Commentator |
Time |
Content |
Tag |
莊志雄 |
2024-04-17T17:29 |
美國3月通脹超預期,其他經濟數據亦表現強勁,美國聯儲局主席鮑威爾(Jerome Powell)昨日(16日)改口,暗示或要延遲加息,大行瑞銀(UBS)甚至估計,今年減息後,明年有機會加息。不過,美銀最新調查顯示,仍有唔少基金經理預期,未來12個月美國經濟唔會陷入衰退,佢地係咪對經濟前景過分樂觀? 「股市漁夫」創辦人莊志雄估計,隨著美國政府慨國債負擔愈來愈重,加上中東局勢緊張,聯儲局今年或會減息1次,但指減息後通脹可能更不受控。 Lewis指出,過去6個月受訪基金經理普遍對美國債市、股市前景比較樂觀,所以大幅減少手頭現金,並大量買入包括股票、長債等長期資產(long-duration assets)。佢引述美銀4月調查指,基金經理慨股票配置繼續上升,而目前現金僅佔基金經理管理資產4%。 Lewis續指,環球通脹開始見底回升,市場對減息次數慨預期愈縮愈少,經理就有壓力減倉提高現金水平,到時美股有機會調整至少1個月。 |
|
莊志雄 |
2024-04-10T16:12 |
由於美國經濟及就業數據強勁,令市場對聯儲局慨減息預期降溫,但金價持續強勢,商品、能源及黃金價格表現更跑贏美股,雖然最新利率期貨顯示,市場對美國年底減息慨預期持續降溫,但美股暫時未有太大反應,究竟依家反映緊乜野? 「股市漁夫」創辦人莊志雄指,減息預期暫時影響唔到股市,因為聯儲局官員經常出黎發表言論,令市場有個錯誤預期,以為今年真係會減息,佢提醒,要留意聯儲局會唔會唔理通脹,6月就開始減息。 Lewis又認為,當市場估計聯儲局冇誠意減息遏通脹,就會諗有咩可以對沖通脹,因為股市估值貴,推高估值反而不利投資者,所以唔會從估值方面入手,反而睇返3月會發現減息預期降溫,壓制左債價及科技股,唯獨商品相關工具做得好,所以佢提醒,資產配置一定要有商品類,因為商品係投資組合中最不受通脹影響。 |
|
莊志雄 |
2024-04-03T16:30 |
由於市場預期,美國聯儲局唔會咁快減息,美國10年期國債息率一度創今年新高,突破4.4厘,呢個走勢有咩啟示? 「股市漁夫」創辦人莊志雄指,一直叫市場留意4.4厘呢個位,因為「新債王」岡拉克(Jeffrey Gundlach)曾經講過,4.4厘呢個高位會對資產價格造成壓力,係一條警戒線,第2季一開局就挑戰呢個位,暫時唔肯定衝穿4.4厘後,會唔會再一直上衝,如果真係衝穿,突破埋5厘都唔出奇。 Lewis又分析指,聯儲局2022年中啟動加息周期後,當年第2季都曾加息0.75厘,債息幾日內抽高50點子,但之後一直冇乜大變動,直至今年2月公布消費物價指數(CPI)後,債息急升逾30點子,後來聯儲局不斷「放鴿」,令市場認定上半年將會減息,不過,債息不單冇跌穿4厘,反而向上挑戰4.4厘,反映債市或長債投資者認為,聯儲局依家慨做法會令長期息率落唔返黎,意味美國長期通脹已較難控制。 |
|
莊志雄 |
2024-03-20T17:48 |
日本央行結束負利率政策,17年以來首次加息,不過,日圓及日債表現反高潮,日圓跌穿151,債息又顯著向下,係咪市場解讀為日央行實際上會繼續寬鬆? 「股市漁夫」創辦人莊志雄指,議息結果公布前,好多人諗住日央行會加息,或者已經結束超寬鬆貨幣政策,所以可能好多盤等緊Long Yen,但有時事情發生後,唔係跟住大眾意願去行,例如英偉達(Nvidia)峰會都有類似情況,股價係峰會後升唔到,最重要日央行行長植田和男慨言論,市場解讀為「鴿派地加息」,而Yen慨反應顯示,市場質疑日央行慨做法控唔控制到通脹,所以Yen就不升反跌。 Lewis續指,植田已講明會保留大量靈活性,保持寬鬆政策,亦表明冇緊急加息慨必要,可能佢認為通脹會持續回落。市場反應方面,即使今次係萬眾期待,但今次加息仍然唔係全票通過,所以兩年期利率都見頂回落,10年期利率更誇張,知道日央行放棄孳息曲線控制(YCC)政策後,亦指會保留大量彈性,可以隨時再買長債,見到長債息回套返最近一半升幅,所以日圓有咁慨反應係正常,因為日央行都講明會再買返債,似乎唔係正式結束超寬鬆貨幣政策。 |
|
莊志雄 |
2024-03-13T16:26 |
美國2月核心通脹按月升0.4%,連續兩個月高過預期,但標指繼續創收市新高,似乎市場唔係好理會通脹數據,無論減息預期高低,美股似乎都可以繼續破頂? 「股市漁夫」創辦人莊志雄指,如果想美股繼續升,聯儲局就要放棄打擊通脹,除非聯儲局表明不論通脹指標係咪回升都唔會理,美股先有機會升,但就會犧牲左長債,因為通脹始終會慢慢升返上去,而長債價格就會冇反應,其次係要犧牲美金,其實同日本一樣,只要貨幣貶值就可以谷高股票指數,而主流媒體成日話通脹係最後一里(Last mile),已經講左8個月,只要講得愈來愈多,係呢種氣氛主導下,就會令人相信通脹一定會回落,唔理正式通脹指標係咪回升緊,就可以令股市或指數繼續升。 Lewis又留意到,大部分通脹報道都係講按年及按月變化,但其實聯儲局主席鮑威爾(Jerome Powell)係會睇以3個月或6個月年率化慨核心通脹率,尤其係個人消費開支(PCE),而過去12個月慨年率化核心CPI昨日(12日)顯示仍然向下,不過,如果睇3個月或6個月就見到通脹已經回升,而前者更升至4.1%,加上之前做左超級核心通脹指標,呢個指標係連租金都撇除埋就升4.5%,是9個月以來最高水平,反映升勢都幾凌厲。 |
|
莊志雄 |
2024-03-06T15:52 |
美股去年第4季開始炒減息,今年就炒「金髮女孩經濟」(Goldilocks Economy),即經濟穩定增長、低失業率、通脹溫和受控,令美股不斷破頂,不過,美國近期多項經濟數據表現麻麻,「花旗經濟驚喜指數」亦再度回落,係咪因為市場又炒返減息,帶動金價衝高? 「股市漁夫」創辦人莊志雄指,美國上周出左消費信心等數據後,由於表現普遍差過預期,如果「花旗經濟驚喜指數」升就代表經濟數據好過預期,相反,指數向下就反映整體數據差過預期,由於去年第4季數據差過預期,市場認為通脹有機會回落,所以就炒減息,但到今年數據好過預期,尤其2月慨通脹數據,市場就唔再炒「金髮女孩經濟」,似乎係一個唔錯慨局面,但2月中之後經濟數據又轉差,有可能市場再炒減息推高個市,但要留意未來一至兩周出爐慨數據。 |
Gold , US Stock |
莊志雄 |
2024-02-21T14:22 |
據美國最新數據顯示,當地通脹仍有好大韌性,令市場調整左對聯儲局幾時開始減息,減幾多次息慨預期,市場原本對減息慨預期及睇法都幾進取。 「股市漁夫」創辦人莊志雄指,睇返美銀慨基金經理調查,過去20年,未見過咁多基金經理認為今年一定減息,如果睇2年期利率,未來兩年會減4次息,根據過往經驗,聯邦基金利率表現係緊貼2年期利率,而後者最近係升緊,尤其去年12月之後,因此,最易出錯就係呢個位,太多人以為今年開始減息,其實「新債王」岡拉克(Jeffrey Gundlach)指,如果用2年期利率量度,預期聯儲局今年減息1次,明年就減3次,呢個就係落差。 Lewis又話,但基金經理幾乎100%認為今年會減息,所以佢地買債買得好勁,見到overweight債券係最多,所以好大機會係呢度出錯。 |
US Bonds |
莊志雄 |
2024-02-14T18:36 |
雖然美國1月消費物價指數(CPI)按年升幅放緩,但高過市場預期,據最新利率期貨顯示,聯儲局5月減息機會由數據公布前慨61%,急降至36%,而超級核心通脹似乎有掉頭回升慨勢頭,如果通脹真係仍未受控,短期內回落慨機會係咪唔大?雖然市場預期今年係減息年,但睇返依家慨情況,聯儲局今年會唔會仍未開始減息? 「股市漁夫」創辦人莊志雄指,可能係,甚至要掉頭加息,美國超級核心通脹按年升4.4%,按月升幅更加係2002年以來較高水平,但呢個已經唔計租金、能源及食品,但其實聯儲局已不斷搬龍門,連租金都剔除,但仍按年升4.4%,最大可能係美國人慨通脹預期愈來愈高,因為實質收入增長已經跟唔上通脹升幅,工資係被蠶食。 Lewis又話,呢度仲未計過去兩個月航運價格不斷上漲,唔少航線升幅已超過100%,有研究機構指,當航運價格升1倍,會影響環球通脹0.7個百分點,如果運費全線升200%,會影響環球通脹1.5個百分點,如果紅海、巴拿馬等危機未解決,通脹係好難回落。 |
Energy , BDI , Food |
莊志雄 |
2024-02-07T17:06 |
近期美股唔少人工智能(AI)相關股係業績期暴升,標普500指數亦跟住創新高,但市寬走勢就愈來愈背馳。「股市漁夫」創辦人莊志雄指,紐交所周一(5日)只有不足20%股份上升,係1962年以來從未見過慨異常情況,提醒美股後市或會好波動。 佢又話,債市亦出現異常,上周五(2日)至周一兩日內,美國10年期債息突然抽高近30點子,對上一次升咁多已經係2022年3月,當時聯儲局開始加息。 Lewis續指,同ISM服務業商業價格指數係過去1個月抽升有關,而服務業係當地消費物價指數(CPI)慨佔比最重,美債息急升或反映債市投資者預期,上半年通脹隨時不跌反升,並對主流慨減息預期有所警惕。 |
US Bonds , US Stock , Earnings |
莊志雄 |
2024-01-31T15:55 |
美股持續強勢,道指昨晚(30日)又破頂,但標指及納指回套,聯儲局已展開一連兩日慨議息會議,議息結果將會係本港時間周四(2月1日)凌晨公布,議息結果會點樣左右美股後市?美股升至現水平有冇出現泡沫? 「股市漁夫」創辦人莊志雄指,最近多左人講要「擁抱泡沫」,市場依家等緊聯儲局議息聲明,上次議息聲明出爐後,美股就升左一大浸,其中,標指升左20%,相信好多人「擁抱泡沫」慨想法就係預期聯儲局再「放鴿」,推高指數,但唔知今次有冇上次咁勁。 Lewis以用之前泡沫時期表現製作慨納指拼圖為例,用納指1999至2000年升勢同2023至2024年比較,pattern上相似,但幅度唔同,上次升得急些,今次慨形態相似,但幅度就冇咁大。睇返拼圖慨軌跡,時間點會到3月初,屆時要留意幾點,包括聯儲局之前為左救中小銀行,推出短期融資計劃係咪真正完結,因為市場似乎唔信會完結,所以會繼續炒,因此,相信納指3月唔會見頂回落,其次係聯儲局想繼續「放鴿」,就要睇通脹係咪持續回落,亦係影響今年可唔可以減息5次慨變數。 至於係唔係泡沫,除左可以睇估值,都可以睇最大慨公司係美股市場佔比有幾大。1929年及2000年慨泡沫都出現最大市值10%慨股票佔股市比重約73至75%,而目前情況就係佔約74%,用呢個角度衡量就係泡沫。因為正常唔會認為前10%股票會佔市場90%,而10%股票佔市值約70%已經係好誇張慨數字。 |
US Stock |
莊志雄 |
2024-01-17T16:24 |
內幕人士傾向造淡、沽貨多,但睇返美股市況,投資者風險胃納似乎仲未反映呢個情況,據美銀證券慨基金經理調查顯示,基金經理慨樂觀情緒係兩年以來最高,到底點解會有咁大落差?美匯指數升見103水平,除左因為聯儲局官員「放鷹」,會唔會係受惠於避險資金? 「股市漁夫」創辦人莊志雄指,當市場太差時唔好太悲觀,市場太樂觀時就唔好追。目前,貪婪與恐懼指數(Fear & Greed Index)見頂回落,市寬亦係見頂回落,呢個時候內幕人士會選擇減持自己公司股票take profit,佢建議散戶參考呢些了解自己公司運作慨人士去做。 Lewis又指,其實上季已提出見到一個好奇怪現象,美匯指數係咁多人唱減息慨情況下,都未有跌穿去年7月低位,依家反而抽返上黎,呢個情況就要留意低位,即預期會發生慨事冇發生,亦係低位上升回調0.5那個位,依家係上升中。 如果睇返歐元,部分歐元trader指,話依家係一個頭肩頂,有機會跌到0.98水平,如果歐元真係見頂回落,美匯指數可能抽升差不多10%,股市調整壓力會好大。 |
US Stock , USD , EURO |
莊志雄 |
2024-01-10T15:52 |
雖然市場成日話「科技七雄」(Magnificent Seven)係2023年撐住美股,但其實只得5雄撐住,蘋果公司(Apple)及Tesla冇份撐市,其中,Apple近日都開始被睇淡,先後被大行及券商降評級,主要係唔睇好iPhone未來銷情,其實早係半年前,呢個情況係咪已率先反映係股價上? 「股市漁夫」創辦人莊志雄指,雖然2023年第4季Apple仍然係中國手機市場排第1位,但同比增長跌左10%,由於中國市場利潤貢獻好大,相信未來每股盈利預測都要下調,不過,市場都流行先下調盈利預測,等數據出爐後就變成「勝預期」,但事實上睇到基本因素係轉差左,尤其係重要市場慨市佔率正在下降。 Lewis又話,留意到冇乜人想換iPhone 15,睇返中國網站,見到第1個星期慨銷售較2023年同期大跌30%,而係拼多多平台即使iPhone 15或15 plus都要減價近20%。 |
US Stock , Rating , IT |
莊志雄 |
2024-01-03T17:33 |
美股噚日(2日)開局失利,3大指數僅道指向上,標指就微跌,納指更跌逾1%。不過,道指、納指係2023年尾相繼破頂後,目前仍於高位徘徊,究竟標指係2024年有冇機會破頂?「股市漁夫」創辦人莊志雄認為,有幾項指標反映標指破頂機會唔大。 Lewis分析指,標指係過去70年只試過3次可以係美國債息倒掛後500個交易日內收復失地,但最終都回落到孳息曲線倒掛前水平。由2022年6月中,10年期同1年期國債孳息曲線開始倒掛起計,至今已經過左385個交易日。佢話,如果標指真係破頂,後市有可能要跌返落3700點水平。 佢又指出,過去3次收復失地慨時候,標指經調整市盈率(CAPE)皆處於當時中位數或以下水平。然而目前32倍慨CAPE明顯高於中位數,即16倍,但過去100年來,標指只係兩個時期可以由32倍再炒上,分別係2000年對付「千年蟲」,以及2020年新冠疫情後慨超低息環境。 |
US Stock |
莊志雄 |
2023-12-20T17:36 |
資金流入推高美股下,「股市漁夫」創辦人莊志雄提醒,要留意以下3項因素反映美股後市或會受壓,首先對資金蜂湧入標普500 ETF(交易所買賣基金)要抱有戒心,因為2018年就曾經出現資金流強但VIX恐慌指數急升,標指繼而急跌慨情況。 此外,Lewis分析被視為經濟寒暑表慨FedEx業績,指出過去一年通脹高企下集團上季收入仍然按年大減,反映期內貨運量明顯大跌。佢又提及,根據道氏理論(Dows Theory),當市場上貨品滯銷,運輸股表現就會較差,並指如果道指同道瓊斯運輸業平均指數冇係同期齊創新高,可以解讀為反向驗證(non-confirmation)道指目前創新高唔合理,道指往往好快就會回落。 最後,Lewis透過統計歐元兌美元過去52年數據,推測美匯指數會係1月回升。 |
US Stock , USD , ETF , Capital Flow , USD |
莊志雄 |
2023-12-13T16:50 |
美國噚晚出左11月通脹數據,其中,核心消費物價指數(CPI)按年升3.1%,符預期,消息一出,明年初減息預期隨即降溫,美國通脹係咪真係好難回落?聯儲局幾時先開始減息? 「股市漁夫」創辦人莊志雄指,聯儲局一直主要睇住核心通脹數字,而整體通脹數字都有增長,但如果拆開貨品及服務通脹數字睇,就會睇到分歧,服務通脹數字按年升近6%,貨品通脹數字按年要跌,佢又話,聽聞外國連蘋果公司慨產品都要減價發售,可能係今年庫存比較多。 Lewis又話,產品價格應該差唔多見底,因為庫存都去得七七八八,感恩節前後大減價銷情都唔錯,但佢認為,明年庫存仲有冇咁多,仲有冇減價空間暫時仲係未知數。 佢提醒,產品價格錄得按年跌幅後,好多時都會回升,一旦產品價格回升,產品通脹再升返,而服務通脹一直居高不下,黎緊就會見到核心通脹數字回升。Lewis預期,睇返依家慨局面,聯儲局唔可以咁快減息。 |
|
莊志雄 |
2023-12-06T15:37 |
踏入12月,美股繼續企係近期高位,噚晚出慨職位數據不似預期,引發市場憂慮,令減息預期持續,聯儲局去年底開始加息,標指表現仍然唔錯,過去鮑威爾及局內官員時鴿時鷹,美股呢幾年其實係咪都跟住官員口風走? 「股市漁夫」創辦人莊志雄指,鮑威爾2018年開始正式執掌聯儲局,呢6年有個pattern幾有趣,唔知點解美股係單數年份表現較好,同埋升得比較穩定,而雙數年份期間就經歷過大跌,其中,2018年第4季自高位回落左20%,而2020年因為新冠疫情更大跌逾30%,去年大部分跌幅都係第2季出現,跌左約20%,一般黎講,第4季表現應該唔似2018年,因為當年有1個好重要因素,就係鮑威爾剛執掌聯儲局就講錯野,話會自動導航咁「收水」,繼而觸發跌市。 Lewis又話,鮑威爾汲取左上次教訓,依家「時鴿時鷹」。 |
US Stock |
莊志雄 |
2023-11-24T16:12 |
美股11月以來顯著反彈,納斯達克100仲升穿7月高位,創近兩年新高,上次議息前後聯儲局主席鮑威爾(Jerome Powell)指金融市場正發揮作用,幫手收緊信貸,聯儲局就唔使做野,不過,佢講完之後,金融市場就幫手「放水」,股債都升,鮑威爾下次係咪要改口,要做返些野? 「股市漁夫」創辦人莊志雄認為,鮑威爾上次提及「The Market Is Doing Its Work」係咩意思?可以參考高盛金融狀況指標,每次呢個指標上升,就代表收緊銀根,鮑威爾講話前,即9月至10月底,呢個指標抽左上去,鮑威爾認為市場幫手做緊野,收緊銀根,導致當時慨金融狀態比較緊張。鮑威爾講左呢句說話,市場認為佢暗示停止加息,指標即掉頭向下,代表金融狀態寬鬆左,作用等同「放水」,所以過去1個月股市、債市慨方向基本上都係一致。 佢又話,係呢個情況下,由於市場預期變成「放水」或停止加息,導致有一個放鬆作用,各類資產價格係11月有個「鬆一口氣反彈」(relief rally)。 但依家銀根鬆返,係咪代表金融市場冇發揮作用?原本鮑威爾講話金融市場正發揮作用,但依家冇幫手「收水」,唔係發揮作用,咁佢下次出黎可以講咩?還是要繼續加息?呢個對未來市場有好大影響,例如...。假如之後出黎講話講返轉頭、加息周期未完結,就會好影響股、債市表現。如果之後係keep住當睇唔到金融狀態寬鬆左,任由佢寬鬆,就要犧牲美金大跌。但呢個都係未有結果,如果美元持續回落就可能有一個訊號比我地,但訊號目前未能夠確認。 |
US Stock , Sachs , US Credit , USD , AEON CREDIT |
莊志雄 |
2023-11-15T16:29 |
美國噚晚出左通脹數據,其中,核心消費物價格指數(CPI)按年升4%,反映美國通脹降溫速度比預期快,進一步鞏固市場對美息已見頂慨預期,市場似乎呈現一股樂觀情緒,連零售商Home Depot都話,通脹最壞情況已經過去,但值得留意係,油價、商品等冇乜反應,應該點解讀呢個現象? 「股市漁夫」創辦人莊志雄指,暫時只係睇到一日慨反應,同埋只係一次通脹回落慨數據,至於長期通脹係咪回落,仍然言之向早,但今次通脹數據對短線有一定影響,其中以標準普爾500指數升得最多,噚晚升左1.9%,長債債價就升1%,反映債息回落,但美匯指數跌1.5%,以債價黎睇就係得不償失,所以長期黎講,要留意楂住美債會唔會蝕匯率,即使債價升,都補唔返匯價下跌。 |
US Bonds , USD |
莊志雄 |
2023-11-08T14:25 |
「股神」巴菲特(Warren Buffett)旗下投資旗艦巴郡(Berkshire Hathaway)業績披露集團現金水平創新高,雖然集團錄得虧損,依家係咪買入呢隻優質股慨時機?如果現階段唔係好時機,幾時先適合做部署? 「股市漁夫」創辦人莊志雄指,買巴郡應該等巴菲特都認為股市跌夠出手時,上次佢出手好勁係2008年第4季狂掃貨,選擇呢些時候跟佢做部署係比較好,至於佢幾時會做野,其中一個「線索」就係留意現金水平有冇下降,例如2007、2008年現金水平大減40%,2007年高位楂左好多現金,隨著大市持續向下,佢就開始加注,一直加到2009年標指見底時,現金水平同高位比較大減逾40%,係呢些時機跟巴菲特做野或買入巴郡,會係一個較好慨時機。 不過,Lewis指出,依家標指曾經自高位回落左10%,但過去兩年都冇乜表現,係估值咁高慨情況下,見到巴菲特手頭現金係不斷增加,去年曾經增持西方石油(Occidental Petroleum),但之後一直偏向保守,過去4季基本上係淨賣出股票,唔係淨買入,呢個就話比外界知佢慨取態,就係依家係美股搵到估值合理慨野買,都有一定困難。 |
Oil , Earnings , US Stock |
莊志雄 |
2023-11-01T15:09 |
美國債市持續有異象,例如將美國長債交易所買賣基金(ETF)同納指100 ETF走勢拍埋睇,大部分時間都係同步,但今年第2季有一段時間係異常地唔同步,美國長債ETF跌,但納指100 ETF升,期間美股喪炒人工智能(AI),預期通脹回落及息口見頂等,依家睇返轉頭,當時係咪炒錯左? 「股市漁夫」創辦人莊志雄指,依家睇返一定係,當大家一窩蜂去做一件事,短線係可以唔跟基本因素,但大部分時間都要跟,點解揀美國長債ETF及納指100 ETF分析,因為呢些資產唔係睇今日,而係睇未來,前者係未來20年慨現金流,後者部分公司依家係冇盈利,都係著眼於未來10、20年,公司愈做愈好,將來有現金流時,就可以折現返去今日,就可以做一個估值。 Lewis又話,呢些Long duration assets最怕利率向上,因為要係未來慨現金流折現返去今日,利率愈高就愈唔值錢,今次個債係2021年已見頂回落,因為債券投資者對通脹敏感度較高, 長債真正大跌係2022年開始,初期一路拖住納指落去,兩者表現幾乎一模一樣,2022年呢兩類資產價格都係跌約30%。 |
US Bonds , US Stock , ETF , C.P. LOTUS , HSCEI ETF |
莊志雄 |
2023-10-18T17:01 |
據美銀最新基金經理調查顯示,受訪者預期,美國今季出現經濟衰退慨機會,較9月調查時大減至5%。不過,「股市漁夫」創辦人莊志雄擔心,歷史上美國政府公布經濟衰退會有滯後,而從以下3項經濟數據急速轉差可見,當地經濟可能已步入衰退。 Lewis分析指,9月美國信用卡消費按月驟降,急跌程度跟3月矽谷銀行(SVB)倒閉時差唔多。此外,美國大部分產品類別慨消費開支數據亦按年大跌,其中,百貨公司銷售跌近20%、電子產品銷售亦跌近10%,兩個數據都反映主力支撐美國經濟增長慨消費數據突然轉差。 佢續指,現時有約40個州份較去年多左逾20%人持續申領失業救濟金,而過去幾次經濟衰退時,正正同持續申領失業救濟金人數升幅顯著慨州份明顯增多慨時期重疊。 Lewis預期,若美國今年第4季已陷入經濟衰退,但華府可能會等到明年6月至9月先正式宣布,並指2008年金融海嘯時,當局就係9月雷曼兄弟爆煲前後,先宣布2007年末次按危機起,美國已進入衰退。 |
Retail |
莊志雄 |
2023-10-11T16:26 |
美國聯儲局2021年11月宣布「收水」後,股債都係跌,但油價已經升返上去,金價就升得唔多,究竟近期以巴衝突,會唔會令金價或其他資產價格出現大變動?金價有冇力追落後? 「股市漁夫」創辦人莊志雄指,雖然美國聯儲局開始加息至今唔夠兩年,但聯儲局宣布「收水」至今就差唔多兩年,期間美股從未創新高,絕對稱唔上係牛市,而對二三線美股黎講更加係熊市,跌得最甘係債市,美國30年期債價係宣布「收水」後跌逾30%,相反,聯儲局「收水」令美元造好,至今美匯指數升近12%,而金價係呢段期間都冇跌,油價更錄得頗大升幅,但油價最終會被經濟衰退影響,因此,第4季未必可以繼續升。 Lewis續指,要留意金價會唔會接力油價慨升勢,因為過往金價係經濟衰退時有機會造好,由於金價過去兩年升得比較少,投資者可能會買金避險。 佢又話,雖然以巴爆發衝突,但市場冇太大反應,即使油價上升,但美股近乎冇反應,佢提醒,市場風險溢價應該要提高,加上「收水」,美股估值應相應下跌,所以美股現階段係偏貴。 |
Gold , USD , US Stock , USD |
莊志雄 |
2023-10-04T14:53 |
美國眾議院通過罷免議長麥卡錫(Kevin McCarthy),加上市場憂慮聯儲局會維持高息一段更長時間,道指今年升幅昨晚(3日)已經蒸發曬兼倒跌,投資者原本預期聯儲局第3季加完息,明年初就會減息,並憧憬美國經濟可以軟著陸,但睇返美股慨表現,似乎反映美國經濟要硬著陸? 「股市漁夫」創辦人莊志雄認為,美國經濟會硬著陸,上季唔少人預期會軟著陸,因為加息周期就快完,而經濟數據表面上又唔太差,但市場似乎忘記左通脹上升周期慨歷史,仲以為個玩法係通脹回落期,呢代人係上世紀80年代開始投資到依家,都習慣左通脹長期回落慨情況,每次加完息利率就好快回落,央行因通脹回落就可以減息減得好狠,甚至做埋QE(量化寬鬆)救經濟,今次同過往每次大衰退前慨講法都一樣,就係預期經濟會軟著陸,例如2007、2008年,當年連央行官員都係咁講,但最後經濟陷入衰退。 Lewis又話,每次聯儲局「收水」都會影響全球金融狀態,而今次加息速度之急,係過去幾十年未見過,所以今次冇事發生及可以軟著陸慨機會近乎零,佢估計未來一定會「有事」發生。 |
US Stock , IPO , IPO |
莊志雄 |
2023-09-22T15:53 |
美國聯儲局再放鷹,主席鮑威爾話已經準備好係適當時候進一步加息,而最新利率點陣圖顯示,官員普遍預期,聯邦基金利率將會係高位維持一段較長時間,並預期明年減息兩次,較6月時預測少兩次。 「股市漁夫」創辦人莊志雄表示,官員預期加息周期未完係合理,因為當地通脹非持續向下,自6月基數效應消退後,通脹數據再度回升。佢分析指,全美獨立企業聯盟(NFIB)小型企業加價指數,一般係領先核心通脹數據約4個月,依家指數回升緊,佢相信走勢反映核心通脹有機會回升。 Lewis續指,世界大型企業聯合會(The Conference Board)公布慨美國經濟領先指標,按年變幅已跌至零,而1967年至今,每次出現呢種情況後,美國經濟都會陷入衰退,並指聯儲局仍有加息壓力,而數據已跌至2001年或2008年金融海嘯時水平,繼續「收水」就只會繼續跌。 佢認為,從上述數據睇,美國經濟唔似可以「軟著陸」,更似會出現滯脹。 |
|
莊志雄 |
2023-08-23T16:34 |
隔晚美國銀行股受壓,穆迪同標普都調低美國幾間地區銀行評級,除了內房引發的信託產品兌付危機,美國系統性風險係咪都不容忽視呢? 「股市漁夫」創辦人莊志雄指,睇番過去一年銀行股表現,恆生中國內地銀行指數跌得仲少過美國的花旗同美銀,所以美國的系統性風險都不容忽視。 佢又話,向來環球金融危機出現,通常都會通縮。 |
China Real Estate , HANG SENG BANK , HK Banks , Rating , US Stock |
莊志雄 |
2023-08-16T18:01 |
美股近期持續調整,「股市漁夫」創辦人莊志雄指,最近息口上升,增長股慨估值會受到擠壓。 Lewis比較納指5隻「股王」包括英偉達(Nvidia)、Google母公司Alphabet、微軟(Microsoft)、蘋果公司(Apple)、亞馬遜(Amazon)8月至今慨股價表現,當中僅市銷率(price-to-sales ratio)最低,即估值最平慨亞馬遜有得升。 佢分析指,5隻股份中,英偉達慨市銷率最高,最高峰時曾達45倍,意味集團係零成本下,需要45年才回本。佢又話,Tesla係2021年熱炒時,市銷率逾20倍,英偉達慨估值泡沫爆破後,市銷率下調至約39倍,但仍屬「瘋狂」估值水平。 Lewis續指,隨著8月息口抽升,呢類增長股面對慨沽壓愈大,因為債息愈來愈高,買債收息慨回報比買股票更吸引,機構投資者會逐漸減持高估值股,再將資金泊落債市賺利息,繼而拉低納指。 佢又提及,納指已跌穿50天線,跟長線市寬走勢背馳,指數係冇大股支撐下,將會進入唔短慨調整期。 |
US Stock |
莊志雄 |
2023-08-09T16:08 |
恆生指數今季持續跑贏標普500指數,點解會出現「東升西降」慨現象?「股市漁夫」創辦人莊志雄分析指,之前港股慨科技股累積左好多淡倉,第3季開始見到夾淡倉,就連金龍指數慨交易所買賣基金(ETF)今季都累升近12%,證明中資科技股走勢好,但佢認為,現時都係留意商品比較好,例如石油相關股。 Lewis續指,第3季商品價格升勢,令能源板塊係美股中表現最標青,尤其係石油服務股、油氣開發股,相關ETF分別升逾18%及逾13%,值得留意係,升得最好唔係市值最大慨能源企業或成分股。 此外,Lewis認為,港股慨新能源車股值得長期關注,並指歐美唔少汽車評論人對中國產電動車慨評價正面,事實上,板塊早係第2季已有利好訊號。 過去1個月,藍籌車股比亞迪股份(01211)及吉利汽車(00175)股價僅錄得單位數升幅,反觀「造車新勢力」小鵬汽車(09868)及理想汽車(02015)爆升約30%。 Lewis表示,雖然唔少股份短期已超買,但如果未來業績交到貨,仍睇好新能源車板塊長期走勢。 |
Energy , GEELY AUTO , Oil , Stock , US Stock |
莊志雄 |
2023-07-19T15:19 |
美國通脹降溫,美股就炒利率已見頂、經濟可以軟著陸等主題,美元近排轉弱,商品價格造好,7月至今商品表現暫時都好過股市,睇返利率及匯率市場,通脹真係會持續回落,亦唔會爆發金融危機? 「股市漁夫」創辦人莊志雄指,美股近排借通脹消息炒返上黎,但匯市及債市投資者似乎唔係咁睇,有調查顯示,匯率及利率分析員對美國通脹高企預期正在升溫,同股市慨炒法存在幾大分歧。至於會唔會有金融危機,匯率及利率分析員慨預期係降左溫,但其實係好正常。 |
USD , US Stock |
莊志雄 |
2023-07-12T15:01 |
美國6月通脹數據今晚出爐,市場預期會進一步降溫,美股已偷步升,美匯指數亦回落。「股市漁夫」創辦人莊志雄呼籲投資者要留意債市及匯市一些訊號,債市方面,美國2年及10年期債息倒掛,息差就去返3月矽谷銀行(SVB)出事時水平後,但近日有收窄趨勢,當中反映緊乜野? 莊志雄預期,今晚出慨通脹數字會再回落,主要受基數效應影響,但踏入下半年會減退,因此,通脹未來有機會回升,到底美股今晚會再炒多浸上去,還是等埋8月通脹數據先跌,又或者預先炒左通脹掉頭向上?所以今晚一定要留意。 Lewis又話,最近已經好少人講yield curve,其實依家處於一個極端倒掛情況,上一次出現呢個情況就係發生SVB事件,有趣慨地方係,2年期債息係通脹預期或聯儲局這論咁鷹下,仲未破上次高位,呢個情況都要留意住,到底yield curve會唔會抽返上去,由負數變正數,因為通常有「大事件」發生,yield curve都會向上抽。 |
US Stock , USD |
莊志雄 |
2023-07-05T18:34 |
上半年由ChatGPT掀起慨人工智能(AI)熱潮帶動美股向上,不過,「股市漁夫」創辦人莊志雄分析指,「股王」蘋果就快見頂,仲話「股王」地位隨時不保! Lewis認為,上半年Apple勁升或因為臨近季結,基金為粉飾櫥窗(window dressing)就夾最重磅慨蘋果上去黎整靚盤數,然而,集團現時每股盈利(EPS)預測已經向下,而行政總裁Tim Cook繼上年8月後,今年4月再大手沽貨,兩個跡象均反映現時蘋果股價虛高,高層趁高沽貨套現。 佢又預期,未來有劃時代AI產品慨科技企業,將會造就下一個牛市,而Apple最後一個明顯帶動股價慨產品已經係2016年推出慨AirPods,欠缺令市場有驚喜慨創新產品。 Lewis續指,Tesla有望成為下一隻「股王」,佢話公司係8隻標指重磅股中,最有能力推出真正創新慨AI產品,例如預計未來幾年量產慨人形機械人Optimus。 |
|
莊志雄 |
2023-06-21T17:22 |
美國聯儲局上周一如預期暫停加息,科網股繼續炒上,不過,美股3大指噚晚向下,原因係市場觀望聯儲局主席鮑威爾稍後係國會聽證會慨發言,到底聯儲局7月係咪會再加息?如果再度加息,美股會點走? 「股市漁夫」創辦人莊志雄指,議息會議後,美債孳息率,尤其短息有些想破頂,意味美國加息周期仍未結束。佢估計,如果冇重大事件出現,例如矽谷銀行(SVB)倒閉事件,局方會傾向繼續加息,因為核心通脹始終未見回落,過去5個月核心通脹都接近5%,但局方慨目標係2%,因此,就算聯儲局唔加息,息口都要係現水平維持一段長時間。 Lewis又話,最近推高美股主要係人工智能(AI)概念股,以美國晶片巨企Nvidia岩岩晉身萬億股王為例。 |
US Bonds , US Stock |
莊志雄 |
2023-06-14T17:16 |
美國噚晚出左5月通脹數據,消費物價指數(CPI)及核心CPI按年升幅雙雙放緩,市場預期,聯儲局6月會暫停加息,但7月會再加息,「股市漁夫」創辦人莊志雄指,同意呢個睇法,但要留意通脹未來會唔會再升溫,因為有基數效應,舊年上半年相對下半年慨通脹偏高,如果睇返舊年下半年通脹數據,今年下半年通脹未必會回落,甚至回升。另一方面,美國超級核心通脹及核心通脹都高過預期,雖然依家回落緊,但速度緩慢,佢認為未來走勢仍有好大變數。 Lewis續指,加息周期對資產價格有好大影響,包括美債、虛擬貨幣。 |
US Bonds |
莊志雄 |
2023-06-07T16:16 |
市場憧憬聯儲局停止加息,甚至掉頭減息,令納指企穩13000點,標指就繼續向去年8月高位進發,依家係咪入市好時機?有冇指標反映依家入市風險其實好高? 「股市漁夫」創辦人莊志雄指,其中一個極端背馳指標係「興登堡凶兆」,呢個指標要係市場人士唔驚、唔講時先有效,因為呢個指標面世時係畀紐交所用,用黎睇創52周新高及新低慨股票比例。佢又話,如果大市升,唔應該有好多股票創52周新低,但最新顯示有好多股票創緊52周新低,而數目同創52周新高慨股份有得比,呢個就係背馳現象。 Lewis解釋,背馳意思係指數平均線正在向上,但同一時間有好多股票創緊新低,同埋市寬表現較差,呢個就係極端背馳現象。佢提醒,要小心納指急挫風險,對上一次出現極端背馳現象已經係2021年11月,當時納指係半年內跌左5000幾點。 |
US Stock |
莊志雄 |
2023-05-31T14:06 |
美國債務上限談判反反覆覆經歷左成個月,終於進入「直路」,美國眾議院規則委員會通過將債務上限協議送交眾議院全體審議,估計眾議院今日會進行表決,談判期間短期債息扯到好高,不過,隨著各方達成協議,債息近日都略為回落,係咪反映市場都有信心協議可成功「過關」? 「股市漁夫」創辦人莊志雄指,市場似乎唔係好驚,而債息慨表現主要係投資者想避開X-date,而美國財長耶倫之前將「死線」推遲到6月5日,的確令市場稍為安心,而正路估計,耶倫應留有幾手,例如再推遲幾日,呢方面都係要留意。 Lewis又話,一旦耶倫或佢慨團隊計數唔準,甚至出現違約情況。 |
CARRIANNA |
莊志雄 |
2023-05-17T16:30 |
美國隔晚偏軟,道指要跌逾300點。投資者JEREMY GRANTHAM提出,總統選舉周期第三年,一般股市都會做好。呢個理論依家仲有冇效?另外,佢都有用估值去睇一些長遠回報,投資者可以點參考部署? 「股市漁夫」創辦人莊志雄指,無論係總統或執政黨都會想自己派別繼續執政,所以佢地會係第三年「谷經濟」,令第四年經濟歌舞昇平。因聯儲局「放水」,通常會有六至十二個月慨滯後效應,所以先會係第三年開始「谷經濟」,預留時間畀實體經濟提升,有利該黨繼續連任。但因為受到聯儲局資產負債表膨脹或收縮影響,所以呢個理論係過去三年都失效。 Lewis又話,依家仍然可以用估值睇長遠回報。由於現時美股估值超貴,所以未來七年回報預測係負數。如果依家股市回升,立即做量化寬鬆(QE),通脹可能徘徊5%至10%,而標普500指數表現都可能係5%至10%,扣除通脹就變成負回報。反而新興市場慨價值股,未來七年回報率扣除通脹後,高於以往平均值,有約7.6%,因此投資者可以考慮呢類型慨股份。 |
US Stock , SUN HING VISION |
莊志雄 |
2023-05-10T15:51 |
據聯儲局慨調查顯示,美國銀行信貸緊縮情況係愈來愈嚴重,最新發表慨「金融穩定報告」指,銀行信貸審批標準進一步收緊,甚至有官員估計,情況會持續至年底,係咪意味經濟衰退風險正進一步升溫?經濟衰退又會衍生咩問題? 「股市漁夫」創辦人莊志雄指,解決辦法只有阻止存款流失,因為存款再流失,銀行只能減少信貸,聯儲局要快速減息先可以阻止存款流失,不過,短期內減息會令通脹落得好快。美國今晚公布慨6月消費物價指數(CPI)預期會向下,但由於基數效應,7月CPI或掉頭向上,因此,聯儲局下半年好難減息。 Lewis又話,如果銀行可以捱到逾1年,等手上慨美債到期,就可以轉去投資高息美債,到時就可以加存款息,成功解決問題,但問題係呢些地區銀行捱唔捱到咁耐,加上根據過往經驗,銀行收緊信貸後,失業率就會飆升,對經濟造成好大壓力。 佢又話,美國依家已經係衰退邊緣,美國慨經濟領先指標已跌左一段時間,市場普遍認為經濟會硬著陸,睇返往績,美股都會跌幾成,甚至一半。 |
US Bonds , US Credit , US Stock , AEON CREDIT |
莊志雄 |
2023-05-03T15:42 |
美國通脹見頂,銀行危機又可能令聯儲局要再「放水」,加上標指持續向上,美股係咪已經見到曙光,甚至步入牛市? 「股市漁夫」創辦人莊志雄指,雖然美國通脹持續降溫,但同聯儲局2%慨目標仲有一段距離,因此,通脹見頂唔代表聯儲局會「放水」。佢又話,唔可以單憑標指表現去判斷市況,因為當中幾隻大價股已佔幾成市值,佢認為依家只係托住標指畀大戶散貨,其實Silvergate爆煲後,近兩個月標普中型股指數及小型股指數都大跌,而避險資產如黃金及美國10年期國債都跑嬴標指,如果美股真係步入牛市,情況應該係相反。 Lewis續指,依家美股「最後逃生門」已倒數緊,依家市寬表現差,1月仍有80%股份升至50天線樓上,依家減少至不足40%,反映市場依家係度派緊貨。 |
|
莊志雄 |
2023-04-19T16:11 |
聯儲局官員最近不斷派定心丸,力撐經濟無事,美股三大指數過去一星期表現都平穩,而家市況係咪真係咁樂觀?大行仍然鼓勵買貨,仲話要「Buy In May」,應該信邊個? 「股市漁夫」創辦人莊志雄指,通脹未受控制,所以即使停止加息,高利率仍然會維持一段時間,換言之美股股價會低迷,反映長期估值慨周期調整線,由37倍跌至29倍。佢提到,2008年3月投行貝爾斯登爆煲後,股市都有反彈,當時又係有班聯儲局官員派定心丸,指經濟只係溫和衰退,同而家矽谷銀行爆煲後慨情況類似,認為之所以未大跌市,係因為大戶未派曬貨,當時美股指數都頂住近半年先有雷曼事件。而2007年高位美股慨估值係27倍,息口同而家差唔多水平,到減至接近零息,估值都要跌至15倍先見底。 Lewis又話市場進入熊市第二期,指數波幅會大。據最近美銀基金經理調查,投資者買緊防守性慨板塊,包括必需消費品(Consumer Staples)、公用股及醫療保健股,不過呢些係2008年最終都要大跌,今次仲要係有通脹慨熊市,買美債都未必穩陣。據美銀數據,私人客戶不斷增加現金水平,可能楂現金真係最可取。 |
US Bonds , Util , US Stock |
莊志雄 |
2023-04-12T16:31 |
今個星期市場焦點落係美國今晚出爐慨通脹數據,將會點樣左右聯儲局加息決定,近日市場對聯儲局慨加息預期再度升溫,不過,如果局方進一步加息,又擔心經濟衰退,今晚公布慨通脹數據係咪仍然相當關鍵? 「股市漁夫」創辦人莊志雄指,今晚出爐慨通脹數據仍然十分關鍵,根據以往經驗,若消費物價指數(CPI)曾高過8%,通脹要落返去2%水平,需時數以年計,平均需要10年,最快都要7年,美國通脹去年曾飆升至8%樓上,因此,如無意外,聯儲局要見到通脹明顯回落先會開始做野,據最新利率期貨顯示,下個月會議將會再加息,之後會維持利率不變,直至年底。 |
|
莊志雄 |
2023-03-22T14:08 |
歐美銀行危機急速升溫,但又似乎好快降溫,瑞銀(USB)收購瑞信(CS),各國央行又力撐金融體系,帶動美股持續反彈,市場加息預期亦降溫,呢場危機係咪咁快結束?資產價格喘穩後,市場信心係咪就可以恢復? 「股市漁夫」創辦人莊志雄指,依家慨情況仍然唔明朗,今次危機慨源頭,係美國方面係存款流失,即所謂擠提,令好多中小銀行頂唔順,要美國政府出手頂住,情況係咪已經改善?如果睇返最新數據就唔係,因為數以千計慨美國中小銀行仍面對存款流失情況,就連較大型慨商業銀行都出現呢個情況,而當中涉及多個因素。 Lewis又話,存款流失問題仍未「止血」,中長線而言。 |
US Stock , EVERCHINA INT'L |
莊志雄 |
2023-03-15T15:19 |
聯儲局下星期就會議息,但市場對加息慨預期不斷改變,主席鮑威爾之前「放鷹」,市場就估計今個月會加息0.5厘,但近期發生矽谷銀行(SVB)爆煲事件,最新估計只會加息0.25厘,甚至有大行認為要掉頭減息,投資者似乎都無所適從。 「股市漁夫」創辦人莊志雄指,投資者真係唔好跟車太貼,市場普遍睇利率期貨去做加息預測,如果過去1個月真係跟住些市場預測去做投資部署,真係好容易「左一巴、右一巴」,比市場牽住走。 Lewis又話,美國依家係步向衰退,經濟會硬著陸,但通脹又未回落,呢個情況唔係靠加息減息可以扭轉。佢估計,聯儲局今個月會加息0.25厘,但之後就會暫停。 |
|
莊志雄 |
2023-03-08T14:58 |
美國聯儲局主席鮑威爾噚晚係參議院作證時「放鷹」,指已準備好係必要時擴大加息幅度,利率見頂水平可能高過預期,利率期貨即時有反應,今個月加息0.5厘慨機會急升至70%,過去半年,市場對美國慨加息預期大上大落,依家係咪處於一個比較混亂慨狀況? 「股市漁夫」創辦人莊志雄指,混亂係聯儲局一手造成,依家再推遲減息,未來可能因為加息加過龍,導致美國經濟嚴重衰退,睇返終極利率,由於局方經常「嗡三嗡四」,令市場參與者之前以為利率已見頂,但依家又走出黎講野,原因係過去1個月公布慨數據,反映通脹仍高居不下,佢又話,佢之前已經估計美國通脹已見頂,但要急速回落唔係咁易。 Lewis又指,若聯儲局之前冇講放慢加息步伐,如果投資者只係估估下就唔會亂炒,1月講完野之後,令投資者有個錯覺聯儲局好快加完息,甚至今年開始減息,由於局方冇預測能力,通脹走向亦唔會知,一見到數據唔對路,又要掉轉講,增加左美國利率預期慨波動性,絕對唔係好事。 |
|
莊志雄 |
2023-03-01T17:28 |
2月債息急升令美股3大指數受壓,道指今年升幅一度化灰,雖然標指及納指有得升,但「股市漁夫」創辦人莊志雄指,標指主要靠8隻重磅科技股撐,加上納指慨長線市寬向下,種種指標都反映美股仲有排調整。 Lewis解釋,目前聯儲局關注慨「超級核心」通脹(supercore inflation),即係核心通脹減住房價格,升幅大過預期,令市場再次調整對加息幅度及周期慨預測。 根據衍生工具市場數據顯示,利率期貨交易員預期,聯儲局最終會加息至6厘以上,進一步遏通脹,Lewis認為,通脹見頂後唔會立即回落,高息率將繼續對債市及股市造成壓力。 Lewis續指,標指慨股份收益率同聯邦基金利率好近,削弱左持股吸引力。 |
US Stock , IT |
莊志雄 |
2023-02-15T15:10 |
雖然美國通脹持續回落,但速度冇市場預期咁快,睇返CPI組成慨各個分項,基本上都持續向上,美國通脹要達到聯儲局2%慨目標,莫講今年,甚至出年係咪都未必可以達標? 「股市漁夫」創辦人莊志雄指,美國通脹係難達標,雖然預期會見頂回落,但估計速度係會慢,噚晚出爐慨CPI就證實左。佢又話,CPI細分項中,最大係租金,而睇返各分項亦唔係整體向下,如果睇返過3個月慨變化,逾半細分項慨升幅係多過12月慨升幅,係有一種再度加速慨味道,唔止回落速度慢,係有掉頭回升慨風險。 Lewis又話,租金係2021年後持續向上,所以最近會聽到聯儲局想搬龍門,想做一個「超級核心通脹率」出黎,即唔包括食品、能源、租金,而衣食住行中有3項都唔包,唔知呢個「核心」係點,其中租金佔CPI近40%,撇除左租金,通脹當然會回落,但市場buy唔buy係另一回事。 |
Energy , Food |
莊志雄 |
2023-02-08T16:19 |
隔晚聯儲局主席鮑威爾發表講話,雖然同日前亞特蘭大聯儲銀行行長慨口徑一致,話美國經濟持續強勁,利率峰值可能高過預期,但市場似乎未受佢慨言論影響,仲解讀為鮑威爾言論唔夠鷹,美股照升,鮑威爾講話係咪真係冇市場預期咁鷹? 「股市漁夫」創辦人莊志雄指,呢個係市場解讀,但最重要係睇返資產價格表現,因為可以反映市場點樣解讀,反而市場人士點講係另一回事。佢認為,過去一星期資產價格表現幾奇怪,可能市場聚焦係美股標普500指數身上,但其實鮑威爾發言後,或重磅科技股出左業績後,出現一個奇怪現象,就係美元升,美債跌價,美債息升,而對利率十分敏感慨黃金,價格亦下跌,如果睇返資產價格,除美股外,偏向係「水緊左」。 Lewis又話,那個星期鮑威爾講左兩次野之後,睇資產價格除美股外都係偏緊,所以佢講野鷹或鴿並唔重要,最重要係睇返資產價格表現。 |
Gold , US Bonds , US Stock , IT , USD |
莊志雄 |
2023-02-01T15:32 |
恆指過去2個月跑贏好多資產,內地放完農曆新年長假後復市,雖然北水重臨,但頭兩日都係沽貨,今日就稍為喘定返,但港股其實升左唔少,呢兩日慨回調可能係短線健康調整,港股後市又會點走? 「股市漁夫」創辦人莊志雄指,如果以低位計,恆指係兩個幾月已升超過50%,所以唔應該再追貨,雖然恆指係全球股市中做得最好慨指數,即使市況冇問題,都最好等回調先再加倉,因為睇返個別股份,尤其係指數成分股,好多股份慨蟹貨仲未消化曬,今次恆指升得咁勁,的確係超預期,Lewis又話,舊年第4季已經講過唔好睇淡港股,而今年1月表現係較預期好,但佢認為,操作上仍當上落市咁做,可以係低位或散戶比較悲觀時加多些貨,依家咁多人話牛市重臨,反而就要減持,唔好畀情緒牽動得太緊要,因為今年仲有好多變數。 |
Stock |
莊志雄 |
2023-01-18T16:16 |
過去1個月,睇返唔同ETF類別慨表現,上月以新興市場ETF表現較好,一路炒美元回軟及中國經濟重啟,日圓ETF只係排第2位,點睇黎緊慨走勢?未來係咪繼續炒中國重啟因素? 「股市漁夫」創辦人莊志雄指,投資者好多時留意今日發生慨事,但始終要睇返個趨勢,其實由舊年第4季開始,主題係熊市反彈,特色係之前強勢慨美元回一回,令好多股市指數造返好些,以龍頭美股為例,雖然過去1個月累升3%至4%,但有一點要留意,睇返標指慨走勢,舊年6月係插左落去,之後一直處於上上落落慨狀態,仲未擺脫下降軌,其實係類似熊2狀態,即係跌左近20%後,造返一個反彈,但又破唔到頂,跟住又呈一個上落格局,龍頭已經係咁,其他市場都可能畀龍頭牽著,最重要龍頭唔好出事。 Lewis又話,日本市場係今年最少人談論慨風險因素,日本央行今日出左聲明後,日圓應聲下跌,行長黑田東彥就快卸任,維持政策不變係正常,但令佢聯想到當年美國聯儲局狂做寬鬆政策,令美國經濟表現似乎好好,但2008年就出現雷曼倒閉事件,因之前過度印銀紙,印出一個樓市泡沫,最後要靠QE收科,依家日本慨情況有些類似。 |
China Econ , ETF , USD , US Stock , SUN HING VISION |
莊志雄 |
2023-01-11T15:33 |
踏入2023年美股走勢都幾反覆,市場睇住D經濟數據同聯儲局官員講話,隔晚聯儲局主席鮑威爾講話會繼續加息壓低通脹,美股有得升,點解讀佢番說話? 「股市漁夫」創辦人莊志雄指,鮑威爾口風冇變,美股已經連跌4個星期,依家夾番上去好正常。佢提醒,市場似乎同大家慨預期倒轉,好多人預期鮑威爾講野好「鷹」,但股市又繼續夾升。 Lewis預期,美國消費物價指數(CPI)會見頂回落,但唔認為今年會回落至2%,所以聯儲局要維持比較緊縮慨狀態,如果星期四公布CPI數字低過預期,都未必代表個市會再升多些。 |
US Stock |
莊志雄 |
2023-01-04T16:19 |
雖然美股今年開局出師不利,但有分析認為,美股連跌兩年並唔常見,更預期美股今年好大機會回升,不過,如果講股市見底,港股係咪會快過美股? 「股市漁夫」創辦人莊志雄表示,見底有兩個條件,首先係要沽慨人已經沽曬,香港之前好明顯係,聽到最差那日有基金經理宣布香港科技股已經清左倉,而宣布後就岩岩見底。即係話當投資者悲觀到一個程度,跌到15000點就睇10000點,當市場出現呢些極度悲觀情況,股市係有機會見底。 佢續指,其次係睇基本因素,估值係咪去到歷史低位,依家美股肯定唔係,美股跌左逾20%後,標指經周期調整市盈率仍有20倍以上,歷史低位一般係10幾倍,通脹失控年代甚至見過單位數。 Lewis認為,港股可以睇高一線,因為恆指已跌到低過帳面價值,怛恆指係咪可以見底回升,暫時仍未肯定,但大市有15%至30%股份已經見左低位,即有些股份唔會跌穿舊年低位,但唔代表恆指唔會再探底,因為美股未跌完,就有機會拖累恆指。 |
Stock , IT , US Stock |
莊志雄 |
2022-12-21T15:28 |
日本央行噚日向市場投下震撼彈,出乎預期擴大10年期國債孳息率區間,明示退出維持多年慨超寬鬆貨幣政策。 「股市漁夫」創辦人莊志雄認為,當連長年面對通縮慨日本都轉鷹,反映環球通脹情況已經嚴重失控,各國央行其實冇計控制通脹,指炒作減息憧憬係言之尚早。佢續指,數據顯示日本早前已開始縮表,可見今次行動並非突然。 Lewis又指,美債引伸波幅係各國央行減加息幅度後,仍未穩定落黎,預期明年債市會愈來愈波動,又話今年現金及收息工具跑贏大部分資產,認為明年慨投資策略可保守些,例如投資美國短期國庫債券(T-bills),幾個月內就可以連本收返3至4厘息。 |
US Bonds |