024-08-21T22:51 |
小米集團(01810)第二季經調整盈利增長20.1%，勝預期，期內汽車業務毛利率為15.4%。 銀河證券業務發展董事羅尚沛表示，小米上季業績十分理想，尤其是汽車毛利率逾15%，高於大部分汽車新勢力，相信大行亦會上調公司目標價至30元或以上。 |
|
| 盧楚仁 |
2024-08-21T19:57 |
國際金價繼續破頂，至於其他貴金屬，尤其白銀價格亦跟到升勢，隔晚衝上1個月高位，再度逼近每盎司30美元關口，若成功衝破30美元，將突破下降通道，後市仲有冇上升空間？ 獨立外匯商品分析師盧楚仁指，對白銀後市有保留，雖然屬於貴金屬，但白銀跟銅、鋁一樣有工業用途，因此，白銀價格可唔可以再升，好視乎環球經濟情況，美元轉弱的確可以推高白銀價格，但單靠美元及金價破頂撐起白銀價格有一定困難，佢估計，白銀價格短期將會出現調整，投資者可以留意28美元水平，若未來美元轉強，白銀後市或要睇得更淡。 |
|
| 林嘉麒 |
2024-08-21T17:31 |
港股上半年日均成交1104億元，按年倒退4%，單計第2季，日均成交1216億元，按年增長18%，港股4月底開始反彈，但踏入第3季再度轉弱，有多個交易日成交唔夠1000億元，若下半年整體市況及氣氛冇改善，日均成交唔夠1000億元，港交所(00388)業績係咪會轉差？股價亦難有好表現？ 元宇證券基金投資總監林嘉麒指，港股第3季一定會轉差，按季成交出現好明顯變化，估計港交所股價係9月難有憧憬或反彈，投資者亦未必願意入場，由於預期成交冇太大改善，港交所股價勢進一步轉弱。佢續指，港交所股價近日係低位徘徊，可能係估值下移慨先兆，未來要留意大行會唔會調整目標價。 KK又話，港交所業績冇太大驚喜，相信短炒已告一段落，後市有機會下試前低位，就算中長線而言，港交所都不宜沾手。 |
|
| 莊志雄 |
2024-08-21T16:46 |
月初美國非農數據唔理想，引發日圓拆倉，令環球股市係8月5日經歷「黑色星期一」，不過，美股同日股快速自低位反彈，道指及標指只係低高位約1%，日圓近日又開始轉強，係咪以之前拆倉低位作為指標？ 「股市漁夫」創辦人莊志雄指，日本央行冇管理好市場預期，所以觸發拆倉潮，唔單止影響日股，仲影響埋美股，連最強慨納指由7月中開始跟隨日圓見頂回落，日圓跌代表美元轉弱、日圓轉強。日央行出黎安撫市場，表示市場未穩定慨情況下，係唔會再加息。依家市場穩定返，會唔會加息，現時對日央行黎講仍然係一個難處，因為仲未解決通脹問題。 Lewis相信，短線做高槓桿或套息交易(Carry Trade)慨投資者已經拆曬倉，但留意返長倉，唔少投資者以借日圓慨方式買日本資產，長倉好多已長楂幾年，利潤非常可觀，如果日圓轉強，會影響日股，所以投資者沽部分日圓資產，還日圓，日圓可能會繼續強勢。若日圓跌到落140水平，可能會拆埋長倉，睇住日圓走勢係一個重要指標，下一輪好大機會會影響美股。 |
|
| 梁偉民 |
2024-08-21T15:03 |
外電引述消息人士指，美國零售巨企沃爾瑪(Walmart)計劃減持京東集團(09618)持股，套現逾200億港元，京東美股昨晚(20日)跌逾4.5%，盤後更急瀉11%，主要股東之一計劃減持，擔唔擔心會引爆「逃亡潮」？繼而拖累港股氣氛？ 高富金融集團投資總監梁偉民指，雖然Walmart減持消息仍未證實，但市場已經憂慮京東係咪出現營運問題，以及股價過高慨情況，雖然京東盈利增長仍然唔錯，但過去兩年收入都冇乜增長，令市場擔心內地零售、電商競爭情況仍然唔明朗，集團前景唔太樂觀。 Wyman續指，若市場信心受損，科技股有可能沽壓湧現，例如阿里巴巴(09988)、騰訊控股(00700)、百度集團(09888)等短期影響較大，亦可能會拖低恆生指數，要留意內地經濟復甦情況，以及有冇新政策出台，否則，恆指後市好難突破18000點。 |
|
| 彭偉新 |
2024-08-21T13:19 |
截至早上11時止，1小時內《彭博》用戶關注度上升最多港股，依次為快手(01024)、同程旅行(00780)、舜宇光學科技(02382)、佳兆業集團(01638)、香港交易所(00388)。 快手昨日(20日)出左業績，中期經調整盈利大升逾2倍，上季業績亦好過預期，不過，業績後被大行唱淡及削目標價，主要係集團下調全年商品交易總額(GMV)預測，引發市場憂慮行業競爭令快手前景面臨好大挑戰。雖然高盛認為快手股價自高位回調近30%，已反映有關風險，加上唔少大行普遍睇好其他收入可以抵銷GMV放緩影響，但股價今朝(21日)仍重挫10%，到底市場點睇快手下半年發展？ 資深證券分析師彭偉新指，市場普遍唔睇好快手前景，主要係公司下半年GMV預測令市場唔放心，加上面對唔少挑戰，始終直播推銷業務好視乎市場滲透率及用戶活躍程度等，加上有小紅書及抖音兩大競爭對手，導致快手未來慨用戶數量或活躍程度可能受壓，市場因而睇淡其下半年業務表現。 |
|
| 彭偉新 |
2024-08-21T12:41 |
獨立股評人彭偉新推介舜宇光學(02382) 推介原因： -多個手機品牌推新產品。 |
|
| 植耀輝 |
2024-08-21T09:59 |
耀才證券研究部總監植耀輝推介威勝控股(03393) 推介原因： -已發盈喜，預期中期純利按年55% -持續拓展海外業務，早前公布中標匈牙利智能電表項目 -現價市盈率(PE)11倍。 |
|
| 文錦輝 |
2024-08-20T18:04 |
近期唔少大宗商品價格向下，包括鋁、銅等，但金價表現一枝獨秀，現貨金價升至每盎司2500美元，如果想投俱黃金，可以吼邊個位買入？ 艾德金融期貨主管文錦輝表示，美國快將啟動減息周期，會有利商品期貨，減息前有好多因素，例如美元強、內地經濟復甦不似預期及地緣政治緊張等，令黃金避險作用更大，帶動價格不斷向上，近日更借日圓拆倉潮衝破2500美元。 Felix又指，若金價可企穩2500美元樓上，可唔可以進一步突破2530美元，就要睇市場需求，投資者可以考慮係2480美元水平買入，年底上望2700美元。 |
|
| 李偉傑 |
2024-08-20T17:51 |
內銀股業績期下周殺到，市場憧憬內銀會派中期息，甚至有分析指，內銀股可能是仍未放榜慨股份中，較值博慨板塊。不過，有大行睇淡內銀股，其中，高盛最新一口氣削7隻內銀H股目標價。 華盛證券財富管理部董事李偉傑指，內銀股板塊基本上同內地經濟、港股市況A股市況背馳，持續向上，以估值平及高股息率吸引投資者，以維持升勢，但佢提醒，內銀去年普遍面對息差收窄壓力，而內銀股係「中特估」概念股之中，唯一未有出現調整，但今次派中期成績表就可能輪到佢。 Jason又話，雖然貸款市場報價利率(LPR)維持不變，令息差冇咁大壓力，但睇返股價，部分內銀股已經破頂，或升上多年高位，所以唔排除業績後趁高獲利，但佢估計，股價唔會跌得好深，整體而言，內銀股有調整壓力，但下跌空間唔大。 |
|
| 趙晞文 |
2024-08-20T17:40 |
特步國際(01368)今日(20日)中午出左業績，股價午後一度抽高逾5%，集團上半年純利及收入都有增長，派息亦有增加，自主品牌表現穩健，新品牌係內地增長亦強勁，但值得留意係，收入增速已連續兩年放緩，係咪受內地消費疲弱影響？下半年前景又係點？ 信達國際研究部董事趙晞文表示，依家不論零售市道及消費信心都處於近年低位，導致整個零售市場受到一定衝擊，所以要視乎個別上市公司慨市場定位去做分析，特步慨市場定位係大眾品牌，所以單睇集團下游品牌表現，上半年收入能夠錄得10%增長，表現已經唔錯。 晞文又話，要分析整個行業前景，有兩個關鍵績效指標(KPI)可以留意。 |
|
| 譚智樂 |
2024-08-20T15:13 |
截至早上11時止，過去1小時內《彭博》用戶搜尋量最多港股，依次為佳兆業集團(01638)、華潤啤酒(00291)、中廣核電力(01816)、中國石油股份(00857)及港交所(00388)。 佳兆業今早(20日)宣布同債權人小組簽訂重組支持協議，又呼籲未簽支持協議慨「債主」盡快簽，佳兆業股價今朝一度大升近15%，之後走勢反覆，曾倒跌4.6%，佳兆業前景係咪仍然令人憂慮？ 富途證券首席分析師譚智樂認為，由於唔少內房都要做債務重組，所以買呢類股份時，唔會單睇業績，但亦好難從單一報道去做任何判斷。佳兆業股價今日衝高後再急挫，走勢反覆之餘，成交金額其實亦非常少，所以呢些數據冇乜參考價值，佢認為，一般散戶盡量唔好掂內房股，而呢類股份亦唔會係市場近期慨焦點。 |
|
| 黃偉豪 |
2024-08-20T12:53 |
港交所(00388)股價今個月呈橫行格局，集團明日(21日)會出業績，股價今日(20日)一度高見234.4元，升不足1%。港交所近期成交量增加，市場普遍預期，集團第2季表現較好，如果睇好港交所應該點部署？ 中薇證券研究部執行董事黃偉豪指，最近大市表現較好，有正面推動力，港交所股價相對大市較為落後，所以市場睇好後市可以追升。不過，佢估計，港交所第2季業績表現一般，因為大市成交5月後持續淡靜，業績對股價慨推動力可能唔大。 Ravi又指，如果想部署好倉唔建議揀CALL，因為出業績前，引伸波幅會被扯高，就算股價有得升都有縮窩風險，所以揀牛證會比較好，收回價宜擺今個月低位，即220元水平。 |
|
| 梁偉民 |
2024-08-20T12:05 |
人仔近日強勢，離岸價昨日(19日)仲創左今年新高，但似乎對港股幫助唔大，雖然恆生指數昨日埋單都升左百幾點，但全日高低波幅只係百幾點，波幅係3個月最窄，成交就縮到唔夠1000億元，連北水都走人，昨日淨流出逾60億元。此外，雖然騰訊控股(00700)業績好過預期，但股價唔識升，點解讀呢個情況？ 高富金融集團投資總監梁偉民表示，北水過去1年，甚至更長時間，短炒慨時間愈來愈短，最近見港股彈返少少就平倉獲利離場。至於騰訊股價係業績後冇進一步上升，可能同股價今年已累升20%至30%有關，而市場係騰訊放榜前已對呢份業績有一定預期，所以可能要更多利好消息，先可以刺激股價向上。 Wyman又認為，暫時黎講港股表現唔算太差，已自低位彈返唔少，若後市再升少少，就可以擺脫5月開始形作慨下降軌。 |
|
| 陳鳳珠 |
2024-08-20T10:19 |
獨立股評人陳鳳珠推介創科實業(00669) 推介原因： - 上半年收入按年增加6%，純利增約16%，至5.5億美元，派息亦增加 - 高利潤率的美沃奇(Milwaukee)業務、電池售後業務等帶動，期內毛利率擴闊至約40% - 美沃奇(Milwaukee)業務保持穩健增長。 |
|
| 阮子曦 |
2024-08-19T22:51 |
極兔速遞(01519)上半年業績由虧轉盈，主要因為毛利率大幅改善。 華富建業證券投資策略聯席總監阮子曦表示，滿意極兔中期業績，相信有利股價表現，不過速遞股對經濟周期敏感，加上公司兩大市場——中國及東南亞，行業競爭激烈，單靠節省成本，未必能持續推動盈利改善。 |
|
| 聶振邦 |
2024-08-19T17:19 |
華潤啤酒(00291)今日(19日)派左中期成績表，上半年銷量按年跌約3%，產品方面，中檔及以上啤酒銷量佔比首度超過50%，次高檔及以上啤酒銷量亦錄得高單位數增長，高檔銷量更增長逾10%。至於啤酒平均售價按年升2%，毛利率按年升0.9個百分點至46.9%。毛利率未來仲有冇得升？ 博威環球證券金融首席分析師聶振邦指，潤啤慨啤酒毛利率近47%，已經係非常高慨水平，不過，若公司能繼續控制好成本，毛利率有機會進一步升至近48%，但暫時來看，要升到50%慨機會較微。 聶Sir續指，即使毛利率升至近48%，利潤率升幅亦唔多，業績只能平穩增長，未必有太大刺激作用。 |
|
| 梁傑文 |
2024-08-19T15:52 |
新火科技控股(01611)以逾3046萬美元，折合約2.38億港元，收購1家英屬處女群島註冊控股公司Avenir Asset Holding。此外，集團以近277萬美元，折合約2160萬港元，向Goldenway收購BitTrade約7.69%股權，新火科技將會發新股支付交易，發行價2.18元，較上周五(16日)收市價有逾14%溢價，交易完成後，BitTrade將成為新火科技間接附屬，BitTrade係日本持牌虛擬貨幣兌換服務供應商。受消息帶動，新火科技股價今日(19日)一度升穿2元關口，升逾6%。到底市場點睇今次呢單deal？ 《香港股票財技密碼》作者梁傑文指，相信今次收購會對公司發展有正面影響，不過，虛擬加密貨幣面對全球性競爭，尤其以美國競爭最激烈，估計短時間內較難令市場有信心新火科技呢項業務可以急速發展，因此，市場對消息相對冷靜。 Mike又指，市場可能會擔心加密貨幣投資者已用慣大型交易平台，如幣安(Binance)、Coinbase等，未必會轉用其他平台，所以吸唔吸到客仍然係一個問號。 |
|
| 郭思治 |
2024-08-19T11:13 |
踏進本周，大市將快步入8月份之下旬，故即月期指轉倉及結算等相關活動將漸主導大局，而從周來大市之走勢看，由於恆指已連續多天穩收於10天線（約在17,013點左近）之上，即大市確已初呈回穩之訊號，衹是在買盤不足之下，大市一直處整固待變之中，到16日，在買盤主動下，一眾恆指成份股均稍見做好，刺激大市出現較明顯之升幅，而恆指亦伺機升越本月1日之高位17,408點，至此，本月大市之形態已扭轉成先低而後高，恆指暫是由5日之低位16,441點升至16日之高位17,473點，即月內大市之波幅已稍擴闊至1,032點，從技術上看，本月高低位之距離已不算窄，但波幅則仍稍感不足，故衹要先低後高之形態不變，大市該仍會再進一步往上尋月內之新高，從而擴闊月內之波幅以滿足所需，當然，成交金額能否續見增加將至為關鍵，因大市之動力如不配合，大市之升勢該會漸受規限。 再看移動線方面之表現，目前各組平均移至線由上而下之排列為100天線（約在17675點左近），50天線（約在17,612點左近），250天線（約在17,295點左近），20天線（約在17,121點左近）及10天線（約在17,013點左近），以恆指現已升至17473點計，即已成功重越10天線，20天線及250天線，單從技術上看，衹要恆指能持續穩守於上述三組平均移動線之上，技術上該有利於短期後市再進一步上試50天線及100天線，但需指出，大市目前暫衹屬中期急跌後之技術性後抽而已。 8月份之股市現已扭轉為先低而後高，技術上該有利於下旬時份之發展，但由於大市之成交金額仍較偏疏，擔心在動力不配之下，大市之升勢會漸受規限，故任何再冒高追入之短炒行動，最好是做好風險管理，至於一直持貨偏重之投資者，最好是考慮需否候高稍作減磅，畢竟港股一直欠缺大型資金之參與。 |
|
| 李浩然 |
2024-08-19T10:25 |
聯儲局9月減息幾乎已成定局，利率期貨預期9月份減息0.25厘機率達75%，減息半厘機會是25%，但從長遠來看，這或許並不重要。市場的普遍看法可能高估了聯儲局的影響力。確實，短期之內，聯儲局能夠影響市場，特別是在危機時期，但鮑威爾並不是幕後操縱一切的巫師。 不過，利率的變化確實會影響所有人的投資組合。因此，了解當聯儲局提高或降低短期利率時金融市場會發生什麼確實會有所幫助。事實上，了解聯儲局降息的原因可能比降息本身更重要。如果聯儲局像金融危機期間那樣緊急降息，那就與聯儲局因為經濟和通脹正在降溫而降息的情況不同了。 從1970年以來的數據顯示，聯儲局首次減息後，標普500指數在往後一年、三年和五年的平均回報率分別為13%、43%和89%。一年後標指曾大幅下跌發生在1973至74年熊市、科網泡沫爆破和2008年金融危機期間。數據也清楚地表明，在非衰退期，股市通常會表現得更好，但差距並不像普遍人想像的那麼大。 儘管投資者喜歡將聯儲局視為市場的救世主或破壞者，但數據顯示，無論是在經濟危機還是通脹回落的情境下，聯儲局的政策調整往往只是推波助瀾。例如，聯儲局首次減息後的一年、三年和五年，在非衰退時期的股市回報平均值達分別為15%、48%和97%，而在衰退期則分別下降到11%、40%和84%。 在利率上升周期，持有現金等價物被證明是一種明智的策略。在沒有利率風險下，而且當利率上升（或下降）時，這些產品的收益率會迅速調整。然而，當聯儲局開始降息時，現金等價物的收益率也會迅速下降。如果你正在尋求流動性、避免波動和確保資本的安全，那麼無論聯儲局如何行動，短期國庫券（T-Bills）都是一個不錯的選擇。但當然，也別忘了，當前高收益的日子可能將一去不復返了。 去年10月，美國十年期國債息率飆升至5%。到現在，債市已經開始預期降息，市場已經在某種程度上預料到了聯儲局的動作。債市不會等待聯儲局的正式公布，而是提前行動。在當前的利率水平，債券提供了對抗通縮的保護，並可能在經濟衰退期間成為避險工具。然而，這並不意味著債券是無風險的選擇。每一個投資決策都需要在風險和回報之間做出權衡。 簡而言之，無論是現金還是債券，投資者都需要理解每種資產類別的優缺點。而聯儲局的利率決策，雖然重要，卻不應是投資決策的唯一因素。記住，沒有人能夠準確預測利率的方向或幅度。對於那些試圖根據個人對利率的預測，而跳進跳出市場的人來說，最好的建議可能是：別那麼做。在這個充滿不確定性的市場中，保持靈活和審慎是王道。 |
|
| 植耀輝 |
2024-08-16T22:58 |
中興通訊(00763)上半年純利升4.8%，基本盈利僅升1.1%。 耀才證券研究部總監植耀輝表示，內地三大電訊商的5G資本開支高峰期已過，令到中興業績缺乏增長動力，估計6G投資期來臨之前，公司盈利表現亦難有明顯改善。 |
|
| 黃敏碩 |
2024-08-16T17:45 |
高偉電子(01415)昨日(15日)出左中期業績，股價今日(16日)愈升愈有，收市大升近11%。雖然中期收入按年增長近60%，但按年少賺11%，主要受資本開支倍升及成本上升影響。不過，集團近年有開拓新產品，對集團下半年業績及毛利率有冇幫助？ 註冊財務策劃師協會會長黃敏碩認為，高偉下半年發展將會出現有突破，考慮到部分定單跟蘋果公司(Apple Inc.)掛鉤，若Apple推新iPhone及人工智能(AI)，相信表現會唔錯，加上下半年業績一般比上半年好，而上半年表現已超預期，因此，估計下半年表現會更強勁。 對於高偉毛利率受壓，Michael認為，若Apple推新iPhone並有AI配合，相信可提升競爭力，要推高毛利率應該唔難。佢又指，高偉近年拓展新產品，包括激光電達、虛擬現實(VR)及擴充實景(AR)等，若現階段可以配合AI發展，相信對業績更有利。 |
|
| 盧楚仁 |
2024-08-16T16:28 |
美國最新就業及零售數據，令市場對美國經濟衰退慨憂慮降溫，全球主要國債再被拋售，其中，美國10年期債息昨日(15日)曾高見3.95厘，今日(16日)就落返少少，美匯指數就係103水平徘徊，全周計變動唔大。由於市場對美國經濟有返信心，據最新利率期貨顯示，聯儲局9月減息0.5厘慨機率回落。美國最新數據係咪引證到經濟冇衰退危機？係咪會利好美走勢？ 獨立外匯商品分析師盧楚仁指，美國數據係幾飄忽，最新數據出爐後，市場又認為聯儲局下月只會減息0.25厘，之前price in緊炒減息0.5厘，導致美元急挫，所以呢浸炒返減息0.25厘，對美元會有好大支持，所以見到美債息大幅抽升，美匯指數短期103，甚至104、105進發。 |
|
| 陳建良 |
2024-08-16T16:02 |
長和系已陸續派發成績表，其中，長和(00001)及長實集團(01113)昨日(15日)公布業績後，股價今日(16日)向下，雖然市場對中期息減少有些失望，但未至於感到意外，面對現時慨經濟環境等因素，未來息率又點睇？有興趣入手長和系慨投資者又應該點揀？ 勝利瑞柏基金管理合伙人暨投資總監陳建良指，集團指派息係因應業務重估而定，長和及長實業務平穩，但仍面對頗大挑戰，股價折讓左唔少，希望公司可以定期派息，但認為派息係全球經濟放緩下，仍有機會再減少，不過，係現時慨經濟環境下，長實及長和營運已經做得非常好，只係市場任由股價繼續折讓，所以會對派息失望。 揀股方面，KL就話，長和系之中可以考慮入手港燈(02638)，其次係長江基建集團(01038)，值得留意係，長建下星期會係英國第2上市，有助提升成交量及減少折讓，收購及集資渠道亦會增加，都對股價有利。佢又認為，長建現時估值偏低，但相信市場會給予長建更合理慨價值。 |
|
| 梁偉源 |
2024-08-16T13:26 |
截至早上11時止，1小時內《彭博》用戶關注度上升最多港股，依次為長和(00001)、港鐵公司(00066)、中銀航空租賃(02588)、聯想集團(00992)、長實集團(01113)。 長和減派息令股價今日(16日)受壓，中信里昂指，集團上半年負債水平仍然穩健，經調整經常性盈利增長7%，又指係現時慨環境下減派息係審慎做法。高盛就話，有信心長和全年派息增長12%。集團股價今日向下係咪市場反應太大？ 大華繼顯執行董事梁偉源指，市場認為長和業績唔太理想，令股價今日向下，其實集團慨業務預測或派息一向都比較審慎，若下半年表現穩定，業績或有改善，屆時將會調整派息。 佢又話，長和業務遍布全球，海外業務慨美元收入兌港元報業績時有匯率壓力，但預期美國下半年啟動減息周期後，美元兌港元匯率將會轉弱，匯率仍會對業績有幫助。 |
|
| 聶振邦 |
2024-08-16T11:21 |
京東集團(09618)及阿里巴巴(09988)昨日(15日)出左業績，其中，京東第2季收入僅微升，但經調整純利大升69%，高盛指除創單季新高，更比預期高出50%，反觀同業阿里上季經調整少賺9%，似乎京東業績明顯靚過阿里。 博威環球證券金融首席分析師聶振邦指，阿里收入高過市場預期，估計集團未來發展持續平穩，公司正處於業務轉型期，而市場亦睇好未來發展，依家集團會較著重人工智能(AI)發展。 聶Sir又話，兩者最大分別係阿里正在轉型，但京東繼續專注網上零售，而有關銷售收入佔比高逾80%，係業務發展穩定下，節流的確可以令個別季度業績向好，但值得留意係，若未來京東慨AI發展追唔上其他大型科技股，競爭力可能會轉弱，如果單睇1至2個季度業績，只適合做短線部署，可以考慮係100至102元建倉，但現價買入風險亦唔大，而未來1個月上望目標115至120元。 |
|
| 熊俊傑 |
2024-08-15T19:45 |
倫敦期銅連彈兩日，自五個月低位反彈，上試每噸9000美元的整數關口，期銅反彈，可能與智利供應出現緊張有關，當地一個全球最大銅礦場薪酬談判未有進展，已經罷工兩日，涉及的礦場佔全球銅供應約4%，對銅價影響有幾大？銅價短線可以再彈幾多？ 獨立商品外匯分析師熊俊傑指，銅價今個星期有見底回升的跡象，受智利一個全球最大銅礦場罷工影響，市場擔憂銅的短期供應，導致銅價近日升至8900美元水平，短期有機會上試9036美元，若罷工事件很快解決，銅價就會回落，更有機會再創新低。 |
|
| 林樵基 |
2024-08-15T11:11 |
內地公布7月經濟數據，零售按年增長2.7%，略好過市場預期，雖然暑假開始，但消費繼續疲弱？房地產投資年初至今跌10.2%，遜預期，拖累經濟發展，內地經濟數據參差，第3季開局是否仍不穩？ 資深經濟學家林樵基指，零售數據是低單位數字，反映整體內需仍然疲弱，即使有政策出台，但對宏觀經濟的動力不足，第3季開始要留意有沒有更多新政策出台，推動經濟。 他指過去幾個月房地產投資跌幅維持高水平，去庫存等問題仍未解決，預計下半年跌幅會收窄，若房地產公司要再大量投資，需要再等一段時間。 |
|
| 陳偉明 |
2024-08-15T11:10 |
日本央行在7月31日議息後意外地宣布加息0.25厘，行長植田和男更「放鷹」表示今年底前仍會再加息。另一方面，美國就業和製造業數據表現疲弱導致衰退憂慮升溫、減息機會大增。在日本加息、美國減息的預期下，終於觸發套息交易拆倉，交易員放棄以低成本借人民幣及日圓作套息交易，沽出高風險資產，加密貨幣遭遇拋售，比特幣曾插穿5萬美元關口。環球股市於上周慘遭「黑色星期一」，亞太股市於上周一(8月5日)暴跌後，當晚美國道指亦急瀉逾千點出現「小股災」，俗稱「恐慌指數」的美股VIX波動指數最多爆升181%至65.73，部分散戶交易平台於美股夜盤時段出現系統故障，市場情緒極度恐慌。 然而，多位日本官員「放鴿」安撫市場情緒，日圓拆倉亦似乎短暫完結，部分投資者開始趁低吸納，之前慘遭拋售的高風險資產普遍於上周二(6日)開始出現反彈，而日本央行副行長內田真一於上周三(7日)更表明不會在市場動盪期間加息，加上美國上周四(8日)晚公布的首次申領失業救濟人數，優於預期創近一年最大降幅，紓緩市場對美國就業市場迅速轉弱及美國經濟衰退的擔憂，環球主要股市普遍出現報復式反彈，當中美國、英國、巴黎、德國、日本及韓國更在8月6日「黑色星期一」之後持續破近期高位，相反中港股市則死氣沉沉，港股上周五(9日)反彈高見17,252點後便無以為繼，A股更持續弱勢尋底。 日圓拆倉引發的環球股災沒有拖累缺乏外資入市的中港股市急插，自然地亦不會因為日圓拆倉完結導致中港股市急彈，相反日本官員「放鴿」，日本今年內再加息機會減低，環球資金可能繼續吸納強勢高風險資產，令到本已弱勢的中港股市繼續缺乏外資關注。 美國本周二(13日)晚公布的7月生產物價指數升幅低於預期，增強市場對聯儲局9月減息的憧憬，美元回軟、人民幣反彈，理論上利好中港股市，但騰訊(00700)於績前受壓、內地7月新增貸款創近15年低位，中港股市受累於本周三(14日)回落，恆指明顯受制於250天線(目前大約17,300點)。 日本央行爆冷加息0.15厘觸發日元拆倉、環球股市動盪。技術上，日本加息後的恆指高位異常重要，如果恆指短期內能夠「陽燭」收市升穿8月1日高位17,408點，可能反映環球資金開始願意重新投資香港股市，否則在環球股市向好下，目前受美國打壓的中港股市應該難展強勢。筆者傾向恆指短期只能在大約16,700至17,400點反覆上落，可考慮在恆指大約17,200點以上候高小注Long Put 8月價外600點恆指期權。 |
|
| 王良享 |
2024-08-15T11:06 |
美國8月非農數據出爐後，互聯網設備供應商思科(Cisco)宣布全球裁員7%，逾6300個職位，就業情況惡化下，環球央行都開始減息周期，昨日(14日)新西蘭央行意外減息，因為怕遲減息會難救經濟，今年餘下時間是否債市比股市安全? 臻享顧問董事總經理王良享指，債市由今年第2季度起「大漲小回」。下半年環球央行減息意向並沒有改變，因為怕經濟出現技術性衰退，所以環球利率會進一步下調。另外，美國年底總統大選令市場充滿不確定性，市場擔心經濟會否快速下滑。 Tommy相信下半年會出現「債優於股」情況。股市方面，人工智能(AI)熱潮有退卻跡象，其他非AI類股份追落後情況亦不太理想，令股市升幅受限。 |
|
| 阮子曦 |
2024-08-15T11:04 |
華富建業證券投資策略聯席總監阮子曦推介萬國數據(09698) 推介原因： - 環球人工智能(AI)應用對集團資訊中心需求與日俱增 - 環球步入減息周期。 |
|
| 許繹彬 |
2024-08-15T10:58 |
全球股市在上周出現「黑色星期一」事件後，本周可算是回歸平靜。作為上周主要跌市元兇，亞洲代表日經及台灣加權等、美國代表道指及納指等股票市場指數雖然仍未重返未跌前水平，但亦可算是收復部分失地。以日經來說，上周低位最恐怖時曾跌至31,000水平，但本周已升逾36,000水平；而其難兄難弟台灣加權在上周曾跌穿20,000大關，但現今已重返22,000水平；道指及納指雖然升幅不及日經顯著，但道指起碼亦已重上40,000大關，總算對投資者有所交代，給予重拾升軌的希望。 儘管上述市場曾作出深度調整，但調整過後會懂得反彈，確實令投資當地股票的投資者有「心服口服」及「有來有往」的感覺，亦會令他們認為「每次調整便是機會」，願意繼續留下交易。但港股在踏上復常之路後，確實未曾令投資者有一刻產生「心服口服」的感覺，因為港股每次調整後，只會呈現一浪低於一浪的形態，在跌穿了某些重要心理關口後（如18,000點），就好像要望天打卦，苦等機會才有望突圍；即使港股偶有一次機會反彈時，也只是低頭碎步，像矮仔爬樓梯般一級一級上，並不會好像其他鄰國的股票市場般，會作出昂首闊步的反彈；再者，由於成交持續不振，如果外圍偶有風吹動，便將這矮仔吹至節節後退，又要以一小步一小步再重新出發。因此投資者對港股仍有保留，可謂情有可原。 港股現階段可謂屋漏偏逢連夜雨，相信投資者在心里上已接受，在外資欠奉的情況下，只有國內經濟體系復甦才有機會令北水充裕，從而才能養活港股；但通常理想美好，現實殘酷，在投資者苦候機會發圍之際，國家外匯管理局公布一項國際收支平衡數據，指今年第二季「直接投資負債」減少1,050億元人民幣，反映外商從中國淨撤出的資金額創下了33年有紀錄以來最高，此數據亦可證明不單止外資少了投資香港市場，連對中國市場的投資也是進一步萎縮。而另一數據可謂直接反映到港股的走向，就是內地股市本周成交不足五千億元人民幣，創逾4年新低；而港股在此情況下再次陷入低谷，成交更不足700億元，創下半年低位，簡直慘不忍曙；正因中港股雙雙跌入「水盡鵝飛」的境界，相信港股短期如要翻身，難度亦倍增。 香港金融市場完全缺乏自理能力，相信沒有人會否認，但其實中央曾致力為香港金融業開路，猶記得今年4月，內地曾為香港金融業發出「新五條」，外間普遍認為中央明撐港股，其中一條相信最令港股重新振作的措施，就是支持合資格的內地企業來港上市，但去到現在港股成交只剩不足700億及新股已被投閒置散的情況下，為何不努力跟進並促使中央盡快落實措施？又例如今年慶祝回歸前夕時，亦曾傳出中證監、國家稅務總局等內地監管部門考慮當內地投資者經港股通投資港股，可豁免獲股息時所繳納的20%股息紅利稅，但當然現在亦只是傳聞，只是聽見樓梯響，但為何港府沒有部門再主動跟進？筆者認為，香港仍擁優良的地利優勢及無限的機會，但如何爭取機會去激活資本市場，令外間重新重視這個曾叱吒風雲的金融市場，就要先知道「幸福並非必然」，而是「幸福是要靠自己爭取」的道理。 談回港股，現階段國內及香港成交持續萎縮，加上人民幣持續疲弱下，成交可能沒有最低，只有更低；在難有實質數據支持下，宜守不宜攻，如突如其來跌近或跌穿17,000點，則可小試牛刀，但到17,300至17,400點水平時，可能呈現舉步維艱的境況。 |
|
| 羅尚沛 |
2024-08-14T22:43 |
新秀麗(01910)上半年經調整盈利微升1.8%，單計第二季則要倒退3.1%，遜預期。 銀河證券業務發展董事羅尚沛預料，新秀麗未來兩季業績難有明顯改善，不過由於股價今年已累跌15%，已反映業績轉弱，再大跌空間應不大。 |
|
| 林嘉麒 |
2024-08-14T16:28 |
騰訊控股(00700)今日(14日)收市後派成績表，股價業績前向下，同系騰訊音樂(01698)昨日(13日)已經出左業績，由於市場憂慮公司前景，拖累股價今日一度瀉逾22%，同樣由騰訊持有慨閱文集團(00772)出完績後，股價連續兩日受壓，今日就輪到騰訊，到底呢份業績有邊部分要特別留意？ 元宇證券投資總監林嘉麒指，騰訊收入及純利增長未必係重點，市場主要關注點包括騰訊遊戲業務復甦動力，尤其可以跟大熱手遊《絕地求生》相提並論慨新手遊《地下城與勇士》，係咪比到投資者好大憧憬，因為近年好多科技股，包括騰訊，都係靠「慳」令純利可以高過市場預期，如果騰訊業績可以見到有實質增長，相信會比騰訊音樂及閱文更有賣點。 |
|
| 莊志雄 |
2024-08-14T16:17 |
美國昨晚(13日)公布慨生產物價指數(PPI)溫和，增加聯儲局9月減息慨籌碼，據最新利率期貨顯示，聯儲局減息0.5厘慨機率略為升溫，更略高於加0.25厘，點睇最新通脹同減息預期慨變化？ 「股市漁夫」創辦人莊志雄指，市場已經就短期減息預期計價，問題在於唔知減0.25厘還是0.5厘，早前，《彭博》報道指，如果睇利率期貨聯儲局會減9次息，每次0.25厘，其實睇美匯指數都可以睇到市場慨取態，但依家市場認為要合共減超過2厘息，問題係減息期間係咪循序漸進，即每次減0.25厘，合共減9次，如果依家要減2厘以上，就代表美國經濟陷入衰退，如果冇出現衰退，其實唔需要減2厘以上，如果經濟係「軟著陸」應該減1厘以下。 Lewis又指，依家慨變數係當聯儲局真係慢慢減息，通脹係咪會回升，因為通脹仍未完全受控，今次係因為聯儲局之前做錯野引發通脹，通脹開始之後，通脹預期亦升左好多，呢個諗法唔係咁易改變，聯儲局需要加息加得好狠，先可以完全遏制通脹，但如果9月啟動減息周期，就應該遏唔曬，將會死灰復燃，持續減息就會令通脹回升，到時聯儲局就會面臨困局。 |
|
| 盧志威 |
2024-08-14T12:07 |
美國7月生產物價指數(PPI)低過預期，按年及按月升幅都放緩，整體及核心PPI按年升2.2%和2.4%，反映通脹持續放緩，刺激美股3大指數昨晚(13日)齊升，其中，道指大升逾400點，納指更升2.4%。美國今晚(14日)會出消費物價指數(CPI)，數據係咪繼續左右美股大局？ 潤淼資產管理董事盧志威表示，睇返聯儲局長期溫和通脹目標，PPI升2.2%其實都收貨，所以昨晚美股表現興奮。另一方面，市場對聯儲局減息慨信心好大，包括短期減息慨持續性，以及幅度會較大，都對大市及資產價格有正面作用。 William又指，經濟數據主要反映個別業績表現，其實金融市場對利率變化較敏感，因為會直接影響融資、貸款等活動，可更大程度超前反映投資者行為。佢續指，如果CPI冇明顯走弱，再加埋各項數據指標及組成部分冇異動，基本上美股今晚易升難跌，同埋PPI數據靚仔，相信CPI應該唔會令市場失望。 |
|
| 郭家耀 |
2024-08-14T10:18 |
宏匯資產管理投資總監郭家耀推介創科實業(00669) 推介原因： - 中期業績增長強勁。 |
|
| 趙晞文 |
2024-08-13T18:34 |
裕元集團(00551)及寶勝國際(03813)出完業績後，股價齊齊造好，裕元上半年賺逾1.8億美元，達到盈喜上限，不過，收入按年跌逾3%，旗下寶勝上半年就多賺約10%，但收入跌約9%。兩家公司都係收入跌但盈利升，係咪反映純粹靠控制成本推高盈利？ 信達國際研究部董事趙晞文指，集團主業係造鞋，今年上半年業績仍算唔錯，首季整體生產量都有增長，考慮到本身主要客戶回補庫存，導致體育用品平均單價下跌，一定會拖累製造業務增長。 晞文又話，裕元上半年業績同之前慨盈喜絕對值差唔多，run-off因素及匯率抵銷對業績實際影響唔大。雖然裕元收入按年跌逾3%，但值得留意係，呢條數係計埋寶勝，整體而言，上半年業績算對辦。 |
|
| 李偉傑 |
2024-08-13T17:08 |
係柬埔寨開賭慨金界控股(03918)，股價今日(13日)一度瀉逾11%，低見2.95元，其後跌幅收窄。摩根士丹利指，第2季到訪柬埔寨慨內地旅客按年增長47%，據柬埔寨旅遊部統計顯示，上半年國際旅客316萬人次，按年增長23%，其中，內地旅客增長45%，成為當地旅遊業主要動力，雖然當地旅遊業復甦，旅客又增長理想，但似乎反映唔到係業績上面？ 華盛證券財富管理部董事李偉傑指，近年柬埔寨成為旅遊熱點，周邊旅遊、綜合度假已成為旅遊項目，而旅客較重視旅遊體驗，唔係淨係去賭場。此外，由於內地賭客資金方面有一定限制，因而影響賭收，故金界業績未能受惠。 至於金界股價，Jason估計，金界股價係3元水平有初步支持。 |
|
| 葉佩蘭 |
2024-08-13T16:10 |
國際油價一度反彈，紐約期油昨晚(12日)曾升至每桶80美元，倫敦布蘭特期就見過82美元，雙雙衝上3周高位，不過，紐油今日(13日)受制80美元，係咪預期美國國務卿布林肯(Antony Blinken)去中東做協調可以令局勢降溫？需求旺季過後，就係石油輸出國組織(OPEC)終止減產慨時間，油價短期係咪已見頂？ 英皇期貨營業部總裁葉佩蘭指，油價基本因素仍較弱，呢浸升勢主要同中東局勢有關，至於局勢係咪有機會緩和仍有變數，其中，伊朗涉及石油供應，如果局勢進一步升級，美國有機會再制裁伊朗，屆時就會影響供應，相信呢件事短期會持續發酵，Fion估計，油價短期係84美元水平會有較大阻力。 |
|
| 譚智樂 |
2024-08-13T15:19 |
截至早上11時止，1小時內《彭博》用戶搜尋量最多港股，依次為建設銀行(00939)、同程旅行(00780)、美團(03690)、華潤置地(01109)及聯想集團(00992)。 內銀今日(13日)整體表現強勢，除左建行，好多隻內銀股都趁勢向上突破，派中期成績表前，市場係咪炒內銀股會派中期息？係依家慨市況下，7厘息係咪好吸引？ 富途證券首席分析師譚智樂指，如果呢類高息股慨派息能力畀到市場信心，今年有望跑贏大市。雖然經濟低迷，但主要同消費降級或經濟疲弱有關，今年亦未見有大型內房出現壞帳、違約等問題，所以市場對內銀派息能力有信心，短期關鍵在於會唔會派中期息。 Arnold續指，國企改革鼓勵企業提升透明度，派息由每年派1次，改為1年派兩次，但係股息率不變下，企業都願意跟政策行。佢估計，內銀股業績前仍會強勢，但短線而言，唔建議係貼近52周高位追入，中長線而言，投資者可以係現價買入建行，有近8厘股息率之餘，股價有機會上試6元水平。 |
|