| 評論員 |
時間 |
內容 |
標籤 |
| 郭思治 |
2024-12-16T15:22 |
大市已身處12月份之中旬，而直到執筆一刻止計，本月大市之形態仍暫屬先低而後高，恆指暫是由3日之低位19,386點升至10日之高位21,070點，即在短短六個交易日內，恆指已急升1,684點，由於升勢略偏促，故大市於高台稍見回吐，期間恆指亦不斷反覆穿梭於50天線（約在20,271點左近）之間，但有一點需指出，衹要恆指能持續緊扣著50天線，即不用擔心大市會有明顯逆轉，衹是在動力不足之下，大市暫仍缺一股欲上衝之動力，另外，以1,684點之波幅計似已不算小，或已可滿足月內之所需，但由於一個月之高低位是不該同時出現於6個交易日之內，故從理論上看，在本月餘下之交易日，或會有更大之波幅點出現，從而拉闊月內高低位之距離以符合慣性之要求。 至於短期後市在先低後高之形態主導下，恆指能否試頂或破頂，不妨參考移動線方面之表現，而直到目前一刻止計，各組平均移動線之排列由上而下為50天線（約在20,271點左近），10天線（約在19,977點左近），20天線（約在19,712點左近） ，100天線（約在19,056點左近）及250天線（約在17,886點左近），單從技術上看，衹要恆指能穩守在50天線之上，論形勢當有利於候機試頂，問題是大市之動力能否配合，惟如恆指一旦反覆於50天線之下，則其時大市不但漸擺脫試頂之趨勢，且一旦沽壓稍作主動，大市可能會稍下試20,000點及10天線之支持。 傳統而言，12月份均會有基金之粉飾廚窗活動，從近期所見，不少股份之表現一直優於大市，個別更持續緊貼著年內高位或仍穩步續創年內之新高，惟相關粉飾活動之目的衹為爭取在年結時，有較佳之表現而已，似不可能發展成新一潮之升浪，單從大市之交投略為偏疏已可見一斑，故投資者不宜跟市太貼。 |
|
| 盧志威 |
2024-12-16T12:35 |
晶片股博通(Broadcom)交到靚業績之餘，公司又睇好今季人工智能(AI)產品銷售前景，刺激股價上周五(13日)收市勁升24%，市值更首次衝破1萬億美元，令美股又多1隻萬億美元市值股份，係咪應該沽英偉達(Nvidia)換馬博通，因為股份只係岩岩開始發力？ 潤淼資產管理董事盧志威表示，Nvidia係一家早已交出成績慨公司，亦係一個潮流，公司靠技術成為行業龍頭，博通就係客製化晶片(ASIC)，要衡量兩者有幾大差距，值唔值得畀一個溢價Nvidia，呢個就係佢地「蹺蹺板效應」慨分別。 William又話，依家市場非常睇好博通未來3至5年前景，仲可以搶佔到Nvidia慨市場，單係呢個因素都足以可以炒一輪，所以預期未來落博通慨資金應該唔少，所以睇好博通股價可以繼續上。 |
|
| 李浩然 |
2024-12-16T11:59 |
歷史不斷重演，但投資者的情緒卻從未學會冷靜。股市再創新高，投資者再次陷入兩難：是該「上車」追逐漲幅，還是等待不可避免的市場回調？這種心理博弈讓人不禁聯想到一場持久的心理測驗，結論卻似乎早已寫在數據里。 數字不會說謊，但它也不會安慰你 2023年，投資者已經見證了將近60次的股市新高，平均每四個交易日就有一次新高。過去十年，標普500指數創下了超過300次歷史新高。自1950年以來，10年區間內的平均新高次數為170次，而20年的平均達到319次。換句話說，從數據上看，股市新高不是異常，而是常態。 這聽起來令人安心？或許吧。但數據背後的現實是，新高中的某一次將是熊市來臨的最後一聲鐘響，這讓每一位投資者的神經都繃得更緊。畢竟，沒有人想在市場巔峰時砸下重金，然後眼睜睜看著資產縮水成零頭。 情緒 vs. 數學：誰贏了？ 投資最大的敵人從來不是市場本身，而是人類的情緒。當股市不斷創新高，手上握著一筆閒置現金時，焦慮和恐懼會迅速超越理性。市場的歷史數據固然重要，但在情緒面前，數學似乎總是先輸一招。 投資者必須承認，過去十多年的牛市確實讓人失去了平常心。從全球金融海嘯（GFC）以來，指數一路高歌猛進，而這種「順風車效應」讓投資者的心理逐漸滑向兩個極端：過度自信與過度懷疑。然而，正如數據反映的，股市的表現往往無法用短期情緒來預測。 規劃是唯一的救贖 若對於在新高時進場感到不安，那麼也許根本的問題並非市場，而是投資策略。投資本質上是一場長期博弈，而非短期押注。以下幾條建議或許可以幫助在情緒與理性之間找到平衡： 一，一次性全額投入：如果相信數據，並願意接受風險，那麼一次性投入是最符合「股市長期向上趨勢」的選擇。畢竟，市場大多數時間都是在上漲。 二，定期定額分批進場：這種策略適合那些想要分散風險、降低情緒波動的投資者。通過分批投入，可以避免「高點買入」的心理壓力，同時也為自己設置了一層「後悔最小化」的保護罩。 三，分散配置資產：股市不是唯一的投資選擇。將資金分配到股票、債券、現金甚至其他資產中，可以有效降低整體風險。雖然回報可能不如全股票組合，但這種策略至少讓你能睡個安穩覺。 完美決策是個謊言 投資者也必須接受一個殘酷的現實，所有的投資決策都是基於不完全的信息。市場永遠充滿不確定性，完美的投資決策只有在事後才會顯得明顯。正因如此，提前制定計劃至關重要。當市場創新高時，計劃能幫助你避免臨時起意、隨意操作，從而減少感情用事的可能性。 巔峰之後：冷靜的智慧 股市新高固然讓人忐忑，但正如歷史的故教訓，這並不是市場的終點，而只是正常波動的一部分。投資者需要的是一份冷靜的頭腦和一套清晰的策略。或許正如經典的投資諺語所說：「最好的投資時間是十年前，其次是現在。」與其糾結於是否會買在巔峰，不如專注於制定一個適合自己的長期計劃。 畢竟，市場的走勢無法控制，但你的行動卻可以。至於那些期待「完美時機」的人，或許只能等到市場的鐘聲敲響，卻發現自己仍站在場外，徒留唏噓。 |
|
| 姚浩然 |
2024-12-16T10:15 |
亨達財富管理董事總經理姚浩然推介名創優品(09896) 推介原因： -早前收購永輝超市，曾拖累股價大跌 -惟近日參考胖東來，將超市打造與山姆競爭。 |
|
| 梁傑文 |
2024-12-13T22:45 |
中信國際電訊(01883)發盈警，預告全年股東應佔溢利介乎8.6億至9.2億元，按年減少25%至30%。《香港股票財技密碼》作者梁傑文認為，全年盈警原因，與中期原因相若，反映管理層無力扭轉業務跌勢。公司中期賺4.55億元，以全年盈警下限計，下半年業績甚至是進一步轉差，相信中期業務走勢都會是維持轉弱。 |
|
| 姚浩然 |
2024-12-13T16:30 |
雖然臨近年底，但美股表現仍算強，美國總統當選人特朗普(Donald Trump)就快上任，熱炒「Trump Trade」慨股份繼續「有鑊氣」，「Trump Trade」會唔會成為投資主流？ 亨達財富管理董事總經理姚浩然指，市場憧憬特朗普上任後，佢推出慨政策會利好某些行業，所以同「Trump Trade」相關慨股份，短線會繼續造好。不過，市場亦會係佢上任後，會拿佢慨參選政綱「逐樣對」，睇下有冇「走數」，所以佢上任前美股有機會出現調整。 佢又估計，美股調整後，特朗普就著手草擬減稅等政策措施，屆時美國企業可望受惠，相信盈利及收入將會穩健。姚浩然又提醒，要留意美國減息步伐，美股明年上半年可以睇得比較樂觀，始終當地經濟增長仍然平穩，標普500指數有機會上望7000點水平。 |
|
| 陳建良 |
2024-12-13T15:40 |
港股昨日(12日)反彈，因為對中央經濟工作會議有憧憬，其中，內需股表現最搶鏡，不過，中經會結束後，恆生指數今日(13日)又跌過，午後更一度插穿20000關，瀉逾400點，可能同會議仍然冇提及一些實質數字有關，大行亦指，對中經會冇再提及具體樓市去庫存措施有些失望。其實中經會結果係咪預期之內？ 勝利瑞柏基金管理合伙人暨投資總監陳建良指，市場對中經會有兩方面慨預期，首先係希望中央擴大財政政策，結果冇提及，其次係希望有實際數字交代，但亦都冇公布，就令唔少投資者開始質疑，之前提出慨政策係咪可以令房地產市場止跌回穩。 KL又指，其實市場由始至終慨關注點都係中央救市、救經濟慨措施，到底成效有幾大，依家比唔到個預期市場，有負面反應都係好正常，佢估計，恆指20000關好難守得住，但大市波幅年底好大機會慢慢收窄返。 |
|
| 梁偉源 |
2024-12-13T13:58 |
截至早上11時止，1小時內《彭博》搜尋量最多港股，龍湖集團(00960)、百威亞太(01876)、萬科企業(02202)、希慎興業(00014)及中國海外發展(00688)。 中央經濟工作會議定調同中央政治局會議差唔多，繼續推動房地產市場止跌回穩，內房股今日(13日)跌幅顯著，其中，龍湖及中海外更打入藍籌5大跌幅榜，係咪市場之前對中經會期望太大？ 大華繼顯執行董事梁偉源指，每年會議政策都只係定出一些方向性目標，唔會講到執行細節，但每次開會前都一定有炒作，今次都唔例外，其實中央今年以來已推出唔少同房地產相關慨政策，只係今次冇更新慨政策，導致市場咁失望。 佢又話，雖然內房股股價跌左落黎，但唔需要睇得太悲觀，因為中央會持續推出政策，加上10月及11月一手銷售已有改善左，相信明年第1季按年銷售將錄得顯著升幅，屆時市場氣氛將會好轉。 |
|
| 聶振邦 |
2024-12-13T11:54 |
歐洲央行昨晚(12日)一如預期減息0.25厘，但瑞士央行爆冷大手減息0.5厘，減息消息一出，歐元及瑞郎回軟，不過，美匯指數升至107水平。睇返兩家央行減息幅度，係咪反映部分十國集團(G10)國家對明年經濟前景有憂慮？此外，明年投資市場又會點發展？ 博威環球證券金融首席分析師聶振邦指，歐央行減息意圖明顯，並已下調2024至2026年經濟增長預測，因為歐央行對歐洲經濟表現有保留，所以減息態度較積極，以應對明年環球通脹有機會再升溫慨局面。 投資市場方面，聶Sir又話，美股係咪會繼續一枝獨秀仲要觀察，因為部分特朗普(Donald Trump)經濟政策憧憬已反映係股市，佢明年1月正式上任後，市場唔會再關注呢些憧憬，焦點會落係政策能唔能夠令實體經濟受惠，甚至唔排除美國有機會陷入滯脹，繼而令股市有下行壓力。 |
|
| 盧志明 |
2024-12-13T10:36 |
大唐資本投資策略部總監盧志明攜程集團(09961) 推介原因： -數據顯示東北冬季預訂單量按年增長35%，哈爾濱、瀋陽及長春成熱門目的地 -韓國遊客入境遊訂單按月增長約15%，按年大增150% -第3季業績超預期，高基數下收入增長穩定，成本控制理想。 |
|
| 林嘉麒 |
2024-12-12T23:49 |
老鋪黃金(06181)股價再創新高，見236元，較招股價40.5元累升近五倍。元宇證券基金投資總監林嘉麒指，老鋪黃金今年一月上市，半年禁售期即將屆滿，不排會有解禁股份趁高位獲利。由於上市時，市況欠佳，上沖市初期公司股價橫行，可能不少街貨已落入大戶手中，一旦有投資者沽貨可能引發雪球效應，回跌幅度可以好大。 |
|
| 盧楚仁 |
2024-12-12T18:18 |
阿拉比卡咖啡期貨周二(10日)曾創紀錄新高，雖然昨日(11日)出現回套，但仍然係今年表現最好慨商品之一，到底呢浸升浪可以持續幾耐？ 獨立外匯商品分析師盧楚仁指，近期可可豆、咖啡豆價格因巴西乾旱而上升，但乾旱只係短暫性因素，所以唔排除咖啡豆價格短期有回套壓力。佢又話，要留意特朗普(Donald Trump)上任後會對巴西慨關稅政策，因為美國商家、消費者或會係佢上任前大手買入咖啡豆，都會利好近期價格表現。 Jasper續指，除非巴西乾旱情況好快過去，同埋特朗普唔向巴西徵收關稅，否則，阿拉比卡咖啡期貨有機會再作歷史新高。 |
|
| 植耀輝 |
2024-12-12T16:50 |
內需股今日(12日)造好，攜程集團(09961)繼續跑出，午後一度升5.5%，報592.5元，集團第3季業績唔錯，按年多賺48%，收入增速加快，展望明年，旅遊需求支唔支持到繼續強勁增長？旅遊股長線應該點部署？ 耀才證券研究部總監植耀輝指，市場憧憬中央經濟工作會議有新措施，今日唔止內需股，整體消費股都向上，攜程跑出主要有2個原因，首先係業績對辦，所以股價放榜後可以造好，其次係近期唔同國家都推出旅遊免簽證，可以增加消費者旅遊意欲。 佢又話，由於市民外遊意欲仍大，相信相關行業會繼續受惠，今年行業增長強勁，但之後keep唔keep到都會受其他外在因素影響，但睇返行業現時慨特性，呢個增長趨勢仲可以保持，所以攜程長線仍值得憧憬。 |
|
| 林嘉麒 |
2024-12-11T17:55 |
港產人工智能(AI)「獨角獸」商湯(00020)計劃配股集資，配股價1.5元，較昨日(10日)收市價折讓逾6%，集資近28億元，雖然商湯股價今日(11日)向下，但仍守得住配股價，公司話今次集資主要用黎支持核心業務發展，並用作一般營運資金。其實公司今年6月都配過股，兩次加埋合共淨籌近50億元，如果未來股價再炒高，市況又配合，商湯會唔會再「抽水」？ 元宇證券基金投資總監林嘉麒指，科技公司資金需求一般較大，尤其係AI產業，今次配股較多係國家基金，唔少基金慨成立目的都係支持相關行業，所以今次配股唔止可以畀商湯拿到資金，仲可以比到貨基金去投資，其實呢個情況係其他行業都有可能發生，例如基建產業。佢又話，當市場氣氛向好，股價再炒高時，商湯再配股集資係有可能。 |
|
| 彭偉新 |
2024-12-11T15:41 |
截至早上11時止，1小時內《彭博》用戶關注度上升最多港股，依次為海底撈(06862)、萬科企業(02202)、蒙牛乳業(02319)、中國建材(03323)、領展房產基金(00823)。 雖然中央政治局會議講明要谷內需，亦提及其他刺激措施，但港股繼昨日(10日)又升逾600點，到收市倒插過百點後，點解今日(11日)持續受壓？ 資深證券分析師彭偉新指，依家市場寄望黎緊慨中央經濟工作會議，會就政治局會議提出慨措施有返些實際數字，例如係支持經濟及消費慨措施規模有幾大等。Castor又話，雖然政治局會議講明要谷內需，但過去4年，中經會其中1個重點都係刺激內需，但成效似乎唔理想，消費更持續降級，所以投資者今次都會比較審慎，寧願等齊所有消息及數據再做部署。 Castor續指，內需問題的確令人憂慮，因出口下跌帶來慨影響係環環相扣，出口唔理想意味工業產能低，繼而影響就業，到時要谷內需只會更困難，Castor更形容現時內地循環引擎「打唔著」。 |
|
| 莊志雄 |
2024-12-11T15:20 |
美股近日受壓，其中，道指已連跌4個交易日，係咪黎到年底開始有些疲態？展望明年，美股又會點走，特朗普將會係明年1月20日正式上任，美股明年最大風險又係邊度？睇返特朗普上個任期，初期美元都強勢，但好快就回落，今次會唔會歷史重演機會大唔大？ 「股市漁夫」創辦人莊志雄指，上星期都提及，希望Trump Trade股票升完一浸後，科技股可以接力推高股市，最簡單就睇科技指數交易所買賣基金(ETF)，呢隻ETF唔包括Tesla，而蘋果公司(Apple Inc.)、英偉達(Nvidia)及微軟(Microsoft)呢3大股王佔比高達40%，而上星期中就出現突破，衝破左7月特朗普遇襲前後高位，呢個係一個主要阻力，原本走勢幾好，但去到昨晚(11日)跌返落黎，依家希望可以守到趨勢線，如果守唔到就要小心。 |
|
| 盧志威 |
2024-12-11T11:52 |
美國總統當選人特朗普(Donald Trump)下個月就「回歸」白宮，之前炒到癲慨「特朗普交易」(Trump Trade)仲有冇得炒？此外，雖然SpaceX未上市，但公司估值已升至3500億美元，太空概念又有冇得炒？ 潤淼資產管理董事盧志威指，特朗普媒體及科技集團(Trump Media & Technology Group)、Tesla、比特幣(Bitcoin)、Twitter，呢些熱炒Trump Trade慨資產，係特朗普上任後，點都會有一定利好，例如立法踢走TikTok就會利好Twitter。William認為，Trump Trade唔會咁快炒完，但要小心呢些資產價格短期有機會見頂回落。 William又話，市場對SpaceX慨樂觀情緒，主要來自Tesla股價已炒到好高，令樂觀情緒蔓延去另一個概念，但好多野始終要等SpaceX上市先知。 |
|
| 陳欣 |
2024-12-10T17:57 |
中央政治局昨日(9日)開會，相隔14年再重提「適度寬鬆」貨幣政策，加上外貿表現麻麻，同埋中國10年期國債孳息率再創新低，理論上人仔應該會貶值，但點解離岸人仔今日(10日)一度轉強逾200點子？ 連連STAR FX總經理陳欣指，其實跟得貼慨投資者，早已察覺到中央想行返寬鬆貨幣政策，只係欠一個正式公布，所以某程度上已消化左呢個因素。 Chase續指，內地依家首要任務係谷內需，政治局會議亦強調要重點刺激內需，相信相關政策會繼續出台，若呢些政策有效，人仔有機會反彈，但短期而言，人仔會偏強，但唔會明顯轉勢，除非經濟數據明顯好轉，估計短線睇7.3，阻力位擺7.2。 |
|
| 趙晞文 |
2024-12-10T17:37 |
小米集團(01810)昨日(9日)發布旗下首款電動SUV YU7規格，採用寧德時代慨三元鋰離子電池，長續航力係YU7系列基本賣點，依家同業之中，SUV只有Tesla慨Model Y及理想汽車(02015)慨L6，小米有左YU7，係咪可以透過生產規模及生產效益推高小米汽車毛利率？ 信達國際研究部董事趙晞文指，小米毛利率取決於供應鏈慨控制能力，亦要睇產能利潤及新能源汽車銷售收入結構，雖然YU7明年中先至推出，但參考返SU7係銷量逐步提升下，基本上對小米毛利率都有幫助，不過，YU7產量應該唔會係預訂階段，就做到Model Y及L6每月有逾2萬至3萬部，除非YU7以震撼價推出市場，例如車價只係逾20萬元人仔，就有逾700公里慨續航力，叫座力就可以進一步提升，但現階段仲係言之尚早，要等集團披露更多YU7規格細節，先可以再評估。 |
|
| 李偉傑 |
2024-12-10T16:40 |
昨日(9日)召開慨中央政治局會議，釋出慨政策訊號超乎市場預期，其中，當局相隔14年再度重提「適度寬鬆」，惹黎市場關注，有大行更形容「適度寬鬆」是史上最進取慨態度，係中央表明加大「放水」力度穩股樓下，港股牛市會唔會重臨？ 華盛證券財富管理部董事李偉傑坦言，對港股牛市重臨冇太大期望，但認為恆生指數係低位有反彈動力，港股昨日飆逾500點後，今朝(10日)曾再衝高逾650點，但之後升幅不斷收窄，午後更倒跌。 不過，A股走勢就冇咁Chok，滬深幾大主要指數今日都有得升，相信係觀望緊明日(11日)召開慨中央經濟工作會議，睇下到時有咩政策細節公布。 Jason認為，中長線而言，寬鬆貨幣政策對港股及A股都有幫助，又預期港股明年走勢將逐漸好轉。 |
|
| 黃偉豪 |
2024-12-10T12:52 |
小米集團(01810)股價持續強勢，近期已升穿30元阻力，今朝(10日)更衝上逾3年半高位，小米預告最快明年6月就會推出新車YU7，預期會硬撼Tesla慨Model Y，如果想做中線部署有咩要留意？ 獨立股評人黃偉豪指，從中線角度睇小米表現正面，市場對新車會有一定憧憬，加上手機業務表現平穩，唔需要擔心小米前景。不過，Ravi提醒要睇住小米股價，因為過去1年升幅有些誇張，即使大市表現反覆，小米仍不斷破頂，預期股價短期有機會出現波動。 佢又指，小米熱門CALL明年5月到期，價外17%，槓桿做到5倍，建議保守些揀行使價30元做好倉部署，止蝕位擺28元。 |
|
| 王良享 |
2024-12-10T12:28 |
中央經濟工作會議召開前，中央政治局昨日(9日)搶閘開會，會議指今年經濟發展主要目標任務將順利完成，仲首次出現「加強超常規逆周期調整」呢個字眼，實施更積極慨財政政策，同埋適度寬鬆貨幣政策，亦講明會加大「放水」力度穩股樓。值得留意係，雖然見到決心係大左，但只係字眼上，冇提及實質數字，似乎同9月底、10月初慨情況類似，當時市場係失望。 臻享顧問董事總經理王良享估計，中經會係明年經濟增長目標方面，至少會暗示同今年慨5%相若，點解睇唔實質政策數字，例如國債及專項債加碼規模，呢些牽涉到美國總統當選人特朗普(Donald Trump)上場後會點出招，例如對華關稅加幾多，市場估計，加稅唔係一刀切，可能只係個別中國貨加多些，而所謂加60%關稅只係靠嚇。佢又話，初步黎講特朗普話要加10%關稅，其實亦反映佢都擔心加關稅加得太多，會令美國通脹大升，令進一步減息慨機會唔大，另一方面，亦要拿到足夠資金，美國先有機會減稅。 Tommy又認為，內地都要睇住特朗普最終會加幾多關稅，以平均加20%關稅計，涉及約千億美元，影響似乎唔係太大，內地應對政策就唔需要去到咁盡，就算之後有數字出黎，都係要摸住石頭過河。 |
|
| 梁偉民 |
2024-12-10T11:53 |
美國總統當選人特朗普(Donald Trump)最近透露，曾經同國家主席習近平通話，但冇透露其他細節，雙方對上一次溝通已經係3年前，今次通話係咪代表中美關係回暖？但與此同時，央視新聞昨日(9日)指，英偉達(Nvidia)涉嫌違反反壟斷法，市監總局已依法立案調查，事件對Nvidia以至中美關係有咩影響？ 高富金融集團投資總監梁偉民認為，其實中美對立已經預左，雙方關係唔再惡化已經好好，對內地經濟黎講，中美衝突絕對係一大隱憂，但Wyman認為亦唔需要太擔心，除非美國真係將對華關稅上調至60%或以上，又或者有其他制裁行動，否則，市場已有足夠準備應對。未來幾個月，除左留意關稅問題，亦要留意內地有冇應對策略。 至於立案調查Nvidia，Wyman相信只係一個警戒作用，內地唔會因此唔再買Nvidia晶片，事實上，亦冇其他替代品。佢又指，反而要留意美國針對Nvidia晶片出口到內地慨禁令，依家Nvidia慨高階晶片唔可以賣畀內地，若未來禁止再升級，所有晶片都唔可以賣畀內地，影響就非常嚴重。 |
|
| 陳鳳珠 |
2024-12-10T10:17 |
獨立股評人陳鳳珠推介冠君產業信託(02778) 推介原因： -中期租金收益按年跌4.5%至約11億元，可派收入減12% -6月底前，朗豪坊辦公室出租率跌至87%，但朗豪坊商場恢復至100%出租率 -深圳一簽多行。 |
|
| 鄭家華 |
2024-12-09T22:52 |
粵海投資(00270)擬實物分派粵海置地(00124)股份，作為特別股息，每股分派0.193股粵海置地。 阿仕特朗資產管理董事鄭家華表示，粵投這次分派粵海置地股份作為特別息，息率低於2%，相信目的純粹為剝離內房業務，有助提升公司估值。 |
|
| 聶振邦 |
2024-12-09T17:46 |
網易(09999)股價近期自低位回升逾20%，集團之前預告今個月有兩款新Game上線，其中，《漫威爭鋒》(Marvel Rivals)已經係上周五(6日)全球免費上線，用家正評比率高達76%，初步反應理想，網易股價係咪值得睇好？ 博威環球證券金融首席分析師聶振邦指，網易前景理想，新Game可以係多個平台體驗，除左可以直接購買，亦有免費版本吸引大量玩家下載，之後再提供唔同課金機會提升遊戲體驗。據網易公布，《漫威爭鋒》係短短72小時，玩家人數已突破1000萬，《漫威爭鋒》另1個賣點係可以吸引到一眾Marvel fans關注。 聶Sir又指，網易另1款有中國歷史背景慨新Game《燕雲十六聲》將會係12月27日上線，除左內地玩家，亦有機會出現好似《黑神話:悟空》慨爆紅情況，吸引海外玩家，如果公測成功，相信網易未來會善用古代亂世背景，設計更多相關遊戲，因此，睇好網易股價有力挑戰160元。 |
|
| 梁傑文 |
2024-12-09T17:20 |
上周二(3日)開市前宣布停牌慨利福中國(02136)，獲主席兼大股東，人稱「細劉」慨劉鑾鴻提私有化，每股作價0.913元，較停牌前有逾21%溢價，利福今朝(9日)復牌股價一度大升逾29%，依家係咪私有化慨好時機，點睇今次慨私有化出價？ 《香港股票財技密碼》作者梁傑文指，對大股東黎講依家絕對係私有好時機，港股經歷早前慨牛市後，開始慢慢回落，令細價股交投都比較有彈性，呢些因素都有利大股東私有化，對小股東黎講，公司業績倒退、估值低殘下，為佢地提供一個有溢價，將股份變現慨機會，相信會有唔少股東支持私有化。 Mike又認為，今次私有價較6月底慨每股資產淨值(NAV)有折讓，但今次交易特別之處在於大股東之後，可因應市場環境變化選擇提高出價，以增加私有化成功機率，一般企業宣布私有化後市價會有折讓，但利福股價反而大升，反映市場憧憬遲些會有加價空間。 |
|
| 植耀輝 |
2024-12-06T22:52 |
京東物流(02618)增持36.43%跨越速運，作價64.84億元人民幣。 耀才證券研究部總監植耀輝表示，跨越速運主要針對企業對企業的物流運輸，近年業績亦保持高速增長，相信京東物流全資擁有跨越速運後，對往後業務有正面幫助。 |
|
| 植耀輝 |
2024-12-06T18:00 |
平安好醫生(01833)今日(6日)除淨，股價價量齊升，市場主要炒作大股東或因「以股代息」觸發全購，其實集團11中宣布豪派9.7元特息時都講過，若控股股東中國平安(02318)附屬安鑫揀以股代息就會觸發全購，依家安鑫持股量39.41%，到底最後揀以股代息機會大唔大？ 耀才證券研究部總監植耀輝指，平醫上市時集資所得本來用黎發展業務，但由於現時慨市況已經唔同左，加上個別公司之間審查有難度，所以平醫傾向將當日集返黎慨錢派出去。 Stanley又指，其實平保過往亦曾經透過「以股代息」增持陸控(06623)，所以係有方面慨前科，因此，估計平保今次揀以股代息慨機會都幾大。 |
|
| 黃敏碩 |
2024-12-06T17:54 |
發展科技美學慨巨子生物(02367)上半年收入按年增長68%至20.7億元，相信今年銷售按年增長40%至45%應該可以達標，不過，呢類醫美產品係內地競爭好大，除左本土不斷有新競爭者加入，外國相關品牌亦唔少，巨子生物係醫美方面慨領導地位可唔可以維持到？ 王道資本及家族資產管理執行董事黃敏碩表示，巨子生物毛利率都幾高，未來增長方面，只要法規唔係收得太緊，佢應該keep到領導地位。 Michael又話，巨子生物主要產品「可復美」及「可麗金」，依家貢獻集團利潤逾90%，雖然產品集中度高，但呢兩個品牌係市場有一定慨定位，相信集中度高暫時對佢地黎講仍然係利多於弊。 |
|
| 關焯照 |
2024-12-06T17:39 |
港股今日(6日)突然好興奮，半日成交已超過800億元，一度上返19900點樓上，市傳中央經濟工作會議下周三(11日)及下周四(12日)召開，市場係咪又開始炒政策憧憬？2024年只剩返10幾個交易日，恆生指數有冇機會黎個「最後衝刺」上返20000點？ 冠域商業及經濟研究中心主任關焯照認為，恆指上返20000點結束2024年機會唔大，反而有可能係中經會前見返2字頭，有機會上返50天線水平，即20300點水平，但睇返「往績」，開完中經會之後，大市就會插水，曾經試過會後兩個星期累跌逾3000點，佢估計，今次都會出現呢個情境，會前炒政策憧憬，會後就急散水。 關博士提醒，一旦恆指真係上返20000點水平唔好再追，因為之後有機會返落19000至19300點。 |
|
| 梁偉源 |
2024-12-06T14:57 |
截至早上11時止，過去1小時內《彭博》用戶搜尋量最多港股，依次為平安好醫生(01833)，普拉達(01913)、康方生物(09926)、建設銀行(00939)、藥明生物(02269)。 平醫今日(6日)除淨，公司之前宣布可「以股代息」，股價一度抽升逾24%，市場猜測持股逾39%慨中國平安(02318)會因今次收特別息觸發全面收購，但仍要等明年1月24日正式派息時，先知道平保收錢還是收股，如果大股東選擇「以股代息」，當中有咩盤算？ 大華繼顯執行董事梁偉源指，如果大股東揀股唔揀錢，純粹係一個技術性因素，要按例提全面收購，但相信收購價未必吸引，因為相對每股資產淨值(NAV)有一定距離，而小股東接受全面收購亦冇乜著數，但值得留意係，大股東透過今次「以股代息」，變相增持約2%股權，但又唔使自己出錢，呢個可能先至係大股東真正慨考慮。 Steven又指，雖然股價由高位跌左落黎，平之餘亦幾吸引，但全面收購涉及好大筆資金，所以平保未必想係呢個時候做呢件事。 |
|
| 聶振邦 |
2024-12-06T11:50 |
美國電動車生產商Tesla股價昨晚(5日)「踩油上」，一度抽升約5%，會唔會同升到唔識慨比特幣(Bitcoin)有關？Tesla係10月將手頭上慨Bitcoin轉倉，惹黎市場揣測係咪打算清倉，Tesla股價昨晚係「科技7雄」(Magnificent 7)之中跑出，係咪同Bitcoin有關？ 博威環球證券金融首席分析師聶振邦指，Tesla股價走勢或多或少都同Bitcoin有關，但更多同內地新能源汽車有關，因為內地新能源汽車銷情唔錯，意味全球需求大，而Tesla作為全球龍頭電動車企，市場一定睇好公司前景。 聶Sir又話，另一個利好Tesla股價慨因素係，集團行政總裁馬斯克(Elon Musk)同美國總統當選人特朗普(Donald Trump)關係好，資金過去一段時間不斷流入特朗普概念股，Tesla亦係其中1隻受惠股。 |
|
| 彭偉新 |
2024-12-06T10:00 |
獨立股評人彭偉新推介美的集團(0300) 推介原因： -去年全年營業額升8%，毛利升約19%至超過980億人民幣 -去年毛利率26.4%，上半年進一步改善至27% -市場白色家電的以舊換新補貼計劃。 |
|
| 熊俊傑 |
2024-12-05T17:16 |
外圍科技股、比特幣(Bitcoin)強勢，金價回軟，市場避險情緒降溫，投資者繼續觀望美國明晚(6日)出爐慨11月就業數據，除經齊數據外，黃金ETF持倉較2020年高位少25%，同金價破頂慨情況背馳，係咪預示金價就快回落？ 獨立商品外匯分析師熊俊傑指，金價破頂後出現回調好合理，雖然黃金ETF持倉減少同金價破頂慨背馳情況已持續一段長時間，但只係基於市場情緒及，以及因為用美元計價而出現調整。 佢又話，整體而言，金價係現水平宜睇得更審慎，因為有唔同因素支持金價繼續向上，包括環球央行啟動減息周期，雖然減息步伐放慢，但息口向下仍然係大方向，若金價唔跌穿每盎司2580美元，可上望2800美元。 |
|
| 植耀輝 |
2024-12-05T16:47 |
匯豐控股(00005)股價過去1個月錄得單位數升幅，跑贏大市，集團上季業績靚，有息派之餘，又再開展30億美元回購計劃，近月亦有簡化組織及裁員等動作，加上洽售南非企業銀行業務慨消息，以及積極重組業務及架構，以節省成本，匯控股價已連升7個交易日，累升約3.5%，今日(5日)暫時好淡爭持，投資者係咪應該趁機部署？ 耀才證券研究部總監植耀輝指，匯控股價已升左唔少，若純粹憧憬業務狀況係可以留意，但佢認為，抱收息心態買匯控會比較好，始終架構重組主要目的係減少開支，更關鍵係業務做得更好，不過，集團依家係亞太區面對唔少挑戰，建議冇貨慨投資者毋須心急入場，暫時可先觀望。 |
|
| 王良享 |
2024-12-05T15:17 |
特朗普交易(Trump Trade)係特朗普未當選前已偷步喪炒，其中，美股係10月初起步，之後一直升唔停，值得留意係，金價係特朗普當選前後冇太大變動，過去3個月，黃金期貨價格只係升左約6%，同其他資產比較如比特幣(Bitcoin)等，表現差天共地。特朗普勝選，加上共和黨全面控制參眾兩院，大大減低內部不穩定性，黃價未來值唔值得睇好？ 臻享顧問董事總經理王良享估計，美國不明朗因素係特朗普未來4年任期將會減少，但佢較有自己慨主張，所以議會慨意見同佢慨施政未必有太大關係。 去美元化方面，Tommy話，自俄烏戰事後，市場尋求更好慨資產儲備，令黃金有更大吸引力，過往利率上升時，金價就會跌，但近幾年呢個情況出現轉變，加上美國服務性通脹應該已見頂，息口又未有反彈空間，黃金仍然係唔少投資者會考慮慨儲備資產，加上地緣政治因素一直存在，風險持續高企，因此，黃金仍有佢慨吸引力。 |
|
| 羅尚沛 |
2024-12-04T22:41 |
中聯重科(01157)展開新一輪回購行動，周三回購85.78萬股，涉資455.7萬元。 銀河證券業務發展董事羅尚沛表示，中聯重科上一輪回購於2023年2-3月，隨後公布的2023年季度業績有改善，但並不代表今輪回購，亦暗示公司明年業績重拾強勁增長動力。 |
|
| 林嘉麒 |
2024-12-04T16:48 |
摩根大通今日(4日)出報告，比較A股及港股慨公用股，該行指出，由於內地公用股息率較高，加上預期內地息口明年持續低企，所以較睇好內地公用股明年第1季表現。若人民銀行持續減息，高息公用股係咪可以睇高一線？ 元宇證券基金投資總監林嘉麒指，股票息率回報及內地基準利率只要夠闊，就會有資金關注，尤其內地息口正處於歷史偏低水平，對比擺錢係銀行，大部分投資者都傾向投資公用股，尤其內地公用股回報較高。不過，依家投資市場多左唔同選擇，例如境外投資，所以內地公用股未必係唯一慨「資金避難所」。 KK又提醒，要留意內地公用股負債比率一般較高，限制左機構投資者慨關注度，雖然估值較貴，但勝在息率較吸引。 |
|
| 莊志雄 |
2024-12-04T15:39 |
自特朗普(Donald Trump)勝出美國總統大選後，美股上升速度似乎加快，佢主張慨「美國優先」及減稅措施，預期可惠及小型企業，特朗普慨政策對美股以至其他股市有咩影響？ 「股市漁夫」創辦人莊志雄表示，係特朗普當選後，美股整體表現結構出現轉變，過往帶動大市慨功臣「科技7雄」(Magnificent 7)，係呢段時間慨表現反而較為失色，而特朗普當選至今，表現最好係標普600小型股指數，其次係標普400中型股指數。不過，自12月開始，納指綜合指數及納指100指數都開始追緊上黎，整體黎講，小型股表現好過大型股，希望科技股係12月可以接力，延續美股慨升勢。 Lewis又話，特朗普當選後，對新興市場影響較大，港股跌勢亦加劇，因為市場始終憂慮關稅問題，以及對華政策可能「偏鷹」，加上市場之前期望中央再推出大規模刺激經濟措施，但最終失望而回。 |
|
| 彭偉新 |
2024-12-04T15:00 |
截至早上11時止，1小時內《彭博》用戶搜尋量最多港股，依次為中國神華(01088)、中國石油股份(00857)、康方生物(09926)、建設銀行(00939)、中國海洋石油(00883)。 雖然神華過去數月冇乜鑊氣，但股價只係自高位回調約12%，煤炭股今日(4日)普遍有得升，其中，神華一度升逾4%。有分析指，「煤炭長協政策」將於明年落地，加上寒冬將至，都有機會推高煤價，神華前景係咪都值徥睇好？ 資深證券分析師彭偉新指，神華同其他煤炭股唔同，因為公司有齊上中下游業務，只要成本控制得好，盈利一定有改善，加上神華慨煤炭基建、鐵路等有助控制整體營運成本，而下游發電部分只要電力需求增加，神華全條產業鏈都會賺到錢。 Castor又話，就算電力需求下降導致煤炭需求較小，但神華股息率足以維持整體吸引力，又話股價短期要上返36元唔難。 |
|
| 盧志威 |
2024-12-04T11:27 |
南韓總統尹錫悅昨晚(3日)突然宣布「戒嚴」，但國會迅速通過解除戒嚴令，其後尹錫悅亦正式宣布撤戒嚴令，結束僅持續逾6個鐘慨戒嚴事件，市場解讀為政黨爭拗，南韓股市今朝(4日)如常開市，首爾KOSPI指數今早低開約2%，今次事件對金融市場有咩影響？點睇高盛話依家係買韓股慨機會？ 潤淼資產管理董事盧志威指，今次戒嚴事件由開始到結束只係幾個鐘，令韓圜出現輕微震盪，但金融市場慨震盪已經完結，因為市場已經預左國會一定會「做野」，例如啟動彈劾總統程序，所以對金融市場影響唔大，短期內回穩完全冇問題，但股市要回升就有難度。 William續指，南韓政局一向複雜，今次突襲式戒嚴，短期黎講一定係負面，但由於國會反應迅速，令政局好快回復穩定，加強投資者對南韓股市慨信心，亦會對當地慨穩定性加分，中長線係一個買入機會。佢認為可以考慮買入龍頭股，例如三星電子(Samsung Electronics)呢類半導體股會較穩陣。 |
|
| 郭家耀 |
2024-12-04T10:04 |
港灣家族辦公室業務發展總監郭家耀推介名創優品(09896) 推介原因： -業績表現理想 -知識產權(IP)戰略受市場認同 建議買入價：45.0元 目標價：52.0元 止蝕價：40. |
|
| 趙晞文 |
2024-12-03T18:03 |
美國政府限制晶片技術對華出口慨措施不斷「加辣」，值得留意係，美國總統拜登(Joe Biden)慨任期仲有唔夠兩個月就完結，特朗普(Donald Trump)就會係1月上台，未來對華晶片技術出口會唔會有更多限制？ 信達國際研究部董事趙晞文指，唔排除特朗普上任後再「加辣」，因為佢係上個任期都係唔同層面多次出手，例如關稅都分左幾次推出，加上今次係佢最後一個任期，所以市場認為佢針對貿易、半導體、生物科技等領域慨政策，出台慨密度及強度應該會比以前高，制裁力度會比拜登政府更大。 至於點解外圍慨半導體股有得升，趙晞文話，首先係受人工智能(AI)領域帶動，令上游產業鏈上季業績及未來指引都唔錯，另一方面，唔少晶片商開始係美國設廠，以減少受關稅慨影響，反映廠商對未來貿易慨爭端開始做部署，所以唔會對股價有太大衝擊。 |
|
| 盧楚仁 |
2024-12-03T17:48 |
金價今日(3日)係每盎司2645美元徘徊，未來要留意美國周五(6日)出爐慨非農新增職位，因為有機會影響美國聯儲局今個月慨議息會議決定，強美元對金價有咩影響？金價後市又會點走？ 獨立外匯商品分析師盧楚仁指，美國加關稅會利好美元，令美元維持強勢，但金價就好難向上。雖然最新有聯儲局官員暗示今個月會議可能會宣布減息，但最終減唔減始終要睇周五慨非農就業數據，同埋下周三(11日)公布慨消費物價指數(CPI)，如果兩個數據都理想，佢估計，聯儲局今個月未必會減息。 技術走勢方面，Jasper話，金價昨日(2日)跌穿10天線，反彈後仍受制於10天線，金價今日見頂回落，短線可以先睇2605美元呢個支持位。 |
|
| 李偉傑 |
2024-12-03T17:33 |
香港寬頻(01310)昨日(2日)披露中國移動(00941)提出全面收購要約詳情後，再出通告話HGC股東，私募股權公司I Squared Capital亦有意收購公司，出價仲略高過中移動。中移動仲特別加入一項條款，指可以因應特殊情況加價，依家多左I Squared呢個對手，中移動加價慨機會係咪好大？投資者應唔應該博競購慨公司加價，現階段追入香港寬頻？ 華盛證券財富管理部董事李偉傑指，中移動每年收益逾千億元，今次收購香港寬頻要動用慨資金，對集團黎講只係一個好細慨數目，所以加價對中移動黎講唔係太大問題，不過，如果出價過高，可能會畀股東質疑買貴貨。佢又指，中移動仍有一定加價空間，因為I Squared慨定價仍然係未知數，未來仍有變數。 Jason又話，香港寬頻股價上次調整，落到10天線再回升，依家10天線係4.6元水平，佢提醒，時間一長，不確定性就會增加，建議投資者可以等股價調整後再吸納。 |
|
| 譚智樂 |
2024-12-03T15:47 |
截至早上11時止，1小時內《彭博》用戶搜尋量最多港股，依次為中國中藥(00570)、藥明生物(02269)、美團(03690)、世茂集團(00813)及中國移動(00941)。 美團上周出左第3季業績，經調整溢利好過預期，新業務虧損又大減，不過，股價係放榜後持續向下，今日(3日)一度跌4%，低見160.7元，美團股價未來會點走？下一個催化劑幾時會出現？ 富途證券首席分析師譚智樂指，美團收入、盈利呢些大數好過市場預期，雖然利潤率比預期跌得多，但主要受季節性因素影響，其實係依家經濟環境低迷下，美團仍交到一份唔錯慨業績，反映管理層執行能力仍然好強。不過，若經濟持續疲弱，市況冇太大起色，加上估值偏高，難免對股價造成壓力。 不過，Arnold認為，美團屬於高Beta股份，所以短期唔適宜睇得太淡，投資者可以係波幅區間150元至170元炒上落。 |
|
| 黃偉豪 |
2024-12-03T13:13 |
美國公布新一輪限制向中國出口半導體慨措施，市傳擬向中芯國際(00981)實施額外制裁，不過，中芯股價昨日(2日)不跌反升，今日(3日)輕微高開後，一度跌3%，低見25.6元，跌幅唔算太大係咪因為制裁力度唔算大？依家開好倉還是淡倉比較合適？ 胤源世創家族辦公室(香港)第一副總裁黃偉豪指，中芯股價呢幾日冇太大反應，主要係市場預期左美國會係晶片方面對中國作出進一步限制，所以對股價衝擊唔會太大。此外，美國實施制裁後，間接令內地加大自主研發及加快國產化進程，所以有投資者借勢炒作呢類股份。 Ravi又話，近期市場都有炒作呢類股份慨趨勢，認為可以博中芯短期好倉，股價方面，可以等股價突破20天線，即26.5元水平入場，目標價28元。 |
|
| 陳偉聰 |
2024-12-03T12:00 |
中央經濟工作會議將於月中舉行，市場等緊會唔會有措施出台，若中經會都令市場失望，港股後市係咪更難樂觀？ 東亞銀行高級投資策略師陳偉聰指，炒內地政策對A股及港股有支持作用，市場一定對中經會有憧憬，一般黎講，中經會將會為明年經濟定調，以及提出發展方向等，不過，明年經濟增長目標、財政政策、發特別國債等，就要等明年3月慨「兩會」先會公布，所以投資者唔需要對中經會有太大期望。 Jason又話，中央係9月底出「組合拳」救經濟，主要係當時市場氣氛悲觀，依家恆生指數企穩19000點水平，上證綜合指數亦持續係3300點水平上落，所以中央冇再出招慨迫切性。佢估計，短線港股將會再向下調整，直至中經會或「兩會」釋出積極訊號，所以可能要等到明年3月有實質政策出台，到時港股先有機會出現明顯升勢。 |
|
| 梁偉民 |
2024-12-03T11:40 |
美國再公布新一輪對華出口半導體「加辣」措施，包括限制向中國出口用於人工智能(AI)訓練等高端應用高頻寬記憶體晶片，並將136家中國實體加入「出口管制實體清單」，外圍芯片股昨晚(2日)向好，其中，英偉達(Nvidia)微升，台積電(TSMC)預託證券升5%，而ASML升近1%，公司話正在評估影響，但認為長遠半導體需求唔會受到影響，係美國禁制措施下，長遠環球半導體產業真係唔會受到影響？ 高富金融集團投資總監梁偉民指，制裁行動對半導體需求會受到一定影響，尤其係短期慨晶片需求，因為對全國慨晶片公司黎講，中國係一個好大慨市場，美國禁制措施會限制對中國出口，對晶片公司慨生意會有影響，不過，對半導體公司短期業績慨影響唔會太明顯，因為禁制措施已經唔係新鮮事。 Wyman又話，重磅慨半導體公司，例如Nvidia、台積電等未來幾季慨業績，係大中華慨生意會有下跌，因為公司會主動減少向中國出口，以避免觸犯禁令。 |
|