| Commentator |
Time |
Content |
Tag |
| 聶振邦 |
2026-10-16T16:32 |
正在招股，將於下周二(20日)截飛慨瘦西湖文旅(06157)，截至昨晚(15日)7時止，暫時收左逾16億元孖展，超額認購逾70倍，港股罕有景區股，招股反應係咪都算唔錯？瘦西湖文旅經營狀況正面，有錢賺之餘，增長亦唔錯，點睇公司前景？ 高歌證券金融首席分析師聶振邦指，由於現時只得1隻新股招股，如果投資者真係睇好呢隻股份，招股首一、兩日孖展應該已超購逾百倍，但依家去到第3日，最新都唔夠100倍，反映招股反應只係中規中矩。 聶Sir又話，集團慨業務古運河區係獨家經營，有壟斷優勢，至於瘦西湖景區亦佔逾90%活動，近乎壟斷，睇返牌照情況，由依家計競爭優勢仲可以保持10年，所以初步睇黎，瘦西湖文旅業務前景算樂觀。 |
|
| 聶振邦 |
2026-10-14T16:21 |
兌吧(01753)股價今日(14日)一度爆升50%，高見0.72元，集團透露，新業務人工智能(AI)短劇連續3個月有錢賺，兌吧今年1月由SaaS(軟體即服務)轉型至AI短劇，睇返中期業績，收入已有2.23億人仔，佔整體收入51%，但因為AI業務勁燒錢，令中期業績「見紅」，雖然新業務表現好，但唔代表盈利一定有保證，點睇兌吧現時經營狀況？AI短劇業務收入增長勁，係咪足以撐起成份業績？ 高歌證券金融首席分析師聶振邦表示，兌吧轉型成效唔錯，之前做SaaS生意時，已有分析廣告流量慨技術優勢，依家做AI短劇似乎用得著，成功製作吸引性高、流量高慨短劇。 聶Sir又話，雖然兌吧中期業績仍錄得虧損，就算黎緊未能扭虧，但估計虧損會進一步收窄。佢認為，兌吧擁有自家系統製作AI短劇，壞處在於前期投入較多，但好處係唔使用詞元(Token)，因此，雖然兌吧前期投入大，但未來成本效益會較理想。 |
|
| 聶振邦 |
2026-10-07T16:24 |
嘉里建設(00683)以逾43億元奪得何文田佛光街豪宅地，較估值上限高約40%，呎價近2.1萬元，市場估計，落成後呎價要3.9萬元至4萬元先可以收支平衡，附近新鴻基地產(00016)旗下豪宅天鑄，最新二手成交呎價約3萬元，發展商今次用高價投得地皮，係咪反映對呢個項目及樓市前景有信心？ 高歌證券金融首席分析師聶振邦表示，依家呢幅地皮定位傾向豪宅類，但都要視乎落成時本港經濟狀況，如果同依家差唔多，呎價可以去到3.9萬至4萬元，但都要睇埋有冇其他配套，例如智能配套等，因為可以提升吸引力。 聶Sir又話，市場上對項目每呎造價睇法分歧，較進取就睇3.3萬元，但如果同預期呎價3.9萬元比較，就冇乜水位，亦有分析估計造價約2.6萬元，呢個同預期呎價比較就有較大水位，但佢認為，造價係3萬元以下比較合理，暫時睇黎，嘉里仍有利可圖，但實際賺幅就有待觀察。 |
|
| 聶振邦 |
2026-10-02T15:51 |
美國巨無霸人工智能(AI)獨角獸Anthropic慨IPO計劃有新消息，市傳集團希望係11月底感恩節前完成上市，如果計返時間，即係11月初就要招股，參考上次SpaceX慨情況，上市前1個月，費城半導體指數(SOX)大升逾22%，今次Anthropic IPO會唔會帶動SOX大升？ 高歌證券金融首席分析師聶振邦指，SOX參考性的確較大，因為Anthropic屬於AI股，底層黎講硬體都要晶片支持，因此，如果SOX升意味有一定投資熱度，間接可以預期Anthropic招股反應會比較理想。 聶Sir解釋，睇返Anthropic今次IPO部署，應該係想避開預期最快明年第1季上市慨OpenAI。 |
|
| 聶振邦 |
2026-09-30T17:20 |
早前，山東黃金(01787)下調今年黃金產量至介乎36至38噸，較2025年減少逾20%，受消息拖累，集團股價應聲跌至逾2個月低位。公司指，因同業爆出安全事故，須按監管要求展開自我審查，因而影響產量。山東黃金下半年業績係咪都要打定輸數？董事長王成龍昨日(29日)建議，動用公司自有及自籌資金回購最多4億人仔A股，對股價有幾大幫助？ 高歌證券金融首席分析師聶振邦估計，金價係11月、12月下跌機會較大，所以未必係部署金礦股慨好時機，加上山東黃金大幅下調產量，集團上半年盈利按年增長47%，但市場都預期下半年增長會放緩，除非有其他催化劑出現，否則，山東黃金股價短期都會跟金價走。 聶Sir又話，山東黃金對上一次回購股份係2020年，反映管理層傾向派息回饋股東，而非透過回購，佢相信今次回購目的係想改善股價表現，但係減產及下半年業績被看淡下，估計回購對提振股價作用唔大。 |
|
| 聶振邦 |
2026-09-29T10:23 |
高歌證券金融首席分析師聶振邦推介零跑汽車(09863) 推介原因： -2026年上半年多賺5倍。 |
|
| 聶振邦 |
2026-09-18T15:58 |
光通信概念股納真科技(09856)昨日(17日)截飛，公司計劃發行1.72億股，當中10%會係本港公開發售，招股價32.96元，每手100股，入場費約3329元，集資約5.67億元，股份預期係下周二(22日)首日掛牌。納真上市前，人工智能(AI)概念股今日(18日)有唔錯慨反彈，可唔可幫手造下勢，納真掛牌有冇機會響頭炮？ 高歌證券金融首席分析師聶振邦指，睇返納真基本面，不論用市盈率(PE)、市帳率(PB)，還是市銷率(PS)計，公司數值都低過行業，所以初步睇黎定價有一定吸引力。此外，集團上半年收入及盈利按年增長約30%，再配合基石投資者佔招股規模50%，因此，投資者認購做中長線部署都係合理。 不過，聶Sir提醒，納真短線表現仍要視乎市況，同埋會唔會有不確定性。 |
|
| 聶振邦 |
2026-09-16T15:58 |
政府公布本港首份五年規劃，指要鞏固香港領先全球慨跨境財富管理中心地位，推動人民幣櫃台納入港股通，並研究以人仔支付政府開支。匯豐證券降港交所(00388)評級至「持有」，目標價削至410元，原因是銀行、資本市場及地產活動，係6月初開始減慢，為港交所收入及盈利帶來壓力，不過，摩根士丹利上調港交所目標價至538元，主要是預期未來資本市場活動持續活躍。大行對港交所睇法好壞參半，投資者應該點部署？ 高歌證券金融首席分析師聶振邦認為，短期黎講，匯證慨預測較可信，2022年至今，港交所股價走勢同恆生指數息息相關，佢又指，若港股成交唔活躍就無法帶動恆指，並估計港交所股價未來兩月好難上返460元。 聶Sir續指，大摩慨報告係偏向長線慨分析，但未知幾時可以到價，因為當中可能有唔少變數。他提醒，如果想做長線部署，港交所係一個唔錯慨選擇，建議等股價落到370元水平再考慮入手，即較現水平再跌逾6%。 |
|
| 聶振邦 |
2026-09-09T16:34 |
內地商用服務機械人公司優地機器人(03231)今日(9日)首掛，成功扭轉近期新股市場劣勢，收市炒高逾1.5倍。至於智能機械人組件供應商梅卡曼德機器人(09615)，上市至今仍然「潛水」，集團今年第1季營業額大升逾70%，股東都好有份量，當中包括美團(03690)，梅卡曼德機器人幾時可以上返水面，集團當日招股定價101.7元？ 高歌證券金融首席分析師聶振邦指，暫時黎睇，梅卡曼德機器人走勢逐步向好，公司屬於產業鏈中游業務，生意較穩定，上市初期，由於撞正港股冇乜方向，加上散戶持股佔比較大，隨著散戶沽貨沽得七七八八，沽壓已明顯細左，股價會有回升空間，不過，都要睇埋機械人板塊熱度keep唔keep到，如果炒作熱度降溫，上到90元水平會有阻力。 |
|
| 聶振邦 |
2026-09-04T17:21 |
金斯瑞生物科技(01548)計劃將蓬勃生物(Probio Technology Limited)分拆係聯交所主板獨立上市，股價今日(4日)顯著受壓，一度急瀉近14%，低見31.26元。早前，集團指可以用人工智能(AI)加快藥物研發，刺激股價走強，不過，分拆消息一出，即時震散股價，點睇價出現呢個情況？ 高歌證券金融首席分析師聶振邦指，金斯瑞股價今日急挫明顯同分拆消息有關，當出現未必係傳統利好消息時，可以令股價進一步爆升，而以往股價弱勢時，任何利好消息都可以稍為提振股價。 聶Sir又話，金斯瑞今輪升浪由不足11元起步，升到現水平，一些潛在利好因素都反映左係股價上。此外，而分拆後業務結構會唔會有變，都係沽貨誘因，亦係今日大跌慨主因。佢又提醒，未來一兩個交易日要繼續留意金斯瑞走勢，如果消息面持續發酵，有可能跌穿30元，到時先可以確立今輪升浪結束。 |
|
| 聶振邦 |
2026-08-31T17:48 |
四大國有銀行上周五(28日)已派左成績表，即中國銀行(03988)、工商銀行(01398)、建設銀行(00939)及農業銀行(01288)，4隻股份今日(31日)強勢，升1%至5%，睇返6月底至7月期間，成個內銀板塊都比較弱勢，主要係市場擔心淨息差前景，同埋盈利空間受壓，股價今日終於借業績翻身，依家股息率約4厘至5厘，收息角度睇算唔算吸引？ 高歌證券金融首席分析師聶振邦指，內銀股整個8月持續向上，主要係7月至8月再出現板塊輪動，7月有較多資金流入消費股，但去到8月大市冇乜方向，可能因為內銀股息率較吸引，資金就流入，其後人仔升值，內銀股又可以受惠，因此，8月中或之前已入手慨投資者，就算息率低，仍有唔錯慨利潤空間，反而依家先入手，吸引力就有限。 |
|
| 聶振邦 |
2026-08-24T17:01 |
建滔積層板(01888)今日(24日)中午出左業績，中期業績符合盈喜水平，上半年收入按年增長55%，純利更按年飆2倍，毛利率升至約30%，派息大增86%，不過，股價午後一度跌7.8%，低見34.36元，係咪呢份業績比唔到市場驚喜？ 高歌證券金融首席分析師聶振邦指，派息增加，利潤率提升，基本上覆銅板、玻璃纖維布仍有加價空間，相信市場會憧憬毛利率持續上升，後續可以留意公司收入會唔會進一步提升，如果可以，估計下半年業績都會亮麗。 聶Sir又話，不論係半導體或半導體原材料行業，都面對產能跟唔上需求慨情況，母企建滔集團(00148)兩度減持，都對建滔積層板股價造成壓力。另一方面，市場擔心建滔積層板股價上返50元後，公司又會「抽水」，令投資者有戒心，繼而影響股價表現，相信後市要有新業務發展利好消息出現，先有機會帶動股價重拾升勢。 |
|
| 聶振邦 |
2026-08-21T16:10 |
本港首次公開招股(IPO)市場係8月比較冷清，暫時只得拿森科技(02261)1隻新股上左市，昨日(20日)就有1隻新股君正股份(03223)截飛，將會係下周二(25日)首掛，即係8月暫時只有2隻新股上左市及即將掛牌，9月會唔會熱鬧返？ 高歌證券金融首席分析師聶振邦指，假設希音(Shein)下周一(24日)真係開始招股，好大機會9月初上市，所以8月肯定只得2隻新股上市，睇返去年8月其實都係偏靜，當時只有5隻新股上市，反而去年9月有10隻新股掛牌，所以預期下個9月會略為改善。 聶Sir又話，始終恆生指數係6月跌得較多，令潛在上市公司卻步，因為擔心對集資有影響，所以會睇得保守些，佢估計，9月會有5至8隻新股上市。 |
|
| 聶振邦 |
2026-08-17T16:26 |
吉利汽車(00175)今日(17日)中午出左業績，上半年少賺約2%，但核心利潤按年增長46%，匯兌損失都少左好多，由第1季近5億人仔，減少至第2季約1.76億人仔，由於海外市場佔比提升，推高左毛利率，整體毛利率1.6個百分點至17.9%，原材料成本上升、市場競爭持續激烈，仲要比唔少折扣，但毛利率仍有得升，表現係咪已經好好？ 高歌證券金融首席分析師聶振邦指，吉利毛利率由2025年16.6%升至現水平，隨著海外業務不斷擴展，雖然毛利率可以有更大上升空間，但仍考慮同內地車企慨競爭問題。 但聶Sir認為，暫時內地車企對外國車企，尤其美國及歐洲，車價仍有頗大競爭力，因此，就算毛利率增速較慢，未來一兩年都仲有上升空間，以吉利黎講可能去到19%先會出現飽和慨情況。 |
|
| 聶振邦 |
2026-08-10T17:05 |
據《彭博》數據顯示，現時佔申洲國際(02313)收入比例最高係Nike，佔29.78%，其次係迅銷(06288)旗下Uniqlo，佔24.26%。集團幾個大客中，最近一個季度僅Uniqlo業績理想，其他大客都因為唔同原因導致盈利受壓，最壞情況係咪已經見左？ 高歌證券金融首席分析師聶振邦指，現時Nike、Uniqlo、Adidas佔申洲收入比例最大，3個品牌合共佔逾70%，其中，Uniqlo佔申洲總收入約25%，由於公司業績向好，唔排除未來定單會相對較多。 聶Sir又話，Nike、Adidas上半年慨業績比較差，一般黎講，下半年經濟增速較快時，業績改善空間亦會較大，所以初步黎睇，估計申洲下半年業績應該有改善。 |
|
| 聶振邦 |
2026-08-07T16:11 |
公開招股超額認購逾2500倍，智能駕駛運動控制技術開發商拿森科技(02261)今日(7日)上市，股價一度炒高90%，公司以招股價下限10.42元定價，係咪擔心市況唔好，會影響首掛表現？ 高歌證券金融首席分析師聶振邦指，拿森科技行業定位係汽車零件，係市況不穩下，就未必好吸引，不過，公司以下限定價聽落會較吸引，但其實招股價上限都只係11.48元，差距都唔大。 聶Sir又話，今日明顯見到股價出現長上影線，反映沽壓都大，相信現價唔係買貨慨好時機，投資者可以股價落返15元水平，又覺得公司中長線前景吸引再考慮入手。 |
|
| 聶振邦 |
2026-08-03T16:23 |
信義光能(00968)日前出左業績，雖然半年少賺近95%，中期息又大減逾94%，但股價今日(3日)高開逾1.8%後，升幅一度擴大至逾13%，高見2.495元，睇返公司之前慨盈警，預期係最劣情況下可能要蝕5000萬人仔，但最終賺3900萬人仔，係咪因為咁所以股價今日大升？ 高歌證券金融首席分析師聶振邦指，信光股價升係可以理解，之前發左盈警股價都冇出現大調整，盈警指出，最壞情況下會「見紅」，但最後有錢賺，對市場黎講算係一個驚喜。 聶Sir又話，信光股價之前調整得比較深，去年11月由4.1元「腰斬」至1.9元，之後先開始回升，依家市場對集團前景有憧憬，所以股價今日(3日)升得高些。 |
|
| 聶振邦 |
2026-07-27T16:11 |
攜程集團(09961)今年1月因涉及壟斷行為，被市監總局立案調查，經調查後，認定攜程存在2項壟斷行為，被行政處罰52億人仔，不過，攜程股價今日(27日)不跌反升，一度大升近8%，高見369元，其後升幅收窄，臨近尾市仍升近4%，點解收咁大張罰單，股價仲可以大升？ 高歌證券金融首席分析師聶振邦指，因為市監總局早係1月中已公布調查攜程，當時股價裂口大跌，自高位613元「腰斬」，其後呢輪跌勢持續約半年，直至臨近7月，股價先開始自低位300元水平慢慢回升，由於消息都持續左幾月，相信市場都消化曬相關負面消息，因此，聶Sir認為，處罰事件慨影響已反映曬。 |
|
| 聶振邦 |
2026-07-24T16:22 |
英偉達(Nvidia)供應商之一，內地光模組龍頭中際旭創(03308)公開招股，將會係下周一(27日)截飛，集團今次引入33名基石投資者，包括淡馬錫(Temasek)、高瓴(Hillhouse Group)、阿里巴巴(09988)、騰訊控股(00700)、周大福企業等，以A股現價計，同H股招股價上限有約20%折讓，未入飛慨散戶，值唔值得趕「尾班車」，但入場費約5萬元，絕對唔平？點預測首掛表現？ 高歌證券金融首席分析師聶振邦指，睇返比例，基投認購慨股份佔差唔多一半，反映基投對中際旭創中長線發展有信心。集團自2024年第2季至今年第1季，每季收入都有增長，對中長線投資者黎講，中際旭創基本面有一定吸引力，不過，就未必岩短線投資者。 聶Sir估計，中際旭創首掛有50%機會炒高，如果真係要抽，建議用現金抽，因為一手要逾5萬元，如果用孖展，由於利息開支大，損手風險會相對高。 |
|
| 聶振邦 |
2026-07-13T16:27 |
台積電今午(13日)出左最新營運數據，6月營業收入逾4426億新台幣，按年增長逾67%，創單月新高。此外，集團不斷傳黎加價消息，3納米等先進製程報價上調外，加價潮亦擴至成熟製程，預期明年初生效，係加價潮之下，台積電係咪可以維持高毛利率？若產品組合有利，加上產能利用率提升，毛利率係咪可以再升？ 高歌證券金融首席分析師聶振邦表示，現時台積電毛利率屬於高水平，由去年第4季開始已經係逾60%徘徊，十分強勢，加上收入持續增長，有助整體利潤提升，前景相對樂觀。 聶Sir又指，現時市場重點關注落係一旦加價成為常態，之後收入增速會唔會因而放慢，到時台積電就要取捨，所以暫時市場稍微觀望，要睇埋第3季業績，先可以評估高毛利率對台積電係正面幫助，還是負面影響。 |
|
| 聶振邦 |
2026-07-10T17:07 |
永康控股(02523)周三(8日)截飛後，突然宣布煞停上市，相信港股市況好大機會係其中一個因素。不過，港股近日市況其實唔差，恆生指數已自低位反彈左唔少，新股市場方面，今個星期有15隻股份上市，雖然有5隻首日「潛水」，但亦有7隻高收，點睇新股市場依家慨情況？ 高歌證券金融首席分析師聶振邦指，近期上市新股表現，明顯同5月、6月有好多係倍倍聲咁升，近期接連出現「潛水」情況，而且唔止1、2隻，例如普源精電(00537)首掛低收37%，同仁堂醫養(02667)首日亦大插39%。佢又話，由於要趕上財政年度慨半年結，所以好多新股都係6月底時進行IPO，導致單日有超過5隻新股齊齊上市慨情況，可能導致市場消化唔到。 聶Sir又話，估計新股表現短期仍會比較參差，暫時過左上市聆訊慨股份只有3隻，所以IPO市場黎緊應該會靜些。 |
|
| 聶振邦 |
2026-07-06T16:31 |
領展房產基金(00823)委任連成德(Neil Andrew Slater)為行政總裁，佢依家係歐洲一家房地產投資平台Redevco做CEO，之前曾經係Aberdeen投資公司日本業務CEO，睇返佢份CV，領展係佢領導下，未來似乎有機會更國際化，到底係咪一件好事？ 高歌證券金融首席分析師聶振邦指，睇返領展內地及本港收入佔比，仍然比海外市場更大，如果要有一個更強勁慨增長引擎，絕對要開始考慮布局海外業務，佢估計，好大機會瞄準英國。 領展終於搵到新CEO，理論上係一個利好消息，但股價今日(6日)就唔係咁好，僅早段短暫升過，之後愈跌愈多，尾市一度跌1.8%，低見37.2元，係咪同CEO人工有關，連成德基本年薪900萬元。 聶Sir就話，領股價跌未必同新CEO人工有關，其實今日好多本地地產股都要跌，包括信和置業(00083)，其實領展股價已經升左幾日，相信今日跌只係投資者獲利離場，唔關新CEO相關消息事。 |
|
| 聶振邦 |
2026-06-26T16:23 |
本港新股市場今日(26日)特別熱鬧，因為再出現「6股齊發」慨盛況，6隻今日首掛新股中，表現最靚仔係智慧停車空間營運商科拓股份(02272)，股價曾狂飆近2倍，表現最差係印尼金礦公司Merdeka Gold(06228)，股價曾輕微「潛水」，呢6隻新股上市後，邊隻最值得睇好？如果IPO抽中係咪可以楂耐些？ 高歌證券金融首席分析師聶振邦指，已經「潛水」那兩隻，行業吸引性較低，風險相對較大，餘下4隻之中，有兩隻已經係A股上市，佢認為，科拓股份冇係A股上市之餘，行業亦有稀缺性，有貨可以睇多1個星期，不過，因為股價已炒高近2倍，如果下周企唔穩120元或以上水平，建議投資者離場。 聶Sir補充，其實現階段黎講，呢6隻新股吸引力唔算好大，依家想追入慨投資者最好忍一忍手。 |
|
| 聶振邦 |
2026-06-22T16:33 |
金礦股今日(22日)普遍都要跌，金價就繼續冇乜力，係每盎司4100美元水平上落，金礦股走勢同金價都幾吻合，近日都幾多大行下調金價預測，其中，高盛最新降至4900美元，瑞銀及摩根大通就睇5000美元樓上，金價仲有幾大調整空間？會唔會慢慢上返大行慨目標價？ 高歌證券金融首席分析師聶振邦指，美國上次加息係基於疫情因素，所以類比性較低，現時係考慮美伊戰事引發慨高通脹，暫時估計美國聯儲局有機會加1至2次息，但唔係一個新加息周期來臨。 聶Sir又話，金價短期會持續波動，如果美伊和談可以持續，市場憧憬戰事今年第3季就會結束，對金價會有較大支持，佢估計，金價短期會係4000美元至4400美元波動，如投資者想買金礦股，可以睇實金價走勢，係現水平或再跌多少少，再買入金礦股會較安全。 |
|
| 聶振邦 |
2026-06-15T18:17 |
半新股解禁潮殺到，當中包括去年12月30日上市慨迅策科技(03319)，IPO基石投資者涉及慨約640萬股，將會係月底「解禁」，股價今日收市升2.5%，收報151.1元，同上市價48元比較，累升逾2倍，似乎對基投黎講都有沽貨誘因？ 高歌證券金融首席分析師聶振邦指，迅策股價依家係150元水平，相對於高位382.8元，已回調左超過一半，基投慨股份會搶閘係6月29日解禁，而上市前投資者及大股東禁售期係1年，所以要到12月先可以沽貨。 佢又指，對基投黎講，股價升至現水平，已經有唔少利潤，加上迅策冇盈利基礎，預期基投解禁後沽壓會比較明顯，關鍵位可以睇100元，如果沽壓冇咁大，止蝕位可以擺130元。 聶Sir又提醒，今年以來，市場焦點都落係人工智能(AI)及半導體股，尤其係AI股，雖然冇盈利基礎，但市場暫時仍睇好AI，而AI孖寶智譜(02513)及MiniMax(00100)都會排隊解禁，一旦市場看法開始逆轉，可能會影響股價表現，其中，智譜因為發布新大模型，股價今日勁升逾30%，若股價係解禁前升勢持續，要小心會成為之後沽貨誘因之一。 |
|
| 聶振邦 |
2026-06-12T16:29 |
創新藥B仔股華健未來(06132)今日(12日)開始收飛，下周三(17日)截飛，集團計劃發行1360萬股H股，股數相對較少，上市後股價會唔會較硬淨？公司旗下核心新藥HJ787，係內地唯一處於臨床開發慨外用選擇性TYK2抑制劑，係咪都要留意內地限制出口或美國制裁等風險？ 高歌證券金融首席分析師聶振邦指，華健未來基石投資者約45%，意味市面只得逾700萬股，街貨少會令股價沽壓顯著減少，所以有一定吸引力，不過，參考天辰生物(01779)上市時，首日升幅唔及暗盤，認為依家玩「B仔股」應以短線操作為主。 聶Sir又話，現時新藥仍處於臨床階段，所以擔心制裁係言之尚早，想入飛抽慨投資者不妨留意下周三截飛前慨孖展認購反應，若超額認購1800倍或以上，可以考慮借孖展認購。佢又估計，華健未來首掛有望升，不過，若暗盤表現好，或升幅較上市價高50%以上，對謹慎慨投資者黎講，止賺會較安全。 |
|
| 聶振邦 |
2026-06-08T16:19 |
機械人股優必選(09880)旗下消費級人形機械人品牌UWORLD推出超仿生人形機械人，首發預訂量6日已累計突破2110台。受消息刺激，股價今日(8日)平開後，一度高見121.3元，升近10%，優必選股價及新產品係咪值得憧憬？ 高歌證券金融首席分析師聶振邦認為，優必選過往都係生產工業類機械人，今次民用慨高仿真度機械人外形，加上能夠提供情感上陪伴，都令市場有更大期望。不過，佢指出，由於呢款機械人續航時間短，亦未有配套做二次開發，意味更新可能去到某個程序就會暫停，因此，會令吸引力打折扣。 股價方面，聶Sir指出，依家半導體股有回軟跡象，加上集團自身利好消息帶動，有望帶動埋港股其他機械人股，因此，佢認為優必選短期可睇高一線，保守慨投資者可以留意110元水平，較進慨投資者可以考慮係120元做部署。 |
|
| 聶振邦 |
2026-06-03T15:58 |
長飛光纖光纜(06869)獲摩根士丹利大升目標價近4倍，由47元調高至230元，但仍低過現價，不過，股價今日(3日)都有反應，一度勁升逾17%，高見273元。值得留意係，大摩話，光纖主要產品價格大升75%至80%，但點解同公司去年業績唔太匹配？ 高歌證券金融首席分析師聶振邦指，英偉達(Nvidia)創辦人黃仁勳昨日(2日)指，美國晶片企業Marvell可以成為下一家萬億企業，令市場意識到全球對光通訊慨需求熾熱，所以今日成個板塊都受資金追捧，加上公司唔只有需求強勁慨中國市場，海外市場佔比都高達42.7%，係人工智能(AI)基建需求咁大，加上光纖價格仍呈上升趨勢，長飛光纖明顯受惠。 聶Sir又話，其實長飛光纖今年第1季業績已有改善，純利大升逾2倍，若呢個強勁增長勢頭持續，今年上半年盈利有機會超越去年，大摩基於首季強勁慨爆發力，又認為增速應該可以持續，所以大幅修正集團估值。 |
|
| 聶振邦 |
2026-05-29T15:54 |
港產「藥妝王」龍豐集團(02290)昨日(28日)開始招股，將會係下周二(6月2日)截飛，預期下周五(6月5日)首日掛牌，市傳孖展暫時已錄得超額認購，值得留意係，同期有另外兩隻股招股，龍豐有冇機會成為「黑馬」？ 高歌證券金融首席分析師聶振邦指，依家唔少IPO都係中資、生物及人工智能(AI)相關股，反觀龍豐呢些零售股就較少，所以有行業稀缺性。另外，龍豐孖展暫時已超購逾10倍，而投資者一般會係截飛前先考慮「最後衝刺」，因此，佢認為孖展最終仍有機會超購百倍。 聶Sir續指，有別於莎莎國際(00178)，龍豐除左有護膚、美妝等業務外，仲有藥品及寵物食品等，產品類別好多元化，可以吸引唔同消費群。雖然集團面對激烈競爭，但現時盈利表現唔錯，今年首8個月盈利增長逾80%，業績都反映集團開始步入收成期。 |
|
| 聶振邦 |
2026-05-20T13:12 |
截至早上11時止，過去1小時內《彭博》用戶搜尋量最多港股，依次為中芯國際(00981)、比亞迪股份(01211)、紫金礦業(02899)、貝殼(02423)及紫金黃金國際 (02259)。 貝殼昨日(19日)出左首季業績，經調淨利潤按年增長15.7%，但淨收入按年跌19%，毛利率創7個季度新高，放榜後，高盛及花旗上調貝殼全年盈利預測。貝殼股價4月之後走勢強勁，今日(20日)一度高見49元，大升7.5%，但之後有獲利壓力，更開出1支「大陰燭」，係咪反映市場仍對內房冇信心，趁股價彈就沽貨？ 高歌證券金融首席分析師聶振邦指，的確有見彈就沽慨可能，貝殼出完業績後，可能市場預期暫時未必再有利好股價慨消息，所以趁高散貨。 聶Sir又話，貝殼上季收入要跌，若未來收入繼續有放緩壓力，最終會反映係盈利增長上。佢續指，睇返日前出爐慨「三頭馬車」數據，其中，零售遠低過市場預期，增速係2022年以黎最慢，所以投資者未來宜對消費股審慎些。 |
|
| 聶振邦 |
2026-05-18T16:23 |
兆易創新(03986)作為一個半新股，正面臨禁售期屆滿的問題，今年1月13日上市，即於7月13日時，基石投資者的半年限售股禁售期將屆滿，股價今早(18日)一度升近15%，高見624.5元，對比162元的招股價，當中有不少水位，臨近期限前，投資者應該如何部署? 高歌證券金融首席分析師聶振邦認為，目前不能排除股價於禁售期屆滿前後會有短線波動。他提到，A股本來就屢創新高，目前水平高企，因此解禁後應會為基石投資者帶來豐厚獲利且存在一定的承壓風險。 聶Sir續指，兆易創新股價或會在跌破550元後迎來新一波跌浪，因此投資者應密切留意未來2至3個星期的變動。佢亦提醒，有貨的投資者要做好風險管理，即跌穿550元就要減持，相反未有持貨的則不應入手。 |
|
| 聶振邦 |
2026-05-15T16:03 |
被視為「商業航天第一股」慨拓璞數控(07688)，概念係港股之中算係獨特，值得留意係，馬斯克(Elon Musk)旗下SpaceX IPO全球矚目，上市進程又行前一步，集團最快下周發布招股書，若同樣係航天概念股慨SpaceX IPO進展順利，會點利好拓璞數控？ 高歌證券金融首席分析師聶振邦認為，都要關注SpaceX招股情況，主要留意集資額係咪史上最大，呢個相對上會有話題性。佢又話，對港股投資者黎講，商業航天概念其實比較陌生，所以拓璞數控招股暫時超額認2500倍，雖然唔算少，但對比起個別超購逾萬倍新股，拓璞數控就會比下去。 聶Sir估計，暫時唔排除拓璞數控首掛倍升慨可能性，但仍要視乎當日港股氣氛，佢又話，暫時都睇好拓璞數控及SpaceX首掛表現，上升機率都超過80%。 |
|
| 聶振邦 |
2026-05-11T17:20 |
英矽智能(03696)上周五(8日)宣布同Google Cloud合作，旗下生成式人工智能(AI)平台Pharma.AI，將利用Google運算基礎措施，以及Gemini模型加快藥物研發流程，係咪利好股價慨正面消息？ 高歌證券金融首席分析師聶振邦表示，英矽智能早前發布智能實驗室系統Lab Claw，呢些智能體需要強大慨AI大模型配合先可以發揮效用，目前睇黎同Gemini搭配慨機會好高，因此，今次合作一定可以加快研發新藥慨效益，係科技層面上有助拉開同競爭對手慨差距。 不過，佢強調，集團臨床實驗及藥物發現成果消息，對股價慨刺激作用，會比AI合作消息更大，後續單靠AI消息未必可以對股價帶黎強大支持。 聶Sir又話，長遠而言，管線開發對公司前景屬於利好，但需時發展，目前，英矽智能需要係收益與前景之間取得平衡，相信今、明兩年會較多同其他藥廠係代工方面探索合作，以提升收入，藥物發現就作為帶動力。 投資部署方面，佢建議留意未來一兩周，股價可唔可以上到70元及企穩，如果可以，就可以上望75元，中長線而言，建議過左主要股東及基石投資者禁售期，等股價回落至60元樓下再做部署。 |
|
| 聶振邦 |
2026-05-04T16:27 |
內地近期又頻頻出招谷樓市，提高住房公積金貸款額度成主流政策，而市場一向關注貸款市場報價利率(LPR)，依家邊個數據最有參考價值？此外，摩根大通指，中國海外發展(00688)係一線城市有好多項目，銷售增長穩健，係咪可以考慮部署？ 高歌證券金融首席分析師聶振邦指，呢幾個月人民銀行都冇調整過LPR，所以參考性冇咁大，依家5年或以上公積金貸款利率2.6厘，屬偏低水平，加上環球通脹受美伊戰爭影響，因此，有內地消費者認為買樓可以保值，帶動近期房產業務向好。 聶Sir補充，對內房而言，若公司持有外債，人仔升值對還債有幫助，亦為人行提供更大減息空間，市場會憧憬按揭利率未來會進一步下調以刺激樓市。 佢又話，具備國企背景慨中海外，對審慎慨投資者有吸引力，股價2月初至今已經累積唔少升幅，估計短期會係15元有阻力，有貨慨投資者如果股價一星期內，收市都突破唔到15元，可以考慮止賺，未入場慨可以考慮係13元至13.2元水平買貨，息率高些之餘，防守力亦更強。 |
|
| 聶振邦 |
2026-04-27T16:41 |
北京車展上周五(24日)開幕，車股今日(27日)普遍造好，不過，相比以往以發布新車為主，今年反而多左介紹技術，例如電池、自動駕駛，甚至連供應鏈相關展商，包括華為、寧德時代(03750)、地平線機器人(09660)等，都拿到更顯眼慨位置，今屆車展轉以技術做賣點，係咪意味今年相關股份比車企更值得留意？ 高歌證券金融首席分析師聶振邦指，車展始終係希望為市場帶黎新憧憬，所以今次更加針對技術層面，如果睇返近期股價走勢，技術相關股的確更值得留意，由2月開始，車股表現都比較參差，相對黎講，機械人相關股如地平線機器人，股價更強勢，晶片股都有利好慨情況，其中，寧德時代表現比較亮麗，推出慨新電池充電速度比起比亞迪股份(01211)慨刀片電池更快，的確會成為亮點。 聶Sir又認為，未來1至2個月內，技術層面相關股，繼續有資金追入慨機會仍會較大。 |
|
| 聶振邦 |
2026-04-17T16:25 |
智能產原始設計製造商(ODM)代理龍頭華勤技術(03296)，周三(15日)至下周一(20日)招股，股份預期下周四(23日)上市，集團覆蓋慨產品包括智能手機、平板、智能穿戴、Notebook等，對比其他都招緊股慨新股，華勤技術有冇吸引力？ 高歌證券金融首席分析師聶振邦指，如果睇返呢個行業，華勤勝在夠穩定，因為智能產品方面持續有增長，對消費者黎講，電子產品始終有一個持續換機需求。此外，華勤係行業龍頭，競爭力就相對較強。 聶Sir又話，華勤依家逐步轉移至人工智能(AI)相關領域發展，第2季將會有超節點相關項目，同英偉達(Nvidia)晶片慨框架有關聯性，因此，集團未來業務方向未必再聚焦係代工方面，反而會同AI有更大關聯性。 |
|
| 聶振邦 |
2026-04-13T16:20 |
九毛九(09922)上周五(10日)出左季度數據，其中，旗下自營店太二翻檯率每日3.5次，人均消費保持74元人仔，表現較慫火鍋及九毛九西北菜有改善。九毛九股價今日(13日)下晝逆市彈高，一度升3.7%，高見1.94元，九毛九上季慨好表現，可唔可以延續落去? 高歌證券金融首席分析師聶振邦認為，九毛九第1及第2季業績造好，主要受新年及黃金周帶動，加上內地通脹數據逐步上升，反映居民消費意欲增加，飲食業都可以受惠。佢又提及，公司去年整體收入主要由收入佔比逾70%慨太二帶動，因此，市場對集團整體表現都睇得比較樂觀。 聶Sir又話，太二主打酸菜魚，而唔係火鍋店呢類客人逗留時間較長慨餐廳，因此，日均翻檯率有逾3次，同店銷售壓力細過慫火鍋及九毛九西北菜，佢估計，集團未來會力谷太二，以提升業務收入及盈利增長。 |
|
| 聶振邦 |
2026-03-30T16:18 |
TCL電子(01070)去年多賺42%，全純利24.95億元，符合盈喜預期，績後股價強勢，今日(30日)更一度大升13.8%，高見12.54元，過去1年，環球貿易關稅動盪，今次份業績又是否說明TCL電子並無受影響？ 高歌證券金融首席分析師聶振邦指，今次TCL電子交到亮眼業績，下半年業績明顯較上半年強，令市場驚喜，一方面海外銷售上，令利潤率增長擺脫內地「內捲」壓力，另一方面高利潤產品銷情好，65吋電視、Mini LED電視帶動銷售，LCD面板做獨市，議價能力強，即使關稅、其他成本，都能容易轉嫁至客戶身上。 聶Sir又話，今日績後有潛在利好消息帶動，股價方面，TCL電子2月下旬曾上過高位13.3元水平左右，現價做短炒雖仍有上升空間，但吸引力低，考慮TCL電子為消費性電子產品，市盈率(PE)有12倍，行業PE則超過20倍，股價雖升但估值都有一定吸引力，進取投資者可現價買入博反彈，若相對謹慎，則可等回調至11.2元至11.8元再入手，會較安全。 |
|
| 聶振邦 |
2026-03-27T16:19 |
從事人工智能(AI)計算機視覺解決方案應用慨極視角(06636)已經係周三(25日)中午截左飛，股份計劃下周一(30日)首掛，消息指，公開發售部分有逾15萬人入飛抽，超額認購4569倍，係今年超購倍數第5多新股。極視角2024年開始已經有賺，但去年首3個月又蝕返錢，點睇呢隻新股？ 高歌證券金融首席分析師聶振邦表示，極視角收入增長的確唔錯，招股書入面亦有2025年全年業績數據作參考，按數據計算，2025年全年收入錄雙位數增長，是繼2023年、2024年後，集團連續第3年收入錄得增長。不過，集團似乎需要考慮成本控制問題，因為去年行政費及研發開支增長逾80%，但收入僅增長約10%，導致業績「見紅」。 聶Sir又話，收入增長要等到第4季先有爆發力，上市後慨情況會影響市場估值，所以暫時黎講做短線操作會較吸引，做中長線投資部署要再睇定些。 |
|
| 聶振邦 |
2026-03-24T14:34 |
截至早上11時止，1小時內《彭博》搜尋量最多港股，依次為老鋪黃金(06181)、恆基地產(00012)、友邦保險(01299)、康師博控股(00322)及泡泡瑪特(09992)。 老鋪黃金昨日(23日)派左一份好靚仔慨成績表，去年純利及收入都按年勁升逾2倍，公司又預告今季收入最多175億人仔，刺激今日(24日)股價一度大升逾10%，但預測市盈率(PE)只得約13倍，後市點睇？ 高歌證券金融首席分析師聶振邦認為，老鋪黃金呢份業績有一定吸引力，但股價由今年1月高位近900元大幅回落，依家岩岩上返600元水平，反映投資者入市態度審慎，有機會係因為金價不確定性，同埋內地及本港零售市道仍然疲弱，由於利好消息已反映得七七八八，所以上望目標宜保守些，暫定650元水平，相信要等港股整體氣氛好轉，先至有望展開更強勁慨升浪。 聶Sir又指，若金價回落，要留意集團呢段時間會唔會進取些入貨，帶動毛利率向上。佢續指，雖然老鋪黃金去年業績唔錯，但去年上半年增速比下半年快，所以要留意今年上半年增長有放緩風險。 |
|
| 聶振邦 |
2026-03-17T13:07 |
截至早上11時止，過去1小時內《彭博》用戶搜尋量最多港股，依次為泡泡瑪特(09992)、比亞迪股份(01211)、美團(03690)、吉利汽車(00175)、小米集團(01810)。 泡泡瑪特係美國加州開設地區總部，負責北美及拉美業務發展，集團依家係美國已有逾60家分店，海外業務佔比持續提升，係咪有利推高毛利率？ 高歌證券金融首席分析師聶振邦指，海外佔比提升會對毛利率有正面影響，去年上半年，泡泡瑪特海外業務佔比已逾40%，若北美市場持續發展，海外佔比將進一步提升，海外利潤率有望高於內地，帶動盈利向好。 此外，Labubu以外慨新角色產品，去年售出4億件，尤其是星星人、Skullpanda及Crybaby，相信有利業績表現，而股價近日亦有回升跡象。 |
|
| 聶振邦 |
2026-03-13T16:19 |
依家有3隻新股招緊股，分別係廣合科技(01989)、國民技術(02701)以及飛速創新(03355)，其中，廣合科技係內地最大及全球第3大算力服務器印刷電路板PCB製造商，客戶包括戴爾(Dell)、惠普(HP)、聯想集團(00992)等。初步黎睇，國民技術及飛速創新有冇賣點？投資者又可唔可以當廣合科技係人工智能(AI)算力基建股？ 高歌證券金融首席分析師聶振邦表示，國民技術及飛速創新同廣合相比，會有比下去慨情況。雖然國民技術已經係A股上市，但暫時仲蝕緊錢，國民技術同廣合都屬於晶片相關產業，如果要二揀一，廣合似乎可以睇高一線。 至於飛速創新雖然有盈利基礎，但由於集團同汽車產業相關，依家汽車股唔係市場焦點，所以孖展認購反應相對冷淡。聶Sir認為，可以暫時唔理國民技術及飛速創新。 佢又話，廣合同唔少知名企業有合作，加上PCB用途相對廣泛，例如好多電子產品都要用PCB，業務前景可以睇高一線。 |
|
| 聶振邦 |
2026-02-27T16:16 |
有4隻計劃3月掛牌慨新股，今日(27日)齊齊開始招股，分別係兆威機電(02692)、優樂賽共享(02649)、埃斯頓(02715)及美格智能(03268)，其中，兆威及埃斯頓都有依家最煞食慨機械人概念，而本身亦已經係A股上市，其中，埃斯頓招股價介乎15.36元至17元，入場費3434元，公司以生產工業機械人為主，人形機械人仍處於探索階段，公司去年扭虧為盈，雖然今年春晚後，機械人概念股炒作冷卻，但市場對呢個概念仍有憧憬，點睇埃斯頓前景？ 高歌證券金融首席分析師聶振邦指，睇返埃斯頓業績，公司基本面冇太大問題，但要留意，公司去年成功扭虧，但勢頭可唔可以延續至今年。 聶Sir又話，雖然機械人概念有吸金力，但市場競爭激烈，加上埃斯頓慨人形機械人仍處於起步階段，所以都要睇長線，但對上市初期表現唔會有好大影響，估計AH價差可以吸引到散戶認購，但未必可以一上市就收復全部價差，但有信心股價可以造好，估計首掛可以炒上22元至24元，若以招股價上限價計，即最多炒高約40%。 |
|
| 聶振邦 |
2026-02-23T16:27 |
美國總統特朗普(Donald Trump)對等關稅(Reciprocal Tariff)被美國最高法院裁定違憲，港股慨出口股今日(23日)隨大市反彈，不過，家電股就個別發展，升得最靚慨海爾智家(06690)都只係升左3%，一度高見27.84元，雖然美的集團(00300)偏軟，但單計2月已累升約9%。 高歌證券金融首席分析師聶振邦指，關稅消息其實對家電股業績影響唔大，早係去年4月關稅消息發酵時，唔少家電商已經將生產線部署係美國本土，或其他低關稅地區，所以呢類股份美國法院慨裁決冇咁敏感。 聶Sir補充，家電股升可能受本身慨利好消息帶動，例如海爾智家近日公布同冷凍裝置相關慨專利消息，刺激股價造好，冇消息慨股份今日表現就相對差些。 佢續指，美的去年已開始發展機械人，加上春晚慨機械人效應，都可以吸引更多潛在資金關注，而市場對機械人發展前景樂觀，都會幫到股價。 |
|
| 聶振邦 |
2026-02-13T16:48 |
本身係A股上市慨美格智能，周三(11日)已通過左港交所(00388)上市聆訊，短期內可以開始招股。美格係深圳上市慨無線通訊模組及解決方案提供商，以高算力模組為核心，支持複雜算法及端側人工智能(AI)應用。近期高算力智能模組處於產業鏈中游，但似乎從事下游業務慨公司較受投資者歡迎，點睇呢隻新股？ 高歌證券金融首席分析師聶振邦指，下游業務對消費者及投資者黎講，應用及接觸面都比較強，例如稀宇科技(MINIMAX)(00100)及智譜(02513)。佢又指，如果產業鏈偏向中游的確會有少少影響，但近期瀾起科技(06809)都升得唔錯，若美格智能上市時，AH股有明顯價差就會有吸引力。 聶Sir續指，依家美格智能市銷率(PS)偏低，市帳率(PB)就合理，如果可以保持盈利增速，中長線投資價值會較大，如果睇短線，AH股價差會係美格智能係香港上市後慨上升關鍵。 |
|
| 聶振邦 |
2026-02-09T16:47 |
內地春節檔期就快到，多部賀歲片已經開始預售，據報預售票房已衝破2000萬人仔，業界估計，今年春節票房最高可以去到80億人仔，會唔會睇得太樂觀？如果真係咁好景，貓眼娛樂(01896)及大麥娛樂(01060)係咪可以炒返轉？ 高歌證券金融首席分析師聶振邦表示，雖然市場普遍視內地春節長假期係利好因素，但亦要留意消費者可能趁長假外遊，反而分薄左電影市場慨客源，所以不宜對春節電影票房睇得太樂觀。 聶Sir又話，睇返電影內容，雖然今年賀歲檔期題材多元化，但唔係每一部都有好好慨票房，以《飛馳人生3》為例，作為系列慨續作，本身有一定口碑及票房打底，加上刺激、喜劇慨定位，貼合春節喜慶慨氣氛。不過，《驚蟄無聲》屬於國安題材，氣氛比較沉重，係節慶期間受眾層面可能相對狹窄。 至於《標人》就改編自漫畫，雖然可以吸納特定慨Fans，但漫畫改編慨電影，評價一向都係好壞參半，票房會存在一定變數。 聶Sir又話，雖然係股價操作層面睇，春節假期概念股往往可以帶動整體投資氣氛，大麥娛樂及貓眼娛樂可能短期有一定炒作空間，但未必有好強上升動力。佢提醒，呢類板塊風險較高，原因係唔知電影最終叫座力係點，加上製作成本高昂，就算票房好好，要回本仍然有變數。 |
|
| 聶振邦 |
2026-02-02T16:40 |
仲有約兩星期就到馬年，內地各大平台慨「紅包大戰」已經開打，百度集團(09888)早前已宣布推出5億人仔紅包計劃，騰訊控股(00700)旗下人工智能(AI)平台「元寶」更準備10億人仔現金紅包，阿里巴巴(09988)慨「千問App」更豪掟30億人仔，大搞「新春請客計劃」，係AI熱潮下，今年慨特色係「AI+社交」，到底邊隻股份會成為「紅包大戰」大贏家？ 高歌證券金融首席分析師聶振邦認為，單靠以往都有慨搶紅包，對帶動整體消費作用唔大，但加入AI元素可以令市民有新鮮感，更可以間接推廣AI應用，例如用戶可以直接係千問App買戲飛，變相增加左消費入口，相信新元素對提升平台今個月慨活躍用戶(MAU)有絕對幫助。 聶Sir又話，3大巨頭之中，大眾對阿里及百度慨生成式人工智能(Gen AI)較熟悉，而騰訊慨AI應用暫時同電腦編程關聯較多，係今次活動入面可能稍為落後，由於阿里擁有商城同閃購等電商業務配合，係帶動消費同業務推動上更有優勢，所以較睇好阿里，後市可以留意股價上半年可唔可以挑戰190至200元水平。 |
|
| 聶振邦 |
2026-01-30T15:58 |
PCB專用生產設備解決方案服務商大族數控(03200)昨日(29日)開始招股，下周二(2月3日)截飛，預期下周五(2月6日)首日掛牌，入場費約9676元，籌最多逾48億元，招股價上限95.8元，較A股上市價159元人仔有好大折讓，估計上市初期會有幾多水位？值唔值博？ 高歌證券金融首席分析師聶振邦指，大族數控AH股有約45%折讓，會有一定吸引力，集團今次發售約5000萬股，基石投資者佔一半，通常國際投資者有25%或以上，都算係反應唔錯，但街貨有2500萬股，可能會限制左上市初期慨升幅。 聶Sir又指，大族數控慨基石投資者有一定叫座力，包括國際大型投資公司及基金公司，例如新加坡政府投資公司GIC、施羅德旗下公司等都有參與，為中長線投資帶黎保證。 |
|
| 聶振邦 |
2026-01-26T16:24 |
內地能量飲品製造商，新股東鵬飲料(09980)今日(26日)開始招股，近年市場對能量飲品安全存疑，導致集團呢瓣收入減少，雖然毛利率保持40%以上，但點解仍低過同類慨農夫山泉(09633)及華潤飲料(02460)，到底抽唔抽得過？ 高歌證券金融首席分析師聶振邦認為，由於東鵬主要銷售能量飲料，原材料成本慨控制空間有限，所以毛利率較低，加上內地能量飲料普及性低，影響銷售慨議價能力，可能要等公司推出更貼合大眾化口味慨果汁產品，同埋要2至3年時間去轉型，先可以提升到毛利。 聶Sir又話，東鵬A股跌左落黎，加上睇埋市盈率(PE)、市帳率(PB)及市銷率(PS)，都會令公司估值較吸引。佢提醒，即使東鵬有供求炒作，但由於已上左A股，估計會限制左H股升幅，所以用現金抽會好過借孖展。 |
|
| 聶振邦 |
2026-01-19T17:11 |
國統局今日(19日)公布重磅經濟數據，其中上月社會消費品零售總額，一如預期所料升幅放緩，僅升0.9%。摩根大通最新報告指，內地消費者越來越傾向體驗式消費，月入1萬元人民幣的年輕人更願意花錢於健身、身心健康、旅遊等項目，是否代表可以繼續看好新消費股、旅遊相關股？ 高歌證券金融首席分析師聶振邦指，現時行業相對吸引高消費客群，年輕人的可支配收入都較多，若產品、服務能賦予情緒價值，相信消費趨勢會持續，未來繼續看好新消費股、旅遊出行股。 而健身相關消費股當中，李寧(02331)上星期公布第4季營運數據，零售流水比第3季有改善，但券商指今年來李寧銷售還未見回升，後市應如何部署？ 聶Sir話，李寧產品以多功能及高科技配合為主，卻未能大幅提升利潤率，現以服裝時尚概念做切入點，有望幫助提高產品單價，加上短線有冬奧這項體育盛事，令股價仲有上升空間，後續若有利好消息可上望26元，甚至更高水平。 |
|