| Commentator |
Time |
Content |
Tag |
| 莊志雄 |
2022-08-10T15:35 |
內地今朝出左通脹數據，今晚就輪到美國CPI出爐，到底美國通脹會點走？有分析預期按年會回落至9%以下，美股之後又點反應？ 「股市漁夫」創辦人莊志雄指，睇返上次聯儲局議息聲明，以及主席鮑威爾慨發言，比巿場慨感覺都係偏鴿，所以美股之後持續反彈。不過，過去幾日出現左變化，局方有官員放鷹，令加息預期由加0.5厘，變成有70%投資者認為會加0.75厘，所以近幾個交易日，一些同未來盈利掛鉤慨股份，尤其係優質股，都冇力升上去，呢個現象主要同未來息率預期有關，如果息率再升溫，FANG指數、納指100指數等都會跑輸標普500指數。 Lewis又話，睇埋唔同行業表現，一些同消費相關業務都跑輸標指，反觀受惠於息率慨行業、收息類或防守型慨股份表現較好，例如金礦股慨股息率已高過公用股指數，以前金礦股唔係收息工具，但係依家慨情況下，加上通脹升溫，都有利貴金屬價格，因此，當通脹預期升溫時，主打防守慨股份就會造好，消費或半導體股表現就較差。 |
US Stock , Metals , Gold mine , Util |
| 陳錦興 |
2022-08-10T15:18 |
國泰航空(00293)中午派左成績表，上半年虧損收窄逾30%，收入按年增長17%，唔派中期息。集團指，政府5月起調整旅遊限制及檢疫要求，上半年後期已實現經營正現金流。國泰股價午後升幅曾擴大至逾3%，但好快已收窄至約1%，其實國泰呢份業績唔算差，但睇股價反應，市場似乎唔係好收貨。 英皇證券研究部總監陳錦興指，國泰呢份業績符合預期，但撞正大市氣氛比較差，港股跌幅不斷擴大，令買盤再推上去時都會有戒心，而8.8元呢個阻力位亦唔容易突破，由於買盤唔敢太進取，股價衝左一下升幅就收窄返。 國泰上半年燃油對沖收益大增逾2倍，陳錦興認為，依家市場就燃油對沖對國泰慨影響。 |
CATHAY PAC AIR , Stock , EMPEROR CAPITAL , Earnings , C.P. LOTUS |
| 譚智樂 |
2022-08-10T13:33 |
截至早上11時止，1小時內《彭博》用戶關注度上升最多港股，依次為聯想集團(00992)、藥明生物(02269)、安踏體育(02020)、華潤啤酒(00291)及小米集團(01810)。 今朝開市前，聯想出左首季業績，收入按年輕微增長，純利則增長11%，毛利率亦有改善，聯想股價今朝曾短暫向上，但好快掉頭向下。 獨立股評人譚智樂指，係市況疲弱下，聯想毛利率都有得升，維持係近16%水平，反映聯想首季最大優勢在於成本控制得好，但值得留意係，聯想旗下業務如硬件、智能手機、電腦設備等，對經濟周期敏感度高，而近期唔少電子企業慨態度比較審慎，認為聯想未必可以係逆周期有好表現。 Arnold又話，聯想股價關鍵位係6.7元水平，又提醒唔好因為估值平、業績硬淨，無視經濟環境變差慨風險因素，有貨可以繼續持有，如果冇貨就唔建議買入。 |
Results , ANTA SPORTS , Stock , LENOVO GROUP , Bio |
| 林樵基 |
2022-08-10T11:33 |
行政會議召集人葉劉淑儀接受《彭博》訪問時指，本港考慮免除內地買家雙倍印花稅，噚日消息一出，地產股應聲抽高，但政府之後澄清冇傾過亦冇相關計劃，地產股即刻升少大截，今朝就跟隨大市向下，係息口趨升下，銀行股及地產股投資價值有幾大？ 光銀國際董事總經理兼研究部主管林樵基估計，本地銀行股會跑贏少少，因為息差係拉闊緊，如果本地經濟進入左復甦階段，一定對銀行有正面影響。 至於本地地產股，Benny就話依家有幾家發展商賣緊樓，開價都貼近二手，加上最近成交少，其實加息慨影響已經開始左，H按已經升左唔少，但如果要等加P先有影響，呢個機會就好微，雖然發展商的確係審慎左，但本地地產商實力仍然幾強，加上舊年賣樓收入今年入帳，所以唔使太擔心業績，而睇業績時應留意核心盈利及現金流。 |
HK Cap Flow , Real Estate , Earnings , Real Estate |
| 文錦輝 |
2022-08-10T11:03 |
美國今晚會出通脹數據，加上半導體巿場傳來不利消息，美股3大指數噚晚全線受壓。美光下調季度收入預測，拖累股價挫近4%，由於行業前景唔明朗，令原本上月底大升10%慨費城半導體指數都要跌，晶片股未來係咪要繼續捱沽？ 艾德證券期貨投資策略總監文錦輝指，由於巿場擔心美國經濟衰退，導致晶片業訂單減少，不過，半導體屬於高端科技，其中新能源汽車對晶片慨需求好大，所以唔使擔心行業前景。 Felix又話，若通脹持續高企，投資者只會短暫沽科技股，長線而言，資金都會擺返落去增長股，所以現階段唔使心急入貨。 |
Energy , IT , US Stock , New Energy Vehicles , New Energy |
| 植耀輝 |
2022-08-10T09:40 |
耀才證券研究部總監植耀輝推介中國神華(01088) 推介原因： －依舊看好煤價前景 －早前已發盈喜，預料盈利增長約60%，派息依然慷慨 －業務涵蓋煤、電、路、港、航。 |
CHINA SHENHUA |
| 陳錦興 |
2022-08-09T16:27 |
行政會議召集人葉劉淑儀接受《彭博》訪問時指，考慮放寬內地買家雙倍印花稅，不過，政府之後急急澄清，話冇傾過冇考慮過，雖然地產股午後升少大截，但普遍維持到約2%升幅，未至於打回原形。今次炒錯左係因為市場太興奮，因為近期難得有好消息？ 英皇證券研究部總監陳錦興認為，今次呢個同地產相關慨消息，的確有好大刺激作用，但諗深一層其實可能性暫時唔係咁高，消息係由《彭博》那邊傳出，之後係市場快速流傳，刺激地產股急升，帶動恆指上返20000點樓上。Stanley指，一連串新聞及技術操作令市況有些波動，但政府澄清後，大市又變返悶局，估計港股市況暫時唔會有太大變化。 |
Stock , EMPEROR CAPITAL , Real Estate , Real Estate , TERN PROPERTIES |
| 梁偉源 |
2022-08-09T13:06 |
截至早上11時止，1小時內《彭博》用戶關注度上升最多港股，依次為新鴻基地產(00016)、新世界發展(00017)、小米集團(01810)、長實集團(01113)、恆基地產(00012)。 《彭博》引述行政會議召集人葉劉淑儀指，本港考慮免除內地買家雙倍印花稅(DSD)，呢個構思選擇性畀優惠某類人士，社會對政策向內地人士傾斜，會唔會產生較大阻力？點解唔直接「減辣」谷返起低迷慨住宅市場？ 大華繼顯執行董事梁偉源指，其實近年黎香港買樓慨內地投資者唔多，就算取消雙倍印花稅，市場供應都唔會有太大改善，反而有新資金黎香港買樓會推高樓價，同政府要遏樓價慨目標背道而馳。 Steven又認為，依家內地人係內地買樓慨意慾唔大，但其實佢地手頭上都有一定資金，如果係香港買樓唔使畀雙倍印花稅，入市意慾係幾大，因此，如果政府希望多些資金入市，令香港樓市活躍返，相信呢個政策係會有成效。 |
HENDERSON LAND , Real Estate , SHK PPT , NEW WORLD DEV , Stock |
| 黃偉豪 |
2022-08-09T12:21 |
港股近排阻力都幾大，即使噚日政府宣布放寬檢疫措施，但投資氣氛都冇改善，大市噚日成交只得700幾億元，個市咁悶，部署係咪可以進取些？ 中薇證券研究部執行董事黃偉豪指，港股暫時都冇乜利好消息，所以未有明顯方向，加息因素，以至內地及環球經濟前景都比較負面，加上港股正值業績期，都要等多些業績出爐，先睇到恆指可唔可以扯高些。 部署方面，佢認為短線操作會比較合適，恆指10天線會係短期阻力位，投資者可以將熊證放係10天線外，支持位睇5月低位，即19178點水平。 |
Stock |
| 盧志威 |
2022-08-09T11:16 |
Nvidia發盈警，主要係遊戲相關產品銷售失色，估計季度收入比預期少17%，拖累股價跌6%之餘，更拖林埋半導體股，費城半導體指數近90%股份都要跌。雖然呢個盈警唔算太嚇人，但高盛、摩根士丹利都睇淡企業盈利前景，到底係大行睇法太悲觀？還是只係個別行業會面臨困境？ 潤淼資產管理董事盧志威指，Nvidia遊戲相關產品銷售主要受Crypto及消費品市場疲弱影響，其實成個半導體行業都面對呢個情況，到底呢個周期幾時先可以恢復，暫時好難確定，現階段仲係處於尋底階段。 佢又話，睇返美股整體企業盈利，好多股票都處於景氣收縮慨狀況，依家比較受歡迎都係防守性高、必須消費品類股份，因為可以將成本轉嫁畀消費者而銷售唔會跌，佢認為大市慨PE及增長前景都會收縮，但部分股票表現會較好，揀股時就盡量揀呢類。 |
Sachs , US Stock |
| 陳鳳珠 |
2022-08-09T10:59 |
安里資產管理投資組合經理陳鳳珠推介吉利汽車(00175) 推介原因： -極氪為主打新能源高端品牌，料銷售績升助推動盈利及毛利率上升 -料下半年受惠政策及購買力釋放，多款新車推出。 |
GEELY AUTO , Energy , New Energy |
| 梁振輝 |
2022-08-09T10:01 |
經濟前景憂慮下，近日市場對美聯儲的加息預期有所下降，一方面令長期債券收益率在最近幾周走低，同時推動全球股市在7月反彈。雖然美國第二季度GDP令市場擔憂，連續兩個季度的經濟萎縮更構成了「技術性」衰退。 然而，更廣泛的經濟數據反映現時宏觀情況仍比過往「真正的」經濟衰退期間為佳，如 ISM製造業和服務業表現均好過預期。當然，筆者並非斷言經濟衰退風險不存在；事實上，美國國債孳息曲線持續倒掛，正反映市場預期經濟有機會出現衰退。 不過，近日不少美聯儲委員再次強調與通脹的抗爭尚未結束，包括三藩市聯儲主席戴利和芝加哥聯儲銀行行長埃文斯在內等不少央行委員，近日都異口同聲地表明壓抑通脹的道路仍然漫長。 雖然，相關言論未必會改變美聯儲實際的加息路徑，但仍可被視為美聯儲對於7月金融狀況變得寬鬆(特別是股市上升)、長期美國債券收益率下降、美元走低，以及市場對未來6至12個月美聯儲加息預期輕微回落的回應。加上，美國7月非農業新增職位強勁，反映美聯儲仍有需要和空間去繼續收緊貨幣政策，相信通脹和增長憂慮之間的拉鋸戰難以短時間內完結。 對投資者而言，在目前市況較不明朗的情況下，利用多元入息資產來獲取近幾年來較高的收益率是駕馭當下環境的一種途徑，雖然投資者一般需要保持投資12個月才能獲得年度化收益率，但收益率上周出現反彈則為投資者提供了增持該類資產的機會。 另外，我們相信中國股票亦是另一種有望應對現時市況的資產類別。雖然上周台海局勢緊張，內地製造業採購經理指數令市場失望，但由於中國股票估值仍然偏低，市場資金最終仍有機會重新關注中國支持增長的政策取向。現時，中國的經濟周期比歐美可能更加接近底部，加上前者政策主張寬鬆以支持增長復甦，筆者相信中國股票中的工業及通信服務等周期性行業，會有不俗的投資潛力。 |
US Bonds , USD , MIDLAND HOLDING , agri , BAOGAI |
| 鄭家華 |
2022-08-08T22:31 |
中國聯通(00762)上半年多賺19.5%，中期息16.5分人民幣，派息比率升至45.8%。 阿仕特朗資產管理董事鄭家華認為，聯通中期息算是有驚喜，中期息股息率逾5%，相信利好股價。 |
RMB , CHINA UNICOM |
| 林嘉麒 |
2022-08-08T16:27 |
有「小領展」之稱慨置富產業信託(00778)，今日逆市造好，股價衝上兩個月高位，一度高見6.98元，升逾5.7%，公司噚晚公布上市後首單海外收購，斥資約5億港元，收購新加坡高文之星物業(Stars of Kovan Property)，雖然交易作價唔高，但係集團首度進軍海外，係咪會成為股價短期慨催化劑？ 元宇證券投資總監林嘉麒指，要睇下公司係咪想係姊妹公司買資產，或有計劃進軍海外，所以要先知道公司慨藍圖，今次置富呢單收購，反映公司冇明顯增長點，置富業務以香港及民生相關為主，呢些業務慨投資價值唔算吸引，如果集團進軍海外，甚至憧憬公司將多些項目放落去，令收益多元化，或令收益率更加靚，更能吸引投資者。 KK又話，置富依家槓桿比率較低，其實可以做多些併購，未來要留意公司再有咩搞作。 |
IPO , IPO , FORTUNE REIT |
| 梁傑文 |
2022-08-08T15:21 |
經營Sogo崇光百貨慨利福國際(01212)，獲大股東劉鑾鴻(細劉)提出以每股5元私有化，較停牌前有逾62%溢價，受疫情影響，集團去年收入只及2018年約一半，而疫情亦改變左零售格局及消費模式，Sogo客源主要係內地客及本地客，但本港暫時仲未可以同內地通關，利福業務復甦係咪好困難？ 《香港股票財技密碼》作者梁傑文話，受疫情影響，內地旅客大減，但投資市場係向前看，如果樂觀去睇，依家會唔會係最壞時期？黎緊各地可能會慢慢放寬入境限制，而內地疫情或開始緩和，到時就會有多些旅客返黎香港，其實唔少國家已放寬左旅遊限制，當地慨旅遊業都好火熱，雖然仲未重返疫情前，但起碼已係低位大幅反彈。 Mike又話，唔需要太執著利福慨生意額少左，至少係咁惡劣環境下，仲keep到一半生意額，只要未來放寬旅遊限制，生意額好大機會見底回升。 |
Stock , LIFESTYLE INT'L , JACOBSON PHARMA , Retail |
| 郭思治 |
2022-08-08T10:24 |
本月大市經過周來之一輪回升後，形態上己暫時屬於先低後高，恆指暫是由2日之低位19,515點升至5日之高位20,283點，即月內之波幅暫為768點，由於一個月之高低位是不該同時出現於四個交易日之內，加上768點之波幅亦該不能滿足月內之所需，故在本月餘下之交易日，理論上會有更大之波幅點出現。要留意一點，恆指技術上雖然已重越20,000點大關，惟成交金額卻未見配合，擔心在動力不繼下，大市升勢會漸受規限，其時衹要沽壓再稍作主動，整個大市又會再重見反覆回軟之弱態。 從技術上看，大市既已重越20,000點大關，形勢上該有利於再進一步上試10天線（20,292點），甚至挑戰20天線（20,516點），惟由於成交金額卻漸見萎縮，故在動力不配下，大市之升勢卒漸受規限，而直到執筆一刻止計，整個大市暫仍持續反覆於各組常用的平均移動線之下，論形態。技術上，暫該屬反覆欲試底之格局，而所指的底，暫該為5月10日之低位19,178點。嚴格而言，大市如欲擺脫欲試底之弱態，首要的條件是指數必需先成功重越10天線（20,292點）並穩守其上，另外，大市之成交金額亦必需明顯增加至1,200億元或以上。 目前市場較關注的是港息可能會上調，因現時美息與港息之差距頗大，故引來大量套息活動，為穩定港元的匯率，金融管理局需要不斷承接港元沽盤，令銀行結餘已跌至約1,300億元。情況如持續下去，銀行拆息該會被挾高，甚至有機會上調優惠利率，對本地樓市及股市當帶來頗負面之影響。 加上內地爛尾樓問題仍有待解決，影響所及，一眾內銀股亦可能會受累；往後，內地經濟下行風險亦日漸增加，故在眾多不明因素困擾下，投資者最好是盡量保留現金，靜待另一次低吸良機，至於持貨偏重者當需做好風險管理。 |
China Banks , China real est , Stock , HK real estate |
| 植耀輝 |
2022-08-05T22:41 |
置富產業信託(00778)上半年物業收入淨額減少5.9%，每基金單位分派減少7.7%。 耀才證券研究部總監植耀輝表示，上半年受本港第五波疫情影響，置富產業收入及派息減少，屬預期之內，而中期息股息率有3.5%，已可接受，展望下半年，營運情況應有所改善，若全年股息率達7%亦屬吸引水平，但實際情況應要視乎本地疫情發展。 |
FORTUNE REIT |
| 黃敏碩 |
2022-08-05T16:49 |
信義玻璃(00868)今日升幅顯著，其實公司星期一出左業績後，股價表現好曳，翌日更落到逾年半低位，其後係15元水平喘定，但今日唔止彈高，仲跑贏大市，再睇返整個信義系，如果計埋股價調整幅度及下半年前景等因素，系內邊隻股份最值博？ 寶鉅證券董事及首席投資總監黃敏碩指，雖然信義儲電(08328)可能係「黑馬」，但始終較睇好信義能源(03868)，雖然近期股價因業績表現受壓，但睇返業務路線圖或基本面，如果內地將來再推動光伏發電，中線會有穩定收入，若信能可消化今轉跌幅，企穩3.8元水平，可考慮小注。 |
Energy , XINYI GLASS , XINYI ENERGY , XY ELEC STORAGE |
| 關焯照 |
2022-08-05T16:43 |
阿里巴巴(09988)派完成績表後，市場焦點就轉到兩星期後出業績慨騰訊控股(00700)及美團(03690)，阿里靠成本控制，交出一份獲得市場正評慨成績表，不過，內地監管部門表明唔會放寬平台經濟監管，意味科網龍頭收入及盈利大幅增長不再，科網股彈唔起係咪基於呢個原因？ 冠域商業及經濟研究中心主任關焯照指，早前騰訊股價唔見左近40%，因為當時好多資金係低位平倉，加上大跌後反彈幅度唔大，每次股價一彈，大股東就沽貨，阿里情況亦一樣，反映市場唔認為呢類股份會見底回升，或者可以大幅反彈，即使業績好過預期，股價出現反彈，都只係曇花一現，所以持有呢些股份慨投資者，就要逢高就走。 |
IT , TENCENT , LINGYI ITECH , Earnings , NETDRAGON |
| 文錦輝 |
2022-08-05T16:30 |
紐約期油跌穿每桶90美元，係2月底俄羅斯入侵烏克蘭以來，首次失守呢個水平，倫敦布蘭特期油就跌至94美元，紐油本周暫時累跌10%，布油更累跌14%，有機會錄得前年4月疫情最恐慌後最大單周跌幅。 艾德證券期貨投資策略總監文錦輝指，市場睇到較大慨經濟體如中國及歐洲，製造業PMI表現麻麻，擔心未來能源需求會不斷減少，油價今個星期逐步係高位沽落黎，噚晚一度跌至87美元水平，如果後市上唔返94美元，有機會向下炒，加上英國衰退機會愈來愈大，油價一定會受壓。 |
Oil , Energy , USD |
| 梁偉源 |
2022-08-05T13:05 |
截至早上11時止，1小時內《彭博》用戶關注度上升最多港股，依次為申洲國際(02313)、旭輝永升服務(01995)、遠洋集團(03377)、澳博控股(00880)、長實集團(01113)。 大市噚日反彈400點，但申洲逆市創52周低，雖然今日暫時有輕微反彈，但全周計暫時仍跌1%，出口股受宏觀經濟影響，加上申洲客戶之一Adidas指，第3季以來大中華區業務復甦慢過預期，今日股價似乎只係技術反彈。 大華繼顯執行董事梁偉源指，申洲兩大客戶Nike及Adidas面對全球經濟放緩，內地品牌如李寧(02331)、特步國際(01368)亦提及銷售情況不似預期，有一定去庫存壓力，反映下半年全球消費品需求未必樂觀，同時，申洲客戶亦要面對生產成本上漲，邊際利潤跟隨受到壓力，因此，今日股價有少少反彈，唔代表係入手好時機。 |
Stock , SHENZHOU INTL , LI NING , Expo , CKH HOLDINGS |
| 聶振邦 |
2022-08-05T11:05 |
恆指今個星期暫時升唔夠20點，雖然有約70%成分股要跌，但有匯豐控股(00005)等多隻重磅科網股頂住，ATMXJ本周暫時只得小米集團(01810)要跌，加上科指噚日錄得逾1個月最大單日升幅，係眾多不明朗因素下，大型科網季績仍值得憧憬？ 華盛証券分析師聶振邦指，阿里巴巴(09988)業績唔錯，同樣主打平台商貿慨京東集團(09618)，市場憧憬業績都應該交到貨，其實市場一度憂慮第2季初，內地封控措施會為企業慨業績帶黎負面影響，但依家睇黎似乎係諗多左，佢認為，科技股業績仍值得憧憬，早前，科技股出現恐慌性拋售，但投資者依家陸續趁低吸納，因此，科技股暫時都係可以睇好。 |
HSBC HOLDINGS , IT , LINGYI ITECH , Stock , HSBC |
| 植耀輝 |
2022-08-04T18:22 |
市場預期，蘋果下月將推出智能手機iPhone 14系列，規格上將有更多升級，究竟蘋果會硬食成本，定會轉嫁供應商或買家呢？作為蘋果最大廣角鏡頭供應商，舜宇光學(02382)寧願薄利多銷，增加自己慨蘋果業務比重，去抵銷Android定單減少慨影響，此舉對利潤有咩影響？ 耀才證券研究部總監植耀輝指，舜宇產品規格及技術不斷提升，但大部分手機都未必用到佢慨功能，導致舜宇慨技術轉化唔到做利潤，因此，舜宇唯有係市佔率上著手，實行薄利多銷慨策略，先同蘋果搞好關係，就可以一直成為蘋果慨供應商，咁樣兩邊都有賺，所以係今次事件中，舜宇只係「蝕頭賺尾」。 |
SUNNY OPTICAL |
| 羅明立 |
2022-08-04T17:17 |
油價受壓，但加元未見明顯回落，美元兌加元仍然係1.29以下徘徊，之後走勢點睇？ 亨達集團助理總經理羅明立指，加拿大央行上一次加息1厘，認為到9月都未必會加息住，因為大幅度加息後要睇下市場情況，估計加元會係1.27至1.3之間上落。 |
USD , CAD , CINDA INTL HLDG |
| 黃敏碩 |
2022-08-04T13:06 |
截至早上11時止，一小時內《彭博》用戶關注度上升最多的港股，依次為澳博控股(00880)、小米集團(01810)、蒙牛乳業(02319)、金沙中國(01928)及中國銀行(03988)。 澳博大折讓四供一向小股東伸手，今朝大跌逾10%，不過供股價折讓太大，有排都跌唔到去2.08元供股價，咁大折讓供股價會唔會去供呢？ 寶鉅證券董事及首席投資總監黃敏碩指出，即使疫情緩和及內地通關有正面慨趨勢，但行業競爭會構成不明朗因素，投資者可以睇定些先再作決定如何部署。 |
MENGNIU DAIRY , Stock , BANK OF CHINA , boc-share , SJM HOLDINGS |
| 許繹彬 |
2022-08-04T10:38 |
港股可謂「屋漏兼逢夜雨」，國內房地產問題繼續發酵，以及地緣局勢緊張，恆指再次跌穿20,000點水平，今次回落的幅度，較想像中來得兇狠；內地「爛尾樓」問題，一直纏繞著Ａ股市場，其後遺症已蔓延至國內銀行，傳出有數之不盡的不良貸款，問題只會愈演愈烈。 此外，本周股王騰訊(00700)的表現強差人意，其跌幅更遠超大市。分析指，以港股今年的低位18,235點計算，騰訊股價的相對低位仍有295.4元，本周卻做出288元的暫時低位，是否已經止瀉？暫時未有任何定論，因為現階段從其跌幅及成交額可見，可以「眾矢之的」來形容騰訊的慘況，連續數天有大成交卻仍跌勢未止，短期內未容樂觀。儘管昨天重回300元以上，但走勢仍欠銳氣。 另一隻有「定海神針」美譽的交易所(00388)，在死守襄陽下，最後亦難敵佩洛西的狠擊，一度跌穿350元大關。部份內地房地產及物管股，均紛紛創下52周新低，藍籌股中的碧桂園「孖寶」：碧桂園(02007)及碧桂園服務(06098)，雙雙跌至體無完膚，連同「ATMX」的科技股及香港地產股同告下跌，失守兩萬大關乃合情合理。 本周焦點必然是美國國會眾議院議長佩洛西的台灣之行，令中台局勢劍拔弩張；美方的玩火行為，雖暫未觸發台海出現槍林彈雨，但已向疫態盡露的港股再踩多一腳，看來暫時難有強力反彈的勢頭，就算彈極可能只是死貓彈。除非出現突發的利好消息，或成交突然急增；否則暫以五月低位19,178點作重要支持位。由於是政治市主導，市場每日的變化風起雲湧，建議投資者先行等形勢明朗及穩定下來，再作下一步部署。 |
Stock , China Real Estate , IT , Real Estate , COUNTRY GARDEN |
| 阮子曦 |
2022-08-04T10:35 |
中國通海證券投資策略聯席總監阮子曦推介長飛光纖光纜(06869) 推介原因： -全球光纖光纜供需依然失衡。 |
YOFC |
| 陳偉明 |
2022-08-04T10:34 |
阿里巴巴(09988)決定申請轉換為港股及美股雙重主要上市，市場解讀為這是應對未來在美退市除牌的方法，加上憧憬阿里在港雙重上市後有望納入港股通迎來北水，港股上周初回升至近21,000點關。 然而阿里最終被美國證交會列入「預定除牌名單」，市場再次憂慮中概股除牌危機，港股於上周五(7月29日)開始急挫，及後再因美國眾議院議長佩洛西訪台的消息拖累下，恆指於本周初一如筆者預期進一步急插失守兩萬關，並在本周二(8月2日)低見19,515點，上周高位建議的淡倉繼續大賺。 另一方面，美國聯儲局上周三(7月27日)晚一如市場預期連續第二次加息0.75厘，主席鮑威爾暗示可能放緩加息步伐，加上上周四(7月28日)晚公布的次季GDP連續兩季按年倒退陷入技術性衰退，市場憧憬聯儲局提前結束加息行動，美股由上周三(7月27日)開始急彈，但美股回勇不但未有惠及中港股市。 相反在爛尾樓斷供、中概股除牌危機、內地經濟數據遜預期及台海局勢緊張等問題拖累下轉趨弱勢。然而，港股在二萬點樓下始終下跌空間有限，市場亦普遍預期恆指再難明顯跌穿5月低位19,178點，加上港股急跌過後已經反映不少利淡消息，預期港股有機會在19,500點附近隨時出現技術反彈，但要大升則甚有難度。 策略上傾向在港股20,000點以下每逢急跌分注Short Put 撈底接貨，對象依然是受惠於加息週期的本地銀行板塊。如期指回升至20,300點以上，提防短期反彈後有回吐壓力，可考慮小注Long Put價外600點下周五(12日)到期的恆指期權。 |
Stock , LINGYI ITECH , Money Supply , US Stock , IPO |
| 羅尚沛 |
2022-08-03T22:36 |
固生堂(02273)發盈喜，預期上半年業績由虧轉盈，賺0.54億元人民幣，經調整溢利則升35-41%。 銀河證券業務發展董事羅尚沛表示，固生堂上半年經調整溢利有增長，原因之一是融資成本減少，若撇除這個因素，溢利可能持平，因此盈喜或存在「水份」，而公司股價已貼近上市初期的歷史高位，不排除個別機構投資者隨時沽貨離場。 |
Results , RMB , Earnings , IPO , IPO |
| 聶振邦 |
2022-08-03T17:17 |
今日多隻汽車股反彈，其中以藍籌吉利汽車(00175)升得最靚，不過，4S經銷商相關股續受壓，其中，中升控股(00881)跌至兩年低位，集團噚日出通告指因應國家二手車發展策略，係全國設置二手車交易平台，但似乎冇乜刺激作用。內地全面撤銷二手車遷入限制，但政策落地對股價完全冇沖喜作用，呢類股份係咪好難谷得起？ 華盛証券分析師聶振邦指，中國汽車流通協會出左報告，指上半年有超過一半汽車經銷商唔達標，依家先開始有些國策扶持，對整體行業未必有好大改善作用。聶Sir又話，內地上半年經濟偏弱，導致汽車銷情差，而4S股亦冇特別傾銷策略，導致相關股份受壓。 |
GEELY AUTO , Auto , Strategy , ZHONGSHENG HLDG |
| 陳錦興 |
2022-08-03T16:03 |
餐飲股7月一直係低位橫行，但同樣係飲飲食食慨食品股，就跌足成個月，當中包括周黑鴨(01458)，公司最新發左盈警，估計中期最多少賺96%，主要受疫情反覆影響，加上原材料價格上升，仲有匯兌損失，其實周黑鴨今朝一度升2%，但之後轉跌，係咪市場睇到一些細節？ 英皇證券研究部總監陳錦興指，可能市場對呢類股份都比較謹慎，周黑鴨6月曾經有一浸升到5.5元水平，去到7月出現較明顯慨沽壓，而集團曾經同分析員傾過經營情況，之後大行就降盈利預測等，對公司出現虧損都有準備，雖然盈警顯示唔使蝕錢，但盈利都冇左一大截，加上毛利率會跌幾多，市場都係有疑慮。 佢又話，周黑鴨一直係撳住黎沽，暫時冇乜反彈動力，相信要等業績出爐，從管理層方面拿到更多訊息，市場才會重新部署周黑鴨。 |
Earnings , Results , EMPEROR CAPITAL , Food , ZHOU HEI YA |
| 莊志雄 |
2022-08-03T15:44 |
聯儲局上星期再加息0.75厘，至今已差不多一個星期，期間美匯跌多升少，各類資產及各地股市表現如何？同美匯表現有幾大關係？ 「股市漁夫」創辦人莊志雄指，聯儲局主席鮑威爾係議息聲明後，佢慨表現被巿場解讀為係鴿派左，因為佢講左一個好重要慨字眼，就係「睇住數據」，因巿場期望通脹回落，但佢咁早講又會影響巿場預期，佢講野後幾日巿場炒局方遲些會再「放水」，或唔再加息，帶動股巿及部分商品同時反彈，令之前做慨功夫如壓抑需求等遏通脹慨作用減弱，導致通脹預期唔會落得咁快。 Lewis又話，依家聯儲局認為中性利率約3厘，但佢估計要去到4厘至5厘先可以控制通脹，加上局方彈出彈入，會持續影響聯儲局公信力，鮑威爾之前放鴿，但噚晚些委員又鷹返少少，更難控制到通脹。 美股方面，由聯儲局議息聲明出爐前至噚晚收巿，係先升後回少少，至於反彈係咪完結，暫時未完全肯定。 |
US Stock , USD |
| 譚智樂 |
2022-08-03T14:08 |
截至早上11時止，1小時內《彭博》用戶關注度上升最多港股，依次為吉利汽車(00175)、龍光集團(03380)、金沙中國(01928)、中國銀行(03988)及廣汽集團(02238)。 近日車股造好，表現最突出係吉利，有消息指，吉利母公司吉利集團及百度集團(09888)合資慨智能汽車公司集度，考慮啟動新一輪融資。雖然呢件事唔太關吉利事，但近日升勢都有成交配合，北水噚日及今日都淨買入，究竟係咩原因？ 獨立股評人譚智樂指，吉利逆市造好，主要係旗下電動車品牌有融資動作，融資釋放價值係利好因素，加上集團係國際及內地市場有一定競爭力。值得留意係，短線而言，市場失左投資焦點，比機會吉利借勢反彈。至於內地延長免徵新能源車購置稅，對傳統車企幫助較大。Arnold提醒，由於吉利仲未出銷售數據及業績，今輪升勢有可能只係曇花一現。 |
GEELY AUTO , Stock , Energy , BANK OF CHINA , New Energy |
| 文錦輝 |
2022-08-03T11:01 |
美國眾議院議長佩洛西慨專機噚晚抵台，中方隨即展開針對性反制行動，包括之後有實彈射擊軍演。投資市場方面，睇返佩洛西專機噚晚降落前後，中概股指數由跌轉升，台積電美股亦可以收復失地，新加坡恆指黑期一度反彈約300點，佩洛西今日繼續有行程，政治巿一向難估，應該點評估局勢變化？ 艾德證券期貨投資策略總監文錦輝指，佩洛西「落地」後，夜期都彈返高，但佢離開後就會開始緊張，佢又認為，今次係冇贏家，短期而言，台灣企業及經濟會有好大衝擊，而中美角力亦會持續，不過，政治市其實好快就會淡忘，下星期已經唔會再炒作呢件事。 Felix認為，踏入8月，恆指落到現水平，其實唔係跌左好多，香港環境唔係太差，內地亦只有內房有債務問題，其實唔少股票跌到現水平都有吸引力，不妨考慮係恆指19500點水平入手，一旦跌穿19000點就要先行離場。 |
US Bonds , China Real Estate , Stock , US Stock |
| 郭家耀 |
2022-08-03T09:42 |
安里資產管理董事總經理郭家耀推介國際家居零售(01373) 推介原因： －業績表現穩健 －派息水平吸引 建議買入價：2.8元 目標價：3.2元 止蝕價：2. |
Rating , IH RETAIL |
| 陳欣 |
2022-08-02T17:23 |
踏入8月，美匯指數延續上周弱勢，聯儲局官員話要加息遏通脹，美國ISM製造業指數擴張速度係兩年來最慢，亞特蘭大聯儲銀行預期，美國今季經濟增長1.3%，較上周預測2.1%顯著放緩，反映市場擔心經濟衰退。美匯指數5月底落到50天線，即105水平就有反彈，依家再逼近50天線，今次係咪守得住？ 資深外匯分析師陳欣指，自第2季GDP出爐，顯示美國經濟步入技術性衰退，美元持續弱勢，美匯指數守唔守得住50天線，要繼續睇經濟數據，因為係聯儲局加息慨依據，如果稍後公布慨通脹數據，反映通脹見頂，加息慨步伐就唔會好似之前咁快，如果數據支持聯儲局繼續走鷹派路線，相信美匯指數可以守住105水平。 |
USD , USD |
| 譚智樂 |
2022-08-02T16:10 |
受台海局勢影響，避險情緒升溫，3隻風電股創52周低，更大幅跑輸恆指，舊年龍頭龍源電力(00916)及大唐新能源 (01798)股價倍升，今年4月及5月內地實施一系列封控措施，雖然6月復工復產，但最新出爐慨7月官方及財新製造業PMI令市場失望，宏觀經濟環境變化會點影響綠電股？ 獨立股評人譚智樂指，綠電股舊年升左好多，主要係有國策扶持，令市場睇好綠電股前景，利好因素過分反映係板塊上，今年經濟及市場氣氛差，雖然業務冇受好大衝擊，不過，在缺乏利好因素下，加上風險因素隨著經濟差逐步浮現，上年慨升幅已回套左大部分。 |
ChinaElec , Energy , Stock , CONCORD NE , New Energy |
| 盧志明 |
2022-08-02T12:55 |
截至早上11點止，1小時內《彭博》用戶關注度上升最多港股，依次為小米集團(01810)、中芯國際(00981)、金沙中國(01928)、騰訊控股(00700)、遠洋集團(03377)。 今日所有上榜股都要跌，其中以小米跌得最多，集團將會係8月底出中期業績，基本上大行都預期小米第2季收入下跌，跌約20%，經調整盈利料按年大跌近70%，主要是智能手機市場需求疲弱，唔少市場研究機構數據顯示，小米第2季出貨量持續下跌，第2季表現差係意料之內。 大唐資本投資策略總監盧志明指，睇返行業層面，今年預左會有個缺口，唔止小米，其他同業都顯著放緩，小米銷量及出貨量反映依家係換機淡季，因此，小米過去一段時間業績都麻麻，而股價只係在5月、6月借勢升左一浸，之後回歸基本面就見到公司傳黎好多壞消息，相信股價今日仲未跌夠，又預期好快會下試10.3元低位，甚至會跌穿，冇貨慨投資者唔建議急於係呢個位入手。 |
Stock , TENCENT , SMIC , Earnings , SINO-OCEAN GP |
| 黃偉豪 |
2022-08-02T11:31 |
市傳美國眾議院議長佩洛西今晚訪台，市場憂慮令台海局勢再升溫，恆指今朝一開市已失守20000關，係咁多不確定因素下，恆指會跌到邊個位？投資者做部署時係咪要更加審慎？ 中薇證券研究部董事黃偉豪指，不明朗因素除左經濟衰退、內地爛尾樓風波外，最新當然係台海問題，港股短期走勢會較弱，依家已跌穿所有均線，不過，以上慨問題可以變得好快，港股走勢未必係一面倒咁淡，投資者要繼續留意事態發展，現階段恆指支持位可以睇5月低位，即19178點水平，建議博反彈慨投資者將收回價放係呢個水平以下，一旦跌穿呢些位，一定要先行止蝕。 |
Stock |
| 黃麗幗 |
2022-08-02T11:09 |
美國通脹創40年新高，上周再加息0.75厘；港元屢觸及美元兌換弱方保證，銀行體系結餘跌穿1,500億元，創2020年的低位。港股每逢升市，成交額驟減，惟另一邊廂則瘋狂低掃美國股市，科技股再受青睞。有「連登契媽」之稱Cathie Wood，旗下的旗艦基金Ark Innovation ETF(ARKK)，連續八日錄得合共6.39億美元的資金流入。 銀行體系結餘大減 金融管理局5月以來已經23次入市托匯，累計回購1,730億港元。過往曾多次沽空港元，卻徒勞無功的國際對沖基金經理巴斯(Kyle Bass) ，乘機再唱淡港元，推測未來1年聯匯制度將會被重新評估，而港元兌美元將大幅貶值三至四成。雖然有關推測不可盡信，仍為港股帶來隱憂。 早前內地保經濟的政策奏效，港股多個板塊曾出現短暫炒作，惟疫情反覆，近期的爛尾樓事件更至少涉及301個內地樓盤，雖則中國銀保監會已介入調停，惟影響波及鋼鐵、內銀及建材供應商等多個產業。當不少分析建議Cash is King，港股悶局短期難以扭轉。 科技股再受青睞 美國加息周期展開，更恐明年出現經濟衰退，5月份美股遭海外投資者淨沽售91.5億美元，不過港投資者對美股熱情未減。美國財政部最新報告顯示，本港資金單計5月淨買入規模達88.31億美元，佔亞洲淨買入美股金額約89%，香港成為海外的最大買家。 美企迎來業績期，微軟、Meta、亞馬遜等多間重磅科技公司相繼公布業績，重燃市場對科技股的熱情。Cathie Wood旗下的ARKK由去年2月高位累挫約七成，不過近期連續八日錄得淨流入6.39億美元(約49.84億元)，為自去年3月錄得最長流入的時間。 港ETF亦具優勢 ETF最大好處就是能夠捕捉一籃子的股分，分散風險，管理費遠較基金低，可作為長線的投資工具。美國ETF市場活躍，逾有2,000隻ETF，佔全球總數的三分一，比香港多近10倍。不過投資者則需要開設美股戶口，並且以美股交易時間買賣。 互聯網即將進入AI人工智能的新世代，IOT物聯網設備改善人類生活，互聯網社交平台更創造龐大經濟效益，科技龍頭將再度崛起，投資者如看好科技股的潛力，可考慮同樣捕捉全球頂尖的互聯網企業的本港ETF代替，如追蹤iEdge Factset環球互聯網指數的ETF，同時期比較，表現更勝ARKK。 |
HK Cap Flow , USD , Stock , China Banks , ETF |
| 盧志威 |
2022-08-02T11:02 |
多家傳媒引述消息指，美國眾議院議長佩洛西今晚會抵達台北，明日行程包括跟蔡英文總統會面，中方表明唔會坐視不理，外交部發言人趙立堅話，如果佢敢去，就等大家拭目以待。有分析認為，依家中美關係50年前尼克遜訪華以來最差，對區內股市，尤其A股及港股會帶來幾大風險？ 潤淼資產管理董事盧志威指，市場最主要係擔心地緣政局會出現擦槍走火慨狀況，但相信相關消息已經消化得七七八八，雖然今日市場氣氛比較低迷，但未至於會突然急瀉慨情況，而睇返環球股市走勢，其實美股仍處於高位，所以投資者唔需要過分緊張。 |
Stock , US Stock |
| 梁振輝 |
2022-08-02T10:52 |
美聯儲採取積極行動抑制通脹，市場情緒從早前憂慮通脹轉向擔心經濟增長，導致投資市場在七月經歷連番起伏。令投資者意外的是，增長憂累遏制了長期債券收益率的升勢，利好高增長股份的估值，對市場帶來意想不到的正面影響，納斯達克指數七月份的強勁表現是最佳的證明。 從資產類別的角度出發，我們認為投資者需加緊注意幾個近來比較突出的趨勢： 一，美聯儲加息和通脹持續高企，繼續推高短期債券收益率，但增長憂累遏制了長期債券收益率的升勢，目前仍低於6月高位。 二，經濟增長放緩的「壞消息」被演繹為股市的「好消息」，主要由於債券收益率升幅放慢，及股市倉位已極度偏淡。 三，經濟增長減慢令市場擔心需求放緩，加上中國再次爆發新冠疫情的憂慮，令石油和工業金屬下跌。 四，債券收益率及美元回跌，推高金價向上。 儘管如此，我們對2022年下半年展望的資產配置觀點保持不變。中央銀行繼續在走鋼絲，一方面要抑制通脹，同時要避免經濟陷入深度衰退。雖然央行過去一個月在降低通脹預期方面取得一些成功，但衰退指標卻顯示，經濟依然面臨一定風險，美國政府債券收益率曲線呈現倒掛便是其中一項證明。我們繼續將多元資產收益資產、增加債券配置及關注亞洲(不計日本)股票作為在基礎配置中三個應對方向。 七月份股市走勢回穩，但債市卻仍然面對壓力。如果經濟衰退的擔憂成為事實，美國和歐洲高收益債券的風險讓人關注。美國高收益債券的信用利差 (即相對於美國國債的收益率溢價) 目前與2018年該類債券遭到拋售時的信用利差水平相若；若果將之與股票波動指數作比較的話，該類債券甚至可能已經比股票市場計入更多對於經濟衰退的憂慮。 雖然，高收益債券的收益率溢價要回到2020年時當經濟出現衰退時的高位並非沒有可能，但這意味該溢價需要比現水平再翻近倍；同時我們注意到若果真的出現如此情形的話，首先很可能意味經濟出現了更嚴重的衰退，其次是歷史反映這種收益率溢價急升的情況通常都是非常短暫，因為當收益率變得如此有吸引力的時候，往往都能比股票更快地開始抵消價格下跌所帶來的影響，現時美國和歐洲高收益債券亦繼續是我們偏好的債券類別之一。 新興市場美元政府債券是第二個較令人擔憂的領域。隨著美元保持強勢和美元借貸成本上升，這類債券違約的可能性增加，相關收益率溢價已升至2020 年以來的最高水平。 但是，我們仍然維持這類債券為核心持倉的觀點，主要由於新興市場美元債券的資產類別非常多樣化，每個主權發行人佔總資產類別的比例不到 5%；而且迄今為止，在債務水平及流動性指標表現較差的新興市場整體而言仍只佔少數。雖然過去歷史表明，投資者需對於新興市場的風險會否出現擴散要保持警惕，但我們相信現時的估值已經大致反映了頗大的潛在風險。 |
Gold , Oil , US Bonds , USD , SUN HING VISION |
| 黃敏碩 |
2022-08-02T09:50 |
寶鉅證券董事及首席投資總監黃敏碩推介歐舒丹(00973) 推介原因: - 透過多品牌形式，銷售有機化妝及護膚品，市場規模保持穩中向上 - 成功建立差異化的競爭策略，產品定價大眾化 - 收購北美護膚品牌，可覆蓋高端身體護理 - 持逾三億美元現金。 |
USD |
| 阮子曦 |
2022-08-01T22:37 |
信義光能(00968)上半年少賺38%，毛利率由55.4%降至34.1%。 中國通海證券投資策略聯席董事阮子曦表示，信光半年純利，屬早前盈警的中位數，未至於很驚嚇，但公司下半年毛利率仍有下跌壓力，相信業績後，股價不會有太大反應，短期會於11至15元上落。 |
Results , Earnings , XINYI SOLAR |
| 梁傑文 |
2022-08-01T15:47 |
內房、物管股今日繼續尋底，當中以物管股金科服務(09666)跌得最甘，一度急瀉逾37%，可能同集團擬向係A股上市慨母企金科股份授出15億人仔貸款，市變相向母企「輸血」有關，但其實呢筆貸款有抵押之餘，更要收8.6厘年息，市場係咪反應太大？ 《香港股票財技密碼》作者梁傑文指，唔可以怪投資者反應過大，因為依家市場對內房、物管股慨投資環境及信心都非常薄弱，睇返昔日龍頭中國恆大(03333)，早前曾出左獨立調查報告，發現旗下子公司有逾百億資金被母公司挪用，市場自然會將兩者比較，講得好聽些，今次金科係向母公司「輸血」，亦有足夠抵押品及收高息，但見到規模、實力更大慨內房都要林，難免令人擔心呢筆錢最終收唔收得返，所以投資者會抱先沽為上慨心態，唔想再等。 |
Stock , China Real Estate , IPO , IPO , EVERGRANDE |
| 郭思治 |
2022-08-01T11:23 |
7月大市在先高後低之形態主導下，技術上差不多屬由頭跌到尾，由於買盤不繼，加上零碎沽壓持續滲著湧現，故大市自5日高位22,198點開始之下跌，至15日低位20,215點止計，即月內之跌幅為1,983點，論幅度該已不算小，故大市其後曾出現技術性回升，但相對月內之跌幅計，衹屬急跌後之小許後抽而已，論形態典型屬有波幅而冇升幅，有反彈而冇大升之技術性後抽而已。 值得留意的是，大市自7月12日開始，恆指已連續14日報收於各組常用的平均移動線之下，單從技術上看，整個大市己開始進入反覆欲試底之弱態，而所指的底，首個該為本月15日之低位20,215點，惟在沽壓主導下，大市於29日己跌穿20,215點，以日中低位為20,050點計，即大市正欲下試20,000點之支持，一旦20,000點之支持有失，其時市內或會出現一股不太理性之拋售，從而令大市再進一步下試5月10日之低位19,178點。 移動線方面之表現續示弱，目前各組常用的平均移動線由上而下順序為250天線(25,231點)，50天線(21,115點)，100天線(21,043點)，20天線(20,948點)及10天線(20,650點)，從形態上看，目前各組平均移動線差不多屬倒序模式，表示大市之弱勢正不斷加劇中。 值得留意一點，目前恆指己跌至20,000點左近，即己漸跌離上述各組平均移動線，從技術上看，由於零碎沽壓己漸主導大局，論形勢當不利8月大市之發展，由於目前不明及偏淡之因素仍多，在買盤審慎下，8月上旬之市況，衹要沽壓再稍主動，恆指可能會進一步下試5月10日之低位19,178點，一旦此據點有失，另一個技術防守將退守至3月15日之低位18,235點，此亦為今年暫時之低位。 面對持續反覆偏弱之市勢，投資者最好是續抱觀望，盡量保留實力，靜待另一次低吸良機，至於持貨偏重者則該盡早做妥個人之風險管理，切勿低估大市回調之深度，亦不宜高估個人持貨之能耐。 |
Stock |
| 李浩然 |
2022-08-01T11:16 |
標準普爾500指數從歷史高點最多一度跌近23％，而羅素2000指數和納斯達克100指數則分別從高點下跌了近32％和33％，這絕對是一個相當典型的熊市狀況。 然而，自6月中以來，標指、羅素2000和納指100已分別反彈了13％、14％及16％。再看個別股票表現，蘋果公司是標指中最大的成份股，在這次跌浪中拋售最厲害的時候，最多曾下瀉近29％，但該股在過去 六周回升了 25％，現在僅比其高點低約10％左右。再看目前狀況，標指由年初至今雖下挫13％，但由年七月至今實際上僅下跌約6％，若考慮到宏觀環境出現巨大的不確定性，也許不少投資者都會感到收貨。 儘管尚未有重大的線索或傳媒的大肆宣揚股市正在觸底，但好淡雙方都在爭論股市是否見底部還是只是一次熊市反彈？當中，好友認為熊市見底的論點包括： 一，股市已為通脹見頂折現，這某程度上是經濟實現軟著陸或聯儲局放慢加息步伐的原因。 二，經濟產出正在放緩，即使面對四年來的高通脹，勞動力市場仍然強勁。 三，大公司的盈利數據依然強勁。 四，股市具有前瞻性，目前正好反映即使未來幾個月陷入衰退或收縮，也可能是溫和的。 五，不利因素人盡皆知，換句話說，股市已對現在顯而易見的所有風險進行了折現。 但看淡者相信目前僅是熊市下出的死貓彈，痛苦的日子仍未過去，主要原因包括： 一，即使通脹已經見頂，它也可能比想像更具粘性。 二，現在和未來的財政和貨幣政策將比過去幾年明顯收緊。 三，聯儲局可能在加息方面做得過火，並給經濟造成比想像中更大的破壞。 四，佔GDP近 20% 的房地產市場可能會因利率上升而大幅放緩。 五，勞動力市場是一個滯後指標，未來幾個月可能會放緩。 六，如果經濟確實陷入衰退，便可能會受到一些外來性衝擊而變得比預期更糟，甚至不排除出現系統性的風險。 顯然，好淡雙方都給予令人信服的論點。 事實上，市場總是難以預測，但無容置疑的是目前的情況也是數十年來最具挑戰性的環境之一。現在有太多相互矛盾的數據點、敘述和觀點，要明確地了解當下變得非常困難，更不用說未來會發生什麼。事實上，這可能是最奇怪的經濟狀況，新冠疫情爆發一度使經濟出現崩潰，然後所有的經濟刺激措施都給了市場短暫的亢奮，然後現在宿醉又再次來臨。 如果股市能提供一個清晰的信號，讓投資者知道何時真正觸底，那就太好了。不幸的是，往往只有事後才能知道那個是真正的底部。長期投資需要為各種結果做好準備(無論市況向上或向下)，尤其是在熊市期間，情緒控制更要比任何時候做得更好。 |
Real Estate , US Stock , Real Estate |
| 梁振輝 |
2022-08-01T11:05 |
港股今個月開始步入業績高峰，今日有重磅股匯豐控股(00005)及恆生銀行(00011)搶閘派成績表，星期四收市後就有阿里巴巴(09988)等，美國加左幾次息後，匯控股價近月一直係50元樓下浮沉，其他國際金融股情況都差唔多，係咪意味金融股未必可以係今次業績期跑出？ 渣打香港財富管理投資策略主管梁振輝指，投資者已偷步炒作加息預期，雖然加息對金融業有幫助，但市場對全球經濟衰退憂慮明顯升溫，限制左部分股份慨升幅，事實上，金融股近期表現唔算好，亦未上返今年高位，不過，最少仲叫做有得升，亦可以跑贏大市，佢又提醒，投資者睇業績時，唔應該單純睇大數。 |
HSBC HOLDINGS , HK Banks , HANG SENG BANK , HSBC , Stock |
| 陳錦興 |
2022-08-01T10:15 |
英皇證券研究部總監陳錦興推介普拉達(01913) 推介原因： -中期業績強勁，歐美增長快 -下半年內地消費轉強。 |
EMPEROR CAPITAL , PRADA |
| 阮子曦 |
2022-07-29T16:12 |
渣打集團(02888)中午出左季績後，股價午後一度拗腰升2.5%，但之後走勢轉弱，暫時仲有得升，睇返幾項指標數字，唯獨淨利息收入維持到按季增長勢頭，雖然第2季稅前基本溢利好過預期，但其實整體表現係咪冇太大驚喜？ 中國通海證券投資策略聯席總監阮子曦指，環球經濟形勢係第2季比較複雜，加上係依家慨市況下，有唔少公司發盈警，市場都唔會有太大期望，所以渣打呢份季績市場都收貨。 佢又話，睇返呢份季績，除淨息差擴闊外，亦睇到渣打成本方面係降低左。此外，要留意公司前景及經濟收入能唔能夠支持公司持續增長，相信呢方面集團都畀到市場信心。 |
STANCHART |